Siamsinna leh Vakiangbu

By ~ Vz Vualnam Khenchia lah zalmang himai hen la Kikhanglou taleh chih lunggulh, Khenchia lah a tak himai hen la Kikhanglou ngei kei leh chih lunggulh, Bang a chia hiai hinkhua a haksat chia Khanloh chih om thei lou ahia? Bang a chia zalmang a noplaitak a A tak hong himai thei lou a hia? Nuam taleh, haksa taleh, Eimah hinkhua chiat kihin ding, Pha taleh, se taleh, Eimah zalmang chiat kimat ding, Michih khanloh nawnlouhna a i ihmut masiah! Hinkhua leh zalmang a bei masiah! © Siamsinna leh Vakiangbu

By ~ Vz Vualnam Khristmas kuan Phalbi suukpilai a Nitak khat Kongzing a ka vaakleh Biakinn kilawmtak a zep ka mu. Ze tuamtuam a vaak, Suktai, toutai, Ze tuamtuam a gial, Dungkham, vaikham, Kelkong tan a kichingtak a zep. 'Kilawmna e,' chikawm a Peel dia ka kisakleh, 'Khawldih! Khawldih!' Hon chi somsom ka za a, Dinkhawl a ka nungheileh Kuamah ka mu kei. Kal ka suannawnleh, 'Kei ka hi, Biakinn ka hi,' A hon chinawn a, Ka ettouhleh Singlamteh a hon vaan a, 'Kongzing tawpna ah Meithai genthei khat a khosa. A thuum ka za, Zaan tampi a thuumna. Bangmah dang a ngen kei, Sum leh pai, neih leh lam, Hiai thil khat kia a ngen- A tanu a ding puanlum gina! A thumna za ding hiai veng ah Kuamah dang a om kei. Kei kia'n ka za a, Ka bil a dimta! Hehpih in hiai ka kizepnate suut inla, Tua naupang va tuamlum dih ve,' A hon chi hi. 'Ah, kei mikhual lengla maimai, Hiai thil ah kigolh kei leng. Bilngong vek sam kei un teh, Mitdel vek sam kei un teh, Koikil hiam

By ~ Vz Vualnam Vangla ka gam' tanchin hon hilh dih ve ua, Ka lungsim in a taihsat ngeilouh Zokuam! Hiai ka gam tanchin ka kiang n'on tuhte uh Hon hih lungkham nuamte' zuauthubawl lel hi'n teh maw! Zogam-Zolei chidam-ludam in na omna maw! Lamka! Na dam maw! Na luunlai maw! Na neulai in na gam dung leh vai ah Napu-napate uh toh ka na kizui ua Khuate saat in mualsuangte ka na phut uh. Gal ka ai ua, sa ka ai ua, tonsong ka phut ua, Kiim leh paam hon neh ding a om kei! Ka utna uh khua in ka nei ua, Ka deihna uh lou in ka bawl ua, Khokiim-khopaam ah siahtung-siahphei ka kai ua, Mimsiah-tangsiah in ka niang ua, Tuunpi bupha bang in ka na luun uh. Lamka! Lamka! Na luunlai maw! Na pute' kiang a ka na om gige bang in Tu in nang ka hon ompih thei nawnta kei! Ka hon ngai a, ka hon lunggulh a, Tahal in kei' di'n na kiang ah mun a om nawnta kei! Khangthak duhgawlte a hong khangkhia ua, Ka inn ka lou a hon suksiatsak ua, Gam gamlapi ah a hon hawlmang uh! Teen na'

By ~ Vz Vualnam Itna piang thei a Itna si thei hiam? Itna khang thei a Itna kiam thei hiam? Itna paak thei a Itna vul thei hiam? Tuni'n itpen i chi a, Zingchia'n huatpen i chi a! Bang in itna piangsak a Bang in itna sisak hiam? Bang in itna khangsak a Bang in itna kiamsak hiam? Bang in itna paaksak a Bang in itna vulsak hiam? Itna'n ngaidam gige zou lou hia? Itna'n maisak gige zou lou hia? Itna'n dohzou gige lou hia? Itna kiniamkhiat gige zou lou hia? Itna lungduai gige zou lou hia? Banghang a kiamsak pahpah? Banghang a vulsak pahpah? Banghang a sisak pahpah? A kiam thei lou, A vul thei lou, A si thei lou, Om mah ve'n chia! Ngaihdamna, maisakna, Dohzohna, ngakzohna, Lungduaina, niamkhiatna, Tuate' gaal ah om! A galkai zoute'n ngah! A galkai zou loute a zaw A kiam ding mah, A vul ding mah, A si ding mah hi. I piak zahzah ngah hi lel hang! © Siamsinna leh Vakiangbu

By ~ Vz Vualnam Tem bang deih toh tui bang ton ding Chi a nunnuam ka heilai in Ziin in lung in a thiik hiam aw Kal simthu khau bang hong nok e Simthu khau bang nok pallah in Deihbel taan in luankhi nuul ve'ng Nunkhua nuam a sawl bang hei ding Ziin in pal bang a nang hiam aw Ka suihlung doh-ai a khim hiam Simthupha'n ka luangzou lou e Ka suihlung sok bang mawkzou e Ngaih in lentual ei kheta e Ka suihlung mawl, ka tongsia loh Tang in sul ah leh nuam ing e Ka suihlung mawl tomkal sung in An bang itpen meldeih heisa Melmak lanu tangzouta e Luankhi'n mal bang koulahta e Lanu' vaang lou bang tulpih in Lamkhuang bang ka khuulzaw ding hiam Singdang siang a laitual leng in Paal dang ang ah ka zaalzaw diam Simlei singta zatamlai ah Sinlai luun dang a paal ding hiam A mi singta zatamte aw Tem bang deihpen tong sangte aw Kal simthu mei bang a ziing zong Tongnem in sum bang kibia un Tem bang deihpen puan bang taan zaw A nalua e khamkha hi e Khamkha'n s

By ~ Vz Vualnam Vual ngaih taan a sunkim lungzuan Kei ka sakduang vul ningniang e Lengvan sumtual nuam galdon ve'ng Lungzuan lan bang ngak na'ng hi e Simlei ah zaw vualngaih vang in Sunchin-zanchin luankhi nul ve'ng Sinlai ling bang dou nalua e Kei ka nunna vangsel sa'ng e Lengvan tualnuam gual gen minthang Nunnop zaila'n a luan chi uh Tua mun a limnga bang bualte'n Simlei mu bang ngai lou chi uh Kei zong tua ah mim bang bual leng Ka lungngaih dai bang theng ding aw Ka luankhi a hulta ding a Nau bang ka nui samta ding hi Simlei a ngaihsial a vul sa'n Tua gam nunnuam manoh nuam ve'ng Ka tuun aw e ka tuun dit aw Tua gam sihsial bang zuan nuam ve'ng Na von khau bang na chiah leng aw Luankhi toh mal bang n'on kou diam Ka nuachiang ah ham bang vai in Lungngaih luankhi na nuul ding hiam Ka tuun aw e ka tuun dit aw Luankhi toh mal bang hon kou ke'n Kei ka lungzuan a nalua e Khamkha'n ka veiloh ding bang e Ni khat khamkha a k&#

By ~ Vz Vualnam Khenchia'n Zomi n'on pibawl pih ua, Khenchia'n Paite n'on pibawl pih ua, Zomi leh Paite kal a luainau bang vei, Ka lung uh am gawp khin veh e, Chikchia koi a det ding ka set ua? Zomi na phattuampih ding chiang un Zomi mah hi hang na chi ua, Paite na phattuampih ding chiang un Paite ah dingkip ni na chi ua, Alang-alang a awn mipite'n Khat mahmah ka phattuampih kei uh. Ka zahlakpih zaw ua, ka mualphoupih zaw uh. Zomi it hi kei uteh! Paite it hi kei uteh! Mipi it hi kei uteh! Noumau ki-it hilim uteh! Zomi chisuk in Paite chitou le leng Angmasialna toh i seplai teng Bangmah tok kolok kei ni! Sepsa teng seplouh suah zawkha ni! Vaite kichi leng leng itna toh sem leng I deih ngahlah kei ni! Na hamphatna ding chiat uh khual a Alang-alang a n'on awnpih sung un Innvengte'n va-uk in hon lensan uh! Nou lah va-ak a le hon lenpihzou nai lou! A gam it loupi in gam na uk ua, A mipi it loupi mipi' sik in na ding ua, Khangthu thei loupi in khangthu n

By ~ Vz Vualnam Eimah simthu leh zaila pak bang tawi a Hanlung chiam zaitha ka suuk laitak in aw Vangkholai a suihlungmawl gual nihthumte'n 'Na Zolai toh gil al bang mang aw,' chi e Kei ka Zolai toh al bang mang kei ning e Vangkholai suihlungmawl gual nihthumte aw Lumsuang bang tou simsing bang gil ding hi'ng e Nang na suihlung toh al bang mang ding hi chia Zolai-zoham chi'n tongsia loh kei ni e Gia bang zuun nalgua bang hahzaw ve ni e I hah peihlouh leh tongsia loh kei ni e Zata' zaitha neemna hi kei ve ni e Simthu-zaila khau bang hual siausiau ni e Ma bang a pan omleh gia bang zom ni e Khangsawn momnou' khankhua i khualna hi e Mawng bang pha a mualsing bang san na'ng hi e Kum hong dang khang hong dang ding a aw sengual Khangsawn momnoute'n khau bang suut ding hi e Tongsia lohte' sakmin kilou lou ding a Gia bang zuunte' sakmin kilou ding hi e © Siamsinna leh Vakiangbu

By ~ Vz Vualnam Ka ma ah bang ni in hon ngak hiam? Nnahoih ka sepkhak tam loute hang in Vualzawlna ni in a hon ngak diam? Gilou ka hihkhak khenkhatte hang in Hamsiatna ni in hon ngak diam? I nnahoih sepkhiatte Leitung in chiamteh takpi hiam? I gilou sepkhiatte Leitung in theiden takpi hiam? A'ihkaleh huaite tengteng Van in chiamteh hizaw hiam? Sihnung chiang a dia siit hiam? Leitung in bang chiamteh a Van in bang theiden hiam thei ke'ng! Himahleh leitung mihingte'n bel Nnahoih sepkhiatte mangngilh in Hoihlou sepkhakte chiamteh! Hoih tampi' tung a kipahman sang in Hoihlou khat tung a thukhenna gikzaw! Lei leh vante' kidaihlah selouh in leng Mihingte' thukhenna leng hunlaw khin! © Siamsinna leh Vakiangbu

By ~ Vz Vualnam Itna' sang a manphazaw Hiai leitung ah bang a om dia! Kopkhat itna a muh ua kipaak Huai sang a kilawmzaw bang a om dia! Tuni a na itpen' khut len a Damsung tonkhawm dia na kisakleh, Na hampha! Na vangpha! Kiptak in len inla, khah ngei ke'n! Denchia'n hinkho huihpite nung mahleh, Hinkho kialte ke mahleh, Hinkho ziinte liing mahleh, Hinkho meivom kaai mahleh, Huai hun chiang in leng khah ke'nla, Lenkip semsem in! Tuate thuakkhawm dia Kalsuankhawm na kei uhiam! Tuate pal galkai dia Kichiam na kei uhiam! Zingkal khat na thoh a, Itna koi a omta hiam na chihleh, Itna a mang hikei e, Itna a mit hikei e, Nang a gammang hizaw teh! Nang a mit hizaw teh! Hinkho leivuite'n na lungtang tuamkhin a, Khosakna meikhu in na mit siipsak a, Lampi muthei nawn lou hi teh! Na lungtang nulsiang inla, Na mit phiatsiang inla, Na lungtang tawng ah hong kiik le teh, A mit ngei lou, a dai ngei lou, A dau ngei lou, a tul ngei lou, Itna na munawn ding hi! Na kipahna buki

By ~ Vz Vualnam Khristmas! Khristmas! Hunpi! Hunnuam! Puan thak! Van thak! Ah! Neulai! Noplai! Tu in zaw ka lianta a, Vanzuakna mun ah ka vaak nawnta kei. Tutung zaw ka lungsung ah ka vaak dia, Ka neih ngeilouh thilte ka zong zaw ding. Ka pumpi in van thak a kuul nawn kei a, Ka lungtang in van thak a kuul zawta hi- Itna, migitna, ngaihdamna, sianthouna, A dang bang ka zonglai dia? Kumthak! Kumthak! Gan kai! Gan ching! Sial hiam! Bawng hiam! Ah! Neulai! Noplai! Tutung zaw ka lungsung ah Goh ding kai in ka kuan dia, Gitlouhna, khaatna, huaihamna, A vek sipsip in ka gou dia, A buuk namsia uh ka hahsiang ding! Tutung kumthak a n'on haih leh, Lawm aw lamdang sa ke'n! Ka lungtang ka hahsiang a, Puan thak in ka tuam a ahi! © Siamsinna leh Vakiangbu

By ~ Vz Vualnam Zomi-Zota tui bang gawm na'ng sunni Chikleh hong suak ding hiam ka chih kaal in Gawmsate zong gi bang khenta zel e Malou bang tut ni om ding hiam chi'ng e Gawmlouh laizom zong za in tamlai e Gawmsate'n khen simthu leel kei ni e Gawmsa teng samgi bang khenta le'ng Gawmlouhte' lung i kuai zou diam chi'ng e Zolei paal ding hai bang ngakna sawtta A kimchiang ah sulhei zel kei ni e Ma bang patsa paamtul tamta hi e A thak ma bang pan nawn kei ni e Innvai-louvai hi lou Zolei simthu Innvai-louvai hawm in hawm kei ni e Phungvai-behvai hi lou Zolei simthu Phungvai-behvai hawm in hawm kei ni e A gam lian e a mi za in tam e Nang bang kaan ding lunglian koi a hei hiam Simthu tam hi e zaila tam hi e Sa bang zeek ding lungchiim koi a om hiam Nichin vonsen lamgial bang kia hi e Zolei huai ding na ngak zel ve ni e Seisang zatamte lah suihlung hual moh Seinoute hai bang na ngak zel ni e © Siamsinna leh Vakiangbu

By ~ Vz Vualnam Thei bang senlim tongsan duangkuai Zolei, Kil bang khang ton i paal ton ding sa'ng e, Na paal zou lou bang ka tul ding sa'ng e. Kei lah paallai sawl bang vul ding hi ta'ng, Nang lah na paal ding lenkum samlai e, Simlei khankhua ton lou ding hita hiam, Ka geel in ka sinlai hon lun e, Meldeih Zolei chik chia'n na paal ding hiam! Paal dang pom ning ka chi zong a ngaih aw, Na vangngaih sinlai ah theumoh hi e. Heina peuh sinlai nau bang n'on luai a Sinlai a vungden tualkhiatmoh hi chia, Na vangngaih tung thelnah bang kiak law'ng e. Singta' gamlei lah sil bang paal chiat a, Ngaih nang na paalmoh bang doh-ai hiam aw! Gualte'n gamlei paal ning bang zou chiat a Paal zoh ding bei kei ka laitan dang sa'ng e! Na paallut hai bang ngak a lenkum vei, Zolei aw khapham kulsin k'ong zaal zong, Lungliap lou kil bang hong khang zel inla, Khangsawn momnou zatamte' paal loh di'n Ni khat etlawm sil bang hong paal ve aw! © Siamsinna leh V

By ~ Vz Vualnam Khen chia'n gelh ut mah lehang Bangmah hong kilaak lou. Ngaihsun, ngaihsun mah lehang Malkhat-malnih leng suak lou. Chiimna'n hon paisanta hia? Pilna'n hon noseta hia? Chiimna'n paisan hi kei e, Pilna'n nosia hi kei e, Lungsung velchet theihna dia Dongkholhsakte khiinkhia a, Nawngkaisakte heemkhia a, Lungsung thovengsak phot hi! Enchian, velchian, suichian in, Adik-atang in om hiam. Dik leh tang in om keileh Thupiang-lapiang tengteng zong Diklou-tanglou omkhaleh! Lungsung a hawm kiikeei chia'n Lungsung velchian enchian in! © Siamsinna leh Vakiangbu

By ~ Vz Vualnam Galkhua dak ve'ng mual kitawi nuamnou ah Tuunnu' gamzang phaksap ngou bang hong lang Etlawm hal in ka laidiip gial bang khing Tuunnu Zolei singta'n henkol bulh e Tuunnu Zolei singta' henkol khai aw Zata'n sal bang suah ning chi'n hanlung chiam Hizong tuanglam lam bang i haih hiam aw Tuahlouh henkol khai in sawl bang vul hang Tuunnu' Zolei lah singta'n henkol bulh A mi zata'n lah tuahlouh henkol khai Tuunnu Zolei di'n salsuah na'ng sunni Lenkawl ah hong suak nawn lou ding bang e Eimah kibaat tuahlouh henkol i khai Kuata'n hong suut ding hiam maimit suan ve'ng Suut ding om lou a mi zatamlai ah Nau bang nui ding ni bang elte hi e Tuahlouh henkol toh kumveita ni e Sal bang suah ding tuunnu ngilhta ni e Zolei paal ding zalmang chita ni e Ei aw phulouh vangngai hita ni e 'Nidanglai a zaw,' chichita ni e Pupa khanlut sialsial maita ni e Khangsawn siamsil suutte'n lah henkol khai Siamsil

By ~ Vz Vualnam Tu a Zolei mui bang peite An bang itte chi kei ning e Tu a Zolei khimzingsakte Lou bang khualte chi kei ning e Tuunnu' Zolei lah khat hi e An bang itte khat ding hi e Zuapa gamzaang lah khat hi e Lou bang khualte khat ding hi e Tu a Zolei mui bang peite Sesum ngaite chita ning e Tu a Zolei khimzingsakte Zingvai hawm nuam chita ning e Tuunnu' Zolei lelliang sa'ng e Tui bang gawm ding von nihthumte'n Sa bang sem seh bang hawm hi e Laamkhuang bang khou ding om lou e Simthu naang bang hong kiheek dia Zolei aw bang i chi ding hiam Lenkum puan bang hong thak ding a Bang sunni hong suak ding a hiam Tawisawn momnou' nunnopna di'n Simthu naang bang kiheek hen aw Khangsawnta lungsiik louhna di'n Lenkawl sunni hong suak hen aw © Siamsinna leh Vakiangbu

By ~ Vz Vualnam Tangthu khat a gen uh Ke'n za ing, khanglui thu. Khua khat om, luun mahmah, Tua ah om innkuan khat, Tapa nih naungeklai, Nu leh pa zong haatlai, Himahleh nunnopna Mun khat ah tengden lou, Zingsang khat phalvaak in Galte'n khua hong sim uh, A pa that, naupang hawi, A nu uh sal in kai. Galte pahtaang leel ah A tate ngai in vul, A kolbuh lel in zoi, A tate kua'n don ding, Chih geel in sunchin kap. A tate kua'n keem ding, Chih geel in zanchin mau. Himahleh hiai thil khat Hehnepna a neihsun A tate melmawllai, A thuakna theihpih lou, Omna peuh uah lungtai. Hun leh ni liam zungzung, Naupangte khang hulhul, Nu leh pa ngaihdan thei, Kandan thei, zondan thei, Im theihlouh hilh khong ngai. Tangvalnoute thangpai, Sisan lum, sisan sou, Ka pa' phu ka laak ma, Ka nu' kol ka suut ma, Tolh lou ding chi'n kichiam, Lum leh tei toh kisa, Lungtuak in kuankhia uh. Mual leh guam galkai uh, Zaitha tawl poisa lou, A nu un zaitha guan, Kilen in masu

By ~ Vz Vualnam Na pianlai in ka om a, Kei leng lam-etna a dim naupang ka na hi a, Na awsuak masapen ka bilkha ah a thaamden. Puan in a hon tuam ua, Naungek deihthohhuaitak na hi. Nang a lam-etna nga Nakiim-nakiang a hon um khiukheute Kum tampi a maigum uh hong nel in Nang a hon muh un nuihmai a hon puu uh. 'Hiai maw i tha hon dawn ding,' chi in Akhat-akhat in a hon nou uh. Huaite lak a ke'n leng Ka honna deihthohdan tel! Ka khamuanna na hong hihdan tel! Theihlouh kaal in na hong khanglian a, Valnou' duhgawlna na hon thei a, Himahleh na kihei ding lam-en in Hawmthohtak in a hon keem uh. Sawt lou sung in na hong piching a Mite'n a hon lam-et laitak un, Mite'n a hon muan laitak un, Nu leh pa tung ah na hong hel maimah! Nang hon khotuahte na zuausan maimah! Ka kipahna uh a thengta! Ka lam-etna uh a huutta! Ka nuihmai uh a mualta! Nang ziak in veng leh paam lak ah Ka maizum khinta uh! Nang ziak in melmate lak ah Ka zahlaak khinta uh! Nang ziak a khasia hiaizah

By ~ Vz Vualnam Zogam it a ka kah chia'n Zogam koi ah chi'n hon nuihsan uh! Zolei ngai a ka mau chia'n Zolei koi ah chi'n hon tawng uh! Nang Zogam a taa in Zogam na theih ke'h, Kua'n thei ding amah ngei ngut a? Nang Zolei a bual in Zolei na ngaih ke'h, Kua'n ngai ding amah ngei ngut a? Nei lou kichi a deih nadan thei lou! Om lou chi a zon nadan thei lou! Mi a pi leh pute uh Gam deih a a kah ziak ua A tute uh a gam ua teng! Mi a khang masate uh Gam ngai a a mau ziak ua A suante uh nuamsa a leng! Nang mihai in chikmah chia'n Zogam-Zolei mu ngei kei ni teh! A hang bel Zogam-Zolei Ka lungsung ah paalluun! © Siamsinna leh Vakiangbu

By ~ Vz Vualnam Ke'n zaw saptuam heutute bang le Hehpihhuai sa lingling mai ve'ng e! Tapa genhak enkol a Alang-alang a mite' mai su a Zum leh zah khual lou a Diang daidaite mah Bangsak gige tel hang a! Tapa thumang i deihtawk vo oi, Ba ei kinana chiitchiat sese? Ba ei kitawngtawng chiitchiat sese? Naupang sia bang a, Phelh ngai gige tel! Numei sia bang a, Lep ngai gige tel! Buaipih lianzaw hiaizah lai a Eimah kibuaipih den tel! Na lampi uh haksa, Kua sawl hi lou noumau' teel, Na nnasep uh tawlhuai, Phutluih hi lou noumau kipia, A tawp dong chitak un! A tawp dong kuhkal un! Angmasialna tawpsan, Thuneih utna nawlkhin, Sumdeihtaakna kidaam, Su leh sa pan kiheem, Na peih nawn kei uleh Buaina bawl se lou kitawp, Na peih lai teng uh Phunlou-paulou na nna uh sem! Hon zathuap semsem nu'ng! Himahleh hiai thei un- Noute hang in kholai ah Numei naupang khamuang in kimawl! Noute hang in inntawng ah Numei naupang lau in liing! Noute hang in nam ding diing! Noute hang in na

By ~ Vz Vualnam Phung vai hawm gik mahmah Liangkou khauh kisamlua Phung vai geel vai lianlua Lunglian puu kisamlua Hawmkhelh baih, geelkhelh baih Khat theihna buching lou Phung vai geel, phung vai hawm Lung tampi ngakkhawm kuul Thazoh ta'ng chihman a Ei deihdan talkaih lou Ngamthoh ta'ng chihman a Lung dangte nawlkhin lou Geelkhial le'ng phung in thuak Hawmkhial le'ng phung suploh Lamsa teng lamlouh suak Lepsa teng leplouh suak Tamzaw' deih, tamzaw' lung Ngaikhe ngam, paipih ngam Makai khauh, makai neem Phung in kuul, phung in sam Khangnoute hanchiam ni Ei nunung, phung masa! © Siamsinna leh Vakiangbu

By ~ Vz Vualnam Paite! Paite! chi'n Hong house tapeuh kei un! Zomi ka angtanluat man uh hi! Zogam ka itluat man uh hi! Zomi ka hawmthohluat man uh hi! Lun in pha hen ka chihluat man uh hi! Ka khasiatna uh, Ka muisiatna uh, Hong ngaihkhiatsak un, Hong limsak-donsak un, Thupha-kampha in hong neem un, Thuhoih-lahoih toh hong kum un. A lung-am gawp hi ung, A lungmawk gawp hi ung, A hamhaih gawp hi ung, Lamdik-lamtang hong lak un, Tua lampi ah hong pi un, Itna toh hong huai un, Lainatna toh hong keem un, Tua hileh ki-it seem ding, Tua hileh kinaih seem ding, Paite, Tedim, Chin a omlouhna Tua gamnuam zuan a kalsuan Zomite khut kilen dialdial ni e! © Siamsinna leh Vakiangbu

By ~ Vz Vualnam Zolei singta' henkol bulh suut dia Lungtuak laizom ma bang pat chiil in Lungtup khuamual suahma chiam hang e Sulhei simthu lellouh chiam hang e Vaimang' sesum in a khim hiam aw Teitui doh-ai in a khim hiam aw Khangsawng phung vai hawm nihthumte'n aw Samtui bang pialta ning chi hi e Simthu luanlai mawng bang phat kuan a Bang di'n samtui bang i pial ding hiam Mazap khohma bang taam lai buang a Bang di'n samgi bang i khen ding hiam Tuahlouhna peuh an bang kumkhawm le'ng A lai ah simthu lam bang saat le'ng Lumsun zolei miza galdon le'ng A lai ah simthu khat in luang le'ng Chiim bang chiim ni e laizomte aw Lehluan simthu leel kei ve ni e Ni bang elte' nau bang nuihna di'n Laizom dougal kisiah kei ni e Laizom dougal kisiahta le'ng Dou tuunnu al bang dah lou ding a Ei i tuun in khamkha'n vei ding a Tawisawnte'n lou bang lel ding hi e Tawisawn momnou lou bang khual vang in Tuahlouh simthu hee

By ~ Vz Vualnam Thuum ni na chi ua, Pathian in hon dawng lou hia? Lemna lampi hon kawkmuh lou hia? Pathian nangawn in a hon dawn ke'h Khawl mai un! Tawp mai un! Gam leh nam it na chi ua, Hiai maw itna na lahna uh? Hon khen kei unla, Kihuatna hon hilh kei un. Angmasialna hon sinsak kei unla, Lal utna hon guan kei un. Khotang siangthou ka deih uh, Khotang khamuang ka lunggulh uh, Ki-it leh kilainat ka ut uh, Khantouhna ka poimoh uh, Hiaite non piak theih kei ding uleh Gam ka it chinawn kei un! Nam ka khual chi nawn kei un! A pangkhawm dingte Na kidou ding uleh, Thuneihna ka it chizaw un, Sum leh pai ka deih chizaw un! Gam na suminsia uh, Nam na suzahlak uh! © Siamsinna leh Vakiangbu

By ~ Vz Vualnam Thutam leng, la tam luang Tak leh zuau khen haksa Mipite amhai khin Himahleh puuk lou ding Zuauthu leng, nawlkhin ding Thudik leng, hilhsawn ding Khenthei dia chiimchiat ding Veng leh paam kihuai ding Khut kilen, khah lou ding Khekhat khai, suankhawm ding Ngevun silh makai tam Mipite kiveng chiat Paite it chi khempeuh Paite it hikim lou Zomi khual kichi teng Zomi khual hikim lou Hamphatna lunggulh tam Nekzonna a zang tam Khensiam lou mipite Eimah bawl a puuk ding Kituahna it loute Makai dia pom lou ding Angmasial a gamtang Nohkhe ding, nawlkhin ding Kibalna hon tunte Mun leh mual awn lou ding Kihuatna chi tuhte Khanna tui buak lou ding Ei pil le'ng, ei chiim le'ng Kua'n hon khemzou lou ding Ei hai le'ng, ei mawl le'ng Mi'n hon khemzou den ding I maban eimah a I tunung ei khut ah Zomite hanlung chiam khangtou diam! © Siamsinna leh Vakiangbu

By ~ Vz Vualnam Khuakhual tuh a nu toh Sinzawl khua ah a khosa uhi. A pa a sihna a sawtta. Tuivai lui a ngabeng lai gamtang khialkha a tuikia a si ahi. A papite leh a paneute Lamka a a peemna uh a sawt simta. Khosa theilua hikei mahle uh summai nopzawk deuhna chia Lamka zaang delh ahi uh. A nite nih Sinzawl a pasal nei a khosa in a om ua, huaite kaankuahna in a nu toh a khosa liailiai uhi. A nu nasep a kizen ziak in huchipi in haksa a sa kei uh. Sinzawl CES school ah pawl li a simlel a, a nu kiang ah, ‘Kei le pawl giat ka hih chiang in khatna in ka pang dia, hileh Daniel Scholarshipte’n ka fee di hon piaksak di ua, nang nna nakpi a na sep ngai nawn lou di,’ khawng a chi zel hi. Himahleh vaang in a phalta kei. Huai kum khristmas ma deuh in a nu a hong damlou ek a, a beisan hi. A papite a hong hoh ua, Khuakhual a pisuk ua, a ompih uhi.  A papite ahihleh Vengnuam ah a teng uhi. A innkiang uh lamkabom ah pa Gin in laibu leh naupangte’ vanzat neneuhte zuakna dawr a bawl hi. Pa Gin

By ~ Vz Vualnam Thu-le-la ka gelh zelna Gelhlouhbu ka phen nawn a, A kimkhat dim nai loute Chikchiah ka hudimzou dia? Thu-le-la koi a kipan Hongpawt-hongpiang ding a'i ua? Ngaihsut ek a suak hi kei! Kisuukluat a piang hi kei! Ama' ut hun a hong suak, Pha a sak hun a hong piang, Kinoh kei le'ng, ngakzou le'ng, Awl in hong dim mai na'n teh! Hinkhua! Zat khit nai louhte Bangchi zat a hoih ahia? Hinkhua! Hin khit nai louhte Bangchi hin a pha ahia? Awlmoh louh theih lah hi kei! Kigintheih luat lah hi kei! Ni in a ut bang suahpih, Ei kisakkholhna khual lou, En ama' kiheek zuihpih! Nisuak peuh na vaidawn le'ng, Nitum peuh mangpha khaak le'ng, Hiai khankhua zangkhin khong ni, Hiai hinkhua hingkhin khong ni, A hun bangzel a hong dim Peeksah gelhlouhbu bang in! © Siamsinna leh Vakiangbu

By ~ Vz Vualnam Na hoih louhna tengteng mu napi a Mihoih a hon sep teitei ding mi om. Na hoihna tengteng mukim napi a Mihoih lou a hon sep teitei ding om. Hoih leh hoih louh ei' mizia hi kei veh, Hon ente' lungtang a kinga hi veh. Huai chi'n utut in om tuan kei le teh, Itna' omzia i uanggen hilim veh! Itna'n hoih lou muthei lou hi tuan kei, Ngaidam ding in a itzou chih hizaw! Itna'n hoih lou pakta chihna hi kei, Kibawlhoih ding a ngakzou chih hizaw! Tua bang itna in a hon ngak a leh Kibawlhoih ding kikhelsak kei le teh! © Siamsinna leh Vakiangbu

By ~ Vz Vualnam Leitung zaw kibulhlemna ding ngen, Ei deihlam kia chihtheih gige louh. Hinkhua zaw zalenna lat ngai den, Ei thu kia a paithei gige lou. Deih nei le'ng a man om man piak ngai, Pe ngap maw, taan ngap maw, khat teel ngai. Ngaih nei le'ng lungtuak a kikholh ngai, Tuahna dia i lungtang khiatniam ngai. Eimah kia kipahna bukim lou, Kipahpih ding khatbeek om lou in. Eimah kia nunnopna guitung lou, Noppih ding khat lel beek tel lou in. Sungte khual, lawmte khual, mikhual khual, Eimah kia kikhual det hithei lou. Utlouh sem, peihlouh bawl, mite khual, Ei peih kia, ei ut kia hithei lou. Tua khawng mah hi mihing hon hisakte! Tua khawng mah hi hinkhua paisak zelte! (Thumthumta in sim in Leitungzaw kibulhlem nadingngen, Eideihlam kiachihtheih gigelouh. . . . Tuakhawngmah hi mihinghon hisakte! Tuakhawngmah hi hinkhuapai sakzelte!) © Siamsinna leh Vakiangbu

By ~ Vz Vualnam Khangthu mangngilh ahita a, tangthu leng phawk ahi nawn kei. Khanglui lai a a tak a thiltung a kigente tangthu bang in leng a kigen nawn kei. Huailam toh kisai khangthakte’n bangmah a thei nawn kei uh. Bang a thei mah ding ua, khangthak hun hita ve’n! Amau’ khang a thil om silh-le-ten, laisimna, ettheih-ngaihtheih tuamtuamte khawng a houlimta ua, khanglui thu koihdap ahita. Koihdap ahihziak a khanglui thilte bei taktakta hia?  Lamka tuh a luun mahmahta a, thil teng a kimta hi. Mihoih a tam zahzah in misia leng a tam a, thilhoih hih ding a kidaih zahzah in thilhoih lou hih ding leng a kidaih hi. Poliste’n khopi sung ah thubuai-labuai - guktak-laktak, kipimang, kithah-kimat, kisualluih, khamtheih-guihtheih leh a dangdang toh kisai sukvaiveng ding a neiden uhi.  Kikim tuh kum sawm-le-guk bang ahita. St. Paul ah pawl sawm a sim lel. Dorcas veng a teng ahi. A zahkai ziak in a pasalte’n a engbawl nuam mahmah ua, himahleh ama’n limsak nuam kei. Pasalte lak ah Gou