Siamsinna leh Vakiangbu

Written By: K Lianthansang Ka ‘nervous’ mahmah ziakin avangsung ah hoihtakin ka thunlut khakei thepthup..!. Amah le’ng ana ‘nervous’ kia hilou, a hihpatna ahihziak le’ng ahi ngei dia; ka thunkhelh pen thunlut hoih tuanlou in, alehlam hon ngatsan vengveng mai hi. Atawp in chu, ken le’ng hoihtak a enkawm in ka thunthak a, maban kalsuan thei di’n ka koih thei khongkhong hi. Mi khenkhat in….Simlei Vai peituah-tu a pantheihna dingin Rs.500/1000 khawng hawmkhe zungzung ua; ke’n bel….Pathian’ gam nnasepna a banghiam ah phattuamna aneih khakleh chi’a Rs.20 ka thoh pe’n, mi’n hon muhsak le uh, tawm thoh hon sakpih luat khak di uh laukawm pipi a ka thoh ahihziak a, thohlawm donna, bawm vangsung a le’ng thunlut khalou zozen a om a, liing zeen a thohlawm thoh hitel ka hihdan-te khawng ka lungsim ah honglut zungzung hi. Bangteng hileh, ka thilpiak pen; kei’ kiphalna bang a ka piak ahihman in, mihing-te’ mitmuh di khualna ziak lel a tampipi thoh-te’ sangin Pathian kipaak zaw peuhma

By ~ Vz Vualnam Amah lah a hamphatlam kitheikei ve’n chin, Ke’n lah hampha sa in engta mahmah ing! Zingkal in a hon mu a Na mit ngaihbaang tak gei khawng na nuhvom lai in, Na muuk limchi tak na giit hialhial lai in. Nitaklam vai na tun in a hon mu a Gimna leh tawlna in na kilawmna a liahmang theikei. Kisil khinphet na kilawmna sukthaanglouh a mu a, Na sam kawt niipniapte na hiat lai. A dang bang a hia amuh amah kia’n a thei! A hon en nilouh a, a mit a phe himhimkei. A dai dide a, kamkhat in leng a hon phatkei. Kideekzou ka sa tel e! Lum ding a na kisak lai a hon en a Khomial in na kilawmna a seel zoukei. Zingkal na thoh chiang in a hon mu masapen ding. A hamphatlam kitheilou amah a ding in A dinmun pammaih sa na tel ing e! Na pindan a na limlang omna mun ah, Kei hong om in hong teeng mai leng! ©Siamsinna Leh Vakiangbu

By ~ S. Kham Thawmte A hehpih na ziak a ni khatkhit ni khat hong pitung i Pathian kiang a thupi na leh paihtawi na tengteng pia in Pate ni chibai kon buk hi. Pa Naupang neuchik ka hih a kipan in nang sang a hatzaw leh pilzaw, sum leh pai hauzaw leh muan huaizaw mi dang om lou ding khop in kon na muang a ka maban ding saupi khual na in gim leh tawl khok salou in na hon kem a ka zuih leh ka et ton ding Pa kon neih man in ka kipak Pa na thupilua na om dan leh na gamtat dante kei a dia sinsak na ahi man in.  I Bible sung ka et chiang in na thumang ding a hih dan leh na thupi na tampi ka muthei Saptuam lutang Khris a hi bang in nang kou a ding in lutang na hi. Abraham Pathian namtelte a ding a vualzawl na a hih bang in nang kou a ding in vualzawl na na hi Pa na thupi lua. Genesis bung 15 na ka simchiang in nasuante nang khuta ki nga ka hih dan uh kathei a na thupi na ka muhbehzel Abraham in sa luang a veng lai a ah ihmu kha ziak in a suante kum zali sung sala tang in gentheitak a

By ~ Vz Vualnam Vangla meldeih lanu’ tongdamnou Sunchin-zanchin thaikawi a ka saan Tui bang neem ve’n ka lai kuai ngawn e Thaikawi a bawn ka lai hon kuaih leh A luangging lawmnou nau bang sang leng Lungzuan dai bang thengsak ngawn in chia Meldeih lanu’ tongluang ging lawmnou Zokuam chiaului bang a luang zaw maw Phaikhi’ thelseem bang a luang zaw maw Nau bang saan ding zaitha lawp ing e Alva tau teng na dondon ing e Lanu tongluang ding sialsial ing e Vangla lanu’ sakmel etlawmnou Vaimang’ siamsil a phualva bang tuang Sunchin-zanchin sang bang nou ing e Tonghou theihlouh in bawn ka lai kuai e Tak a mel mu’n tonghou ta leng aw Sang bang nouh chim ni a om diam aw I ngak sunni hong suak dih hen aw Lanu siang laitual va leng ni e Sian’ hawm a simthu a luan leh aw Ngaih ang ah lungzuan ngilh ta ni e Simthu luangmoh a i hou moh leh Tuanglam ah pheiphung khaizel ni e ©Siamsinna Leh Vakiangbu

By ~ sm-hauhsing Mite gen minthang, Zougal Memorial Shield, semi- final, en diing in ka lawmpa toh kakuan uhi. Nidang a football pek en gige leng ka hi samkei, mite'n a gen thupi luatziak uh leh ei singtangmi national player bangzah hiamte kimawl khadiing uh ahih ziak a kuan ka hi. Hiai tuh nisim, June 18,2015 nitaklam dak 1 ahi. Kou leng ka lawmpa toh public ground ka tung ua, ka gintaksang mah in mipi ana tamzaw hi. Huci in kou leng tutna mundi zongkawm in awl-awl in ka pai ua, huci in tumlam(west) pang ah ka va tu uhi. Football pek en a ka om lai un ball pek et lunglutlou hituanlou na pi in ngaihtuahna ah thil tuamtuam khong hong lut a, huaite lak ah thum(3) taklang nuam ka hi zaw, match review bawl sawm ka hi kei chih ka taklang masa hi. 1. Mipi tampi lak a ka lawmpa toh mun khat, a etnopdeuh na mun dia ka gintak uh hituanlou,mun awng ka muh man un ka va tu uhi. Ka veilampang a papi khat a tu a, ka taklam ah ka lawmpa, ka lawmpa ban ah,numei naupangkhat leh Ap

By ~ Vz Vualnam Tu a sum leh pai na hauh man in Naveng-napaam nuaisiah het ke’n. Tu a niang leh tai a na om man in Na kiim a tasamte ngeingaihlou ke’n. Tanau-laina na hauh man in Dai kikaal a mi simmoh het ke’n. Nu leh pa’ khanuai a na om man in Tagah nubei-pabeite khase sak ke’n. Tu leh ta hau a phung na phat man in Tubei-tabeite nuihzabawlna in zang ke’n. Na ngaih anglum a na lup man in Ngaih ang tang zouloute nuihsan ke’n. Tu a ngaihzawng na neih man in Midangte’ hon limsakna thaangbawl ke’n. Na it, na ngaih, na muan, na kisaktheihpih, Zankhat thu in mangthang thei a Mite’ hehpihna kuulthei hi teh! Mitphiat kaal in nangmah mangthang in It leh ngaih na nutsiatte’n Mite’ lainatna kuulthei hi uh! ©Siamsinna Leh Vakiangbu

By ~ Vz Vualnam Ka sungte’n kamtawm a hon chi ua Himahleh ka deihtaak kiang ah zaw Daih hun nei ngeilou luita bang ka hi! Ka naute’n sumchiil ahon chi ua Himahleh ka deihtaak kiang ah zaw Siit himhim neilou a pegai tuuktui bang ka hi! Innsung ah thadah a hon chi ua Himahleh ka deihtaak kiang ah zaw Tawlngak hun theilou miksi bang ka hi! Ka sungte’n lungtom a hon chi ua Himahleh ka deihtaak kiang ah zaw Loutual patneem bang mai ka hi! Itna’n a hon zelh chiang in Utlouhte utna, peihlouhte peihna, Deihlouhte deihna, limsak ngeilouhte limsakna, Lamdang pii a kheek lamdang in i om Sawt daih ngellou ding kikheekna Mi khat keleu a dia! ©Siamsinna Leh Vakiangbu

By ~ Vz Vualnam Adu! Hon Chiamnuih I Ke! Ka kiim a mite’ nuih zaizaina ding Thu-le-la gending-sakding ka neih leh Kei zaw leitung ah ka lung akim mai! Ka chiamnuih a lungtaina na muh leh Kidaamlou hial in a vaang na zou in. Leitung a ka chihtak theihna omsun Chiamnuih leh nuihzabawl kia lel ahi. Ka chiamnuih a nuihzaat na’ng na muhke’h Mihai bang in hon sep thahah laizang ke’n. Nang’ pilna tan a hong kum ka hi zaw. Kei a tan ah lah n’ong kal zoukei dia! Adu! Hon chiamnuih i ke heuhou chin! ©Siamsinna Leh Vakiangbu

By ~ Vz Vualnam Machiang khankhua khau bang hong kihual ding Laidiip loutual patneem saai bang ngawn e Lungtu deih ang ah i zaal ding hiam aw Lungtu sing’ ang ah a zaalzaw ding hiam Tem bang hon deihte’n puan bang hon taan in Zanchin lungzuan sial hui bang a mau diam Tem bang i deihte silhpuan bang taan in Ei aw gamva bang i tau zaw ding hiam Itna kop in luanglou nuai simlei ah Zu bang nialte beini omlou ding aw Tem bang deihte’n zu bang ei nial zaw maw Tem bang hon deih zu bang i nial zaw maw Tem bang deihte’ nial luanli i nuul zong Singphung a munmuang nunnop a zil leh Nunnop a zil i sinlai chiat hi e Sinlai tuangtung chi’n dah kineem ni e Tem bang deihte’ ang a mun i muan a I nialte’n lungzuan khuam bang adou leh Tung sianmang in ngaihkhua na tuah hen aw Lungzuan luanli buan bang na nuul hen aw Khankhua khau bang hong kihualching hen aw Ang a hong zaal chiat an bang it ve ni Tomkaal gua bang hin sung dah kineem in Nou chimlou sangsa bang kihuai ni e ©Siamsinna Le

By ~ Vz Vualnam Thang i van zawllai ah Si-al um bang khawlta e Mun na muanna ka anglai ah Thai aw naubang k’on pom ding a Saam bang zaal zaalmang manta in Sunkhua’n kiangnem n’on huai a Sungneek-dawntui lou bang n’on khual Silhpuan-teenniik phualgia bang zuun Baanzaal zaitha na tawlta ding hi e Singdang englou i heina Saumang nang’ zuun a phungching aw Zaitha na tawl lim ding hi e Zingchin tuangnung siahlah saumang nunnuam Anglai pai bang pom chim ma'n Sunni’n lenkawl hon peel ding a Thai aw nau bang k’on phawng ding a Ka ang ah khangthei na lou nawn ding aw ©Siamsinna Leh Vakiangbu

~ Vz Vualnam Hong sungtang in meldeih phualva Dawngkot nang a’n kihong Zehzumlou in sung hong tang in Deih a tui bang laak hi chia Manoh mimphung haam bang huai ding Phung in hai bang ngak ung Tu a meldeih nang hong suak aw Lungtup tui tung hi e Nuachiang lailung zuang nawnlou in Mimphung lai hong tang in. Melmak saumang a sungtum ding Sinlai gial bang khing ke’n Mim bang bual na’ng siangsung ah aw Heisa’n hong paal ve aw Khang huan tangnah phungpha bang aw Dawntam hong suang in aw Baanzaal ngakna, pheiphung khaina Sian in lam bang pii hen Tulvuah luang leh sunni taang in Meldeih nang hon siam hen Kiang toh kumsawt kinuamtuam di’n Sian in hon siam hen aw ©Siamsinna Leh Vakiangbu   2015  

Written by:  K Lianthansang Written leh Medical Examination leh thunei sangzaw-te apan ‘Interview’ chihte buaipih khak-a nei sese lou in ka chingsuak zenzen a; kipahhuai chih di hi’n teh..!!. Lungkimtak a kha bangzah hiam ka service nung in; kei theihna kia a kingak ahun nawnkei a, maban pai didan bangkim hon ngaihtuahsak thei di mi ka zon hong poimoh pah hi. Ka u’te panpihna toh ZUIH di kichiantak ka mupah a, huai in hon thupiak peuhmah ka ZUIH tuh, kei leh ka inkuan-te a dia damna leh punna ding le ahi bok hi. Eimi deuh chihziak leh amin mahmah leng ‘ZUI’(numei’ min) ahihziak in ginomtak in ka ZUI(hon thupiak-te) den hi. Aziak ahihleh; min a ‘Biak’ kichi telkha-te ‘Biak ngaideuh tangpi uh’ chi’a mi’n agensek uh ka zaak man in, ‘Zui’ kichi telkha-te leng ‘Zuihtak deuh’ dia ka gintaak ziaka, ana ZUIKHA leng ka hi bok. Huai ka chih hang in, min pawkhalou leng tampi om veve a; ‘Biak’ kichi teng Biak ngaivek tuanlou ua, ‘Zui’ kichi min nei teng leng zuihtaak kim tuanlou uh a

~ ZM Tonsing “...Azu-ava’n zong zuun lou e, Zuun diing neilou ka gamlei aw; Ka gamlei aw lelliang lua e” Lawm it, Vanglian Tung Thianmang huaina zal a Zolei tangbang na dam ngei lam-en ing. Kei zong Sian’ huaina’n tangbang damlel ingh. Kimaituah a simthu khaubang sutkhop lunggulh lua himahle’ng omna mun-le-mual in a zilh taklouh ziakin hiai siamsin thelnah tungtawn a thaikawi k’on khak na lungtang a paitem bang ana kuah diing in k’on ngen masa hi. Houlung kup kia mai hilou a, kimuhlouhna bangle sawt piansimta ahihman in hongzin ka lunggulh mahmah hi. Nou lah hon pemsan masa, pemsan nanung na veihgim nasan ule zakphak hinawnlou tel a! I sulnung teng uh keikia’n khattang in ka na zunzun mai hi. I chihsa mahbang in hongzin lunggulh lua himahle’ng zanlam teng ikhua-itui ngaina leh puahnuam mi a hongtam luat ziakin k’ong zin theikei. Hichibang gam-le-nam, mihinpihte it a, zunlouh tulpan kai i Zodawn vangkhua te it a, awlmoh a, tembang zuun leh puahphat ut banah mitsiik

By: Vz Vualnam Sinlai kulthuk a suan bang meng Khaammoh a kil bang khang Gamsing bang maang, simsing bang gil Litui bang ching itna Sanlouh, lohlouh, tong dawnlouh a Dai bang theu ding ngaingam la’ng e Sinlai a kumsawt kuam bang kip Sing bang puukni om diam Sinlai a kumswat sil bang paal Pa bang mualh ni om diam Sing bang puuklou, pa bang muallou Kumsawt simsing bang a gil diam Lai ah naa e sinlai hon lun Khamkha’n vei loh ngawn ing An bang itna kholhzu bang nial Koi ah laan bang i nga dia Laan bang ngak na’ng lanu’ sinlai Dawngkot kihong moh e Lanu’ sumtual ah nga ta’ng e Lanu’ sumtual ngaak hen Singta’ dia dawngkot a hon chia’n Itna sawl bang vul na mu hen Lenkum kivei khan hong dang dia Zuanna a dang sam diam Simthu zingdai bang hong theng dia Luanli a theu sam diam Zuanna danglou, luanli theulou Kumsawt ham bang i vai ding hiam ©Siamsinna Leh Vakiangbu