NI KHAT PUBLIC GROUND AH

By ~ sm-hauhsing

Mite gen minthang, Zougal Memorial Shield, semi- final, en diing in ka lawmpa toh kakuan uhi. Nidang a football pek en gige leng ka hi samkei, mite'n a gen thupi luatziak uh leh ei singtangmi national player bangzah hiamte kimawl khadiing uh ahih ziak a kuan ka hi. Hiai tuh nisim, June 18,2015 nitaklam dak 1 ahi. Kou leng ka lawmpa toh public ground ka tung ua, ka gintaksang mah in mipi ana tamzaw hi. Huci in kou leng tutna mundi zongkawm in awl-awl in ka pai ua, huci in tumlam(west) pang ah ka va tu uhi. Football pek en a ka om lai un ball pek et lunglutlou hituanlou na pi in ngaihtuahna ah thil tuamtuam khong hong lut a, huaite lak ah thum(3) taklang nuam ka hi zaw, match review bawl sawm ka hi kei chih ka taklang masa hi.

1. Mipi tampi lak a ka lawmpa toh mun khat, a etnopdeuh na mun dia ka gintak uh hituanlou,mun awng ka muh man un ka va tu uhi. Ka veilampang a papi khat a tu a, ka taklam ah ka lawmpa, ka lawmpa ban ah,numei naupangkhat leh Apa atu uhi. Hiaite bangziak a hon gen dendawn ka hiam i cihleh Amaute in i thugelh na sung ah poimohna liantak nei uh ahih ziak ahi. Kuate hiam cihdan leh kei pen hawkdak/lawptawp deuh ka diam a, football en kawm in mipi lam ah ka na dakdak a, mipi tam kasa lotel a lamdang bang kasa zozen hi. Lamka a om nazenpi a kimawl entamlou ban ah facebook khong a mipi atam dan a gen uh theilel akihih man in a tak a va cian( prove) tuh ka hi peuhmah hi. Tua hunlaitak in commentator in kimawl en mipi 35000 bang pha ahihdan hon gen zomah hi( mitamdan genna ahi). Mipi tamdan bel, leitual( ground) nasan ale tutna di kimu zoulou dek, khenkhat bang singkung leh innsawngtung khong a kal hial ngai dan ahi. Ka ngaihtuah a, lawmpa kiang ah: mipi tam natel e maw, hiai zahzah Lamka khosung a sepdi neilou ki-om hi di hi a, ka cih leh Aman: zawng( poor) namah hang a ahi di mah ei ve mo, economy niam i cihcih sepdi neilou/mulou hiai zahzah i om ziak eive ahon cih leh hi ka salongut hi. Govt.sepna kia lou bussiness lian taktak kitamzaw semlaileh sepna hongpung dia mizawngte hampha mai didan zaw hiven. Tua lah mi hausa tampite, employment generate na a lah pang tuanlou, amau a hau kekuih mawk. Mipi'n phattuampih khangellou. Mipi a sang a sim ballpek ente bangcibang a sepna piak in omthei dia? Sempeihloubel hisamlou diing uh. I society a din nikhat in minute 5 bang pia in khosung hahsiangle mipi huaizah in bangzah/ bangcia a lian ahahzou dia cihdandeuh khong ngaihtuah kawm in footballpek etna ka zomzel hi.

2. Ka veilampang a tupa'n a laizial/zanah hon teep khu luailuai. Ka lawmpa'n namsia salua( ci tuamse le). Kideekzou non mahmah lou a teep ahi diam ahih kei leh kideektuan lou a aduh hun in a phakdan a teep? Kua ma'n kitheihpih vetlou. Ka theih khat om, ka lawmpa bel kideek zoulou ahi diing, laizial teeppa kiang ah,"Pa, na laizial teep, teepgai meng maive maw, namselua ahi ." Acih zenhouh leh khatpa ngaihdan hilou adiam, "Namsia na sak ualeh mun ah va tu ve ua", hon cigeih, lawmpa toh ki-entuah in nuih mai ngai. Ka pamlamdeuh ka dakphei nawnleh khat in laizial teep khu phulphul, a nung a tu numei naupang in a naak( nose) ana hum tenton mai. Ka lungsim in tuh numei naupang in a naak nasa zaw hisam loudi hi a, naak hum kawm a kimawl etzaw gimhuai mahmah inte maw ka ci lel hi. Mipi nautang omkhawmna( public place) te ah zaw kideek hamham a, inn khong a teep khut luahluah din ahoih aka.

3. Football pekte lah siam uh, a entu mipi lah dim mai, kimawlte leh mipite hamphat na bel vuah zuklouh cauh ahi. Vuahzu himaizenleh bawibual-vokbual( khomin hilou) a kimawl bang maah di uh ban ah mipite'n vuah thuak maimah ngai di. Ni saloleh kimawlte a dia leivui khulua, a ball muh haksa hitelzel in cin. I kisaktheihpih public ground puahphat hun mahmahta, mipite lunglutna etmai a le mipi palai dia i sawlte'n a theihsiam uh hunta hilouhiam hon cisak hi. Ban ah, kum hiaitan izat district administration in le ngaihsak na cang theilou atel hiam? Ahihkeileh mimal khat leh nih khong in a hamphatpih ziak ua tutan a puahlouh a om adiam? Bangteng hileh akua mohsak sawm leh mohsa vual di hikhang. I gen ut pentakzaw public ground puahphat hileh kimawl mite leh a entute adia nuam diing cih hilel ei.

©Siamsinna Leh Vakiangbu