PATHAWI HIMAHLENG!!

~Kattie Mawite

Ka ngaihnou ka ngaisang top. Ka dinmun uh kikheng hileh ama lungsim bang ka put zoh ka gingta kei. Iitna tak toh hon iit hi in kathei a, kenleng ka it petmah. Keilam apan ngiat a hon neikei a, apasal ka hihtheihna din CONDITION bangmah hon bawlsak kei. Tulai in hihna kibang(homosexual) kingai tampi om mahleh, kei ngaihnou bel NUMEI ahi.

A hon itna thupi kasa. Ka phulouh iitna tang hi in ka kithei a, ka kipak petmah. Himahleh alangkhat ah ka kisuanglah zel. Ka kingaihsiat theihna di leh ka lungsim hon kam gegu di kampau chikmah in hon zatkhum ngeikei a, milak ah leng a hon zahpih kei. Kei ziaka nuam asaklouhni leng atam din ka gingta. Himahleh kei kianga a om chiangin maitai tak in hon houpih a, huai in a ngaihhuaina nakpi in a behlap hi.

Ka ngaihnoute bel innkuan nuamsa ahi uh. Apa Evangelist teacher pension ahi a, a upa'n leng apa sulnung zui in Evangelist teacher mah a sem hi. Amah tuh college kailai ahi a, anau pasal nihte bel high school kailai ahi uh. A ki-it siam mahmah ua, a kizahtaktuah dan uh thupi kasa. Innsunga kisel a puak rom-rom gige chih a omkei a, AW KHAUH zat ngailou in, kamdam a gen tuh zuih din a koih pah uhi.

Kei tuh kanu toh ka tanu toh innluah in ka khosa uhi. Ka tanu tuh kum 2 lel mi a hipan. Zingkal chiangin kanu mehzuak in Damkam Bazar ah atu zela, huaisung in ken ka tanu don kawm in an khawng kana huanzel hi. Kanu hongtun chiangin an ne in, kei nitha kiloh in ka kuanzel hi. Huai tuh ka niteng hunzatdan uh ahi.

Ka ngaihnoute toh vengkhat a tengkhawm kahihman un kipawttuahna a nuam petmah. Himahleh siamsinlai ahihman in nitak hunte in kamawk pawt keia, nitak annekzoh chiang in ka ki-text cheuh zel uhi. A laisim hun di chiangin lungnuam taka laisim din ka lungtang tengteng toh ka deihsakna ka khak zel a, a simzoh chiangin lungnuam leh tawldam taka ihmu dia deihsakna kikhaktuah in ka ihmu zel uhi. Zingkal chiangin zingpha kikhak in, sunhun zatnuam chi in message tungtawn mah in ka kihou zel uhi. Huai tuh ka niteng kihoudan tangpi uh ahi a, atak in bel Pathianni lou ngal in ka kimu ngeikei uhi.

Ngeina bangin Pathianni sun kikhawm tawp in ka ngaihnoute inn ah kava pawt nawn hi. A innkuan un ana omkim ua, kholum lai ahihman in a innkong ua haikung nuaia bench a koihte uah ana tu uhi. Ni hoihsat lua ahihman in keile kho-ul kai niuniau in ka tungphei hi. Ka ngaihnou in freeze apan tui vot ngiingei vala pah in kadawn din hon pia a, ka ngaihnou hon itdan te ngaihtuah kawm in tui vot ngiingei kon dawn chuh aw.....nuam himai.

Ka kalthu uh a nu-le-pa banah a sanggam tenle hon theihpih vek uhi. Sunday school zillai khawng ka kikup neuhneuh khitnung un anu'n, "Thang, kon dong phut mawk di. Bang chidana na zi in hon omlouhsan(sihsan) kha a? Bangchik kum khawng ahi di?" hon chi hi. Kenleng ka ngaihnou ka melh phei cheuh a, amahle'ng ana nui cheuh ahihman in ka tanchin genna di hangsanna tampi hon guan hi. Hichi'n ka gen panta hi.

"Kei kahihleh, singtang khua a piang leh ka pianna khua a khanglian kahi. Kapa mel ka mukha keia, alimlak ah bel ka mukha. Kei hon suun chih zenzen dan lah a omkei dia, amah suun mahmah kahihdan alimlak apan ka theithei. U leh nau khatle ka neikei a, pi leh pu tuh kaneia, himahleh hon omlouhsan tuak ta uh. Kanu toh kia ka khosa ua, khosakna summuhna haksa ahihman in school sawt kana kai zoukei. Huailai in kakhua uah Mission school a om a, huai ah pawl 5 tan lel kana sim hi. Government school tuh amin in a omsam na a, asemtute le kuamah kitheilou, banah akai dile a omkei. Government school khawng hoihtaka om a, semtute'n le hongsem le uh zaw tua sanga sang ana kitungzaw maithei di hia....hehe..... School katawp apan lou nasepna ah kanu nung kana zui a, louvat, loukhoh, mangtom, buh aat leh adangdang ka sinsiam pah hi.

Lou nasep alah khamkhop ki khoukhe zou ngeilou ahihman in kum 18 khawng kaphak apan kanu nung zui nawnlou in, gamsunga mau leh gua te saat in, Lamka lam ah kazuak zel hi. Huchiin awlawl in ka khosak uh hong nuam zawdeuh hi. Tangval piching kahihtak in ngaihzawng bang ka neisam hi. Innkuan mi nih kia pha kahihman un, leh, kanu kithuahpih di mahmah le poimoh chi in tua ka nungak ngaih nu toh kiten ding ka hon sawmta uhi. Mi hihdana kitenna thupi taka sai zoulou kahihman un, zingkal annekma in pastor in hon kitengsak hi. Ka zineih tuh keikia lou, kanu leng a kipak mahmah a, a ki-it mahmah tuak uhi. Kanu leh kazi kal ah thubuai lep d a om ngeikei. Kanu'n kazi a sisan a piang ta bang in a it a, ka zi inleng a pianna nu bang in kanu hon itpih hi. Huchi in nuamsatak in kumkhat val bang ka tengkhawm uhi.

Huchihlai in kazi' naupaai tuh apian honghunsim ta hi. Mi ki-etkol banga ka ki-etkol louh ziak uh adiama chihzaw ka theikei. Nauneih di huntak in kazi hong chau phut mawk a, doctorte' panpihna loua neizoulou di dinmun in hong om mawk! Mangbat huai tak ahi. Kakhua ua gari pai a ginat louh banah, tuukpi lai ahi zomah. Thohtanni hi in kathei. Nitaklam khat hong chau lua ahihman in Aizawl lam sumo te kakhua uh zingkal lama hong tungzel uh ahihman in huai ngak top ka sawm uhi.

Zingkal hong hi a, vangphathuai takin sumo khat, Lamka lam a mi pii dia kuan, ahawm phial khat hong taikha zenzen hi. Huai ah kanu, kapu leh ka khote uh Lamka lam zin di bangzah hiam ka tuangsuk uhi. Kazi lah lum dildel maimah ahihman in ka ngaihtuahna a paisau khop mai. Lampi tuh SIA chih inle a genpha bankei. Buannawi leh hawktui lamtawn in kapal ua, a kal laklak ah lamlian lailai ana kuak keukuau hi. Munkhat ngial ah lamlian lai lianpi ana kuak a, pelhna di omlou ahihman in ka tuanna gari uh atai teitei nalam in ka taang zomah uhi. Numei-pasal chih omlou in gari ka kisawn siak uh angai. Kazi ka ngaihtuah a, naak lai ahihman in hinglai tuh ahipeuhmah ve. Himahleh taang hetlou ahihman in sih le hin kala om ahi chih ka haihkei. Ka zi iitlua kahihman in gari a taang a, Lamka tun manlouh di kalau petmah. Huai hunchiah inchu ka pasal zoukei. Ka mit pan mittui gol taktak hong taakkhia a, kideek di chimahleng a hithei vual kei. Men kawm pipi in gari taang tuh ka thaneih tengteng in ka sawn ekh ekh mai. Atawp in ka sawnkai zou khong uhi.

Katai nawn ua, kei a pasal pen himahleng ka khasiat tha peuh asuak. 'Singtang khuate ale PHC omsam hi a, semtute hongpai a, a nna uh hongsem hile uh zaw, kazi hiaitan tunglou maithei hi a.....' chih khawng ka ngaihtuah vungvung hi. Ka beidot man in ka lungsim asia a, ngaihtuah louh di teng ka ban ngaihtuah a, a chang in lah, 'Pathian in dam dia hon deih leh hon damsak na ding ahi' ka chithei thepthup zel hi.

Sih-le-hin kal ah nitak dak 7 vel in lamka katung ua, Damdawi Inn ka tungsuak ngal uhi. Doctor te ana paikhin ua, nurse duty te panpihna toh damdawiin ah admit in ka om uhi. Dam di lametna lianpi toh om kahimai uh. Glucose khawng khai in, damdawi khawng kapia uhi. Huchi in neuchik hong halhdeuh zek a, ka kipak mahmah uhi. A nauneih hunlua ahihman in neihsak teitei a sawm ua, huai din nna hon buatsaih pah uhi. July 2,2013 zingkal ahi a, nursete leh Pathian panpihna ziak in tanu melhoihtak hon neikhe ta hi. Ka tanu hong piantak in kipahna mittui nullou ka omkei uh. Himahleh ka kipahna un sawt a daihkei. Ka zi alupna toh hon hawtpawt ua, a daang dildel mai. A taang keia, a tanu meel le a muman kei. Doctor duty om nailou ahihman in a buaihuai mahmah. Nurse te'n lah nna asem ngam taktak kei ua. Ka tannu pianni, zingkal lam dak 10 vel in ka zi tuh a naak khawl in, ka mitmuh mahmah in hon beisanta.

Huainung in kanu'n ka tanu a enkoltou dena, ken neek ka zong hi. Huai apan ka ngaihtuahna hong kikheng a, damdawi inn baihlam taka naihtheihna di Lamka a teen ka ut hi. Huchi in hiailam ah ka hong pem ua, nitenga kiloh in neek ka zong hi. Huaiziak in nou bang kon theihkhak loh a, ka hamphatna mahmah ahi" chi in ka tanchin tomkim in ka genzou hi.

Ka ngaihnou in ka thugen hoihtak in ana ngaikhe hiikheek a, ka tanchin a theihsa himahleh huaini in chiang zawsem in athei hi. Tangval siangthou angai tampi om din ka gingta. Kei pentak a hon it lamdang kasa a, huai ka ngaihtuah chiangin ka itna a lian semsem. PATHAWI HIMAHLENG a pasal din ahon sit keia, keitoh kiten ding sa-ikna a neikei.

©SIAMSINNA LEH VAKIANGBU