ATULLOU ITNA

By ~ ChinZa Vualnam 

"Usiam na omna kashmir gam buai vengvung lak ah, ka ittna zaw hon mansuah hial ken aw, Vukkhal sahtak te kawm ah Na itna selmang het ken; Ice kawm a naseel maimah leh zaw Bangchituk in kip mahleh ni honsa dia vukkhal te nisa in hon haituui dia, muhphak louh gam ah vuuk tui in ataai mang ding, huai ziak in na lungtang tawng ah kem den in aw" Chia Linda in anget ngut2 lai hunte Siam in aphawksuah thak2 hi. Ahitak in Siam in Linda a itna amansuah ngeikei. A omna Kashmir gam buai vengvung sangmah in zong alawmpa Soson in Linda nuleh pan Contractor Lalpu toh Linda gawmsawm ahih dan uh siikgui tungtawn a agen te'n alungbuai sak zaw hi. Himahleh Linda in ginom ding a athuchiam te peel thei ding in agingta tuankei hi. Munkhat a omkhawm a asia apha kikumthei hi le uh zaw athuak zong adan om deuh khamoh lou ding hi aa.. Tu'n lah akaal uh Taangsangpen Himalaya tang in ahal vengvong ta mai aa..

Linda zong anuten Lalpu toh gawmsawm mahle uh Siam a itna lakiik thei vual ahi nawn kei hi.

Alungsim tawng in "Usiam, bangteng tuak mahleng hontaisan ngeilou ding kahi aw Nahon kileh kiik hun ding hon na ngak den ding kahi" achi a, bangteng chimah leh a usiam in azapha ngaalkei hi.

Linda nute'n zong atanu uh, Contractor Lalpu a dia hun bangtan hiam abuai pih nung un, ani ding chiamsa in hon bawlthei khongkhong ta ua khovot suukpi lai January 8 ding in lem asa ta uhi. Linda in hiai thu atheih in anuleh pa'n atanu deihlouh toh gawm asawm tei2 uh lamdang asa hi. Anu leh pan Itnawnlou bang in athei hial hi. Himah leh Siam christmass mang di'n hon pai dia Lalpu toh zaw kaki tengkei hial ding alungsim in achi hi.

Nitakkhat Siambawi lungleng tak in khavak nuai ah atu hi. Linda in a omna Lamka khopi ah hiaibang nitak bangchin azang diammaw kha lah avaak mahmah ngal a Chih te ngaihtuah a atut sung in zan honsawt hiai2 a, tung a khapi in lah alungzuanna theihpih lou in engbawl hileh kilawm in avaakpha semsem hi. Zanhuihkhi siang hon nungpanta a, khapi zong vanlaizawl atungtou velvol ta hi.. Gintaklouh pi in Siambawi lawmpa Soson in Sikgui tungtawn in Siambawi hon houpih a, Zansawt nung a bang tanchin om ahi diam aw.. Chih ngaihtuah kawm in lungnuamlou pi in Ala ta hi.. Linda in kumthak dt8 a Lalpu toh kiteng ding ahih dan Son in agen tak in, Bangmah genthei nawnlou in atusuk maita hi..

A itpen Linda toh khovel hunte zangkhawm ngeinawn lou ding a akitheih ziak in, alungsim ana mahmah mai a, alungsim tawng a akep det Linda a itna khimzing in akhuhmang vekta hi. Amah zong kihalhsak tei2 in Linda a ding lai tamlou agelh zoh in, zankhovot nuai ah agaal gamlapi a tuipi kihawt ging zua2 lam manoh in vuuksahtak tungtawn in honpaita hi. "Linda aw, kon itna hiai vukte kawm ah ana seelmang kha himai leng zaw zingnisuak in taaimang thei hi a, kalungtang a ka itna lah lakhe thei kahi ngal kei a" chihte ngaihtuah kawm in amittui hon luang zoih2 mai hi. Tuipi kiang hon tungta a tuipi kiang a Lungkhamtak a sawtlou adinnung in Khovel a lungkham na thuak nawnlou ding leh SIHTANPHA adia Linda kiang a athuchiam te tangtun na din, tuipi kihawt in theihlouh gam ah Siamboi atuah mangta hi.

Lamka khopi zong, Khristmass husa hon ngaih semsem a, Jesu pianna thu leh la in Lamka khopi amausak vengvung ta hi. Hiai christmass hun nuam zang ding in kilchih akipan mi hon paikhawm sauh2 ta ua, khenkhat te,sungkuan tetoh zang ding ahi ua, khenkhat te, angaihzawng te utoh zangkhawm ding ahi uhi. Linda in zong a USiam tun hun ding ngaklah tak in ana gaal et gige lai hi. Christmass gift apiak ding thil tuamtuam zong mandiam in akoih ta.

Gintaklouh pi in in nikhat Laithon luisim ngemngom khat postman pan ava pia a, huai lehkha thon Siamboi akipan ahi chih athei ngal a, a etleh laitamlou hiaidan in ana ki gelh hi-

Itpen, Linda

Nang ading a chingzoulou kahih dan kaki theih in poi kasa hi. Himah leh hon mohsak lou kahi aw Lin, Khovel nopsak na leh Neihleh lam kaneih louh ziak a chinglou kahih dan kaki thei a kei kakimohsak petmah hi. Kakiang a non nget bang in, kon itna ka koihkhe ngeikei a, Kashmir vuktolh te'n atuah manglouh na di'n ka lungsim tawng ah ka keem gige hi. Hiai lehkha nasim chiang in namit kha in minute khat bek hon ngaihtuah lai ve maw.. Linda aw, ken zaw tu in nakiang ah bangmah genman na ding hun kaneinawn ngalkei a..! Hiai laikhak nasim zoh chiang in kataksa Tuipi thukpi sung a ngapi gilsung ah a omta ngei dia, himahleh kakha in Nang hon pai hun ding ngak in Namuh phak louh vandum khen ah hon ngak gige ding ahi aw..

Nang hon it tawntung

-Siambawi.

Hiai lehkha thon asim zoh in, Linda zong Usiam chin ngaihtak in hon kikou khe kha a, aban bangmah gen zom theilou in apuuk maimah hi.. Amit te vaai huaihuai in, achi hon liing sungsung a, Kintak a damdawi in tut himah leh Siamboi toh tongchiam pel nawnlou ding Leh ATULLOU ITNA zangkhawm ding in, Siambawi kiang a khawl ding in Linda zong apai sam ta hi..

~BEITA~

©Siamsinna leh Vakiangbu