LAWMTA THUMTE

~Vz Vualnam

Phuak khemkhem nawn mai ni...

‘Numei khawng zaw kum sawmnihlenga khawng hon peel phot le uh maw, huai chia houpih nuam pan ahi uh. Huai ma zaw amau le duhthusam bang nei sam un chin, a duhthusam utoh hin utsam ahi uh. Kum sawmnihlenga khawng a hon pelh hial chiang ua bel a duhthusam uh duhthusam ahihdan hon theikhia un, hong patau pan un, huai chia houpih nuam pan ahi uh,’ Thangpu’n Lianpu kia’h a chi hi.

Thangpu, Lianpu leh Chinpu. Amau lawmta thumte’n kibatna tampi a nei uhi. A thum un mihoih huathuat ngenta ahi ua, saptuam leh khotang a suanhuai ngenta ahi uh. Lengkul sangkil a ding ngen ahi ua, a naupang pen Chinpu bang leng midang hileh zi neithamta ding hi. Thangpu tuh bank manager ahi a, Lianpu Section Officer ahi a, Chinpu pen ahihleh Post Doctorate hih a om ahi. A sepna uleh laisimna uh toh kisai a Delhi a kimukha a, kithei a, lawmta hong suak ahi uh.

Thildang teng sang a a kibat diakkholna uh bel hiai ahi – mihoih huathuat ngen, teep leh muam nangawn chiing himhimlou tangval himahle uh tutan zi geentaaklouh nungak nangawn leng a muzou nailou ngen ahi uh. A mizia uh nungakte’ deihdan hikhalou hia ahihke’h a mit uh sanglua hizaw hia, tutan zi poimoh mahmahta napi un a muthei naikei uh. Mit sang chih mawk a le, numei melhoih pipi bang in pasal ginlou chikchik bang ngaih chihtak a ngai bang omthei uh ahihchia, a vaang uh tung nailou hi pen in teh. Amau lah mel-et a suanhuailua leng hi hetlou napi a nungak deihte uh a melhoih pen lawi ahi ua, huaiziak le hikha in teh. Tua a nungak deihte un amau a deihkei chiat uhi. Amau lah kichitak sak in a nungak deih chiat uh a pumngak uhi.

Lianpu tuh Ngaihching in a deihta mahmah a, himahleh a mah Lianpu pen in Lunniang a deihziak in Ngaihching pen a limsak nuamkei hi. Himahleh Lunniang pen in Lianpu deihlou zel in hiai tengthum tuh kum sawttak a om leemluam uhi.

Chinpu in leng Kimboi a deihtaakna sawtpi ahita a, himahleh Kimboi in a deih nuamkei hi. Deih noplouh genlouh, tangval dang a neihsan zomah hi. Huchih chiang in a Lianpu deihta nu Ngaihching bang leng hoih leh kizen mohlou ahihtoh, a Lianpu mah in leng Chinpu a kutbawl toh, Chinpu mah in leng lungtunhuai a sak ziak in amau tegel a hong kingai thei uhi. Lianpu in bel Lunniang a ngak teitei a, khat in limsak nuamkei mahleh khatveitei a deih khong kilam-en in a tawpsan nuamkei hi.

Chinpu’n Lianpu’ kiang ah, ‘Nang le huai Lunniang delhdelh nawndah ve. Mi’n hichitel a hon deihlou bang, tawpsan suk in. A dang omlou le hi lou. Hon limsak a tam tawk voi,’ a chih chiang in Lianpu in, ‘Mi i ngaih vanglak leh a tawp chia hon hehpih a hon ngai khong di ua kigingta in chin, lah huchi le a na hi khollou. En le i ngaih noplouhte a kuhkal ziak uhiam, a hon itluat ziak uhiam ua ki-it a kingai tuan thahahlou. Hilele ei a lam-en a i pan leh kilam-en thouthou. Huai lam-etna paikhe theilou ka hi,’ chi’n a dawng a, Chinpu in leng a loh ngaihna theilou in. ‘Mi’n hon ngaihluat ua, en i ngaih utkei leh kivangsia a chi ua, huai houh dik di ahi di e. Na hehlouh di’n, Ngaihching in nidang hichi tel a honna deih, ken ka deih noplouh ziak a a gau thuak ka hi di. Ka deihte le tangzou di’n ka kigingkei,’ a chi a, Chinpu in bel huai khawng khemkhem, chi’n a thulaak sakkei hi.

Theihlouh kaal in kumte hong liam zungzung a, Chinpu in tuma a a heel nilouh Kimboi pen a tangvalpa toh a hong kikhen ua, huchih chiang in Kimboi in Chinpu pen hon deih phiing a, a hon limbawl mahmah hi. Himahleh Chinpu’n nungak dang a na nei manta ahihman in a limsak nuam nawnkei a, lawm bang lel in a bawlta hi. Kimboi in a kisiikna thu genzel mahleh Chinpu in hithei nawnlou ahihdan chiangtak in a hilh a, huailam thu genkha nawnlou ding in a hilh hi.

Kumte bang khawllou hial mah a hihchiang in Lianpu bang leng a naupang nawnkei hial a, lah a nungak heel neem dek nai tuamlou ahihman in patauh a hong kipanta hi. Chinpu deih masak Kimboi pen nungak melhoih mahmah ahi a, Lianpu toh leng sawtpek a pan a hoih a sakdan uh kikum nilouh ahi uhi. Huchia Kimboi in Chinpu ahon limbawl phiing laitak leh Lianpu’ lungkiat laitak hong kituakkha ahihman in Chinpu in Lianpu kiang ah, ‘Huai Kimboi ana limbawl mai ve. Ke’n gen leng ut mai ding ahi. Kei hon deihbawl phiing a, ei lah kihithei nawnlou a, nang lah kei hon pia na hihchia ke’n le nang hon pemai leng,’ chi’n a kichiamnuih zel uhi.

Lianpu’n Ngaihching a tawpsan nuamlou a a heelheel chiang in Ngaihching in leng a lohdan ding thei zoulou in, ‘Pasal neihpah ka sawmkei. Na hon ngak peih leh hon ngak in. Himahleh na hon ngakzoh ka gingtakei,’ chi in khase thei hetlou ding in Lianpu a koih hi. Lianpu in leng, ‘Hiai tan ka hon ngakzoh leh huai tan leng ka hon ngakzou ding. Ka kum a hunta a, zi neih hun le ahi thamta. Ka lawmte tengteng in leng a neita uh. Sepna toh kisai a leng innkuan bang a ki-om theilou, ei kia bang i om hun tam ahihman in zi tuh ka kuul mahmah. Huai chiah tu’n zi neikei leng ka hatlai in ka tate a piching man nawnkei ding uh. Himahleh tu a zi neih a, huaite tengteng pumpelh sang in nang hon ngak ka utzaw. Tu a pan a innkuan neih a, kum tampi khosakkhawm sang in nang hon ngak a, kum tawmchik khosakkhawm ka teel zaw,’ a chi tang hiilhial hi. Himahleh a lungsim in bel Ngaihching in a nialna ding a theihnawn mahmahlouh ziak a lungkiatsakna ding a agen ahi chih bel a haih dekkei hi.

Lianpu’n tuh lungkelou in a ngaktou zel a, himahleh Ngaihlian thuchiam ah lam-etna himhim a mukei. Kum nga hiilhial a heel nung a le heelbut a omlou ahihtaak chiang in Lianpu in leng kum nga hial a hon deihkei leh zaw chikmah chiang in hon deihnawn ke’n teh chi in tawpsan ding in thupuukna a hon la khong hi. Chinpu mah in leng Kimboi’ kiang ah Lianpu pen ana genbawl a, Kimboi in leng mihoih ahihnaak leh poilou chi in Lianpu leh Kimboi hong kineel ua, sawtlou in a hong kingai thei uhi.

Huchia abuai vingveng lai un a lawmpa uh Thangpu leng a deihbang mutheilou in ama’ buaibuai in a na buailaw sam hi. A sepna utoh kisai bang a mun tuamtuam a hong kikhen uh ahihman in facebook chihkhawng lou ngal a leng kithuahthei ahi nawnkei uhi. Mun tuamchiat ah om mahle uh a a tanchin uh a kihilhtuah zelzel uhi.

Lianpu leh Kimboi a kingaih uh kum khat bang phanuam ding ahita hi. Lunniang leng a laisim hon zou a, lah sepna leng zong tuanlou in innlam ah a pai a, bangmah semlou in a om hi. A theihlouh kaal a a kum bang leng hong hun law simta ahihman in a guuk in hong patau phiing a, lah tangval tampite’n ngai uh hinapi in ama’n ngaih ding leng theilou in a om hi. Lianpu’n nidang a ana ngaihdan khawng a hon ngaihsut kiik chiang in a lungleng mahmah hi. Himahleh huchituk a ana nialsa ahihchiang in bangmah genngam ding dinmun in a dingkei.

Khatvei Lianpu innlam a va pai in Lunniang in a inn ua pawt ding in ana chial a, Lianpu leng a utlou hihetlou napi in a kithalawp hetkei a, lah a nial utlouh man in a va pawt hi. Innlam a pai chiang a Lunniangte’ va pawt ding sawm zel mahleh Lunniang in a limsak louhluat ziak in a va pawt ngamkei hi. Kua bang in kum tampi sung hunlem a zong hi. Tua nungak dang a sai nung a Lunniang in a hichih phiing ama’n leng thuakhak a sa a, khat veivei houh a engbawlna ahi de aw chi’n a ngaihsun hi. Lunniang in lah a limbawl deuhdeuh a, a tawp in a kisiikdan a hilh khong hi. ‘Hehpih in hon ngaidam mai ve U Lian, hun khat kia hon pelai mai ve,’ chi’n a khitui bang a luang zezen hi.

Lianpu’n leng haksa a sa mahmah a, ‘Ngaihdam leh damlouh ziak leng hilou ahi Niang. Ka tung ah hihkhelh na nei hetkei. Himahleh ke’n midang ka na kingaihpih khin a, a kiang ah kitenpih ding ka hihdan leng ana chiamkhin ka hi. Huchi bang ahih nung a kilepkhiat ka utkei. Tua amah taisan a ka suk lungkham ding hithei ka sakei. It a gen in zaw nang loungal ka kipahna ding khovvel ah a omkei. Hiai ding ka ngaihngamlouh ziak a kuhkal tak a honna ngakngak ing a, na hon limsak utloh lai a leng lungkelou a hon ngak ing a, himahleh kum nga hiilhial k’on ngak nung a leng na hoih ngaih theihkei leh zaw kum sawmnga hon ngaak leng le n’on ngaithei tuankei di chia hon tawpsan mah ka hi. Ka na kuhkal zohlouh ziak in nang hon ngaidam zaw in. Pasal na hon neihsan hial ma ka hon na ngak ding ka chi a, himahleh ka hon thuchiam ah ka na gin-om zoukei. Nang zaw it dia le honna it khol ing a, na u-le-nau leh na innkuante bang leng chikmah a ka muhngei leh theih ngeilouh himah le uh kei a bang a bawlthei pah ing a, nang leng nikhat ni chiang in n’on it ngeingei ding chih ana lam-en mah zaw hi ve’ng ing. Ka na lungke baih deuh a eive maw,’ chi in a dawng lel hi. Lunniang in, ‘Ka na hailaw kha a ahi chihlouh ngal gen ding dang ka theikei. Nang ka honna nial zaw leitung a ka hihkhelh thupi pen ahi ding. A himhim thu in hon ngak in ka chi voi, ka haksatnate ka hon gen a,’ a chi a, kisiik mahmah lele a Lianpu mah in, ‘Hon ngak in na chi ngei a, himahleh n’on hepkhiatna lel hi in ka thei a ahi. Na ittheih ding mi na muh chiang a na buaina teng thakhat thu a mangmai na ding ahi. I it noplouhte kiang a zaw buaina ding, suanlam ding om gige mah ahi. Tu a na kisiikna nidang chia na kipahna ding hong hithei ahi. Nang tuh ittu ding na hau a, ei bel hon deih dile om khollou ahih chia, hon deih a om lailai chia ana pommah ka hi. Hon itlou a hon ngailou zaw ka hikei. Chikmah chiang a ka hon itna bei ngei ding in leng ka gingtakei. Himahleh hithei nawnlou hiphot mai heh maw,’ chi in naa satuak mahle uh lemthei nawnlou ahi mai hi.

Huchi’n lawmta bang in a ki-en ua, a vangkim in a kihouzel uhi. Lunniang in, ‘Bangchi’n mi hon it taktakte ka theithei dia?’ chi’n Lianpu a dong zel a, Lianpu’n bel, ‘Huchi bang a it in ka omkha ngeikei a, ka theikei. It didan kia ka thei a, nang ka hon itna itna dik ahihleh tuh mi’n a kisaktheihna sang ua a hon itzawk uleh huai itna tuh ginlelhhuai ka sakei. Ke’n le ka kisaktheihna sang in ka hon itzaw a, itna dik hi in ka thei a. Himahleh itna dik zaw i sihni chiang kia in i chianthei pan ding. Gintaak kia i gingta thei phot,’ chi in a dawng zel hi.

Khatvei tuh Lianpu’n Lunniang’ kiang ah, ‘Ka lawmte mihoih khat om eive. Na lunglut di leh hon gen le teh,’ chi in Thangpu a kawkmuh a, Thangpu’ kiang ah leng tua bang in Lunniang a kawkmuh leuleu hi. Lunniang in leng mihoih ahih naak leh poilou chi in Thangpu toh a hong kithei ua, sawtlou nung in a hong kingai uhi.

Huchi’n a mau lawmta tengthum nungak a deih chiat uh kipetuah in chihdan siamtak in a hon hih ua, a khase tuam ding omlou in zi ding a hon muchiat uhi. Zineih bang leng kizom sak ding chi in a banban in hong kineih huan uhi. Huchia zi leh pasal a ahong kineihtuah chiat chiang un bel a mau a chiat hoihpen in a thei chiat ua, a lungkim chiat uhi.

©SIAMSINNA LEH VAKIANGBU