SIH HUN IN NA SI HIA??

By ~ Kattie Mawite


Nisim June 26,2015 (Pathianni) tuh kou veng saptuam in HAITHAK LATNA program zang dia ka buatsaih sa uh ahia, program le zatmai dia mansa in a om a, ahun atun nailouh ziaka kizanglou lel ahi.
Himahleh SIHNA in program dang ahon bawlkhum a, HAITHAK program tuh a ki cancel tave.



Hiai SIHNA tuh a huathuai mahmah mai. Kuaman a deihlouh hangin hon sapna lamlam ah ut-le-utlouh gentheihlouh in ipai duamduam uh angai. I iit tata hon iitpih a, I program nuam di tata hon tuhkhe zel. Mihingte'n deihtelna I nei hetkei chih hon muchiangsak mahmah. Hiai SIHNA intuh ateek-akhang deihlouh a neikei a, khentuam leng a neikei bok. Azawng-ahau hon kikimsaktu leng ahi.



Akhente Pathian' lemgel hunchet in hiai SIHNA in a khut vot takmai tuh a zakkhum a, akhente leuleu ahihleh amau mahmah in, amau deihteelna zang in hiai SIHNA' angsung vot diakduak ah hon lutsan nak uhi. Tuailai melhoih taktak, I nu-le-pa iit taktak te'n bangziaka hiai thupukna bawlzel uh hiam? Huailaitaka a lungtang ua om pen a theihnop huai khop mai. Lah ahon hilh thei nawn ngal kei ua!! Lungkhamna lianpi, beidotna tawpkhawk tuak uh ahi ngei ding ee….


Ka innkhang lam ua, tuabang deihtelna nei a, SIHNA' angsunga lutthak om a chih ziak un keileng PROGRAM THAK pen zang din ka kuan sam. Ut ziaka hoh di hileh bel ka hoh hetkei di. Buannawi lah lamtawn a honna muak tu ahi a. Lampi gina omleh phave... Tangkuang zui a kipai hilai. Miksi hon kizui mah ka bang daudau zozen uhi. Paikawm in ka chiamnui suk ua, 'mi a tamtam toh, buannawi teng le ana tuanvui gai leu hi di aka' chi in ka nuisuk nalhnalh uhi. Himahleh ka lungsim bel a nui thei mahmah kei. 


Ka ngaihtuahna a paisau mahmah. Kei ka sih ut nailouhlouh maizen toh.Pathian in, 'Mawite, nang zaw tuni/zingchiang in sita mai in aw. Na leitung hinkhua beisak ta mai ni' hon chi bang hi zenzen le tuh, 'I Toupa ka ut naikei. Hehpihtakin tomchik bek hon damsak hamham lai in' chi a ngen ngutngut didan kahi. Kei hichituka dam ka ut laia bangziaka mite, amau hinna kila a, amau leh amau khawng kithat mawk uh ade aw?? Ahihkei leh bang puaklah nei a, hin sanga sih teel zaw mai uh adaw..?? chih khawng ka ngaihtuah a, aziak theih utna lianpi kanei hi.



Ka sigal uh bel, tuailai kum in huamkha lai mahleh zi-le-ta nei, inntuam suang a khosa ahi. Innkong ah kalawmnu toh ka tu ua, ka lungsim a si dedu. Sivuina program kigelhna a alimlak ka en a, adamlai in theikha kei mahleng, ka it petmah. Aw...a iithuai tel mai. Kum 40mi, sia-le-pha theihna chiangtak neithei, mi piching zet in bangziaka amah hinna kilakna di tana thupukna bawl tamai ade aw…?



Kum a leng huntawk ta, TEEK hialta awklum leng a omtham. Banah, nungak/tangval leng mahni kithat/mahni hinna la atam mahmah. Aziak bel ithei vekkei, himahleh akhente examna a fail ziak, ngaihzawngte toh kisukbuai ziak/kikhenziak khawng le a om. Examna a fail ziaka kingaisia a kithat te'n chikmah chiang in a PASS nawnkei ding uh. Ngaihzawng thu a buai ziaka kithah di lungsima nei khate'n hiai theih din hoih kasa, "PATHIAN IN NANG A DIA ASIAM AHIHLEH HON KITENGSAK NA DI AHI. EI-LE-EI A KISAI VAIVENG SAWMLOU IN, I ZI DI, I PASAL DI PATHIAN KIANG AH DONG IN, AMAH NGEN LE, AMAN EIA DIA HOIH THEI LO MAHMAH AHI. AMAH ZIA NGAKZOU NI. NANG-LE-NANG NA KITHAHPEN A 'SOLUTION' AHIKEI A, NA TANGTAWN MUN DI 'MEIDIL' KONG HONG LEL NAHI A, KHOVEL A NA BUAINA SANGA HAKSA ZAW MUN ZUAN NAHI CHIH KITHEI IN".



Nu-le-pa te'nle hiai thei ni; nang-le-nang kithat lechin na innkuante mite.n bangchi'n agen ding ua? 'AWKLUMTE INNKUAN' chih in a om maimah duam? Inteeknu inteekpa nahihna ah natate'n na sulnung hon zui le uh na kipak diam? Lungngaihna tawpkhawk nei nahi maithei, himahleh innsunga na dinmun leh na hihna zahtak in. Innsung enkai a, akemtu di hizenpi awklup tuh DAWILOKNA tawpkhawk ahi chih thei in.



Tual thatte'n bel kisika Pathian' kianga ngaihdam anget uleh, ngaihdamna atang ding uh. Himahleh, mahni kithatte'n bel kisikna di hun anei nawnkei ua, ngaihdamna leng a tangkei ding uh.



Huaibanah, NA HINNA NANG AA AHIKEI chih thei gige in. Na hinna hon petu Pathian ahia, Ama' a, en ikep leh izat lel ahi. Bangchi'n na zang in na kem a? Na hinna na zatdan ah Pathian a lungkim huntawk diam? Ahihkeileh, na hinna nang thupukna a na hihbei/kithah mawk, Pathian a lungkim in a kipak diam? Huntawpni chiang in vaihawmna ma ah bang na genta dia?? Ngaihtuah tham chingtak ahi.



"Nou semgim leh puakgik potengteng aw, ka kiangah hongpai unla, keiman khawlna kon pe ding (Matthai 11:28)" hon chipa kiang ah I puakgikte tun in, Ama' kiang ah thum in panpihna ngen le'ng Amah panpihtu nai gige pa'n honna nawlkhin hetlou dinga, tung zanna, khawlna leh lungnopna khamuanhuai tak honna pe ding hi.


Simtute Toupa'n hon vualzawl chiat hen. Ka kipak.

©Siamsinna Leh Vakiangbu

Comments

Post a Comment

Popular posts from this blog

PATHAWI HIMAHLENG!!

~Kattie Mawite Ka ngaihnou ka ngaisang top. Ka dinmun uh kikheng hileh ama lungsim bang ka put zoh ka gingta kei. Iitna tak toh hon iit hi in kathei a, kenleng ka it petmah. Keilam apan ngiat a hon neikei a, apasal ka hihtheihna din CONDITION bangmah hon bawlsak kei. Tulai in hihna kibang(homosexual) kingai tampi om mahleh, kei ngaihnou bel NUMEI ahi. A hon itna thupi kasa. Ka phulouh iitna tang hi in ka kithei a, ka kipak petmah. Himahleh alangkhat ah ka kisuanglah zel. Ka kingaihsiat theihna di leh ka lungsim hon kam gegu di kampau chikmah in hon zatkhum ngeikei a, milak ah leng a hon zahpih kei. Kei ziaka nuam asaklouhni leng atam din ka gingta. Himahleh kei kianga a om chiangin maitai tak in hon houpih a, huai in a ngaihhuaina nakpi in a behlap hi. Ka ngaihnoute bel innkuan nuamsa ahi uh. Apa Evangelist teacher pension ahi a, a upa'n leng apa sulnung zui in Evangelist teacher mah a sem hi. Amah tuh college kailai ahi a, anau pasal nihte bel high school kailai ahi
Read more

PALLAI NITE

~Lian Khuptong Alamdang Pathian Itna' 'khovel nopsakna leh gentheihna tepanin Tuun sungkhatpan mimbang ka hong khangkhia hi. Deihthoh takmai leh iitakmai'n keple huihmut dingnah tomphallou in ka omhi. Kep leh etkolna nuaia kasenchiil panin kapiching dong in, duattak leh deihthoh takin kep kana hi. Sianhuaina toh hucihin ka hongkhang lianzela khovel tak palding in kongkisa ta hi. Mite kitaiteh nalak ah ka taisam hi. Hinkhua gintaksa anaa nuamchiam kei alai hawlpawl in lakloh takin ka omhi. Pallai amm'n nuamleen tuh ka hinkhua aka nopsak ahih hi. Maban etna'n kalsuan touzelin ahak-anuam phutkhak dandan in kahong phuh hi. Huaihang in hinkhua zatdan ka etchiang in lungkhamna leh mangbatna ten nisim'n hongtuam tawntung hi. Ahakdan pengen siamvual ahih keihial hi.  Huchitazong in taikhua tuh hongvak zelsam a lametna thak honguan zel hi. Naa khatpeuh zoh kuhkalna leh thuakhaatna lou toh pangtakpi mah ngai hi. Khovel zoh omvengvung kitaiteh nalah
Read more

NATNA LAUHUAI COVID APAN PIANTHAKNA

 By  ~ Paumuanlal Guite BaBs Chikmah a zak ngeilouh, lungsim tawng a leng gelphak ngeilouh COVID 19 in khovel pumpi hong sawiliing ta hi. It leh ngaihte toh tui leh nga bang bualkhawmna, a sakminthang Lamka khopi leng natna in hong hawi tuankei. Niteng in a vei a pung hulhul chih kuapeuh in thei, himahleh gamsung vaihawm solkalte’n hiai natna apan i suahtak theihna ding ua hon thupiak uh Policete mat utlouhna ziak lel in i zui hamham chiat uhi. Huai bangle Policete galmuh chiang khawng a zui hamhamte i hilai uhi. A tamzawte bang in a omna mun uh i pel chetchet zomah uh, lamka chihmah a ka tuamtuam tam i theitel ua. Siamsinna innte, nasepna buuk tuamtuamte kikhak zungzung a, i biakna munte tan leng kikhak hial in inn a kuapeuh kikhum chiat ding i chih lai un kholai a hih ding poimoh nei a pungdiak a bang maimah hi. I natna minthang ziak ua mual honna liamsan niteng in zak ahigige mai. It tak in a luangbul ah kap zoizoi ut mahlehang mangmat phak ahinawnkei, silhpuan piandang toh kithua
Read more