A BUL KIPATNA DIKLOU ZAW...

~Kattie Mawite

Vuah hahzuk lua ahihman in ka nasep uh ka sunzom theikei uhi. Inteekte innsung ah ka tulut tou ua, gimsim kahi diama tutna sau tung ah ka lum ngalngal a, ka ihmu kha zomah hi."Uthang ei, thou ve. ILP buaina in Lamka zang le hon nawkkha a, eiveng tele buai a buai uh ahi. Nna nasep theih tuankei uleh vuah zu lele pai mai ni" chi kawm in kazi in kaliang ah hong beng teuhteuh hi. Huchi ahihleh chi in keile mit nuai liailiai kawma ka thohkhiat leh kazi ana omkei a, kamang ahihlam ka theikhia hi. 'Nidanga mang nei ngeilou pi in bangziaka tuni a mang nei kade aw' ka chi a, ka lung a nuam chiahkei. 'Ka zi bangchi adaw? Ahihkei leh ILP thu a buaina om taktak hiale?' Chi in keile kei in kana kidong a, kalawmte theihlouh in kana lungbuai gu mahmah hi.Ka zi toh facebook account nei tuak mahle ung, mahni aa chiat ka khoih uhi. Nupa himahle ung privacy neitak a om hoih kasak ziak ua huchi mah kahi uh. Asia khoih dia kimuangmoh lou tuak kahihman un poi le kasa sese kei uhi. 'Ei muanhuai masa phot peuhmah le' chi tuh ka himai uh. Banah, ei I muanhuai leh midangte muanhuai dia kikoih mai dan ahi.Himahleh huaini chet in chu ka lungsim a kawi deuh hi in kathei.ILP thu inlah eilam tantan hon nawk dia gingta lou kahihman in ka zi in ka ngaihtuahna leh ka lungsim hon luahdim vek ngal mai. Ka kingaihlai uh hi in ka kitennung uh hitaleh hichituk a ka lungsim a luahzoh lam ka theikha kei. Ka ngaihlouh ziak ahikei. Ngamkhat thu a ki-it tuntun a, sawtlou kal a thengpah sang in, hawmdan siama hawmzaka, sih tanpha a hawmlual dia it hipen din ka kigingta.

Chikmah a kahih ngeilouh leh ka ut ngeilouh himahleh huaini'n tuh ka zi facebook a lut ka sawm mawk hi. A password leh a honna number thei kahihman in, ki awilou kawm sim, lah thuduh sim in ka login ta hi. Friend request leh notification bangzah hiam a om a, huaiban ah message le nih a om cheuhchauh hi. Message ka etleh a khaktu a kibang a, pasal ahizomah. Kaheh a suak pianpah hi. A message ka simsuk leh ka hehtha a suak petmah a kasan tuaituai zozen hi. Mi inn a om kahihlam ka kimangngilh phial hi.Vuah azuk chia mei pailou pahpah mah hiven, huaini inle a paikei. Mei pai hileh TV khawng en di unga, ka lungsima om gegu pen nengchik ki mangngilh thei deuh di hiven. Vuah la zu ngiahngiah mai, keilah lungsim sa vitvit a om. Ka lawmte kianga kagen laizang di lah hilou deuh. Ka om lem thei nawnkei."Mawi, vuah zu lele kong pai thouthou di aw.... hiai kana hunlem omlou di ahi. Na Uthang kuankhia himah maw?" Chih leh, "Mawi, non thuk hetkeia, buai maw? Na man hunhun in hon hilh lel in aw. Hon call lechinle baihlam zaw maithei ahi. Kon ngailua"Hiai message tegel ka lungsim ah aom den. A heh selua in, 'bangziaka ka zi in thuklou a de aw? Ahihkei leh call le himaithei' chih peuh kana ngaihtuah hi.'Hiai tegel bangchik apan kisai uh hi di?ka kuankhiak chianga hoh gige adiam? Kei tung ah lah asiam tawk a....' chih khawng ka ngaihtuahna ah honglut neuhneuh hi.

Kei' itna a lungkim zou kisa lou chih di lah, a gamtat leh khoheidan ah muanmohna di bangmah a omkei. Nnasem a kakuan dek chiangin kamdam in hon khakhia a, ka tunkik chiang in hoihtak in honna vaidawn a, gim lamlam le phawklou di khop in honna muak thei hi.Mak kasa khop mai. Pil kasa. Kei haizaw kahihlam huaini in ka theikhia hi. Mi'n, "numeite' lungsim bang theihsuah haksa lou pi" ana china ua, kei aa nu bel ana theisuak hetlou dan keive. Kei haiman hia? Ahihkeileh amah pil lua? Ka thei zoukei. Bangteng hileh, khem a om om tuh kana hi peuhmah ve.Ka zi' thu ngaihtuah nawnlouh deuh na ahihkhak leh chi in kei facebook ah kalut hi. Mi status tekhawng ka simsuk a, group tuamtuamZOGAM.COM, ZogamOnline, PhualvaTimes leh adangdang a ILP thu toh kisai, Moreh lama buaina toh kisai khawng ka sim suksuk hi. Hichihlai in mikhat status hichi ana om hi; "Mi'n zaw nih leh thum khawng neikop tektuk ih ei.. enlah khat le kinei zoulou phial. A bangbang di le chi uh adiama.

Khat a neih uleh lungkim mai leu kilawm. Ki lucksak na a ngai uh adiama... sumsen sak huaizahzah neih... Tulai diakdiak bang numeite le hai nawn teuhlou unchin, suma I biakzoh deuh keileh hon ngailou maimah uh. Topup man ale tam bei lo di eivoi. Phone no.ahau mah di uh. Simcard tuamtuam zang zomah ve unchin. Ken zaw huai zahzah bangmah di ka chikei. Ka it mahmah leh ka deihthoh mahmah ka PHONE neihsun ah ka lungkim mai di. Phone tampi zatna di a om tuankei." Ka sim tung in nungak gen kasa a, ka hunluite ngaihtuah in kana kizephawk geugau hi. Ka simsuksuk leh PHONE gen ahihlam ka thei phing a, kawt kisa sim in ka tuike nuih phuhphuh nilouh hi.Ka tangval tunglai hunte hon phawksaka, ka kingaihtuah kha dedu hi. Facebook ka lut lamlam le ka phawk nawnkei. Ka tangval tunglai in numei khat toh kana kingai sam uhi. Ka kingai petmah ua, midang lunggulhna himhim ka neikei uh. Siangthoutak in hun ka zang ua, kizahtaktuah leh kingaih mahmah ka thuah uhi. Huailai in tulaia I phone zat te hong om panpan a, neikha ngei diale kigingta lou mai dan kahi. 

Hunte hong paizel a, ka hong piching mahmah tuak ta uhi. Phone ka neituak ta ua, kithuazakna a nuamtuam petmah. Huai hun in college ka kaituak ua, pawl 12 ka zil tuak uhi. Himahleh ka kaina uh a kibangkei.Council a ka exam di kuan un ka bil hong puaklek a, ka ngaihmuang thei nawnkei. Ka nungaknu'n midang toh hon kop ahihdan ka theikhia a, exam dek chilou din laisim manlou zen in ka kitawng sek uhi.Khen mai dia hoihlua hinapi ka itluat man in ka khen ngamkei. Ka lawmte bang in 'mihai' hon hisa hial uhi. Ama' ziaka mihai hih le poi kasa zoukei. A kingaihpihpa khen henla, keia din hoihtak in hong omthak leh chih ka deihlo lailai hi. Ka itna ziak in a hoihlouhna tengle ngaidam zou vek didan in ka om mawk hi. Huchibang dinmun liailuai himahleh ka khen ngamkei a, khen le ka sawmkei. Ka lungtang tengteng toh lamen tak in hon itna masa banga itna a hon piak di kana ngak top mai hi. "Hon ngai nawnlou nahi hiam?" Chia ka dot chiang in lah, "kon ngai" chihteng in hon dawng leuhlauh zel.

'Hon ngai chingal a lah hon ngaihsak nawnlou. Kisuanglah hia? Ahihkeileh a kilawm dana hon ngai a chih khemkhem' chi in keile kei kana kingaihtuah buai guthei mahmah hi. Huchibang thu a om nung a inn uah kava pawt ngam nawn vak kei. Ka kal ua kigolh omta ahihman in phone a kihou le ahaksa mahmah ta hi. Huchi in pawl 12 k exam ma uh kal nih di khawng in a no.kheng hinte, ka thuzak thei nawnkei a, kikhen ka himai uhi.Nungakte toh kikhen a lunggim san laitak a pawl 12 kon exam chuh anuam kholkei. Result asuah inle ka pass kei namah. Nungak khat ziaka fail tuh ka himai ve. Exam thak theih himahleh ka ut nawnkei. A khonunglam in ka thangpaih pan a, amah mangngilhna dile hikawm chi in nungak dang ka sai panpah hi. Ngai mahmah himahleh leng amah lam ah kal khat le ka suankik utkei a, ka mitsik inle ka melh ut nawnkei.Facebook khawng ah hon inbox zel mahleh simlouh in ka delete sak zel hi. A status leh limlak te bang a hon tag deuhvel seka, ken kana remove zel hi. Ka engpan a, ka nungak thak tetoh lim ka kilak khawm te khawng uh ka post chiangin amah ka tag khial ngeikei. A tawp in hon ninglua hia, ahihkei leh nungak dang toh ka om amuhchia alungsim ana nalua adiama, hon BLOCK khong hi. Ken tuh 'kizen e' ka chi a, puaknat inle ka neikha kei. Ka thangpaih vilvelna a daithei tuankei. Huainu toh ka kikhen nung in ka phaphet kei. Nungak khat kia deihkhop lou in nih leh thum bang ka kop gige sim hi. Nungak hoih le katuak a, asia le katuak. Ahoihte bel kizahtak deuh sam hi.

Nungak hau chih mahtak ka kikemsiangthou zou nawnkei a, nungak nih leh thum kawmtuah in hinkhua ka zangta hi. Nuam chu kasa na ve. Khat in hon khen lele ik a nam dek nailou. Poi le kisa pha vetlou. Nupi khat apasal toh kina in, 'kapai di' a chihleh a pasal in, 'na utleh pai ve. Na thakhengtu di toh kongbul ah na kituak di' a chi, a chih bang deuh un, khat in hon khen leh a thakhengtu di ka lalut chetchet hi.Ka zawllui teng sim leng ka khutzung inle a daih nawnkei di. Huci vengvung kawmkal ah tua ka zi le, ama a mi bangzah hiamte thakhengtu dia ka laklut ahi. Ka kingaihpih khak dangte sanga a tungtuan zawkna a om diak tuankei. Sawt kingai manlou in ka kisukhial kha ua, tual thah ka ut hial louh man in ka gu a, ka zi tuh ahimai aka. Ka omdan hoih salou in, zi kaneih apan ka lungsim ka kheng a, zi-le-ta nei kahihtak man in pa muanhuai leh kinepna tham pa hiding in panthak kala hi. Ta kaneih un kalwmte, ka kimaingalpih mahmah khat in, "Tulaia zaw, naungek le a pichin na dia kha kua ngai nawnlou hi di aka maw? A piang pahpah mawk ua. Doctor tele siam gawp uh hi di aka...." hon chi laizang hi. Nuihzathuai sim, lah hehhuai sim. Va heh dialah, ihihna tak hon genkha ahihchia, dawngkik theilou in ka nui maimah hi.Chetsual man a ka neihkhak himahleh ka zi tuh neikhial ka kisa hetkei. A vom man hiuhiau a, a ngaihbaang mahmah hi. Mi maitai tak leng ahi. Upen hilou, inn tuan di thouthou chi in inn ka tuanpah uhi. Ken niteng a kiloh in neek ka zonga, ka zi bel INHIKPI ahimai. Kata uh numei ahia, kumkhat valzek pan ahi.Ka omdan hoihlou teng nusia in hinkhua thak ka zanga, nidang sangin leng ka zi ka itna a lianzaw hi. Ahithei tan in ka kikhual mahmah a, ka zi toh leng kina kisel in ka om vaang mahmah uhi.

Ka hauh keihkuih louh hang un, ka kituak ua nuam kasa veve uhi.Huchia lunggimpih luat di neiloua ngaihmuang taka ka omlai in, nikhat thu a hiai banga ka zi a om ka theih tuh keia dia lungphawng lou vual ahikei. Himahleh ka zi ka mohsa pumpi theikei. Bangziaka huchia om ahia chih bangmah ka theikei. Kei mahmah leng hun paisa a ana khial lua kahihman in ka kimohsa mahmah hi. Lah ahidi teng a hikhinta!!Ka lungkham petmah. Ka zi hehsan in taihilh di chileng, kei chitlouhna leh hunpaisa a ka khelhna teng kamai ah abanban a hong kilak bang hial in kamu hi. 

A BUL KIPATNA DIKLOU ZAW...... ka chi vungvung maimah hi.

Huchia lunggim taka ka kingaihtuah dedu lai in ka lawmpa Mang Guite in whatsapp a hon khak,

Heutupa Lianding Guite in asak;

Lungngaih mangbatna puakgik toh

Selung muanglou khattang kisa

Lamet neilou zaitha neemzou

Tawldamna Toupa ka hon zuan hi

Lung aw dam in, tawldam in

Nang hon it Jesu ah tawldam in

Lung aw dam in, tawldam in

Nang hon it Jesu ah tawldam in

Bah leh liam in haatna neilou

Ka kha nang ngai in amau zel

Ka zinna hiai lei gamdai ah

Nanglou in Toupa ka hing zoulou

Ka vai khempeuh nang kiang' kon laan

Na thu bangzel in hon pi in

Pathian hat leh hoih nang nahi

Bangteng sang lian zaw nahi Toupa

Hiai la ka phawkkhia a, ka ngaipah hi. Vuah a theu nai tuankei a, bench tung ah ka lum nilouh hi. Ka la ngaih repeat a koih kahihman in, bangzah vei hiam ka ngaihsuak nung in ka ihmutsan ta hi.

©SIAMSINNA LEH VAKIANGBU