KA TUHGAH AAT KA HIZAW

By ~ Kattie Mawite

Ka pasal toh ka kiten uh kum 10 bang a paita. Tapa 1 leh tanu 1 kanei ua,ka tapa kum 9 leh ka tanu kum 5 mi a hipan uh. Naupangchik a pasal nei kahihman in, kum 30 le ka pha naikei. Himahleh, haksatna ka thuak teng zaw, kum 70 mi in thuak leh leng, nuamtak in a thuak tuan din ka gingta kei. Khauhual natna hii a leng namah a, keile huai natna a si di bang ka hikhamoh dia!!

Ka pasal nautum ahihman in inntuam ah ka khosa pah uhi. Nitha kiloh in a kuanzel a, a chang in kilohna di a muhlouh ni atam mahmah. Ken ahihleh, kapa(ka pasal' pa) hon inntuanna Siamgatna khawl in siam ka gan zel a, haksatak in ka khosa liailiai uhi. Ka tapa in Rayburn ah Cl-VI a simlel a, katanu in ahihleh LANVA SCHOOL ah Cl-I a sim hi. School hoih ah kaisak ut mahleng, siamsinna le lei petmah ngai ahihman in kaisak zoulou kasuak uhi.

Nek-le-dawn bek ah kisuum zou le ung ka hinkhua ule neuchik nuamdeuh di hi a... Ka niteng melput uh tuh MAIGUM ahimai a, ka kampau sunsunte uleng AW KHAUH ngen ahimai. Nitaklam chiang in PANAAI, kua hon puak leng hilou in,innsung ah ahong lutsek a, keibel kana kipak hetkei sek. PAA chituamtuam atam mahmah hang in, PANAAI zaw a teelhuai hetkei. Sunkhua a siamgan leh inn nna teng sem zel nu tuh PANAAI honglut chiangin kana maitai zou tuan samkei. Muhtheih hileh ka insung utuh, electric +ve leh -ve kihetkha mah bang zotzot din ka gingta. A huaise diak bel, tate tung bek a LAMETNA a omlouh pen ahi. Nu-le-pa electric +ve leh -ve kihetkha mah bang soksok gige laka khangkhia naupang tuh a maitai in a nunnem di chihna sea om hauhkei. Deihsak in thuhilh lele nu-le-pate mah hon COPY in, tangtak leh khauhtak in hon dawng zel. Kum 9 lel mi in a nulepa ngawingawi, zahna nengchik le tellou a hon dawng ngam ahi ka puaknat penpen.

Veng leh pamte houlimna ka zakguk hiauhiau zelte tuh ka kizakmoh khembawl zel a ngai. "Apa nitaklam tenga zukhamsa a tung, a tapa pa'n tuilou lam khawng a PUANSIA nam zel" chih khawng migen ka zatam mahmah. Bil hum tuntun a, mittui vung kelkul a inn ka tun hun atam mahmah. Thuhilh di chile "noule na huchi uh, na khachi uh" chih ahihman ki pautam theilou suak hi.

Mimuh ale vakkhe ngamlou in inn ah ahitheitan in ka kikhum a, men peipuai kawm a siam ka gat ni leng atam mahmah. Nulepa thu manglou a pasal neia taikhia kahihman in ka nunglam ah ka haksatna ka tun ngamkei a, ka pasal lamte lah, tun lele kamsia thuak di lel kahihman in, PATHIAN kiang loungal taina ding ka neikei. Zingkal chiangin Biakinn ah thumna nei din ka kuanzel a,huaileng mi tangpi thohma, mi hon muhlouh deuh di hun in ka kuanzel hi. Mi laka ka tel chiang inleng keikia hon mitsuan uh hileh kilawm hial hi.

A chang in ka tapapa'n van nengneng zuakguk dan hon theihpah hi. Thilhoihlou hih di na nana tuh hilh a ngai hetkei. Huaiteng hileh phadawm dihia school a alawmte van guuk hon chiinglai!!

Ka pasal lah tuh, PANAAI chihmahtak, PANAAI MUNPI a tun a, a hong naai nakleh a lungkima, bangmah dang ngaihsak himhim a neikei. Pasal dam gegu a MEITHAI tuh ka hita maive. Lungkhamna tampi'n a hon sun pailet tektok hi.

Kisiik in lei sik mahleng, phattuamna nengchik leng a neikei. Huainak sang in ka puakgik hon behlap zaw abang zosop. Ka nulehpa'n deihsaktak a hon thuhilh lai un a thuhilhna uh ana mang himai leng aw....." chihlouh ngal gen di a vang tel mai.

Ka khankhiakna innsung in zillou hilebel ka kimohsakna anepdeuh maithei. Kapa saptuam upa ahia, mi nunnem leh tate itsiam tak ahi. Kanu ahihleh mi pautawm,thuhoih leh tate thuhilhna manpha taktak a hon piakte loungal thilteng a mawk vek zelzul kei. Unau 3 kahi ua, u pasal leh nau numei kanei hi.

Cl X ka zoh in,college kaina naideuh di chi in Rayburn College ah admission ka bawl a, nuam kasa a, enjoy petmah kahimai. Kou seniorte khat yoh kimaikha in ka kingai uhi. Amau bel a khosak uh ahoih a, gari neu,gari lian utut zat di anei uhi. A nulepa le lohnei a, sep nei le ahi diak kei uh. Amah ngei leng a melse hetkei a,a hoihlo vekvuk tuankei. A ngaihbang hiuhiau a, a neihzoh utoh nungakte bang in a pakta thei mahmah uhi. Huai hunlai phetlouh, tulai a di tan inleng a neizou mahmah lawi ahi di un ka gingta. Amah bang a khosak nuam in hon ngaihkhak tuh hampha ka kisa mahmah hi.

Himahleh, kou innsunga thuhilhna tampi ka zakte banglou tak in, neektheih, dawntheih chituamtuam ahau mahmah a, a chang in hong nam philphel thei zel hi.

Ka sungte'n bel a muhmai unle a mihoihlouh di a theipah ua, kei a hon thuhilh chiangun hilh gim ka namkei. Ka nulepa thu sang in ka tangvalpa thu ka mang zaw a, ka omdan tuh nidang a bang nawnkei. Ka nulepa' lunggimpih TA tuh kahi peuhmah ve.

Hunte paizel in Cl-XII exam bang kahon zouta a, ka zohnung ni3 hiam paipan in ka tangvalpa toh ka kitaipihta uhi. Innkuan khosak haksa apan kahihman in honna deihbawl kei zomah uhi. Ka pasalte innsunga kal khat khawng ja omnung in a summuhna uleh a kipeihna uh ka theikhe ta hi. Daan in a phallouh phetlouh, Pathian inle a deihlouh, khamtheih thilte zuaka kipei a, neihle lam hiaizah ana lamkhia ana hi laizang uhi. Ka ngaih a pha hetkei. Huaihun apan lungsim noplouh leh lungkham kana panta. Huaihun in ka pasal in laisim a tawpsan a, keile a tawp cu kahita mai ve. Cl-XII zaw IInd in ka pass sam aka.

Ka kitenzoh uh kha 3 hiam in inn ka tuan ua, hihtheihdang om tuanlou ahihman in, hon inntuanna uh siamkhawl a siamgat ka ziltawm a, ka ganta hi. Ka pasal leng a laizilte nektak chinglou ahihman in nitha kiloh a kuan panta hi. Chikmah a nasem ngeilou pa tuh a gimthei mahmah a, a chang in tawldam deuhna di chi in hon peg cheuh zel hi. Huai tuh PANAAI ahih hong kipatna ahi.

Ka innpite ulah, a sumdawnna un siatlam hon manoh in sawtlou kal in hong ki inngam maimah uhi. Aw.... sawt a daihkei tel mai mw. Khangkhat hoih le a daihkei. Neihlelam a lamkhiaksa tengteng utuh 'tuibel I lehbut a,atuiteng bobei' mah a bang hi. A khosakna uh kou sang in nengchik le a kaang zaw tuankei ua, tai ngamna di le ahikei uh. Ka nulepa tuh lungkham in teek kun lam a manoh maimah ta uhi.

Gamsung ki-ukna dan in a phallouh, Pathian inle a phallouh, summuhdan thanghuai leh siangthoulou taka kipei na nana tuh a lohching sawt hetkei. Agah tuh atu-le-ta te'n azal kazou ua, ka deihkhop mahmah ua, ka gaw niitneet zozen uhi. Kei ngei leng, ka nulepa thu kana manlouh tuh ka manthatna ding ana hi maimah ve…..

KEI TUHGAH MAH AAT kana hi nilouh a, kuamah ka ngoh thei tuankei.

(Hiai tangthu tuh ataktak a thiltung, I khotang mahmah a mit a muhtheih ahi. A thuak kha tampi I om dinga, a thuak nailou leng I om ding. Hiaite tuah di ahi I chituam theikei. Pilvang ni.)

KINGAIHTUAH THAK NI

~ Nek-le-taak zongtu nahihleh, bangchi'n na zong a? Pathian deihdan in na zongkha hia? Ahihkei leh nang angsung na khualman a I tuailai tampite hinna latu nahi maimah hia?

~ Naupangte'n nulepa thu I mang na hia? I nulepte I tung ah a kipak na duam? Ahihkei leh, a mittui uh lungsaktu I hikha hiam?

~ Nulepate, I tate I thuhilh chiang in 'noule na huchi uh, na khachi uh' hon chi maimah uhia? Ahihkeileh I omdan apat gamtat hoih, kampau kilawm leh thilhoih zil di a mu uhia?

~ Pate aw, Panaai bangzah I om ua? Zingkal lam a ZION, nitaklam chianga LION bangzah I om ua?

KINGAIHTUAH THAK NI

BIBLE AH....

* Nou semgim leh puakgik po tengteng aw, kakiangah hongpai unla, keiman khawlna konpe ding. Matthai 11:28

* Naupangte aw, Toupa ah na nute uleh na pate uh thu mang un; huai tuh thildik ahi ngal a. Ephesate 6:1

* Dikloutak a sum mumi tuh, vasa amah tui loupi opkeuh bang ahi. Ahaatlai hun in a taan dia; ahun tawp ah mihai asuak lel ding. Jeremia 17:11

Pathian' thu mah ah kibulphuh thak ni.

_______Kipak______

©Siamsinna Leh Vakiangbu