KIGUIH!

By ~ Kattie Mawite

Chimhuai thei lua chi in nikhat internet pack thun din ka pawtkhe mawk hi. Ka voda offer ka etleh 45man I thunleh 450 MB,15 days, 3G ana om nawn ahihman in huai ka thunpah hi.

Ka tunkik phet in FACEBOOK mah ka lut masa pen hi. Friend request bangzah hiam ana omsuk deudau a,a limlak uleh bang le en selou in ka CONFIRM suk vek ngal. A zoh sawtlou nung in message honglut ka et leh "Mawite kipak" hon chi cheuhchauh a "teile tipak" chi'n ka thukkik ngal hi. Dena ka confirm te chu ahipeuhmah ve, ka chi lungsim hi.

Message hong lutzom zel a, kenle ka thuk zela, ka houlim tui mahmah uhi. Thu vantang mai2 khawng genkhawm in ka khomtawk un nuam kasa mahmah uhi. A hounuam a, a piching mah2 hi in ka thei.

Amah toh kihou tuh ka 'daily routine' a hong hita. Zingkal ka online chiang in MORNING WISH ana omkhial ngeikei a, nitak chiang in ka ki GOODNIGHT zel uhi.

Hunte hong paitou zel a, ka lawmpa'n hounuam a honsak thu leh hon ngai ahihdan hon gen a, kei ngaihdan bel ahi kholkei. Ken chu FB khawnga kingai chih khawng omthei diale ana koihlou,banah ka lungsim le kana pekei bok.

Niteng in hon itna thu hon gen gige a, ken bel ka theihngei louh ahihna toh ka thupi sim vakkei. A profile ka check chiang in a limlak bangmah muh di a omkei a, "na limlak hon khak in ka munuam" ka chih chiang in, "atak in ikimu na keidia" chi'n hon dawng zel hi.

Omna khawng kidong chian in, phone no. Khawng ka kipetuah uhi. A aw nem leh a pichinna ten hon zougawp ngiingei zaw ahi ngei dinga, kenleng ka THEIHNGEILOUH PA' itna tuh ka sangta hi. Ka niteng hunzat a nuamthei mahmah. Mu ngeikei mah leng, a awsuak khumtak te'n ka lungsim a luahzou vek a,midang ngaihna himhim ka neikei. 

Hunte hong paitou zel a, ka kal ua itna guizam leng a kip in a detdou huntawk in ka thei hi. Kimu ding chisek mahle ung, kei mawk pawtkhiak theilou ka hihman in hunlem aom theikei. Tuadan in khathum bang ka zangliam man uhi.

A tawptawp in, ka itpen toh kimuh didan ka hon ngaihtuah ta hi. Ka kihou ua, gari nei ahihman in "ka venglam uah hong taisuk inla, huaimun(kimu di ka chihna mun uh) nongtun chiang in hon call lechin" ka chihleh "awle" a chipah hi.

Kimu di chih ka ngaihtuah chiang in ka dip ahawm a, lah ka kithalawp zel a, kana guk buai mahmah hi. T-shirt blue leh khekol tight ka neih sunsun, a luisim tak ziaka tonsim nipnep ka teng a,ka khuknuai tan ah ka kaiton tou hi. Kaman toh kiton in call hongpai a, kimu di ka chihna mun uh tungta ahihdan hon gen hi. Keileng kilawpsim lah linsim gaugau in awlawl in ka kikhiin tou niitniit ta hi.

Tuani chet in ka pam ua meiteite misi a om a, zingkal dak 9 lak hipan ahihman in mi atam naikei. Huaite paipel tou in ka ngaihnou zonbawl kawm in awlawl in ka paitou hi. Ka sakzek ah Bolero khat ana khawl a, huchilou midang himhim muh di omlou ahihman in, huai gari a tuang pen tuh ka ngaihnou hidia gingta in ka naihtou chot mawk hi. Aman leng honna khutvan a, honna sam hi.

Ka naineh tou a, gari sung ka en a, amel ka muhleh...…..

Aw.. maizen, ka dip a hawm a, ka kahtha a suak. Ka chimul bang a thou hial. A mel ka en ngam nawnkei. Huai ka khatvei et a kamuh tuh ka deihkhop mahmah a,a lehlam ka ngatsan maimah ta hi.

Paulou a kiksan hial di lah nuam kasa kei a, houpih di lah ka ut mahmah kei. Amah gari sung ah atu a, kei apua ah nuam salou tak in ka ding deelduul hi. Aman leng gari sunga lut din ahon zawn a, ka utkei bilbel hi. "Bangchi e kisathei na chia, honglut ve" honchi a, ka dawn didan tuan theilou kahihman in "I" chihteng in ka dawng bilbel hi. Amel ka muh apat a INTENTION ka thei a, banah amah ngei leng ka theihluat, papisa,ahihban ah, nungaknou kahihlai apat FLIRT chi a katheih, ka lauh gige pa an hi laizang hi.

Gari sunga lutdin hon samsam mahleh ka utkei a, "kana pai phot di,painuam ou" chi in, ama hon dawnna le ngak nawn selou in ka paitum san hi.

In ka tunkik in ka tuike nuih veivuai maimah hi. Ka hehtha asuak a, akhenchiah ka nuih bang aza zel a, keikia in ka om liailuai nilouh hi.

(Atak a thiltung pansan a gelh ahi. Nungak tampi hiai bang tuak a om ka gingta. Tua ahihman in pilvang ni. "Khemna a na lutlouh na ding un kiging gige in thum un" Matthai 26:41a)

©Siamsinna Leh Vakiangbu