PALLAI NITE

~Lian Khuptong

Alamdang Pathian Itna' 'khovel nopsakna leh gentheihna tepanin Tuun sungkhatpan mimbang ka hong khangkhia hi. Deihthoh takmai leh iitakmai'n keple huihmut dingnah tomphallou in ka omhi. Kep leh etkolna nuaia kasenchiil panin kapiching dong in, duattak leh deihthoh takin kep kana hi. Sianhuaina toh hucihin ka hongkhang lianzela khovel tak palding in kongkisa ta hi. Mite kitaiteh nalak ah ka taisam hi. Hinkhua gintaksa anaa nuamchiam kei alai hawlpawl in lakloh takin ka omhi. Pallai amm'n nuamleen tuh ka hinkhua aka nopsak ahih hi. Maban etna'n kalsuan touzelin ahak-anuam phutkhak dandan in kahong phuh hi. Huaihang in hinkhua zatdan ka etchiang in lungkhamna leh mangbatna ten nisim'n hongtuam tawntung hi. Ahakdan pengen siamvual ahih keihial hi. 

Huchitazong in taikhua tuh hongvak zelsam a lametna thak honguan zel hi. Naa khatpeuh zoh kuhkalna leh thuakhaatna lou toh pangtakpi mah ngai hi. Khovel zoh omvengvung kitaiteh nalah hat kidelh phalou lam hita hi. Lungkhamna leh dahhuai nangen tuabangte theinapi'n, zong khangthei bangkilou zou mawh hi. Khovel damsung huntomnou khiaklah huailou napi'n tomchik nopsaknate mah lungsim luahtuh ana hizel telmai hi. Pallai amm huaidan theinapi'n sa'bangtatna nga banglenna enkik zual taleng Sianmang et'n kakilawm diam! 

Tangbang kakhan sung huntomnou khiaklah huai mah hiven mo? Mualliam sahunten lah sulkik hongkihei nonlou dia kapaal lainite lah hongvuul pahdia aw! Atom ngeimai pallai nite chiin khelah mahleng khatveini chiangin pakbang vulthou thou ding ahih ngala Sianmang mitka tungna diam? Kapallai nite zatdana aw! Selungva banga pilten leng pallai nite amm'n sutzoulou uhi.

Pallai hunnuam zangden dingkisa ing Tangbang idamsung in, pallai zaitha hatlai nite Izatna ah Sianmang in hong awina'diam? Tomkal tangbang Idamsung Sianmang maimit itunna dingin aw! Hun-le-nite lah hong kheng kheng Tangbang kholhpi lawmvual ngaihte Sianmang huainan iheina peuh ah. Imalou bangsuanni Zunlouh tulpaan kai igamin nangmah hongdeih hilou hiam! 

Aliamsa hunluiten tanglung honzuang sak papah hi. Ngilhning chih lengzong tanglung leng khahnak manghil a omtheilou hi. Amaute itna mahin kalungsung lua den neem tuh ding omnonta lou keikaheina mubang ngaihna lian sialzatam vang hi. 

Naupang kahihlai'n vabangpil kisa bolthei mahleng tuaten bangmah tanhon tunkei hi.Tu'n kahongpi chingta bolthei kisa mahleng kakisak theihna'ten bangmahlou huih nungdelh hita hi.

Kahong theihsiam patleh mualliamsa hunten honataisan hi. Eknutsiat kana himai apaisa hunten lah sulkik honghei nonlou dia? Bolkik utmah leng aliamzou tahi. Mimbang inlah senchil theihnon keidia'dahin luankhi toh suni katumzel mai! 

Tangbang kadam dia Sianhuai in kamachiang khiimkhua zingte palbang nangdin ka taksa hong upa'n ka khangzel dia lungkimna toh kamaimit suan ning Akpi'n akhah zaknuaia anoute opkhumzel kamuhten luankhi daisak hi. Aw kasenlai hunnuam lungsim siangthou takmai'a ngabang lenlai nite nuam e Ngaihtuahna beibanga lungsim moltaka lenlainite galin dawnchim louh hi. Tangbang kholpih vualtetoh lenlai nite zong lailung adamthei nontalou hi.

Pallainite laa kangaih leh hiaibangthu teng hongpot mawk! Akongelh mawkle athutengzong taizak gopdek hi. Palai niten mualliam ma'n sabang itatna ngabang ilenna te sanggam nalung akimna mo? Sianmang in awina diam mualliam hunte mah ngailai ding mo? Senlainite mah sutsut ding mo? Pallai hunnuam mualliam ma'n thou inlan lamni...

BEITA

©Siamsinna leh Vakiangbu