NUTE’ KIANG A LAIKAK

Shared by ~ Kei’min Pau Ngaihte

Story composed by – Summinlun Vualnam 

It luat ka Tunnu,

Nu, “KA KIPAK LUA, NU KA KIPAK LAW MAHMAH”.Hiai bang kampau na kiang a ka gen khak naikei leh “NU KIPAKLUA KA HI CHIH KA HON GEN AHI”.Nu na hoihna leh na thupina kam a gen ding chi leng ka gen kim zoukei ding. Himahleh Nu, na ta mawlchik in hiai bang ka hon gen ka lungsim tawng apan ka hon gen ahi chi’n honna sansak in aw.

Nu, tuisik ka hih apan na hon kem a, kha 9 (kua) sung haksatak leh gimna tampi thuak in na hon enkol tou hi. Kha kua a hong bei a, himahleh Nu nang’ adi’n bel kei ziak a haksatna leh gentheihna na thuak kipatna ana hizaw hi. Khovel a ka hong piankhiak apan ka awging na zak masak pen “NU KA KIPAK” chih hizawlou in na anglum leh nawitui lunggulh a KA KAH GING ahizaw hi. Naungek ka hong hi a, nang’ adia gimna leh haksatna behlaptu ka hong hizaw hi. Ka zun-le-ek siak ngai in zankhang, midangte’ tawldam hunlai tak himahleh nang bel kei ziak in ihmut khamlou zen in na hon dontou hi. Hiaiteng thuak mah lechin, Nu aw,ka gim ka tawl chilou in kei nopsakna ding ahihnakleh chi’n na hon kemtou hi. Hiaiteng ziakin “NU KAKIPAK LUA”

Ka hong khanglian a, himahleh keimah khe a ding theilou leh ding zoulou kahih lai in keimah khe a ding diing dan na hon sinsak hi. Kum 3 ka hong hi a, school kai dia ka kuan ding chiang in ka tiffin ding zingkal beltak a hon bawlsak in school kai di’n na vualzawlna hoihpen toh na hon kha khe gige hi. NU NA AW NEEM ZAAK NUAM HINA MAIZEN E NU. School kai tawp bah-le-tawl tak a ka hong tun chiang in na meh-le-buh huan limpen toh na hon vaidawn gige hi. Hiai teng honna hihsak mah lechin, na tung ah kipahna sang in na thu manglou leh na tung a lungkimlou in ka na om khanak. Nu hiaiteng na hon ngaihdam sa himahleh NU NA NGAIHDAMNA KA HON NGEN THAKTHAK AHI.

Nu ka hong khanglian hiaihiai a, ka tung a na hoihnate theisiam deuhdeuh ding bangin na hon lamen mahmah ding hi. Himahleh nang lamet louh dan in na ta, ka haiman in na tunga hehna ding leh lungkimlouhna ding ka hon hau zaw hi. Khenchiang bangin na hon thuhilhna leh kei’ a dia na geelkholhte bang kei’ hoihna ding ahi chih theilou in haihuai bang sa in kana kipilsak kha naak hi. Nu, hiai bang a ka hon bawl hun in leng lungduaitak leh neemtak in na hon taihilh a, kei a lungke tuanlou in na hon makaih touzel hi. “NU KAKIPAK LUA”

Kum 10 ka hon peelta a, khenchiang in ka puan-ak bang, ka Moja, ka niik te bang ka sumang khazel hi. Huaite kia hilou in kei mahmah leng hiai khovel a lamhaih in ka paina ding kichian theilou in kana vakmang khazel hi. Hiaihun in, ka van mangte kia hon muhsak lou in, ka vakmangna apan ka lampi ding hon kawkmuh in lamdik ah na hon pii zel hi. “NU KAKIPAK LUA”

Zingkal baihtak a thou in, gilkial-dangtak a school kai dia ka kuan ding ngaingam lou in ihmut khamlou pipi a thoukhe zel in ka an-le-meh ding limtak na hon bawlsak zel hi. Himahleh, hiaite theisiamlou in na meh-le-buh huante limlou chi’n ka hon phunsan khazel hi. “NU HON NGAMDAM IN AW”

Sun nitumin tawlngalou in naa nasem a,khua hong mial in thilsiam teng in amau tawlngakna ding mun chiat zuan mahle uh, Nu nang’ adi’n bel tawlngak hun chih a omkei hi. Na ta nawitui duh a kahging in hon phawngzel a, na ta’ zun-le-ek hah a hong hun zel. Nang’ adi’n zaw sun-le-zan a kilamdanna a om tuankei hi. Na kipiakzohna leh na hon itna thupi in lian hina maizen e. “NU KAKIPAK LUA”

Nu, hiaizahpi kei’ adi’n na hon hihsakta a, ka tunga na hoihna ka hon din seng zou ngeikei ding. Himahleh, na kiang ah ka hon ngen lailai ding. Maban ka kalsuanna ding ah nang makaihna lou a lamhaih ding ka hi, na hon thuhilh zel leh na hon makaih zel ka hon ngen lai hi. Kei’ adia khitui luang a na thumnate’ ziak a hiai tan tung kahi lel hi. Maban ah Pathian kiang a na hon thumsakna ka hon ngen lai ahi. Na ta tung ah thilhoih hih chimtak hetken aw Nu. Khenciang in pil ka hong kisa kha ding a, nang hon poimoh nawnlou ka kisak hun bang a hong tung ding. Hiai hun chiang in chimtak huai leh ninghuai hon sa mailou in nang lou a bangmah tan tunglou ding ka hihdan hon hilh zel zaw in aw.

Ka zohna dingin:Nu, na kiang ah “ Nu ka kipak” hon chikha ngeilou ka hihleh, Nu tuni in “KAKI PAK”Nu na kiang ah “Nu hoih leh Chin pen na hi” hon chi ngeilou ka hihleh” Nu tuni in ka hon gen.Nu, na kiang a “Nang bang nu ka neihkhak ka hampha lua” hon chi ngeilou ka hihleh”Nu tuni in ka hon gen ahi.Nu, Pathian kianga “Nang bang a NU HOIH leh MANPHA hon piak ziak a kipahthu gen kha ngeilou ka hihleh”Nu, tuni in Pathian kiang ah kipahthu ka gen ahi.

Nu, Pathian in na khan kumkhua sawtsak henla, koute’ adia vualzawlna tamsem luanna naak na hihtheih gigena ding in hon ompih zel hen. Ka tung a na hoihna hon din seng zou ngeilou ding himah leng, Na ta deihthoh tak apan hiai kammal mawlchik honna sansak in aw: “NU KA KIPAK LUA, NU KA KIPAK LUA”.

©04082013

©Siamsinna leh Vakiangbu