SANGGAH KA LAITAN SINGDANG TAN DI'N KA PHAL KEI

By ~ Mun Muanlian

Note : True story.

Sunkhat kholak ka vak leh vaite naupang 2 borasia, puansia niapnuap silh ka mu a kei le ka lungtang ah tha khat in ka neulai hon phok sak guih hi.

Unau thum ka pha ua numei 1 ka hi uh,ka neu lai in ka pa'n zi dang hon neihsan a ka nau neupen uh pian kum ahi. Ka nu'n hon na vak touh charchar hi. Kum 15 vel ka phak in ka nau neupen uh kum 5 ahi pan a, huailai in ka nu'n damlouhna nasatak hon tuakta a amah leh amah zong kimuang zou nonlou a, " bawi nanaute nu leh pa in hong pang inla na pa'n hon deih kei mah leh na naute hoih tak in nakem in maw ' chi in ka nu'n hon gen a, " nu nang toh kemkhom d i hi bang na chi kei ding; nong dampahta di nu. Kou non khualna,  na lunggim, na thagim toh nu o, hon pai san mahmah ken o " chi in kap kawm in ka nu ka kawi phei ta a, ka nu'n " Bawi kapken, ei thu lah hilou ahih sam chia Pasian kiah thum ni maw " hon chi a ken le awle nu chi in thumna ka nei ua,  ka thu nget zoh un ka imu ta uhi. 

Zingkhua hong vak phet in kei le ka mang selua mahmah ahih chia ka nu lupna lam ka manoh leh ka naupa na ihmu lai a, ken le " nu na hoih deuh hiam,  bang na chi a ? " chi a houpih sawm in nu... ka chih leh hon dawng non takei a , kei le khophoklou in ka puksuk a,  ka nau nu'n le hon thei a ka nu sam in  " nu o,, nu o,, a chi zel a,  kei hon enphei zel a u,  ka u !  nou hon paisan sawm na hi uh hiam ? Kou nanau neugel koi ah nou omlou in bang chi khosak ding ka hi uh hiam ? " chi in a kah leh ka invengte un thomging a zak uh chiang in ka nu damlou gim lam thei uh ahihman in kintak in hon delhpah ua kei muntuam ah hon puakhia in ka lu khong tui hon suk kawtsak uh leh khua kong phok khia hi. 

Inn lam ka etphei leh mi buai vengvung ka mu a ka nu si chih ka chian mahmahmai ta hi. Kei le kintak a delhphei ngal ka sawm leh kuaman hon phal kei zaw mah a, ka omna mun ah ka mittui a kekhia zungzung mai ta hi. Awl in innlam ka zuanphei a ka nu pum kawi in ka kap khia zungzung mai ta hi. Tun o, thou o na lenglate a ding ning zu hong lup ve maw chi in ka kap a,  bangbang teng lou kha gop ka diam ka pa sanggamte'n na zadah zawmah lai uhi. Ka nu kivuikhit ni nih zoh in miteng veng khin uh a, kou unau tengbek inn ah ka om ta ua, zan khat ihmu thei mahmah lou ka hihman in inn polam ka pawtphei leh ka sanggamnu khavak nuai ah na kap in laa na sa...

TUN AW NA LEENNA THANGVAN SANG PA'N
HONG TUALKUM INLA
NA VON SANGGAH TENG HEH HONG NEM VE MAW..
KA SEENVUALTE A TUUN LEH ZUA TOH
NUN NUAM IN HOULUNG KUM UH E
NA VONTHUM TENG LEL LIANG LUA VE UNG.
TUUNNU NGAI IN ZANKHUA SAWT
MAI MIT SING THEI KEI UNG.

chi a a om laitak in bawi aw zankhang lai a hihlai ah bang hih na hi hiam i nu samsam leteh zong hong dawng thei non lou ding hi ven ong pai in lumta ni, limtak in imu ni ka chih leh ka thu hong mangpah vanglak a ka gei ah lumsak in a sam ka zut leh hong imu pah hi. Kei zong khovak leh nek tawm ding zon ngai ahihman in ka nasep ding phok kawm in ka imu a zingsang tung in ka naute thoh khiatma in nek ding teng na su fel in hong thoh phetphet un ann ka ne ua,  mi nek bang in anlim nounou mehlim nounou ne zou kei mah le ung ka muh khom uh ka nekte uh kou a ding in a lim mahmah mai hi. Ann nek khit in ka naute kiang ah inn limtak in na ngak un maw , kei lou vakuan ning chi in ka kuansanta hi.

Ken zong lou ka kuan santa a ka lou kuan nalam ah,mite anu, apate,  a innkuante toh lou kuan nainai ka mu a, ka khasiat tha suak mahmah mai hi. Lou malai ah nidang a ka nute toh ka pankhomna ua keikia kong pan chu kinaupang simlai lunglen huai mahmah mai a ka lungsim in ka nu ka houpih a ka et leh kuamah na om ta kei a, ka kapkap nemnom mai hi. Lou ma lai ah.ni hong tum dekta a, anhuanna ding sing ka liang dimtek in ka pua a ka sanggamte'n inn ka tung in hon na vaidawn siausiau uhi. Tha nem dikdek a om himah leng ka naute hon pahtak dante uh ka muh chiah ka thabang hong thou thak a ka lung nuam mahmah mai hi. Ankhong huan sa in ong na koih ua ka kisilna ding tuikhong tawisa in na koih dimdiam uhi. Kisil khin  an nek khit in khua hong mial a khapi tangnuai a naute toh tutkhom neinai a kipah mel pua ka om sam kei uhi. Zan hong sawt sim chiang in boite lumta ni uh chi in ka luppihta hi.

Kei chu ka niteng subject gamlak manoh ahi mai a, ka lawm hoihpen tem (knife) tuu (spade) leh hei (axe) ahi maita hi. Tuadan in ka khosa toutou ua lunglenna teng zong hong bei huaihuai panta hi. Nikhat ka nau neupen uh vengsung a lawmte toh kimawl ding in vapot a akimawlna ah min na simmawh bawl mahmah in nu neilou, pa neilou nang hon panpih ding zong om kei chi in na zah kou gop ua, na vua uhi. Kapsa in inn hong tung a, " uu , nunute la hong tung hakna uh e. Mi'n kei nu neilou pa neilou chi'n hon simmawh lua uh eive u. Nunute kiang ah va pai ni ' chi in kap ngutngut mai hi. ' Kei ka nu si a,  aman si cihlam theilou ahihman in, khualzin ahi chi in ka na khem kha hi'. Ka gen d ka theita kei a, ka mittui hong pawt hi. " Uu, bang hang a kap na hi hiam ? Nunute om na ka thei, Zin chi hilou na hiam ? Pai in va sam ni ' chi in ka baan ah hon kai hi. Chihna ding ka thei mahmah kei a, kuamah kikhem zou sam omlou in ka kap ua,  a gen teng mah gen in hon kaikai mai hi. Hualai tak in ka naunu pen ki-im zou non mahmah lou ahi dia, hong kapkhia in ka naupa uh tai ek in,  " Nunute sikhinta hi . Mi'n hon chih d mah ahi bawi " a chikhia ek ma ta hi. Ka naupa uh leng kapkhia lualua a, "bang hang a tuni tan hon im na hi uh hiam ? "chi in nasa tak in kap hi. A tawp in kei a u pen mah om ka naute ka zol a, " bawite o, topta un .Kapkap le  zong aphatuam omlou hi . Kilunggim sak maimai leh kitha gimsak mai i hi lel uhi. Tawpta un  " chi in ka khem tawpta hi. Ka vengte un koutheih houtheih chi teng in hon kouta mai uhi. " Nek ding neilou nu-le-pa neilou. Pa damlai a pa mel muloute" chi khong in hon hou zialzial mai uhi. Mi hon bawlnate ui khat zong hichi liang a kibawl ding in ka um kei mai hi.

Nin paih ding zahkhop in hon mu maimah uhi. Ka innsak ka inkhangte un, kei leng ka guah (rain) thuakna lam in ka khua hong sik a kalkhat bang lupna ngak a ka om leh, ka nek ding uh na bei man hi. Kei lah nasem dia kuan khia zou mahmah lou ka naute ka muh chiah hehpih lua ka damlouh lam phokpha lou in lupna tungpan thoukhia in ka tempawng ka mat leh,  ka naunu'n, " u,  koi a pai sawm na hi hiam, na kilunggim sak lua . Ken Pasian in i nek ding uh hong pia mahmah ding hi. I nau toh na om unla ken ka va zong ding hi " chí in hon khaam a,  amah tuu (spade) khat leh tem khat man/la  in. ka gal et leh ka loulam uh manoh in apai tum tou vangvang mai hi. Ka lungsim a nuam thei mahmah kei a,  naupang amah kia a koi ah bang a chi de o chi in ka kingaihtuah vungvung mai hi. Ka lungnuam thei mahmah lou ahihman in thumna'n  ka ngen a, " Topa ka nau na ompih inla damtak in inn hong tungkik sak in" cia ka nget leh ka lungsim hong nuamtuam deuh hi. Nitak lam in apuak khop tek in hakai ong pua suk liailuai mai hi. Ka nau ong pai ka muh in kipak lua in ka kha bang hong sia a, thumna ka lungsim ah nei in kipahthu ka gen kawm in ka mittui bang hong luang khia zutzut mai ta hi. Ka nau ka sam a bawi gimlua niteh tawldam phot in ka ci hi. Amah pen ong puaksa hakai kipaktak in huan ding in kisa hi  " Ken kong bawl ding bawi va tawldam phot in " chii a ka sawl leh, " u,  ken kong bawl ding hi. Nang na dam chia na bawl vek ahi. Kisuanglah ken chi a,a mahmah in huan mengmeng in, a min tak in kipak tak in ka nekpih hi.

Ka Chinat kal 2 bang hong paita a kei le hoihlam ka manawh hiaihiai ta hi. Kalkhat val bang hakai ann a ka set nung un,  ka naupa un kham gopta ahi diam ah ne ut nonlou in innmai ah tu in nitum zul in mi eng vungvung a kapkawm in laa khat na sakhia hiauhiau hi.

" MINU MI PA VAITUNG DIAMDIAM UH E,
KEI NU KEI PA KOI A VAITHAM DEN HIAM ?
NUNU, PAPA GAL IN HONG DON VENG
NA VON SANGGAH THUM TE'N  
BUHSIH ZONG NE ZOU KEI  VE UNG E ,
HAKAI  LAIKUANG IN UM MAITA UNG."

cih laa sa kawm a na kap ka mu hi. Kei le hoih mahmah ta ka hihman in ka va pawt a, ":bawi, tawp o , tawpta o bawi,  en zong zingkhong chia alim nounou buhsih tang mah neta ding i hi uh. Lou a ka chin, khai/ haichi te min dekdek ta hi. Nipi kalkhat ban ah netheita ding i hi uh " chi in ka zol a,  ka ne sak zou sam hi.

Kum 2 zoh in kei le kong lian deuhta a, mikhut nuai khong a sumloh a kiloh thei ding dinmun in ka om ta hi. Ka nau neupen uh le pil mahmah ta hi. Ka khosung uh pen singtang ahihman in nitha kilohna ding a vang mahmah mai a khopi lam kon zuan uhi. Ka ngaihtuahna ah bel loukhou a om sang in kiloh nuam zaw ding cih ka ngaihtuah hi. Town sung kong tungta ua kilohna ding ka zong koikoi a, kiloh theihtheih na ah ka kilohta hi. Kilohna khong ah mite musit in ka om koikoi mai a, khat veivei kei leh kei kingaihsiat dekdek hun bang a om hi. Nitha kiloh tawm in ka naute ka vak hi. Nikhat kiloh tawmna ding ka muh louh chiang bang in ann ngol dekdek mai ka hi uhi. Ka lungsim khat ah chu mite'n bang chi tuk in hon musit le uh zong ann ngollouh na ding ahih nak leh chi in ka sem tentan mai hi. Haksa sa kawmkawm in nitha kiloh tawm himahleng ka hihtheih khom in ka naute C-kul ka kaisak sam a, amau le a skul kaina lam uah min na musit mahmah mai ua, kei kiang ah hon gen zel ua, " uu o, hehpihtak in c-kul hon kaisak nawn dah mai in. Na sum le a pammaih a, huai tengtang in annlim ann al ne le hlok zaw ding hi. Min school a hon houpihnate uh thuakhak thei lua hi," chi in hon gen ua. Kei le poisa mahmah lengle ka hih thei öm samlou a, haksat gentheina teng i tuah ding mah ahi. Tua hi kei leh lai kisiamlou ding a, mi nek teng ki duhgoh tawntung ding ahi chi in ka thuhilhta hi.

Amau un le ka thuhilhna uh hon mang sam uh a nei zoulou sasa in skul ka kaisak tentan mai a mipuan-ak silh bang ka guan zou kei a akhen chiang in ka lungsim khat in a laisiam dingdeih mawk leng le ka chomlah trentran sam hi. A tawpna in bang chiang tan mah le kitun zou ken teh cih khong lunggelna  ka nei mawk a,  a pawl 4 pawl  5 aphak chiang un Bible sim dan khong ka zil sak a huai khong hon siam chiang bang in c-kul kai le ka lungsim guk tak a tawp sak mai ding bang lung ka gel thethup a atawp na in dicision ka laa a ka sihkei nak uh leh chi in ka chom zoh tan chom tentan mai ka tum ta hi. Nikhat kiloh ding a ka kuan leh ka seppihte ka mahazon pa kiang uah ka tang ding in mi na tonpih maita uhi. Kum hong beikuan chiang in min ann tampipi a laa ua sum zongte'n le sum muhna baih a sa uhi. Kei a ding in ciklai peuh in kibang mai hi. Ka sepna mun uh ka tung in aneitu pa'n nang hon kuan nonlou ding chi in na lawmte'n midang hon tonpihta hi , hon chi maimah uhi. Kei le mai khing nemnum in ka kilehkik a  sep d dang zong  ka thei zoh nonlouh chiang in bora sia khat khai in nala kuak teng zui in siksia ka zong koikoi ta mai hi. Tangvalnou khat a d in zaw zum huai thou mah maw. Himahleh nikhat nasemlou in sum mulou hi leng  buai thei mai  ding ka hi hi. Damlouh hii tang tuak mawk le ung le kivenna d himhim ka nei kei ua ka khosak dan uh chu akpi toh ka kiteh hun bang om in ka kingai sia vungvung mai hi.

Kingaihsiatna in chu khovel hun ka zangta mai hi. Hibang lawmlawm tuak ding a mihing a na piang ka hi maw? chi khong in ka pumdim ta mai hi. Ka nau neupen pa uh le a skul kaina lam ah nek thei khong pua zel in ka nau bang na gong kou ek-ekh mai hi. Ka naute'n huai thu siate hon gen chiang un bilbang dim salua gop in khat veivei bang chih ding theilou in ka tai kha zialzial maimah hi. Nikhat ka nasepna gim lua mahmah sum hon piak thei nailouh dan thu hon gen in kou lah buai mahmah ka hihman un gimtak leh lung ngai tak a ka omlai in ka naupa'n  " uu, kou zinghal chia sum non tawi theikei uh leh school non kai nonlouh di uh, hong kichi "chi in hon gen leh eilah nitak meh d natawm omlou lunggim leh thagim toh ka hehtha hong suak phut mawk in ka naute bang ka zep ziarziar kha mawk a, ka nauneu pen pa uh khasetak in ka pam ah kap ka mu a, ka kisuanglah mahmah mai hi. Zolphei pah tum napi in munkhat ka dek bawl a ka et leh kahtam bang hon lou in,

TUN LEH ZUA AW KOI  A VAITHAM DEN NA HI UH HIAM ?  
KEI  ZONG  NA SIANG AH ZALNUAM VENG ,
NA SIANG AH KEI ZONG HONG KHOL SAK VE AW,  
TUUNU AW,
hon chi a;  ka lungsim hon khoih kha mahmah mai a, a guk tak in ka naute theihlouh kal in ka mittui ka guk nul keuhkeuh ta mai hi. Kei le kaplou dan kineih in ka naute ka khem a," bawi thai ciah i pia ding uhi . Tawpta un, chi vel in ka khem tawp a, ka neihsun uh ann nekpih ding ka kisak lai tak un.

 Ka naunu'n chu thil a thei siam mahmah mai a,  aneupen pa'n chu theisiam khol nailou ahihman in meh bei a ann ne dek ka hih sam man un aneupen pa'n, "uu, meh ding zong kinei zoulou a bang chi dan in ka school fee uh pia zou mawk ding na hiam ? " chi in hon gen mawk a ka lungsim chu hon sunkha mahmah mai hi. Paukhia thei zok lou in ka ann nek bang ka ook gop kha zezen hi. Ken le," bawi, Pasian in hon pia ding hi lunghimoh lou tak in i neih sunsun uh ne phot ni tunni chiang dong i nek ding uh hong pia ahihleh tua zong hong pia mahmah ding hi " ka chi a, ann ka ne ua ka nekkhit un ka naute lai ka simsak a a theihsiang khit chiang un ka luppih hi. Zan hong sawt sim hiaihiai a ka naute skul kaisak zoulou taktak ding ka diam cia kingaihtuah in sum muhna ding mahmah lah ka thei zouta kei hi. Skul fee gen tak louh meh bei a ann nekpih ka hihlam khong kiphok in ka naute bek mikhat suah zoulou ding cih lung gelgel in kua mah theihpih louh in zankhua vak in ka mittui ka nulnul maita hi. 

Zingkhua hong vak a lunggim tak in nasepna lam ka zuanta hi. Sunni tum in ka nasepna mun ah lung ngai dide in ka om laitak in ka seppih ka lawmte khat in hon heh pih mahmah mai hi. "Lawm aw bang lunggimpih na hi hiam, kon panpih thei ding bang a om ? a hon chi a kei le mi hon bawlna teng thei ka hihman in "lunggimpih bang mah ka neikei" chi in ka chihmawh nuih mawk hi. Aman le hon gen zom teitei a kon panpih theih ding bang om hiam ? Kisuanglah lou tak in hon gen in hon chi a kei le a tawpna in ka genkhia suk ek mawk a aman le, "lawm o, lungkham non ken den chiah nasep tawp ciah inn hong pha in " chi in hon zawn hi.Amah chu anu, apa zong damlai ahi a nek ding kisam lua mi ahi kei uhi. Amah lohsa a innkuante'n a eng ngei het kei hi. Kei zong nasepna ah zan a ka loh la in amau innlam ka zuanta hi.

Ka lawmpa'n hon eng bawl a, " hi tan vei na kisemkhomta hotel ah meh lim deuh khat ne ni ., non khelaih ngai ding ahi " hon chi phut mawk hi. Ann hotel ah hon lutpih in a deihdeih sam ziauziau mai hi. Kei lah inn a ka naute toh mehna san meh zoulo pan hotel a kei sumseng a an nek ding cih ka lung awi thei mahmah kei a,  kei ka gil kial nai kei nang kia in ne in,  ka cih leh ut mahmah lou in plate 2 sam thouthou a,  ka chii bang ki-thing zou liang hi. Kisamkhin , I mai a om chu  ka neksuk dek laitak in naute mel bang mitkha ah hong lang liailiai mai hi. Ka nek zoh phetphet sum kei hon pia sak zaw mah. Katalai sai o !! Lungkham chu om thou ei. Ken lah hon engbol ahihlam theilou, chii ling duldul kawm a ka piak leh ka ni 2 tha man ka lak toh kituak chet zawmah.  Heiha ! Naute fee hong kiphul,  inn ah naute anntang ding omlou ln lungkham leh mangbang tak in ka ding dedu mai a, " bang ngaihtuahna hihiam hong pai in paita peuh ni, " hon chi a ka zuiphei nulnul mai hi. Ka lungsim ah chu inn mai k tung leh hon paisan petmah in chin bang ka chita diam ? cih kia om mai ta hi. Innmai ka tung un, ka ann nek man teng uh hon pekik a, "na lungsim kon et maimai ahi .

Lungkham kei in. Ka inn uh nai chik ahita , hong pai chi  in ka zuiphei a  a inn uh ka tun un anik, apuan hong kikheng a,  apuansilh lui anaute a lui chihte vel  khutkhai khat a hon guang a hon kha ding in hong kuan hi. Ka kikhen kuan un sum bangzah hiam na poimawh chi in hon dong a,  kisuanglah kawmkawm in, " tulnih"  ka cih leh tulthum hon pia a, " dikkik ding lam buaipih ken na naute zong sa puak in la, limtak in ne sak in maw " cin hon vaikhak a kei lei ngamlouh ding lau in hon leipih malam zawmah hi. Kei leng kipaktak in ka pai a, aman le a inn lam uh a zuan ta hi. Inn ka tung in ka naute sa khong ka puak amuh un kipak petmah in hon tawp liang uhi. Hon van piakte ka et uh leh amau a di in bang mah hi kei mah leh, kou a ding in suangmanpha zah tuk in hoih ka sa mahmah mai uhi.

Kingaihtuah in Pasian kiang ah kipahthu ka gen masa a, kipak lua ka hih man in ka kha sia in ka mittui bang hon pot zutzut mai mah hi. Kanaute an ding limtak in ka huan sak a kipak tak in ne uh a ka naupa bang kipak petmah in, " uu, nunu te toh nekhom hi leng anuam mah ding maw " hon chikhia kha zozen hi. Ka nute a gen chiang in zaw ka lungsim hon khoihkha lua ahihman in ka nehnou kha nak hi.Kei le ka lungsim ong sukha mahmah sam a paulou in ka kingaih tuah dedu hi. Ka naute mai ah ka khasiat lam ka thei sak ut mahmah kei a, bangmah thu gen tam lou in, " bawite ann na ne un maw " chi in ka room lam uh ka zuan phei a,  ka puan ngahte uh hoih tak in koih in ka naute ann nek khit in lai ka simsak a ka luppih hi. 

Zinkhua hong vak zel a, an nek khit in keipen ka nasepna lam zuan ding in ka kuan nonta a,ka naute a c-kul fee ding teng uh ka pia a,  ka kikhenta uhi. Ka nasep pen uh zou dek taka hih man un hih zou lei koi lam ah sep ding cih khong buaipih in lawmpa sum dit zohlouh d mahmah ka ngai thei himhim kei hi. Lungkham huai sim panpan nawn zel kipahnate zong dahna in hon zui zel ka lungkham mahmah mai ta hi.Huchi bang a ka om laitak in kalkhat bang ong paita a, ka nasep pen uh ka zousiangta ua sepna ding dang zong a ka omlai tak un, ka lawm pan permanant work cih d ei diam ah khat hon mu a, huai ah ka nih un ka va kingen ua, ka sem thei nonta uhi. Kum ong bei dekta a,  ka naute zong exam hong zou siangta uhi. 

Mite'n Christmas van lei ding in bazaar lam hon zuan nainai khong i muh cia zaw lungtang bang hon dot kha tiaitiai mai eive.. Kei lah van leina ding gen tak louh lawmpa bat leng pia zoulo ding lawmpa'n le van lei ut sam ding cih khong ahi lel tak hi, ka buaipih thupi pen. Christmas zat bang a ut huai mahmah mai,  lah ka hinkhua a ka ki-et cia zat ngam vual ahi het kei mai hi. Min puan hoih nounou hon silh d ua, kou zaw ka puan hoih neih sunte uh mi nasepna puan dia le kilawmlou khop ahi a, Christmas vel zang lou in innsung ah ka kikulkhum uhi.

Mi a ding in lungdampawi himahleh,  kei a ding in dahna pawi toh kibang lel hi. Mi lak ah kimusak ngamlou in innsung neucik khat ah ka unau teng un ka neih khamkham uh toh ka kizat ta mai mah uhi.Kumte hong bei touh zel a, pawi hun sung bang ong kivang panpanta a, naute admission ding buai in ka buai nawn ta , a lawm pa bat pen athu mai in ka gen zel a ann ne ngamlou zen phial in ka kipei vengvung ta mai a,  ka admit zou hamham sam hi. Ka nau neu pen le pawl 6 bang hong pha a,  a khat pen pawl 8 ahita hi. Ka naute leng a tei mahmah mai ta ua, ka lang ah a pang thei den simta uhi. Ka lawmpa toh ka nasepna uh ka mu fuh mahmah mai ua, kou ka peihlai siah uh septheih dan ahi sim mawk a, a guuktak in ka kipak mahmah mai ta hi.Ka nasepna ua ka Toupa uh chi diam ah a neipa'n tanu khat bek nei a, amah leng nungak simta hi. Ka naute toh a c-kul uh kibang a,  ka naunu sang in pawl 2 in tam zaw hi. Hun ong neih ciah ka nasepna ua a pa hon zui zel hi. Ka omdante vel hon en-en mai a ka naute hinkhua toh kibang salua ahi diam ah nikhat chu ka sunkhol laitak un ka lawmte'n sun ann vel pua zelzel uh a, kei pen min ka meh khong uh a theihkhak ding lau sim in ka pau ngei mahmah kei hi. Amah le ka kiang ah ong khol a, ka houlim zek uhi. Ka min vel hon dong in ken le amah min vel kidongtuah kawm a ka houlim lai tak un nasep kipat hun nawnta ahihman in ka nna ka va sem nawn ta hi. 

Ka tawp chiang un inn lam ka zuan zel a, ka naunu in ann leh meh huan minsa in hon na vaidawn ka muh in chu kipak petmah in ka nau ka tawp hi. Ka unau un nitak teng in kikhopna ka nei zel ua, laisiangthou khong ka sinsak gige a nuam tak in hinkhua ka mang uhi. Kou tantawk in chu ka kipakthei mahmah mai uhi. Ka sepna ua ka loh pen kal teng a la zel ka hihman un ka lawmpa a ding ka kholkhol a, ka ngah phetphet in dit ka sawm leh, amah a ut het kei hi. Ken zong, "tuapen nawn kidit sak ut kei leh kou pen nong theisa mah bang a buai tawntung ka hihman un ka buai chiang a ong tai ngamlou d ka hi, " ka cih leh hon theisiam mahmah a hong saansak sam hi. Nikhat ka vai tun in ka naunu'n ka Toupa uh tanu in kei min vel na dong a, unau ka hihlam uh na kan chianta hi. Huai pat in aman leng hon hehpih mahmah mai a kei ziak kon chi mai di apa kiang ah suncia nek kibat thei chiatna ding in refreshment bawl ding ahihdan na kum in apan le hoihsa lua ahi dia hon neihpita a suncia sangh leh singpi ka nei zelta uhi.

Tua bang khong hon bawl chiang un ka mai zum na zaw hon liahkhuh deuh hi. Vangtah huaitak in kei sik leh tang a si-ngam dia pang gige ka lawm it tak ka nna seppih pa'n damlouhna lian tak hon tuak a, hospital a admit in om a, a result kitheikhia mahmah lou in niteng in a tha kiam zungzung cih thu bang ka za a, ka nu'n hon nutsiat nung in ka lawm it tak in zong hon nusiah ding dinmun in om ta a, aman le kei hon ngai mahmah mai a, hileh zong ka buai dan thei ahihman in hon kan ngam mahmah kei a nitak khat ka nasep tawp in damdawi inn ka va pha a, ka lawmpa bang kei hon muh phetphet in a khasia a na kap hi. A gei a hon sam a, "lawm aw,  na naute kei naubang in ka ngaihtuah a , nangkia a na vak ding a haksat ding dan kon muhpih hi. Khat penpen bek mikhat ong suah pih tum hi mah leng, ahi thei ta kei hi. Pa in kei hong sam ahihman in hoih tak in ong pang in maw . Lungkia lou in nanaute hon chom in mw" NEVER GIVE UP" hon cih zoh in paulou in amit a sisukta maimah hi. Kei leng mi lak cih omlou in ka kap lualua mai a, ":lawm aw, hong thou aw nang lou in  simlei tung ah ka kholhpih ding singdang muzou kei veng " chi in ka kap ruatua ta mai hi. Damdawi inn pan a puak khiat ding thu hon gen ua, kei leng ka na seppuan toh ka hihman in ka innlam uh kin deuh in ka delh pah a,  ka nik ka puan kheng in ka naute kiah thu omdan gen zualzual in ka nusia pah hi.

 Huchi in, misi in ka tungta hi. A nawllam deuh ah ka tu a, kuamah theihlouh in ka mittui ka guk siak den mai hi . Veng kigamla sim ka hihman un kuamah le meltheih mahmah ka nei kei hi . Ka gei a tu nungak nou  2  in hon houpih zel ua,  "Nang a kua pen na hiam ? "hon na chi kheuh uhi. A lawm maimai ka hi ka cih leh mak hon sa sim ua, "  eile a lawm i thou voi . Nou koi a bang chi kitheih ? chi in hon dong ua. Ken le kisuanlah kawmkawm in ka gen miatmiat mai hi. Ka hinkhua vel hon dong uh a " Zi neita na hiam ? " chi in hon dong ua;  ken le, "Nei nailou "  ka cih leh hon nuih san zialzial uh a,  ka kisuanlah mahmah mai a,  ka kun den ta hi.  Amau le kisuanglah sim ahi ngei d ua ngaihdam bang hon ngen thethup uhi. Ken le ka nu sihlai bang ka gelkhia vungvung mai a,  ka nu'n hon nutsiat apat ka lawm neih masak pen ahi .Kare !  ka am hai dek mawk maimah hi. Ka zan khua vak a, khua vak in lawmte teng paikhin vek in a sungkuamte leh keikia ka om ua,  a nu'n zaw hon na thei mahmah sam a , " bawi, misi pen sikhin ahi ta. Na naute a lungkham lua ding innlam na zuan phot in " chi in kei leng ka pai ngal hi. Inn ka tun phet in ka naute sangkah ding in na kithoi linlian uh a,  kei leng bang mah gen saulou in, " kai nuam un maw " chi in lupnatung ka zuan a,  ka ihmu pah vingveng hi. Ka ihmut sung in mang khong ka nei thethup a, ka lawmpa toh ka nu in a gal apan hon en in kipaktak in nuikhawm ka mu a , ka pamlam ka et phei leh ka pa zong a zi a ta toh kei lam hon zuan ka mu a kipaktak in ka delh phei a,  ka naute chi mai lei ka pa tate ka pawm hi. Ka pa'n,  " bawi a chih laitak in ka kong uh hong kikeu a,  ka et leh ka naute höng tungta uhi. Dak ka et leh 2:30pm bang na kawk a, ann ka huan ua ka min phetphet un ne ngal in ka lawmpa inn lam ah ka naute toh va hoh in khuamial ma  a ka paipih leh inn ka tung haksim ua huai nitak a laisim ding uh ka kipel sak hi.

Zingkhua hong vak non zel a nasepna lam zuat a ngai nawn ta hi. Lawmpa chi in it mawk leng zong ann ngol theih ahihman in a phoklou kipan ngai hi. Ka nasepna neipa uh tanu in hon phak khak non in kei hon en a lamdang hon sa mahmah mai hi. A ziak chu hon muh teng in kipaktak leh maitai mel tak a ka om lam hon mu ngei kei hi. Sun in hon sam a mun ongthawl deuh khat ah ka va khawl uhi. Aman le, " bang ziak himhim ahi hiam, misi suun bang a hicia na om, na puak nat mahmah thil om ding hi ? " hon chi a, kei leng ka story teng ka gen a hun sawtsim ana lut man hi. Nasep kipat hunta chia ka dinkhiat dek leh, " tulai in " chi in ka khut ah hon man a bangbang hiam ka houlim uh a aman le hon hehpih mahmah ta hi. Ken leng amin ka dawng sam a, " aman Vung hon chi in " a chi a, kei le kiniamkhiat deuh in, " Uvung kon chi ding hi" ka cih leh, heh piansim in ong kilehhei san a kei zong.

Houpih samlou in ka paisan dek leh na khol dih hon chi guih a , ka min hon dawng hi. Ken le "Thangboi" chi in ka hilh ngal a aman le, "uthang, hehpihtak in hong tu lai in" chi in hon sam a kei le, "tutan na kiang a ka khol thei le ka tantok ahi ka nna ka va sem phot dia, hun awl ka neih chiah i kholkhawm zel na d" chi in ka nasepna lam ka zuatsanta a ka nna ka va sem non hi. Ni hong tum kuan zel ta ahihman in innlam zuat ahunta a innlam ka manawh hi. Ka niteng hinkhua tuadan in ka zang tou zel a, ka naute bang sang innlam ah nek theih vel ana leisak zel a, ka meh ding khong bang uh hon khak zel hi. Kei le nikhat ka nasepna mun ua ka khollai tak un amah ka kiang ah hong tu chet ahihman in " Vung tuban huai dante na hih nawn ken la ka nasepna non houpih teng le ka kipak lua hi. Ka neih khomkhom uh ka ne ding uhi " ka cih leh "kon hehpih a hi, Nang kia kiloh a nasem na naute na chom, nang tuah a hak mahmah mai ding chih kon thei a, kon panpih theihna om sun ahi. Kisuanglah ken" hon chi a, ken le bangmah ka gen nawn tuan kei. Ka tut zek uh leh nasep kipat hun nawnta a ka nasepte uh ka sunzomtou zel ua nitum kuan ciah inlam zuat ahi ka niteng hinkhua.

Lawmta dan in kong kipawl ua a pate leng a tanu neihsun uh ahihman in a thu a mang mahmah mai ua, kei pen in lawm leh vual itdan in ka it hi. A pate'n le ka kipawlh dante uh hon muh uh chiang in nungak tangval dan ahih louh lam hon thei ua,  amah zar in deihsakna lianpi ka tang a, nasem maimai hinawnlou in a nna teng uh enkaitu in hon pang sak saw ta uhi. Ken zong " ka theihna in zong a zil kei hia ka lawmte sep bangbang ka sem ding hi "ka cih leh hilou " hih nang nasem tute enkai ding na hi ta"  chi in a nasemte enkai maimai in ka om ta hi. Huai mun a quater dandeuh chi mai le huai teng ah hon om sak ua,  ka innlui uh toh teh in a nuam mahmah mai . Vangam tuk in ka ngai mai hi. Kou leng ka innten uh hong changkang sak mahmah mai ua,  kipak lua ka hihman in a maipha bang ka zong tawntung hi. Amau'n le hon deihsakna uh alian deuhdeuh ta hi. Ka naunu le hong nungak pian simta a,  tangval bang lengla ka nei thei zeuhzeuh ta uhi. Ka naunu zong mikam tei mahmah khat ahi a,  min zong a ngaina thei mahmah mai uhi.

Ka nau nu'n leng pawl-X  hon zou khongkhong ta hi. Lawm ngaih le hon nei sim gaugau a, kei phalna lou a ngaih nei utlou ahihman in, kei hon dong zel a,  ken le ka kham louhdan ka theisak hi . A khen chiang in ka kichiamnuih zel ua,  " lawm ngai in pasal hon neihsan mawk ta leng u,  buai lua ding na hi . Ka pasal neihma ngeingei in nang zi hon neih phot in " chi in hon engbawll zel hi. Huai hun laitak in Vung le pawl - XII zou ahi ta a, anu te'n mundang ah sawl tum mah leh a ut het kei hi. Aman a ut louhdan thute kei kiang ah hon gen zel sam hi. Ken le , "nu leh pate thumang nahlawh pek kichi hi , va zin in " chi in ka sawl a,  a ut thei mahmah kei a,  a tawpna in , "ka zin ding leh zong nang apat kamkhat ka zak nop om hi .Hua thu ka zak matan koimah pailou ding ka hi, " hon chi a ken le bangthu gen ut nei na hi hiam ? ka chih leh;  Bang pen ahia na zak nop ? hon chi a,  aman le,  " Zing ciah khonol ah lei tung ah dak 12 in i kimu ding hi.  Hua cia thu gen ut tampi nei ka hi " chi in hon paisa ta hi. Amah hong hoh nasan ahihleh bel apate'n lungdam pih mahmah ahihman un tunitaklam nasem teng nekkhawmna neihpih ding cih thu gen a hong pai ahi. Nitak lam nasem ka tawppih baih a , Vung te innlam ka zuan tou nainai uhi. Ka tun phet un an nek theihpah ding dinmun in na om a ka nek uh leh Vung leng ka naute toh ka umkhom uh leh hong pai a,  kou kiang ah ann hong ne a,  "U thang hah nek in maw " chi in hon en phei a,  ken le ka et lai tak toh kituakkha ahihman in kisuanglah sim tuak ka hihman un ka nuih cheuh uh leh ka naute'n hon mukha geih ua,  hon engbawl in tua ann nek khawmna zaw Uvung leh Uthang moupawii hikei maw ?chi'n  ka ki-en chiat ua, ka nui mawk uhi. Ann nekkhit in ka pai dek laitak un Vung in le Uthang zingchiang a pen mangngilh ken maw hon chi a,  kou leng ka om na lam ka zuan ta uhi. 

Inn ka tung in chu khua mial simta ahihman in ka nau tawm kha laisimsak in a simkhit in ka lum ua, nui thremthram kawm in " zing chiah bang thu mawngmawng a de o ! "cin lupnatung ah kei kia kingaihtuah in ka khovak dektak hi. Ken le Vung chu sawtpi apat ka na guk et gige ahi a, ka itna thu gen mawk hi ta leng a lungsim lou lam ahi peuh mah leh niteng khosakna buai ding ahihdan thei ka hihman in bangmah ka gen ngei himhim kei hi. Khua hong vakta a, naute'n ann hon huan ua amin in ne in  nek khit phetphet in nasep ding teng va kok muh in,  ka lup leh ka ihmu kha hi. Thouhak sim kha,  thou khia dak ka et leh 11:30  bang na kok a,  kin deuh a kisa in khonawl lam lei tung ka delh leh dakkal lang ka zekai kha a,  lei ka tun in nungak nou melhoih deuh mai khat na ding zitzet ka mu a, Vung ana hi maita hi. Ken le " kon zekai kha a,  hon ngaidam in maw? " ka chi a.

Huchi in aman le hon en a, "aw poikei kei, zong ka tunna a sawt nai kei" hon ci a; ken le, "kipahhuai e leh "ka ci hi. Kei le ka pau zomzel a, "Vung, bang gen nop nei na hia le ?" ka cih leh amah le kisuanglah kawm tak in, "nungak khat in kon kimuhpih ut acihleh chu bang dang gen nop om ding ahi hiam?" Hon ci a, kei le kitheisiam lou sak in, "nungak khat in hon chi mawk leh chu a thugen loupi a lamdang sa ding ka hi" ka cih leh; Aman le, "Uthang chi in hon koi phei a, ka zin ding thu bang dia hichia deih mawk na hi hiam ? Ken zaw nang ong nusia in koimah ka pai ngap mahmah kei. Hehpihtak in nang kon muhni apat ka gennop tutan a kong gen ngamlouh pen kong genta di. 'Uthang, ken nang hon ngai lua kei ve. Na khosak dante vel in ka hinkhua sukha mahmah mai a, ka lungtang teng luahkhin na hi ta. Uthang hehpihtak in hon ngai mai ve aw' " hon chi a ken le ka gen d ka thei tuan sam kei a, paulou a ka om leh, "hon ngailou maw, Uthang? " hon chi a, ken le ka gen ding ka thei zou nawn mahmah kei. Ka gukngaihna lah a sawt ngal a, ka hinkhua ka et chiah ngai ngam vual ka hi het kei. A tawpna in ah, "Vung hon ngailou le hon chi tuan ken la ahihtheih leh, midang laisiam pipi atam a, mi hausa pipi atam hi, nang hon hel tangval khat ta peuh toh kingai zaw leteh nang a ding in zong ahoih zaw dia , kei a ding in leng a hoih zaw ding in ka um" ka cih leh aman le, "bang hang in maw?" Hon chi a, kenle, "nang zaw kon itlua tel. Non khualnate ka et chiah nial ngam vual le na hi kei. Nang sang in le kon it zaw. Himahleh, tun nang toh kei kingai mawk hi ta le napate'n hon deihsak kei ding ua, ken le nou nasem kha nawnlou ding ing a, ka niteng hinkhua le hon subuai ding ahi. Ka cih leh, tua zaw himah. "Uthang kei chu na itna non piak kei leh koi mah ah le ka zin kei dia, kuaman le hon mu kha nawn kei dia, Pa kiang kon na paisanta di" hon chi top a, paulou in tomkha ka om ua, ken le nial theih tan in ka nial sam hi. Himahleh hon itluat lam thei ka hihman in ka nial ngam nawn ta kei hi. A tawpna ah "Vung na cih dandan ahi mai ding" ka chi ek ta hi. Amah le kipaklua a diam hon kawi phei a, ken leng ka kawi thuk sam hi. Aman, "Uthang sihna lou ngal in hon khen kei leh hon khen mahmah ken aw ! " høn chi a, ken le, "khen buanglou e Vung" ka chi hi. Ka gen zomzel a genthei haksatna thuakkhom ding in hanchiam ni maw chi in ka gen hi. Sawtlou ka kihoukhit un inn lam ka zuan nawnta uhi.

Kou geel chu it taktak in kong ki-it tuakta ua. Ken le sih le sihpih d chi khop in dicision ka la ta hi. Aman le kei thu hon mang mahmah mai a, ken le amah thu ka mang hi. Gamdang a kei mukha lou a kum nih kum thum lam va zin ding cih a ngai ngam mahmah kei a, kei le amah mulou a om ding cih ka geel chiang in ka hithei mahmah kei hi.

A zin ding hun hong tung petmah d ahita a azinma deuh in ka kimu uhi. Ken le lehkha hoih tak in hon sim in maw chi in ka vaikhak a, na pil na siamnate eite geel a ding mah ahi chi in ka vaikhak hi. Hon zinsan petmah ding hi ta, kei le nidang a sukha ngam chiah lou himahleng huai ni zet in zaw khahlou in ka kawi den a, ka tawp sam hi. Ni hong kai pian simta a, inn lam ka zuanta uhi. Inn lam pailai tak chu o. . . . tenpih utna lungtang ka nei top hi. Mulou a om vengveng d chu ngaih a hak khop mai. Nikhat muh louh chia le ki-om theilou phial. Akum a sim muh louh d chih chu lunggel ahak ngei mai. Zinlou ding in khaam peuhmah leng lah, a khawl chet dia ! A gate bul tan uh ka va kha a, "Nitak chiah hong pawt in o," hon chi a, ken le awle chi in ka kikhen ua, nitak khomialma in ka pawt ngal hi. A pate'n ka kingaih lam uh a theih di uh lah ka lau ngal ua, nidang a va lengla ngei loupa huai zan chu ka va pawt ta hi. A pate'n le hon na theisiam mahmah mai uh chita le lawmta ngeinadan a hon koih uh ahih chia, a pate'n hön lupsan pah ua, kou gel kia ka tu uhi. Huai laitak in ka khut hon la a, "Uthang hiai na muhlai teng na kiang a om dan in hon ngaihtuah in maw ! " hon chi hi. Theihlouh kal in dak 9 bang na pel man a, kei le ka pai a, aman le gate bul tan hon kha a, ken le rose pak san khat ka pia a, "hiai pak a san mah bang in nang a di'n si ngam in ka pang gige chi in ka paisan dek a; zin nuam kinem tak a hon na ngak ding ka hi" ka chi a aman le ginom tak in nang a di'n ka va pang ding hi chi in mangpha kikhak in ka kikhenta uhi.

Huiha ! kua mangpha kikhak malak ah zankhua vak in ka kingaihtuah top hi. A zin ni chu, kalai ! ! thawmhau huai ei. . . . Ka nu'n hon beisan ni hikha zaw mah. Lunglen huai hi ta ven o. Kei le ka lungleng lua ahihman in laa khat ka sa khia hauhau hi.
 
PHAM SA TUUNNU NGAI IN HUIBANG MAU VENG,
LEL LIANG NA VON HEH HONG NEM AW 
SIMLEI TUNG AH LUNGZUAN SIN DIA
MIMBANG A PIANG KA TA HIAM ?
NGAIH O, NGAIHNOU O SINGDANG GAM LEI AH
NA LENG ZONG IN TANG ZATAM A PAAL ZONG
NAU BANG NA SANG LOU O.
NA VANG MUBANG NGAI ING
I LEN NA ZOGAM LEI PA'N
NA VANG NGAIH SIALSIAL ING E...

cih laa ka sak zoh in Vuvung pa hong pai a lungzuang tak a ka om laitak in, "Vuvung ngai a lungzuang gopta na hi hiam ? " hon chi a, kei le kisuanglah kawm tak in ka en gau a, " I, hi kei pa aw, tuni ka nu sih ni ahihman in ka nu ngai lua ing a na hichi hing " ka chih leh ong theisiam mahmah mai a, "Na naute mai ah tua bang khong in om om nawn ken. Na naute'n nuam salou ding ahi " chi in hon gen hi. Ken le, " himah e, pa aw" chi in ka sep ding, ka bawl ding teng ka bawl pah zatzat mai hi.

Aman le hon paisanta a, kei le ka nasep ka sunzom zel hi. Nì hong kai simta a, annhuan hun nawn ta hi. Kei leng ann ka huan a, ka huan min khit phetphet in nasemte va enkai in amau le a innlam uh a zuan nawnta ua, kei leng insung ka lut phei a ka naute leng school kai tawp hong tungkhin ana man khinta ua, ann ka nek pihpah hi. Ann nekhin khuamial kuan Kha hon de tung lai kon mu chu.... lunglen huai sam ei.....

Kei leng la khat ka sakhia lualua sam hi. Unaupa Muana Ngaihte in a sak " Lailung zuang in bangteng ka geel zong in leenmui hong kai ciiciai i lenna gam" chih la ka sa viauviau a, ka naute'n hon engbawl ua, " I uu le ngaih nei ahi ding" chi in ka zak teitei di'n kihou uhi. Kei leng a zalou ka kipang sam hi. Khapi mualpang ah hong suaktou ciaiciai ka en a, alunglen huai khop mai. Khapi ka et leh Vung mel bang hong lang zezen hi. Ngailou kipangpang lai chu lungsim mitkha in a lang denden mai ta hi.

Zan chiang in lunggeel hoih lou pipi ka nei a, tangval dang mihausa laisiam mahmah khat khong toh kingai ding peuh in ka um mawh mawk hi. Langkhat a lah, ka geel chiah kei pat hilou, a hon kam vaikhakte chu ka phokkhia vongvong mai sam hi. Vung gelna in ka hun atam zaw ka zang beita hi. Theihlouh kal in kum bang hong bei dek kuan man hi.

Kum hong bei dekta Christmas ding buai in mi hong buaita ua, kei chu Vung hong tung ding ngak in ka om threnthran mai hi. Midang khualzinte hong tung siausiau ua, Vuvung hong tung ta kei a, nidanglai in zaw Christmas zang ding a le milak a pawt ngamlou pa chu Vuvung te innkuan deihsakna ziak in mi neih bang ka nei zou kei zong un, kou hunkhop tawk in ka niik, ka puante uh hoih hun tawk ka sa mahmah mai uhi. Christmas ni hon tung khongkhong ta a, mi lak ah ka kihel tei sam hang in, Vung ngaihna in ka hunte ka zang a, nuam ka sa thei mahmah kei hi. Nidang a zat zoh louhlai bang gelkhiat in hon om sam hi. A nuam theipen in zat ka tum tentan mai a, nuam chu, lamkhat ah nuam ka sa, himahleh, a nuam taktak thei mawk ta kei. Ka naute bang laisiangthou kidemna vel khong ah khatna chih khong bang hon la ua, min apakta mahmah mai uhi.

Lungleng tak in Christmas ka zang zouta uhi. Kumte hong thak zel a, lungzuan baan cih himhim chu ka neita kei mawk hi. Ka naunu'n pawl XII hon simta a, aneupen in X hon simta hi. Vangphat huaitak in chita leng ka naute tuition fee chu ka pia tawm mahmah mai hi. Amau chu class topper bang hon la zel sam uh ahihman in ka naute leng amaban uh chu alam-et huai mahmah khat chu mite muhdan ahi mawk ta hi. 

Hun leh nite mual aliam zungzung a, ka lei hinkhua chu adang thei mahmah ta kei hi. Lunggeelna in kumthum vingveng Vung ngak chu ahak khop mai. Ka naunu leng nungak ta ahihman in lawm ngaih bang nei theita hi. Exam na ding khakhat vel in a sap in a ngaihzawngpa toh kitaipih uhi. Pasal hon neihsan chu poi ka sa het kei; a ziak chu Pasian in pasal amah kia om phallou a ompih ding numei a na bawl ahihman in numei chu mi innsung a lut ding mah ahi, chi in ka theisiam mahmah mai hi. Ka naunu om nawnlouh apat in innsung a numei kitaksapdan na sa tak in ka phok tuaituai mai hi. Vung ka ngaihna chu alian deuhdeuh mai. Kuamah theihlouh in mittui naptui zaw ka siak mun khop mai. Huihaah ! Vung tunkal ngaklah a maw hia ka om ci'n ka kibawl sawm tei sam a, ahithei mahmah kei. Kumte hong bei zel a, kum thumna ding hi ta ngak chu a nuam deuh simta hi. 

Ka naupa leng X zou in XI sim apan ta hi. Kum thum cin in chu theih man louh in kum hong beita a Vung ong tun hun ding thu bang apa'n hon genkha hi. A tun ni chiang in a pii ding in airpot a sawl in ka om hi.

Vung hong tung ding ni hi ta. A dawn ding in apate'n kei kia hon sawl ta uhi. Kei leng hoih tak in kong kichei chitchet a,  limlang (mirror) ah thumvei bang ki-en in nalh ka kisa hun tawk a, gamdang a om nungak te'n le hoih hon salua di uh chi kawm in ka pawt sam a;  himahleh, ka lungkim thei mahmah lou in ka va ki-en thakkik lai a, ka lungchu a tung mahmah mai hi. Kei leng ka kuan a airpot ka va tung ta a, ka tun zoh nung sawtloin in vanleng khat hong boh a ka et-et leh a last lam deuh ah nungak NOU melhoih tak mai khovel a hi bang nungak dang om ken teh chih ut huai khop zah mai a hoih khat hong pai phei a, huih in a sam a mut leng sengseng a, a et lawm dan chu bang toh teh di'n zong ka thei zou kei, ankampak huih in a amut ling niainiai bang mai in a sam kitheh sengseng hi. Vung ahi chih hoih lam ka thei ngei nai kei hi. Kei kifuhsak deuh a paipa chu a ek-siak din le ka kilawm kei phial a, ken le amah ka naih phei ngal a.

Amah le kei lam zuan in hong paita hi. Airport sung cih om selou in ka kikawi ngal uhi. Aman le, "Uthang na damdam mah teh maw ? " hon ci a ken le, " damdam mah ing ; hile zong dam siang ciah thei lou khat ka nei a, tu zet in zaw ka dam siangta" ka cih le hon en a, ka nui uhi. Kou leng innlam zuan in kon paita ua lamkal ah " Uthang, ken gari kon tawl di " chi in hon ngen a,  ken le ka tawl sak hi. Amah le lampi thei lou kipang in muntuam ah hon paipih a,  ken le, " lampi mangngilh gop na ta ve maw ! ? " ka cih leh aman " poiloupi nang kon mangngilh kei nak peuh leh" chi kawm in hon taipih chenchen a, Restaurant kong khat ah hon kholpih a, huai ah ka va lut uhi. Ken le iplah lua petmah ka hihman in a bil bang ka va kei kha thepthup hi. Ana hon chi gaih a, ken le bangmah dang gen lou in kumthum vingveng hon ngak ka hi chi in ngaihtuah in ka tawp chenchen ngal a, huai ni zaw sawtsim ngei tak kitawp zaw ka hi di uh. Ka kiang ua te'n hon na ning man zozen uhi. Kei le ka kipahdan chu gen sengvual ahi kei. It mahmah mawk leng zong a pate kizah sam ahihcia ka paipihpah a,  bangmah le ka kihousau man kei uhi. Inn ka tun un " Vung, gim ding na hih cia, na tawldam phot in maw. Zing khong cia i kizel na d " chi in ka paisanta hi. Huai ni zaw kipak petmah ka hi di ann ka nek lam le ka thei kei a, tampi mahmah ka na gai man hi . Ka ann nek-kawm in Vung ngaihtuah den ka hihman in restaurant a ka tutlai uh mitkha in hong lang a ka naupa bang Vung ding sa in ann ka va bah/baak kha thepthep a;  ka naupa'n a nuam kei na eh ! Hon cih leh Vung ahihlouh lam phokkhia thak in kisuanglah tak in ka nau kiah, ' sorry '  ka chi hi. Ka nau inle hon engbawl  ngal a, " U, nungak ngaita peuh le zong naute peuh va hucih " chi in hon chiamnuih a, kei le kisuanglah sim ka hihman in ka dingkhia vat hi. Huai zan chu khapi en kawm a lasak chihte om khalou dan eive !! Lupna tung ah lum in ka ihmu pah dide hi. 

Khua vak chia thou in, ann ka huan tawm luutluut zel a, ka nek khit un nasemte leng hong tungta ua, naa ka sepdek laitak un Vung hong pai a vak di'n hon zawn a , ka va vakpih a,  kou gel kia ka om ciang un itna thu lou zaw thutuam ka gen vang mahmah mai ua a zin sung a ka omdan teng ka hilh hi. Aman le, huai lam a lunghel tak a om a Christmas ka zat dingdan vel geel a na buai ahihdan thu hon hilh hi. Kingailua hizen ngal, ka omkhawm chiang un gen ding chu a vang mahmah mai hi . Amahnu chu mi frank tak khat ahihziak in apate'n lawm ngai thei dia koihlou ahihman un nikhat na engbawl tei sam ua, " bawi, lawm ngaih na nei hiam? chi in na dong kha ua;  aman le , " hi " na chi keuh dan  abang. A pate'n le kipahpih mahmah mai ua, ' na lawmpa khatvei inn ah hon tonpihta peuh in, na pate zong hon musak inla, na nu na pa'n zong kong theihpih uh kul ding hi " a cih leh, aman le " pa aw mu ngeilua tham na hi. Ka ngaihna kum 5 a ching dek ta a,  himahleh ka kingaihna uh kumthum val zek pan ahi, pa aw..Tu'n hon tonpih kei ta se leng na mahkhak ding uh khat ahihman in nikhat tei na thei ngeingei ding uhi."  Aman chu kei ka hihlam gen ngam sam lou hi. Gen mawk taleh hon deihsak louh d uh thei ahihman in, apate lunggel dan chu mipil deuh khat leh mi neizou deuh khat peuh hi leh phamawh sa lou uhi. Apa'n, bawi, na pate'n na siiksa teng leh na siiklai di teng theikhin ka hi uh. Pasal hoih mahmah khat na neih kon deihsak hi. Aziak chu ka tanu na hi a,  ka tapa zong na hihlam kiphok kawm in pasal zong in na pate deihlouh khat toh na kiteng thei kei ding hi"  na chi hi. Aman le, "  pa aw,  tua zoh ni sawtlou in kon musak ding hi. Hon khen mahmah ken o " chi in ana ngen tuntuun mai hi. Apa'n bang dang zong gen lou in abaih thei pen a amuhsak ding dan thu gen pih hi.

A pa thugente chu kei kiang ah hon gen ek mawk ta a, " Ka pa thumang ni  inla hon deih sak kei uh leh zong ken ka it khat chu kua deihsak ka ngai kei "  hon chi a haksa ka sa petmah mai ta. A pate theih teitei ding hi mawk ta , Karee !! maban ah bang chi khosak ding chih chouh in ka lungsim a buai ta. Ka lungtang kiphel suah chet in lampi nih aphata hi. Koi lam tawn ding  ? Ka it mahmah Vung taan ding chih toh, sum lohna khol chet ding ka naupa BA zoh matan lah ka chom nuam ngal a, langkhat a ka it ka ngaih khat ziak in ka nuntakna ka tan loh ding mah ahi cih lung gel ka nei a, paulou in ka om dedu ta hi. Amah hong pau zom zel a, " Uthang tuni a ka thugen non suk buchin sak kei leh na kiang apan ka pawtkheta. Non it a non ngaih taktak nak leh ken leng anuam ahaksa ka nuntakna ka taan loh zong in, nang kon zui ding hi ."  hon cia. Hua in ka lungtang hon dengkha mahmah mai ahi. A pate'n ITNA MITDEL.na chi sam hi ven,  chi in a thu ka mang maita hi. Ka va zuilut  apan hon muh in lamdang asa top mai a,  kipuk dek liang hi. A tanu kiang ah, "  hiaipa maw na tangval pa ? a chi a, a tanu in zong , " hi, himah ei pa a ci a."  A pa'n thang na nau Vung toh unau dan a om maimai kon sak leh,  ka gintak sa nana sang tun ngei uh eh !! " hon chi a.hmmmmmm. Thang zingciah na sepna lam ah  kong pha dia huai ciah i kimu ding hon chi hi.

Kei le ka lu nasan phongkang ngamlou in ka kun ngeungau ta mai a,  Vuvung inle ka zak laitak mahmah in, " Pa aw, na tanu na hehpih theihna tawp hon pia inla ka Uthang toh hon khen mahmah ken ö " chi in apa khebul ah kunsuk in a kapkap hi. A pa'n le gen ding bangmah a thei nawn ta kei a,  " na nu toh kihou un" a chi a room lam hon zotsan hiau ta hi. Vuvung chu a nu ang ah kap in ka kikhen louhna ding ngen in kap a,  kei leng mittui dang chih mah tak Vung kah ka mu chu ....ka mittui hong kai neinai mai a,  gen ding bel ka thei tuan sam kei hi. Bangtan hiam ka tut nung in Vuvung in leng, "  nou deihna bang a ka Uthang utlou sasa hon tonpih ka hi "  a chi a, anu'n le bangmah a gen tuan kei hi. Kei a di'n chu lamet a huai nawn kei chih ka mu ta. Pai dia  kisa, ka din touh chet leh Vung inle ka khut hon matsak a , " U thang hon nusia nawn koh. Kon zui ding"  chi in hon kawi a, ka pawt dek chet uh leh Vuvung pa hong pawt a Vuvung a kaikik a, ka paisanta hi. Inn ka tun in chu om maimai theih ahita kei. Kah louh ngal bawltheih  neilou ka hihman in,  a guk in ka nu ka suunlai sang in ka pawna zaw mai hi. Zankhovak in ka kap hi.

Khua hong vak petmahta a, ngaihno (Vuvung) papa toh kihou ding chu ka laidiip kisai litliit mai hi. Ann nek gim le anam nawn het kei. Lungbuai lua, kimuhma a sih bang a ut huai maita hi. Hibang thu i tuah chiang in zaw tuunnu itna lian diak ei... Dak 9AM bang hong gingta a, om didan zong ka thei zouta kei. Lunggeel dan in chu hong kihou nasat dingdan a lang. Himahleh, ngaihno nuselou a panlak ka sawm tei tentan hi.

Lawmte nasep ka va en hi . Sem un cih ding mel ka thei tuan kei, hai din heuhou leh, Huiha ! Ngaihno papa ka mu ta hi. huailai tak chu ka nuai vang leh, lut ngei ding ka hi. Aman le nasemte va enkhia sam a lungtung mahmah dan zaw ahi ngei di. Kei hon sam a, ka va paita hi. Ka it ka tapa aw, chi in kam nem deuh in hon sam a, lauhna teng a bei dawm hi. " Ken leng bang a pa ? " ka cih leh, "Bawi aw, na nu na pa dan in nawn mu a, ka lung na tung mahmah mai hi. Na tung ah ka kipak lua hi bawi, " hon chi a, kei leng ka kipak petmah sim a, " pa aw, kei le ka kipak lua " ka cih a, " bawi aw, na sepna teng ka kipak mahmah mai. Hilehzong, na thil bawl uh ka deih hetlouh khat a om a, hua pen na tawpsan kul ding hi " hon chi ta a; gen d ka thei zouta kei. Na ki-itdan uh ka thei vekh. Himahleh, nang zong innsung omdan teng na thei vek a, ka ta dan a kon kep ahi. A selam in la lou in, tu leh tu in na khen zou kei ta zong in ka tanu neihsun hi sam ahihman in, na khen kul ding hi hon chi hi.

Kei leng pa deuh mai tak in, " Pa aw, hehpihtak in na nasem ding in nong khawlsakta zong in phamawh ka sa kei hi. Ka it mahmah Vuvung toh hon khen mahmah ken aw" chi in ka ngen tuntun ta mai hi. Aman le a gen di dan a thei sam kei a, " Bawi aw, bangmah ken gen ding ka thei zouta kei hi. Na nu toh kihou mai un" chi in aman le hon paisan hi.

Lungkham lua lupna tung ah ka luplai tak in Vuvung nu hong lut vat a, 'Uinou' chi in hong hang zauzau hi. "Akin theipen in ka tanu na khen in. Tukal sung ngeingei a na khen kei leh, na hinna a bei ding hi " hon chi a, "hih na omna inn zaw napa'n hon piaksa ahi. Kon laksak kei dia. Na ut leh na zuak thei. Himahleh, ka tanu muhphak ding in na mel himhim zong nonlak thei nawn kei ding hi, " chi in bangbang hiam hon gen hi. Zak toh zaklouh toh ka thei khen zou mahmah kei hi. Ken zong a tawp in, "nu aw, a tawpna ding bek in ka it mahmah na tanu nong kimuhpihsak thei diam ? " chi'n ka ngen hi. "Hithei peuhmah lou ding. Na maban ah nuam tak a hin na ut leh, akin theipen in na innmun zuak inla, mundang ka muh phak louh ding mun ah na om un" hon chi hi. Ngaih luat Vuvung toh kimuh theihna di himhim a om nawn ta kei. Inn mai kipawtsak ngei nawnlou ahihman in ah. Hon paisanta a, khua hong mial duaiduaita hi.

Zankhua a kah louh chu bawltheih ka neikei hi. Ka naupa le a guk tak in ka sih suak ding hon ngai ngam mahmah sam kei, amah leng zan ihmu ngamlou in hon guk vilvilta hi. Kh  ua vak in ka naupa leng kipei vatvat in mundang paina ding khong na sai fel a, ka inn vel uh zuak sawm in na kipei hi. Kei chu aw. . . damna ding damdoi ngailou in Vuvung ngai in ka maumau maita hi.

Nithum zoh in, ka omna mun uh nusia di'n ka kithoi laitak un uplouhpi in....Aw nem tak khat in, " Uthang, hong kichi a, ken le ka etphei leh ka ngaihno ana hi maimah hi. A kiang ah pasal 2 ding chitchet mai hi. Bodyguard dandeuh a a nu'n hon sawl ahi ngei di cih ngaihtuahna ka nei pah hi. Ken le bangmah gen tamlou in ka naihphei a, ka kawi ngal hi. Aman le hon kawi sam a, ka kikahkhum tuah ta uhi. Bangtan hiam ka kawi nung in hon en a, ka muk hon tawp hi. Kei le kidek zoulou in ka tawpthuk sam hi. Sawt sim tak tawpna di cih mahtak ka kitawp chenchen mai ua, huai khit in ka kikawi ua kikhah ngamlou in ka kikawi den mai ua, ken le, "bawi, tua nawn kawi leh nong tawpte zaw mangpha nomn khakna hi kei maw ? " ka cih leh aman le bangmah gen manlou in a lawmte gel in hun beita, pai hun chi in a kai ua, ken le ka kai sam a, ka kikaituah chenchen mai uhi. Khahlou keii a ka kikaihtuah uh leh mi bangzah hiam hong pai ua, amah nu kaikhia in kei hah zial in hon zial ua, bangmah theilou in ka kipuksukta a, ka nau in damdawi inn ah hon pua tung hi.

Thakhat in khua ka phok vat a ka ngaihno Vuvung om ding ka sak leh ana om het kei hi. Ka kim ka kiang ka et leh damlou ngen ka mu a, lamdang sa lua in ka kikoukhia kha zezen hi. Ka Lupna (bed)  kizom pihte'n, " tangvalno khat in hi teng hon tun ahi," hon chi ua. " Amah koi a om hiam ?" cia ka dot leh, " ann ka va la ding . Hon na etsak zel un"  chi in hon vaikhak hi chi in hon gen uhi. Ken le lamdang salua in, "Bangthu tuak ka hihiam  ? Kei bangmah chiloupi " ka cih khitphet leh a natna in hon pha a,  ka thuaklah petmah mai hi . Hon buaipih mahmah mai uh cih chu ka thei chian mahmah mai hi. Ka lungsim chu apil mahmah sam a, taksa in a zou kei cih man maimai ahi. Sawtlou in ka nau hong lutphei ka mu hi. Begkhai khat a bangbang hiam hon khialut ka mu sam hi. 

Damdawi inn ah sawt kuam tak ka om ua huai sung in zaw lesson tampi ka mukhia man sam hi. Kong dam siangsimta a,  innlam ka zuanta uhi. Innkhong na kikhek ka muh chu o.... ka am-hai dektak a,  sencil vang-ngaih chi mai diam,  ka lawm ngaih masak pen leh a nunung pen dia ka koih Vuvung lim khat chu ka nei sam ua,  huai en in sunkhua zankhua hun ka zangta mai hi. Tu'n zaw ka tel (chiang ) taktak ta ve; misipul dou sang in mihing pul dou ahak dan. Inn ka tun uh kalkhat manpan in ka naupa council exam hun ahi ta a, a laisim toh kei hon buaipih toh a buai petmah mai hi. Ka damsiang ma in exam a zouta a,  ka damsiang taktak in chu pa ching tuak leng ka hi ta uh. Nek leh tak lam zaw kuamah ka eng sam kei uhi.

Sawt lou in ka naupa leng a result hong suak a apass tei sam hi. Ken chu piching na hi ta a, tu'n zaw nang leh nang a na sutzop ut leh na kichom theita hi cin ken le ka ngaihsak peih nawn khol kei a,  amah le huai lam lunglut lua vak khol nonlou ahi dia, a sunzom nawn kei a, sep theihtheih ka sem tuak lel uhi. Hucia  ka omlai in  nikhat kha ' taang ' nuai ah ka tut laitak in ka lung leng mahmah mai a, ngaihno Vung itna a lian deuhdeuh mai a,  Khapi en in ka mittui hong tak ziahziah mai a,  huai laitak in ka lungsim ah laa khat hong dok khia a ..

"Gibang khenna ding in kawlni hong suak a,nunnop nate mual aliam zel ding hi  "cih laa bang hong lang chuaichuai mai hi. Huai zan ciah chu ihmu lou hial in ngaihno muh theihna ding lampi ka hanchiam a,  bang chi leng muthei ding ka hiam ? cih lunggel bang hong pawt a, a inn uh theilou lah hilou ing a,  pasal ka va kuan ding chi in ka hanchiam ta hi.

Kei leng lung gel khat ka nei a ngaihno ziak a khatvei thuak chu poi ka sa het kei hi. Ngaih luatna leh muh utna in hon phata a, a inn uh thei lou zong ki hi sam lou ahih cia cin upate'n " ZUM LEH SAILIAH A SI OM SAMLOU" na ci uh hiven ci'n khua vak in ka kithoikhia a, ka kuanta hi. A inn uh kong tungta petpet a, huai lak ah mitampi na kikhom uhi. Ken le mak salua ka lut gargar mai hi. A sung ka tun leh itluat Vuvung mou khakna na nei uhi. Kei leng a theisa mahbang in ka kihel hi. Thu omdan ka guk kankan ta hi. Ka kiim a tute kiang ah, "Vung in lawm ngaih nei hilou ahi hiam ?" chi a ka dot leh, amau'n le, "Nei zaw chi mah ve uh, a sihkhit ciang in Vung zong kingaisia lua, asun-azan a kapkap mai ahi . Huai pen a phattuam khak leh cia apate'n a sai fel sak uh, aman le na lemsakpih ahih tuak hi." hon ci ua, kei le a si dan a hon nutsiah uh ahihdan ka tel mahmah mai ta hi. Ka va thuk kan deuhdeuh a, apasal ding pa bang ka kankhia a, Vung theihlouh in ka kiguk muhpihta hi. Ken thil omdan teng ka dong a, aman le im neilou in hon gen a, " A ngaìhzawngpa nang na hi hiam ?" hon chi a ken le, " Ka himah hi, " ka cih leh aman le, "Lawm aw, Vuvung pen ken nang dam leh damlouh lam zong ka theita, ken na lawmpa toh khatvei tei hong kimusak ding hing ci'n kam ka na ciam a, huai ziak in aman a nuntakna taanloh lou a, na zolzou ka hìhman in kiteenna programe ka na sai fel uhi. Lawm aw hehpihtak in ka kiteenna uh hon subuai ken la, den cia amah toh nong kimuhpih sak thei diam? ci'n ong ngen hi."

Ken le, " Aw, poi ken teh " ka chi a, himahleh, lungsim guk tak chu a ut het kei hi. Huci in ken mipi lam ka zuan a, aman le stage tung lam a zuan tou a ka kikhen uhi. A guk tak in chu a hak ngei mai kidekdek mah leng ka kidam zou non ta kei a, ka mittui chu a luangkhia zutzut mai hi. Hawmthoh tak leh itluat tak khat pasal nei theihna dia palai a pang ding chu hak hi mai. Ka kiang a te'n lamdang hon sa mahmah mai ua, a tancin mipi in theikim vek ahihman a zawllui pa di in hon muangmawh sim ua, ka kiang tak a tu gel in chu hon theita uhi. Programe hong kipanta a Vung in gennop a neih leh chi in hun apia ua, mipite mai ah kapsa'n hong dingkhia a, kei suun a si ding laitak a kisak lai in it kei ta mahleh a pasal ding pa tung ah kipahthu gen a, anu, apa tung ah leng kipahthu gen sam hi. Mipi a uap teng leng kipak ahihdan a lang sak ta hi. Mou pa hun hon pia nawn ua, aman leng thu tam genlou in Vuvung in a itluat a ngaihluat a muh nop mahmah a Uthang musak ding a kam chiamna nei kha ka hihman in tuni in ka musak ding hi a cih leh mipite'n akhut beng duamduam uhi. Tu'n Vuvung in misi suun a asuun a it mahmah a Uthang hong ding hen la hehpih tak in gen nop a neih leh zong amah hun ka pia a, tua khit chia kei hun zou ka hi ding hi. Ci'n hon sam a, ka ding touh leh mipi kuamah apau aphun omlou in lamdangsa tak in hon en nuainuai uh a, kei zong ngaihno muhna ah mittui musak ut nonlou ka hihman in nui hiuhiau kawm in ka paitou nalhnalh a, stage tung ka tun phetphet in.

 It luat Vuvung a om na pan hong dingkhia a, mipi mai ah hon kawi ngal a, hon tawp zomah hi. Ken chu kawi ding in le ka en non kei. A muk hon tawp tei sam hang ka tawp thuk peih nawnta kei hi. "Uthang koi ah va kibumang tel na hi hiam ? Ken nang kon ngaihluat na lam ah hih pawi na lemsak pih ka hi ta. Hon maisak in maw ! " ci'n akap ngeu-ngeu mai hi. Kei mittui dang penpen ka kidek tentan sam a, "Aw, thil teng ka theikhin vek. Na tutna ah va tukik in" chi a ka sawl leh, "Uthang, nang adin ka kikem siangthou a, ka sianthouna teng natan louh ding zaw ahi thei mahmah kei. Hih lai a om mipi teng in na zata un. Ka Uthang in a ut bang in hon khoih hen la kuaman a tung ah action la kei ta hen" chi in awng-khia zuaizuai maimah hi. Nupi tampi tak leng mittui nul sauhsauh ua, Vuvung nu leh pa ngei in zong a nul uhi. "Ken leng gennop tamlou nei ka hihman in hehpih tak in na tutna va zuankik in " ci'n ka sawlta hi. Ken zong thu tamlou ka gen a, "hih mou pawi kuamahta in susia keita hen. Ka it mahmah Vung pen a pasal toh hoihtak a hong ki-it tuah ua, suan leh khak tampi hon neita uh hen" ci'n ka thugen kawmkawm in ka mittui ka siak zel sam a, Vuvung nu leh pa tung ah maisakna ka ngen a, mipite kiang ah zong ngen in "ngaihluat Vuvung zaw ngaíhlouh luat man ahi" ci'n ka gen a, ka tutna lam ka zuan nawnta hi.

Ka tutna mun ah ka tukik a itluat khat hicia pasal nei mai ding cih ka geel cia ngai thei mahmah lou,  ka tutna mun ah ka kapkhia a,  kidek zou nawn mahmah lou ka hihman in miteng theihsuahma ci dan in ka guk pai sawmta hi. Muh kelkul a ngaihluat khat in pasal nei di zaw ka ngai thei mahmah kei a,  paikhiak ka sawmta hi. Pai ding in ka kiguk sak a,  aguk tak a pai a ka kikoih leh sungkhial nu'n hon na mu man a ; gate bul ah hon na chang hi. Gate bul tun tak in nupi khat mittui nul a ding ka mu a, Thang ci'n hon na sam a,  Ka et gau leh ! Vuvung nu ana hi maimah hi. Amah le kisik tei sam zaw ahi peuhmah dia, "bawi, hon ngaidam in maw cin na thum hi . Bang teng kei ziak vek ahi na pa'n zong hi tan hial ding in ngaihtuahna nei kei mah leh kei ziak hang a na gim na thuakna teng hehpihtak in hon mai sak in maw " ci'n hon na ngen a;  ken leng,"nu o, thil teng a kikhel khinta hi . Bang hang a siamlouh kitan thei mawk na hi hiam  ? Kei khelhna vek ahi na tanu neihsun uh kei tagah khat in ka na kingaihpih mawk ; kei mawhna vek ahi . Nang hon maisak zaw in "  ka ci hi. Aman le , " bawi o, kon maisak khin a,  nang nawng maisak ding ki sam hi "  hon ci a,  ken leng, " nu o, ken le kon maisak vek ta hi . Lungmuangtak in kap nawn ken la tuni kipaktak a om ding ni ahi. " chi'n ka nui selsal ta hi. Aman leng, "bawi ,hehpihtak in bang teng hi ta leh lim in lim ta kei leh an nek tan ngak in la nanau toh lungdam tak in kikha khia un"  ci'n hon kham a , ken leng nial hetlou in ka ngak mai ta hi.

Ann nek hun hon tungta pet mah a kei a di in ann nek gim anam het kei hi. Ann nek hun hong tung ta a , kei leng a kilawm dan in ann ka va doh tei sam hi . Mun ningkhat a keikia ka tut leh,  angkawi tang zoh louh itluat Vung hon paiphei a ka kiang ah hong tu a, "Uthang hah nek in maw. Nang toh i ann nekkhawm a tawpna ding ahi ta "  chi in annkuang khat ka sawkkhom ua , hon bah/baak a ken leng ka bak sam a, mittui toh ann ka ne uhi. Ken leng, "Vung a tawpna ding ahi zenzen kei ding hi . Kei chu mizawng ka hihman in ankhing, tuibuk ka kisap chiang a,  nang kiang mah a hong pai a,  hua cia nekhawm zel na ding i hi " ka ci ta hi. Bangmah dang leng gen sausaulou  in aman le "Uthang hehpihtak in mou pawi ah laa khat hong sak sak in,  kon nget tawpna ahita ding" ci in hon zawn a , ken le " awle,  kon sak sawm dia, bang hiam cia ka lem theihlouhna a om zenzen leh hon ngaisiam in maw ! " ka ci a, aman, " Huai dan a ka nget tawpna nawn lemsakpih ut keh zaw nang thu ahi ta. Ken bawl theih ka nei ta kei hi "  hon ci a, .ken leng, "kon sak sawm teitei ding" ci'n ki-it lualai sam ka hih uh ciang in kap kawm in ka kikhen ta uhi. Kei leng inn lam ka zuan ta hi. Zan in chu banglaa kisa leh a hoih de o ?? ci'n ka ngaihtuah den a,  laa khat ka zan phuah a;  huai chu guiter tum a sak maimai di'n ka deih dan tak khat ka phuakkhia ta hi.

Khua hong vak ta a itluat ngaihno pasal nei ding ni hi ta huai lak a dia cial a ki-om peih lou pumpum in ka kuan ngalngal sam ta hi . A mun ka tun in programe ana pankhin man zezen uhi. Programe masa pen ka lap kei a,  a nihna ki lopna pen ka lap hamham sam hi. Huaile programe ana kipan man zomah hi. Vung pen na guk dak guaugiau a, kei hon guk et ding in ka um sim hi. Moupawi ah mi atam mahmah mai hi .Mi hausa tuak kiteng ahihman un sanggam a hau mahmah mai uhi. Kei leng sawtlou ka tut leh ka lasak hun ana tung man a,  laa sa ding in hon sam ngal uhi. Ken le copy 2 kia pau ka hihman in Vung khat ka pia a,  khat ken ka en kawm a guiter tum kawm in ka sa hauhauu ta hi.

THEI BANG SEN APANTUUN LEH ZUA  
ANG PAN KIL BANG KHANG LO
TANG LEL LIANG KA  LAI TAN
THUAK AHAK NGEI MAI 
LUNGDEIH TOH TUIBANG KA GAWMLO ZONG
THUAK DAN KA SIAM VEVE TA. 

Nun lui ka ngilhta ding 
Tang lel liang kei sanggah 
Ka laitan thuak dan ka siam ta e 
Gual in kei sanggah nuihciam in hon lel lo aw. 

**NUNLUI NGILH IN MACHIANG KHAN KHUA
DING GEEL MAI TAN AW NGAIH.
NA ANGKAWI TOH NUN NUAM IN HONG LENG AW
TUNGSIAN MANG IN LUM BANG HONG SUNG HEN LA 
VON DEIH ZATAM HON TAWI UN MAW. 

***SIAN IN HON HUAI HEN LA 
SAWL BANG KA HEI NA PEUH A 
NANG NGAIH BANG SAWM TA NING E 
IT LUAT NGAIH O TONG SIA'N HON LEL LO O 
LAILUNG DAM IN GIIBANG KIKHEN TA HANG. 

hih la ka sak khit phetphet in ka mit tui hong tak zutzut a,  ka tutna lam zuan in ka paita hi.

Hucin programe kizat zoh in lem lakna a kinei ua it luat Vuvung pen apasal in pawm a,  kiss kawm a lem hon kilak uh ka muh chu thangsiat huai piansim ngiai-nguai sim maimah a, mittui te daan na vual ahi nawn ta kei . Bah leh zoitak a inn lam zuat a ngaita hi.Kei leng kingaisia lua ta ka hinkhua ka man/zat dan bang kei leh kei ka kigot a,  ka susia zak man sim hi. Sunkhat kingai sia lua,  zu vel dawn in zukham sa ka pai leh tangvalno 3 in nungak no khat na bawl siat sawm in gamlak ah na pii hi. Ken le ka va tuak kha khelkhel a,  tua nungak kha un ka cih leh pau phanphan sim zozen uhi Kei bang vua di'n hong kisa ua kei leng ka na pang tei sam hi. Mi thum ahihman un ka lel sim a ka nau pa'n zoaw ka paina peuh ah hon guk vengveng zaw ahi ngei di,  thakhat in hong diang lut ngal a,  ka kisual trantran mai uhi . Bang tan hiam zoh in kou leng gimsim pet mah ta, amau leng gim pet mah zaw ahi ngei ding ua, a tai ua,  nungakno amah kia in kap ngau-ngau a ka houpih leh, "hut / panpih tak le ka hi kei hi. Tua nong hut tei sam hang un,  nikhat ni chiang a ut bangbang un hon bawl veve ding uhi . Kei sik leh tang a pau ding khovel ah a om ta kei " hon chi a,  ken leng, "Koi a om na hiam? Ci'n ka pan a aman hon hilh a a story ka dong ngal hi.

Huci in amah tancin saulou hon gen ngal a, ka dip hon sun kha mahmah mai a ka hinkhua kizephok lua ka hihman in paulou in ka om dedu a, zukham lam le ka phok pha nawnta kei hi. Ka nau in le hon na paisanta a, ken le, " Na min bang ahi hiam ? "ci'n ka dong pan phing hi. Aman le, "Ngaih vung hon ci ngal a, " nu ei ! Ka diip bang hon dot zet maimah hi. Zawlluite min mah na pokha, Kalai ! Vung kici le a tam tuak ngei cih ngaihsutna ah hong om biangbuang maimah hi. Ken leng ka khut ka pia a, "Paile Vung pai ni," ka ci hi. Aman le, "kei zaw nang hon zui tak ka hi kei. Hon na paisan in ka khovel tawpni ahi ta" hon ci hi. "Vung, hong paita peuh in, tuni apat in na sihna ah ka si dia; na paina peuh ah hon zui a, ka neknek hon nekpih a, gentheih haksatna thuakkhawmpih ding in Pasian in nang hon pia hi; hon zuita peuh in " ka cih leh hon nial ngam nawn sam kei a akhut hon pia a ken leng ka len a, ka kikawi ngal ua, innlam ka zuanta uhi.

Ka inn uh ka tunpih sam ta hi . Huai nitak chu kou leng ka neih kham un anuam theipen in ka zang ua,  huai nitak lawm leh vual neihsun teng toh ka zang ua, nuam ka sa mahmah mai ua , a thupi di in chu " singdang kuamah eng tuanlou" cih ka zang ua huai laa sa in ka rock naihnaih ta uhi. Nuam hi mai . Kei laa sa di'n hun hon pia ua,  ken leng "Nunlui sial nawn kei ning" cih laa ka sa hi. (a laa thei ut te'n hon guk inbox cheuh thei ven)Huci'n nuam chih louh gen ding omlou. Kua dang en na teng ka subei ta uhi.

Hu ci in zankhovak in a laam thei lam in, hun ka zang uhi. Langkhat ah ka guk ngaih sut a , mihau mahmah te'n mittui naptui toh mou pawi zang ua, ken lamna toh kipak tak a ka zat hampha ka kisa mahmah mai hi. Thai  Vung toh ka ki-it mahmah ua,  nuam leng ka sa mahmah mai uhi. Nek leh tak bawl lam leng siam mahmah mai ahi. Itluat Vung toh na kiteng le ung hi bang a insung nuam bawl di'n ka kilam en kei hi. A ziak chu amah pen tanu hawmthoh ahihman in naa bangmah sem theilou ahi cih ka thei cian mahmah a Pasian kiang ah bang kipahthu ka puak zel sam hi. Ka nasep teng in thai Vung chu ka lang a pangzou den ahi a,  zi manpha tak ahihlam ka phok khia thakthak a,  itluat Vuvung sang in leng ka it zaw a,  amah leng pasal mai-etdan siam tak zi ahi . Kipah huai lua tel ka mittui nul a bei vingveng ta hi.

Huci in nupa ki-it tak leh ki-thutuak tak ka hi ua nuam ka sa mahmah mai ua miten gen belh pen in hon nei ta uhi. Mibang in anlim mehlim ne zokei mah le ung ka neikhom un kipaktak in ka ne uhi. Tu'nbel taleh nau ka nei ta ua sunkhat khua lak ka va pot leh huai vai/kol bora beg sia niapnuap khaipa ka muh ziak in ka hinkhua kiphok lua ka hih man in kon gelh ahi. Sanggah ka tan singdang tan dia ka phal loh na cu. Amasa pen neu apat damlai pa nei lo. 2. na it mahmah tuun nun hon beisan sanggah genthei kisak lai tak a hon ngai khok mah lawm it tak ka tanna, kumbang zah hiam guk ngaih nung a itluat vuvung ka tan na ahi.

MORAL: Hiai story hon kigelh ziak ahihleh nuleh pate'n i bol ding dol thei louh ziak in kate tagah meithai, a it anaih toh kiteng lou dia han ciam a amau deih bang zileh ta ding a zon ziak un tate tampi ana ki hi ci kha ta hi.Tua pan lak thak dia ka deih cu khang thak ei pawl in izi ita toh lungkim tak a awm a tate a ding in zi leh pasal zon sak lou a kep ding dan dol tak a kem din ka khangthak pihte kon ngen hi. Zileh ta zon nalam ah zong pilvang siam ciat a damsung hinpih ding zong ciat le kon ngen sawnsawn hi.

Simtu tengteng hiai story sung a genkhial sakkhial a om leh ngaidam kon ngen ahi. Honsim sak a hon ngai khok tengtung ah lungdam thu ka puak hi.

END OF PART 1. (Part II hong suakpah ding.)

©Siamsinna leh Vakiangbu