SIMLEI NUNTAKNA

By ~ Sang Hilsia

Innkuan nuamsa leh neizou apat khangkhia ka hi a, gentheihna, haksatna, taaksapna himhim ka tuak kha ngei kei. Huai ziak in tasam a om di’n le ka kikoih ngei kei himhim hi. Thil ka deih hunhun in a om a, sum a om ziak in. Ka pa’ sepna ziak in ka ngawl ngei kei ua, ka taaksap hun u le a om ngei sam kei. Deihdeih nei a, duhduh ne a khanglian ka hi hi. Ka pa ahihleh officer lian tak ahi a, naupang pahtak huai tak ka hi a, ka pa’ office a ka hoh khak chiang in le, a seppihte’n hon na pakta thei mahmah uhi. Ka pa khut nasep ngaina mi ahi a, suti a neih chiang un bang suun nileng a huan (garden) ah a hun tam zaw a zang bei gige hi. Compound lianpi nei ka hihman un, ka pa’n paak chi tuamtuam a chiing a, huai kia le hilou, meh khawng le a chiing hi. Tua ziak in anteh meh ka ngawl ngei kei uh. Vaigam ah om ka hi ua, eimi khenkhat in anteh meh a duh chiang khawng un lei di khawng in hong ngen sek ua, ka pa’n, “Ei khut a piangkhia khawng zuak mawkmawk lou e, mi a dia panpihtu hih diing ahi, ei kia a kihing theilou ahi a, mi i panpih hun a om dia, ei le mi’ panpih i poimoh hun om di ahi” ci in a zuak nuam kei a, a deih zahzah uh ala sak a, amau le a kipaak thei mahmah uhi. Ka pa officer himahleh mi peuh in a neel ua, amah lah mi kiphal tak ahi ngal a. Nam ngaina mahmah mi a hi a, saptuam a le a hih theih khomkhom in a kizang a, damlou lua ahih kei leh Pathian Ni kikhop maih ngeilou khat ahi hi.

Ka nu ahihleh, inn nupi mai ahi a, inn naa a thazoh mahmah a, mi hausa himah le ung, ompih ka nei kei ua, innsung nna ka nu leh ka nau khut ah a kinga a, ken bel kipasal sak in ka panpih nuam het kei hi. Innsung a fel mahmah a, amah bang nu ka neih khak hampha lua ka hih dan tu khonung in ka thei pan phet hi !!

Ka naunu ahihleh mi maitai leh paunuam mahmah ahi a, mi khase baih mahmah le ahi. A duang etlawmte leh a sakmel etlawmnate’ ziak in a luck lou het kei. Tangval amah deih a tam mahmah uh, huaite aman a haih kei. Amah ngai a deih bawlte bang a hon hilh sek a, himahleh ka ngei ngaih kei a, ka suheh zaw sop a, ka room apat khase tak a a pawt hun a tam mahmah. Ka pa bang in ka nau le paak lam lunglut ahihman in, ka pa toh a kithuah tam ua, huan sung ah hun a zang tam mahmah uhi. Paak ci tuamtuam tam tak a tuh ua, a kipaak un, kilawm a sa thei mahmah uhi. Himahleh, ken bel a kilawmna di bang mah ka mu kei !! “U, ka paak suante uh hong en ve a nalh theih dan” hon cih chiang in le ka gensiat sak zaw sop hi. Huai hun ciang in, ” U, na khel lua” hon ci a, ” Khel mah ke” ka ci suk gaih zel a. Kei pen khel mahmah mahleng ka nau in hon ngai in hon iit petmah a, inn a ka om kei leh om maimai theilou sim ahi. Ken lah huai iitna manphat dan tu khonung in ka thei pan ngal hi.

Kei ka hih leh Music lunglut mahmah ka hi a, ka lunglutna “Music” tum in ka hun tam zaw ka zang a, ka sungkuante toh hun ka zat sang in keimah lunglutna ah hun ka zang tam zaw hi. Ngaihpi pi in ka tum a, ka sungkuante apat in, ” Na bengseng lua, awl tum deuh o” cih kammal ka za ngei kei. Ka lunglutna mite’ a di’n a buaihuai hiam cih himhim ka ngaihtuah ngei kei. Ka sungte’ lunglutna lunglutpih kei mah leng, music van ka poimoh moh cu ka pa’n hon leisak khial ngei kei a, banah ngaihpipi in tum mahleng a hon tai ngei sam kei. A paak suante ka gensiatsak lai inle hon tai ngei kei. Ka pa sepna ziak in kho thupi leh nuam taktak ah ka om kha ua, taaksapna omlou in kiningching tak in ka om uhi. Ka thohma in ka nau in ka room a hon hih siang sak zel a, kipahthu gen nak sang in, “Siang kei” ci in ka phun a, puansawp le u lah phun, puan nawt khial zek le u lah phun, mahni a kihih sawnlou himhim ka hi. Ka phunnate kam khat in le a hon dawng ngei kei a, ka phunnate ka lungtun tan ah ahih a, tu khonung a ka ngaihtuah kik ciang in, ka om dante ka kisiik mahmah a, lah bawl thak theih vual ahi nawn ta kei. Niteng in ka sungkuante’ mit siipna di’n ka om gige hi. Innsung ah hi ci tuk in khel mah leng, khamtheih ah ka kibual kei a, drugs lampang a bel 100% pure ka hi. Laizial ka tep kei a, kuva nasan le ka hai kei. Himahleh, innsung ah ka omdan a hoih het kei.

Kitangval ta, Graduate thei di bang hita, ka nau le Degree 1st year bang hisam ta hi. Kei ka hih leh a kum nawn a degree final year ekzam di ka hi. Nikhat ka pa office kai tawp inn a singpi dawn zou, bazaar kai ngai a cih ziak un, ka nu toh ka nau toh a 3 un a pawt ua, kei kia inn ah ka na om hi. A pawt zoh uh dakkal 3 vel diing in ka phone a hong ging a, ka nau ahi a, ” U, a kin thei bang pen in, Christian Hospital hon delh in” hon ci a, a koih ngal hi. A ‘aw’ apat bang hiam dik lou om ahi cih a chiang mahmah. Inn kalh in, a kin thei tawp in ka bike toh Christian Hospital lam ah ka tai vengveng ta hi. A damdoi inn pen ka inn ua pat a tangpi a gari a i pai leh minute 30 khawng kitai ahi a, huai ni in chu minute 10 in ka tung hi. Damdoi inn ka tun in ka nau in hon na mu pah a, bang mah le ka dong man kei a, hon pum kawi a, hon kah khum ek-ek mai hi. Ka nu-le-pa’ mel ka muh louh tak in, “I nu la?”.”ICU ah”. “I pa la leh?”. “Morgue ah”. Hiai dawnna ka zak in naa ka sa mahmah a, ka biang ah khitui dan vuallouh in a hong tak khe keuhkeuh hi.

Bazaar hoh hong kiklam, lam kaak ah gari dang toh kiphukha a hi ua, ka pa’n gari hek hiven, ama om na lam a pat phukha ahi a, ka gari uh a ma lam laktaaklou sim hi. A nung a tuang ka nau bel liamna bang mah nei lou a, a ma a tuang ka nu-le-pa’n a thuak uhi. Ka pa damdoi inn zot pih ahih lai a si ahihdan ka nau in khitui luang zungzung kawm in hon gen hi. Morgue ah ka va lut a, ka lungtang a naa petmah a, ka pa’ luangtung ah ka va kidiik nilouh hi. Ka nu lah oxygen kibulh, a kiang a le om theih louh, gaal et lel himai !! A dinmun lauhthawn huai hilai. Ka lungsim ngaihtuahna a paisau mahmah. Ka nu’n lah khua phawklou, ka pa’ luang lah puakkhiat ngai, ka mihing thahatna in a zou mahmah kei. Ka nau toh khut kilen in ka tukhawm tittet ua, panpihtu bei ka kisa petmah uhi. Hucia mangbang tak a ka omlai un, eimi a theikha liai damdoi inn a hong tung ua, pan lak theih dandan in pan hon la ua, ka na vaak tuan mahmah uhi. Kou hon buaipih a hong kipeite ka et velvel ciang in ah, nidang a ka pa mi panpihtu ahih gige ziak hi di’n ka gingta tinten hi. Hucih lai in ka pa’ kampau,”Mi panpihtu hih diing ahi. Ei kia a kihing theilou, mi i panpih hun le a om dia, mi hon panpih i poimoh hun le om di ahi” a cih ka bil kha ah a hong ging chiaichiai hi. Ka pa a damlai a a mihoih ziak a, tua a sih nung tan pha a le amah iit a, lainattu om ahi ka ci lou thei kei. Thil hoih hih manphat dan ka chianta hi !! Hiai tuah siatna toh kisai in, ka om dan uh ka ngaihtuah khe thak guih hi. Thil tunma kal khat in ka pa’n, a ATM card pin hon hilh a, huai kia le hilou, a e-mail password leh inn pata kei min a kikheng, ” Ka tapa na hi a, ka gou luahtu di na hi” chi kawm a hon piak lai khawng ka ngaihtuah kik leh, ka pa’n a hun bei di mukhol a diam cih ka ngaihtuahna ah a hong lut hi.

Ka pa la kivuita, melmuh di om nawn lou, ka nu lah houpih theih nailouh, ka mangbang petmah hi. Innsung kei khut ah om hi ta mai hi. Kei ka hoih leh ka innsung uh nuam di hi ta, lamet dang om nawn lou. Ann lah kihuan theilou ahih na ah, ken ka nu ka ompih a, ka nau inn’ leh damdoi inn kawm tuah in ka bike in a kivial lehleh mai hi. Khat veivei ka khel zel a, giah bel damdoi inn ah ka giak uhi. Ka nau bike zil ut loupipi force a a poimohna om kha thei ahi ci a ka zilsak, tua apply theih ahihman in, kizen vanglak hi. Kha khat bang damdoi inn a ka om nung un hon discharge ta ua, kou le ka pawtkhe ta uhi. Damdoi inn a ki-om sawt sim ahihman in, huai a seem, eimi nurse duangching leh mel etlawm tak Liani toh ka kineel man uhi. Mi kipaak thei tak ahi a, a maitai a, ka nau toh ka teh mahmah mai hi. Aman hon na lainat mahmah a, amah ziak in ka buainate uh a veng duakduak hi. Nitak le zanhah pih ka ngaih ua leh hon zanhah pih a, gim-le-tawl khawk sa lou in, kou a ding in a pang hi. Khat veivei bang, ka unau ua ka pawtkhiat uh a poimoh chiang in, Liani in ka nu hon na etsak zel hi. Hu ci bang ahihman in, bang tan hiam ah ngaihnatna ka nei hi.

Inn ah ka ki-enkol ua, ka nu le a kisot mahmah ta hi. Himahleh, a khe nidang dan in a zang thei nawn kei. Mi khenkhat in bel piangsual peuh a ci di ua, a liamna a khe dam siang theilou ahihman in a baai (limp) a ngaita. A taksa damsiang mah leh, a damsung in a khe a dam nawn kei di !! Ka pa mel mulou a vuiliam a om pen ka nu’ a di’n bang ci tuk in a haksa phet diam maw.. ! ?

Hunte hong mualliam zel a, ka thawmhauna u le a dan hong om zaw deuh ta a, ka hinkhua ngeina uh kon zang thei nawn dek panta uhi. Himahleh, innsung kei’ khut a kingata ahihman in, ka hinkhua ngeina a hing thei nawn lou ka hih dan ka kithei a, kibawl hoih ka sawm petmah ta hi. Ka nau sepsep bang ka seppih a, siamlou lua ka hihman in, “U, huci’n koih mai ve, haksa le hilou eive, ken le ka zou thou na di” hon cih ciang in, aw neem tak in, “Khatvei sunsun khawng i hon panpih ut sam voi” ci’n ka dawng a, kei ah kikhekna amuh un ka nu leh ka nau kipaak mahmah uh ahi cih a mel uah a kilang hi. Ka nau toh ka kal u le a hoih sot mahmah a, ken le nuam ka sa a, ka hun tamzaw ka sungkuante toh kon zangta hi. Zingkalte thou baih in, singpi khawng a hong thoh ciang ua a dawn theih ngal di un ka na koih sak zel a, ka nu leh ka nau zingkal a hi cia a kihou ciang un ka na nui hauhau zel: “Nu, hiai singpi nang awm hia? Na thoh lam lah ka thei kei a”. “Kei ka thoh nailouh pi, na U ahi di”. Verandah ah news sim in ka tu a, a kihou uh a zalou lem kineih in ka om mun ah kipaak in ka nui hauhau zel hi. Hicih hun ciang in ka nau in kipahthu hon gen khial ngei kei. Mi’ a dia thil hoih hih nak manphat hi na tel e. Mi kipahsak nak thupi hi na tel e..

Zing khat ka room ka hah zoh in, tohlet (window) gei ah ka tu a, ka pa khut nung ngen ka mu a, ka lungleng mahmah hi. Inn malam ka en a, a paak suante, ka mu a, inn nunglam ka en a lah, a haichi tuhte sel panpan ta, a zaamna di a bawlte khawng ka mu a, etlawm ka sa petmah hi. “Pa, damlai lecin zaw, kipahpih lotel di hi cin a maw ! Tu’n lah na khutmate in nang ngaihna hon thak sak zaw a”. Ka nau toh paak tuh a kipaak tak a hun a zat laite uh ka mitkha ah a hong lang dundun a, ka pa toh hun ka zat khop tawm luat uh ka kisiik a, kei mah deihtelna leh lunglutna a ka na pai luat khak poi ka sa mahmah hi. Ka nau bang ka eng petmah hi. Huchia ka om lai in, ka nau zing singpi pe di’n a hong lut a lamdang sak chi tak in, “U, bang ngaihtuah e ? Na om de du a?” hon ci a, “I pa toh na thil hihte uh a etlawmna tu’n ka theikhe pan, i pa toh tua sang in hun ana zang tamzaw leng zaw, ka lungkim di hia ! Kei mah deihtelna couh a ka na pai khak poi ka sa lua. I pa toh hun na zangkhawm tam ua kon eng lua nau. A zang khawm thei di hi na zenpi, kei’ khel ziak a zangkhawm theilou. Tu in i pa toh hun zang khawm ut in samsam mah leng le phatuam nawnlou in cin, kisiiklua ka hi” ka ci hi. “U, hun paisa hita, kisulunggim ken la, i pa’ sulnung i zui dia, amah i phawk gige na di’n paak tampi i suan beh di aw” chi in hon dawng a, lem ka sakpih hi. Hucih dungzui in paak chi tuamtuam ka lei ua, ka huan u le ka keek lian ua, tampi petmah ka suan beh uhi. Ka nau lah a siamsa ahi a, nalh taktak in a lem a, a etlawm mahmah hi. Skul suti nikhat cim lua, ka pa’ laptop ka en a, huai a ka lung hon khoih pen chu a paak lim lakte ahi. A thil chiinte a neu apat alian pen tan a kim sipsip hi. A paak suante, a haichi tuhte lim ala a, folder tuam ah atuh ni toh chiamteh in a koih diudeu hi. A thil hihte lim la a, koih hoih zel ahihdan huai ni in ka phawkkhe pan hi. Ka lungsim ah thupukna khat ka bawl hi. Huai tuh ka pa’ sulnung zuih a, a khutmate phou lak diing cih ahi.

Ka pa camera ka khoihsak ngei hetlouh ka lakhia a, limlak ka pan ngal hi. Ka nau peuh ka la sek a, huci’n ka kizil a, A camera lens ka duhthusam louh ziak in, lei ka sawm a, himahleh a leina di sum omlou, ka lungbuai petmah hi. A tawp in chu ka music van teng zuak di thupukna ka bawl hi. Hiai thu ka nau in a theih phet in, lamdang sa tak in, “U, zuak ngam taktak di mo?” Na lawmhoih pen hilou hiam?” hon chi a, “Nau, nidang in ka lawmhoih pen ahi mah, himahleh tu’n bel lawm thak ka nei ta” ci in a biang ka meek sak a. Music a ka lunglut luat hon theihpih mahmah uh ahihman in, ka vante ka zuak dek mawk pen lamdang a sa uhi. Ka nu le ka dong a, ka zuak utna ziak le hoih tak in ka gen a, “Nang thuthu ahi” hon ci hi. Camera thak bel lei ka sawm kei, a ziak bel, ka pa’ camera ka zat ciang in amah ka kiang ah om bang in ka thei a, kimuan ngamna ka nei a, lohching thei zaw a ka kitheih ziak ahi. A lens pen upgrade lel di ka lungsim ahi. Ka music vante, ka acoustic guitar cih louh siah iit mahmah kawm in ka zuak a, ka zuakna man in ka camera lens di ka lei hi. Huai banah, paak chii (seed) le ka lei a, ka pa’ huan kon puah taktak ta uhi. Ka huan ngei ua paak etlawm taktak te lim ka la a, computer ah ka koih a, ka en-en mai a, nalh ka sa thei petmah hi. Ban ah, nature ka ngaihnatna le a uang deuhdeuh a, ka paina peuh ah ka camera ka tawi a, nikhat in lim tampipi ka la a, inn ka pai ciah ka 3 un ka en khawm nainai zel ua, ka nui khawm ua, nuam ka sa mahmah uhi. Ka lim lakte ‘Facebook’ peuh ah enjoy na di maimai kawm in ka upload zel a, like leh comment ka ngahtam thei petmah a, huai in tha hon pe mahmah hi. Ka limlak upload a tam zaw ka huansung ua thil piangte ahi. Photography lam ah mi dan in certificate nei kei mah leng, professional te’ hihte ka hih lah a om kei.

Nikhat ka mail ka check leh, Indian Bollywood director apat ahi a, photographer dia hon deih thu uh hon gen ana hi maimah a, Facebook a ka lim upload te mu a, impressed mahmah ahihdan hon gen lai hi. Enjoy na maimai di ka cih pen ka lungtup mualsuahtu a hong hi maimah hi. Ken le a hon offer uh ka dawng pah a, nasep ka panpah ngal hi. Ka lunglutna ahih toh nuam ka sa a, ka enjoy a, chitak tak in ka seem hi. Ka kuhkalnate’ ziak in ka heutute’ deihsakna ka tang a, hon kaisangsak pah uhi.

Pathian in ka hoihna dia ka pa hon laksak ahi cih ka theihsiam ma in puaksiam haksa ka sa mahmah a, himahleh huai kon theihchet ciang in ka puak a zaang mahmah ta. Ka hinkhua a ka kipahni te: Ka sepna a ka kaisanna, Koppih ka neihna,Tapa fel tak ka neih te, ka hinkhua a kikhekna omte bang hon mu leh nak kipah lotel di hia, ci in ka nehnou tha bang hong suak sek a. Banghiam ah lohcinna ka ngah ciang in ka pa ka lungsim ah a hong lang gige a, hon kipahpih di dan ka ngaihtuah a, kipahna khitui in hon buak zel hi.

Ka pa a damlai a, a paak suante ka gensiatsak ciang in,”Bawi khatvei tei tua ka thil hih te’ ziak a hon phawk gige di na hi” hon cih bang ka phawk thakthak zel a. A thil gen pen hong tangtung petmah a, ka theisiamta. Nikhat lel leng ka pa ka phawklouh ni a om kei. Pawt dek leng lah, ka pa khutma: a paak suante kimu, inn i tun cia lah a khutma mah kimu, ka pawt dek ciang in huai pakte’n “pawt nuam” hon ci hi le uh kilawm in ka thei a, skul kai ka kuan dek teng a ka pa’n bye bye hon khak laite khawng ka mitkha ah a hong lang dundun zel a, inn ka tunkik ciang in huai paakte mah in nuih mai tak toh hon na vaidawn bang in ka thei a, ka pa’ mizia a sulang mahmah uhi.

Tu in Indian Bollywood Industry ah Director of Photography len in ka sungkuan un Mumbai ah ka khosa lel uhi. Pathian in koppih kizen tak a hon pia a, ka haksat ni ua hon taisan lou, ka gim ka tawl uh hon thuakpih, damdoi inn a sem Liani ahi. Tu in Pathian vualzawlna gil a gah goutan tapa ka nei ua, a nu a suun a, a melhoih mahmah hi. Ka innsung uh a chidam mahmah a, ka zi in ka nu leh ka nau kei a hon iit zahzah in a iit a, huai in ka innsung un a chidam sak diak hi.

“Zua aw, kei dia na thil hihte, kei a dia na kipumpiak na te, thupi in lamdang lua. Simlei ah ka nuntak sung nang ngilhni tuang tung lou diing.”

‘I’ll see you in Heaven, in another life, where we’ll never say goodbye.’

Missing you Dad.

BEITA 

©Siamsinna leh Vakiangbu