LUNGSIM KITAMKHAM
~Lian Khuptong
Amualliam annbang ki-it tekal thu mah awle sutlou ding genlouh
theihlouh tangdan in tamlou kikumni hang. Siamziak hilou gelpeih ziakleng
hisam kei lungzuan zatam sialvanga sialvui ching hizoh hi.
Franky leh Ricky tuh sangam Nu-le-pate unau helhel kumsangkhat
zagiatleh som nga hunlai khongin napiang uhi. Huaihun lai in Lamka
zaangtuh khonuam leh singleh louhing dipdipna mun ana hilai tudin
munzenin, nakhangtou naisam lou hi. Khonuam takleh kithukhat vaihawm diamdiam theilai ana himokve lamdang nitakzan sawtin mite galmuang kisa'n
nuamleen pallainite zangin, khodung khovai tuh tangphing pheng mai
huaikomkala laka khovel hamsiatna leh haksatna leh tomchiik nopsakna
tezangdin Franky ahongpian khia hi. Tuabangin Ricky leng khakhat nungin
Franky piannung tham in khovel paaldin hongpian kheh non hi. Hun hongpai
zelin nihgel tuh hongkhang liansimta uh hongkipol theipah ua kikim sim
hel hel uhi. Sikul kaina koimunpeuh akizuidenin ahaksatna anopna-adahna
te wa kipanpih ngiat ngiat lawmta kipol thei sanggam hizoh mah
uhi. Franky toh Ricky igentak samah bangin nungak bangleng helkhawm in
khovela mikhat suahsom in siamsinna te abang ahihthei tan un' hahpangtak
sin uhi.Hun-le-kha kihei mualhong liamzel a Franky in kumkho tawna
atulpih din Lia paal zatamlaia deih chi banga atel Kykym tuh azi'din
Ricky toh Valentines day Feb14 in vagu hiau uhi.
Tuabang Franky in Zi' hon neih mawkle Ricky toh bang akal uh gamla
deuh deuh in nidang bangzen in kizuih kipolh cihte omthei nonlou Ricky
lengtang khat kisasim in Bem asikul kapi tekhat vabul bawl hi. Tuabang
kitengding simthu honlel pat uhle heiha, Bem nuten deihsak lou'n
ahaltheih tawpin haalziak un nihgel kalsimthu sianhawm hinte kikhen mai
uhi. Khatve Franky leng hun-awlin senchil lawmngaih Ricky tevahoh in,
hunluite sutin Ricky in Bemtoh kalthu bang hilin alungkhamna adahna teng
tun hi. Huchih mahbangin Franky inleng pallai ammlua ahihdan genin
honghoulim tiptip maisam uh. Dak 3pm bang honging leh Franky leng paivai
somin kimu zelding chiin kilehsan phot.
Khovelin hoihlam sangin siatlam manoh eive adik hi. Ricky tangkhat
kisa alawm it Bem tohkal lah khaubang kiphel tahi. Gentheih ding omlou
Alawm Frank in Zineih san zohmah khasia mahmah sam hi.Hongkho daka
khovel mite etbangin kadamsung huntomno kathu chiin, amah deihtelna
lampi honzuita mai hi. Huaia siatna chitengin utleh dahin ahinkhua'
khangdawng hin khuapen lampidiklou lam Zu-le-sa'n hongkibual petmah hi.
Khaih! Atun-le-zua te katam lohna puakgikpi ahongsuakta asikul kaina lah
sutzop nonlouh mite' pampaih nawlkhin ahong hita mai hi.
Hunte pailiam zelin mite kumthak leh kumlui zangding phultaka omlai
un' Ricky genthei takin liangvaitak mai panpih ding beiin daikiil khataa
khovot thuaklah in om hi.Mangbang kikou aw! Zak ahihta kei kuamah
theihlou'n khovotpiin kumthak ding hongtung ngak hipeuh mah phot hi.
Gintak louhpiin zalmang dia lengdeih hetlou hinapih tang- au-pa'n
khosung adung avai-in hongkikou kangkang bang simthu honggen tazen hiam!
Khosung mipite nangai un' pasal tangvalnou te aw! Guitui lei (bridge)
kianga tumahin misi'khat a oma khosung mite aneu-alian hongtai khom un''
hiaithu Franky in honzaaktak in lamdangsa'n kua hiding hiam! Kisa'n
vakan kheh dingin hongpusuak hi.Khiimbang zing kasengual ngaih ahunlou'n
khaubang non chiasan mo? Tanglungmol in navang ngaih puaksing banglel
lua'ing Franky dahlaw mahmah sam hi.
Franky in Rick suun kisa'n nguizou hial keihi zohmai leng cih peuh'n
pohna mah hi.Ricky sihni hialin zoh Bem bangleng kidek zoutuan samlou'n
asungkuan un hong pha hial uhi.Ngaihtuah nakhata mihing hinkhua bolhoih
suse thei ommah hiam chi lungsim mawk! Frank in alawm it tungtawn a
alungsim ahong ging gige khat omin thei hi.Banghanga mihinghina
manphatdan theinapi kei ana khanglou theilou amaleh amah bang kimohsa
hi.
Tuabang tengnung in Ricky sihzoh kumkhat bangpai nonta hi. Galhong
omin zoudawn lamteng galten pumtuam thuthang in, Lamka zanghong dengsuak
hi.Imisate tuallena Igam singdangtan ding kaphallou e... khopi tangval
suanhuai mibangzah hiam hongtai khom uhi.
Gam itna toh Franky lengvakuan tel hi. Zodawn lakik dingin kuantou uh
kaihlam tangdung khonga galte toh hongki bukap zialta mai uhi.Thau
taangleng vengvung asakhang amm sitset mai! Kidawp omlou'n atawpin
gamlei tangtuh lakik ahong hinon galte taidalh khin uh. Kuateng liam
kuateng dam bangleng theihphak hinailou hi.
Lenmual dawna nihongsuak singseng in, damtakin bangzah hiam?sih
mahleu ahunkhop damtakin, khopizuan theinon vanglak uhi. Khosung
hongtung uhleh mite aZI' atate un'dawn sausauh Franky in gala silou
kipaktaka inntung ding Zi'tetoh kimuding in, akilam etna' bangloutak
maiin kuamah adawn di omtalou hi.Dahlua kingaisetak mai'n innhonglut leh
lehkhathon honmu ngal simpah hi.Vangngaih tohsakmel muhding kineem in,
zaithanuam in kahongpai a tuhin singdang siangna honzot sanmai Tanglung
molin bangchin zalmangpha könchi theidia? Nasulnunga sawlbang heinalua
Isiang nahongzuan dingsa'n suunitum kangaka nalaukha bekin, kazuan
hongneemve maw! Aw ngaiveng nunnuam ikholhlai gentam angaikei hi.
Kykym intuh pasaldang neihsan anaakhotai uhi. Franky tuh simleia
piang sapsap dingin vangtah kisa in, hongkingai segop petmah hi.
Belhding neilou giakmoh vabang alawm Ricky inla agalkuan mahin sihsan
zohmah aluankhi lehul manlou'n aZI' It nusia tunlah minu'n singdang
angliim nabel zohsawp ahehluat manin, Franky gamnuaia valut non in Burma
gamtan galte vadelh khia uhi.
Liam leh baihin zogam lam manohin hongkileh kikna lam un' alawmkhat
uh hahliamlua damzoh lam ennon lou'n Franky enkaiding in, alawmten nusia
aman lengsing phung naihpi hi.Tua singphunga atawikawl chiang
aliangbat'n hongki ngaihtuah tuah hi. Franky in banghanga gala simai lou
kahia? kei hiaia patin pailengleh kalam etdi omlou hi.Kazi'lah omnon
lou kasen kavualngaih inlah honnuse khin lam-etding bei hi.
Tuabanga hongki ngaihtuah laitakin galten Franky na umkual khinta
amanleng tainadi zongmah leh suahtak nang omlou hi.Galten nathau
koihkhia' chiin nolh mahleu Franky in atawikawl chiang hongliktou
patle.... Detdet....mualliam tamai vangsel tangpa
Comments
Post a Comment