HAKSAT NA KHEL AH VUALZAWLNA!

By ~ Za Ching Paite

Ka pasal in hon sihsan nung kum 1 bang paita mah leh lungsim mumal tak leng nei theilou in ani, ani a suun deuhdeuh hileng kilawm in kipah meel himhim ka nei ngei kei hi. Ka lungleng thei mahmah mai a Hunluite ngaihtuah in khitui toh ka hun ka zang tou gige mai hi. A khen ciang in ka hinkhua paidan theihsiam haksa ka sa a, naupang cik, hai miilmeel a pasal nei ka na hi a, kei deihtelna hi hetlou a tua meithai ka hih maimah cih khwng ka ngaihtuah ciang in vaangse law tuam kisakna bang in ka pumdim hi. Ka tapa kum khat lel d mi bang ka kiang a ompih thei hileng zaw ka lungzuan lungnat bang le nuamtuam kha d hi a, hilele kei sang a apute a nite kineisak zaw uh ahihcia, a meel muhphak inle om ngei kei a, ka ngai thei mahmah a, ka lunggim hon behlap mahmah hi. Mi lak a kihel d bang le ka zum a koimah ah le hoh khelou in inn ah thawmhau tak in ka om-om mai hi. Ka sungte bang in hon awlmoh thei mahmah ua, ka pa bang in ‘bawi, hicia na om-om hoihlou hiveh aw ! Nang kia haksatna tuak hilou na hi. Kihalhsak inla biakinn lam khawng naih le cin na lungsim le hong zangkhai tuan d ahi’ hon cisek mah leh kei ah bangmah lunglutna himhim a om theikei. Mial in hon tuam cip gawp ahimai.

Himahleh, hunte hong pai zel in ka nu leh pa hon thumsakna, ka u leh ka nau hon panpihna leh lawmte hon khamuanna te ziak in ka lungsim hong kikheng thei in khovel vakna lam en in lungsim nuam tak a hindan ngeina zang ding in kong kisata hi. Biakinn bang ah ka hihtheih dandan in ka hong kizang tei sam a, ka vengte bang un hon kipahpih thei mahmah ua, ka nu leh pa hon kipahpihna bang a lian khol diak hi. Ka hun awl neih kaal in mi tampite haichilh leh gen minthang FACEBOOK bang kon khoih panta a, ka lawm d bang ka ngah mahmah hi. Nidang a lawm luite toh bang kimu khe thakthak in nuam kon sa panpan ta hi.

Lunggimnate bang awl-awl in hong zang hiaihiai a, kei a kipahna thak om in ka mel bang hong vak tuan in nidang a ka kilawmnate hong lang non panta a, hon star d hunkhop bang ana om zel sam hi. Hon na ngai a, itna thu hon gen d bang le ka tuak zeuhzeuh nawn hi. Hileleng ka dinmun ka kitheihciang luat ziak in leh ka pasal ka suun na leng bei nailou ahihman in hicibang thute ah ka lung a lut thei het kei a, ngaihzawng neih d lampang ngaihtuah in ka nei kei himhim hi. A khente bang in ah hiai nuthoi eivele cin hon ngapthoh bawl in ut dandan a bawl theih d hon sa in msg. thaanghuai taktak bang hon khak zel ua, hilele amau hon gingtak bang hetlou in huci bang mite ka kihep khiaksan zel hi. Lawm khenkhatte bang in lah ka dinmun hon thei ciang un hon hehpih mahmah d bang ana om thethup zel hi. Huci’n hun hong pai tou zel a, kei leng ka hinkhua a kipahna thak nei in nuam konsa tou mahmah a, sep leh bawl bang ah ka thanuam a maitai tak in hun kon zang tou zel hi. Nitak khat lupna tung ah ihmu thei pah lou ka hih ciang in ka online kha nilouh hi. Lawmte khawng toh ki chat in ka houlim lim uh leh zinglam dak 1 bang ana ging man hial a, kei le uang kisa law sim in ka log out dek leh friend request khat ana om a, ken le ciang tak a enthak tuanlou in ka ihmut san pah hi.

Sawt lou cik ihmu ka kisak leh ka nu’n hong phawng a ‘bawi….Ching hong thou in dak 7:30 bang gingta eive’ hon cih leh ken le phawk guih in ka thoukhe pah a, kisuanglah tak mai in ‘nu khangma kha kei ve maw…zanitak ka ihmu thei pah kei a eive ka cih leh aman leng ka kisuanlah lam hon thei a hi dia, huchi hun bang le om kha thei d eimah ve en zaw hon theisiam lua hang. Hilele ei kia om hi nonlou hang a, mou bang neita i hih ciang a, mou te’ mitmei bang na veng petmah kei leh eibang in hon dampih gige lou maithei i hihcia na u te khut a nong kingak hun bang omthei a hi i cih man hi cin itna leh deihsakna toh hon thuhilh hi.

Ken leng ka nu thugen dik ka sa mahmah mai a kei nungak siang le hi nonlou pasal neisa nawkik hi maimah ka hihciang a nidang a ka insung ua nopsa tak a ut dandan a ka om bang a omthei hi nonlou ka hihdan khawng kon phawk khe thak a…nu na thugente a hilaw ngut mahve, tuban kong pilvaang sawm ta d o, ci in kihahsiang di’n bathroom ah ka lutsan hi. A leh lamtak ah ka mounu (ka u zi) hi a ka tung ah a siam mahmah a a sisan kizoppih a sanggam taktak mah bang a hon bawl in a nuam mahmah hi. Ka haksatnate bang hon theisiam in ka lunggim luat khak d bang hon veeng in hon khamuan zou mahmah hi. Ta numei khat a nei ua huai in bang hon ngai petmah a nini ci in ka omna lamlam ah hon delh in innsung ah hon aangtang sak tuan mahmah hi… Kei leng kihasiang zou in ka sep ngeinate innsung hahsiang, puansawp cihleh leh a dangdang hih in ka buai na d khop ka ngah mahmah hi. Huci dan khawng a buaina d ka muhzoh peuh leh lunggim cihte khawng kiphawk manlou in nuam ka sa zaw hi. Huchia ka buai sung in ann nek hong hun in ann te ne mengmeng in sepna a kuankhe d te kuan in koumau naa ciat kon sem non uh

Hih d teng hih zou in kei leng ka facebook kon login non a friend request om te hoih tak a leng encian sese lou in ka ban accept suk hi. A nung sawtlou in message khat hong om a, ka etleh “Siam Zomi” kici khat in hon message ana hi a…hai, Cing dam zel mo? kon request non accept sak a ka kipak lua…’ cih ana om a, ken le damzel mah ing cih teng kia in ka reply leuhlauh hi. Aman ahihleh hon theih citak in hon houpih tou zel a ken le lamdang sa in nang kei hon thei ngei mo? ka cih thahah leh aman le…Aaamai ! hon thei nonlou mo ? Ka limlakte ana en thak dih hon ci a ken le kua a hi mahmah de o / cin ka en pah hA profile picture te ka ban et leh maizennn ! Ka lamet hetlouh leh ka na ngaihtuah khak ngei non hetlouh kum 10 bang paita a khovel a ka itna ka na piak masak penpen Usiam ana hi maimah a, lamdang sa in ka kiguih hial a, ka dip bang in hon phu dutdut zezen hi.

Cik mah a mukha leh kihou kha ngei non dia ka kikoih nonlouh nung a hiai social network tungtawn a ka FIRST LOVE kon muh khak zaw lamdang ka cilou theikei hi. A lim te bang ka en thakthak a nidang a ka kipolh lai sang mah unle a meel bang a hoih zaw hi. A lim khenkhat te ah numei melhoih sim khat a tel nak sek a zi neita hi d eive ka ci lungsim hi. Ken le msg khak pah in Usiam nang lah na na himaimah a ! Lamdang na e ! Hon thei nonlou dek kei vele. Bang cidan a non muh khiak zenzen a. Zi neita mo? Ka ci suk pah a; Aman le cim lua ing a facebook ka khoihkhoih leh people u may know a na min hong om a hoihtak a ka et ciang leh na lim ana om mawk a…ehee ! Hiai nidang a ka na itluat ka Lunching eivele cia hon add pah ka hi. Kum hiai zah nung in lamet louh leh gingtak louh pi in i kimu tuah kha non a, ka kipak tel mai. Na aw ka za ut lua. Na contact No. hon pe ve? cin hon ngen a, ken le ka pe pah hi. Huci’n a hon call ngei a ka hun luite uh suut in a lungleen huai ka sa mahmah hi.

Nidang a ka na kingaih lai ua ka omdante uh khawng gen in naupang hai cik, itna om zia leng thei taktak nailou a kingai ka hi ua, ka kisuheh mun mahmah ua, huai hun khawng a ka kinuaksan dan khawng uh gen in ka nui ek-ekh zel uh hi. Amah a dia kei leng a first love ka na hih ziak in hon mangngilh theilou ahihdan khawng hon hilh a, huai hun tak in zaw ka hihna leng mangngilh zou khop in hunlui ah om in nuam ka sa mahmah hi. Zi neita a, tapa khat nei a hihdan leh a sepna mun Mumbai khopi a om a hihdan khawng hon hilh a, ken leng ka tanchin kim sipsip a hilh in tua ka inn ua nawkik ka hihdan leh ka tapa nangawn le tang zoulou ka hihdan a theih in poi a sa mahmah a, hon thuakpih petmah a hihdan leh lungkham hetken Pathian in nang a dia hoih zaw lem hon geel sak na d ahi, kon na thuumpih zel d aw, ci’n hon khamuan a, hucin mangpha kikhak in fone a koihta hi.

Ka ngaihtuahna a pai sau mahmah mai a, zawlluite khawng nuamsa tak a zi leh ta toh om ua, ken hiai ka dinmun bang ka tan khak sese, bang ziak pen tak a hi dia o ? cihkhawng ngaihtuah in ka khasiat bang hong suak mawkmawk a, ka pasal ka ngaihna bang hong puang thakthak in huai zan tuh ihmu hetlou in lupna tung ah khitui toh ka khovak maimah hi.

Ka hun awl neih teng un Usiam toh kihou in ka kithuzak gige ta ua, ken leng ka lawm hoih pen bang a bawl in ka kipahna leh ka lungkhamnate khawng hilh in hon khamuanna thu khawng leh thuhilhna hoih pipi khawng hon pe zel in ka kihou thei mahmah uh hi. Bang cituk a kilawm hoih hi in kihouthei mah le ung le amah mi’ pa leh mi pasal hawmthoh tak ana hita ahih ciang in, a khengval lua a ka om khak d lau in pilvang tak in kipolhpih ka sawm zaw hi. Huchi bang kaal ah kei leng a tam zaw te theih a nungak ka hi phot a, ka mel bang le selou a hihciang in tangval hoih pipi sepna hoih taktak nei bang ka hon tuak kha tou zel a, hilele ka dinmun ka ki-etciang in kei leh kei a kisit in kuaman le itna tak a hon en di’n ka koih thei kei himhim hi. Ban ah kua hiam khat khawng toh kingaizawng d dinmun a ka kikoih ciang in leng kei ah kimuan ngamna omlou in, nidang bang a mi it leh ngaih nei taktak thei non di’n ka kigingta kei mawk hi.

Mihing khat a kihih sam ciang in mihoih i na sak leh i na ngaihnat theih deuh bang le a na om zel sam a hileh leng mi va ngaih bawl a maingal tak omthei dinmun a om in ka kikoih kei himhim hi. Hon ngaihbawl deuh bang a om ciang in kei hici bang ahi ka dinmun ci a kei leh kei va kigenkhiak d bang ka lin thei petmah a lah kigenkhiak louh theihlouh na mun bang om zel ahih ciang in zum pipi in ka hilh zel hi. Khenkhatte bang in a hon theihcian ciang un hon ngaihsak non kei vengveng ua….a khenciang in zaw nuthoi dinmun haksa ka sak luat tuntun hun bang om zel a, lah ei bawl theih ana hi hetlou ahihciang a ahi bangbang pomsiam a ngai zel hi.

Ka lawmte leh tanau khenkhatte’n ngaihzawng nei d khawng in hon hasuan zel ua hileleng huai hun ciang in a sisa ka pasal leh ka tapa ka itna lian semsem in ka ut het kei hi. Himahleh na pasal it cici mawk lecin leng hong hing thak tuanlou dia, na tapa nang kiang a om le hilou pi ngaihtuah tuah lecin le phatuamlou ngak khial thei na hi. Huai sang in na maban d khual inla pasal hoihtak a poimoh hun a na ta hon etkolpih thei d zong in, hon cihciang un lah a dikna ciang om sa zel in ka lungsim buai in a buai hi. Usiam in lah niteng a hon houpih gige mai…Khatvei vei bang na tapa van d na na leisak nang ci peuh in sum bang hon khak thethup hi. Huci bangte ngailou a hi ci’n nial dek leng le i hon panpih theihna sun eivele ci’n nial vual a hi het kei a, kipaktak a san a ngai zel hi. A hon care petmah a akhenciang bang in a zi in hon theihkhak d lau in nuam ka saklouh hun bang a om a, ngaihsak nonlou d ka cih ciang inle a kuhkal luat ziak in ka taisan thei taktak kei hi.

Damlou a ka omkhak zek ciang bang in hon awlmoh pet mah hi. Nikhat a nihvei thumvei bang hon fone thithe in ka kiang a om a duat tak a hon kep a utdan khawng gen in a khenciang in lah ciamnuih thutak in hon ngai lawlai a hihdan peuh a gen zel a; ken leng a hon awlmoh dan leh hon buaipih zoh dante ka ngaihtuah ciah numei leh ui in a be zouzou leh a maivil zouzou ngai uh ahi acih bang dandeuh un ka ngaihnatna lian hiaihiai in ka thei a, ka lungkham mangbatna te leng hon mangngilh sak zou lua ahihman in amah toh kihou khawng bang nuam kon sa law sim mawk hi. Hilehleng ka lungsim guuk tak in zaw ka ki-oi hetkei, zi leh ta nei a hita hincin kihou in om-om mawk le ung denciang a a hilou tan bang tun khak theih hi a, kei a d mahmah a leng hoihlou ahi ci in ka lungbuai gu mahmah zel hi.

Huci in thilhoih loupi ka kaal ua hong tun khak d ka lauhman in ken leng a hi theitan a panlak sawm in ngaihzawng khawng neihsan leng awl-awl in amah apan in ka kihemkhe thei dia, kei a d mah a leng hoih zaw d ci in ngaihzawng neih d peuh kon lunggulh ta hi. Tangval hon ngai omlou lah hilou a ci in mikhat toh kong kingai uh hi. Hilele ka ngai thei taktak kei a, ka cihsa mah bang in kei a kimuan ngamna a omkei a, amah leng ka muang thei het kei hi. Ka muanlouh dungzui in aman leng hon ngai taktak hilou in ka taksa leh ka melhoihna enlah a hon kimawlpih ut maimai ana hi a, ka theih khiak tak in ka heh mahmah mai a, huci’n ka kaal uh lemthei taktak lou in ka tawpsan zel hi. Hici bang thil ka tuah khak ka ngaihtuah khak ciang in vaangsiat huai sa in kingaihsiat huai khawng ka sa vungvung a, khovel a mi vangse kha vanglakte a damsung ua vangse tou den d a hitel d ua aw…. ! cih khawng hon ngaihtuah sak hi.

Hici bang hun haksa simsim khawng ka tuahciang in Usiam kiang lou ka genna d dang om tuan lou a hihciang in ka hilh kha zel hi. Amah lah a hihtheih tan a bang lam peuh a hon panpih dia mansa a om gige a hih zawk mah toh kei a di’n thil bangkim ah a kiang a va tai khak a baih lam petmah hi. Huci’n ka hong kihou toutou kha zel ua, ka kaal uah kingaihnat na lian semsem in nidang a hoih hon sak bang a hoih hon sa lai a hon ngaihna bei ngeilou a hihdan khawng hon gen tam pen a hi gige hi. Nidang a ka na kingaih lai ua naupang hai cih mah tak thil hou cik ziak khawng a ana kikhen kha maimai ka hih uh toh tua leng hon tan khak louh zel d lau hileh kilawm in midang toh ka kihou khak ciang bang in ana pawna thei lotel hi.

I pu i pate’n zawllui leh lamlui zuih nuam a na ci ua huai bang dan deuh in ken leng lampi thak zuih sang a lamlui zuih nuamsa zaw ka hingei dia, a zi leh a ta om lam phawklou in ka itna thu ka hilh thuk sam ta hi. Ka kingaihtuah ciang in ka kisiam tan thei het kei a, hici bang khawng thil hoihpen le ana hilou mah a hihciah vualzawlna tan huai le ka sa het kei hileleng ka theihlouh kal a ana ngai gawp khin ka hihciang in…poikei munkhat a omkhawm le ka hi kei na uh, hun hong pai dia a hi dandan hong om na in teh ci’n ka kihehnemsuk mai hi. Mihingte hinkhua zaw ana haksa tak a hi. I utlouh lamlam ah pi in i om a, hoih i sawm ciang a leng a hoihlou lam in hon kai zou zaw zel a, i deih hetlouh thilte bang i tung a hong tung maimah cih khawng ka ngaihtuah ciang in thil paidan theihsiam haksa ka sak hun bang a om thou a, hilele a hoihlou lam mah in hon kai zou zaw ahihciang ka kilungmuang sak teitei hi. Hun hong pai zel a Usiam toh ka kaal uh bang hoih tou zel in ka om na mun tuak ua kipak leh lungmuang tak a ka omlai un amah a sepna in lam ah hong kisuan ding cih thu hong om phut a, ka lungbuai panta hi.

A khen ciang kum10 bang pai nung a amel mukha non d ci’n ka kipak a, a hong kisuan d kal ka ngaklah a akhenciang in lah munkhat a ka hong omkhawm hial d uh ka ngaingam het kei zel hi. Amah lah hong pai di uh kal ngaklah in buai in a buai maimah hi. Hucia kuamah theihpih hetlouh a ka na guk buaibuai sung in a hong kisuan hun uh hong tung petmah a, a innkuan un Lamka khopi a hong tung ta ngei uhi. Ka na gingtak sa mah bang in munkhat a ka hong omkhawm uh chu niteng in ka kimu gige ua, ka kaal uah itna pung hulhul in bangmah in hon khen zoulou d bang hial khop in ka kingai petmah uhi.

Hun awl a neih ciang in mun khenkhat ah kuamah hon muhphak louhna mun ah kou geel kia in ka ki itna thu khawng uh kikum in ka nung leh ka ma ua bang thil hong tung d a cih himhim phawk phalou in nuam ka sa thei mahmah uhi. Kei bang diak in houh nidang a ka lunggim na tengteng mangngilh kisa in nuam ka sa petmah a Pathian lam himhim le ngaihsak kha nonlou in biakinn bang kon gamlat hiaihiai ta hi. Ka omkhop ciang un beer khawng peuh dawn khawm in ka ki itna uh latsakna di’n taksa utna subucing in a tawpkhok ka tung zel ua, huai tuh ka daily routine uh a himai hi.

Niteng hun teng a omkhwm ut ka hih maimah ciang un a tuung in zaw ka omdan uh bangtan hiam kiseel zou mah leh thilhoih lou himhim zaw sawt a kiseel zou tuan kei. Ka omdan uh khosung ah kithang vengvung in khosung mi aneu alian houlimna ka himaimah uhi. Ka sungte’n ka omdan hoihlou a hon theih un, a hon awi kei mahmah ua tai leh salhna ka thuak gige maita hi. Hileleng ka itna in hon zouzaw a hihciang in ka tawpsan zou tuan kei a, hon thuhilhnate uh ka kitheihmoh bawl teitei a ka nu leh ka pa bang a lunggim un milak ah a zum thei mahmah uhi. Amah leng a zi toh a kal uh a kise hiaihiai a hileleng a hon ngaihluat ziak in bangmah poisak leng neilou in a hon tawpsan sawm tuan kei a, a hong kikhen loh hial zezen uhi.

A zi toh a kikhen uh leng poi ka sa dek kei a, hon daaltu om nonlou ci’n a kipak zaw hi. Huci’n ka om dan ngeite uh sunzom in hun bangtan hiam nuamsa tak in om tou zel mah le ung, ka sungte’n lah niteng a hon thuhilh gige uh ahihciang in ka lungsim zaw a nuam thei non taktak kei. A hon itluat ziak leh ka hoih d adeih luat ziak in ka upa khut ka thuak hun bang a om a, ka nu leh pa biang a khitui luangte ka muh ciang in ka lungsim zaw a naa mahmah sam hi. Vangsiatna a na tuak kha hita leng le a tanu neihsun uh hon it a hon muang law mahmah sam hi ua, tua kei hici bang a minse tak a om a mi nupa kal susia a na hih maimah ka hi cih khawng kon ngaihtuah khe thakthak hi. Hici bang khong kei tung ah tung di’n le ka deih het kei ding. Ken ka pasal sisa le hicituk a suun hi’ng a, tua mi a pasalte si le hilou damlai a hicia ka suunsak tel a zi thuak didan khawng ka ngaihtuah ciang in hai ka kisa lotel hi.

Usiam in ahihleh bang teng a thuak ngap a kiten d le poi a sa kei, hileleng ken mi pasalte hingsuan in va kitenpih hial hileng le kei a dia a nopna d om tuan hetlou, ka maban mial semsem d ahihman in kei hon ngaihsak nonlou a, a zi mah kitenpih thak di’n ka sawl zawta hi. Hilehle amah a ut hetkei a, huci di’n hon sawlsawl non ken, kon ngaih luat dan na thei vele. Khovel a ka itpen toh om di’n bang citeng haksatna tuah leng poi ka sa kei. Hon taisan mahmah ken aw hon cih ngutngut ciang in ken le ngai law petmah ka hihcia kikhen taktak hial d zaw ka ngam kei zel a, haksa ka sa mahmah mai hi. Haksa sa tawk leng le hicia om-om thei ka hihlouh man un, kingai tawk le ung le kikhen mah kou a dia hoih pen ahi ci in khen ka sawm teitei a, niteng in a zi pi kik di’n ka sawlsawl zaw ta hi. A tawp in aman le hon sel zou non sam lou ahi dia, a sungte lemsakna toh a zi va pi non in, ka hong kigamlat hiaihiai ta uhi. Kei deihtelna a kikhen himah le ung, a guk in ka ngai thei mah mah a, ka hunluite uh ngaihtuah in ka kapkap mai hi. A zi toh kituak tak a omkhwm ka muh ciang bang in ka hazatna lungsim hong suak in ka pawna thei lotel hi.

Nidang a ka pasal hon sihsan lai a lungkham mangbatna ka tuah lai in Pathian ah ka muanna koih in mihing ah ana kinga khalou hileng zaw hiai bang teng haksatna a thuahthuah a ka tung a tunglou d hia cih khawng ka ngaihtuah ciang in ka kisiik petmah a, lah ka hinkhua paisa bawl thak theih a hi non kei. Mi tengteng in hon mudah ua, hon taisan hile uh kilawm ka sa a, thawmhau ka kisa mahmah hi. A khenciang bang in kingaisia in sih bang ka ut maimah sek a hileleng hiai leitung haksatna thuak zoulou in kei leh kei kithat hita mawk leng ka sih nung a gawtmun a haksa zaw sem thuak d ka cih ciang in sih leng ka ngam kei zel hi. Pathian bel in ngaihdam ngen leng hon ngaidam d ahi cih zaw ka thei lawtel; hilele huai di’n le utna lungtang himhim ka neithei non kei a, huai sang in omsia a minse ta vanglak ci in zu khawng in ka kihehnem zaw hi. Hileleng zu leh sa in lungkimna hon pe het kei a huai sang in ka lunggim hon behlap tu ana hizaw zel hi.

Khovel ah kei a di’n lungkim na himhim a om non kei. Ka omdan peuhmah ka kining a hoih lam sang in siat lam ka mahnoh hiaihiai hi. Ka lunggim nate ka mangngilh theih deuh khak leh ci’n facebook bang ah cihmoh luat man in ka hai chiakchiak a, ka lungkhamna thu khawng gen in leh sih ka utdan khawng ka gen khiakhia sek hi. Hucia ka om-om lai in ka lawmte lak a tangval missionary khat a na om a, nidang khawng a le hoih hon sa a, hon houpih sek ka ngaihsak khak ngei khollouh ahi a, huai in ka status te khawng a na muh ciang in nuam ana salou lua ahi dia, nikhat , Ching bang lungkhamna nei na hia? Kon panpih theih dan om diam? ci in hon msg hi. Ken le ngaihsak tuanlou in ka om ngeingei in ka om san a, hilele niteng in huai msg mah hon khak gige hi.

A tawp in ken le Ulian bang thupi hikei ka mawk paupau hi ci’n awlmoh law khollou in ka dawng lel a, hilele aman gingta tuanlou in kon na et-et ciang a lunggim luatna khat nei hi dia hon gingta ka hi. Bang haksatna nei na hi hiam? Hon hilh in ka hihtheih omleh hon panpih dia mansa ka hi hon ci ci teitei hi. Lawm leh vual kithuahpih d neilou ka lunggimna ka kikuppih d le omlou a mitengteng in hon taisanta ci a kingaise tak a ka omlai a, hici bang a mi hon panpih ut om cih bang kon ngaihtuah thak ciang in lamdang sakna toh kipah huai sa in ken le hoih tak in hon houpihna te ka dawng ta a, awl-awl in kong kineel hiaihiai uhi.

Amah ahihleh Pathian thu lunglut mahmah mi ahi a, atung in kei dinmun hoihlouh ziak in zahtak huai sa sim mah leng, gintak sang in ana neel huai zaw thamtham hi. Hici’n kong kihou tou zel ua, a hinkhua a haksa a tuahte leh nidang a tapa hawmthoh a hihziak a, anu leh pate itna zang khial a khamtheih sal a ana tang kha ana hihdan leh sum leh pai hauhziak a numei tung khawng a thangtat a ut dandan a ana kibual kha ahidan khawng hon hilh hi. Tua a pa’n a sihsan nung a piangthak a adamsung a Pathian nasem dia missionary dia kipekhia ana hi a, sanggam dang le neilou a anu toh kia khosa ahihdan khawng hon hilh hi. Kei kia hilou a mitengteng inle hinkhua ah haksatna tuam ciat a na nei sam uh eive mo cih khawng hon ngaihtuah khesak hi. Hucin ken le ka hinkhua a ka tuah tengteng khat le imm neilou in ka hilh vek a, tua lungkham leh beidong kisa a akhenciang bang a ka hinna ka lak mai bang ut mai ka hihdan khawng ka hilh hi. A hon theih ciang semsem leh hon hehpih deuhdeuh ahi dia, ama sang in le kong kihou thei zaw ua, fon no. khawng kipetuah in a chang in ka inn khawng uah hong hoh zel hi. Ka omkhop ciang un Pathian thu khawng hon hilh gige hi. A tung in chu ka lunglutpih het kei a, hilele hon awlmoh luat ziak in peihlou sasa in ka ngaihkhiak sak zelzel hi.

Amah toh kong kithuah ua pat in ut dandan a om a zu khawng dawnna d hun awl ka nei thei non het kei hi. Amah theih a lah huaite khawng hih ut tuan sam lou ka hihciang in a Pathian thu a ka lunglut louh toh a khenciang in ka ning hun bang a om a, ka ut dandan in ka ci ek-ekh kha zel hi. Hilele huai hun ciang inle amah a lungke tuan het kei a, ka theihsiam louh thilte nemtak in hon hilh hiat-hiat zel hi. Mundang a thugenna d a neihciang bang in hon zawn sek a, ut khol kei mah leng thumanna in ka va zui zel hi. Kei leng awl-awl a ka lungsimte hong kikheng in min hicituk a hon awlmoh ahihleh bang ziak a ka lungtang khauhsak a ka hih ngeite hih a om-om lai d ka hia ! Min le Pathian amuh uh leh bangziak a ken le mulou tuan d ka hia? ci in thumna bang ka nei a, Ulian bang hun awl a neihciang in ka sam a, hotdamna lampi hon hilh in ci in Pathian thu ka kihilhsak zel hi. Hucih ciang in amah leng a kipak in a kithalawp thei mahmah hi.

Biakinn kai khawng bang lunggulh in kai sawm zel mah leng, kei leh kei kiliim muh in ka ngam kei zel a, kisakhinsa bang ka tawp thak zel hi. Hucia ka om khawng Ulian in hon theih ciang in haksa ka sak didan hon theihpih in hon hehpih thei mahmah a…. Ching hangsan tak in om in, bangmah lauh d omlou ahi. Khovel lam en ken la, Pathian lam en zaw in. Amah hon panpih dia mansa a om gige a hi ci in hon khamuan zel hi. Pathian thugente’n a cihsek bang ua Pathian a dia kipia a, a hoih lam a kalsuan dia i hong kisak dek ciang in le hon na daltu d tam in a tam zel hi. Ulian toh bang ka kizuih khak ciang un hon gense ut a tam thei mahmah ua, ‘hiai minu le papi sa khawng toh kingai a zu leh sa ne a om in a cihmoh tak a Pathian thu a kiseelna dia zat sawm ahi d’ khawng hon ci uh hi. Hici bang thu khawng ka zak ciang in ka pawna thei lotel a, tawpkik a ut dandan a om non mai bang ka ut sek hi.

Hileleng huai mi hon genna khawng maimai minsiat ziak a si kuamah om lah hilou a, ci’n kitheih mohbawl ka sawm teitei hi. A chang in Biakinn bang ka kai a, hileleng mihoih ngen kikhop khawmna ahihciang in kei bangbang a mi ginaloute a ding in a nuam het kei. Mi tengteng in kei hon en uh hileh kilawm bang ka sa a, kisuanlah huai ka sa thei mahmah hi.

Ulian toh bang kingai hon hisak ua, zumna neilou hiven mi a khem zouzou mah kei dia, cih khawng in hon gen ua, akiang a ka gen ciang in, huai khawng poilou pi, hon ngailou lah hituanlou ing a, cih peuh in hon ciamnuih maimah hi. Hicibang a kibawlhoih ut a kong om theih hon kipahpih law dia ka gintak tanau nai ta-ta bang hon gen ut pen a apang ciang un zaw lungtang a naa lawtel a, sih bang a ut huai tuntun hi.

Nikhat ka room ah kei kia in ka om a ka hun paisate khawng ngaihtuah in bang ziak a hicitel a vangse dia ana piang kha se ka hi de aw ! Hicibang dinmun khAwng ken le ka deihpen a na hituan hetlou hia, mi kipak a omlai ua kei a dia kipahna himhim omlou. Haksatna leh lungngaihna ngen in hon bawm a mite muhsit leh simmoh a ka hinkhua zang bei d ka hitel d maw ! ! Ka khelhna a tam ziak a Pathian inle hon taisan hita in teh. Hicia lungngaihna mittui toh hinkhua ka zat gige sang in si zaw leng tawldam huai pen lou d hia ! ? cin mittui kai zungzung in ka lungsim ah kei leh kei ka kidong dong mai hi.

A tawp in ka fone ka la a Ulian kiang ah,”Ulian sih nung in hinna a om thei lai diam? Hinkho thak ka pan ut !!” ci’n msg. ka khak kha zezen hi. Amah a buai laitak toh ana kituak kha ahi dia, hon thuk hetkei hi. Huai tak in ka lawmhoih pen Ulian nangawn inle hon taisanta hi’n teh ci’n ka lungsim siat tha hong suak guih in a ut-ut hita ve, poisak bangmah ka nei non kei, hiai leitung ah kei a di’n khiatlah d himhim om kei. Ka hinna a manphatna himhim le omlou, hinghing taak le ka hi non kei ci’n khauhual ceiling fan a khih in mulkimna bei in ki-awklup ka sawmta hi. Hucia ka omlai in ka u zi ka mou nu’n ka thawmging hon za in, hon delh pah a, hon muh tak in a kikouzak a, ka sungkuante’n hon delh in hon phelkhe pah ua, bang cidan hiamhiam a hon khoihkhoih uh leh khua kon phawk non zenzen hi.

Ka kim leh kiang ka et kimvel leh mi ana tam mahmah ua, ka nute khawng a na kahkahna uh mitsan niuniau in ka mu hi. Huai in Ulian le ka kiang ah ana om ta a, kong halh khiak tak in hon pumkoi in, Ching bang dia hiai bang lungsim nei na hia? Na haksatna a hon panpih dia mansa gige a om kei ve. Mihing lam enlou a Pathian a kingak zawk d ahihdan kon hilh gige hilou mo? Huaite khawng theisiam lawta hon ci ing a, lungmuang tak a om kei ve !! Leitung mite’n hon simmoh in hon phawk kei le uh leng hon it gige i hihna bang a hon pomthei Pathian om eivoi. Hicibang khawng a om maimai dia hon phal mahmah lou ka hi, hon it lawtel kei ve. Ka tung ah na lungkim louhna om hia? Huci bang a om khak zenzen leh hon hilh in aw ? ci in a kap zoihzoih hi. Ken le awl in thil omdan kon theisiam hiaihiai a, ka khasiat thasuak in pau khe theilou in a leh lam ngatsan in ka kap ek-ekh hi. Ka tha chau law mahmah ahi dia sawt hak peihlou in awl in ka ihmutsan non hi.

Mumang lamdang taktak ka nei a, thakhat a kiguih in ka khanglou zotzot hi. Huci’n ihmu lem thei nonlou in ka thou a, lauh nei hileng kilawm in ka thawmhau tha a suak mahmah hi. Huaizan tuh kua ma’n hon ihmutsan ngamlou in ka kiang ah om in hon zanhahpih ua, Ulian in thumna khawng hon neihsak in Pathian thu hon hilh zel a,atawp in zingkal lam khua hong vak ma deuh in khelhna kisiik a Pathian kiang ah ngaihdam ngen in hotdamna ka hon tang ta hi. Ka nu leh pa leh ka sanggamte a kipak petmah ua, ka hihkhelte khawng ngaihdam ngen in kipah ziak a kahna husa in ka insung uh a lum vengvung hi. Huai teng lak ah Ulian kipak khol diak a bang a, a gen d pen le thei zezen lou in a mittui a na nuulnul mai hi. Zingkhua hong vak in kei le kihalhsak in ka thoukhia a, ka pa’n inkuan kikhopna hon neihpih a, ken le lamtawn a Jesu zui a mite’n hon simmoh le uh leng Toupa hatna thagui len a ka sihtan a, a nasem ding in ka kipekhe thakthak hi.

Hucin niteng in Pathian kiang ah ka hinna laan in ka hihtheih bangbang amah a dia kizang in biakinn khawng ah kong kihel nonta hi Ka nunglam ah hon gense ut a tam mahmah a, simmoh leh enghouna kampau khawng za zel mah leng huaite ziak a kithadak sak mailou in haksa ka tuahte Pathian kiang tun zaw in mailam en in Toupa a ka muanna hihhat in ka tuah bangbang lungkim tak in ka om sawm zaw hi. Ulian toh bang ka houlim thei semsem ua, ua chu ka lunglutna uh leng kibangta ahihciang in, ka kithutuak mahmah uhi.

Nikhat ka kiang ah hon itna thu hon gen in hon kitengpih ut ahihdan hon gen a, ken hucidan a hon ngai dia ka na kilamet ngei hetlouh ziak in lamdang ka sa a, ka dawng didan le ka theizok kei zezen hi. Ching non dawng het kei a, na lungsim lou lam genkha ka hi hia leh? Ka hih khak leh zaw hon ngaisiam in aw. Nidang a kon muh tung in hoih kon sa a, hilele na dinmun khawng kon theih ciang semsem leh hon it petmah ka hi hon ci a, ken le…Ulian hiai bang a na itna thu hon gen ngei di’n kon na lamen kha ngei het kei a, ka kilamet khel ah itna thu khumtak non gen ziak in ka kipak lua. Nang hon ngai taktak na hih nak leh zaw hon nial thei d vual ka hihet kei. Hilele kiten d thu non gen khak zaw ka phulou ahi. Nou khawng tangval melhoih tak nungak pil leh siam taktak mu law d hicin ua, kei nuthoi pen tak in kon kitengpih d zaw kisuanglah huai ka sa. Huai ciah na nu bang inle nang a dia hoih a sak leh a deih bang le ana om kha mai thei d hi a, ka cih leh aman, mawkmawk eive Ching, Pathian et in kuamah phulou a omkei. Nuthoi na hih ziak in kon sit tuan hetkei. Itna ahi a poimoh pen…Ka nu’n le hon niallou ahi. Na tanchin teng le ka hilh sa vek hita ci in hon dawng non a; hici in ken leng hucia hon deih taktak na hihleh ka nu le pa kiang ah gen zaw in kei thu in bangmah thu tanna ka la thei kei, amau thuthu ahi ci’n ka hilh a, amah le kithalawp tak in palai hon sawl a, kei nu leh pa’n leng hon na deihsak gige sa uh ahihziak in bangmah buaina omlou in nu leh pa leh indongtate lemsak pihna in kiteng kon sawm ta uh hi.

Ka kiteng d uh a hun leh a ni d khawng genkhin vek himahle ung, a khen ciang in ka lin mahmah a, nungak haizah lak a kei penpen in ka va kitenpih mawk d ci’n ka zum thabang a suak hi. Hileleng, Ulian in hon it zou petmah a, a hihtheih tawp a thupi theipen a kitenna bawl d ci’n kithalawp tak in a kisakhol nak mahmah hi. A hun leh ni d hong nai hiaihiai a, a sisa ka pasal leh ka tapa ka ngaihna hong puang in ka lung a leng a kithalawpna himhim leng ka neithei kei hi. Ka sungkuante’n ahihleh nidang a ka omdan hoih louh ziak a lungkhamna citeng ka thuaksak nung a mihing le hizou non ken teh ci a dam gegu himahleng a lungsimguk tak ua a sisa bang a hon suun nung ua tua omdan kikheng a pasal hoihtak neithei dia om ci in hon kipahpih mahmah ua, ka pa bang a kipah luat ziak a khasia in a mittui a nulnul mai hi.

Ka ute nupa bang kithalawp tak a poimoh moh sem in a buai mahmah ua, na deihdeih gen in, hon hihsak d ka hi ci in hon dong thithe uhi. Ka ute hon deihsak dan thupi ka sa a, a sanggamnu uh hoihlou tawp a om a mite simmoh pen ka hih lai a leng kamsia a hon hou ngeilou ua, it tak a hon na kemtou ahihziak un ken le ute aw deihluat le neituan keng na hon itna kia uh le kei a di’n a thupi lua cikmah ciang in kon din zou ngei kei d. Van khawng zaw nou hon hih saksak ka lungkim ahi ci’n kipahthu ka gen hi. A ni d hong tung petmah a, thilteng gen fel veksa hita a, tua a dakkal chauh in samta ahihciang in linsim mah leng kisaklouh theihlouh ahihziak in thazoi ngoihngoih in ka kisa a, a khenciang in ka khasiat tha suak in mi hon muh khak d lah lau in a guk in ka mittui ka nulnul hi. Mou puan nalh tak kon silh a liimlang mai ah ding a kong ki-en zaw…. Ka kilawm lou tuan hetkei. Miteng teng sang a leng kilawm zaw ka bang a huai huntak in ka pasal in hong mukha leh bang ngaihdan a nei de aw, ka tapa pa lungsim naa saktu phet ka hikha de aw cih khawng ngaihtuah in ka kap kha nak hi.

Hucin moupi d te le hong tung ta ua kou le ka mansiang vek tak un, abul tung a pat a nial kha lou vet ka hihciang in kuankhiak louh theihlouh ahih taak ziak in kuankhe di’n kong kisa ta uhi. Kuankhe dia kal ka suan dek ciang in ka nunglam ah hon kai om hileh kilawm in haksa ka sa mahmah a, khitui luang zungzung in masawn theilou in ka room kong khak bul ah ka ding nilouh hi. Hucia bang tan hiam ka om nung in ka nu’n…’bawi hici d himawk lou ahi, bangmah lou i hihlai a Pathian itna ziak a mihing hon suah a i tan vuallouh a itna hon pia na Ulian i zaklaksak kha d ! I dinmun enthak mah dih khovel khelhna a kibual a i ut dandan a om a mite hon simmoh pen i hih nung a leng hon ittu d i muh lai hamphat huai lua hilou mo? Deihtel thei hilou i hi. Na lungsim a na puakgikte paikhia inla kipak tak in om sawm inla Pathian kiang ah kipah thugen zaw in thawmhauna d omlou ahi . Pathian hon sapna le hikha d ahi hon ci a…

 

Heutu toh ton gige in bangteng hong tung zong
Na makai pa kiang om in na lampi a mial zong.
Na melmate’n hon zol ua lauhhuai a nai ciang in
Jesu toh na ton ciang’ lau ding na neilou

 

Ton inla hang tak in masuan .
Kihan toh gige inla nisim na hondampa toh ton in.
Aman lam tawntung in hon pi ding!

 

Heutu toh ton gige in na paina peuh ah
Mialna leh liimliap ah lampi hon hilh ding.
Hon ompih na vaak in na lampi a taan ding
Gamdaai zong paklun huan kilawm suak sak ding.

Heutu toh ton gige in lampi ah khawl ken.
Thu a hon piak peuhmah aw kin in mang in.
A hon sawlna mang in a hatna’n sem zel in.
Jesu toh na ton ciang in na dik lou theilou.

 

(Biakna laa te no.278)

Hiai laa in hon khamuan a ka mittui hon nulsiang sak in, ‘kap non ken, na kipah mel lang sak in tuni na nang a dia na ni thupi pen ahi. Kipak tak in om in hon ci hi. Hucin ka pan thumna hon neihsak a ka kuan kheta uhi.

A mun d ka tung un ka lamet khel in mipi ana tam mahmah a, kei le lut in Pathian vualzawlna tang in kitenna siangthou tak in ka nei thei uhi. Saptuam te leh mipi’n hon kipahpih ua, kipahna thilpiak leng tampi ka dong uhi. Kitenna zoh a hih in Ulian te in lam ah vaidawnna thupi tak hon na nei ua, ka ngaihtuah ciang in kei tan ding a thupi lua sa in ka phulouh vualzawlna Toupan hon pia ahi ci in Pathian kiang ah kipahthu ka gengen mai hi.

Ka hinkhua paisa khawng ka lungsim ah hong kilang dundun a, kei a dia ka damsung a ka kipahni pen himahleh khasiatna ngen in hon buak a ka mittui ka nui zel a, Ulian in hon theihkhak d lau in ka kiseel seel mai a, aguuk in ka gim mahmah hi. Huci’n bangmah buaina om hetlou in programe teng zoh ahi ta a, kei leng pasal nei ka hong himaimah hi.

Hun hong pai zel a ka pasal (Ulian) toh ka theih tawp ua Pathian nasem di’n kong kisa ua ka paina lamlam uah ka kizui ua, a thugenna khenkhat bang ah ka testimony khawng hon gen sak a, Pathian in hon ompih in hon vualzawl a, mite lungsim khoih in ka lohching thei mahmah uhi.

Nikhat ngial houh ka zawl luipa Usiam te biakinn ah thu ka va gen kha ua, amah leng hong kikhom kha ahi dia, tawp a biakinn kong ah mi toh chibai kibuk a, ka buai vengvung uh leh amah leng hong pai a, chibai hong buuk hi. Ching hicibang a Pathian nasem a nong om kon kipahpih lotel. Ka hon zahtak lua…Nidang a ka haiman a lungkham tak a kon koih khak ka kisik lua, hon ngaidam in aw. Ken le nang muh bang a Pathian kon muh sam theihna di’n hon thumpih zel in aw hong ci a, ken le…eee ! Usiam nidang thu ziak in kilungkham saksak non ken, huci bang a ana omkhalou hileng tua ka dinmun bang tanglou maithei ka hi. Kei kiang a ngaihdam non nget mawk d hilou a, tung a Pa kiang ah ngaihdam ngen zaw in, hon ngaidam dia mansa gige ahi; kon na thumpih zel d aw ci in ka kihep khiaksan hi.

Huai zan in chu ka lung a leng sim geugau a, Usiam toh ka hunluite uh khawng ka ngaihtuahna ah hon kilang dundun a, ka omdan a lemtheih het kei hi. Hilehleng ka pasal hon theih khak d ka lauhman in maitai tak a om ka sawm a aguk in thumna bang ka nei hi. Hucia ka omlai in Ulian in, Cing tuzan chu na lung a leng sim d e….ci’n hon chiamnuih zomah hi. Ken le, Ulian lungleng mawkmawk lou e. . Ka pasal nang na om vele, na hon it zoh dan thupi ka sa lua. Na kiang a om lungmuan huai ka sa. Bangmah dang taksap ka nei non kei. Nang a d kia a hing a, na kipahna leh na deilam a hing kon sawm gige d aw ci’n ka dawng hi. Amah leng kipak mahmah in hon it semsem hi.
 

Hunte hong pai zel a Pathian vualzawlna banglam peuh a dong in a hoihna kon mu semsem hi. Toupa a omte di’n bangkim ah hauhna hi cih khawng bang kon thei semsem a, hon deihsak tu d mi hausa pipi bang a om a, khosakna ah leng kuamah englou in ka om ua.Nidang a mite simmoh pen leh thulak huai loupen himahleng, tu’n zaw hon it tu d lawm leh vual bang ka hau mahmah hi. A vualzawlna in ta numei khat leh pasal khat ka nei ua, ka kipahna uh a bukim diak hi. Hilele ta khawng kon neih nung un deih bang in ka pasal ka zui thei non kei a, inn ah ka tate leh ka nu (ka pasal nu) enkol in ka pasal a dia thumsaktu in ka pang zawta hi.

Ka nu leng ka tung ah a siam mahmah a, numei mawl cik himahleh mou kepdan bang a siam mahmah a, ka gensiatna d khatmah le ka theikei a, zahtak huai ka sa mahmah hi. Ka pasal masa toh ka tapa bang le a lian mahmah ta a, nu itna lungsim bang nei theita a hi dia, a chang in hong hoh zel a, huai hun ciang inle Ulian in a ma tate toh hon khentuam sak hetlou in a sisan a piang a ta mah bang in a bawl a apoimoh moh bang a hihsak a, kei a di’n zaw hici bang a hon itte innsung a ka lut khak hampha kisa a Pathian kiang a kipahthu gengen lou vual ka hi hetkei. Ka nu leh ka pasal ka itna a lian semsem hi.

Nitak khat vuah a zu nelhnelh a, kei bangbang a mi lungleng theite a di’n zaw a lunglen huai ngei mai…. Naute leng ihmu pah uh ahihciang in kou le ka nupa ua Pathian kiang a kilatna ka neihzoh un ka lum ua Ulian leng huai zan chu tawl kisa sim ahi dia, hon ihmut san pah hi. Ka lungsim ah bangbang hiam ngaihtuahna hong om in ihmu theilou in lupnatung ah ka hak nilouh hi. Toupa hon pidan ngaihtuah in nidang a haksatna tuak a sun leh zan a khitui luang zungzung a hun ka zatlai nite khawng ka phawk khe thakthak hi. Toupa lemgeel dan zaw a lamdang tel mai ! Mihing ngaihtuahna a theihsiam vual ahi het kei. Ka pasal masa bang dam a ana kiteng suak thei a haksatna a na tuak kha hetlou hileng tua ka muh bang a Pathian a na mulou d hing a. Kei utdan leh kei deihdan a thil teng ana pai thei hileh kei kithupi sak na ding lel hizaw… Toupa mel liahkhuhtu a na hi zaw d ing a; tua hi cituk a pasal hoih leh hon it Pathian zahtak mi bang nei kha lou d hing a, cih khawng ka ngaihtuah nilouh hi.

Nidang a ka haksatnate mihing lungsim ngaihtuahna a thuak zoh vual ding hilou a ka na koih, lungkham kisa a thum huthut a kei leh kei leng ka hinkhua kitheisiam lou a, Bang ding a hiai bang teng ana tuak ka hi mahmah de aw? cia kingaihtuah vungvung a ka na om a, hiai leitung gitlouhnate ziak a ka hinna leng it zou nonlou a ka maban hun hong pai d te leng maituah ngamlou a sih bang ana sawm himahleng Pathian in hon it ziak in hiai tengteng apat a hon honkhetu d ka pasal hon pia a, tua ka haksatna tengteng thuak mualsuah zou ka hihdan khawng ngaihtuah in ka khasiat thasuak in ka kidiik kha nilouh hi. Hucia ka omlai in Ulian in hon phawk a, Cing bang ci e? Na lungsim nop louhna om hia ? ci’n hon dong a, ken le… Ulian nidang a ka hun paisa khawng ka ngaihtuah kha a hi.

Nidang in Toupa hon pidan ka na theisiam ngei het kei a, vangsia kisa a lungkham leh mangbang tak a om a alohngaihna ka theih louh ziak in ka ut dandan in ka om a hilehleng tu’n zaw hon pipa ka theician ta. Sihna limguam tawn a ka pailai in leng hon taisanlou a a hehpihna a hon pikhia in a vualzawlna tampi hon vuk a kei a dia hoih zaw lampi a hon pi Toupa thupi hina tel e maw! Hicituk a hon it a ka tung a ahoihnate ana theisiam pah hi leng zaw ka hun paisa a amah a ding kia a ana kizang d hi’ng a, tua lah hun paisa sapkik theih louh a, ka kisiik lua…ci’n a ang ah belh phei in ka kap hithit hi.

Awl-awl a ka mittui hon nul sak in…. “Cing kap non ken, Pathian in mi a itte lam ci tuamtuam a hon sam ahi. A khente tuisik a hih ua pat in ana teelkhin a akhente a hihleh haksatna tawpkhok a hon sam ana hi eive…I tung a thiltung khempeuh Pathian in hon theihpih louh a om kei. I hoih zawkna d bang, amah lam i naih zawk theihna d bang in anuam leh ahaksa i tuah hon phal ahi. Hunlui paisate ziak in kikhase saksak non ken. I dam dia Toupa a dia i sep d maban a tampi neilai i hi” ci’n hon hehnem hiathiat hi. Ken le hilaw tham mah e maw Ulian. Hici bang lungkhamna apan a hon suaktasak a, ka phulouh vualzawlna tampi hon pelai, amah a ding kia a kipia a adeihlam naa te sem a ka pasal leh ka innkuante a ding a siangthou tak a ka hinkhua ka zat ding ka bat thupi pen ahi. Toupa tun zaw na khut ken ka leen dia phunlou leh lungkim in om ning. Na khut haat a non pi ziak in” ci in Pathian mai ah a thak tak a kilatna nei in ka tawldamta uhi.
 

Hiai ahi HAKSATNA KHEL A VUALZAWLNA KA TAN !!!

 

BEITA….

 

Writer’s Note : Hiai kha mikhat tangthu ahi a amah phalna ziak a kon gelh ahi. Hileleng, a kal lak a behlap le tampi om. Vangsiatna i cih khwng ei ut thu/ ei deihtel ziak a hong tung ahi hetkei. Khovel ah kuamah simmoh d omlou ahihdan hon theician sak mahmah. Asau sim dendon na a, Simtute’n lunglut tak a non na simsak zel ziak un ka kipak. Banglam hiam bek a phattuampih thei ciat di’n Toupan hon vualzawl sak hen..

 

Ka kipak !!!!

 

©Siamsinna leh Vakiangbu