NAHKHOK NOU DAN KITAM LUA..!

By ~ Chin K Vualnam Paite

Suangtu neilou a piang om di’n a gintakhuai kei hi. Suangtu i neih vek mahbang un, hon sungtute’n leng suangtu ana nei sawn nawn uhi. Hiai i genna ahihleh, bangdang ziak hilou in, ei hon khoiliantu, hon suangtu leh mihing hon suahtu omlou a Khovel vak kimu theilou ahi i chih nopna ahi.

Awle, Mihingte’n suangtu aneih mahbang un, ganhing chichih in leng suangtu anei uhi. Suangtu omlou a nou nei theilou ahih uh a chiangna mahmah ahihleh, Pathian in Noah kiang ah gamsate a kop-kop (nupa/­api-tal) a longsung a pilut di’n ana hilh hi. Huchi lou hileh, tuichim a sikhin di ahihman un. A kop-kop a kichi pentak ahi, suangtu poimohna. Ganhingte’n bawn suangtu hichituk a poimoh ahih ua leh, Mihingte’n bang chituk in i poimoh di ua.?

Milian-milal hi in, na taksa bang leng nang hon sungtute sang in lian zaw leh leng, a ta leh nau uh hi ve-ve na hi hi. Amau omlou a nang ‘Automatic’ a omthei mawklou na hi chih na phawk di ahi. Nang hon sungtu te na simmoh bawl a, alungkhamna uh na hih leh zaw siamtu Pathian in a thangpaihna natung ah hon sungbaw zua-zua ding a, huaihun chiang in…!!!

I thupi ah lut khongkhong ta le, ‘Nahkhok’ kichi vasa neuchik, ‘Kawlgit’ sang ale neu zaw tham ahi a, bu/nest a bawl chiang in, nahteh ziallum in huai ah tui thalel hi. Aneu vang in, siamna sangtak nei ahi dia, nahpa bang ziaklumthei mawk dan ahi.Taksa let zaw bangmah ana hilou dan ahi. Khuak neihoihte mah mitung ah leng uh hi’n a theihtheih hi. Nahkhok in atuite opkhum in, hong keuh ua, a noute iit tak in hon vak lianta hi. Himahleh, pi-pute gen apan in, hiai ‘nahkhok noute hong let chiang un Musi hong suak ua, api uh negai uh’ ci uhi. Paunak om ahihman in, huai paunak pansan i hi pen mai uh.

Nahkhok nou bangbang a letnung a ei hon khoi a hon vak tute bang i loh uale? Lungkham vungvung in i koih uh hia? Kipak tak in i koih uh hia? Khakham vei in i sisak kha uh hia? I simmoh bawl ua, i hih vatvat kha uh hia? Amau omkei le uh nang om di’n na kigingta hia? Sana/Watch bawltu omlou in sana hong om mawk di’n na gingta hia? Hiai dotnate hoihtak in dawngthei le zaw, Nu-le-pate’n Leitung a vangam masa zang mai duh hiven maw?

Na zi hiam na pasal hiam ziak in, na nu leh na pa simmoh mawk ken aw, unau? Nang tuisik apan a mihing hon suah a, nang ziak a ihmut khamlou zen a zan khovak zen a hon khim ihmu tu te, tu’n ihmut limtak in ihmusak sam ve maw? Nu leh Pa dinmun a ding ka hi naikei, himahleh nu-le-pate dinmun a ding bang a kisuangtuah theih ahi. Na nu leh pa na mawkbawl leh a paap pawzoulou di na hi chih kiphawk in lan, nang hon sunagtute na leitung pathian ahihdan ana kichianta in aw?

Tuailaite aw, na nu leh pa zahna lianpi na piak a, nang tung a amau om ahih uh na theih gige ka deih hi. Pilna siamna lam a bangmah ahi kei maithei uh. Himahleh, nang pianma amau le nang bang a ana om ngei ahi ua, nang sang in experience hau zaw tham di ahi uh. Nang pilna bel khovel pilna ahi a, amau pilna pen Mihing hinkhua adia poimoh masa ahi. Na nu leh pa thu na mang kei leh, na pilna zattaklouh ahi ding hi. Nu leh pa nekangtu leh indirect tak a thattu na hi kha hia?

Nu leh pa sunglunggim a, atung ua khutkha hiam i om ua leh zaw i khan uh toulou di ahi. Nu leh pa vualzawlna manphalua eive..! Na nu leh pa na nekkang leh zaw, khuangbai bangmai a nang leh nang le kine a, atawp a nalu/head kamkhat na suah khak di hon lauhsak mahmah kei ve..!!

Gam leh nam vai (politics) vai ah thukalzeh dan in lutzual le, Mipite suangtu ahi mai ua, suangtute enkol dia pathian in a seh MLA/Minister te ahi uhi. Huchi ahihleh, ei hon suangtute lamet bang in i om na uh hia? Ei hon sungtu leh bawltu mipite nekangtu i hi uh hia leh? Hauhsakna di lel a zang i hih uh hia leh? Mipite khasiatna khitui in na dinmun apan hon taikhe zou mahmah di ahi chih ana phawkthak samve ua maw? Ibobi khuak i matzoh ua, apei dan i siam mahmah kei ua leh, i maban ding uh lungkham huai mahmah ding hi. Nahkhok nou bangmai in, mipite nek sawm kei leng i situan dia hia?

Gam leh Nam khantouhna leh Inkuansung bawlhoihna ding in, I nahkhok nou lungsim uh i paihkhiat uh poimoh masa hi. Ei hon sungtute i duat ua, i kepsiam uh kiphamoh mahmah hi. I Gam ah, NAHKHOK NOU DAN KITAM LUA hilou hiam? Suangtu nei ka hi kichi peuhmah in kibawlthakna leh talsawn zen a kingaihtuah kikna di’n zang le chi a, siam leh siamlouh genlou a hon gelhkhe mai ka hi. Genkhelh omte kingaisiam in, gendik omsunte ahi bangtak a zat ahih theihna di’n Pathian kiang ah ngen le chi’n i kichial hi.

—Kakipak—

©Siamsinna leh Vakiangbu