” SIH TAN PHA IN AW" (A lamdang itna)
By ~ Palemtheilou Papektawl
Tun aw’ na laukha bek in hong veh
in.Tua hunlai in bel school kai a kisawl sang in, nu leh pa tamtakte’n
neih leh lam kiningching louh ziak in a tate uh Lou lam ah sawl zel uhi.
Mi tampite school kai a sawm chiang un, “bang nang school kai di gengen
le ka za ning, Lou kuan di’n kisa inla kuan pah aw,” chia a kisawl lai
un, kei bel neih ziak hilou in Nu-le-pa’n mailam saupi enkawm in school a
hon na kaisak uhi. Pawl 2 (nih) ka sim kum in ka Nu’n a hon na omlouh
san hi. Huchi’n ka pa toh kou gel chauh kong khosa uhi. Ka min ahihleh Mangpu ahi hi.
Hun bang tan hiam ka pa toh kou gel
chouh in hinkhu ka hon zat nung un, ka pa’n ka nu sulnung a amah chouh
vailou kuan thomhau kisa ahi ngei ding a, Ka Nu di’nLunching zi’n
a hon nei hi. Nu chih di lah haksa ka sa a, chihlouh di lah kilawmlou,
haksa ka sak thu a thil hithei hilou ahihman in awl-awl in ‘Nu’ chih ka
kisintou tou a, atawp in zaw ”Nu” ka chithei khong sam hi. Ka Nu thak,
chi maini, a siam mahmah a, ama sisan apiang a tapa bang a a hon et ziak
in nuam ka sa mahmah hi. Ka nu-le-pa Lou nasem in, thousi- thouvai,
nisa- vuahzu nuai ah, kei a tapa neihsun uh khualna in a ni teng hinkhua
uh a zang uhi. Ken leng nu-le-pa sep gimna thawnsak lou ding, chi’n
laisim ka hahpan mahmah hi. Hun leh nite hong kikhek zel in, ka nu’n a
ta masa di’n tapa melhoihtak mai Lianboi a hon
nei hi. Hinna nei peuhmah khanglet lam manawh a kihihman in, sawtlou
nung in Lianboi leng school kai theita di dinmun a omta ahihman in, kei
toh school khat ah ka kaikhawm uhi. Lianboi school kai tung kum in bel
ken pawl 5 (nga) ka simta hi. Huchi’n Lianboi leng hong khang lian
deuhdeuh a, a lungsimte hong kikhek in, duh leh deih a hon hau deuhdeuh
a, ka Nu’n kei leh Lianboi khentuamna a hon nei panpan ta hi. Nuamsa lou
chik a ka hinkhua ka hon zat touh lai’n. Nau numei ’Sawmi’ ka
hon nei nawn uhi. Lianboi chouh ahih a leng khentuamna om hia, Sawmi
hong khanglian leh kei zaw innsung ah le ka ta nawn kei di, chih khawng
peuh ka ngaihtuah hi. Ka gintak mahbang in hun sawtlou chik sung in,
Sawmi kum 4 (li) a hong ching a school a hong kai panta hi. Ka lak uah
khentuamna alian deuhdeuh a, Lianboi leh Sawmi school fee pai’n kei a
piaklouh khawng a om ahihman in, School apan pawl 8 exam manlou in
hawlkhiat in ka om hi.
Lou nasem pan di’n ka hong kisa a,
chikmah a Lou khou khalou ka hihman in, haichi tuamtuam leh buh kung
bang ka satkhe mun thei mahmah hi. Huchih chiang in ka Nu’n, “hiai chiah
phata a, lou le khou theilou bang a kivak sawm e ? ” Chi’n a hon sal
sek hi. Huai chiang in, ka pa’n a kizil ahi huchi salh thoh lou in na
hilh thoh di chi’n ka nu thuhilh sek hi. Ka Nu’n nang pau ngailou, ka ta
ahi ka ut dandan in ka bawl di, a chih chiang in ka pa pau ngam nawnlou
hi. Sun nitum a Lou nasem, lnntung chia ka naute’n tui ana tawi lou uh.
Kisilna di omlou, huchih chiang in ka pa’n ka naute, Lianboi leh Sawmi
tuitawi di’n sawl zel mah leh ka Nu’n Mangpu nang va tawi in la.. Na
naute’n a lai uh sim uh heh, a chih chiang in, ka pa’n a naute’n va tawi
zual le uh a ve le. Mangpu a Lou kuanna a gim sam kei di, chi zel mah
leh ka Nu’n gimlouh a nek piang lou, Mangpu kuan kin aw, chi’n a hon
sawl teitei hi. Ka pa’n lah bangmah gen ngam nawn tuanlou ahihman in,
Tuithei seng a pua in lui lam ka mahnawh ta hi.
Bangzah vei hiam ka tawi zoh in ka
kisil siang a, sawtlou nung in ann ka ne uhi. Gimsim ka hihman in ann ne
zou sawt tulou in ka lumpah hi. Nitak dak 7pm, lakvel in ka lawmpa Muanlian in
pawt di’n a hong manawh hi. Muan nang va pawt mai’n tuni tak zaw kong
pawt dah di, ka na chi hi. Ka Nu kei tung a gilou mahleh mitung ah bel a
siam mahmah mai hi. Lawmpa lah pawt dia hon ngak, ka Nu’n lah Mang na
lawm va zui ve. Lawmte lak a le kihelzel di ahi, a hon chih ziak in, thu
mu kisa in pawt di’n ka kisa hi. Kei bel ka lawmpa zui utlou mong ka hi
kei a, ka nu mitmei ka ven ziak ahi zaw hi. Lawmpa toh ka hong ki
zuidok ta ua. Hohna di pen le thei zoklou a ka mawk vakvak sung un dak 8
bang ana ging man maimah hi. A tawp in zaw inn khat ah ka lut khong sam
uhi. Nungak hel dan le hilou lnn zualna/ hon munnate inn ahi hi.
Manthei genzaw sam omlou in bang lou teng ka va gengen sung un, dak 9 a
ging man ziak in ka pai nawn phot uhi. Mi pau nuam leh pawlhnop mahmah
ka hihziak in, lawmte’n a hon ngai thei mahmah uhi. Muanlian toh mangpha
kikhak in, inn lam tuak ah kong kikhenta uhi.
Sawtlou nung in inn ka tung pah ngal
a, innsung ka lutsawm leh inn a kisungkalh ziak in ka lut theikei hi. Ka
sungkuante’n a hon hawng uh lamen in, kongkhak ka soiging a, himahleh
kong hon in ka om tuan kei. Sawt sim ka ngak nung in leng kong hawng a
omlou ka hihman in, sumtawng ah sum tung ah ka lumsuk hi. Nipi lai
ahihman in, khua bel avot kei hi. Himahleh thoukang toh ui-hik atam luat
ziak in imut theina di vual ahi kei. Ka nu’n a hon hichi bawl nop man a
ka pawt di hon phal eive mo ! ! chih khawn peuh ka ngaihtuah hi. Imu
theilou in thoukang leh ui-hik hon keihna thaksa in ka kikhuatkhuat mai
hi. Nu-le-pa ang-sung a nuamtak a ka imut laite mitkha ah hong kilang
in, ka theihlouh kal in ka mittui aluang man hi. Nu aw hon dampih lai hi
le chin zaw mo !! Na tapa ken hiai bang tuaklou di hi ing a, tun lah
nuai simlei haksatna tuang nungsiah in, nu’n nop kimna thangvan ah na
hon na paisanta a, nang tellou in zaw na ta kei hambang vai veng. Nu kon
ngai lua. Ka zua in lah kei sang in hehpih zok leh ngaih zok aneita a,
himahleh en dih Nu itna neuchik bek toh ka zalkhun hon zuan sak lai di
ka sak leh, tu’n na damlai a, ui-nou natawm kong a na gaihsak noplou hia
! Tu’n na ta kei gamsate bang mai’n hehpihtu neilou a, genthei tak mai a
tawldam hun lunggimna in ka zang ta. Nu aw na kiang ah kei le kong pai
mai di, chi’n ka nu ka lungsim ngaihtuahna ah ka houpih pih sung in,
khua a vak man hi. Ka nu nawn a hong thou a, zing zuntha di in innkong
lam hon naihpah hi. Innkong a na ding ka hihman in a hon muh phet in,
Mangpu nang tutan tan koi a pawt e…. ? Lut inla tuithei toh luilam
zuanpah aw, a hon chi pah ngal hi. Nitak a ka omdan teng gen ngam di
vual ka hihlouh man in, thumang tak in ka lut a, ka nu hon sawl bang in
ka gamtang pah ngal hi.Zing nasep di om teng ka zoh in ann ka ne ua, ann
ne zou Lou lam ka manawh nawn hi.
Hunte hong paizel in kumthak mel
damtak in ka hong mu thei nawn hi. Ka nu hon muhdah/ huatna a lian
deuhdeuh a, ka hinkhua a genthei deuhdeuh tamai hi. Kum khat kinepna
Louvat ka hon pan nawn ua, ka pa toh Lou vat in ka kuanzel uhi. Huchi
lai’n nikhat vangsiat huai tak in ka khe liansim mahmah ka sat kha a,
kei tha hatna a inn tung zoulou di ka hihman in, ka pa’n lou vengte
samkhawm in, a hon puak thoh uhi. Inn ka tun un ka nu’n milak chih om se
lou in, na nasep chiang in le na thadah sep thei lua a ahi. Damdawi man
di sum le omkei, hichin tuam thoh mai ni a hon chi hi. Hehpihtak a hon
na enkol di ka sak leh, koi malak a salh ka tuak lai zomah hi.
Khosung a di a aneizou, a khosa thei
deuhte ki hi a, kei a di damdawi tang khat, tang nih man lel di omlou
chih ka ngaihtuah chiang in, naa ka sa mahmah mai hi. It tu ding leh
hehpih tu ding ka neihlouh toh bang dia va kisatkha khelkhel ka hia ?
chi’n kei leh kei bang ka kimohsa zel hi. Himahleh Pathian lemgel
ahihziak in puaknat luat di’n ka koih kei hi. Hichin tuam mai ni, chi
zen napi in atuamna di lah hon pelou, ka khe lah a si pawtpawt mai
ahihman in, ka puan-ak ka bawt sia a, huai in ka tuam hi. Ka nu’n a hon
na mukha khelkhel zomah a, Mangpu nag neizou lua kisa mo !! A hon chi
sukpah ngal hi. ”Nu” neizou ka kisak man ahi kei, ka si-san luang a
khawlna di ahi nak leh chi ka hi zaw, chi’n ka dawng hi.
Ka khe natsung bangmah sem theilou ka
hihman in, semlou in chu ngol hen, a dik khop mai ann kichi himhim piak
in ka omkei. Ni nih, ni thum ann kon ngolh chiang in ka tha a chau
mahmah ta. Lupna tang zoulou gentak louh, ka sungkuante inn om di a om
louh chiang un, innsung ah le a hon omsak nuam kei ua, kong chabi a kalh
in, innkong ah a hon om sak zel uhi. Sun khat kei vuak innkong ah ka om
a, gil kial lua mahmah ta ahihman in, tu’t leng tu peih nawnlou in ka
lum dildilh mai hi. Hichih lai’n Umang imu mo? Chih ”aw” ging ka za hi.
Awl in ka mit ka hak a, kua hiam chih thei nuam in ka en pah ngal hi.
Nidang a school ka kailai a ka kithuahpih theih mahmah Manlun ana
hi a, lamdang sa tak in ka en hiuhou maimah hi. Hon thei nawnlou na di
e…. ? Nang zaw huchih pahpah lou di eive a hon chi ka zak leh imu
ngamkhat a khanglou mah bang in khua ka hon phawk guih hi. E…e… Man’
thei zenzen e, nang penpen i hon mangngilh mahmah dia ? Nong hoh zenzen a
bang chi sim e? Chi’n ka dong hi. Louvat na a kisatkha ahi hon chi ua, a
hun tak a lah hong kihoh theilou a, tua hong veh pan ka hi, na hoih
deuh ta hia? Hoih deuh ta mah ing e.. Chi’n ka dawng nawn hi. Manlun i
ka tanchin thei mahmah ahihziak in, lawmte chi’n a hon hehpih mahmah sam
hi. Umang ann na ne ta hia? Chi’n a hon dawng nawn hi. Ne ta mah ing
e…. Chi’n ka dawn nawn hi. Paulou in ka mai mahmah ah hon en in a mittui
a hong luang mawk hi. Man’ bang ziak a kap mawk na hia ? Tawp in chi’n
khemtheih dandan in ka khem hi. Umang bang ziak a tu tan ann ngol a na
om nung a le kei na lawm kiang a zuau gen a ann ne chi lailai na hiam ?
Na omdan ka thei vek. Hong pai in, a lim zaw kon nekpih zou kei di
hilele ka neih bangbang ka hon nek pih di, chi’n ka ban ah hon kaita mai
hi. Man’ na hon daihsak a ka kipak lua, hilele kong pai dah mai di.
Nang le kon ngaihlouh man ahi kei, ana pai phot mai in om sawt le chin
den chiah a hoihlou a om kha di. Umang ka om sawt ziak a bang a ahoih
lou di? A hon chih zoh toh kituak in ka nu singpua a hong tung chet a,
pau lou in a hon en a, sawtlou nung in innsung ah a hon lutsan hi.
Huchih tak in, Man ana pai phot mai in, dam leh hundang ah kimu nawn na
ni, chi’n pai di’n ka sawl hi. Umang ana damta in aw, chi’n a hon paisan
ta hi.
Manlun paizoh sawtlou nung in ka nu
inn kong ah a hong pawt a, et le en ngamlou in ka kun den maimah hi.
Ngamkhat in ka deksam a hong kilai a, Mangpu zum lou mo? Hichi dan a om
na ut ziak a na khe hon sat nei ve mo !! Nang bang kisa e… ! A damlou
le hikei teh… Na thadah man lel a kibawl na hi zaw, a kinlam in
singkhuah kham di va pu aw, chi’n zep toh tempawng piak a hon thuah a,
tha hatna neilou himah leng hehpihna tanglou ka hihman in, ding zoulou
sasa in ka ding a, tempawng la in, awl in gamlak mahnawh in ka bai suk
liakliak ta mai hi. Khi tui luang zungzung kawm in dainawl ka tung khong
sam hi. Sing lianlou ka sat a, inn puaktungna di’n tha himhim ka nei
nawn kei. Ka satna mun apan lampi tan chu a hun sawt in ka tholh tung
sam hi. Inn lam paipih di’n ka kisa a, ka liang putzel a, himahleh kal
ka suanpih zou mahmah kei hi. Lampi ah ka sing sat tung ah tu in ka
mitui ka nulnul mai hi. Lungsim ngaihtuahna a saupai khop mai, naupang
chik ka hi lai a, innveng tangvalnoute singputna ka zuih sek lai a, ka
singput zoh di a hon satsak uah, inn kiang tan a hon putsak zel ua, inn
tun dek mahmah chiang in ken ka puzel a, inn ka tun chiang in ka nu’n a
hon pahtak dan, bawi na hat lua, na gim mah di mo !! Singpi khum kon
bawl di aw, chia a hon vaidawn lai khong ka ngaihtuah a, phamsa tunnu
ngai in luankhi ka nulnul mai hi.
Nitak lam ni (sun) bang a hon niam a,
himahleh ka singput di puzou mahmah lou, kei vuak a le pai theilou
phial ka hihman in, ka omna mah ah ka omlai hi. Vangphat huai tak in ka
lawmpa Muanlian pa, a hong pai kha zenzen a, ka singlukham sat a hon
putsak a, ken awl in a nung ah ka zui hi. Inn ka tun di kuan un,
Muanlian pa’n leng hon theisiam mahmah ahihman in, kei a hon pusak a,
ana pai inla… Den deuh chia kei kong pai di a hon chi hi. Ken leng
kipahthu gen theih dandan in ka gen a, inn lam ah ka paisanta hi.Silou
phit in zaw inn ka tung khong sam hi, Tomchik sung pukha himahleng ka
lel man mahmah hi. Pahtak tang di i kisakleh…. Sumkuang aw sumkuang tu
tantan koi a na bang va hih e… Na sing sat di n’on bawl tawm hia? Amanna
di chu na omkei thou mo, chi’n kamsia ka zalai hi. Ka khe ah si a hong
pawt thak nawn a, na khe le va sat beh mo !! Gum na chia tua na
satkhaksa teng le naa salaw di kon sak leh ut tak na hihleh kon satbeh
lai diam a hon chih beh lai hi. Ka kam in genkei mah leh ka lungsim in
gen a hau khop mai, mihing khat lawmlawm va kihichi bawltel chih ka
ngaihtuah chiang in naa ka sa petmah hi. Haksatna tampi toh ka khe naa
ka hon thuak touzel a, kha nih bang a hong ching hial tak in zaw a hong
dam siang khong sam hi. Lou mangtom hun, buh tuh hun toh ka dam a kituak
a, Lou nasem in ka niteng hikhua ka hon zang tou ta hi. Hunte’n mual
hon liamsan zungzung in, hun thak, nithakte zong luankhi toh ka maituah
tou zel hi.
Kumkhat a naupang kichi peumah in a ngaklah mahmah Naupang te ni(Children’s day) na
tawm biakinn kai a hon kiphal kei hi. Lawmte toh kipawlh a, nuamtak a
hun zatkhop ka ut mahmah sam hi. Himahleh ka ut louh lamtak in inn ah
puansawp di’n a hon sawl ua, tui tawi haksa ahihman in, ka nu kiang ah
lui lam ah sawp di in ka kingen a, a hon phal vang lak hi. Lawm leh
vualte kithalawp tak a, biakinn lam zuante ka muh chiang in ka eng
mahmah hi. Ka puansawp di tamlaw mahmah ahihman in zing tung in ka kuan
pah hi. Sawtlou nung in biakinn adak a hong ging a, ka bil ah a lut
mahmah hi. Ka nu a damlai a, lawmte toh kimawl dak ging lam le phawk
manlou zen a nuamsa tak a ka omlai a, ka nu’n kikhop hunta chia utloupi
pi hon kaihkhiat lai khong ngaihtuah in, kei vuak in luimun ah ka kap
kha zel hi. Biakinn thomgingte ka ngai a, ka len vualpihte’n ”aw” a neih
zahzah ua Pathian phat a laa asak gingte uh ka ziak chiang in kei leng
kihel sam ka ut a, tua di’n ka hinkhua in a hon phal kei zel hi.
Thomhau leh lung ngai vungvung kawm
in ka puante sawp a ka om lai in Gintak louh pi’n Manlun a hong hoh mawk
hi. Ka muh phetphet in lamdang ka sa a, a kicheidan kikhawm di hi omtak
a kichei ahihman in, Man kikhawm lou mo? Bang hong hih dek e..? Chi’n
ka dong hi. Umang kikhawm ing a hilele nang kon etbawl chia hon mulou
ing a, ka lungsim nuam theilou nang zong dia thumna neih kal a hong pawt
gu ka hi. Na inn uh kong et leh lah kong chahbi a kikalh, nang lah hong
kikhawmlou, na inn kiangte uh pi ka dot leh lui hoh hong tung nailou
ahi di, hon chi a, luilam hon enpah ka hi, chi’n a hon dawng hi. Man
paikik inla va kikhawm nawn in, kei zaw hihchi di mah ka hi. Denchia ka
nute’n hon thei le uh a hoih kei kha di, chi’n paikik nawn di’n ka sawl
hi. Umang ka kik nawn dah mai di, kon sawppih di aw, chi’n ka puan sawp a
hon sawppih ta hi. Ka kisuanglah mahmah a gen di pen le ka thei nawn
kei zezen hi.
Manlun ngaihna chiang ka nei mawk hi.
Sawt simtak kihoulou a ka omlai un, Manlun a hong pau a, Umang na
hehpih huai e mo, lawm leh vualte nopsak ni a leng nang nasem a na kuan
tel. Na nute hai uh e mo? Na nu’n hon dampih nawn kei leh le, na pa
damlai sam hia, hichi tel lawmlawm a hon koih ken thuak zoulou ka hi.
Man nang hon hehpih tuk a hon hehpih nu leh pa nei hi leng ka kichi lua,
himahleh kei zaw na hehpihna tangtak ka hi kei. Hun dang in bel school
khong ah nuam i sa mahmah a, tua hun laite ka ngaihtuah ching in, pahna
luankhi’n a hon tuum zel. Tu’n zaw nu neilou, pa neilou ka suakta a,
nang toh kithuah ut mah leng ka kisuanglah lawta. Umang nu-le-pa neilou
chi’n kon musit ahia? Man” tua dan a hon musit di na hi zenzen kei,
khovel ah kei hon it nang chou ahi, kei ka kisuanglah kha pahpah ahi.
Kihoulim kawmkawm in puan ka sawp zel ua, ka puan puak tamsim mah leh
nuam ka sak ziak hia sawtlou chik sung in ka sawpkhin maimah uhi.
Kikhawm tawp ma in inn tung kei leng ka nu’n hon sal zel di ahihman in,
inn lam zuan in ka kik nawn uhi.
Lampi ah ka kihou na uh ka sunzom tou
zel ua, bang mahlou kal in inn ka tung man uhi. Kikhawmte ana tawp nai
kei vang lak ua, a kin thei bangpen in ka puansawpte uh, ka phou ua, ka
zoh tak un Manlun in Umang sun kikhopna ah hoh thei hon sawm in aw,
chi’n a hon paisanta hi. Kikhawmte a hong tawp ua, ka nu inn a hong tun
tak in, Mang sawpzou baih na chia, nuai ngellou a tui a hon suk kawt
thoh maimai mo! Naa hoih sep in aw ann na duh leh, a hon chi zui hi. Sem
leng lah salh tuak, sem kei leng lah salh tuak, kei a di’n kipahna di
himhim a om kei. Sun kikhopna a lah tel ka ut a, lah ka kingen ngam kei
zel hi. Inn ah om in sep theihtheih sep in ka om lai in, ka lawmpa
Muanlian a hong hoh a, Mang kikhop sawmlou mo? Kisa ve kikhom kei dia,
hon chi hi. Muan kikhop sawm khollou hi veng aw, sep di tam toh chi’n ka
dawng hi. Hulou halou in kikhawm di’n zot in hong zawnta mai hi. A tawp
in ka nu kiang ah, Nu ka va kikhawm diam? Ka chih leh a hon phal
vanglak a, kipak tak in kikhawm di’n ka kuanta hi. Lawmpa kiang ah, Muan
ka hinkhua na theihsa hilou mo !! Bang dia hon hai gam tattat na hia?
Mang” nang thu a lah pawt ngamlou na hihchia, lawm leh vual lak na ut
sam gingta ing a, hong hi chih sek mah ka hi. Ka hih khial kha ngaihdam
aw. Muan huchih zezen ngai kei na hon daihsaknate uh ka theisiam kei
ahi, chia ka kihouhou sung un biakinn ka tung maimah uhi. Kikhop bel hun
nailou ahihman in lawmte toh houlim in thu tuamtuam ka gen khawm ua,
himahleh kei kup di a vang khop mai. Lawmte’n siamsin thu a gen ua, ken
lou nasep louh genpih di ka nei kei a, a nopna a om tuan kei.
Kikhawp dak a hong ging a, lawmte toh
biakinn sung ah ka lut nainai uhi. Program kon pan ua, items tuamtaum
te khat khit khat in kon zang tou ziahziah mai uhi. A nuam a achang bang
in gil vun na zezen in kinui zel hi. Himahleh Munlun mel ka muhlouh man
in ka lungsim a nuam thei taktak tuan kei hi. Biakinn sung ah hun ka
zat zoh un, Biakinn kong ah hun zatna ka nei lai uhi. Tua mun ah bel
Manlun mel ka mu a, ka lungsim a nuam tuam mahmah hi. Naupangte lak ah
gen nop nei a om leh hun zaatak hon ahi chi’n heutute’n a hon phang ua,
Manlun a va ding mawk hi. Bang gennop nei ahi dia aw, a gen di hon gen
zok leh chih bang ka guk ngaklah mahmah hi. Huchih lai in kei a hon sam
mawk a, lin pipi in ka va pai sam hi. Kei hon gen nop ahihleh unau pa
Mangpu in laa khat ka sa nuam a, himahleh hun ka ngen ngam kei a, nang
hon ngetsak in a chih ziak a hong ding ka hi a, tu’n amah lasakna hun i
pia ahi, chin a hon paisan a, ka lawm leh vualte’n khut beng in a hon
ong khum zuazua uhi. Sak di pen theilou in ka kingaihtuah tuah lai in,
ka lungsim ah Muana Ngaihte in a sak khat a hong suak guih a, keyboard
toh kon sa ta hi. A la tuhh iai ahi..
*Ka zua Lunggel Piandang sang e….
Tun aw, a thai lianu’n tuang nung hon siah a,
Sing dang tun deih anglai naubang pom a,
Sanggah lungmawl kei di’n nalua sang e………!!
Sing dang tun deih anglai naubang pom a,
Sanggah lungmawl kei di’n nalua sang e………!!
Ana vangsel vansin nuai ah,
Zua aw chi leng singdang tunnu’n hal,
Tun a chi leng luankhi’n tuibang hon tuum ,
Sanggah ka sial za in tam e maw gual aw…
Zua aw chi leng singdang tunnu’n hal,
Tun a chi leng luankhi’n tuibang hon tuum ,
Sanggah ka sial za in tam e maw gual aw…
** Sinlai simtu lung a ka gelgel chiang in,
Gelsau ngam lang tun leh zua simthu,
Sanggah lelliang siangmang laitan hi e….
Phamsa vangkhua mubang in ngai mai veng e….
Gelsau ngam lang tun leh zua simthu,
Sanggah lelliang siangmang laitan hi e….
Phamsa vangkhua mubang in ngai mai veng e….
***Gahliang gual lai ah ngabang ka lenzong in,
Sanggah tanbang kimpih ding omlou,
Kimpih vualngaihte’n siamsinthu lel uh e…..
Sanggah kei zuan nem ding omlou simlei ah.
Sanggah tanbang kimpih ding omlou,
Kimpih vualngaihte’n siamsinthu lel uh e…..
Sanggah kei zuan nem ding omlou simlei ah.
Ka lawm leh vualte ka muh chiang in
kipah melpu ka mu kei himhim hi. Manlun ka en a, a mittui a na nulnul
mai hi. Ka hinkhua toh kituak sa ahi ngei di ua, ngaih nop le a sathei
mahmah uhi. Ka lasak a thu ka ngaihtuah tuah chiang in ka khasiat tha
hong suak a, a tawp tan le sa suak theilou phial in ka om maimah hi. Ka
sak zoh in ka tutna lam zuan in ka va tu nawn hi. Nitak lam dak 4 vel in
program ka zang zouta uhi. Ka zoh phetphet un inn lam zuan in ka pai
pah vengveng hi. Manlun leh Muanlian in hon delh ua, a hon phak tak un,
ka lasak siam hon sakdante khong uh hon gen ua, kei bel ka zum gu sim
alah ka kipak mahmah hi. Sawt ton manlou in inn tung di’n ka kisa ua,
ann nek lim aw chi’n kong kikhenta uhi. Hun leh nite hong liamzel in
haksatna tampi kawmkal ah kipahna toh tangval dinmun in kong ding tou
thei samta hi. Innsung a genthei kisa a hehpihtu neilou a ka om hun a
leng hon taisan mailou a, hon hehnem zel Manlun” ka itna leh ka ngaihna a
lian deuhdeuh a, nungak di et in ka enkha zel hi.
Ka nu thak in lah hon mudah deuhdeuh
mai, ann nelou tui dawnlou a ka om hun a hon hehpih khenkhatte’n a inn
khong uah hon guk sap in ann a hon nesak zel ua, kisuanglah mah leng
gilkialman in uipi bang mai in mi inn teng ah ann ne in ka vial diandian
mai hi. Nitak khat pawt ka paihak sim a, nidang mah bang in inn
kalhkhum in ka om nawn a, ka lupna sum tung mah ah ka lum nawn hi. Ka
pianna pa natawm in hehpihna neilou himhim in, nang kon vakvak sang in
vokpi khat vak leng ka lawk zaw di, chih kampau tanpha hon zatkhum sek
a, kei a di’n hinman himhim om ka saklouh hun atam thei mahmah hi. Kei
aw bang di’n simlei tung a mimbang apiang ka hiam ? Tung Sianmang aw
sanggah ka tung a na laitan, selungmawl ken theisiam zou lang. . Kei dia
nopna kawlni hong suaklou ding hiam !! Ka tun ka zua in lah nenbang
hong niil in, pianna tunnu ngai in naubang kapkap veng. Sian aw lailung
dam di’n kei hong siam aw, sengual toh tanbang kim a nunnuam sawlbang
hei nuam veng e……….
Ka hinkhua ka ngaihtuah chiang in,
piang vangtah kisa in, kei hon siam tung Thianmang bang ka mohsa kha zel
hi. Lawm leh vualte siamsin a, tun-zua toh nuamtak a khosate bang eng
in ka hinkhua ka zang touta mai hi. Inn a om a ui hou, ak hou a kihou
gegi sang in Lou a giah a, khattang lungzuan sial kei di’n a nuam zaw a,
Pathian ni natawm innlam pailou in Lou lam ngen ah ka khosa hi. Kiginni
khawng chiang in Manlun Lou a hong kuan zel a, kilawm in Lou na ka
semkhawm zel uhi. Nikhat kou Lou ah, nikhat Munlun te Lou ah, hichi dan
in Kiginni teng hun ka zang ua nuam ka sa thei mahmah hi. Kipawl khop
tam ziak hia!! Manlun in ka lungsim teng a luah a, aguk tak in ka ngai a
gensuk mai bang ka sawm hi. Gen taktak dia ka kisak chiang in lah ka
hinkhua ziak in ka ngam kei zel hi.
Tu’n gen mawk ta leng hon ngai kei
hen la hon mudah leh khovel a haksatna ka tuah hun a hon hehnem di om
nawnlou di hia, gen in hon ngai zenzen ta leh lah a nu leh pate’n hon
deihsak kei le uh gentheihna kiguan beh ka suak zel dia, chi’n lungsim
nih leh thum suah in ka buaigu thei mahmah hi. Ahi thei tan a kidek a
genlouh teitei ka sawm hi. Khat veivei lah gen a hon ngaih leh kiten
pihpah a inntuam a om pah di, hileh ka gentheihna nuam tuam di, chih
khawng ka ngaihtuah chiang in, hon ngai di sa bang in ka koih kha
thepthup zel hi. Hunte’n lah mual hon liamsan zungzung in, ka hun tam
zaw Manlun ngaihtuahna in ka zang zel hi. Mi gukngaih a haksa ngei mai,
ani ani in ka itna apung hulhul a, Manlun in lah hon theihpih mahmah
lou. Zan hun natawm imu manlou phialphial in ka ngaihtuah a, imu pan
manglam ah kingai in nuamsa tak in hinkhua na kizangkhawm a, khanloh
chiang in a tak di bang kisa hi. Lah zanmang lel ana hi zel hi.
Hi thei nawn mahmah lou genlouh
teitei ka sawm chiang in, ka sung ah hon sawl teitei om hi in ka thei
hi. Hon ngaih kei leh le poilou, ka lungsim a nop deuh nak leh chi’n gen
di thupukna ka hon la a, gen ka sawm ta hi. Manlun mel ka muh chiang in
ka zahtak a ka kam mahmah toh gen ngamlou in, ka sik in letter sawl ka
sawm a, letter kon gelh panta hi. Lou lam ah zan hun ah thomging zak di
om manglou ahihman in lungsim ngaihtuahna apai a, kei gelh dia le kilawm
lou zezen kon gelhkheta hi. Hiai ahi a letter sungthu……
Ngilh ni omlou, it luat Manlun,
Tuni’n na kiang ah gennop khat ka
nei a, na ngaihdan ahi kei leh zong na hehpihna toh atawp tan hon
simsuak sak di’n kon ngen masa ahi. Awle…. Na kiang ah genlouh ka sawm
himahleh selung sung ah tuipi bang kihawt in, selunggu puakzak in zehzum
khuallou a hon gen ka hi. Theisen neu apan lunglai ah tham den
vangngaih. Tang sanggah lailung damna, kei di’n na selung sung tawng kot
hon hong inla, vangngaih simthu khau bang sutkhawm ni. Liapaal zatam
lai ah nanglou kei di’n singdang omlou. Leitung tangbang damsung nunnuam
sawlbang heikhawm di’n deih chibang ka tel nangbek hi chia, ahi zong in
singdang sanmun muangsa na hihleh guallai nuihchiam hong lel lou aw.
Vangngaih simthu tomkal bek hilou in. Pham dong a beilou ding itna toh
ken nang hong it ing. Itna simthu kong lelte kei di’n sinlai laambang
pahna hong suaksak in mo. Nang lou in gamgua bang hing zou kei veng,
selung khat in vangngaih simthu sutkhawm in pheiphung suan khawm nuam
veng…. ….
Laikhak..
Nang a kinem… Mangpu. …
Kiginni Lou hong kuan nawn a, kou Lou
ah sun nitum in ka pang khawm uhi. Gelh zohsa himahleh a piak di ka
huphul mahmah hi. Vaipai hunta ahihman in, pai nawn di’n a kisa a, kei
leng pai di’n hon zawn mah leh ka ut kei hi. A paitan in le ka pe ngam
nai tuan kei hi. A pai zoh buksung ka lut leh a sun ann puakna a
mangngilh kha zenzen a, ka laithon a sung ah guang in, ka nung delh hi.
Sau simpi ana tung man a, ka pha haksim hi. Ka phak in Man na tifin na
mangngilh hong pe dek ka hi ch’n ka pepah hi. Kipahhuai lua Umang, ka na
painawn di aw, ch’n a hon paisan nawn hi. A tum di kuan in, inn na tun
ma in na tifin sung en in aw, ka gal chih a, Lou lam zuan in ka kik nawn
hi. Hon thuk kik di kal bang ka ngaklah a, mi hon posak ngam di lah ka
gingta kei a, Kiginni tung nawn ta leh chih bang ka ut mahmah hi.
Pathian ni sun kei kia ka kingaihtuah
tuah a, hon khak kikleh bang thu a hong om mah dia aw… Tua va pai a va
dot di hia le… Chih bang ka ngaihtuah hi. Inn lam pai leng lah hong
kibawl didan teng thei lua ka hihman in ka pai ut kei zel hi. Ngaklah
luat ziak hia, nikhat lel le sawt ka sahi. Ni bang tum hak ka sa thei
mahmah hi. Hunte khawllou a na paipai sam hi ven, Kiginni a hong tung
petmah a, nisuak et a nuam tel mai. Loukuante Lou a hong tung panpan ta
ua, himahleh Manlun mel muh in a om kei. Dak 9 tan a le hong tung nailou
ahiman in, ka ngaih apha thei ta kei. Sun nitum in Lou nasemlou zen in
buksung ah ka lumden tamai hi. Nitak lam vaipai hun in ka lawmpa
Muanlian a hong hoh mawk a, lamdang bang ka sa zozen hi. Mang damlou mo?
Hon chipah hi. Dam e zezen, bang chi sim e…. No’ng hoh zenzen a. Bang
chi chih le zaw omtuan kei. Manlun in hiai a na pia aw hon chi a, hong
pezual ka hi. Ka na pai nawn mai di. Ka vaikai kha dia, chi’n hon paisan
nawn pah hi. Lungsim guk a nuih pah mai, bang a kigelh mah dia aw, chih
chouh ka thei ut ta hi. Sim pah ngamlou in ka koih hoih a, nitak ann
nezou phutuan vak nuai ah hichin ka hon sim ta hi..
It luat Umang,
Chik chiang na tongdam ka
za diam, chia selung ka gel lai in, tu’n na tongdam thelnah laileng pan
ka muh in pahna’n ka dim. Selung khat a vangngaih simthu sutpih dia,
liapaal zatam lai ah kei bang lel deih chibang no’n tel khak zenzen
hampha kisa ing. Kei lou a gamgua bang hing zoulou na hihdante ka thei
chiang in, kei din phulou bang ka sa kha zozen hi. Na tongdam ningzu
bangkhum, damsung anuam, ahaksa thuak khawm di in, naubang na sang ing.
Itna abei theilou itna toh kei nong it bangbang in ken zong nang hong it
ing. Senvual in nihgel itna nuihchiam in hong lel zong selung liap ken
mo? Tangbang dam lungtup mualsuah mateng sulkik simthu lel lou in
machiang suankhawm ta ni. Sihna khenlouh ngal gibang kikhen kei ni mo
Umang?
Laikhak……..
Sihtanpha nang adia ginom, Manlun.
Ka kipahna gen seng ding ahi kei.
Khat vei chouh sim hun salou in, ka sim tuantuan mai hi. Zankhua in imu
theilou zen in ka kingaihtuah a, kei vuak in ka guk nuihnuih mai hi.
Zingkhua a hong vak a, ka etna lamlam kipak mai hi in ka thei, buhte
huih in amul na lamlam ah abuk diamdiam ua, a etlawm khopmai, Manlun mel
muhkal ka ngaklah chih tak in ka ngaklah tamai hi. Lou khoh bang nidang
teng sang in anuam zaw hi in ka thei; dahna di himhim ka thei nawn kei.
Kipahna in ka pumdim. Babare !! ahi mai.haha.
Niteng khawl in louna kon semtou zel
a, ziltawp ni ann nekma in Lou ka zou khongkhong sam hi. Ann ne zou meh
di tuamtuam la in loulai ah ka vak kualkual a, sawtlou nung in inn lam
zuan in kong paita hi. Kalsuan anuam tel mai, innlam zuan kal-kin chih
mahtak tomchik paipan ka kisak leh inntung dek ka na hi maimah hi. Inn
ka tun in, ka nu ana om a, pahtak tang di i kisak leh, salh ka tuak lai
zomah hi. Ka vanpuakte a koihna di munte ah ka koih zoh in ka kisil
siang a, ka kisil zoh in inn sung nasep theihtheih ka sem hi. Mi inn a
kiloh a om bang mai in, numei naa chih omlou in, innsung nna hi in, Lou
nna hita leh ka sem khawm vek hi. Om noplouh ni chang chiang in nateng
kisem fel zoulou in ki-omsek hi. Tua bang hun a leng theihsiamna himhim
omlou in a hon salhna/taina ka tuak lai hi. Ka pa lah kei a di’n bangmah
ahi nawn kei. Ka nu hon omlouh san nung a gentheih haksatna ka tuah hun
a ka taina di himahleh, kei hon genthei saktu lel asuak hi. Nitak khua a
hong mial a, ka ngaihnoute innlam zuan in ka kipankhia a, sawtlou nung
in ka tungpah hi. Lengla ana hau mahmah ua, ka tutna di le a ong kei
phial hi.
Zansawt dan zil in, lenglate a kiam
hulhul ua, kuamah om nawnlouh tak in, Manlun kiang nai ah ka va tusam
hi. Gen di ka thei zoukei, ka tuah khakpatna ahihman in haksa ka sa
mahmah hi. Paulou in ka ki-entuah zel ua, gen di theizaw sam omlou in ka
kinuihsan maimah uhi. A tawp in zaw kei a pasal zaw deuh chi in, Man ka
itna na hon sangsak ziak in ka kipaklua ka chi thei khongsam hi. Umang
kei bang na hon it khak zenzen kei ka kipak zaw. A hon chih leh gen di
ka thei nawn ta kei hi. Kihou zel, sawt simpi pi paulou a om zel ka
huchih sung un zan dak 9 ana ging man a, singtang a dia zansawt mahmah
ta ahihman in pai di’n ka kisa hi. Munlun in innkong tan hong kha a,
Umang hon ngai taktak nate mo? Chi’n a hon dawng hi. Man itna ka neih
tengteng kon piak ahi a, ka neih beh lai leh le nang adi ahi, chi’n ka
dawn hi. Umang lawm leh vual pawlhna ah hong pilvang mahmah in aw. Kei
leng nang a dia ginom tak in ka na om tawntung ding. Man nang chouh na
hi ka lailung damna, selung liaplou in aw chi’n, mangpha kikhak in kong
kikhenta uhi.
Bangmah lou kal in ka ki itna un
khosung teng a zelzuak a, aneu alian a theilou omlou, lamdang salou le
omlou. Khen khat in houh Manlun toh mo Mangpu a kingaih uh, Mangpu a
maimai a di’n a pamaih khong achi uhi. Kei tagah bangmai silh-le-teen
hoih leng nei zoulou toh Manlun nu leh pa ang sung a nuamsa ta akhosa
ahihman in kei a dia pammaih sa ahi uhi. Khosung thu tang Manlun nu-le-
pate’n leng ana za sam ahi ngei di ua, nikhat……….
Nikhat Manlun nu’n, Manlun toh meisak
a itna thu gen a ka omlai un, Mang Manlun toh na omdan uh ka et-et
chiang in a kingai mah na bang ua, huchi houh na hi uh hiam? Chi’n a
hong dawng a, ken leng ”Nu” kingai mah ung e.. Manlun ka damsung a dia
ka tel ahi ta. Na hon deihsak kei tak un zong kikhelta ahihman in Manlun
toh zaw hon khen mahmah kei un aw !! Chi’n ka dawng hi. Paulou in sawt
sim a om a, Mang naupang chik na hi lai ua, tua dan thil om thei mawk
lou di ahihman in tawpsan ana sawm zaw le chin ahoih zaw di ka chi hon
chi hi. Nu, ken Manlun ka itna hichi mawk a bei thei di ahi louh ziak in
hehpih in hon theisiam mai un. Mang itna kichi zaw a mawk a bei thei hi
kei mah e…. I neih i lam, i khosakdan le a kikhai lua a, Munlun zaw nou
innsung a hong lut thei di vual ahi kei, huaiziak in haksa mah leh tu’n
ka muh mahmah in Manlun kiang ah khenna bawl mai in, chi’n Manlun khen
di’n a hon sawt tamai hi. Manlun in lah, “Umang, hon khen mahmah ken
aw!! Chi’n kap kawm in a hon kawi tuntun mai hi. Lungsim ah bangmah a om
thei nawn kei. Manlun khen di lah khovel a ka lungmuanna om sun
ahihziak in haksa ka sa zel. Khen kei leng lah itna ziak a agentheih di
lel ka hi zel a.
Manlun mitui ka nul sak a, Man hon
taisanlou ding ka hi. Lungmuang in nuam in haksa leh sihna khen louh
ngal khenlou dia l simthu chiam pellou ding ka hi. Bang teng hi leh ka
na pai phot mai di aw? Kilungnuam sak in mo !! Chia pai dia ka kisak leh
Manlun in, Umang bang dia hon taisan sawm na hia? Ken leng ka hon zui
ding chi’n ka khut ah hon len ta mai hi. Man ngaklah ken nikhat ni chia
hon zui law di na hi ka chih leh, Manlun nu’n chikmah chia hon zui ken
teh….. Manlun, na hiaipa innsung a le tazoulou na zuih sawm himhim bang
hon nekpih di sa e… !! Zumlou maw ! chin Manlun a sam ah man in innsung
lam ah a kailut hi.
Manlun nu hon hounate a dik himahleh
naa ka sa petmah hi. Kei a di’n pai mailouh hih theih om nawnlou ahiman
in, kei zakkhop in man mangpha in aw, kon ngai lua. Ka chi a innlam zuan
in ka paisan ta hi. Inn ka tun in vangphat huai tak in kong ana kikalh
kei zenzen a, innsung ah lut in ka lumsuak ngal hi. Lum mah leng imu
thei di vual ka hi kei. Bang ziak a ka phulou di theizenpi a, Manlun
kiang a ka itna va gen sese ka hi dia aw. Tu’n lah ka itna bei thei mawk
di ahi nawn kei a, it na zaw a lamdang lua. Ka theisiam thei kei. Kei
ka pian phung tual aniam vang in maw !! Ka ngaih paallai heisa bang ka
loh louh mai ding. Piang vang tah hi na lawmlawm ing e.. Manlun anu’n
bang aloh dia aw. Bang ziak a ka khut hon len a, kon zui di achih lai a,
anu’n akaih kik lai lentang ngamlou ka tel lawmlawm a. Man hon ngaidam
in aw..? Mailam hun khualna vang ahi. A khen chiang in ka kimohsa a,
akhen chiang in lah Manlun toh kihoulim dan in ka lungsim ah bang lou
teng ka ngaihtuah a, atawp in zaw ka imu thei khong sam hi.
Zingkal ka khangma kha a, ka thoh in
6am bang ana ging man hi. Thouphet innkong a ka pawt leh ka nu’n hon
maitang kawk in, Mangpu zumlou mo? Bang kisa himhim e? Hehpih a innsung
kong tansak lai thei siamlou mo? Na bang suan di na nei a mi tanu na hel
a, mi lak teng a hon suminse gige di na hih leh tuni apan inn na taisan
di ahi. Tu mahmah in le pawt in la hong kik nawn koh chi’n chiang in
hon sat a, bawng huanluh hawl bang mai in innlum taisan di’n a hon hawl
ta mai hi.
Ut leh utlouh in hawlpawt in ka om ta
mai hi. Zotna di leh tunna di theilou in munkhat ah tu in, tangval
piching himah leng kap in ka kap khe hohoo mai hi. Tua mun tan a le ka
nu’n chiang toh hon delh lailai hi. Huchi in beidong kisa in ka nu han
ah ka va pai a, Nu” aw na luakha bek in hong veh dih, na vontawi ka tan
na lung a kim hiam? Nu tuni apan hiai mun taisan di ka hi a, ka omna
lamlam ah hon makaih in aw. Na ban lenlou in zaw lamkhang tuankhial ding
ka hi. Ka sihna mun ding koisan hiam ? ka thei kei, himahleh ka sihna
mun di zuan in ka paita ding. “Man, boi, hon ngailua kei ve.. Mel
kimulou zong itna khaubang hualsa tolhlou di’n na ginom in aw. Kimuh
nawn mateng mangpha.” Ka lung sim in Manlun mangpha ka khak a. Manohna
mawng neilou in gamlak ah ka paisukta hi.
Lungsim mumal le neilou in ka mailam
ka manoh zel a, achang in gamken, khaugui, linglak teng pal in bah in ka
puk zel hi. Sun hun in ka dang hong tak a, phavang khuakhal lai ahihman
in tui a vang mahmah hi. Tui duh gentaklouh nitak lam in ka gil hong
kial a, tha teng bei in mukhat peuhpeuh ah ka lum zel hi. Koi lam tungta
ka hiam? Chih leng theilou ka hihman in, peihlou sasaa in singkung khat
ah kal in ka dak kualkual leh ka omna a kipan mual nih vel hal ah khua
hi omtak khat ka galmuh a, khua ahi leh tuh nitak bek a kitawldam theih
khak leh chi’n huailam zuan in kong kipankhe nawn ta hi.
Gim leh tawl, gilkial dangtak
bah/solsam nung in ka galmuhna mun ka tung khongkhong hi. Ka kilamet mah
bang in khua ana hi a, ka etdan in inn 15 kan pha di’n ka ginta kei hi.
Inn ka tuah masakna pen ah ka lut a, kho hausa kua hi hiam? A inn uh
koisan hi hiam chih ka van kan a, naupang khat in hausapa inn tan hong
kha a, huchi in hausapa’n leng hon thei ngeilou ahihman in. Koi a hong
kipan na hiam? Bang a kei apan na poimoh? Bang a kon panpih thei di om
hiam? Hon gen in. A hon chi a, ken leng tua i simsa ka tan chinte ka gen
a, tu zan bek na inn ah hon tawldam sak in chi’n ka ngen hi. Huchih tak
in hausapa’n lenga lehlam en in a mittui nul hi awmtak in a hong om
mawk a, lamdang sakna lianpi ka nei hi. Sawtlou nung in a hong kihei
phei a, na min bang hi hiam? A hon chi a, ken len Mangpu ka hi, chi’n ka
dawng nawn hi. A mai suah ka et chiang in thil saupi ngaihtuah nei hi
leh kilawm in ka mu hi. Lamdang sa ka hihman in, Pu aw, bang a na
ngaihtuah? Ka chih leh. Mang lungkham ken, ken hon enkol di ka hi. Nang
tuah bangbang tuak ka na hisam a, neuchik ka hih apan nu-le-pa neilou in
ka om a; ka papite bel in genthei tak mai a na khosa ka hi hi. Ka
nupi’n hon bawl gentheihnate thuak zoulou in, ka nungak nu toh ka nau nu
toh innsung a kipan ka na taikhia ua, ni bangzah hiam gamlak a ka
khosak nung un, mailam khualna in tua ka tenna khua ka na sat hi. Ka zi
in kum paisa in a hon omlouhsan a, tun ka tate alian pen in pasal anei
khinta a, ama nuai a tanu khat leh tapa khat ka nei a, amau toh tutan
hiai mun a na khosa lai ka hi uh. Gentheihna tuak kha loute’n mi
gentheite hehpihdan a theihlouh ziak un, a gentheite’n gentheih semna
tuak i na hi uh. Bang teng hi leh tuzan hiai ah om phot inla, zingkhua
hong vak dia na inn, na lou di bang leh l ngaihtuah ding, a hon chi chu
kei a dia kipahna bukim ahi mai hi. A khe bul ah kuun in kipahthu ka gen
a, chikmah a kithei ngeilou himahle ung. Hinkho zatdan kituah khak ziak
in, ka kingawngkawi ua ka kikahkhum tuak ta mai uhi. Kihou zou ann
khong hon ne sak a, ka nek zoh in thu vantang kihoulimna sawt sim tak ka
neih zoh un lum di’n ka kisa ua, kong lum ta uhi.
Gim mahmah ka hihman in, lumpan ka
kisak leh ka na ihmu man hi. Zing khua hong vak a, hausa pu’n khosung a
inn suan apa chiat samkhom in, ka tanchin ahilh a, amau toh khosa khom
ding ka hihdante leng ahilh vek hi. A gen beh na ah, eibang ahi kei a,
silh leh ten, um leh bel neihsa bangmah neilou ahiman in l kiphal dandan
amah adi’n pekhawm leng a hoih ding, chi’n thu apuang a, khosung ah hon
maingal sak mahmah hi. Ka ki-etkolna di’n sum leh pai, sih leh ten
bangkim hon sai fel sak ua, ikua mah luah louh inn khat ah hon omsakta
uhi. Ka sap theithei sam in inn sung khosakna di ngaihtuah in ka buai
thei mahmah hi.
Hun awl ka neih chiang in ka lungsim a
saupai thei mahmah a, ka it Manlun bang chik chiang in na mel mu ding
ka hiam? Na sakmel etlawm ko’n muhkik ni chiang in singdang anglai
zalkhin na hi mai mah diam? Mel kimu lou, tong kisang theilou zong
sihtanpha adia tongchiam mualsuah di’n na omlai na hiam ? Na tongdam
sang nuam lai veng. Tu’n lah koi kuam sawlbang hei ka hiam chih leng ka
kithei nawn kei. Himahleh ka lungsim bel Manlun kiang ah omden thouthou
hi. Lungsim ngaihtuahna mai himahleh akhenchiang in mtitui nul hun atam
thei mahmah hi. Bang chi teng in om mah leng Manlun chu kei a di sa in
ka koih a, lungnopna khat ka nei veve hi.
Hunte hong pai zel in buh lak hun a
hong tung a, ken bel buh lak di neilou ka hihman in, a nei zou deuhte
kiang ah kiloh in ka kuan zel a, nikhat in nitha Teng 10 zel a hon pia
uhi. Nitak chiang bang in Kha a vak a lungleng in hunluite ngaihna alian
deuhdeuh hi. Manlun toh khavak nuai a khenlou dia ka kichiam laite uh
mitkha ah a hong kilang a, lunglen apuangsak diak hi. Tua bang hun ah
lungleng vungvung a ka om chiang in Muana Ngaihte in a sak….
SOLKHA TANG AW SOLKHA LENMUAL KHUMTA IN.
VANG NGAIH KA SIAL LEN PUANBANG THAK E….
NGAIH IN KA SIANG TONG A CHIAM SIMTHU,
SOLKHA HONG TANG CHIANG AW A LANG….!!
VANG NGAIH KA SIAL LEN PUANBANG THAK E….
NGAIH IN KA SIANG TONG A CHIAM SIMTHU,
SOLKHA HONG TANG CHIANG AW A LANG….!!
chih teng ka sa tuantuan mai hi. Ka
lungsim guktak ah Manlun muhkik nawnna di lampi zong in kuamah theihpih
louh in ka na guk lungkham thei mahmah hi. Khosung a leng ka inntek
mahmah sam ta a, nitak pawt nopna bang ka hau thei mahmah hi. I chihsa
mahbang in mipau nuam ka hihman in lawm bang ka hau a, nuam ka sa mahmah
hi.
Hunte hong pai zel in kumtawp lam ahi
toh Chirstmas gim hong nam panpan ta a, lunglen apuangsak mahmah hi.
Nasep tha-it luat omlou ahihman in, nikhat sa beng di’n ka kisa a, zing
ann ne zou gamlak zuan in kong kuankheta hi. Gamla sim inn apan in 4km
vel ka pai zoh nung in Numei panpihtu di sam a kikou ”aw” ka za hi.
Gamlak ahih toh kho nupi khat khong singpua bang hiam tuak hi di’n ka
gingta a, ”aw” ka zakna lam zuan in ka tai vengveng hi.
Sawtlou nung in ka tung a, maizen ka
gingtak banglou tak in pasal nih in sual luih/ rape sawm a panpihtu sam
ana hi maimah hi. Loh ngaihna theilou in ka thau van lam ah ka kap leh
pasalte gel in hon en ua, a kin thei bang pen in a taimang uhi. Numei
kua hi hiam chih thei ut in a omna mun ah ka va pai a, ka tei aw…. Ka it
Manlun ana hi mawk a, lamdang ka sa mahmah hi. Manlun ahih tak in, a
kin thei pen in ka mai ka dial puak in ka tuam a, nang kua na hiam?
Kitheihmoh bawl in, Koi a hong kipan na hiam? Chin ka dong hi. Kei ka
hih leh Manlun ka hi a, hiai apan kigamla lawlou khua khat a hong kipan
ka hi, chi’n a hon dawng hi. Bang hih a gamlak vak na hiam? Bang zong na
hiam? Chi’n ka dawng nawn hi. Muh ut khat ka nei a, huai muh kinem a ka
hun awng teng a gamlak vakvak mai ka hi. Chi’n a hon dawng nawn a, bang
ahiam na muh ut? Kon panpih thei diam? Ka chi nawn hi. Hun bangtan hiam
paisa in ah tangval khat toh ka kingai ua, ka tangval pa mi genthei
mahmah ahih ziak in, ka nu leh pa’n a hon deihsak louhziak un genthei
tak mai in hinkhua ka na zang tou ua, huchih lai in ka tangval pa inn
apan hawl pawt in a om a, tun koi a om a ! Damlai hia ! Si hia chih leng
ka thei kei, himahleh, ka ngaihsutna ah gamlak khong a khosa di’n ka
gingta a, amah muh kinem ka hi. Nang min bang hi hiam? Na hong panpih a
ka kipaklua, chi’n a hon dawng hi. Ka min leng a hong dong hi. Kei ka
hih le Lalboi ka hi, chin ka khem hi. A ziak bel kei adia a ginom na ka
theih ut man ahi hi. Ulal kon chi di aw, himahleh na mel ka mu nuam, ka
mi zong ka chih pa toh na ”aw” a kibang lua, hehpih in na mel n’on mu
sak thei diam? Man hon thei siam mai in, natna ka neih ziak a, ka tuam
ahi a, mawk phel theih ahi kei. Ulal hehpih in hon kimuhsak mai in, na
”aw” suah kei a di’n thilthak ahi kei. Chi’n a hon ngen tuntun mai hi.
Ki-iim sawm mah leng ka ”aw” in ka hihna langsak thouthou ahihman in, ka
maituamna ka phel a, Man hon en in, muh kinem a na zong na Umang kei ka
hi, ka chi khe khong hi. Umang ei…. Na na dam mo? Bang dia tu tantan
ki-imm na hia!! Chi’n hon angkawi a, a khitui aluang zungzung mai hi. Ka
it mahmah ka angsung a kidiik hihiit chiang in zaw, ki pasal sak zou
sam lou in kei leng ka kidiiksam hi.
Sawtsim tak a kikhem zaw di sam omlou
in ka kikahkhum zoh nung un, singliim nuai ah ka tusuk uhi. Sawtpi
kimuh louh nung a kimu ka hihman un ka kingai mahmah ua, nuam leng ka sa
mahmah tuak uhi. Ka kimuhlouh sung ua leng ginom tak a om ka hih dante
uh ka kihilh tuah ua, ka lunglen dan khong uh leh ka kingaih dante uh
gen di a tam mahmah hi. Gen nop teng genkhin manlou in nii in hong
tumsan ding a bat maimah ziak in, Manlun paikik nawn di’n ka sawl hi.
Himahleh, Manlun a kik ut kei a,
Umang paikik dia nawn sawl lailai bang chi dan e ? Chi’n a heh dek zozen
hi. Man paikik nawn dah mai in chih kei leng ka ut mahmah himahleh lem
khinlou ahi, chi’n khem theih dandan in ka khem nung in leng a ut tuan
mahmah louh ziak in, a itlou, a ngailou le kihilou hi ven chi in, innlam
ah ka paipihta hi.
Inn lam ah ka paipih mawk hang in ka
lungsim bel a nuam thei mahmah kei hi. A nu a pa’n bang lunggel anei di
ua aw !! Gal kiguanphet ka suak dia aw, chih khong ka ngaihtuah zel hi.
Bang teng hi leh, itna ziak in poisak ka nei kei zel hi. Sawt simpi ka
paizoh nung un, khua ka tung ua, kei hon na kemtu hausapu ka pa tuk a ka
ngaih ahihziak in amah kiang ka tunpih masa hi. Hausapu’n leng a hon na
kipahpih mahmah a, nuam ka sa mahmah hi.
Lawmte’n moulopna, chih di hia bang
pen chi di ahia? Singpi awm na khong a hon nei ua, lawmte a joker diak
te bang in, tua singpi pen moulopna hilou in, Mangpu samat a lawmte’n ka
kipahpih uh chih etsakna ahi, Sabeng a kuan a hichi bang sa mat di
ahihleh, kei le zingchiah ka kuan pah di. Bang lou hiamhiam gen in nuam
ka sak mahmah sung un zan ana sawt man a mangpha kikhak in kong kikhenta
uhi. Phalbi zan eichouh lupna a votsa tak a lup khenkhon lai a puanpi
neih chu anuam tel mai. Zingkhua vakpah mai ahi.haha.
Khua hong vak a Lawinu chi tamai ni
toh sungte innlam ah thil omdan gen di thukimna kon la ua, ann nek zoh
in kong kuankheta uhi. Lamipi ah ka ngaihtuah na bel hon kaikhen
thouthou di un ka gingta a, ka lingu mahmah hi. Khua chu kong tung
petmah ta ua, ka diip in ‘kum 6. . . kum 6. . . . .’ achi zotzot mai hi.
Manlun te inn ah ka lut duldul ua, kisuanglah mel deuh in ka tanchin uh
a nu leh pate ka hilh ta hi….11na di leh abei na di tomchik omlai.
Ka gintak bang lou tak in, Manlun nu
leh pa ana siam mahmah ua, bang teng kikhelta hi ven. Nupa ki it dan
siamtak in nong khosa di ua, tu leh ta tampi suang di’n Pathian in hon
vualzawl hen, a hon na chi uh bang chu, ka kipahna genseng di ahi kei.
Manlun nu leh pa kiang ah kipahthu ka gen a, Manlun leng kipaklua sam
ahi ngei dia ngamkhat in hon bohphei a, hon kawi mawk hi. Ken leng kawi
thuk sam ding ka chih leh ngamkhat in ka khanglou a, lupna alum a
lu-kham kawi ka na hi maimah hi.
AW… KA ZALMANG TAK SIMTHU HI MAI LE CHIN ZAW MAW !! Chi kawm in ka thoukhia hi.
B……………….E……………..I………………….. T…………………..A…………….
©Siamsinna leh Vakiangbu
Comments
Post a Comment