A LAMDANG ITNA
By ~ Mang Tonsing
Khovel a mipilpen Kumpi Solomon’
lungbuaina, genchet didan theizoulou-a a kivialleh tuahtuah hiam
ahihke’h a tut melmul na ah bang di’n ei phiangsan i buailou zenzen dia?
Khovel a mipilpen lah kihi deklou phetlou ahai te-lak a simtel a le
ki-om kha banlou zo-mah! Huaiziak in, hiai a lamdang itna kichi chiang
fekfok a ei genkhiat leh suikhiak but di ahi dekneng kei.
Itna kichi a lamdang. A lamdan ziakmah in
mipilpa le a pil bu-kim kei. Laphuaktu’n “It le hang a mel a hoih;
mudah le a mel a sia” ana chi hial. Itna ziak in bangkim a buching. A
mit dang a chivom lian liahluah le itna ziak hilou hileh gen-le-sak di a
tamtel! A kalkualh, a mit let-lelu, a neu belbol, a gitlouh leh
phunhaat ban ah mi muh a a om dan hoihlou tengteng leng itna mit in a
liahkhuh. Itna ziak in a buching a, gensiat teitei na di thu himhim
khutchin vom chiah lelleng a om mahmah kei. A Aktuam sia ule hoih hina
maizen e, a pa’ sakhaupi sia toh!
Itna ah kipahna buching a om kei a, huat
leh mudahna ah leng a om ka chituan kei. Ngai dih – Hun paisa a pa-ta
kithatte leng itna ziak a kithat ahi uh, ka chi ngam. Apa’n khovel a
ninggawp a, hiai khovel lungzinna leh mangbatna paisan a-ut ngoihngoih.
Himahleh, paisan mawk leh ama’ sulnung ah a it mahmah a tate dinmun leh
khosak didan a ngaihtuah a… Sih mai utna lungsim a neih in lah paisan
tuanlou ahihna ah ITNA ziaka a it mahmah a tate a thah mailouh ngal
lampi dang a om kei. Huaiziak in, ITNA ziak liuliau in a it mahmah, a
sisan a piang ngawingawi a tapa 2 a that top maive! Lamdang lou. Itna
ziak in Pa’n a tapa sihtanpha a mualphouna chiteng thuak di’n a pe-ngam.
Itna guu a haattel!
Ahi, Itna kichi a ana omlou hileh hiai
khovel a laa leh tumging kilawm a om ka ging kei. Concert a thu
kigensiak ekh-ekh na om di! Huai le kisel ek-ek hiam kigensiat tuah
fokfok na khawng hizo-mah ve’n chin. Eh! Itna kichi ana omlou hileh i
piangmawk di! Ka nu-le-pa itna ziak in ana kiteng ua, itna ziak mah in
tuisik a kipan khoilet leh dopsang a om ing a…Huaile hilou, Pathian in
itna kichi ana neilou hita mawk leh…ka tei awwwww…! hilele, itna in zaw
hon su-genthei tel. Tamtakte’n itna guu thuakzou nawnlou in honna paisan
ua, tamtak mah in hinkhua ah siatloh in huai a, aval om laiteng in i
gentheihpih uh!
Laa lam ah k’ong kiik cheuh lai di. I
chihsa mahbang in itna kichi ana omlou hileh gingkilawm a om hauhkei di.
Itna ziak in gingkilawm nalh taktak a om a, gam ngaihla, latualleng
nalhtaktak i ngaihkhiak heuhheuh teleng itna laa ahi. Huchilou,
chimaile, kichamsak deuh a phuah (nibang hongtang mahle chin zong nang
ngaihluankhi daibang thengta!) te leng itna ziak a hongpawt ahi veve.
Itluat ziak in kingaihsiat a baihlam huan ah, itluat ziak mah in
kihamsiat khum-ek leng a baihsam mahmah. Pathian laa (gospel song) te
leng itna laa ahi lou tuan kei.
Itna ziak a taksa-pum phal chihkhawng
ningniang chuh a houtel. Neihlouh tantan le kiphal a. Mihing zum leh
kisuanglah theilou ki-omlou hi. Himahleh, itna taktak kha in a hon
matkhak chiang in zum leh kisuanlah chih ningniangte paulap theihvual
ahi kei, gen a nei sii kei. Itna in a hon maingal sak in hon kuhkal sak
a, huai mah thupi a neikawm in lohchinna in leng a hon nawlkhin thei sam
kei. Itna ziak in nikhat lelleng kum kivei a bang zou a, itna ziakmah
in kumkhat vingveng nasan leng nikhat lel toh a kibang thei.
Itna ziak in Tun-le-zua te’n
thousi-thouvai, vuahzu-daikai paulam in a neingei kei uh. Nidanglai
ngial in nu-le-pa te’n tate’ mel muman ngeilou ahi uh chihleng itna ziak
ahi. Huan, Tuailai tamtakte’n itna ziak in vangkhua leh sau tuangnung
siah in gamdai hon zotsan uhi. Itna ziak in sakluang leng i phal.
Huchihlai in itna ziakmah in i mihinpih tamtakte a genthei kholdiak uh.
Itna gusia nekha tam hina tel e! Thamlou in, zingkar a hotel a chiltui
kai zutzut zen a houlim kongkong te leng itna ziak ahi veve, itluat man a
sousang ahi lel uh.
Itna ziak in i lak ah anei leh neilou kal
kideidanna nasatak in a uang. Itna ziak liuliau in tamtak meikuang
paisuak phialphial in a om chile’ng chikhial sautel di’n ka kikoih kei!
Itna chikhat kia om ana hilou dan ahi. Itna ziak in ilak ah kigalbawl
leh ki-ngeu etna in vai a hawm. Itluat man in kituak diamdiam a tuibang
luankhawm na ding kawlni a suakkei nilouh. A suakmawk keilai zo-mah di,
it dan chituamtuam i hauhluat teektuuk ziak un. “Ngailou hile’ng ngai di
hi’ng a; ka ngai a ngailou keive” chih dan deuh in itlou hile a ningzu
houh i dawn baihzo d’uam maw??? Eh! Sau gen lo-dek kha manzel hang,
peppop, hun heh!
Itna zaw kipahna ahi kei. Kipakkawm a
lungkhamna; lam-en kawm a ginlelhna; nuikawm a kahna: Lunggimna hon
tuntu lel ahi. Huaiziak in, itlouhtheih himaileh ka chi ve!
17 August, 2013
©Siamsinna leh Vakiangbu
Comments
Post a Comment