NA NGAIHTUAH NGEI HIA?

By ~ Muana Guite

Nite khollou a pai ahih ziak in, hunte hong mualliam zungzung a, taksa hatna le hong kiamkiam hiaihiai a, i vunte bang leng hong duai lai ding ahi. I taksate chu guhvuak bang in hong omlai dia. I Mittte’n i khomuhna hong mang hiaihiai dia, i bil in thil a zak theihna hong tawm hiaihiai dia, i ngaihtuahnate bang hong mang hiaihiai dia………. huai hun chiang in lunglennate’n hon tuam lai ding hi.

 

Mihing Damsung :
 

Hiai khovel ah mihing in i dam hun ding i thei kei a, i dam hun leng midang a toh a kibang kei ding hi. Khenkhatte piantung in a mualliam ua, khenkhatte naupang chik in, khenkhatte’n tuailai lai in, khenkhatte upat nung in a mualliam uh hi.

Bible inle damsawt chu lunggimna leh sepgimna lel ding ahi ana chi a, huai ziak in lamsau tak zuihna din chu thuakzohna leh sepgimna, mangbatna leh lunggimna chu thuak zel a ngai ding hi.

 

Lametna :
 

Hiai khovel chu kap kawm in i masawn ngal a, hiai kahna gam chu bang hiam hih sawm in lametna toh malam hinkhua ding gel in i hun i zang hi. Hiai lametna ziak in i dam man a om a, huai lametna mah in i malam hinkhua ding hon pii hi. Lametna in i vanglai/tuailai hun i zang a, lametna mah in i hinkhua a tawp zel hi.
Na tuailai hun a na lametna mutaak dia na hinkhua na zat leh, na lametna chu a khonung a hon kipaksak leh hon khasesak tu ding ahi.

 

Ka tek ta :
 

Nisuak leh nitum tamtak ka mu ta, nipi leh phalbi tamtak ka thuak ta……. ka thahatna a beita, ka ngaihtuahna a mang hiaihiai, ka thilmuh theihnate a mial deuhdeuh ta, hiai hun chiang in ka hih theih a tawm lawta ding, ka gen theih om sun chu KA TEKTA chih chouh ahi ta.

Kum lam a upa hi mah le le, i theihnate a tawm luat ziak in i sang a naupang zaw te vaihawm khum ahi thei taktak nawn kei dia, nidang a zing nisuak i kipahpih mahmah te tu’n chu lunggimna lel hong hita dia, lawm leh vual di hong tawmta dia, i zak theihna atawm ziak in lawm leh vualte toh kipawl mah le, a nopna a om nawn taktak kei ding hi. I sih chiang in “PUTEK/PITEK SI” chi in hon vuiliam ding uh.

Huai ziak in NA NGAIHTUAH NGEI HIA ??? Na upat chiang a naa nasep theih a tawm mahmah di ziak in na Tuailai/Vanglai hun in naa a tam thei lam sem in la, nang sang a upa zaw te simmoh ken la, lawm leh vualte toh kipawl mah le uh nopsa taktak nawnlou uh ahih lam phawk inla, nang hun le hong tung ding ahihman in, na Tuailai lai in Upa te zahtak didan NA NGAIHTUAH NGEI HIA ???

 

©Siamsinna leh Vakiangbu