IITNA MITDEL ~ (Iitna tengteng amit dellou adiam ?)

By ~ Nasri Jona Tawmbing TxNâ

THUMAPI: Kei ka hausa a, kei ka siam a, kei ka pil a,,,,, chia, mahni kia a khosa thei, hiai khovel a mihingte lak ah kuamah i om uh a gintaak huaikei. A dikmah ahi. Mi tengteng kipoimoh tuahchiat i hih na ah, kisimmawh thei le kuamah i om tuankei. Dikna tanvou mihing khempeuh in i neichiat ahi. Ka lawmte khat (Lusei-te) hi, thugelh lunglut leh siam mahmah khat ahi a; huchia a thugelh khenkhat te, monthly magazine khat in, amah gelh dandan a gen in ahon suah a, ka lawmpa’n bangmah theilou ahihman in, ken le ka hilh ngal hi. A kipak vak kei a, phone a houpih ngal in ngaihdam ngen di’n a va phut hi.

Ana suah tute’n ngaihdam ngetna di’n sum tamlou apia ua, sum tamlou in a kingaidam thei vanglak uhi. Himahleh, aman haksa tak a, ahun manphatak seng a ana buaipih kha minhoihna le loukhalou a suak hi.

Siam in chingzou kei mah le’ng, i theih bangbang a, hun manpha seng a kigelh zelsam ahihman in, hiaibang thilte, eite lak ah hong tung kei leh chih a deihhuai mahmah hi. A hong tung leng a gintak huaikei. Kei ngei inle siamlou tak a ka gelh himahleh, fb group dang a post di bang, website lam a koih di bang, monthly magazine lam tanpha a suah di’n hon ngen nulh mawk ua, ka kipak petmah hi.

A gelhtu kiang a ngen sese lou in, amau ut dandan in bawl in, heilam dang in ana suah le u le, ken, bangchimah a hong mu a hong thei khollou maithei ka hi. Huchih lai a, adera kizahtakna langsak a na hon nget ziak un ka kipaak petmah a, hiai in, maban ah phurna naktak in a hon pia ahi. Huaiziak in kipoimoh tuah theivek i hi chih thei in, milian, mineu, azawng, ahau, apil, amawlte zong, kizahtak tuah chiat in, kuamah kimusitlou in, tua i paidan, i dikna tanvou kizahtak sak touzel leng, chih kon genmasa ahi.

———————-

 Khen – I

Zing ann nekham, “School khawlni ahihtoh,” chi’n nasem a, kilawh di’n ka hong kisa hi. Kisazou, kuankhiak sawm in, kongkhak ka hawng a, ka dakkhiak leh, suahlam apat, meipi tuitawi di hileh kilawm a, tumlam manawh a, a lomlom a, hong kizial vutvut ka mu hi. Meipi kilomzial vutvutte en in, kei leng paisuak mailou in, minute nga (5) khong etkhiak phot hoih ka sak ziak in, ka innluah sung ah ka lutkiik a, ka gintaak bang ngeingei in, sawtlou nung in vuah a hong zu-ngal hi. “Nasem in kuan kei leng, bang ka hih dia ? School khawlni sunsun, kideihthoh huaihuai maizen toh,,,,” chia kingaituah kawm in, ka lukham a, ka lehkhabu koih, sim di’n kong kisa hi. Huchia lunglut tak a, bangmah dang le ngaihtuahlou a, ka simlai in, tukverh a ka vadak khiak leh khua leng ana pha mahmah ta a. Sana ka etleh dak 10 bang peelta ahihman in, kei leng nasem a kuannawn sese lou in, ka laibusim ka sunzawm nawn hi.

Huchia, lunglut tak a ka simzel lai in, ka laibu sim ah, thumal (word) khat theilouh ka hon nei hi. Ka ngaih tuahtuah hang in ka theizou mahmah kei a, ka lungsim ah, “ka kilawhna a, ka sumkhol tamlou om hive’n, huai in dictionary ka lei mai di,” chi’n thupuukna ka bawl hi. Ka laibu sim ka sim sunzom zel a, sun singpi dawn hong hun a, mite bang a gas achihte uh neizou teilou ka hihman in, ka stove neuchik khat ka halkuang a, center fresh buuk a ka chini neih tamlou omlai toh, singpite’ tamlou toh ka kha hi. Mikhat dawn di, nou khat lel awm min na’ng in, minute sawm (10) lam mahmah hun a hong bei hial hi. Ka singpi awm ka dawn kawmkawm in ka laibu sim ka sim sunzawm zel a, singpi ka dawn khit in, tukverh ah ka vadak khiak leh, ka innluah khang a luitui sakhituihuup in ana hiip lellel ka mu a, neulai khong hon phawksuah sak sim mahmah mai hi.

Huchia, sakhituihuup hong langta ahihman in ken leng, khua aphat ka gingta a, ka poimoh mahmah, himahleh, sum ka neihlouh ziak a ka leingam ngeilouh, tua ka sum neih sunsun a dictionary leidi’n ka kuankhia hi. Ka innluahna apat gamla thou mahleh, niteng a nektawm zawng ka hih mai ban ah, ka laizilna a ka sumsen tengteng keimah ka kitum ngai ahihman in, taxi a tuang thei ka hi kei. Ka khe in ka pai zel a, dakkal khat phial mahmah ka pai nung in, Sikulpuikawn a Synod bookroom ka tung hi. Mi zakzum mahmah ka hih ziak in, a sung a lutngam zoklou in, a kong ah, sawtsimtak ka kingaihtuah a, “ka sumneih in adaih dia aw, ana daihlou bang hi zenzen leh, bang ka gen dia,,,,,,,,” chia sawt simtak lungsim buaitak a ka kingaituah sung in, vuah hong zu di’n a hong kisa nawn hi. Ken leng, vuah in hon nangman khak lau in, sih leh sih, dam leh dam chi’n zum leh zah khuallou in, bookroom sung ah ka valut top hi.

Numei melhoih mahmah khat in ana welcome pah a, “bang a na deih, bang lampang a,,,,,,, ? ” chia, bangbang hiam a hon dot nung in, ken leng, dictionary deih ka hihdan ka gen hi. Ka mel ah bang om ahia, chih ka thei kei, huai nu’n mundang enlou in sawt sim mahmah a hon en heuhou maimah hi. Amah lah paulou, kei lah paulou a sawt simtak ka ki-ettuah nung un, “om maw, omlou?” chi’n ka kanzui nawn hi….”eh ! om mah e,,,, kon pedi aw,,,,,”chih toh, room dang ah a lutsuak ngal hi. “Hiai a laibu kirem metmutte lak a omlou ahi di maw,,,, ! Huai innsung lamlam a va lut chih mawk,,,, bangteng hileh, a omlouh man a, a koihhoihte uh hon lakhe di hi’n teh,,,” chi’n ka na ngaak hi.

Midang, huai bookroom a nasem dangte’n bel hon muhle mulou hileh kilawm in, et leng a hon en kei ua, kei le bangmah genlou in, munkhat ah ka na tu maimai hi. Sawtlou nung in, ahong pawtkhia a, keilam hon en in, a hong nui siiuseu hi. Amel ka et vuak a le, kei mi zakzum, nuamlou ka na saksak maizen toh, keilam en a a hong nui zawmah lai pen, en ut pipi in, mundang ka etsan daih hi. Himahleh, amah mel ah, kingaih niamna anei chih haihvual ahi kei a, a hon etdan lah kei migenthei mai himahleng, ka haih hetkei, a ngaihhuai in, a nelhuai mahmah di’n ka gingta ngal mawk hi.

Himahleh, bangmah genthei ka hi kei, keilam manoh in a hong paiphei zel a, ka kiang a hong tun in, “hiai maw na chih,,,” chi’n nuikawm mah in a hon pia hi. “Dawrngakte hihdan mah ahi. Customer te mai ah, kipahmel musak kei mawk leh, kuan a va dawrdawr peih dia, hiai zaw khovel paidan mah ahi,” chia kingaihtuah kawm in, a hon laibu piak ka la a, ka laak kawm in, aman di zah ka dong ngal hi. “Rs 200 man ahi,,,, chi’n a hon dawng a, ka wallet ka lakhia a, ka sum neih tengteng ka phorhkhia hi. “Hiai teng maw na neih ? Hiai lakiik mai oh,,,” chi’n 100 note ahon pekiik a, Rs100 in hon leisak asawm mawk hi. “Hilou e, aman zah mah in kon leisak di, hiaiteng kia hilou e, ka sumneih zaw,,,,,,,” chi kawm in, Rs 100 piak kiik ka sawm a, himahleh alaak noplouh ziak in ken le penawn tuanlou in, ka siam bangbang in kipahthu ka gen a, ka innluahna lam manawh di’n ka pawtsan hi.

Vuahmal phin seihseih nuai ah, ka laibu lei a kawt-khak lau in, ka puanak nuai ah ka guangluut a, tailah hilou, hatsim tak in ka pai hi. Ka pai kawm in ka lungsim ah thil banglou teng a hong lang a, bangziak a hiai nu’n hon hichi deihsak mawk ahi dia aw,,,,, ? Bangmah ka theisiam zoukei, himahleh, laibu man a hon niam a, a tawm zaw a hon leisak chihna ahi mai, dawrkaite hihdan mah ahi,, chi’n ka ngaihtuah suk zel hi. Huchia ka ngaihtuahna ka kisual saksak kal in, ka innluah ka na tung kiik nawn a, ka luut phet in, ka laibu lei ka phenpah ngal hi. Denlam a ka thumal theihlouh ka en masa pen a, huai thumal khatlel ka theihlouh, ka theihtaak ziak in, ka laibu lei zong a lohching khat kong hipah hi,,, chi’n ka kingaituah a ka kipaak mahmah mai hi.

Ka laibu sim ka sim sunzawn nawn a, ka thumal theihlouhte theih sawm in, ka dictionary leithak ka vaphen zel hi. Huchia ka dictionary ka phenphen lai in a kar ah limlaak khat ana om mawk hi. Kuahiam khat in a wallet vel a akoih dia atepneu hileh kilawm in, alim teng langthei chiangchiang a kitepneu a, ahihziak a a lim bel sekha hetlou ahi. Lamdangsa tak in ka lakhia a, amel ka et leh kua dang hilou in, ka laibu leilai a ana buaipihtu nu lim ana hi maimah hi. Lamdang sakna’n ka pumdim ngal a, “a thak hi zenpi a bangdia hiai limlaak ana omthei mawk adia aw,,,,ahih keileh amah zatlai khonghouh hon pekha ahi dia aw,,,, ! ” chi’n limlak ka en-en mai hi. Amel leh pian khong bel soisel na’ng khat le ka mukei, van a angel a gengente ule, hiai kan in hoih tuan kenteh chih di khop a hoih hi’n ka thei a, ka velvel nalam ah, a nunglam ah, phone number (0389*******) ana om zawmah lai hi. Huai hunlai a tua i zat, mobile chihte om nailou ahihman in, ken le a inn number uh hi di’n ka gingta a, “ahih kei lelah kuahiam khat in amau number apiak hi’n teh” chi’n, ka ngaihtuah hi. Phone ding chileng pco ngai, pco ah va phone leng ka sum neih sunsun hong kiam zel di, ann ngawl alah omthei samlou ka hihman in, ken leng ka pheenkhakna mah ah ka koih kiik nawn hi.

Nitaklam neekbawl hong hunta ahihman in, phurlou tak mai in, mikhat neek di bawl di’n kong kisa nawn hi. Ka anntang koihna ka et leh, ni 2/3 daih di kaan omlou ahihlam ka thei a, a guuk tak in ka lungkham mahmah mai hi. Bangteng hileh, ngawl theilou ka hih chiah chi’n ann huan di’n ka kisa a, “banghiam chia, kidaih mahmah lou dia ka om leh, class ka off dia, ka kilawh zaw mai di,,,” chi’n, ka ngaihtuah thak hi. “Ka nu leh pa’n kei mah a lametna lianpi nei a, khopi a laisim dia hon koih uh ka hihman in, ken leng haksa bangteng thuak kihuam in, ka simtou zel dia, chik ni chiang hiam in, ka lawhchi’n ni a hong tung dia, huai hun chiang in, tua ka gentheihnate bang lawmlawm hi nawnlou in, ka class a hon simoh mahmah te’n zong hon simmoh nawn sam kei ve un teh,,,,” chi’n ka kingaihtuah hi. Himahleh tua, nektawm zong a, kilawh tawm a ka laizil ziak a hon musit mahmah te leng, kei ngaihdan in bangpi ahi tuan sam kei uh. Nu leh pa sepsuahsa a kila lian, class khawlni kia le deihkhop lou a, taiguuk hat taktak te ahi zawmah lai ua, khopi mi a ki chihchih hang un, singtang a khangkhia, kum 3/4 lel khopi a om tei pan chauh, ahihman un ka ngaisang lawmlawm tuan samkei hi.

Huchia banglou teng ngaihtuah kawm a neek ka bawl lai in, ka in kongkhak hong ki kiiu a, ka lawmpa a hong lut hi. Ka lawmpa ahihleh, mi kiphahniam mi mahmah ahi a, a khosakna uh ngaihtuah in, a omdan toh a kikhai mahmah mai hi. A deihdeih neithei, a duhduh ne thei hinapi, kisaktheihna neuchik leng a neikei a, a khen chiang a zu a dawn zeuhzeuh louhngal, dem nang himhim ka theikei. Sawtlou a tut nung in, ken leng ka neekbawl ka zou a, ka lupna tung a tukawm in, ka hong kihoulim maimai uhi. Banglou teng gen a ka kihoulim lai un, sunlam a ka laibu lei kar a ka a limlaak muh thu ka hilh a, aman le, en ut ahihman in ka ensak pah hi. Amel ah lamdang sakna a hong lian mahmah mai a, paulou a amah ka etlai in,,,,”hiainu, nungak fel mahmah khat eive, nidang in ka na kithuah sek ua, a nu’n Synod bookroom ah a sem a, apa ahihleh teacher ahi,,,,” chi’n ahon gen hi.

Ahihleh, bangziak a hiai dictionary kar a alimlaak ana omthei ahi dia,,,,,bang chidan hithei di ahia,,,? Chia ka dot leh, “ka theibiik kei, anu koihkhak khong houh ahi diam maw,,,,,? “Tuni laibu ka valei pen le amah ana piak eive,,,” “aw, anu taang a vakuan hi’nteh maw, bangteng hileh, amah ka na houpih dia, thil omdan ka na dong di aw, laibuthak kar a limlak mangngilh chih omthei kei leh kilawm, chi’n a hong nuikhe huahua a, “hon star chihna himai aka,,,,,,” , hiai bang a meilhoih leh piannalh, fel zawmah lai chi na hih chiah, kei niteng a kilohtawm, silh-le-teen chu genlouh, neek di nei hamham hi’ng a, bangteng hileh ana phone sak himhim le chi’n. Kei lah tuni a kilawh a kuan di ka chih leh, khua hong siat ziak in ka kilawh thei si ka. Nang ana phone sak mai ve maw,,, chi’n ka lawmpa ka ngen hi. “Awle, bangteng hileh ka na phone phot dia, ana hope sang law kholkei lechi’n,,,,” chih toh innkong a pawtkhiak a thuah hi. “Mamuan,,,,,,,bangchi phone sawm e, hiai a number lah na la hetkei a, chi’n ka sam kiik a, amah le phone number la di’n a hong kiik nawn hi. Ka ki hope zenzen kei, ka theihnop peen ahihleh, bangziak a hiai a limlak ka laibu kar a ana omkha mawk ahia ? chih thei ut mai ka hi,,,,, neeklim aw,,,,,chi’n ka kikhen nawn uhi.

Zingkhua hong vaak a, college ah ka lawmpa Mamuan toh kong kimu uhi. Ka muh phet in ka dong ngal a, bangmah genlou in sawtkuam tak ahon en hi. Gen mengmeng ve,,,, bangchi dan a alimlaak ana omthei mawk ahia, denchiah ahilou lam khong in ahon ngawh kha di chih lau ka hi. Mi limlaak guu di hial a zaw, guuta hilou keive,,, chi’n ka nui naanalh hi. Ehemmmm ! Jo, hichibang khong kituak kha samleh nuam di hive’n maw,,,,, zannitak in ka na phone a, nang mahmah hon houpih nuam ahihdan ahon gen a, ahihleh bangziak a limlak ana om kha mawk ahia,, chia ka dot leh, “ka kimuh chiang un ka hilh mai di” chiteng in ahon dawng a, ken le bangmah genlou in, ka koih san hi,,,, chi’n a hon dawng hi.

“Mamuan,,, hichibang mi fel leh changkang ken ka mu mawk thei kei, ka dinmun toh amau dinmun, lei leh vaan kikhiat bang a kikhia ahi,,,,, thudik hon hilh mai ve maw,,,”chi’n ka dong hi. “Thudik ahi ka hon hilh, zuau ka hon hilhlam na thei ngei a hia,,,,?” chi’n hehdek hileh kilawm in ahong pau khia a, kei leng ka daisuk mai hi. Luutna dak a hong ging a, class ah ka luut khom nainai uhi. Class laaklai teng in leng ka lungsim anuam thei mahmah kei, nileng a ka omdan nuamlou ahihman in, ka pau kei a, munkhat ah ka tu maimai hi. Ka lawm dangte’n zong ka omdan ahon muh chiang un, damlouhna nei di’n a hon ngai ua, a hong dong kheukhou hial uhi. Class tawpnung in leng ka lawmpa’n bangmah a hon gennawn tuan kei a, kei leng ka kisuanglah man in, bangmah ka gen kei. Ka inn luahna lam manawh in ka pai vengveng a, inn ka tu’n in, hih di poimoh omte hih di’n ka kisa nawn hi.

Hun leh ni te liamzel mahleh, ka lawmpa Mamuan in, huailamthu bangmah hon genpih kha nawnlou ahihman in ken zong bangmah ka gen nawn tuankei. Inter Village football tournament final ni di ahihman in, kei leng, Lammual lam manawh in ka pawtkhia hi. Gate bul a ticket la di’n ka kisa a, ka la zou, nunglam ka et leh, helmet tawi a, keilam hon en a ding lai, huai limlak ka neihnu ka mukha mawk hi. Mulou dandan a om in, gate ah lut ka sawm a. Himahleh a hong pai phei a, ka min le theilou ahihman in, ” Kon houpih zual thei diam, gen di poimoh khat ka nei a,,,,?” chi’n a hon houpih hi. Bangthu hita ahia ? Bang a na gen ut ? chi’n nuikawm in ka na dawng a, kimawl etsawm na hihleh, keile kimawl en dia hong kuan ka hi. Ka veng te uh a kimawl dek u toh, ka sungte ka nget leh a hon phal vanglak ua, chi’n ticket a va la a, gate sung ah ka kizuilut uhi.

Tutna dia kibawlte ah ka tu ua, pasal peen, pau masa lou omtel, chi’n a vengte uh, kimawl a siam ka sakdan khong ka gen a, amau kimawl ka muhnop man a, a endia kuan ka hihdan khong ka gen hi. “Tangval, na chih simsim te kimawl khadek uh hi’n teh maw, na ngaih poimoh dan,,,,?” Chia ka dot leh, huai lam le hikei, ballpeek et khong nuam ka sak ziak himhim a hong pai ka hi. Ka gintaak louh tak in, i kimu mawk a, ka,,,,,,,,,chiteng gen in, hong tawp leuhlouh hi. Gen di dang neilai ahi dia aw,,,, chi’n kei bel bangmah genlou in, ka tu hi. A diktak in chu, pasal himahleng, ka zaam a, ka chi khawng liing peppep in ka kithei zou hial hi. Himahleh, ka kidem kei, kei a di’n ka kiang a nungaak tu, a sang in, ka zahtak em a hi. Ka zahtaak luat man le ahi maithei, a limlaak ka neihlam le ka na thei pha nawn kei hial hi.

Player te leng field sung ah a hong luut panpan ta ua, kou leng, ka kiang ua omte le ngaihtuah sese lou in, ka hong kihoulim san uhi. “Eh,,,, i kihoupihpih na a, min le bangmah kitheilou a, hichi kihou pihpih mawk,,, diklou ahi, chi’n, amin ka dong hi. A min tawn ahon hilh a, “Christy chi’n ahon sam sek uh. Nangla bangchia kon sam di, na min non hilh thei tei diam? Chi’n a hon dong a, ken leng ka mintawn ka hilh a, ka lawmte’n “Jo” chi’n a hon sam uh chi’n ka dawng hi. Min khawng ka kihilh nung un chu neukhah in ka kineel deuhta uh hi’n ka thei a, zumnate le adan hong omta mahmah hi. Mipi kimawlte awng a, a kikou zuauzuau lai un kou gel bel thildang daih ah ka na buai mahmah mai ua; Christy in, “zanlam a dictionary kar a limlaak na muhthu, na lawmte khat in a hon hilh a, ahih theih leh hon pekiik le chi’n chi ka hi. Bang chidan a huai laibu kar a ana omkha a hiam chih ken le bangmah ka thei kei.” Chi’n a hon gen hi. Hitham e, ken le lamdang ka sa khopmai, laibu thak kar a limlak ana om mawk ka theisiam kei a, na deihlai ahih ka gintaak ziak in, ka muh dandan a kemlai ka hi. Kon pekiik di chi’n ka dawng hi.

Goal……….. Chia mipi kikou zuazua te’n thakhat a hon halhsak guih hileh kilawm in, kougel leng, field lam kintak in ka en ngal ua, Christy vengte’n goal khat ana khum uh ahihdan ka mu uhi. Vanlam meipi’n a hon boh nawn liikleek a, vuah hong nai nawnta ahi chih haihvuallouh in, khua hong niim hi. 1as half lailai in, kipai maileh, denchiah vuah khong hong zu dia, taxi fair di lah ticket man a zang gaivek ka hih chiah, khe a ka pai thouthou ngai di, chi’n ka kingaihtuah hi. Huchia ka kingaihtuah lai in, “Jo, kuhva na ne diam, chihtoh, kuhva pack piak a hon thuah a, Christy ka kipaak lua, ka nedah mai di, ka duhtha suaklou phot,,, chi’n ka dawng hi. A guuk a ka lungsim thei hileh bel, ahon theisiam dia, na utleh ana paiphot maive,,, a hon chi ngei di. Himahleh, pai ut thou mah leng, Christy kiang a om nuam ka sakna khat a om hi. Aziak bel a polite a, apau ut zawkmah toh. Paikhiaksan di ka lin hipeen in ka thei hi.

Christy in, ka sum neihlouhdan hon thei hileh kilawn in, Jo, cigarette na teep nuam hia? Bangte a na teep sek, kon leisak di aw,,,,, ? chi’n, cigarette zuak tunu kiang ah a va pai phei pah hi. Christy, cigarette ka teep ngeikei, hon lei koh, chi’n ka hilh pah a, amah le bangmah genlou in, ka kiang ah hong tu kiik nawn hi. Jo, ka limlak la di’n na inn uah ka hong hoh di. nang nawn piak mankei khak leh, chi’n a hon gen a. Ka kiguih zou hial hi. Christy ka inn luahna ah hong hoh mawk leh, vokbuuk chiah lek inn a teng ka hihlam hong mu leh, bangchi ngaih in a hon ngai dia ! Bangpi hikei mahleng, a hon simmoh khak ka lau ahi. Himahleh, ka dinmun diktak bangchi mah in ka selthei si kei. Christy, hilou ahi, hun remchang dang ah kon pe mahmah di. mangsaklou di ka hi. Chi’n suanlam ka bawl a. Himahleh, deihkin ahihdan a hon gen tak in, ken le ka dinmun bangkim ka hilh vek hi. Ka innluahna omdan tengteng ka hilh leh. Mamuan in bangteng hon hilh vek ahi. Kei le bangpi ka hih tuanlouhpi, huai mahni kizahpih chih khemkhem, nang leh nang na kichawmdan khong, ngaihsan huailua na hi. Chi’n a hon dawng hi. Christy in a hon gen sunzawm nawn a, vuahkhong hong zuk khak leh, i pai mai diam ? Kou vengte le vualzou mahmah un te, chi’n, pai di’n, Christy scooty nung ah pasal ka tuang ahih chu, huai hun a ka zumdan leh, nuam ka sak louh dan, tuigai thei hileng ka tuigai zou hial di’n ka kiging. Himahleh, amah a fel a, a polite ziak in, ka thuak hamham hipen in ka thei.

Ka innluahna neu leh simmoh huaitak sung ah ka lut ua, bangmah dang genlou in a limlak ka vala a, ka pe ngal hi. Paulou in a hon sang a, paimai lou in bangbang hiam gen in atu khawmuang hi. Sawtlou ka kihoulim nung un, paisawm in a hong dingkhe phut mawk hi. Ken leng innkong tan kha di’n ka zuipawt ngal a. Innkong ka tun un, vuah zuktamluat ziak in a pai thei kei a, innsung ah ka lutkiik nawn uhi. Christy singpi dawn in aw,,,, chi’n singpi awm di’n ka kisa a, ka chini bei ahihlam ka thei khia a, aman zong hon theisiam ahi ngei dia, “Jo, a khumlou in, hon bawl oh, aw, a khum ka dawn ngeikei chi’n a hon gen hi. Huaitung a ka kipahna a thupi ngei mai. Neuchik a mualpholou ka hihman in, ka lungsim a guuk in a nuinui mai hi. Singpi nou nih ka tawiphei a, tutnang mumal le neilou ka hih man in, stool ah kei ka tu a, tutphahsau, a rong le theihkhen nawnlouh khop a luui, vom ngimngem tung ah Christy a tu hi. “Jo hiai ka limlak pen nang ana kol maive, chi’n a limlak a hon pia a, lamdang ka sakluat man in ka sang kei a, amah ka en maimah hi. Gennop nei hileh kilawm in, a gawl a hon khuah a, “Jo, huai laibu lei dia na hong hoh lai in ka hon muhdan leh ka hon etdan, ka omdan tengteng na theisiam vek di’n kon gingta. Numei ka hi a, genlou di chimah leng, ka sung a hon nawh tuttut tu om hileh kilawm in, a hon nawh tuttut mai hi. Numei zumna neilou chia na hon ngaih lele ana ngai mai inla, zum leh zah le khual zou ka hinawn kei. Kon ngaina a, ka lungsim tengteng na luahdimvek hi’n kon thei. Laibu lei dia na hong lut tung apat ka na en a, na mizia leh na omdan apat kisuanglah meltak a na hong lut lai khong ka na mu a, huailai apat a hon veipan ngal hi’n ka kithei.

Na hon houpih theih nang chi’n ka lungsim ah, tua ka thil hihdan ahong lang a, ken le huaidan ahihmai ka hi. Himahleh kilamen tak a ka om-om hang in na hon phone ngei si kei a, zanlam in na lawmpa’n a hon phone zenzen a, huailai in leng gen di leh genlouh di sawtpi ka kingaihtuah hi. Himahleh, nanglak mahmah a gen hoih ka sak ziak in bangmah genlou in ka om a. Ka thumna tanpha ah, nang ka hon muh nawn theih nang in ka ngensek hi. Khatvei mah ngaihzawng ka nei naikei a, tangval vei chihte le ka nei kha ngei kei hi. Himahleh, nang ka hon muhtung apat in ka lungsim tengteng puakkham hileh kilawm in ka thei hi.

Christy, na hon muh leh na hon theih bang maimai ka hi. Hon en vengveng le chin, ka gentheihdan khong, pianphung ale, kuamah phazoulou, nang mi hausa innkuan apat khangkhia, deihdeih nei a, duhduh nethei in, kei niteng a kilawh a nektawm zong, bangchi’n na hon iit thei mawk a,,,,, thil hithei hilou ahi. Kingaihtuah chiang inla, keilou, mi hausa taktak, laisiam taktak, pian leh phung a le sit huailou tampi mu di na hi. Denchiang a na kisiikna ahih khak di lauhuai sa ka hi. Kei ziak a kisiik tak leh khase tak a na om hoih salou ka hi. Chi’n ka dawng hi.

“Jo, na gen dik khopmai, khovel ah mihausa leh, misiam tampi a om uh, a diktak in gen leng, tu’n kum 21na ka zang lellel a, hon deihtu leh hon beemtu le ka na tuak thamta hi. Himahleh, kuamah gintak di le ka thei kei a, deih a gen di le ka nei kei.

Huaiziak mah in ka lawm leh vualte’n le, lengkuul di na hi, pasal na ngaihsak kei lua,,,, chi’n a hon taitai sek uh. Himahleh, ka pasal/koppih di zaw ken bangmah ka theikei, Pathian in a hun tak a honpe na di ahi. Huai di’n ka thuum teng in ka ngen a, gingta tak in ka ngaak hi. Chi’n ka dawng zel hi. Huai ka thumna a ka na nget sek mah bang in, khovel a ka mi ngaihnat zawng nang ka hon tuakkha ahi mai a, hiai thu ah, na utleh hon dem in, hon mawhsa mah lechi’n khawk ka sa kei. Huaiziak in, na hon deihlou ahihleh suanlam tuamtuam bawllou in, thu chiang tak in hon hilh mai lechi’n chih deih ka hi…..” Chrisrty suanlam bangmah ka bawl zenzen kei,,,,,,”, chia gen sutzop ka sawm lai in a hon paukhalh a. Iitna i chih, neihleh lam ziak hiam, pian leh phung ziak hiam hilou ahi. Jo, ka gensa mah bang in, mihau, misiam iit thei hileng, koppih ka nei tham ta di, a hauh ziak uhiam, asiam ziak u hiam a iitna pe theilou ka hi. A hih keileh iitna omzia theisiamlou ka hi hia leh? Jo, iitna kichi a omzia hon hilh ve,,,, chi’n aw liing pepep kawm in a hon gen hi.

 Khen – II

Christy tua iitna na hon gente kha; iitna diktak himai lou di maw,,,,,! Kong bangkim ah nang ka hon phu kei a, ka hon phulouhna teng le ka genkhin vekta, huchi kawm pipi a na hon iit taktak ahihleh, ken na iitna nial ka sawm zenzen kei. Ahihziak in, denchiang hun ah, ka gentheih ziak in haksa tak in ka hon omsak kha dia, huai hun chiang a na hon muhsit khak lau ka hi. Tuadan a iitna na hon piak a ka hihna bangbang na hon pomtheih di leh, khovel a mi vangpha pen ka hi hial di,,, chi’n nui kawm in ama lam ka enphei a, thakhat a hong dingkhia in, ka kipaak lua aw Jo chi’n a hon gen hi. A kisuum ahi chih ka thei, himahleh, asia leh apha a theihna ziak a kisuum hamham ahihman in, “Christy, kei le ka kipaaklua,,,,” chi’n a ngawng ah ka vakawi hi. A khatveina ahihziak hia, ka kineel kei ua, sawt le kipomlou in, ka tutna chiat uh ka naih nawn uhi.

Kipaktak in, bangbang hiam gen in, ka kihoulim ua, vuahzu le theuta ahihman in,Christy zong innlam pai di’n a hong kisa nawn hi. Innkong a a scooty koih, vuahzuk ziak a kawtvek ahihman in a nulhul na’ng ka towel ka pia a, a nulhul khit in, a innlam uh zuan din a hon paisan hi.

Innsung ah ka luut a, kipah di hia, dah di,,,,,? Chihle theikhen lou in ka om helholh hi. Ka phulouh leh, ka damsung a tuak kha dia ka kigintaak hetlouh thil tuakkha ka hihman in lamdang ka sa petmah a, bangteng hileh, “Kei zaw mihing mai ka hi a, ka sia leh pha theihna in bangtan mah hon tunpihlou di ahihziak in, kou gel a di mawngmawng in thuumna kon nei di,,,,,,” chi’n, ka room ah ka luut a, ka lupna tung a khukdin in, Pathian kiang ah, kilatkhiakna ka hon nei hi. Thumna ka neikhit in, neekbawl di’n ka kisa a, thil bangteng hih in bawl mah leng ka lungsim tengteng Christy in a luahden hi.

Hun hong pai zel a, kou gel inle kimuh theihdan ka hon nei panpan ta ua, ka lung uh amuang in, ka kipak thei mahmah mai uhi. Ki-iit leh kingai taktak ka hihman un, ka kimuh chiang un ka aam un, ka kikhelah thei mahmah mai ua, huchia kikhelah tak a kong om chiang un, lungsim in zong ahiloulam mah hon ngaihtuah kha sek hi. Himahleh lungsim a huaibang ngaihtuahna a hong piang chiang in, Christy in, Pathian min in hiai bang thilte hihlou di’n a hon ngen zel a, nupa hihma a hih hoih a saklouhdante a hon gen a, ken le Pathian min a ahon ngetnate zahtakhuai ka sak ziak in ka tawpkiik zel hi. Nikhat houh a sungte kuamah omlou ahihman un, ka innluahna kiang a pco ah ahon phone a, kei leng nasem a ka kuanlouh ni ahihman in ka va pawt hi. Amah kia’n ana om a, kiteng di tanpha khong a hon gen mawk hi. Himahleh ken bel tu dinmun a hithei nailou ahihdan in ka dawng zel a, huai ni a Christy paukam in hon kipaksak mahmah mai hi. “Haksa i thuak khom dia, nuam ah nuam i thuak khom di ahi, hiai ahi iitna taktak…….” Chi’n kei ama sang akum nga (5) lam a upa zaw himah leng a hon thuhilh tautau hi.

A paukam piching ka sa a. Himahleh kei ziak a ahaksa thuak di ka phallouh ziak in, ka nial teitei hi. Huchia ka nialnial leh amah a ngaihdan hong hi nawnlou in, “Hon iit taktka lou neive maw, neih le hon nei ngamlou,,,,,” chi’n hong hehbawl maimah hi. Khem theih chiteng a ka khem nung in a hong lungkim thei nawn a, kei leng sawtpi omta ka hihman in ka inluahna lam zuan di’n ka paisan nawn hi.

Ka kizuihna uh, kum khat bang chingta ahihman in, ka kimaingal un, kei leng a inn khawng uah ka tangneelta mahmah hi. A nu leh pa kia hilou, a sanggamte’n zong ahon ngaina mahmah mai ua, lehlam ngaihtuah in, ka dinmun uh a kikhiat luat ziak in zumhuai sim mahleh, a inn ua pawt bang le anuam tuan mahmah hi. School lam ah ka laisinna bel, kihihbuaisak ka sawmkei a, akhenchiang bang in, pawt dia a hon zot nate khong ka nial hun a tam mahmah mai hi. Huai hun chiang in le ahon theisiam thei mahmah a. Kuhkal tak a zirtou zel di’n a hon hasuan zel zensam hi.

Exam naang hong nai mahmah ta ahihman in, Christy toh ka kimuhlouhna uh le hun sawtkhop ahita; phone a ka kihou louhna uh le sawt mahmah ta ahihman in, chi’n nikhat, ka sum neih sunsun in, ka iit leh ngaihpen, Christy phone di’n, ka inn luahna khang a pco booth ah ka luut hi. A inn number uh ka dial ngal hi. Khatvei a ki ring quit a, ka dial thak nawn hi, anu’n ana pick-up a, kei le ka kigen pah hi. Himahleh, anu’n Christy houpih theihlouh ahihdan a hon gen a, bangmah dang genlou in a hon koihsan hi.

“Ka Christy bangchi ahi dia aw,,,,! Damlouhna nei ahi dia aw,,,,! ” chi’n ka lung abuai mahmah mai a, call thak di’n lah, ka kisuanglah a, “abuailai uh hi’nteh” chi’n, ngaih pha ngellou in ka kiik hi. Nithum nung in, pco ngaktu nu’n naupang a hon samsak a, kei leng kintak in ka diangsuk ngal hi. Phone ka lak rualrual in, ka Christy aw ngeimai, hun sawtpi zalou a ka na om, ka zata, “Jo na damzel maw,,,,? Na man leh hong pawt zualve, kei kia’n ka om a, gen di ka haulua a, phone apat in gen leng lah sawtpi gen ngai dia, ka phone zatlam ka pate’n hon thei le uh, hon tai nawn ek di ua,,,,, na class laak na awlmoh chihchu ka thei, ahihziak in, hon ngaipoimoh inla, hong hawh teitei maive maw,,,” chi’n phone a koih ngal hi.

Ka Christy in bang gen-ut ahi dia aw,,,, nidang a hichibang paukam zang ngeilou, class ka off le phal ngeilou in, hichia a hon nget man in ngai poimoh louthei ka hikei, ka Christy mu di’n ka van neihte lak a ahoih penpen te kithuam in, a inn lam uh ka manawhta hi. Kho-ul kai phingpheng kawm in, a inn uh ka tung a, kongkhak ka kiiu a, ka Christy ngei mai in, inn kongkhak a hon hawng hi. “Jo hong luut ou,,,, na hong hohthei a, ka kipaklua, hiai lamah i tu di,,,” chi’n sitting room ah ka kizuiluut uhi. “Jo, ka sungte pawt a hong paima ua na paikiik ngeingei ngai di ahi,,,,” a hon chi a, thil omdan ka theisiam hetkei hi. Nidang a kei hon paakta, kilawhtawm a nekzong, kilawh tawm a laizil ka hihdante a hon phat gige ulah ahi ngal a, “ka sungte hong paima a na paikiik ngai,,,” a hon chih pen ka theihsiamlouh man in ka dong ngal hi. “I kimuhlouh kar in, huai khang a, tangval (putek) pa’n a hong heel-heel mai hi. Himahleh, ken lah ngaina theilou, phetlou a nang hon phatsan thei ka hihlouh man in, a hong pawt chiang khong in, ka room ah ka na luutsan zel hi. Huchia, alak a beiseih theih a ka omlouh ziak in, ka nu leh pate kiang ah ana gen a, ka nu leh pa’n le, officer ahih tawh, ka pasal di’n a hon deihsak mahmah mai ua,,,,,amah ngai di’n a hon genden uhi.”

“Himahleh, ka nu leh pa thu, nang ziak in ka nial a, himahleh ka nu leh pa’n bel, hon kiteeng luihsak sawm uh ahi. Huaiziak in, hun remchang hon ngaihtuah inla, i kitaipih ngai di ahi, tukar bak hun nei nawnlou i hi,,,,” chi’n diip-hawm meltak in a hon chi hi. Ka paukam zak in a hon zou mahmah mai a, ka gen di pen le theilou a sawt huntak ka kingaihtuah nung in”Christy, kitaipih chihte hithei mawk dia hia ? Ken ka pianthak tuung apat a, Pathian kiang a zi, a guuk a neilou dia ana kichiamkhin kei voi, bangteng hileh, thumna toh i pang dia, ken le ka theitawp in, na nu leh pa kiang ah ka na genpih dia, nang le ana genzel lechin, a hon hihluih uh ka gingta hial kei,,,,” chi’n ka dawng hi. “Jo, na gen zaw dikthou mah e, hilele, kei zaw ka beidong ahita. Ka utlouh thu leh ka deihlouhthu vuaitam ka na genta a, himahleh, a hon ngaihsak kei ua, “Na neih di ahi,,,,nang makhua ka khualna ziak uh ahi,,,, chi’n, nang le paukam na taktak hon kou uh eive. Ka lungsim a nna petmah,,,,” chi’n a biang ah a mittui hong luang hial hi. Ka Christy mittui hong luang ka muh in, ka lungsim tengteng a danglam zou hial a, tu mahmah a guuk khiak khong ka ut hial hi. Himahleh, Pathian mai a ka thuchiam zuausak thei ka hikei chih ka kithei a. “Kap mai lou in, i nih a, i pangkhawm ngai ahi. Christy, na kah mawk leh bangmah phatuamlou di, i maban sah lawlai ahi,,,,,” chi’n ka khem kawm in, a biang a mittui luang ka nulsak hi. Christy zong hong tawp thei vanglak a. “Christy, na sungte le hong pai uh hun dekta inteh. Ka vapai phot dia, lungmuang tak in ana om in aw, sihna loungal in hon khen lou di ahi,,,, chi’n pai ka sawm hi. “Tu nitak, nong pawt ngeingei di, ka sungte’n, ka phone zat dile hon phal nawnlou uh ahi,,,,,Jo omnuam aw,,,,” chi’n ka kikhen nawn uhi.

Ka ngaihtuah na tengteng a buaivek a, Christy, ka muhtung apat a ka ngaihnat mahmah, chaanthei ka hikei, ka Christy a di’n ka theitawp ka suah dia, thuak a ngaih lele ka thuak mai di, chi’n ka kingaihtuah hi. Ka hih di peuh phurna bangmah ka neikei a, ka ann kam nangawn alim kei. Phetlou in, lai sim dia ka dohkan ma a ka tut chiang inle, ka lungsim ka pethei mahmah kei a. Bang teng hileh, a nu leh pa ka houpih phot ngai ahi, chi’n thupuukna ka bawl hi.

Nitak ann nekham, ka Christy te innlam manawh in ka diangkhe nawn hi. Nitak dak 8 lak in a inn uh ka tung a, a innsung uh ka lut phet in, kei ngaihbel ziak hia, chih ka theikei, lamdang sakna ka nei mawk hi. A sungte’n nidang ka pawtchia ana kipahpih mahmah sek uhia, huai nitaak in bel kuama’n a hon houpih kei ua, tangval upa lamdeuh khat, chikmah a ka muh ngeilouh ana om hi. Amah toh kihoulim in, ana buai mahmah mai ua, a kihou uh ka zaakdan in, Ka Christy gengen pen hi dia gintakna ka nei ngal hi. Kei le munkhat ah ka tu a. Ka Christy mel muh di a-om kei a, a u nu kiang a ka kan leh, room a om ahihdan a hon hilh hi. “Hong tukhe dia ka sapsap hang un a hong pawtkhe nuam hetkei a, nang vasam lechi’n hong pawtkhe pah di eive,,,,,” chi’n a u nu’n Christy sam din a hon sawl hi.

Keile kimaingal sak tak in, Christy room ah, Christy sam di’n luut ka sawm hi. Huchih laitak in, apa a hong paukhia a, ka min a le hon sam lou in,,,,,”Hey,,,,, huai lam a bang hih a luut sawm na hia, maingal na chia ? Tu tantan harh nailou maw,,,,? Christy in bangmah genlou a maw? Hiai na mu hia,,,,, ?”chi’n huai tangval upatmel takmai kawk in, ka tanu, Christy pasal di ahi. Tuban hong lang nawn het kawh, hiai inn a na hong lang a, ka tanu na hong hihbuai nawn ahihleh, ken le ka hon dawm nawn kei di,,,,” chi’n a hon tai gugu hi.

Kisuanglah tak in, ka kiik a, “tut di a hia, pai mai di,,,,,?” chi-a ka kingaihtuah lai in, room apat Christy a hong pawtkhia a, ka kiang a hong ding in, nuihmai tak in a hon houpih pah hi. Himahleh, Christy mel ah, dahna leh lungkhamna a nei ahi chih ka haih kei, a ziakbel, nidang a amel putdan toh, huai nitak a mel putdan a kilamdang mahmah ziak in.

A pasal dia a chih uh a hong pau a, “Christy, hiah kei kiang ah hong tuve, tuni nileng namel mulou ing a, hon kingai lawta eive,,,,,!” chi’n a hon gen hi. Christy in bel paukam khat inle a dawng kei a, pai leng a va pai tuan sam kei hi. Huchih lai in a sanggamnu’n, huai tangval upa (officer pa, chi’n gen ta di aw) kiang ah, “Nang le, Christy in a hon deihloudan tengteng thei zenpi, bang dia hong beisei gige na hia aw,,,, mi nungak tangval ki-iitna hihsiat sawm a hichi gam tatat di ahia maw,,,,, ana kiteeng hile u chin le, kipak taktak om tuanlou di neive ua,,,,,” chi’a a hon gen leh, Christy pa hong heh a. A tanu naktak in a hon sal gugu hi. A salh khit in, Christy toh lum di’n a sawl zui ngal a, amau le apa lau mahmah uh ahihman in, lum di’n room ah a hon luutsan uhi. Christy ngaih pha theilou ahi ngei dia, sawtlou nung in room apat a hong pawt kiik a, “Jo, mangpha mai aw,,,,” chih teng gen in a hon luutsan nawn hi. Kei le bangmah genlou in ka pawtkhia a, innkong mial lai ah a thawm uh ngaikhia in ka ding hi.

Officer-pa toh Christy pa kihouna, chiangtak a zathei ka hihman in ka ngaikhe zel a. Tukha sung mahmah a kiteeng a-utdan a gen tak in, apan le, “Ahimahve maw,,,, hiai mi zum theilou pa, bangmah sepsuah le neilou, duhgawl zaw mah, pa’n lah hong hihbuai den, ka tanu in lah a bang ana en kha ahi diam ah,,, haichilh zaw mah,,,,,,” chi’n a hon gen pungpung hi. Huai thu ka zak phet in ka hehtha a hong suak mahmah mai a. Himahleh, bangmah gen thei ka hikei, a hon kou nate a dikmah ahi chi’n ka paikkhiaksan hi. Inn ka tung tanpha in ka ngaihtuahna, huai thu in aluah den a, ihmu dia ka kisak chiang in, huaithu in ahon harsak deuhdeuh hi. Haptakhat sung mahmah ihmu lou a om ka hihman in, ka taksa a gim mahmah mai a, himahleh, ka gimziak maimai a class off ka sawm kei, class ni in ka class a, khawlni in, ka kilawh zel thou hi. Nitam aliamma in, Muhthei khop a ka taksa hong keniam ahihman in, ka khua khong a hong sik a, class le kai ngaplou, kilawh a lah kuan ngaplou in, inn ah ka om a hong ngai maimah hi.

Nikhat ka gintaaklouh tak in, Mamuan a honglut thut mawk hi. Lamdang sa tak in ka na en a, aman le a hon muh phet in, lamdang sakna a dim hileh kilawm in a hon en a,,,,”Jo, bangchi e, tulai class lah na hong kai ngei nawn kei a, na mellah a se mahmah mai a, damlouhna nei maw ? Damdawi man di na nei hia,,,?” chih toh, cheng 500 note hon piak a sawm hi. Ka la-ut kei a, piakkiik ka sawm hang in a hon lakkiik sak nuam kei hi. A tuung apat ka lawmhoih mahmah Mamuan kiang a ka thiltuahte ka hilhlouh ka kisiik a, “a tuung in ana hilhpah leng banghiam chia hon panpihthei mahmah di hia,,,,” chia kingaihtuah kawm in, Mamuan kiang ah ngaihdam ka ngen a, ka tung ua thiltung tengteng ka hilhvek hi. “Thil omtheimah ahi, lungkham a, damlouhna di hial in a neep lua, hichibang a om di khop in na lungsim a naupang sam a Jo, amah lou le midang atam uh aka,,,” chi’n a hon chiamnuih hi. Chiamnuih ahi chih thei mahleng ka nui utkei a, “ka Christy chaanthei hilou ka hihman in, bangkim ka thuak di” chi’n ka dawng hi.

Huaithu ka gen tak in, Mamuan inle hon theisiam ahi ngei dia, “i pangkhawm dia, bangmah lungkham naang omlou ahi. Aman a hon deih taktak ahihleh haksatna bangmah omlou a, kiteng mahmah di na hi uh.” Chi’n a hon neem hi. Kaaisimta ahihman in Mamuan in zong a hon paisan nawn hi. Ka hun tamzaw lupna tung a ka zat nung in, harhlam ka manoh deuhta hi’n ka kithei a. Himahleh nikhat lel zong kei a di’n kum sawtpi bangmai in, ni a sawt a, lungleng tak leh ka Christy ngaihtuahna toh, ka laisinna ngaihtuahna toh, ka lungsim a kidaih zou kei chi leng ka genkim zoupe’n di’n ka ging. Zingkar khat, ann nekham, “class kai di ahi dia aw, kailou di,,,,,” chia ka kingaihtuahtuah sung in, a hong kaiman a. Kei le bangmah hihpeih lou in, lupnatung mah ka kidenna nawn hi. A hitak in Christy zong ngai in iit mah leng, va kilak ka ut nawnkei, aziak bel, denzek chia pasal nei mai di, amah ut kei lele a nu leh pate’n neisak thouthou di uh ahi chih ka thei a, ki taipih di chi lenglah Pathian mai a ka na kichiamna bohpelh ka ut kei hi. Pathian mai a ka thuchiam ka bohpelh sang in, khovel a ka iitpen chaaan mahleng poi ka sanawn kei, chi’n ngaihtuahna thak ka kibawl a. Ka sih nungchiang a kei hon iittu Pathian angsung ka tun theihnang ahih phot leh. Hiai khovel a, haksatna i chih te khong, sawtlou chik di, huchi mah bang in, nopna i chih te khong sawtlou chik a beipah di ahi chih ka theihziak ahi.

Sun dak 11 lam a hong gin tak in, kei le ihmu kha ka hi ngei dia, ka innkongkhak kikiiu ging in a hon phawng hi. Peihlou pipi a thoukhia in, inkongkhak ka va hawng a, kong bul ah Christy ana ding ka mu hi. A hon muhphhet in a hon pawm ngal a, kap kawm in, ka kimuhlouh sung ua a hon ngaihthu khong a hon gen ngal hi. Christy kap lou in hoih tak in kipawl di aw,,,, tawp awle, chi’n nidang a ka hihsek mah bang in a mittui ka nulsak a, a hon pomna khut a lakhia a, tutna a tu di’n ka kaiphei hi. “Jo, ka sungte’n ka kiteng hun du, genfelta uh eive, bang i chi dia, ka beidong petmah ahi,,,,,” Chi’n a hon gen thakthak hi. Dawng didan thei tuanlou ka hihman in, ka dai maimai hi. Huchia dai dedu a ka tut lai in, Christy thakhat in a hong dingkhia a, ka awm a hon tum kawm in, “Ka gen zalou maw,,,, mawh,,,,,,mawh, ei bang chia om di,,,,, kei tellou in om thei mah lechin, nang tellou a kei om theilou ka hi,,,,,,” chi’n hong kapkhe nawn hi. A kap kawmkawm in, huai nitak khat na hong pawt apat in, ka pa’n, a hon etkoldan a danglam mahmah a, ka class kai di aphal kei a, koi mah a ka pawtkhiak di aphal kei a, inn ah a hon khum den hi. Huaikia hilou, telephone nangawn a pawt chiang un a lock zel ua, chim kisa tak in, inn ah ka om den hi. Tuni le’ng midangteng apawt vek ua, ka unu toh kia ka om uhi. Ka u’n le hon hehpih lua ahihman in, a hon pawt khesak a, himahleh, a kinthei lam a hong kiik di’n ahon chi hi,,,,,, chi’n ahon gen hi.

Christy hai gawp na maw ? Bang ngaihtuahna nei na hia oi ? Naupang hai bangmai a na huchi gamtat mawk,,,,? ” chi’n ka rizai in ka khuh pah hi. Himahleh, khasia a kap keukeuh kawm in, “Jo hehpih tak in kon ngetna hon hih buchinsak hamham ve maw,,,,,, ! Numei ginalou ka hihziak hilou in, nang ka hon iitluat ziak zaw ei ve,,,,,, Kon ngetna hon hih buchinsak inla, huchi’n na deihdan tak in pasal chu ka nei theita dia. Nang le lungkim tak in na hon khakhe sam kei dia Jo,,,,” chi’n ahon ngen den hi. “Christy ka lungsim hon theih siampih mahmah maive maw,,,,” chia ngaihtuah kawm in, mundang ka en a, ka mittui amuh louh lai in ka nul zungzung hi. Hiaidan a thil a omtouh zel leh, buaina omkhak ka lauhman in, kisuum di’n ka ngen hi. “Christy, hehpih tak in, hon paisanta mai ve. Denchiang in na sungte’n a hong mukha di ua, thil hoihlou zaw hong tung khak lauhuai ahi. Chi’n ka gen hi. “Jo’ tuni baak nang hon muthei nawnlou di ka hi. Eigeel adia i hun tawpna hita ahi. Hehpihtak in ka ngetna hon hih lawhchin sakve,,,,,, chi’n ahon ngen ngoihngoih lai hi. Ka hih theihlouhdan ka gengen a, hiai na siangthouna, tua na pasal adia na lat di ahi, Christy, kei na pasal hileng, keilak mah a na lat di ahi. Himahleh, kei toh kiteng theilou di i hih man in, Kipaktak in na siangthouna na pasal kiang mahmah ah laan inla, huchi’n amah le a kipaak dia, nang le kipaak di, Pathian deihdan zong hong hi dia, nupa kipaaktak hong hi di na hi uh Christy,,,,” chi’n ka thuhilh hi. Huai thu ka gen tak in, amah le lupna apat hong thoukhia a, “zinghal chia kinei ta di ka hihman un, kimuhnawn hun di ka gen theikei, huaiziak in, hiai ka ngetna beek na hon hih buchinsak kon ngen ahi, Jo,,,,. Huai kiteenna hun dahhuai leh lungkhamhuai tak keikia a thuak mmualsuah ngaaplou ka hihman in, na hong tel ngeingei di ahi. Huai ni a na mel ka muh kei leh, ka kithat dia, muh le na hon mu nawn kei di,,,,” chi’n, huaini a hoh di’n kichiamna a hon neisak a, kei leng, khovel a ka iitpen leh ngaihpen, tangzou kei mahleng, hiai khovel a a-om nawnlouh sang in, pasal nei mahleh, dam in om henla, kimuh hun khong le hong omzel ka lam-et ziak in ka kichiam hi. “Jo, a tawpna di’n aw,,,,,, chi’n ka muuk toh amuuk ahon kisutuah sak a, taalkhiak sawm mah leng, a hon matkip luat ziak in ka talkhe zoukei. Deihthoh tak in ka Christy ka tawp (last) na di’n a muuk ah ka tawp a, kideihthoh tak in aman leng ahon tawp tonton hi. Kideihthoh tak a ka kitawptuah nung un, om sawt leh thil hoihlou hong piang di ka lauh man in, pai di’n ka sawl a, innkong lam ah, mittui kai nilnel kawm in, a nor in ka nor pawt hi.

“Ka lawm hoihpen Mamuan le hong pawt henla, thil kigenpih leh chi’n ka kingaihtuah hi. Himahleh, amel muh di lah a om ngei tuankei a, kei lah pawt di chileng, tha hatna ka nei mahmah kei a, ka tha tengteng zoi gaivek hi. Innsung a tut maimai le ka peihkei a, lupna ah china zen in ka lumlum mai hi. “Zingchiang ka Christy pasal neih ni di ahita. Ka va hoh ngai di hia, kei mah alah ka kihta sim a, hoh kei leng lah a kithah taktak khak ka lau zel si,,,” chia kingaihtuah kawm in, nitaklam ann, kam limlou tak in ka ne hi. Huchia ann ka neek lai in, ka gintak hetlouh in, Mamuan a hong luut mawk hi. Bangmah gen kei mahleh, ka tanchin a theihlouhna sawt simta ahihman in, huai khong ziak a hong pawt hi di’n ka na gingta a, bangmah le ka dong tuan sese kei hi. Ann ka neekkham in ka lupnatung ah ka nih un ka tu ua, ka kihoulim uhi. Thil omdan, Christy omdan tengteng leh a pasal neih di tanpha ka hilhvek a, lamdang satak in a hon en heuhou mai hi. “Huchi ahihleh zingchiang chu i vatel ngeingei ngai leh kilawm maw ka chihleh, “Kei ngaihdan a zaw va lat khemkhem ngai salou ka hi a, himahleh a hon thilgente khong a taktak ahih a, huai ei hohlouh ziak a mikhat sih sang in, haksalua lah hilou a, va hoh le’ng a kei dia, chi’n chiamnuih thutak in ahon dawng hi.

Khen- III

Note:- “Laklohlua”, chia gen atam toh, beisak teitei ka ut ziak in, ka kaaitoi a, tu nitaak a beisak sawm i hi. Gensa hi himahleh, genthak zel di aw,,,,,,,,Hiai thu, a gelhtu phalna la masa lou in, group dang, website tuamtuam leh magazine a suah phallouh ahi. I suah-ut/deih ahih leh, nget di…..LAWL.

Sawtsimtak ka kihoulim nung un, kaai simta ahihman in, Mamuan in zong a hon paisan a, kei le, lum di’n kisak ka sawm hi. Ka lupdek leh, zingchiang mou lopna a ka van aak di kisak ngai ahi chih ka theisuah a, ka vanneih tengteng lak a hoihpen leh, banghiam hunpi lou a; ka aak ut maimailouh, Christy hon leisakte ngeimai, nawt mam di’n ka hong kisa hi. Ka puan nawt tung a ka mittui hong takkhiate ka mulou tuan kei. Nidang a, hiai puanak ka aak chia, kipahna a dimzel himahleng, hiaini’n bel, ka muhvuak in le dahna mittui hong luang in, ka dang zoukei hi. Khitui naptui toh, zingchiang moulopna a ka van aak di ka kisak khit in lum di’n ka hong kisa nawn hi.

Ka lup hang in ka ihmut bel a suakthei mahmah kei a, ihmut ka sawm peuhleh ka harh huaihuai mai hi. Lupnatung, kei a di’n tawldamna mun hilou in, lunggimna mun a tang zouta, nidang a kipaak tak a ka van aakte ka muhvuak inle, ka khitui sam pawttu a hong suak zawta, khovel ah kei a di’n damman a-om in ka thei nawn kei, kihihlupsuk khong ka utna a hong suak hial hi. “Ki hihlum suk in, bangmah theilou in khovel ah le ki-om nawnkei vanglak leh,,,,” chia ka kingaihtuah lai in ka lungsim ah, mi dawilok ka hihlam a hong lang a, hiai numei khat ziak a ka hinna ka laak na di chhan bangmah omlou ahi. Pathian deihdan le hilou himhim ahi,,,chia ka kingaihtuah lai in ana ihmu kha chu ka hingei dia, kongkhak hong kisawih ging in a hon phawng a, kei leng ka lupna apat, ihmut khamlou pi’n ka thou khia hi. Sana ka et leh, zinglam dak 6 ana peel panpan hi.

Inkongkhak ka vahawng a, kong bul ah, pasal naupang khat ana ding ka mu hi. “Bang deih e, bang chi dan a, tu zingkarkar a hiaisan a hong om mawk na hia,,,,,,?” chia ka dot leh, “Pi Kimi (pco ngaaktu nu) in, va sam oh a hon chia, na phone di hong pai,,, ,,,” chi’n a hon taikhiaksan ngaal hi. “Tu zingkarkar a hon houpihnuam kua ahita mai a, inn lam a ka sungte khong houh ahi di e,,,, ka kihou louhna uh lah sawtta ngal a, banghiam thil hoihlou om ahi mahmahdi,,,,,,” chi’n maile phiat manlou in, diip kisai litlit kawmin a tai in ka taisuk hi.

Bangmahle gen sese lou in phone ka la a, ka gintaklouh tak in, Christy pa ana hi maimah hi. “Jo, bang na chi a,,,,,,,,,,,,,,?” bangmah gen sunzawm lou in a dai vengveng hi. “Ka hoih, bangthu hita ahia, tu zing karkar a na hon phone mawk,,,,,,” chi’n paukamneem tak in ka dong hi, “Zannitaak zankhua in ka ihmu thei kei ua, Christy haizou hial di a bang hi. Huaiziak in hehpih tak in tu’n hong hoh inla, Christy in pasal neih hun a aneihtheih nang in hong kheem lechin chi ka hi, na min a louden a, hih didan le ka thei nawn kei,,,,,” chi’n a hon gen hi. “E,,, ahi maw,,,poina mahmah e ! Himahleh, kei nou innsung, changkang tak a hong luutngam ka hi nawn kei. I dinmun ulah lei leh vaan bang a kikhia ahia, phet lou in, denzek chiang a pasal nei mai di, Christy ka hon muh in bangmah phattuamna neilou ahi,,,,,apa na hia, na deihna bang a omsak na hihman in, a kipahna di le nang mahmah in na theisiam zaw di,,,,,bangteng hileh, Christy ka zi’ di ahi kei a, himahleh khovel a ka iitpen ahihman in, kipaak tak a na koih ka lam-en,,,,,, hiai ka hon ngetna ahi” chi’n phone ka koih hi.

PCO booth apat ka pawtkhia a, gamla louchik ka tun in,, Nu Kimi in a hon samkiik hi. Kei le ka paikiik ngal a, hon houpihthak nuam uh ahihdan ahon gen hi. “Hehpihtak in ka ngetna hon hih buchinsak hamham lechin chih hon ngen ka hi. Christy in a pasal neihma a khatvei beek namel muh-ut ahihdan a genden a, apa ka hihhna ah hiaibeek ka hih lohchinsak a ngai ahi,,,,hong pai abuaihuai leh, motor ka hon sawl mai di,,,,,,,” chi’n ahon ngen lailai hi. “Ka hitheikei, kei mi genthei, sepsuah bangmah neilou, neektawm zong a kilawh maimai ka hia, hiai bang a ka hun manphatak zangbei maimai thei hilou ka hi,,,, hehpihtak in hon theisiam mai aw,,,,,,,,” chia phone koih ka sawm leh. “Jo, na lungkimlou ahi chih bel ka thei, na tung a paukam kilawmlou ka na zat khaakte ah na ngaihdamna ka hon ngen a,,,,, Kei ziak hilou in, Christy ziak liauliau in ka ngetna hon hih lohchinsak di’n kon ngen,,,,,,,” chia a hon nget ngutngut tak in, kei le ka lungsim ahong nem deuh a, pasal khat in hichi khop a hon ngen ahih chiah, chi’n hoh di’n thupuukna ka bawlta hi.

Inn ah ka paikiik a, akin thei bangpen a kisa in, Christy-te innlam manoh in ka dingkhe ngal hi. Khe-in pai lenglah tunghak law di, sunlam chia, mou lopna a, tel manlouh ka lauh ziak in, taxi ka la hi. Taxi driver toh kihoulim kawm in ka taizel ua, bang ngaihtuah ka hi hiam chih ka theikei, Christy toh ka tanchin uh, driver-pa kiang ah ka genkha mawk hi. Huaithu a zak phet in lamdang sakmel tak in a hon en heuhou a, Christy te inn ka tung ua, ngak ka ngaih di leh ngaihlouh di ahon dong hi,,,,,, ken le, ka kisuanglah man in ana ngaklou mai di’n ka gen a, taxi fare piak sawm a, ka sumneih sunsun ka phorh leh, “piak ngailou, tuni moulopna ah le ka hon kha thei di,,,,” chi’n a hon taikhiaksan hi.

Diip kisaai lit-lit kawm in, innsung ah ka luut a, Christy sungte’n ka mel a hon muh phet un, ka lak ah lam-et nei hileh kilawm tak in, a hon-na en ua, kei leng “amau hon sap ziak a hoh ka hih chiah,,,,” chi’n tangnel tak in ka luut suak ngal hi. “Jo, na hong hohthei a, kipahhuai mahmah e,,,,,room ah Christy a-om a, bangkim vai ana kihomfel vekta, tu’n va tawpkiik di chilenglah, mualphou huai law mahmah ahih chiah, Christy vakhem inla, a lungkim theih na’ng in na va genpih mai di,,,,,,,” chi’n Christy pa’n a hon gen hi. A kiang ah, Christy nu leh a sanggamnu leng a-om ua, bangmah genlou in, a hon en uhi.

Christy room ah ka luut a, lupnatung a, sam thou lingleng, tukverhlam ngaa a daakkhia in, Christy ana tu hi. A hon et khak leh chi’n thawm nei mah leng, ahon en himhim kei a, “Christy,,,,” chia ka sap leh a hon enphei hi. Ka mel a muh phet in a hon dingkhia a. “Ka mintawn a hon sam kawm in,,,,Hiai a bang hih dia hong hoh e? Pasal le na hikei, na neep lua,,, ka hon hua, na mel le ka mupeihkei,,,,” chih toh, sunlam chiang a avan aak di, mouvan kikhaite ahon lakhe noknok a, a lomlom a zial in, kei ahon deng zialzial hi. Huai mai le deihkhop lou in, kap zoihzoih kawm in, a khedap, a room a kirem metmutte khong hon lakhia in, deng in a hon deng mai hi. Bangmah genlou in ka khut in ka na kidang zel a, hon deng na’ng a vante’n daih nawnlou ahihman in, hon deng utlai mahleh a hon dengthei nawn samkei. Kap nak deuhdeuh ahihman in loh ngaihna le ka theikei a, “Kin tak in pawtkhia oh Jo, tuni bak ka mel hiai khovel ah mu nawnlou di na hi,,,, hehpihtak in hiai apat hon paisan mai oh,,,,, na hon deih kei a, pasal dang nei dia  na hon sawl a, pasal dang nei a haksatak a ka om le khawk salou in, bang dia kei mu dia hiai a hong pai lailai na hia oi,,,,,,chi’n lupna tung ah a tusuk nop hi.” Kap zoihzoih kawm a agen himahleh ka bil a hon vut teuteu mai hi. “Christy,,,,,” chia ka sap leh, thakhat in a hong dingkhe nawn a, “Jo,,,,,,, chi’n a hon pawm tonton mai hi.

Lupna ah ka tutpih nawn a, a sam thou lenglungte ka bolhoih sak kawm in, kei a hon iit ziak a abiang a mittui luangte, ka romol in ka nulsak hi. “Christy hehpihtak in piching tak in om inla, pasal hoihtak in na hon nei dia,,,,, ken nang hon iit nawnlou ka hi. Kei toh kiteng lele ken ka hon iit tuan kei leh nuamsa tuanlou di na hi, huaiziak in nang iit kei mah le chin, nang hon iittu mah nei lechin hoih zaw di ahi,,,,,”chi’n haksa sa kawm pipi in ka lungsim loulam ka gen hial hi. “Jo, bang ziak a zuau hon hilh dia hong hoh na hia oi, na thugen tengteng zuau vek ahi, kei na hon iit chih ka thei, kei lou kuamah iit leh ngaih neilou na hi,,,,, hehpihtak in “KON IIT chi ve maw,,,maw,,,,, chi’n ka awm ah a lu ahon nga a, a hong kap keuhkeuh mai hi. Christy mittui in, ka aang tengteng kawtsak zou hial ahihman in, ka romol ka lakhia a, Christy mittui ka nulsak zel hi.

“Christy thudik ahi ka gen, zuau ka gen zenzen kei, ka hon itt kei,,,,,,,,,,,”gen sunzawm ttheilou in ka mittui a hong luang a, Christ in kap ka hihlam a hon theih in, hon denna dia a zat, a moupuan va la in, huai moupuan in, ka mittui a hon nuulsak hi. Huchia ka omlai un, kongkhaklam ka et leh, Christy nu leh a sanggamnu’ ka mu a, kidik feihfeih kawm in a hon en uhi. Sawt hon en ngamlou uh ahi ngei dia, a hon pawtkhiaksan pah ua, sitting room lam ah kisal ging loiloi thawm ka za zuuingal hi.

“Christy, piching tak in om inla, kei hon mangngilh inla, tua, denzek chiang a na pasal himai di ngaihtuah in na hun zangta in aw, ken zaw hon iitlou ka hi. Huai ziak in nang le hon mangngilhta in aw,,,,,,,ken le kon mangngilh ta dia, ‘fel tak in ka om ta di’ chi’n hong kichiam aw le,,,,,,, chi’n, nidang a ka na hihsek dan un, a naak ah ka khutzung in ka vaphil hi. Lungkham leh dahna mittui luang kar a, Christy nuihmel ka muh in ka kipaak mahmah mai a, akipahna bukimlou ahi chih thei mah leng, ka lungsim a nuam veve hi. “Jo,,,feltak in ka om ta di,,,,,nang le feltak in na hong om dia, koppih hoihtak na hon neih theih na di’n Pathian kiang ah ka na thum zelzel di aw,,,,,,,’Ka Christy a di’n kei le ka thum zel di,,,,, chi’n hong kichiam tei awle Jo,,,,,,,,,,” chi’n, ka naak a hon philsak tei a. “Ka Christy in, pasal gin-om leh hoih a neih a, Kristian innkuan a dinkhiak ua, tu-sawn ta-sawn a hon suang theih nang in Pathian kiang ah, a vualzawlna ngen in ka thum zel di,,,,,,,,” chi’n ka kichiam a,,,,, Room ka pawt khiaksan hi.

“Numei bangmai, bangmah ngaihtuah chiang lou in, vai-na hawm sek a eive, na vaihawmte soisel in, hong kigolh le lah, “Numei pil in sangkil le kaankei,,,,,” na hon chihsan zel a, thil dang zaw ka theisiam, himahleh tua, na tanu tung a na vaihawm dan sese zaw theisiamlou ka hi,,,,,na sum etlahna le alian lua a eive, sum leh paai hauh ziak a kipah di nasak ziak a hiaibang a na tanu tung a vaihawm zaw na hi ngei dia,,,,sum leh paai in alei zohlouh, hiai, mi genthei pente neih kipahna lah na theihsiampih mahmah ngal kei a. Na tanu tung ah bangteng hong tung leh, amoh tengteng nang na khuk vek di ahi,,,,,”chi’n Christy nu’n, a pasal ana hangsan toihtoih hi.

Tal-dom zen a kingaihtuah hileh kilawm in, Christy pa tutna tung ah atu a,”Thil ahi di teng hi khinta ahi. Bangmah gen buai di om nawnkei,,,,,pa pen in ka chih leh chu, na hih du himai,,,,,” chi’n, Christy pa le, ki siikna himhim neilou hileh kilawm in a hong paukhe lai hi. “Ahi mahve,,,,,a vaihawm dik mahmah ahi. Christy makhua a ngaihtuahna ziak a hiai bang a vaihawm ahi a, theih siamlouh di leh dem nang bangmah a-om kei, kei le moulopna lam a hong tel sawm ka hihman in, ka zekai khakha dia, ka va pai phot di,,, Christy le fel mahmah ta,,,,, chi’n ka pawtsan hi.

Ann nekham bangbang hiam hih a, ka tut sung in dak 11 bang hong ging naita ahihman in, ka Christy pasal neihna lam a hoh di’n ka kisa pan ta hi. Phurna neuchik beek le neilou ka hihman in, ka kisak sungzong a sawt a, Mamuan ngaak kawm in ka kisak khit nung inle, sawt huntak ka ngaak lai hi. Dak 12 pelta ahihman, kitenna ka nang manlouh khak lau in, Biakinn lam ka zuan ngal a, saulou ka pai nung in Mamuan in zong a hon delhpha a, “Jo, hong kuanlou di ka chih leh, na-na ngak ka gintaak ziak in buai pipi in ka hong kuan hi. Zannitak apat ka nu damlou in a hong gimsim a, tu’n damdawi inn ah a-om lel-lel hi. Biakinn tan ka hon kha dia, kei zaw ka na kiik ngai di ahi,,,,” chi’n a hon gen ngal hi. Ken le, poilou Mamuan, na nu damlou ahihleh, hon ngai poimoh teitei dah mai oh, hiai ah ka lawmte taxi ah ka tuangphei mai di,,,,, chi’n ka dawng hi. “Ahihleh ka nu ngaihtuah louthei hilou ka hihman in, Jo, ka na kiik mai di aw, mi piching khat na hih kha, mipi lak ah omdan kilawm theilou di khop a naupang hai hi nawnlou na hi, omdan hong siam inla, mualphou tak a na hong om hon phallou ka hi,,,,,,” chi’n a hon kiik san hi. Ka lawm hoihpen pai kiik di ka enzui vungvung a, hichi bang nikhua a lawmhoih ka na neihkhak Mamuan tung ah, kipaak thou mahleng, a poimoh hun laitak a hon ompih theihlouh man in, thawmhau ka kisa mahmah a, kiik mai khong ka lungsim ah hong lang dundun hial hi.

Zingkar a taxi ka tuanna pa ka zong a, sawtlou ka zong nung in ka mu ngal hi. “E,,, kimanta maw, veng dang ah a hon zangzual ua, ka hong tungkiik chiah,,,, hong lut aw,,,,,,!” chi’n ana houpih ngal hi. Kei le kisuanglah thou mah leng, moulopna lap manlouh ka lauh ziak in ka luut ngal a, “Tuzing alah ka fare hon laksak nuamlou a, tu-tung chu piak teitei taak di himai,,,, chi’n ka ngaihtuah maimai hi. “Na tanchin na gen in ka lungsim a hon zou mahmah mai a, hon hehpih thou mah leng, hehpih sang in, phat huai ka hon sa, thuak teitei inla, na laizirna kuhkal tak a na panna di’n zang inla, zirsuah ngeingei na sawm di ahi.”

“Kei le nang bang deuh a hiai bang thil ana tuak khatei ka hia, himahleh ka kuhkal louhziak in, zirsuah zoulou in, hichia, taxi ka khal ngai maimah ahi. Ka tanchin le gen di atam mahmah mai,,,,,,” chi’n a hon gen hi. Na chanchin hon gen ve, theih a ut-huai voi, ahih kei lelah gen nuam khollou maw leh,,,,,,,?” chia, ka dot leh, “gen nuamlou chih le hikhol kei, a bul apat gen leng sawtpi gen ngai di ahih chiah, hun remchang dang ah i gen zaw mai di aw,,,,! Tulai nu leh pa tamtakte’n, iitna omzia le theisiam nawnlou uh ahi. Sum leh pai, a enlah ua, iitna tellou a, mahni gil a gah, a tate uh ngoihngoih le, sum leh pai ziak a, kiteengsak thei mawk uh hi veh aw maw,,,,,,”chi’n a hong khawl hi. Ka dakkhiak leh, Christy te kiten na’ng Biakinn kong ah ka na khawl ua. “Nang le mou lopna ah hong tel vanglak lechin, a zohchiah ol-in i paikiik na kei dia,,,,,,,” chia, fare piak ka sawm leh, a hon laksak ut-kei zel hi. Piak sawm teitei mah leng a la-ut tuan kei a. “Hangsan tak in om inla, ka gente thei den inla, amaute sang a loching zaw hi dia kuhkal tak a na pan ngai ahi…… Ka na paikiik mai di,,,,,” chi’n ahon tailiamsan hi.

Sawtlou ka din nung in, ki tenna dak hong ging a, mi tamtakte adi’n hiai dakging pen, kipahna leh dak ging tengteng lak a, zak nuampen ahi maithei. Himahleh kei adi’n bel, patau dak sang a le ngaihkhiak haksa zaw in ka bil a hon vut teuteu mai hi. Ngaihtuahna mumal le nei thei lou in ka om a,” Bang ziak a hiaibang thil, kei tung a hong tung sese ahi dia aw,,,,,?”chia kingaihtuah kawm in, Biakinn kil-lam ka naih phei hi. Biakinn kil a ka om lai in, mipi mou lawm dia nalh taktak a kichei, Biak-inn lam manawh a hong pai suausuau te nung ah, Car naltak apat a, ka Christy mou puan-aak silh a hong kumkhia ka galmuh hi. Ka zalmang ahikei a, mitvai maimai zong ahi kei chih ka thei, ka mit nuai in, ka enthak zel a, a taktak mah ahi. Biak-inn lam a hon naih zel ua, a hon muh di ka lauh man in, Biakinn nunglam ah ka paiphei hi. Mipite leh moute Biakinn sung a a luutvek nung un, kei le Biakinn kong lam manawh in ka pai phei a. Diip kisai litlit kawm in Biakinn sung ah ka luut hi.

Koimah a dak-khe ngamlou ka hihman in, kuun kawm in ka luut a, tutna zawn nanung peen ah ka tu hi. Pastor pa a hong ding a, kichiamna nei di’n sapna a hon bawl tak in, kei le, kho-ul kai zoihzoih kawm in ka dakkhia hi. Ka Chrisrlty in ka luut tung apat ana en gige ahihdan ka thei a, kei lam hon-en kawm in, Pastor pa lam ah akal asuanphei zel hi. Ken le Christy a di’n, ka lungsim in thumna ka na neihsak zel a. Amel ah kipahna himhim a lang kei. Huaikia hilou in, mou lawm a hong kuan, mipi hiaizah lak ah, kuamah kipahmel ka mu himhim kei. Lusuun a dah a, nguimel puvek uh hi’n ka thei a. A pasal pa’n thu chiamna a hon neihkhit in, Christy hun a hong tung hi. “Ka Christy, na thuchiam ma in, khatvei beek keilam hon en ve, maw,,,,,! Hehpihtak in, kon ngetna nanungpen eive hiai, abaak, thil dang bangmah hon phuutlou ka hi, hehpihtak in khatvei chouh hon en lai mahmah ve,,,,,,,” chia ka kingaihtuah lai in, Christy in zong, ka lungsim theisiam hileh kilawm in, keilam a hon en phei hi. “Kei, Christy,,,,,,,,,,,,,,,,, in,,,,,,,,chi’n gen sunzawm theilou in, a aw a hong vuang a, kisuum chih haihvual louh in, nuailam en in, a hong kuun dedu hi. Mipite zong lamdang sa in, kamka heuhou zen in a en ua, sawtlou Pastor pa’n angaak nung in, a hon gen sunzawm thei nawn hi.

Ka kahneh ziak hilou in, ka Christy mel in a hon vua a, ka mittui pawt di ka na dandan hang in, ka dang zoukei. Thakhat in ka biang ah ka mittui a luan in a hong luang a, ka kiang a tute hon theih di lau in, ka kuun suk a, ka sakhau a romol in, ka kinul hul ngal hi. Huchia ka kuun sung in, Christy in zong damsung a koppih a di’n Pathian leh mipi te mai ah thuchiamna ana neikhin ta a. Hiai ah om-om leng mualphou mahmah di, hia ka kitheih ziak in, Pastor pa thumsakna anei lai in ka pawtkhia hi. Himahleh, Christy mel mulou a paikiik ka ngaingam kei a, tawp ngak in, Biakinn nunglam ah ka vatu hi.

Toupa hon sinsak thuumna a neih khit un, Biakinn konglam manoh in a hong pawtkhia ua, Biakinn kong ah, lim laakna hun a hon nei uhi. Christy munuam mahmah, lah kei a hon muh di lau kawm pipi in, Biakinn kilkhat apat in, a guuk in, lim a kilaak lai uh ka en zel a, Christy in zong kei a hon zong ahi chih haihvual louh in, a limlaak lai ngaihsaklou zen in, a vial dakdak mai hi. Amel ah kipahna himhim muh di a omlouh ziak in, mipite’n zong lamdang sakna lianpi anei uh chih haihvual ahi kei. Himahleh, thil omdan diktak theibel mi tawmchik ahihman un, kuaman kei a hon muangmoh kei ua, huaiziak mah a mualphou lou a om lel ka hi. Moute’n zong limlaak zouta uh ahihman un, innlam manoh in a paikheta ua. Huchi’n a nung uah, Mou lopna innlam manawh di’n, mipite’n zong azui uhi. “Ka Christy, singdang ang-kawi a tulmai di hia maw,,,,, chia ngaihtuah in, a kilat sungteng uh en in ka daak den hi. Mipi teng le paitheng vekta uh ahihman in, keile, ka inn luahna lam manawh in ka paikiik nawn hi.

Hun leh kumte a hong liam zel a, kei le Christy mangngilh kei mah leng, ka lungsim ah a-om lawmlawm nawnkei hi. Ka zirna lam ah le’ng Pathian kepna leh huhna tang in, ka lamzang tou zel a, MCS a ka exam na zong Pathian ziak liiauliau in ka hong lawhching hi. Sepna ka hon nei a, nidang a ka na tup gige, Officer khat ka hong hi teita hi. Kou innkuan khosakna zong nidang banglou tak in a hong zangkhai mahmah ta a, huchia Christy pasal neih nung, Kum 5 mahmah a hong kivei nung in, nikhat Bazar ah ka hong kimu kha zenzen uhi. Restaurant nai pen ah ka luut ua, Ka tanchin, bangmah gen ngailou in a theivek a, a guuk a ka tanchin a na ngaihvenven ahihlam ka thei hi. Amau nupa in ta khat neita ahihdan a hon gen a.

“Jo, nang ziak a hiai bang dinmun a ding thei ka hi. Khovel a ka itpen, nang hon neilou in ka na lungkham mahmah sek a, himahleh, i kiteng theihlouh di thei gegu a, na lak a kiphal tak a, vuaktang petmah a ka hong kipiak khiak lai nangawn a le, Pathian kiang a na thuchiamna tangtun zohlouh di lau a, na kisuum teitei dan thupi ka sa a, huai in kou nupa hinkhua ah le naaktak in kipahna a hon bawlsak hi. Siangthou tak a pasal nei ka hihlam ka pasal in a hon theih in, a hon ngaisang in, a hon duat mahmah mai a, nupa hi a, ta’ ka neih nung tanpha un, muanmohna himhim neilou in, nupa hinkhua nuamtak in ka zangtou thei uhi. Huailai in, ka tung ah, lungsim hoihlou pu in, “midang zi di thouthou” chi’n ut hilechin ka hon ngetna na hon hih lohchinsak ngei di’n ka ging. Himahleh, na hon it louh ziak a hiai bang a ka hon ngetna hon hih buchin saklou ka hon sak lai in, theihna diklou lianpi nei ka hihdan, ka kiten nung un ka thei thak a, kei na hon iit ziak liauliau a hiaibang a ka hon ngetna hon hih buchin saklou na hi chih ka thei ta,,,,, chi’n, a hong kidiik feihfeih hi.

Christy, hiai, na nungaak lai a na duh pen leh na ngaihnat pen ahi, huai lai in, hon treat uut in, hon deihsak mah leng, ka gentheih luat man in, ka hon nesak zoukei a, nang sum mahmah in na hon leisak zel a, nang na ngaihnat luat ziak in ken tuni tan in hiai ka ngaihnat phah in, ka mangngilh theikei hi,,,, chi’n anek di’n ama lam ah ka khinphei a, “Jo ka kipaklua aw, nupa hikei mahle hang, ken le, na hong lohchin theih nang in chi’n, i kichiamsa mah bang in, ka hihtheih khamkham a Pathian kiang a ana ngetsak zel sam kei ve,,,,,,” “Christy kei le ka kipak lua aw, tu kha tawp chiang in zi neih ka sawm a, huai hun ah, nou innkuan le na hong tel ngei uh ka lam-en, na pa uh le, muh ut-huai ka sa himhim, rem a sak leh na hong tel ngeingei di uh aw, ahihziak in, na pa un rem a sak kei le bel, na hongt el theih kei ua lele poilou ahi,,,,” chi’n ka gen hi.

“Jo, ka pasal kiang ah i tanchin bangkim ka hilhvek a, aman le muanmohna neuchik le a hon neikei. Nang a hon ngaihsang thu ngen, a gengen sek a, hon muh a utthu khong gengen sam ei ve,,,,,” na zi neih chiang in chu, ka sungkuan un hong tel ka hon sawm di uh aw,,,,,,,” chi’n ka kimuhlouh sung ua ka tanchin khong uh gen in, ka hong kikhenta uhi.

Pathian vualzawlna tang in, kei le koppih nei di’n ka hong kisata hi. Mite bang a thupi tak a lawmzou hikei mah leng, Pathian leh mipite theihpihna toh, Ka pianthak tung a ka kichiamna bang in, Biakiin huang a, dan siangthou a kiteen ngei ka sawm hi. Neih bangbang a kisakhol in, ka buai mahmah mai uhi. A hun hong tung a, Christy te innkuan zong ka zi neihna ah, a hong telthei uhi. Christy pasal neihlai toh kei zineihdan bel, lei leh van bang in aboruak a kikhia hi’n ka thei hial hi. Dahna, lungkhamnate’n mun a tang himhim kei a, kitenna neih zoh a, Biakinn kong a lim ka kilak lai bang un, Christy te innkuan leh kou nupa in kipaktak a ka limlak uh ka muh chiang bang in, tuni tan in kipahna’n ka dim hi.

Beita !!!

©Siamsinna leh Vakiangbu