PU-PA LA TOH KISAI
By ~ Vz Vualnam
Pupa’ la toh kisai theihna i hau hetkei
ua, thei hetlou leng i hisim uhi. Awlmoh a nei a hon gelhsuk deenduan di
ka chihleh tamlaw mahmah, gelh seng ding hong hitalou, bangteng hileh
hiai teng in leng theihna apoimoh zah neithei na ni chi in hichi teng ka
hon gelh hi.
Pupa la
Khangthakte’n i pupa la toh kisai theihna
i nei tawm mahmahta ua, akoipen akoi hi a, abangpen abang hi hiam?
chih leng theikhen nawnlou i bangta uhi. Huaiziak in pupa la toh kisai i
theihtel theihna di’n tamlou kikum ni.
Pupa la i chih la tuamtuam tampi hi a,
ahun leh amun zil a kisa ahi. Tuate avek in bel en leng theikim khang
in, himahleh i theih zahzah kikum ni.
Zangta la:
Zangta chih tuh zanggam mi, adiakkhol in
Kawlte, Burma te ana chihna deuh uh ahi a, tuate athah chiang un la kaih
khat sa in laam ua, tua a lasak uh tuh zangta la akichi a, alaam tuh
zangta laam kichi hi. Himahleh Kawlte hiam, phaizaang mite kia athah
chiang ua asak uh bel hisamlou zel hi. Gal la chi le hang adik ding hi.
Sa-le-gaal a kinei mi ahi ua, sa-le-gaal amat chiang ua asak tangpi uh
ahi. Himahleh sa-le-gal kialou khua toh kisai, lungzuanna toh kisai,
nungak toh kisai leh thil tuamtuam toh kisai leng zangta lakaih in
saktheih veve hi.
Zangta la leng kaih chi nih omsawn lai hi. Zangta la ngeina, Mualpi zangta lakaih kichi leh Bukpi zangta lakaih
om hi. Bukpite’n amau zangta lakaih kineih uh ahiman in zangta la
ngeina pen zangta lakaih a simlou in ‘sannem lakaih’ achi uhi.
Bukpite zangta la:
Ka dou aw e, ka dou aw e
Ka dou kawlpite aw e
Ka dou kawlpi saumang tuunnu’n
Ka hehluat neem zoulou e
Ka dou kawlpite aw e
Ka dou kawlpi saumang tuunnu’n
Ka hehluat neem zoulou e
Dou lah neemlou ei lah neemlou
Kua aw i neem saam diam aw
I neem saam diam seinou vual aw
Dou’ lu lah alva’n bawm e
Kua aw i neem saam diam aw
I neem saam diam seinou vual aw
Dou’ lu lah alva’n bawm e
Ka tem aw e lunlai tem aw
Zaangsuang ah va nawl ing e
Zaangsang ah va nawl ing e
Ka dou luunlai saat ing e.
Zaangsuang ah va nawl ing e
Zaangsang ah va nawl ing e
Ka dou luunlai saat ing e.
Mualpi zangta la:
Mualpi ka vangkhua aw e
Zin leh leng baanna aw e
Zin leh leng baanna aw e
Ngousai tuang tunna aw e
Zin leh leng baanna aw e
Zin leh leng baanna aw e
Ngousai tuang tunna aw e
Mualpi ka vangkhua aw e
Khuva leng in khuplah e
Khuva leng in khuplah ta e
Sabuaivom in nawklah e
Khuva leng in khuplah e
Khuva leng in khuplah ta e
Sabuaivom in nawklah e
Pupa’ khuamual sangsing leel ah
Sumlu biing bang khai ing e
Vontawi teng toh ka kawlchiang toh
Leidou manoh zel ung e
Sumlu biing bang khai ing e
Vontawi teng toh ka kawlchiang toh
Leidou manoh zel ung e
Khuakiim aw hon nehlou aw
Sakamkei bang gial ing e
Sakamkei bang gial ing e
Ngousai ing hansuang daw’ng e
Sakamkei bang gial ing e
Sakamkei bang gial ing e
Ngousai ing hansuang daw’ng e
Sannem la:
Sannem la tuh nungak leh tangval
kingaihna, leitung hinkhua leh lungzuannalam chihkhawng ahi a, himahleh
thil teng leng ahithei veve hi. Sannem lakaih leng chitampi omsawnlai
hi. Khua atuam dungzui in lakaih tuam kineih theizel uhi. Zuneekna mun
khawng a asak mundeuh pawl uh ahi.
Anuam in bang anuam hiam aw
Zua’ lam lensialki leh khuang nuam e
Zua lam lensialki leh khuang nuam e
Ziin lailenkal tang bang dam nuam e
Zua’ lam lensialki leh khuang nuam e
Zua lam lensialki leh khuang nuam e
Ziin lailenkal tang bang dam nuam e
Pham masa ding mel kitheilou
Maimit kisuansuan ni e lawm e
Maimit suan a houlung chimlouh
Mel kimuhlai chi ni e ngaih aw
Maimit kisuansuan ni e lawm e
Maimit suan a houlung chimlouh
Mel kimuhlai chi ni e ngaih aw
I aw sannem nang toh tualsung khat ah
Nang toh zaanglawi bang thang le’ng chi’ng e
Nang toh zaanglawi bang than le’ng chi’ng
Besam puaksiam phualgia bang ke’n zuun le’ng chi’ng e
Nang toh zaanglawi bang thang le’ng chi’ng e
Nang toh zaanglawi bang than le’ng chi’ng
Besam puaksiam phualgia bang ke’n zuun le’ng chi’ng e
Ton la/ Sialsut la:
Ton la, sialsut la kichi tuh a
ton/sialsut chiang ua asak uh la ahi. Tong/sialsun kichi tuh mi neizou
leh that leh manzoute’ nopbawlni ahi a, sagou in zu-le-sa toh khozaang
in nuamsa tak in om uhi.
Kiang toh ka lam sawmsial aw e
A kii ngousai ha bang e
Kiang toh ka khoh setang aw e
Khokhang leenli vei bang e
A kii ngousai ha bang e
Kiang toh ka khoh setang aw e
Khokhang leenli vei bang e
Gam a sesing munmuang ta e
Taang i nu’n sial in la’ng e
Taang i nu’n sial in latah e
Gamsing bang mang song aw e
Taang i nu’n sial in la’ng e
Taang i nu’n sial in latah e
Gamsing bang mang song aw e
Sim a hong suak sawmsial lian aw
Pusei tonsawl ziingsak e
Pusei tonsawl ziing nuai ah aw
Tuunliang mu bang ngai ing e
Pusei tonsawl ziingsak e
Pusei tonsawl ziing nuai ah aw
Tuunliang mu bang ngai ing e
Ka sial aw e sialtum kaang aw
A kii tangtawi ka lapna e
A kii tangtawi ka lapna aw
A phaw laltang ka nohna
A kii tangtawi ka lapna e
A kii tangtawi ka lapna aw
A phaw laltang ka nohna
Lakhiang la:
Lakhiang la tuh hunbi nei leng hituanlou in lunglen hun khawng ua asak maimai uh ahi.
Lakhiang la leh tang a mi kilawm e
Kho lentawm leh haudoh tuang kilawm e
Kho lentawm leh haudoh tuang kilawm e
Lakhiangla sak bang puang e sen a gual
Kha i kiak leh kulsin ah baang na hi te
Kha i kiak leh kulsin ah baang na hi te
Khake le’ng lah koi laidiip dap puanteh
Omlai aw gi bang ei hawi maita aw
Omlai aw gi bang ei hawi maita aw
Lung kituak geel neihtong chiandal ging bang
Gaal a zaak in sing lengtal khuan toh lawm e
Gaal a zaak in sing lengtal khuan toh lawm e
Singlengtal khuan thang khokhaal toh lawm e
Limsing dangkai deih lungzuan toh lawm e
Limsing dangkai deih lungzuan toh lawm e
Singlengtal aw kha na keta hiam aw
Nahsing nuai teng gialtui bang adai e
Nahsing nuai teng gialtui bang adai e
Michin suihlung zuanna di’n singlengtal
Al bang mangsa kotsial bang asuak e
Al bang mangsa kotsial bang asuak e
Al bang mangsa kotsial bang asuak e
I tuun khakia kotsial bang suakmoh e
I tuun khakia kotsial bang suakmoh e
Hiai atung ate lou leng tampi, Silap la, Huihnung la, Zawlla, Simai la, Chianchiin la, Khupching leh Ngambawm la, Khodou la, Thanghou la, Chiantuang la leh
adangdang tampi om a, gen a gelhseng ding hilou hi. Lasak kia hilou in a
tumthoh kia (instrumental) bang leng om hi. Tuate tuh daak la leh phiit
ahi. Theih dia poimoh bel hiai laminte a kaihmin hilel zaw ahi chih
ahi. La dang teng kaih zang in la na utut na phuakthei hi. Himahleh mi’
min nei, Khupching leh Ngambawm la, Thanghou la chihte bel akaih kila
khollou hi.
©Siamsinna leh Vakiangbu
Comments
Post a Comment