KHANMOH BAWK
By ~ Lian Khuptong
Vailoukuan pailam Ching toh Muan hong
kiton houlim suksuk lai un en dih Umuan Kailam taang a vanleeng nidang a
kia chi uh hilou mo? Kemah ei, Muan in bang nidang in, a siklawngte a
themneng tu’n mutlong in zangta zen hang huailai in, piang le na piangta
a hia? Zezen non houbawl Umuan non huchi chia zaw hong sik nuam ka hi.
Heiha ! ! vailou kuan le gimhuai na e
Muan lehkhasim lam a kihei mai di hia? Pasut bawi na thugen a dikmai
thei zoukhan nakhual le tuh na kipat kulsa mah ing. Muan le ann ne zou’n
kongtual tawlkhat tu in hong kingaihtuah vangvang sam hi.
Tu’n ken siam va sin mawk leng Ching
ana om zoutakpi diam? Tualai in nungakno melhoitak mai khat solkha vak
nuamsa’n hong kikou phei in Umuan tuni Loukuanna gimlua mo? Lungkimlou
sim na hiam! Eh…ka ngaihtuahna a paisau lokhadek ahi. Umuan tuni kon
hounate naa salua mo? Ngaihsiam ash! Muan zenzen nang mai bang ah
selungzuang tak in ka om kei di nang toh kikholh nuamsa ka hi.
Ken mo hong ngai theilua Ching awneem
tuh azak mai inle a nuam nuihmaitak a mel lah hoih felzoh mah hiai
bangteng ziakmah zaw hinte hichi lawmlawm a Muan in akhiaklah. A lungsim
a kheng phut gige thil lamdangpi zaw ahi. Muanpa’n siamsin dia khopi
lam a asawlzoh louh nakkhem ahi a tuh Muante innsung subuai dikhop a
Ching mimbang na pian chi theihkhop in, phutluih ngaikhop a siamsin dia
Muan pa’n anoh phut thei khop hial ahi.
Ching in zaw Muan in hi chi lawmlawm a
angaih tel itna tuibang ana kituh khin ana hi uhi.Zingkal khat Umuan
bangchi e? Loukuan di non tot ngeilouh tel ! Ash…hong taiphei Muan in
Ching ka pa’n siamsin di’n gamthuk lam a hon thonkhe dek a poi ka sa
mitui toh kidim a hon gen leh, eh! Umuan keikia nutsiat di ka hive mo!
Naa ka sa, ki-it kingaih laitak a hiai bang simthu tuang hong tung mai
hong mangngilh ken aw! Ching in akhut a khausan bat’n awl in kikhakhe
mai ta uhi.
Sabang a tatna nasa uh Ching in
lambang a zuih tuh thuak hak samah hi. Loukuan vaipai nitak hunte tuh
Ching adi’n lungleen hun azat gige mai thil haksapi hong suak ta
hi.Huchi mahbang in Muan a di’n tuh lungleeng pi a hun zat gige naa sa
mahmah sam in, siamin na hong hahpan mahmah sam hi.
Kum tam kuamtak siamsin in mundang a
omzel paizel in Muan tuh kilehleh hi.Gali pute’n bang theihloh gop in
Ching toh a kal bang uh chiamnuih zel uhi.Tutung tuh a suty pai a
lungsim kamkhat om in thei hi.Himahleh, Ching in akhausan piak pen amuh
chiah Kipahna khat nei veve lai buang sam hi. Innlam a paidek pen Ching
apat lekhathon thukikna amuh louh in a lungsim nuamsak theilou hi.
Khokhaal kuan ding hita Muan le khopi
pan in, Zoudawn lam manoh in Gali in a hong kisoisuk hi.Ching toh kimu
ding tuh a ngaklah pen himai. Thildang tuh ngaihtuah lou dan ahi.
Sawtkuamtak hong tai khit nung in “mualmet” hong tung petmah a lamdang
mah khat bel Muan Gali hong kum leh a khua uh Nidang na bang nonlou sa’n
Ching in, khomual a na dawn sek napi’n tutung naupangte natawm inle ana
delh louh uhi. Thazoi tak in inn ah hong lut’n imusuak gimsim kisa mah
hi.
A zing in bangthu hong tung ale? Muan
tuh ann ne zou pawt thuah Ching te inn a hoh a lungsim a tuh gukkhiak
mai ding hita. Siamsinna lah kum1 kai leh zou di kimuang mahmah sam hi.
Khomui pian vuah lah zu nelhnelh
the’haam dumde vak meiikai mihingte le kimuchian mellou pasal khat
lungke dimdem thaizoitak in, innlam zuan in hong pai mel-etmai in leng
hiaipa lungkhamna tuh thupina maizen e chih theih pah ngal mai ding ahi.
Ching tuh alou theilou dinmun a
khattang a Dalpu hehpihna toh thuak zoulou’n, na kiteng laizang kha
uhi. Umuan hong tung thei napi’n ki-awi mahmah samlou in, kimusak
nuamlou hi.Dalpu in a va belh gige ziak mah in na zuikha mah hi.Muan a
di’n tuh lungleen kum khotawn a zat ahita mai. A pa’n a siamsinna lakloh
sa’n sawl mahleh ahih thei non kei hi.
Innkong valanda a tu’n kingaihtuah
in, nidang a zaw Ching hon na kepna, hambang a huainate peuh ngai in,
Hicituk a itna angvan ka tang bangziak a Muan in, kiteng pih mailou ka
hiam ? Hunluite bang a ngaihtuah chiah naa salua’n kisik tuntun hi.
Lamkhat alah a siamsinna lam Ching hang in loih thepthup zel. Muan
hinkhua tuh lohsapna in pumtuam hi.
Mite theidan in amau gel kikhen
nonlou ding a sak uh, Tua hichi höng suah pen uh mite houlimna ahi. Muan
tuh potlou’n adahna toh akhasiat toh azum toh kap mailouh tuh hihtheih
dang omlou hi.
Nikhat tuh lamet louhpi’n sathu”
zong’n Ching in, naupang khat liangpuak, khat nungzang ah pua in Muan te
inn hong lutkha laizang a, Umuan lungzuang tak a tu hon muh leh hehpih
in lainat mahmah hi.Muan toh Ching annbang ki-it sa höng kimutuah tuh
hong ki-liangkawi maisam uhi.
Tawlkhat tak hong kikahpih tuak uh a,
ahunluite uh hon suut ua, dahlua hinapi bang hong nuihkap mai hun chang
bang uh om hi. Ching in tuh Muan khut a khausan ngat a buhsak pen
kisiamtan louh ziak in a sutsakta mai hi.
Banghang annbang ki-itna pi nun khat a
luaikhom theilou mawk uh hiam! Mite gendan in huai hun lai in, Dalpu zi
tuh Ching ‘u’ na hilaizang hi. Theih khollou pi in, Dalpu zi höng si
guih! A tate uh la neu lawlai sam, Chingte la sanggah liangvai
hambangvai huchi kawmkal a Ching tuh Dalpu toh na kila khah mah uhi.
Hiai bangte Muan in a theilou ahi zenzen kei a, Himahleh, Ching toh a kalthu uh pen kikhen ding pen thil haksapi mah ahi.
Nihgel ki-it kingaite tuh kitheisiam
theitak a na hi gige na pi’n , itna ziak mah in luankhi toh sakmel a
kimuh hun pen uh tomnou nangawn kikhen haktak suak kha hi.
Annbang itna ziak mah in Muan in a
theisiam a thuak ngap sukzel hi. Lam khat ah Ching in leeng itna ziak
mah in itna mah ana bel zel ahi. Itna kisuangsawn Himahleh, itna ziak in
Muan tuh lam chiteng a alungtup mualsuah zoulou’n a khan kumkhua asawt
kei mite bang a pil hileh.
Thumanna hang in, a siamsinna bek a
mi löhching suak thei hia ! Bulbal neilou in tungsunni lenkawl a kia’n
muikhuazing in, tulvuah kiate’n imut lim sak. . .
Zingkhua hong vak a Muan le beidong
kisa in, apan lah laisimna va sunzom in chi in sawlzel. Itna lah tang
sam nawnlou tangkhat kisa a pa thumanna toh siamsin di’n hong kuankhe
nawn khong hi. Muan le siamsinna lam a tuitum kisa’n a zohdi kuan’n
Chingbem a kaipihte khat toh hong kimai kha laizang hi. Niteng phial in
hong kithuah in kinel mahmah uhi.
A siamsinna Muan in hon zoukhe
khongta tuh vangphat huaitak mai’n sepna TAN in nasem di’n la uh a sepna
ua a heutu pa un thubuai labuai khen ding in, deihsakna tang in huai
ginom tak in naa tuh hongs em hi. Tuabang in mithu leh laate khen ding
in, haksa pipi innkuan vai bang, Nu-le-pa kal bang, tualthahna toh kisai
bang, haksa sathei mahleh dik leh tang in hehpihna toh thu hon khen
chiang in mite kipak in, mite theihphak hong hita hi. Sum-le-pai,
gou-le-gam nei in mite ngaihsang hong suak mawk hi.
Muan in tuh hibang in nasem hoih
mahleh a senlai a a it mahmah Ching tuh a lungsung a kiveiden hi. Khovel
nopsaknate pal in om mahleh lungkimna tak neilou hi.
Lamkhat ah bel a pa thumanna ziak a
hiaitan a tungpen kipak mahmah zel hi.Nikhat tuh ama thukhen ding in,
bang simthu hong tung hiam ? Muan kiang a nupa’ nih hong kiheek uhi.
Kikhenna thu a numeipen min Adele, a pasal Jack ahi. A numei gensak
masa’ in Adele in kei ka pasal in a sepna lam a numei dang a ngaih man
in ka damtheilouh toh hong ning bawl in hon maak saw;m ken lah, ka ta it
pom theilou ka hi chi hi.Tua bang in Jack in hon gen a, ken ka zi ka
leisa maakpen siang hilou hiam? Ka leisa ka thu mah hilou mo?
Muan in hichin hon gen nawn leuh hi.
Adele na thugen tuh adik a himahleh, na pasal in na utloupi a hon khen
mawksawm pen ngaihtuah zek kul sa ing. Jack in khenna lai toh hon
maaksawm pen tuh thildik hizel bang teng hileh hong gen zeklai un a dang
zong hon chi hi.
Adele hong ding nawn in nidang in
ki-ittak leh kingaitak in khen nawnlou ding in ka na kikhutsuih pen uh
tua a haksat hun in aman hiaibang simthu hon puakkhiak pen, kei numei
mawl tak in, a mawkna’n pom haksa ka dinmun pen bangmah salou hon muniam
lua sa ka hi. Jack in ka lawinu’pen damtheilou lua’n ka maak sawmpen a
sianglou bang hiam ? DAN in non pompih uh deih ka hi.
Muan le mangbang simpi in buaisim a thubuai khen haksa tua bang in, hiai damlouhna toh kisai Adele gendi’n kun hi.
Adele in gen non a, ka pasal in
mundang ah nna hong sepsan a kei ka tapa uh enkol in ah ka om hi. Tua
bang a ka om lai’n khatvei hotel houlimna mite thugen khat ka va zak in,
ka lungtang a naa sak huai tuh, ka pasal a nasepna lam a nungak ngai
in, om a tua ni apat’n ka lungngaihna in ka taksa a chau gop petmah a,
damlou in, lungtang naa in ka om a, huaitak in, ka pasal in lam-et beisa
in hibangthu hon puak khiakmai naa sa ingh.
Bangteng hileh Muan in tuh Jack in
maakna lai toh mi’n hon pom ut nonlou tuh na kihep mah kuul sa’n a pasal
deihna bang in, thunung thuma’ omlou ding in zawhna tuh Jackspear khut a
pia in, thukenna tuh tua bang in, kalhta uhi.
Adele tuh mangbang lungketak in vuallel dimdem in chiahsak uhi.
Jackspear tuh lungdam kisa’n awng lahlah hi. Tua bang in a ZI thak toh hong kiteng ua, tawlkhat hong khosa’n hong om uhi.
Tua bang in hong omlai uh bang
doh-aisan hiam! Angkawm na nana tuh Sian lemgellou pen guitung sam lou’n
nupate’n khen ding simthu hong lel di’n hong kisa’n thukhenna mai a
hong kiheek ek nawn uhi.
Jack in a lungkimlouhna Muan mai ah
hon pulak non a bang thu hon gen tazen hiam? Ka zi in kei chauh toh tuul
ding ut, ka ta pen amah sisan a pianglou in a nolh ut pen ken deihlou
ka hh. DAN in hon pom pih hen aw!
Tuabang in Jack zi’ hong ding a ken
ka pasal toh ka teng dek un zong nata na zi masa pia in ka chih ka
kithukim uhi. Tuabang in kong kiteng ua, ka thuchiam uh palsat a hon
nial pen pomlou ka hi.
Muan hong ding nawn a Jackspear na
thuchiam nihvei na pelh nung in vuallel na hita. Ngaihdam na hinön kei
ding DAN nuai in hon pompih theilou ding ka hi uhi.Jackspear tuh
dahmeltak in vuallel in kik a, azi’n lah paisan tangkhat tak in lungkham
khakham vei gop hi.
Adele a zi’ masapen ang a kiknuam in,
va sam mahleh ahi theinonta kei. Mite’n a gamtat khohei dan teng
musuakvek uhi.Beidongtak in itna masa thupisa mahleh samkik ut utnapi
kikhelta hi.
Muan le tangkhat kisa’n Chingbem toh
kikhutsuih in hong kiteng ua, nuamtak in khosa ta uhi.Mualmet khua tuh
kho kidohtak leh kho nuam buh-le-bal kichingna khonuamtak ahi.
Ching nidang a Muan X’nu pen le
lungleeng thei mahmah sam hi. A Umuan toh sabang a tatnasa munteng
amuh-muhpen a lungleenna behlapsak den mai hi. Itna masa’ a kiknuam
napi’n lah kikhelta ahithei nawnlou dingpi ngaihtuah khazel hi.
ITNA bangzahta a manpha natel a
itna’masa’n mite lungsim sung naktak’n luah veh aw! Itna zaw manpha
hitel na lawmlawm e, koimun koimun ah om leng zong itna in mite
kinaihsak in kigamla sak hi.Itna ziak in mite kigawm in itna ziak mah in
leitung mite kikhensak in kigawm zel hi. Tua bangte’n Ninuai a chikleh
beini a nei kei ding . Tua hang in, annbang itna zaw amah utna omlou’n
phutluih thei ahikei. Khovel a mipil misimtakte’n zong annbang itna sut
in sut mawh uhi.
Itna lamdang itna thupi” 1Korinth laikhak bung 15 in genta ei itna taktak.
Beita.
©Siamsinna leh Vakiangbu
Comments
Post a Comment