Siamsinna leh Vakiangbu

By ~ Vz Vualnam Hoih deih ngen hinapi, Thilhoih a pian theihlouh chia'n; Midik ngen hinapi, Thildik a pian theihlouh chia'n; Lemna deih ngen hinapi, Buaina ngen i ngah chia'n; Kituah ut ngen hinapi, Kihoutheihlouhna a pian chia'n; Nam tawisang ut ngen hinapi, Nam i daisak khaak chia'n; Sanggam laiguizom hinapi, Gaal i kisuahkhaak chia'n; A kihun ding ngen hinapi, A kiheek a i pan khaak chia'n; Khantouh ut ngen hinapi, Kiakniamlam i manoh chia'n; khat leh khat kimohsak tawpsan in I lungsung velchian chiat le'ng Huai ah dawnna a om hi. Tua dawnna gumngam chiat le'ng Vai hong veng ding hi! (C) Siamsinna leh Vakiangbu

By ~ Vz Vualnam Bawite aw, ka tate aw, Ka mel a etlawm gigekei ding a, Ka tha a hat gigekei ding a, Ka ngaihsutna a chiim gigekei ding a, Na theihlouhkaal un, ni khat, Ka thate a hong ke ding a, Ka khuukte a hong zoi ding a, Ka meel a hong vuai ding a, Ka ngaihsutna a hong mawk ding a, Himahleh mangbangkei un, Thawmhau in lungmangkei un, Ka ma a pai ka pa bang in, Kei leng nou ma ah ka paisam ding a, Ka pa' nung ka zuih bang in, Kei nung leng na hon zuisam ding uh. Hiai leitung daan i zuihzel lai un, Paimasate toh lungkim a kikha in, Hon zuite lungkim in khen le'ng, Bawite aw, ka tate aw, Phazou e, hunzou e! (C) Siamsinna leh Vakiangbu

By~Vz Vualnam Hon taisan pah ke'n aw, Hihkhelh ka neihkhaakleh, Mihing in lah a hihkhial naak a, Hoihlou chi in hon nuse pah ke'n aw! Ka hihkhelh hon theisak inla, Kibawlhoihna ding hun hon pia in aw, Na lungtuah ding ka utbel hi! Hon taisan pah ke'n aw, K'on suk khasiat khaakleh, Mihing lah i bukim ngalkei a, Khasia in hon nuse pah ke'n aw! Na khasiatna hon kum inla, Ngaihdam ngetna ding hun hon pia in aw, Na lungtuah ding ka utbel hi! Houlim le'ng, kikum le'ng, Lungsim tawng a thaamte luikhe le'ng! Ngaikhe le'ng, zakim le'ng, Bukimlouhnate kitheituah le'ng Itna bukim piang ding hi! (C) Siamsinna leh Vakiangbu

By ~ Vz Vualnam Thou aw, thou aw, tuunnu aw, Zaitha khauhsak, hatsak aw, Sian in hon siam hon huai hen la, Miza di'n zolei hong paal ve aw. Anglai henkol khaina kumkhua sawt zong Na etlawmnate tulloulai; Zata'n paalzu ning bang siim zong Kumsawt paalzu ning bang peenloulai. Na kawlni suak zata' di'n lam-etna; Na siktuisiang zata nepna; Na huihkhi zata tawldamna; Na sakmin in zata sinlai lawng. Zaila'n hon awiawi ning tuunnu Zolei; Zolengthe bang khuangkhuang ning e. Ka tongluang dai a siatlei suah chia'n Tuunnu nang ang a zaaldenta ding. (C) Siamsinna leh Vakiangbu

By ~ Vz Vualzong Hon deih ing i chi a, Hon ngai ing i chi a, Hizong guitunglou, Hizong khantoulou, Banghang hiam? Itpen hi i chi a, Ngaihpen hi i chi a, Hizong guitunglou, Hizong khantoulou, Banghang hiam? Banghang itna tulkhin hiam? Banghang itna vulkhin hiam? Banghang itna kiamkhin hiam? A tawp dong i chiam itna! Itna kep haklua hiam, Ngaihna khoihaklua hiam, A kim zong daihlou, A tawp dong daihlou, Banghang hiam? Itna tengden nuamlou, Ngaihna thaamden nuamlou, Chimtaak khinta hiam? Deihkhop khinta hiam? Banghang hiam? Silpaak a paalna di'n, Muhlouh zungzaam kisam. Itna a paalna di'n Muhlouh zungzaam kisam. A zung zaamloupi in A paal lam-en naak hang. (C) Siamsinna leh Vakiangbu

By ~ Vz Vualnam Tulai simthu mei bang ziinglai ah, I vangkhua nun zong kidangta e. Khat toh um bang khawl tonghouta le'ng Khat in dougal chi e mel in ma. Vangkhua khat simthu khat a luanlai Ngai nang e koi a thaamta hiam aw. Tu'n lah vangkhua khat sakmin khat hal Simthu khat a luannna omlou e. Vangkhua sai bang saat tuan a pupa, Diamdiam simthu khat in luang uh a Khangsawnte'n ngilhlou dawngia bang zom, Tu a eite'n ngilhta ding i hiam. Lai ah na e suutsiamkei ve'ng aw, Lenkum sawmtam luankhat a luan nua Tu a luinih kaa i gawmmoh aw, Chiahsa laukhate'n hon awi ding hiam! Tuahlouh simthu heem ah khia ni e, Ma bang patsa gia bang zom ni e, Vangkhua ah dialdial in luang ni e, Khangsawn lou bang i khualna hi e. (C) Siamsinna leh Vakiangbu

By ~ Vz Vualnam Na khuukte hong zoi a Na kalsuan a bah chia'n, Na sinlai tamkham a Na mittui a luan chia'n, A tawpna chi nai ke'n, Hinkhua lankhe nai ke'n. Na khukzoi lei ah nga'n, Sinlai Sian' ang nga'n, Hong haat ding, hong dam ding, Thuumna tampi kuul lel hi. Maban bing gawp in lang, Phuut ngaphuailou in lang, Lampi mialgawp in lang, Pal ngamhuailou in lang, Maban mong chikei ni, Lampi mong chikei ni. Maban Sian' ang ah nga'n, Lampi sian' khut ah nga'n, Kihong ding, hong vaak ding, Thuumna tampi kuul lel hi. Tua chia'n na lawm, Tua bang na muhleh, Amah zong hiai thute'n khamuan in. Hiai bah leh tawl khen ah, Lungzin-lungngaih gaal ah, Hatna-hansanna om, Nunnop vuichinna om, Tuangtunma chiah zel ni, Tuanglam ah puukkei ni. Tua ah lungsiik omlou, Lunglawp in khankhua liam, Tua mun tunna ding in Thuumna tampi kuul lel hi. (C) Siamsinna leh Vakiangbu

By ~  Paumuanlal Guite BaBs “Kheih....kheih....kheih..... khosung mipi kuapeuh in ana ngai un, hausapute nupa a chinat man un a lou uh nungak-tangval in va khohsak ngai ding...” chi’n ka khua ua tang-au pa hong kikou a, kei leng mi huh a kuan chih khawng ka kithalawp lam ahihbanah tangval taktak hi naikei mahleng kho neuchik adi’n chu tangval bang a ngaih aom ka hihna toh a kuan ding in ka kisa hi. Ka vanken ding tuithawl, tu leh temta ka kawlzalpi a guang in mansa in ka om hi. Ann nekhin neukha tawldam zek in khomual kingakkhawmna ding mun zuan in ka pai pah vengveng hi. A mun ka tun in kuamah ana om naikei ua, huchi’n kei leng lawmte ngakna kawm in singkung khat a kingai in nahteh ka na muut hiauhiau hi. Huchia ka tutlai in thakhat in ka nung hon kibeng a, lunglen china chia chi’n ka khua ua dia melhoih penpen Chingnu in hon nuihsan selsal hi. Chingnu dia gingta lou law mahmah ka hi ngei ding a ka kiguih zawzen. Ka dawn zokna ding le theilou in ka om heihoi a, ka chi bang a lii

By ~ Vz Vualnam Sangnih-le-khat buhtuhlai in Talpak uital hon Thanlon ah Bang mang zong a hong diangluut, Kangleipak hilou zogam hi, Lungmuang, khamuang a saam bang zallou ding. Tai un talpak uital hon tai un, Na pu na pate' sul zui in, Loktak phai kawm na tunma taizel un, Na nung ah ZRAte'n hon delh, Ka pu ka pate' sul zui in. Na pu na pate' lu la a Khomual a ka suan ngilhta maw? Na tuun mu ut nawnlou maw, Zogam-zolei a khe n'ong ngak? Zogam ah tawldam-tawlnga theilou ding. Zogam ah ZRA om ung, Luang khat tat na'ng zong awnlou ding! Hon ngapthoh a hong kuante'n Tuunpi kua na phukha umaw! Tai un, tai un, tuunpi'n hon delh tai un! --- Zogam Tangval (C) Siamsinna leh Vakiangbu

By ~ Vz Vualnam Aw zolei duangvul maw! Na paalzu tawpkang u maw! Na etlawmna mualzou maw! Al bang mang dia tuangnung siah, Kua'n haam bang hon huai diam aw! Zolei sakmin i lohna Lenkum tam liamta e, Zolei zuun ding i chiamna Lenkum tam veita e, Chiamna koi a vaithaam hiam aw! Zolei, zolei chia i loh, Sesum i lohna hiam? Zolei paal ding chia i chiam, Ei ngen paalchiam i hiam? Zolei paalsik makai paal e! Khangsawn siamsil suutte aw, Bilh bang thoh hunta e. Tuunnu zolei paalna di'n Khohma bang zaam ni e. Zolei paal mah chiam ve ni e. Sesum ngai a tongchiamte Tuanglam awn nawnkei ni! Angma khual a tongleelte Sing bang khe ve ni e! Zolei a paalna ding hi e! (C) Siamsinna leh Vakiangbu

By ~ Vz Vualnam Lemna thu kamkhat leng gentheilou napi, Kisiatna ding thu gen a daitheilou kitam! Vok-an la dia sawlzoh leng hilou napi, Khodung-khovai a mi vo dia diang peih kitam! Khantouh na'ng seem dia khut zungkhat leng liik peihlou napi, Khosung patausak ding a nitha seeng peih kitam! Makaih dingdan thei hetlou napi, Makai ut a kipiingpavei kitam! Mahni hamphatna ding kia sual hi napi, Nam a ding a sual ka hi chi kitam! Kum tampi kilemkipsa nam khuam phelse napi, Keembit kisa a tha-it mahmah kitam! Namte' lak a hon zahlaaksak dimdem napi, Mipite' kiang a gupna zong a thuumthuum kitam! A thei nawnlou khangthakte kikhenna sinsak napi, Nam a dia silpha seem a kingai kitam! Khangthakte' mangngilh sa tualgaal samsam napi, Lemna leh muanna sam kisa kitam! Neekzonna ding lel a gam leh nam zang hi napi, Gam leh nam itlua bang a kibawl kitam! A tawm diingdiing i tam ua, A tam diingdiing i tawm ua, Hichi lingling hi hang! Hiai vingvengte khawng maw khangthu dia i teel!

By ~ Vz Vualnam Kiakniamna hilou a Khantouhna hon tun ding, Makai a deihhuaita ngei maw! Neksiatna hilou a Khosuahna hon tun ding, Makai a deihhuaita ngei maw! Angmasialna hilou a Angvaanna hon tun ding, Makai a deihhuaita ngei maw! Kihuatna hilou a Ki-itna hon tun ding, Makai a deihhuaita ngei maw! Kikhen-kibal hilou a Kipumkhatna hon tun ding, Makai a deihhuaita ngei maw! Makai lah eimah bawl hi a, I nam domsang ding, I gam gia bang zuun ding, Namte' tung a hon laamtou ding, Bawl leng a chihhuaita ngei maw! (C) Siamsinna leh Vakiangbu

By ~ Vz Vualnam Vai ngalsaute aw, talpak uital aw, Hon simmohkei un, hon nuihsankei un, Ka makaite uh kitawng mahle uh, Zogam hum ding salpha omlai ung e. Zogam salpha sangtamte, Gawl bang puukbei zong leh Kawlchiang ka tawm ding a Ke'n pat bang sai lailai ning. Hon ngapthohkei un, hon neepbawlkei un, Khuai bang hanglai ung tuunpi luunlai bang. Kei bang giallai ung ngapthoh a n'ong kuan leh Na tuun'siang zong nawnlou ding hilel teh. Makaite kisia, makaite kibal, Sum itte kikhen, sum deihte kina, Hamphatna delh uh, hizong zogam itte Khuam bang kip simsing bang gilden ung e. (C) Siamsinna leh Vakiangbu

By ~ Vz Vualnam Hey! Lawmte hong paikhawm un. Zolei di'n septheih bang i nei hiam? Tukawl i tawi diam namtem? Siamsil i suut diam zaitha? Zolei in nang leh kei hon ngak. Hiangkot tang ah malgam don leng, Songtui lenkawl ah gamlai don leng, Thangmual ah simgam don leng paallou lai, Nang-le-kei' zaitha a paal ding hi. Singchin ommuan mun paal chiat e, Va chih in ommuan mun zolei awi, Zohuihkhi zong munmuanglou e, Ei aw tutkhawl a lawmlou e. Tutkhawllou zaitha neemlou seem le'ng, I zogam nuam sil bang hong paal dia, Tawisawn momnoute'n ning bang zou dia, Zuapa zaitha hi chi ding uh aw. (C) Siamsinna leh Vakiangbu

By ~ Vz Vualnam Hinkho sunni hong kaai a, Innka a pan nitum kuan i gaal et chia'n, I hinkhua chiahsate i suutkiik ding a, Kisiikna i nei chiat ding a, Kipahna i nei chiat ding a, Tua nitum ding i etliam lai in Hinkhua bang bel hiam i telta ding a, Khatvei piangkiik ding hi le'ng, Theita mah ning, i chi dia, Himahleh tua sunni a tum dia, A hong suak nawntakei ding hi. I haatlai a i delhdelhte, I tuailailai a i lunggulhte, Hun i neihlai a tampi i mansaknate, Tua innka a i khitui ding ahi uh- Kisiikna khitui hiam! Kipahna khitui hiam! (C) Siamsinna leh Vakiangbu

By ~ Vz Vualnam Lanva lui! Lanva lui! Nang nidang a tuisik luang kelkel! Lungtai a lungging biabia! Bang hon loh a maizen ua, Bang hon suah a maizen ua, Hawktui bang a na luan maimah! Na chiau nin guam a suah ua, Na suang leh piauneelte a hon suh ua, Na kuam a singkungte a phuuk ua, Tuuk hawk teng nang zoulou a, Na kuang dim a n'ong luan chia'n, 'Lanva lui bangchi hita ahia?' A chi uh. Nang hon hun ding omlou hia? Nang hon keem ding omlou hia? A tate uh dangtaak a a thuum ua, Dawn ding tuisik a taaksap chiang un A hon meeklup uh Lanva lui, Nang a hon suun ding uh! (C) Siamsinna leh Vakiangbu

By ~ Vz Vualnam I ngaihsutnate a kitonlouh hun in leng, Thagum chipahkei ni! I muhkholhnate a kikeelkiit hun in leng, Thagum chipahkei ni! I vaiguan a kituahlouh hun in leng, Thagum chipahkei ni! Ei a di'n i ngaihsunkei a, Ei a di'n i mukholkei a, Ei a di'n i guangkei a, I gam a ding zaw in! Ei' di'n i sualkei a, Mipite' di'n i sualzaw hi. Ei' di'n i semgimkei a, I tate' di'n i semgimzaw hi. Mipite kipumkhatsak zou peuh le'ng, Phazou lawm aw! I tate kituaksak zou peuh le'ng, Phazou lawm aw! Kituahlouhna, kilemlouhna, Kitheihsiamlouhna, Mutkuangkei peuh leng, Mit khong ding lawm aw! (C) Siamsinna leh Vakiangbu

By ~ Vz Vualnam Kuizil zaap mu bang ka leng dia Zolei kawl killi teng ah, Zomi aw hanlungchiam ni Chi'n simthu va puak ning e, Laizom' siang va leel ning e. Zoheisa bang zolei zeem ni, Lenkawl sokngei paalluun bang. Zolengthe bang khuangkhuang ni e, Zolei awiawi ni. Malgam gamzang Lamka pan in Simgam Thuklai peel dong in Amual-aguam mapang chiat le'ng Zolei paalluun ding. Zohuihkhi bang zaitha nuam le'ng Zogam-zolei khanna di'n. Singta toh tan bang kimna di'n Zaitha suuk ni e. (C) Siamsinna leh Vakiangbu

By ~ Vz Vualnam Paite it ing ka chih ding zong Nuam nawnkei! Zomi it ing ka chih ding zong Nuam nawnkei! Paite itte'n na itdan uh tuam! Hon itpih thei ke'ng! Zomi itte'n na itdan uh tuam! Hon itpih thei ke'ng! Paite itkei ni, Zomi itkei ni, I innveng chiat itzaw ni, Kikhotuah in kineekngaih ni! Ei kia'n uunlou in! I khosung chiat itzaw ni, A khantouh ding deih bel ni! Ei huangsung kia hilou in! Paite it ing ka chih ding zong Nuam nawnkei! Zomi it ing ka chih ding zong Nuam nawnkei! (C) Siamsinna leh Vakiangbu

By ~ Vz Vualnam Bualna zolei nunnuam i chih Limsun ngoumei vang hiam aw? Zohuihkhi laang vang zaw hiam aw? Zosiktui siang vang zaw hiam aw? Limsun ngoumei kia'n nuamlou dia, Zohuihkhi lang kia'n kimlou dia, Zosiktui kia'n lung kuailou dia, Tui bang gawm a nunnuam hi e. Galdot lentu et lawm i chih Tullel heisa paal vang hiam aw? Sevau leh kuahsuang vang hiam aw? Ngilhmoh mualdawn tumtai vang hiam? Tangkhat paal in zeemkimlou dia, Lentu singchih paalkim chiat a Galdot zokuam etlawm hi e, Lenmui kai toh sinlai lawng e. Setang khohpha ngailou om diam? Sungneek nian ding ngailou om diam? Thulguah hiam aw sunni hiam aw, Sungneek setang tuang a tunna? Khohlou tul tuk sunni' hai nua'n Kammei in kaihbi bang zial e. Thulguah hong luang kilpi hong nel, Setang tuangtung siah bang niang hang. Tuan a pupa khuai bang hangte Simthu khat a luangte hi e. Dou a laan leh pal bang nang khawm, Thangkhawm-zuangkhawm pupa hi e. Ei zong lungtup sial bang liante, Dialdial

By ~ Vz Vualnam Jesu'n vangam lampi sialkhin na chi ua, Na tangkoupih vengvung ua, Lamka hon tawnkhalou ahi tawk di maw! Vangam i hichi gamlaat uh! Vangam lampi ahih ngalleh, Hoih in kilawm mahmah ve'n chin! Siangthou hiuhiau ve'n chin! Akiim-akiang vangam bang ve'n chin! Nou innkong a hon tawnkha hia? Koilak tawn a hia? Koi a va naih ding i hia? A'ihkaleh vangam lampi kochiik leh haksa Chia a tangkoupih nilouh un Tedim road hon tawn houh hia leh? Siampu'n a chi! (C) Siamsinna leh Vakiangbu

By ~ Vz Vualnam Zokuam simthu mei bang ziinglai ah aw; Lengthe'n kumchin a zaila hong awi e. Nahsing nuai teng khuai bang ulsak e; Simthu ziinglai a thengta ding bang e. Lengthe nang lah na zaila danglou e; Pupa' khan a na zai dang nailou e. Kou lah ka simthu uh dang zouta e; Pheiphung khaikhawm chiamte'n khaituamta e. Limsing dangkai tongluan danglou lengthe; Na dungsuun in simsing bang gil le ung; Lungtup khuamual tuanglam nuamtuam ding aw; Gamkuam tatna lam bang zangtuam ding aw. Nang dung lah hon suunlahta ung e lengthe; Chiamna simsing bang gillahta ung e. Ka zaila uh oihtuamta e lengthe; Ka simthu uh luantuam zouta hi e. Ka simthu uh zu bang peeng zouta e; Zolei vonte' sinlai kuailahta e. Ka zaila uh a kaih dang zouta e; Zolei miza'n awingamlahta e. Zaila danglou nang na kaina ah aw; Zolei sunnau bang na awiawi ve aw. Simthu danglou nang na kaina ah aw; Zolei simthu lei bang lellel ve aw. Kumchin na zaila zata'n ngai hen aw;

By ~ Vz Vualnam Gilkhang buh-al khuangkhuang ta e Sunni hamtang kai hiihiai e Ei aw laukha zuangthou moh in Laikhun ah maimit siing hang e Laizom dougal kisiah ding in Zin in doh-ai a khim hiam aw Ziin in doh-ai khimlou ding a Ni bang elte hi ding hi e Laizom dougal kisiah le hang Laltang gawl bang a puuk ding hiam Laltang lah gawl bang puuklou dia Gawl bang puuk ding laizom hihang Laizom toh tuakmaw'n i hei zong Laltang kaitui bang zawlkei ni Eimah henkol kisiah ding in Laltang toh khau bang hualkei ni Khangthei lou zuangthoukei le hang Kimpih zingvai hong man ding a Khangthei lou zuang i thoh chia'n aw Kimpih ukva'n leng ding hi e (C) Siamsinna leh Vakiangbu

By ~ Vz Vualnam Zu leh sa toh ma kai kei ni, Khatzaw sam teelzaw ni! Angmasialna toh ma kai kei ni, Khatzaw sam teelzaw ni! Duh-amna toh ma kai kei ni, Khatzaw sam teelzaw ni! Deihsak tuam nei in ma kai kei ni, Khatzaw sam teelzaw ni! Lungneuna toh ma kai kei ni, Khatzaw sam teelzaw ni! Haina toh ma kai kei ni, Khatzaw sam teelzaw ni! A tonkhawm thei lou thilte I tonsak nilouh ziak in I nam zahlaakta! I phung kibalta! A ton ding thilte Tonkhawmsakta ni! I nam palluunta hen! I phung chingta hen! © Siamsinna leh Vakiangbu

By ~ Vz Vualnam Chikchia'n i paal dia? Zalenna i muh chiang in maw? Hi lou hial. Eimah i kivaihawm chiang in maw? Hi lou hial. Sim leh mal i gawm chiang in maw? Hi lou hial. Mihoih lou teng a bei chiang un maw? Hi lou hial. Paite a haat chiang in maw? Hi lou hial. Zomi a haat chiang in maw? Hi lou hial. Makai hoih i neih chiang un maw? Hikhana ve. Himahleh michih in nasep awlmoh a, Mahni sepsa a khantouh sawm a, Diktat tak sum leh pai lam a, Bandh bawl man lou zen a i tha-it chiang in, Huai hun chiang in i paal ding hi! © Siamsinna leh Vakiangbu

By ~ Vz Vualnam I kituahlai ua nuam i sakdan uh Ngilhta na hiam? Dialdial a i luanlai ua mi'n hon endan uh Ngilhta na hiam? I pankhawmlai ua mi'n hon zahtatdan uh Ngilhta na hiam? Thukhat a i luanlai ua ma i sawndan uh Ngilhta na hiam? Khekhat khai a kal i suanlai ua i hatdan uh Ngilhta na hiam? Takheh! chia hanlung i chiamlai uh Ngilhta na hiam? Kituahlouhna in a hon suksiatdan Ngilhta na hiam? Kisat-kivuakna nung a meimapawn' melsiatdan Ngilhta na hiam? Kikhen-kimak in supna a hon tutdan Ngilhta na hiam? Kikhin-kigal in a hon nenniamdan Ngilhta na hiam? Kituahna in hon domsang ding a, Kikhenna in hon nengniam ding a, Pha i sak bang in vaihawmta ni! © Siamsinna leh Vakiangbu

By ~ Vz Vualnam Ka tuun aw tuun nunneem aw e Kei ka lungzuan nalua hi e Sunchin puaksing bang lel ta'ng e Simlei gi bang khen nuam ta'ng e Chiahta leng, tuun aw chiahta leng Nuachiang ham bang na vai ding hiam Chiaukuam leng bang na khuang ding hiam Sinlai sok bang na mawk ding hiam Kei ka lungzuan hon thei le chi'n Lamkhuang bang hon khou ngam lou in Ngaihsial a theuna lengvan ah Zin bang n'on kha nuam ding hi e Lungzuan ngilh di'n chiahta leng lah Nuhtuun huai ding bansam ding a Nuhtuun lelliang ding geelngam la'ng Lungzuan a sial ding geelngam la'ng Nuhtuun huai di'n khawllai leng lah Suihlungzuan dai bang nawk ngam la'ng Luankhi toh tui bang ton ngam la'ng Ngaih teng galsial bang don ngam la'ng Chiah tonta ni e nuhtuun aw Simlei a zuang tuam om lou in Khosial dai bang thenna lengvan Tuun aw zuantonta ve ni e © Siamsinna leh Vakiangbu

By ~ Vz Vualnam Mahni hamphatna dia pawlpi zang tam, Fimkhul loh! Angmasial ziak a mipi pei lung-am tam, Fimkhul loh! Mahni deihdan sepkhiatna dia mipi zang tam, Fimkhul loh! Thudik gum thei lou dia koltang tam, Fimkhul loh! Maipha zon ziak a a kaupau tam, Fimkhul loh! A neekna uh zuausan thei lou tam, Fimkhul loh! Nekzonna dia nampi zang tam, Fimkhul loh! Zuauthu veek a gupna zong tam, Fimkhul loh! Zingchiang nangawn galmuh lou makai tam, Fimkhul loh! Nam phelkhap thei lel ding makai tam, Fimkhul loh! I theihlouh kaal a khetbuuk dia hon zang ut tam, Fimkhul loh! Dik leh dik lou khen thei lou mipi tam, Fimkhul loh! Awphawi tuamte huat ziak a nam it kisa tam, Fimkhul loh! Theihna tawmchik toh kipilsak khangnou tam, Fimkhul loh! Gelhgelh lele bei ngei lou ding khop a tam, Fim in fimkhul loh! © Siamsinna leh Vakiangbu

By ~ Vz Vualnam Mi khat leh nih i kihuat man in I nam thuaksak kei ni! Mi khat leh nih i kideihsak man in I nam thuaksak kei ni! Sum leh pai i lunggulh man in I nam thuaksak kei ni! Hamphatna i lunggulh man in I nam thuaksak kei ni! I deihgawl man in I nam thuaksak kei ni! I duh-am man in I nam thuaksak kei ni! Thuneih i ut man in I nam thuaksak kei ni! I nam' thuakna i tate' thuakna! I nam' siatna i tute' siatna! I nam' puukna khangsawnte' puukna! A pil leh pil loute'n leng thei hang, A lamdanna zaw nasep ah ahi! (c) Siamsinna leh Vakiangbu

By ~ Vz Vualnam Suihlungzuan leh omlai vei aw Koizaw puaksing bang gikzaw hiam aw Koizaw'n duangtham a zenzaw hiam aw Sinlai khau bang hualhual ngawn ing e Vualngaih vang a lungzuan khuam bang dou Sakduang neem ve'n gawl bang puuk law'ng e Solkha kimkhen luankhi toh ngaihsial Tangliang khamkha'n ka pham ding bang e Omlai vei a sakduang a vulleh Vaimang banzal in let thei hi e Vaimang banzal in a lehlah leh Kha kia'n nuai simlei khenta ni e Lohlah paal ngai a lung a zuanleh Nuai simlei ah leh na'ng om lou e Lungzuang a phamna lah om lou a Luankhi toh kumvei ding neem ing e Omlai vei a khakiak a omleh Lungzuan khakiak zong omleh chi'ng e Lungzuan lou bang lel a kha kia in Simlei khosial mel in ma nuam ing © Siamsinna leh Vakiangbu

By ~ Vz Vualnam Zungolvei' kiang ah, 'Ba na zu it na hia?' 'Na hinkhua suse gawp hi lou hiam?' Ka chi a, Khamtheih goih mi' kiang ah, 'Ba na khamtheih tawpsan lou na hia?' 'Hinkho manpha na deih ka hia?' Ka chi a, Sum a kimawl mi' kiang ah, 'Ba na kimawlna nuse lou?' 'Na innkuante na khual kei a hia?' Ka chi a, Khen chia'n i hinkhua hon susia thilte I khahkhe ngam kei kha naak! I hinna a sesak deuhdeuh ua, I lenkip deuhdeuh. Ka hinna zawngkhalsak hiai itna, Zungolvei in zu a it bang in ka it hi! © Siamsinna leh Vakiangbu

By ~ Vz Vualnam Khitui! Lungzuan khitui! Zankhang in na hong luang a, Sunkim in na hong luang a, Ka lut theihlouh itna pakhuan Galdot a lungzuan ka sial chiang in. Hinkhua a pan kithalawpna na luanmang a, Lakmai a pan nuihna na taimang a, Kithalawpna leh nuihna om lou hiai hinkhua, Kua a hing ngap nawn mahmah dia! Khitui! Lungzuan khitui! Nisuah in na hong luang a, Nitum in na hong luang a, Ka lut theihlouh itna pakhuan Galdot a lungzuan ka sial chiang in. Khente'n itna ah kipahna a mu ua, Khente'n itna ah khitui a mu ua, Khente'n itna ah sihna a mu ua, A'ihleh itna a khitui i muhleh Ba khasia a phun i hia? Sihna mu dia seh hi leng leng Bang phun theihna i nei a? Khitui! Lungzuan khitui! Zing in hong luang inla, Zan in hong luang inla, Sihna'n a naak a huk mateng Hiai mitte ah hong luang zel in! © Siamsinna leh Vakiangbu

By ~ Vz Vualnam I tha neihsun teng A om sun kituhna a zang lou a I ki-ottuah theih chiang un, I genkhiat sun teng Kikou-kidemna hi lou a Kihanthawnna a hih chiang in, I sepkhiat sun teng Sak leh khang nawk hi lou a Sak leh khang huai a hih chiang in, I neih sun teng Ei kia'n ki-ut lou a Veng leh paam i hop theih chiang un, I lampi sial sunte Mite' puuk na'ng hi lou a Kal sangzaw suanna a hih chiang in, Thanghou leh Liandoute bang a Mim tang i kiphelhawm chiang un, I palluun ding a, I zalen ding hi! A kua'n makai taleh, Miteng' makai hi ding a, Miteng a ma' a hi ding a, Kineisak tuam om lou dia, Deihsak tuam om lou dia, A kua'n vaihawm taleh, Hampha tuam om lou dia, Thuak tuam om lou dia, Michih tanchiat a lungkim ding! Tua Zolei sunmang lunggulhhuai Eite khut ah kinga! Tuni a piangsak ding maw? Zingchiang ngaklai ding maw? Kum nawn ngaklai ding maw? Angmasialna'n miteng' mit A totsak ngakzaw ding maw! Nam dangte henkol sang in Angmasialna'

By ~ Vz Vualnam Lamka, leivui khopi! Lamka, buannawi khopi! Phalbilai a Lamka na hong zin a, Leivui in a hon tuamleh, Tuuklai a na hong zin a, Buannawi in a hon tupleh, Nuammoh sa in phun mawkmawk ke'n! Gam it ka tam ua ahi! Zo leivui nangawn nuamtuam! Zo buannawi nangawn nuamtuam! Lampi hoih nei le ung Leivui om lou dia, Buannawi om lou dia, Vai alkatala in hon hal dia, Diik ding, pal ding om lou dia, Zuang lawlou ding ka'i umaw! Huaiziak in lampi bawlna dingte in Innte bawl in garite ka lei ua, Lampi ka gina bawl kei uh! Leivui in a hon tuam a, Buannawi in a hon tup chia'n Ka gam utoh ka kizopna uh thuukseem! Phalbilai a Lamka na hong zin a, Leivui in a hon tuamleh, Tuuklai a Lamka na hong zin a, Buannawi in a hon tuamleh, Nuammoh sa in phun mawkmawk ke'n! A vaihawm ding kituh zomah lai ung! Kua hiam in ka gam itdan uh Dik ngel lou na sak uleh Gam itdan diktak Hon lak mah dih ve ua! © Siamsinna leh Vakiangbu

By ~ Vz Vualnam Zawlnei hi ke'ng, Maban mu ke'ng, A'ihhang hiai teltak in mu ing- Paite tawisang ut a kipumpeite'n Paite niamkiaksak hiaihiai! Mipil hi ke'ng, Thu tam thei ke'ng, A'ihhang hiai teltak in thei ing- Zomi tawisang ut a kipumpeite'n Zomi niamkiaksak hiaihiai! Bang dia kidalna dia Paite zang? Bang dia kiliahna dia Zomi zang? Paite it hileteh Kituahna zong niteh! Zomi it hileteh Khendalh kei niteh! Thuneihna itte'n Hiamgam poisa lou! Sum leh pai delhte'n Kikhen-kibal poisa lou! Namte' kikhenna ah Thuneihna ngah uh! Namte' liamna ah Sum leh pai ngah uh! A ta it taktak minu'n, A ta sehnih a suah sang in Midang in tang leh utzaw! Solomon hi ke'ng, Thuchiim-lachiim thei ke'ng, A'ihhang a tangthu zakha ing! © Siamsinna leh Vakiangbu

By ~ Vz Vualnam Ngaihsak nawn ke'n a chi ua, Limsak nawn ke'n a chi ua, Ngai nawn ke'n a chi ua, It nawn ke'n a chi ua, Tawpsan in a chi ua, Maban sawn in a chi ua, Itna tua bang liang a baihsam hileh Pasian' tapa hong sih kuul ke'n teh! Itna haichilh na hon chi ua, Pasian bang in sihpih nai sam ke'ng! Ka itna leh Pasian itna a teh hi ke'ng Mihing itna zong baihsam lou hi, A chi hi lel ing! A it thei loute lah mohsa khang, It tawp thei loute lah mohsa khang, Eimah vaang chiat pozou di'n Sian in hon siamleh chi lel hang! © Siamsinna leh Vakiangbu