LENGTHE
By ~ Vz Vualnam
Zokuam simthu mei bang ziinglai ah aw;
Lengthe'n kumchin a zaila hong awi e.
Nahsing nuai teng khuai bang ulsak e;
Simthu ziinglai a thengta ding bang e.
Lengthe'n kumchin a zaila hong awi e.
Nahsing nuai teng khuai bang ulsak e;
Simthu ziinglai a thengta ding bang e.
Lengthe nang lah na zaila danglou e;
Pupa' khan a na zai dang nailou e.
Kou lah ka simthu uh dang zouta e;
Pheiphung khaikhawm chiamte'n khaituamta e.
Pupa' khan a na zai dang nailou e.
Kou lah ka simthu uh dang zouta e;
Pheiphung khaikhawm chiamte'n khaituamta e.
Limsing dangkai tongluan danglou lengthe;
Na dungsuun in simsing bang gil le ung;
Lungtup khuamual tuanglam nuamtuam ding aw;
Gamkuam tatna lam bang zangtuam ding aw.
Na dungsuun in simsing bang gil le ung;
Lungtup khuamual tuanglam nuamtuam ding aw;
Gamkuam tatna lam bang zangtuam ding aw.
Nang dung lah hon suunlahta ung e lengthe;
Chiamna simsing bang gillahta ung e.
Ka zaila uh oihtuamta e lengthe;
Ka simthu uh luantuam zouta hi e.
Chiamna simsing bang gillahta ung e.
Ka zaila uh oihtuamta e lengthe;
Ka simthu uh luantuam zouta hi e.
Ka simthu uh zu bang peeng zouta e;
Zolei vonte' sinlai kuailahta e.
Ka zaila uh a kaih dang zouta e;
Zolei miza'n awingamlahta e.
Zolei vonte' sinlai kuailahta e.
Ka zaila uh a kaih dang zouta e;
Zolei miza'n awingamlahta e.
Zaila danglou nang na kaina ah aw;
Zolei sunnau bang na awiawi ve aw.
Simthu danglou nang na kaina ah aw;
Zolei simthu lei bang lellel ve aw.
Zolei sunnau bang na awiawi ve aw.
Simthu danglou nang na kaina ah aw;
Zolei simthu lei bang lellel ve aw.
Kumchin na zaila zata'n ngai hen aw;
Tuakmoh zata bilh bang hong thou hen aw.
Tuakmoh zata bilh bang hong thou henla;
Damtui luankhat in luangtonta hen aw.
Tuakmoh zata bilh bang hong thou henla;
Damtui luankhat in luangtonta hen aw.
(C)Siamsinna leh Vakiangbu
Comments
Post a Comment