TOUPA KA GU MAI AW
By ~ Leon Guite Khristmas special..... Khristmas hin nuamtak vaidawn ut in vengchih, kilchih ah mite nuamsatak in chiau vengvung uhi. Khosungte cheimawi in biakinn te nalh tak in zem ua, kilawm thei mahmah hi. Veng chih a YPA ten leng hiai hun nuam sung a thilsia atun khak ding lau in kilchih ah vengtu koih in naktak in panla uhi. Huchih laitak in veng duty heutu khat in naupang khat abil ah ahon kai a, "en dih ua athil guk" chi'n alawmte kiang ah kikou lala kawm in gen hi. Naupangpa bel puan-ak se nipnep a nit ziak a angou na kolang zou nawnlou khat â in a ding dinden hi. A puan kawm ah van tun lianlou khat tun thinthen a, aman pa'n laksuh in phelsak buatbuat hi. Tua a van bawm sung ah aksi lim khat leh Khrismas putek lim khat a om hi. A kîm a omtên naupangpa simmoh tak in kou zialzial uhi. Huchi'n police te hong pai ua naupangpa tuh a innlam uah pawkheta uhi. Pa Khup bel azi'n asihsan nung atapa Lianpu chauh toh khosa uhi.