ITNA DIK

By ~ Vz Vualnam


It napi a aziak na theihlouh a
Nawlkhiin a om napi a na it teitei a
Mangpha khaak a om napi a
Na lunggulh teitei a
Chiamnuih leltak a bawl a om napi a
Thuakzohna na taaksaplouh a
Engbawl a om napi a
Thangpaihna himhim mun na otlouh a
Hihnat a om napi a
Thuukzaw seem a na it seemseem a
Haina himhim khualzoulou a
Na lungsim tengteng a na delh a
Lam-etna a omlai hitaleh
Lam-etna a omlouh lai hitaleh
Na lungsim a na lam-et teitei a
A itpen toh kiton helhel na muhlai a
Lungtang a khitui luang zungzung kawm a
Ahoihna ding a Pathian na ngetsak theihleh
Lawm aw, itna dik na mu hi!
Itna dik zaw na mu ngei a
Himahleh huan a thei paak teng in
Gah asuan kimlouh bang un
Itna teng leng kopkim in ahong paikei uhi
Itna kopbei na tankhaak leh
Hichitel a itna thuuk leh zaa
Avuaksuak mai ding maw
Chi in khase hetkei hial in
Na itna in na it a zuiden ding a
Mi’ zi ahihna innsung ah
Mi’ pa ahihna innkuan ah
A kipah ni a kipahpih ding in
Dahna khitui aluan ni a nulsak ding in
A kiang ah gin-om tak in a omden ding hi
Gin-om itna lah na peta ngal a
Hunte ahong paizeel ding a
Tua itna na lohna lungtang ngei ah
Itna dang ahong dawn nawn ding a
Huai itna hong paak nawn chiang in
Hawmthoh tak a hon kepsak ding
Chimtaak hun himhim neilou a zuun ding
Tua bang mi’ kiang ah na peta ding hi
Kihihhaat inla, thuakhaat in
Denchiang in na vaang ahong buching ding a
Huai chiang in na hinkhua na nung et ding a
Lungkim kisa in na nui hiuhiau ding a
Na vaang hon bawlsak pa’ kiang ah
Kipahthu na gen nilouh ding hi
Na dahni in, na thuaknat ni in, na lungkiat ni in

Hiai thei gige in-
Tu a loupateh khawng ne a om lungnou melse tak na chihlah
Zingchiang bang a akilawmpen pangpaleek hi ding ahi ngal a!

©Siamsinna leh Vakiangbu