ZODAWN PAN LAIKHAK -II
By ~ Pau Lian
Phavang saanlai, zingsang tuimei kai thieithiai nuai ah khelahtak in Chiching in mangpha khakna in chibai hon buuk a, akhut taklam tuh kalenkip tinten a, amah enkawm in "Ching, chikchiah I kimukik nawndia chih zaw ka gen theikei, a baih theipen in nang muh tuh kaki nepna lianpen ahi, na pemna lam uah lawm leh vual dang vapawl ding nahih man in non pilvang di aw, tu in kikhen mah le hang ki khenden lou ding ihi, khatvei tei Pathian in a hoihna itung ah hon suah dia kimukik nading ihi chi kawm in a khut tuh sawt simtak ka letnung in kakhah ta. Chingboi in a nute amalam a saupi ana tungtate gal et zual in mithah nemtak leh khelah tak in kei hon enkik a, hitham e Umang, nang adia ginom gige ding kahi, kei adin nang mudia hong zin haksa tading ahihna ah nangbek phavang nawn chiang a christmas van lei dia Lamka nahong hoh teitei kaki nepna ahi chi in, a nuihmaitai hon suah a, kenleng painuam leh damtak in aw chi in Chingboi leh a innkuante Zodawn apan khosakna hoihzaw lamen a Lamka a a pem ni uh December ni 14, 1999 kum in ngainapi leh khelah tak a kava khaklai tuh ka mangilh theihlouh thil ahita, huaimah tuh maitak tak a Chingboi ka muh tawpna leng ahi maimah hi.
Kum 16 paisa in Chingboi kana theita, lawmta ka hih ban uah Zodawn khua lian louchik a khangkhia, alim a-al nekhawm a, annkhing mehkhing sawkkhawm a ka hinkhua pai liamsa kana zatkhop pih, ka lawmhoih ahih man in hon pemsan guih uleh thawmhauna in ka dim hi. Pemzou hile ung pemnuam sam na ing e ka chi a, himah leh kapu kapa lutang phumna, ka pianna zodawn khiaklahna in ka lungtang a netum zel hi. Khovel hoihlouh ziak a bitna zong a khokhat apan khokhat a vapem a nam makai te order bang a grouping neih a inn van vatuah thumanna leh bitna ahi chih thei mah leng innsung a papen omlouh nung a pasal keichauh adia na gikpi ahihlam kahaih dek hetkei hi. Lamka lam mah zot a ginna thuchiam a nei a hinkhothak pat mai kei mimal tak ah bithuai kasak zawk leh katel hun tam mah leh sum leh pai omlouh man in ki nemthawn lua kahih dan kamu a, kangaihtuah khak hun inleng hiaibang lunggulh nate mangngilh kasawm sek hi. Hiai bitna zong a nambing, khobing ki punkhop na in kou itna kal ah bitna sang in kikhenna leh thawmhauna hon tunzaw ta, veng leh pam ki thutuak a khosalai thakhat in kikhen dalhna leh pemkhiakna nasatak hong suak maimah ta hi. Khosung ading a aneinung zaw kichi ten tuh hon pemsan zungzung uh ahih man in tamlou chik khokiang a ki punkhawm in thawmhau kisatak leh pemzawh sam hun lunggulh gige kawm in hinkho thak ka hon panta uhi.
A kha akha kivei mah leh khatvei chiang in lungngai vungvung leh mi englua a omhun a hong tam mahmah sek a, akhen chiang in vangse lua kisa leh lungleng tak a hiai Zodawn gam,mite'n a pampaih uleh a taisan namun a loukhou a thousi thovai toh khosak det niam huailua sakna leh mite bang a laisim sam a lamet huaizaw hinkhua zatlouh poi kasa tuntun sek hi. Chingboi in kaki pahna teng pempih adiam aw ka chisek a,hiai kisikna beitheilou in ka hun omlai teng a luah dimta a, akikhel nung in bang kaloh dia ka chi a, puakdan siam kaki zil gige hi. Mihing hibuang hiaiteng zouzai ngaihtuah theih kakipak a, himahleh lungsim thawmhau leh khavatak a hun kazat ni a hong tam in vangse lua kisa in luankhi kanul khazel hi. Hun leh khate kihei hun in ka mangngilh louhding a ka chiamsa, a nuihmai tai sieusiau zalmang a kamuh a atak ding kana saknaak khem, ama a ding in bangmah hikei mah leng kei ading a ka lametna, ka hinna kimkhat bangmai a ka ngaih poimawh Chingboi ngaihna in ka tuaidawng thahatlai a zoi sak khanak, akhen chiang in laikhak kikhak zel mah le ung niteng dakkal teng a muniam leh amah theinuam ka hihna ah Chingboi ngaihna in panpihtu bei in keivuak in hinkhua ka zangta hi. Chingboi in lamka a veng a pam uh omdan leh a college kaidante uh a laikhak ah hon genchian zel a, tua laithon kasim chiang in Chingboi kakiang a om bang in kamu a, a gen peuh mitkha a mukawm in keileng vatelkha dan in kaki hisap a, tua laithon honkhak tuh adang a hong tun nawn ma ama mel kamuhna omsun ahih na toh chi in niteng phial in ka simsim mai hi.
Hun leh niten ngak neilou in mualliam zungzung in kikhek den mahleh ken amah ka itna bel tua hun kikhek zelte zawh zohlouh in a bul a kapat uh tua itna, ka latkhiak uh nengkhah leng a lamdang naikei, lungsim ah kiptak in kakem a, kimuh ding kal ngaklah tak in kinepna toh ka om hi. Chingboi inleng a college kai hun in, a suty hun hitaleh, lawmdang a polhni a a lungsim tawng a kei hon ngaihtuah a hon vom gige ahih dan hon hilh zelzel bang in kenleng ka loukhoh namun hitaleh,ka gamvak hun hi in ka om maimai hun in ka suangtuahna masa ah Chingboi, a sakmin leh a ngaihhuai na maimel tai siusiaute ka mu gige hi.
2000 December khabul a hong hita, tha-iit tak leh phur tak in buh khamzawh khou zoulou himah leng kipahna lungsim guktak a neikawm in buhte ka sekkhawm ua, malta tamlou zuakding neisam chi in huaite buaipih kawm leh tawl om in inn ka om a, sunkam a pangkhang tau a malta te zalh zel a om in ka khodak a, inn pam ah christmas pak etlawmtak, pakkhe pahta ding kamu guih a, huai enkawm in ka lungsim ah "gamla nawnlou eive Chingboi nang kon muhni ding ", ka chi hi. Sawm kholhsa bang in malta keu hunhun in Lamka va zin tei kasawm ta hi. Ni tamlou nung in phurtak leh kinepna thupi penpen toh malta iippi dim 2 pua in ngaih lenna lamka lam zuan in motor ah dimtek in ka tuangsuk ua, miten haksa samale uh ngaih siang zotna lampi zaw kei din a nuampen ahi, lampi khu in leivui khu in mitmul nasan paak niuniau mah leh ka lungsim inzaw khua a phawk kei, ka lungsim a vakvai a, ka ngaihpen Chingboi heina vangkhua leh a huihnung dingdan tanpha motor tung ah ka chiam lawk sim maimah hi. Dakkal tamtak lampi kawi leh tang, kuak leh mam, sihtheih mantheih na lak ah ka tai nung un nitaklam dak 7 lakvel, khomial nung in Lamka ka tungta hi.
Tanau neisam chi in tanaute pangbel in kava kinga a, zansawt khuallou in kaman hun in Chingboite innlam atheite kawkmuhna bang in kava zuanta hi. Chingboite inkong katun in mi tam mahmah uh ahi chih a nuih ging uapan in kathei a, linlua himah leng gam hiaitan a khualzin hingal a hoh utna a lut ngamlou a thawnkik ding tuh ka utlouh man in ka lutsuak ta hi. Ka gintak bang in mi tamsim tak ana tu ua, kalut toh kiton in veilam pang a meiphu awi a lamdang satak a ana en Chingboi kamu a, keileng nuikawm in ama lam ka manawh ta hi. Chingboi leh a sungten lamdang satak in hon chibai ua,lengla tetoh huai nitak bel thukhotang leh kholam thu ngen kikum in limtak in ka houlim ua, chingboi bel nidang toh teh in a maitai kei chih leng etmai in ka theichian hi. Sawtsimpi ka tut nung in gari tuanna le gimhuai chi in pai din kakisa a, ka dintouh leh chingboi pan "Mang, hon zin ngalsam na hih leh zingciang pathianni leng ahih toh ann nong nedi aw hon chi a, kenleng Pakham huai hial zaw ngaikei ka chi a himahleh a chih teitei ziak in aw ka chita hi. Gate tan chingboi in honkha a, kenleng amah ka en a, ching nana tuamta ngei chi in mangpha khak in ka paisanta hi.
Zan ihmut limtak a ihmut zawh in zingkal a hong hita.Hih dingteng lah hihzou,pathianni a hihtoh kikhop lah uthuai samlou chi in annek zawh in lawmte kianglam phadin ka pawt a, mun tuamtuam phak zawh in ka annek nading Chingboi te innlam ka zuan hi. Innkong ah nisalum awi a tukawm in kaki houlim ua, Chingboi pi intuh kholam thu theinuam in thukan toh thuah in hon houlim pih den a, Chingboi annhuan a buai toh kihoulim nading hunhoih kanei mankei hi. Annek hun in gilvah tak in ann kane ua, Chingboi nute'n kikhawm ding in hon zawn mahle uh ka utlam ahih louh man in ka nial a, pipi toh akikhawm louteng in inn kana ngak uhi. Chingboi lapawl sa ding a kikhop ngai teitei ahih man in kisuanglah tak in a kuan a, akikhop sung uh pipi toh T.V kana en uhi. Kikhawmte a hong tawp tak un Chingboi leng a lawmte pasal 2 toh a hong lut a, kenbel amau kua a, bang ahi ua chih bel theikei mah leng Chingboi mit apan nopsak louhna om ahi chih kamu hi. Meiphu awikawm a T.V en in zansawt simtak huaini katu a, himahleh lenglate dem zoulou ka hih man in ka paita hi. Chingboi in ani ma a gate tan hong kha hinapi huai nitak varandah pamzek tan a hongkha a, kenleng bangchi oi Ching ka chih leh nuam sakchi ngellou in bang zaw chikhang hon chi a, kenleng nuam salou in mangpha kakhak a, ka paita hi.
Lungsim ah zaw nguina chi a hong kituhta, bangziak a chingboi nguina in kei hon hichi khoih khak atel a ka chi a, ngaihzawk dang nei hiding in ka muangmawh a lah ka lungsim taktak in a gingta theikei, kum hiaitan lawmlawm kaki ngaih nung ua Chingboi amik amak ka theihsuaksa in hon hichi zekhem din ka gingta kei, himahleh mihing lungtang suang a bawl lah hisamlou a, detdou lou thei zaw ahi ka chita,thuchiang theinuam in ka kinawh gawpta hi. Ngaihdan tamtak piangte lak ah atamzaw ah thu theilou a ngaihdan suangtuahna numei vaai pipi in huai nitak bel ka ihmu hak mahmah mai hi.
Hon zekhem hileh bang kalawh dia chih lam enlou in, gingtalou sasa in ka muangmoh mawk hi. Athu thei leng kalung nuam ding in ka gingta a himahleh nitamlou sunglel khualzin kahih na toh buaizawk nading om ahih man in zingkhua hong vak in ka malta puakte kava zuak a, vaigam leng hisamlou, Lamka a vaite rate nuai a kun gige lin pipi in kakin ziak in kavan teng lawk ngellou in kava khawngta hi. Ka tunnate inn katun in zinglam dak 11 bang ana gingta, paiding ka chih hun lah a zingchiang ahih maimah man in lungsim kinawh tak in ann kane a, kanek khit in Chingboi muding in kava pawt hi. Chingboi in lai ana sim a, maban a exam neiding himah leh gen utluat nei kahih man in kava houpih a, katung ah lungkiakna nei maw Ching...ngeina na bang nawnkei kaci ta hi.
Chingboi inleng hon dawng a, ngeina banglou chih lampang zaw nang thil lakdan hizoding ahi, sawtpi kimuhlouh nung a kimu a gendi theilou tel zaw kahi mah ve, ka haksatna genkhe thei ding gumna neileng chilua kahi hon chimawk hi, kenleng eh..bang haksatna nei namawk a, gen ve, nagen gige mah hilel lou maw, damlouh na nei maw chi in kadong a himahleh Chingboi in a genkei, hon en a, kei haksatna zaw a thuak a haklua, himahleh ka haksatna na theih in nang lungkhamna hon guan zodi, na theihhun ngak mai in, lungkim tak a nakik ka deihpen ahi, maitai sawm mahleng haksa kasa, mi hehpih huai kahi hon chita hi, kenleng ka dong a, agen nuam bilbel kei, nitaklam tan a gen noplouh tuh kenle ka theinuam samkei chi in thangpai petmah in ka pai a, varandah tan hong nungdelh in, na theisiam kei a ahi, nitak ciah hong hoh teitei in chi in hon gal gen a kenleng dawng selou in ka paitum san hi.
Maitai loutak a zinpa inn hongtung chihte omlouh nading in kamel ka bawl a, nidang sangmah ale maitai zaw in ka om a, himahleh ka lungtang tem a dawt bang in ana a, chikmah a thuguk hon neihkhum ngeilou Chingboi in tua sun nitum ale dotkhiak butlouh thuguk aneih mawk lamdang kasa petmah hi. Min kipak mahmah in hon mumah le uh dahna in ka lungtang a tuam a, theisiamlou ka hih lam thei napi a theisiam lou nahi hon chih laidep in gentup nei hiding in ka gingta zel hi. Nitak hong hih in hohnuam lua lah hingal thangpai kisa leh lungsim bukkak a ka omsung in nitak a hong sawt dek man zezen hi. Bangteng hileh chi in kakisa a Chingboi te innlam zuan a kapai lai in lamkiang a dawrkong apan Chingboi leh a lawmte 2 ana ding ua, Chingboi in hon sam a, hoih e ..hong hohlou di nata dio chi a na van puak di hon pedek kahi, lawmte zawn zen a hon chi hi. Kenleng manhak ka hihdan gen in kuva kahai ua, sawtlou Chingboi te inn a vapawt in, deihbang a kihoutheilou in ka paita a, theihnop tampi theilou in ka ihmu a, khiaklah tampi mah neikawm in tenna zodawn lam zuan in zingsang phalbi khovot nuai ah baihtak in Zodawn lam ka zuanta hi.
Lungngaihna tampi toh Zodawn damtak in katung a, innkiim innpam kingaina tak a zin leh tungte kiveh tuah khiukheu a om nuam natel e hiaibang lung noplouh lai in chih louh tuh kipah nading dang kamu kei. Miten hon nuai et mah le uh hiai Zodawn ah itna kimpen in kamu a, nuam kasa a himahleh kipahna zaw a kim thei nawnkei, kipahna langbei toh hichia gimtak a tung dia kaki nep louhlouh maizen toh ka chi hi. Ka tunni nitaklam in Chingboi lawmnu, kei ading aleng midang tuanlou Kikim loukuan pailam hon bang a, a van di Chingboi in akhak ka piak kawm in thil omdan ka hilh a aman leng lamdang asa mahmah mai hi. Gingtalou sasa in ka laithon kasim ciah kitheimai nave, nitak chiah hong hoh leteh chi in hon paisan ta hi.
Nitak in keileng kava pawt a, ka gintak louh in tua ka lawmnu uh Kikim laithon ka simkhawm ua, bangmah thupi akigelh kei, himahleh huai laithon sung sawn ah kei a ding liauliau, Kikim in kei hon piak ding laithon ana om a, hong pah ngamlou in ka kientuah ua, Kikim in hon laksuh gaih in hon simta hi...
To Umang,
Kum tampi lawmta sang a thupi zaw a iki polh nung in khosakna ziak in mel kimulou in a kum a sim mah ina omta, ka pemni ua ka kichiamna ka mangngilh naikei, nang leng mangilh lou mah in nagen bang in iki mu a, lungkimna leh kipahna boltu hiding isak lai in thangpaihna boltu lel a suak maimah. Kei phawk taklou himah leng non phawk a, na itna siangthou non piaklai man in hampha kaki sa, na paima ding sun a ka thil gen noplouh in hon khase sak kha ding himahleh gennuam a hon theisak hileng huai in khasiatna a hon piakzawk ding dan chiang tak in kamu. Khasia leh thangpai in ka hon koih ngeikei a, koih leng kon sawmkei, nang leng khasia leh panpihtu bei in non taisan ngeikei a, itna in ikal ah vaihawm ahi ichih lai in nu-leh-pate lemgeel in vaihawm zota ding a bang, maban zaw kei maimai in gentheih kanei kei, tum taktak a ki iit I hih leh na vaihawm dandan hon zui ding a mansa kahi, kei hong hel a hong chialte sang a kal nasuan kinzawk a ngai ding, kei ziak a nang hehpih huai na hih sang in ken huai hehpih huaina katel zaw.
Pathian daan leh daanlou inzaw ikal ah gen a nei nawnkei, itna in a hih zoh vek ka lamet leh ka teel pen ahi.
Nang a kinem
Chingboi
chih hon simsuak a, Kikim inleng gen ding a theikei, pasal neidek eive maw ka chih leh Kikim inleng hon lakloh koih na e maw, nang hon tel bang in bangdia na zin a genchiang mailou adi, hon sitsimta a na guk khak ding houh lau hinteh maw hon chi hi.
Gennop tam mahleh gending pen theilou phial in ka tutmun ah ka om a, hiaibang laithon kasim in ka lungtang ah natna hon behlap mahmah hi inleng kathei hi, nidang a hun sawt tak lungzuang tak a akum a sim kimulou a itna tak toh kana lamet gige tu in ka thuakgimna gah loh zoh huailou phial a kilang a van a kikhai bangmai a a loh ngaihna theih huai hetlou a hon om lamdang kasa a, sawtpi ngaihtuah dedu a ka om nung in Kikim kiang ah bang loh leng hoih nasa chi'n kadong hi. Kikim ngei inleng hiaibang thil tuah ding aleng na lametlouh ahih na ah maban saupi ading a na lunggim na dal mai inla, na lungsim guk a na thukhenna zui mai in, zingkhua hong vak dia, na lungsim a hon kihei mai ding, itna tak a na et ahih leh zaw naguk mai thilhoih ahi, Chingboi inleng hon khotuah lou hetkei, himahleh nakal ua palai ompen pilvang tak a na hepkhiak theih leh zaw pasal pil nahi mai ding, aman leng hon ngai mahmah hinapi maban ah kuan hon khosuah pih zodiam chih a et tuh numei pil te adia thuptawp lakna ngeina ahi hon chi hi.
Ka dinmun, ka khosakna leh ka neih leh lam ka en a, ka ching zoukei chih kathei, ngai mahleng Chingboi adin lah hinkhua lamet huaizaw ka deihsak ngal a chi'n Kikim ka hilh a, Kikim inleng dik asa mahmah, himah leh hiai itna kalthu maban limchit leh louh in thu a puak in zaw itna buching hilou ahi, itpen toh khosak a anuam ahaksa thuak mualsuah mah kenbel telzaw kahih a chih chiang in ka ngaihtuahna a hon subuai semsem hi. Kikim toh sawt simtak ka kihou nung un kapai a, ngaihtuahna mulmal neilou hizaw in itna kichi theilou hizaw leng chi vungvung kawm in ka pindan sung ah laipuan kala a, Chingboi kiang ah ka itna thu leh amah ka khual dan hilh a maban a suan ding neilou ka hihdan hilhzaw ning chin laipuan ah amah ka lungtang tawnga ka itna ka gelh ta hi.
Itpen leh ngaihpen
Chingboi
Na laithon kana mu a, taksa damtak in Zodawn tung mah leng lungsim zaw zawngkhalna leh ki-iiplahna in a dim maimah, chikmah a na khasiatna ding genlou a om kei kua kahia chih na hon thei, chikmah a na siatna ding bol ngamlou pa'n tuni tan dong in nang a dia thil hoih deih lai ahi chih thei in aw. Neuchik I hih lai apan in kon iit a, nakipah na ka thei a, nadah hun in kana dah a, nakah hun in ka mit ah khitui luang hial kei mahleh ka lungsim guk in kana kap sek, na gilkial ni in kei a avah leh kana kisuanglah a, nagil avah ni a kei a akial leh kipaktak in ka thuak zou gige, theigah nekding na duhni in lou din na hon ngen a, singkung sang pipi ah kava kah a, theigah limchi kamuh masakpen nang a din kon khia a, nana ne a, limsa nahi chih na maimel apan kamuh lel inleng kei a din lungnopna gensenglouh hon petu ahi.
Kum tamtak khangkhawm ihi a, huai hunsung inleng namel kamuh noplouh ni omkei, na aw kaza gige nuam a, na nuihmai mel zan a ka ihmut natawm in kamu, himahleh tu in muntuam tuak ah khosa in I om a, kimuhkal ngaklah tak a tuikang ngak a kangak nung in ikimu a, lungdam tak a kik ka kisaklai in lamdang tak a kik kana hizaw hi Tapa tangkhat, vual eng, kei sanggah leltak in na laithon kana sim a, kana theisiam a, himahleh nangbel nana muh ding kon laikhak na theisiam kei ding, kingai mah leng hiai Zodawn na pawt sansa, huihpi vuahpi, thousi thouvai nuai a damsung a nekzong ding leh nadeih sulnung zui ding inzaw hong kik kei hial in aw, tel mah leteh lakik mai inla na maban a kong zazaw kihong bangbang ah ana lut zomai in. Itna in hihzou vek mah leh sum leh pai leh nu-leh-pa vualzawl na inleng hinkhua nuamtak hihzou thou nading ahi.
Ki it kingai mah leng latkhiak ding tampi om ahi. Kon it a, kon ngai a himahleh ken nang kon itna na maban a hinkho nuam na zat theihna ding in ka lankhia a, nangleng kei non itna lankhia inla amah leh na nu-leh- pa deih telna ah pai mai in, hon itlou hikeng, nang a dia tualniam kana hihman lel hi chi in theisiam maini Ching..
Zodawn pan laikhaktu
Na Umang
Nitamlou nung in hiai laithon kakhak thei pah a, huaihun inbel kei leh kei kimohsakna in kadim a, bangziak a hichitel a ngai hinapi mi adia phal a lankhe thei kadiam ka chi a, lamdang kasa petmah hi, a lehlam tak ah bel hiai bang thu buaihuai kei maimai in bang chin ka tokbuai theidia ka chi a, Chingboi ngai mahmah lengle lou nasep pih din pammaih kei mahmah inleng kasa hi. Lamka a nuamtak a khosa ta bang din kei duh-am man in lou nasem din officer toh kiteng ding lai kava gukhe zenzen dia ka chi a, a khenchiang in bangziak a mi ki it kingai lai chih thei napi a sepna sangtak neihman leh Dansiangthou suanlam a mi kalthu a bohsiat nak uh adio? Pathian maibiakna dia mi kingai lungkham sak a dansiangthou a kiteen in siangthouna a nei teitei lai dia maw chih peuh ka ngaihtuah sek hi. Bangteng hileh Laithon a tunna ding ngei a tung a, a thukkikna leng mupah ding in kaki gingta a, ka gintak bang ngei in December 20 ni in tua dawn kikna laithon tuh simtheih ding in kakhut ah ka tawita hi. Tua laithon ka sim a, ka lungsim ah pona tak in "theisiam nuamlou neive maw "chi in a genchet dingdan leh a thukkik ding dan ngaihtuahna ah a ompah hi. Tua laithon ah Chingboi in nounel tak in kei a hon itzawk dan leh panpihtu bei ahi dan hon hilh a, kei lam a tupguhna leh vaihawm dandan a a maban kinga a chih teitei ten hon su lung-am a, vapi maiding kadiam chih sawtpi kangaihtuah nung in chimoh tai ngeina chi in ka laikhak muh Kikim kava simsak nawnzel mai hi.
Kikim in a hon nuihsan a, pasal din le pasal kei na chia, na kisikna ding lel hihkha di neive aw, nang va kalsuan inla vapi leteh zou himai neivoi hon chi a, kou numeite vangtahna na theikei a ahi, pasal in hon ngai petmah chi henla, hon tangkhalou guihding chih a theih huntan inleng honpi ding in kalsuan ngam keileh numei in bang ka hihthei ding ua, numei pasal lam zuan in hon paileh khotang in a mohsak dingdan uh nathei, na it taktak leh kisa inla vapi in, nazi dia mansa ahi, anuam ahak thuak din akiman chih nathei hon chi a, tua laithon tuh hon simthak nawn hi.
Itpen leh ngaihpen
Umang
Na laikhak kana muh in kipahna sang in dahna in hon zelsuak zaw hi. Ka kinepna bang a na laithon sang a nang mahmah taksa a hong tung zaw a kumtawn a khosa khawm dia kei honpi maidia kon gintak lai in na laithon vuak hong tung maimah. A thutun sung a kigelh bang a dio ka chi a, ka theinuam a lah ka enngam kei, kei a dia hoih deih gige a kon theih in tu in ka hoihna ding sang in dahna lampi ah non khakhia, Ka itna nala a, himah leh tua itna mineizou leh sumhau kiang ah na lankhe maimah. I neuchik lai hun nagen a, i khankhiak huntan a khiaklah huai nasak pente leng na gen bang in kenleng ka khiaklah penzaw khopi hinkhua a vual eng a omsang a Zodawn a a lim-a-al ne a, innsak inkhang toh kihouthei a, anuampen zal zoukhawm a, adah huaipen thuakkhop mah ahi. Kum hiaitan vei iki ngaih nung in ken kamangilh ngeilouh ding zaw hiai laithon ahi ding, min a itpen a taan sang a sihna a tel lai in nang maw non latkhiak ding, Mi'n itna kichi ah duh-amlua kichi omkei a chih lai in maw nang kisuanlahna ziak lel a non khahsuah ding.?
Ka dinmun en in, numei ka hi, nang ngaih ziak a nu-leh-pa thu palsat a Zodawn lam zuan a kei kon tai zawk ding, ka minsiat naphal diam?Min beven nu hon chi le uh leng nang itna ziak in poisak kanei kei, himahleh tubang a chiangkuang lou a gup neingamlou a na om inzaw minsiat khulel ding a kong kalsuan a dik kei, minse nu, beven nu nana chidia, na hon pampaih khading. Pasal kisa a non it taktak leh suanlam bol kenla, sihdong a kisik a poisa a ka om sang in hon hunkhia in aw, nang ading a veihuai nawnlou ka hihkhak leh leng hon theisiam sak mai in a kin theilam in, akikhel nung inzaw vangsia kisa in kahna om dah mai hen.
Nang hon it..
Chingboi
Lamka
chi in Kikim in hon simsuk zungzung a, asimzoh in hon ensal gemgam a, bang a na poimawh dang, genbeh ding omlou hilou maw chi in ka laithon ka sakhau ah hon guansak kawm in zingchiang mahmah a vazin ngeingei ding in hon hanthawn nilouh ta hi.
Nitak zan khovak in ka ngaihtuah a, ching zoulou deuhmah zaw keive chih leng kathei, zin ding hi lengle paiman ding leltak leng sakhau apan sawk ding a omkei, ka voktal uh tuuk 5 vual zuak zen in pang ding chi lengle huai huntak in singtang kawm ah vok leinuam aki mu zenzen kei ding, khe in pai taleng lah ka tung samkei dia ka chi a, ka malta man ka puaktung sunte bat ditna din ana pekha naikei leng zaw maw ka chi a, poi kasa petmah hi. Bangteng hileh bat zon a inkal kitawi zen a hiaibang ching zoulou napi a phut luihna a pan suahtak nading in chi in zingsang beltak in kathou a, kho hausa pa kiang ah sum 500 kava ba a, innsung awlmoh huailua hinapi in phallou sasa in Lamka lam ka zuanta hi.
Lamka ka tun in lin pipi in katunna luiteh kava kinga nawn a, kihah mengmeng in ann kane a, a nitak in Chingboi teh kava hoh pah hi. Chingboite inn kava lut dek leh mi tamtak ana tudim phetphut ua, singpi khol om hi awmtak in sung leh pua ah mi adim uhi. Chingboi ka kan bawl hang in naupang te'n athei kei ua, inn phaitam lam a meiphu kiang a tu pipi kiang ah thu omdan kakan ta hi. Pipi inleng thu omdan teng kim sipsip in hon hilh a, zingchiang a Chingboi in pasal neiding ahih dan leh tu nitak a amau a pasal ding toh biakinn a reharsal nei uh ahih dan hon gen hi. Lamdang satak in ka om a, ahun geihgeih a gamtang thei hileng ka deihlai chanlou ding hing a chikawm in leh hiai itna kei a ding a kisiamlou mah hinte maw ka chi a, ngaimah leng sialkhau sattat tu a tuphing a pang nuam tuan nawnlou kahih man in pipi kiang ah Chingboi kiang ah hiai ana piaksak in aw chi in ka sakhau apan sum 100 a pasal neihding ka loppih na chi in kapia a, pipi inleng om tadih ding in hon khou nilouh a, om ding kahi chi in kamsiam a khem in kapai a, ihmu louhial in zan khovak in kalum a, zingkhua hong vak in kathou a, nunlui teng kilatna Zodawn lam zuan in ka paita hi
Chingboi toh damsung a ding in khosa khawm kei mah le ung hinkhua nuamtak zang a a pasal toh innkuan bawl uh ahi chih kaza zel a, Lamka kaphak chang inleng kaki muzel ua, kihuatna leh kikel-kitna omlou hial in kingaihnatna dik toh maitak tak in ka kihou ua, amah ka it ziak a keitoh hinkho haksa a thuak louh a a kemsiam zoding lam theisiam tak a a zot zawk pen ka damsung a ka kipahna hizaw ahi chi a amah kiang a ka kimuh hun ua kagen chiang in khase sim mah leh kenbel thildik a kalsuan kahi kaki chi a, kuaman hon phat keimah le uh lungzuan hun a ka khasiat ni natawm inleng huai kei leh kei a thupukna dik kalak pen hon hehnem tu in kazang zaw hi. Chingboi ngaih ziak in kum tamtak haksatna tuak mah leng ama nopna dia ken aguk a kathuak kan a itna thupi omlou ahi ka chi hi a, ka thuak lai ding leh ka thuak mualsuah zohna ding in hatna petu Pathian kiang ah hatlou sasa in ka thum zelzel hi.
BEITA
©Siamsinna leh Vakiangbu
Phavang saanlai, zingsang tuimei kai thieithiai nuai ah khelahtak in Chiching in mangpha khakna in chibai hon buuk a, akhut taklam tuh kalenkip tinten a, amah enkawm in "Ching, chikchiah I kimukik nawndia chih zaw ka gen theikei, a baih theipen in nang muh tuh kaki nepna lianpen ahi, na pemna lam uah lawm leh vual dang vapawl ding nahih man in non pilvang di aw, tu in kikhen mah le hang ki khenden lou ding ihi, khatvei tei Pathian in a hoihna itung ah hon suah dia kimukik nading ihi chi kawm in a khut tuh sawt simtak ka letnung in kakhah ta. Chingboi in a nute amalam a saupi ana tungtate gal et zual in mithah nemtak leh khelah tak in kei hon enkik a, hitham e Umang, nang adia ginom gige ding kahi, kei adin nang mudia hong zin haksa tading ahihna ah nangbek phavang nawn chiang a christmas van lei dia Lamka nahong hoh teitei kaki nepna ahi chi in, a nuihmaitai hon suah a, kenleng painuam leh damtak in aw chi in Chingboi leh a innkuante Zodawn apan khosakna hoihzaw lamen a Lamka a a pem ni uh December ni 14, 1999 kum in ngainapi leh khelah tak a kava khaklai tuh ka mangilh theihlouh thil ahita, huaimah tuh maitak tak a Chingboi ka muh tawpna leng ahi maimah hi.
Kum 16 paisa in Chingboi kana theita, lawmta ka hih ban uah Zodawn khua lian louchik a khangkhia, alim a-al nekhawm a, annkhing mehkhing sawkkhawm a ka hinkhua pai liamsa kana zatkhop pih, ka lawmhoih ahih man in hon pemsan guih uleh thawmhauna in ka dim hi. Pemzou hile ung pemnuam sam na ing e ka chi a, himah leh kapu kapa lutang phumna, ka pianna zodawn khiaklahna in ka lungtang a netum zel hi. Khovel hoihlouh ziak a bitna zong a khokhat apan khokhat a vapem a nam makai te order bang a grouping neih a inn van vatuah thumanna leh bitna ahi chih thei mah leng innsung a papen omlouh nung a pasal keichauh adia na gikpi ahihlam kahaih dek hetkei hi. Lamka lam mah zot a ginna thuchiam a nei a hinkhothak pat mai kei mimal tak ah bithuai kasak zawk leh katel hun tam mah leh sum leh pai omlouh man in ki nemthawn lua kahih dan kamu a, kangaihtuah khak hun inleng hiaibang lunggulh nate mangngilh kasawm sek hi. Hiai bitna zong a nambing, khobing ki punkhop na in kou itna kal ah bitna sang in kikhenna leh thawmhauna hon tunzaw ta, veng leh pam ki thutuak a khosalai thakhat in kikhen dalhna leh pemkhiakna nasatak hong suak maimah ta hi. Khosung ading a aneinung zaw kichi ten tuh hon pemsan zungzung uh ahih man in tamlou chik khokiang a ki punkhawm in thawmhau kisatak leh pemzawh sam hun lunggulh gige kawm in hinkho thak ka hon panta uhi.
A kha akha kivei mah leh khatvei chiang in lungngai vungvung leh mi englua a omhun a hong tam mahmah sek a, akhen chiang in vangse lua kisa leh lungleng tak a hiai Zodawn gam,mite'n a pampaih uleh a taisan namun a loukhou a thousi thovai toh khosak det niam huailua sakna leh mite bang a laisim sam a lamet huaizaw hinkhua zatlouh poi kasa tuntun sek hi. Chingboi in kaki pahna teng pempih adiam aw ka chisek a,hiai kisikna beitheilou in ka hun omlai teng a luah dimta a, akikhel nung in bang kaloh dia ka chi a, puakdan siam kaki zil gige hi. Mihing hibuang hiaiteng zouzai ngaihtuah theih kakipak a, himahleh lungsim thawmhau leh khavatak a hun kazat ni a hong tam in vangse lua kisa in luankhi kanul khazel hi. Hun leh khate kihei hun in ka mangngilh louhding a ka chiamsa, a nuihmai tai sieusiau zalmang a kamuh a atak ding kana saknaak khem, ama a ding in bangmah hikei mah leng kei ading a ka lametna, ka hinna kimkhat bangmai a ka ngaih poimawh Chingboi ngaihna in ka tuaidawng thahatlai a zoi sak khanak, akhen chiang in laikhak kikhak zel mah le ung niteng dakkal teng a muniam leh amah theinuam ka hihna ah Chingboi ngaihna in panpihtu bei in keivuak in hinkhua ka zangta hi. Chingboi in lamka a veng a pam uh omdan leh a college kaidante uh a laikhak ah hon genchian zel a, tua laithon kasim chiang in Chingboi kakiang a om bang in kamu a, a gen peuh mitkha a mukawm in keileng vatelkha dan in kaki hisap a, tua laithon honkhak tuh adang a hong tun nawn ma ama mel kamuhna omsun ahih na toh chi in niteng phial in ka simsim mai hi.
Hun leh niten ngak neilou in mualliam zungzung in kikhek den mahleh ken amah ka itna bel tua hun kikhek zelte zawh zohlouh in a bul a kapat uh tua itna, ka latkhiak uh nengkhah leng a lamdang naikei, lungsim ah kiptak in kakem a, kimuh ding kal ngaklah tak in kinepna toh ka om hi. Chingboi inleng a college kai hun in, a suty hun hitaleh, lawmdang a polhni a a lungsim tawng a kei hon ngaihtuah a hon vom gige ahih dan hon hilh zelzel bang in kenleng ka loukhoh namun hitaleh,ka gamvak hun hi in ka om maimai hun in ka suangtuahna masa ah Chingboi, a sakmin leh a ngaihhuai na maimel tai siusiaute ka mu gige hi.
2000 December khabul a hong hita, tha-iit tak leh phur tak in buh khamzawh khou zoulou himah leng kipahna lungsim guktak a neikawm in buhte ka sekkhawm ua, malta tamlou zuakding neisam chi in huaite buaipih kawm leh tawl om in inn ka om a, sunkam a pangkhang tau a malta te zalh zel a om in ka khodak a, inn pam ah christmas pak etlawmtak, pakkhe pahta ding kamu guih a, huai enkawm in ka lungsim ah "gamla nawnlou eive Chingboi nang kon muhni ding ", ka chi hi. Sawm kholhsa bang in malta keu hunhun in Lamka va zin tei kasawm ta hi. Ni tamlou nung in phurtak leh kinepna thupi penpen toh malta iippi dim 2 pua in ngaih lenna lamka lam zuan in motor ah dimtek in ka tuangsuk ua, miten haksa samale uh ngaih siang zotna lampi zaw kei din a nuampen ahi, lampi khu in leivui khu in mitmul nasan paak niuniau mah leh ka lungsim inzaw khua a phawk kei, ka lungsim a vakvai a, ka ngaihpen Chingboi heina vangkhua leh a huihnung dingdan tanpha motor tung ah ka chiam lawk sim maimah hi. Dakkal tamtak lampi kawi leh tang, kuak leh mam, sihtheih mantheih na lak ah ka tai nung un nitaklam dak 7 lakvel, khomial nung in Lamka ka tungta hi.
Tanau neisam chi in tanaute pangbel in kava kinga a, zansawt khuallou in kaman hun in Chingboite innlam atheite kawkmuhna bang in kava zuanta hi. Chingboite inkong katun in mi tam mahmah uh ahi chih a nuih ging uapan in kathei a, linlua himah leng gam hiaitan a khualzin hingal a hoh utna a lut ngamlou a thawnkik ding tuh ka utlouh man in ka lutsuak ta hi. Ka gintak bang in mi tamsim tak ana tu ua, kalut toh kiton in veilam pang a meiphu awi a lamdang satak a ana en Chingboi kamu a, keileng nuikawm in ama lam ka manawh ta hi. Chingboi leh a sungten lamdang satak in hon chibai ua,lengla tetoh huai nitak bel thukhotang leh kholam thu ngen kikum in limtak in ka houlim ua, chingboi bel nidang toh teh in a maitai kei chih leng etmai in ka theichian hi. Sawtsimpi ka tut nung in gari tuanna le gimhuai chi in pai din kakisa a, ka dintouh leh chingboi pan "Mang, hon zin ngalsam na hih leh zingciang pathianni leng ahih toh ann nong nedi aw hon chi a, kenleng Pakham huai hial zaw ngaikei ka chi a himahleh a chih teitei ziak in aw ka chita hi. Gate tan chingboi in honkha a, kenleng amah ka en a, ching nana tuamta ngei chi in mangpha khak in ka paisanta hi.
Zan ihmut limtak a ihmut zawh in zingkal a hong hita.Hih dingteng lah hihzou,pathianni a hihtoh kikhop lah uthuai samlou chi in annek zawh in lawmte kianglam phadin ka pawt a, mun tuamtuam phak zawh in ka annek nading Chingboi te innlam ka zuan hi. Innkong ah nisalum awi a tukawm in kaki houlim ua, Chingboi pi intuh kholam thu theinuam in thukan toh thuah in hon houlim pih den a, Chingboi annhuan a buai toh kihoulim nading hunhoih kanei mankei hi. Annek hun in gilvah tak in ann kane ua, Chingboi nute'n kikhawm ding in hon zawn mahle uh ka utlam ahih louh man in ka nial a, pipi toh akikhawm louteng in inn kana ngak uhi. Chingboi lapawl sa ding a kikhop ngai teitei ahih man in kisuanglah tak in a kuan a, akikhop sung uh pipi toh T.V kana en uhi. Kikhawmte a hong tawp tak un Chingboi leng a lawmte pasal 2 toh a hong lut a, kenbel amau kua a, bang ahi ua chih bel theikei mah leng Chingboi mit apan nopsak louhna om ahi chih kamu hi. Meiphu awikawm a T.V en in zansawt simtak huaini katu a, himahleh lenglate dem zoulou ka hih man in ka paita hi. Chingboi in ani ma a gate tan hong kha hinapi huai nitak varandah pamzek tan a hongkha a, kenleng bangchi oi Ching ka chih leh nuam sakchi ngellou in bang zaw chikhang hon chi a, kenleng nuam salou in mangpha kakhak a, ka paita hi.
Lungsim ah zaw nguina chi a hong kituhta, bangziak a chingboi nguina in kei hon hichi khoih khak atel a ka chi a, ngaihzawk dang nei hiding in ka muangmawh a lah ka lungsim taktak in a gingta theikei, kum hiaitan lawmlawm kaki ngaih nung ua Chingboi amik amak ka theihsuaksa in hon hichi zekhem din ka gingta kei, himahleh mihing lungtang suang a bawl lah hisamlou a, detdou lou thei zaw ahi ka chita,thuchiang theinuam in ka kinawh gawpta hi. Ngaihdan tamtak piangte lak ah atamzaw ah thu theilou a ngaihdan suangtuahna numei vaai pipi in huai nitak bel ka ihmu hak mahmah mai hi.
Hon zekhem hileh bang kalawh dia chih lam enlou in, gingtalou sasa in ka muangmoh mawk hi. Athu thei leng kalung nuam ding in ka gingta a himahleh nitamlou sunglel khualzin kahih na toh buaizawk nading om ahih man in zingkhua hong vak in ka malta puakte kava zuak a, vaigam leng hisamlou, Lamka a vaite rate nuai a kun gige lin pipi in kakin ziak in kavan teng lawk ngellou in kava khawngta hi. Ka tunnate inn katun in zinglam dak 11 bang ana gingta, paiding ka chih hun lah a zingchiang ahih maimah man in lungsim kinawh tak in ann kane a, kanek khit in Chingboi muding in kava pawt hi. Chingboi in lai ana sim a, maban a exam neiding himah leh gen utluat nei kahih man in kava houpih a, katung ah lungkiakna nei maw Ching...ngeina na bang nawnkei kaci ta hi.
Chingboi inleng hon dawng a, ngeina banglou chih lampang zaw nang thil lakdan hizoding ahi, sawtpi kimuhlouh nung a kimu a gendi theilou tel zaw kahi mah ve, ka haksatna genkhe thei ding gumna neileng chilua kahi hon chimawk hi, kenleng eh..bang haksatna nei namawk a, gen ve, nagen gige mah hilel lou maw, damlouh na nei maw chi in kadong a himahleh Chingboi in a genkei, hon en a, kei haksatna zaw a thuak a haklua, himahleh ka haksatna na theih in nang lungkhamna hon guan zodi, na theihhun ngak mai in, lungkim tak a nakik ka deihpen ahi, maitai sawm mahleng haksa kasa, mi hehpih huai kahi hon chita hi, kenleng ka dong a, agen nuam bilbel kei, nitaklam tan a gen noplouh tuh kenle ka theinuam samkei chi in thangpai petmah in ka pai a, varandah tan hong nungdelh in, na theisiam kei a ahi, nitak ciah hong hoh teitei in chi in hon gal gen a kenleng dawng selou in ka paitum san hi.
Maitai loutak a zinpa inn hongtung chihte omlouh nading in kamel ka bawl a, nidang sangmah ale maitai zaw in ka om a, himahleh ka lungtang tem a dawt bang in ana a, chikmah a thuguk hon neihkhum ngeilou Chingboi in tua sun nitum ale dotkhiak butlouh thuguk aneih mawk lamdang kasa petmah hi. Min kipak mahmah in hon mumah le uh dahna in ka lungtang a tuam a, theisiamlou ka hih lam thei napi a theisiam lou nahi hon chih laidep in gentup nei hiding in ka gingta zel hi. Nitak hong hih in hohnuam lua lah hingal thangpai kisa leh lungsim bukkak a ka omsung in nitak a hong sawt dek man zezen hi. Bangteng hileh chi in kakisa a Chingboi te innlam zuan a kapai lai in lamkiang a dawrkong apan Chingboi leh a lawmte 2 ana ding ua, Chingboi in hon sam a, hoih e ..hong hohlou di nata dio chi a na van puak di hon pedek kahi, lawmte zawn zen a hon chi hi. Kenleng manhak ka hihdan gen in kuva kahai ua, sawtlou Chingboi te inn a vapawt in, deihbang a kihoutheilou in ka paita a, theihnop tampi theilou in ka ihmu a, khiaklah tampi mah neikawm in tenna zodawn lam zuan in zingsang phalbi khovot nuai ah baihtak in Zodawn lam ka zuanta hi.
Lungngaihna tampi toh Zodawn damtak in katung a, innkiim innpam kingaina tak a zin leh tungte kiveh tuah khiukheu a om nuam natel e hiaibang lung noplouh lai in chih louh tuh kipah nading dang kamu kei. Miten hon nuai et mah le uh hiai Zodawn ah itna kimpen in kamu a, nuam kasa a himahleh kipahna zaw a kim thei nawnkei, kipahna langbei toh hichia gimtak a tung dia kaki nep louhlouh maizen toh ka chi hi. Ka tunni nitaklam in Chingboi lawmnu, kei ading aleng midang tuanlou Kikim loukuan pailam hon bang a, a van di Chingboi in akhak ka piak kawm in thil omdan ka hilh a aman leng lamdang asa mahmah mai hi. Gingtalou sasa in ka laithon kasim ciah kitheimai nave, nitak chiah hong hoh leteh chi in hon paisan ta hi.
Nitak in keileng kava pawt a, ka gintak louh in tua ka lawmnu uh Kikim laithon ka simkhawm ua, bangmah thupi akigelh kei, himahleh huai laithon sung sawn ah kei a ding liauliau, Kikim in kei hon piak ding laithon ana om a, hong pah ngamlou in ka kientuah ua, Kikim in hon laksuh gaih in hon simta hi...
To Umang,
Kum tampi lawmta sang a thupi zaw a iki polh nung in khosakna ziak in mel kimulou in a kum a sim mah ina omta, ka pemni ua ka kichiamna ka mangngilh naikei, nang leng mangilh lou mah in nagen bang in iki mu a, lungkimna leh kipahna boltu hiding isak lai in thangpaihna boltu lel a suak maimah. Kei phawk taklou himah leng non phawk a, na itna siangthou non piaklai man in hampha kaki sa, na paima ding sun a ka thil gen noplouh in hon khase sak kha ding himahleh gennuam a hon theisak hileng huai in khasiatna a hon piakzawk ding dan chiang tak in kamu. Khasia leh thangpai in ka hon koih ngeikei a, koih leng kon sawmkei, nang leng khasia leh panpihtu bei in non taisan ngeikei a, itna in ikal ah vaihawm ahi ichih lai in nu-leh-pate lemgeel in vaihawm zota ding a bang, maban zaw kei maimai in gentheih kanei kei, tum taktak a ki iit I hih leh na vaihawm dandan hon zui ding a mansa kahi, kei hong hel a hong chialte sang a kal nasuan kinzawk a ngai ding, kei ziak a nang hehpih huai na hih sang in ken huai hehpih huaina katel zaw.
Pathian daan leh daanlou inzaw ikal ah gen a nei nawnkei, itna in a hih zoh vek ka lamet leh ka teel pen ahi.
Nang a kinem
Chingboi
chih hon simsuak a, Kikim inleng gen ding a theikei, pasal neidek eive maw ka chih leh Kikim inleng hon lakloh koih na e maw, nang hon tel bang in bangdia na zin a genchiang mailou adi, hon sitsimta a na guk khak ding houh lau hinteh maw hon chi hi.
Gennop tam mahleh gending pen theilou phial in ka tutmun ah ka om a, hiaibang laithon kasim in ka lungtang ah natna hon behlap mahmah hi inleng kathei hi, nidang a hun sawt tak lungzuang tak a akum a sim kimulou a itna tak toh kana lamet gige tu in ka thuakgimna gah loh zoh huailou phial a kilang a van a kikhai bangmai a a loh ngaihna theih huai hetlou a hon om lamdang kasa a, sawtpi ngaihtuah dedu a ka om nung in Kikim kiang ah bang loh leng hoih nasa chi'n kadong hi. Kikim ngei inleng hiaibang thil tuah ding aleng na lametlouh ahih na ah maban saupi ading a na lunggim na dal mai inla, na lungsim guk a na thukhenna zui mai in, zingkhua hong vak dia, na lungsim a hon kihei mai ding, itna tak a na et ahih leh zaw naguk mai thilhoih ahi, Chingboi inleng hon khotuah lou hetkei, himahleh nakal ua palai ompen pilvang tak a na hepkhiak theih leh zaw pasal pil nahi mai ding, aman leng hon ngai mahmah hinapi maban ah kuan hon khosuah pih zodiam chih a et tuh numei pil te adia thuptawp lakna ngeina ahi hon chi hi.
Ka dinmun, ka khosakna leh ka neih leh lam ka en a, ka ching zoukei chih kathei, ngai mahleng Chingboi adin lah hinkhua lamet huaizaw ka deihsak ngal a chi'n Kikim ka hilh a, Kikim inleng dik asa mahmah, himah leh hiai itna kalthu maban limchit leh louh in thu a puak in zaw itna buching hilou ahi, itpen toh khosak a anuam ahaksa thuak mualsuah mah kenbel telzaw kahih a chih chiang in ka ngaihtuahna a hon subuai semsem hi. Kikim toh sawt simtak ka kihou nung un kapai a, ngaihtuahna mulmal neilou hizaw in itna kichi theilou hizaw leng chi vungvung kawm in ka pindan sung ah laipuan kala a, Chingboi kiang ah ka itna thu leh amah ka khual dan hilh a maban a suan ding neilou ka hihdan hilhzaw ning chin laipuan ah amah ka lungtang tawnga ka itna ka gelh ta hi.
Itpen leh ngaihpen
Chingboi
Na laithon kana mu a, taksa damtak in Zodawn tung mah leng lungsim zaw zawngkhalna leh ki-iiplahna in a dim maimah, chikmah a na khasiatna ding genlou a om kei kua kahia chih na hon thei, chikmah a na siatna ding bol ngamlou pa'n tuni tan dong in nang a dia thil hoih deih lai ahi chih thei in aw. Neuchik I hih lai apan in kon iit a, nakipah na ka thei a, nadah hun in kana dah a, nakah hun in ka mit ah khitui luang hial kei mahleh ka lungsim guk in kana kap sek, na gilkial ni in kei a avah leh kana kisuanglah a, nagil avah ni a kei a akial leh kipaktak in ka thuak zou gige, theigah nekding na duhni in lou din na hon ngen a, singkung sang pipi ah kava kah a, theigah limchi kamuh masakpen nang a din kon khia a, nana ne a, limsa nahi chih na maimel apan kamuh lel inleng kei a din lungnopna gensenglouh hon petu ahi.
Kum tamtak khangkhawm ihi a, huai hunsung inleng namel kamuh noplouh ni omkei, na aw kaza gige nuam a, na nuihmai mel zan a ka ihmut natawm in kamu, himahleh tu in muntuam tuak ah khosa in I om a, kimuhkal ngaklah tak a tuikang ngak a kangak nung in ikimu a, lungdam tak a kik ka kisaklai in lamdang tak a kik kana hizaw hi Tapa tangkhat, vual eng, kei sanggah leltak in na laithon kana sim a, kana theisiam a, himahleh nangbel nana muh ding kon laikhak na theisiam kei ding, kingai mah leng hiai Zodawn na pawt sansa, huihpi vuahpi, thousi thouvai nuai a damsung a nekzong ding leh nadeih sulnung zui ding inzaw hong kik kei hial in aw, tel mah leteh lakik mai inla na maban a kong zazaw kihong bangbang ah ana lut zomai in. Itna in hihzou vek mah leh sum leh pai leh nu-leh-pa vualzawl na inleng hinkhua nuamtak hihzou thou nading ahi.
Ki it kingai mah leng latkhiak ding tampi om ahi. Kon it a, kon ngai a himahleh ken nang kon itna na maban a hinkho nuam na zat theihna ding in ka lankhia a, nangleng kei non itna lankhia inla amah leh na nu-leh- pa deih telna ah pai mai in, hon itlou hikeng, nang a dia tualniam kana hihman lel hi chi in theisiam maini Ching..
Zodawn pan laikhaktu
Na Umang
Nitamlou nung in hiai laithon kakhak thei pah a, huaihun inbel kei leh kei kimohsakna in kadim a, bangziak a hichitel a ngai hinapi mi adia phal a lankhe thei kadiam ka chi a, lamdang kasa petmah hi, a lehlam tak ah bel hiai bang thu buaihuai kei maimai in bang chin ka tokbuai theidia ka chi a, Chingboi ngai mahmah lengle lou nasep pih din pammaih kei mahmah inleng kasa hi. Lamka a nuamtak a khosa ta bang din kei duh-am man in lou nasem din officer toh kiteng ding lai kava gukhe zenzen dia ka chi a, a khenchiang in bangziak a mi ki it kingai lai chih thei napi a sepna sangtak neihman leh Dansiangthou suanlam a mi kalthu a bohsiat nak uh adio? Pathian maibiakna dia mi kingai lungkham sak a dansiangthou a kiteen in siangthouna a nei teitei lai dia maw chih peuh ka ngaihtuah sek hi. Bangteng hileh Laithon a tunna ding ngei a tung a, a thukkikna leng mupah ding in kaki gingta a, ka gintak bang ngei in December 20 ni in tua dawn kikna laithon tuh simtheih ding in kakhut ah ka tawita hi. Tua laithon ka sim a, ka lungsim ah pona tak in "theisiam nuamlou neive maw "chi in a genchet dingdan leh a thukkik ding dan ngaihtuahna ah a ompah hi. Tua laithon ah Chingboi in nounel tak in kei a hon itzawk dan leh panpihtu bei ahi dan hon hilh a, kei lam a tupguhna leh vaihawm dandan a a maban kinga a chih teitei ten hon su lung-am a, vapi maiding kadiam chih sawtpi kangaihtuah nung in chimoh tai ngeina chi in ka laikhak muh Kikim kava simsak nawnzel mai hi.
Kikim in a hon nuihsan a, pasal din le pasal kei na chia, na kisikna ding lel hihkha di neive aw, nang va kalsuan inla vapi leteh zou himai neivoi hon chi a, kou numeite vangtahna na theikei a ahi, pasal in hon ngai petmah chi henla, hon tangkhalou guihding chih a theih huntan inleng honpi ding in kalsuan ngam keileh numei in bang ka hihthei ding ua, numei pasal lam zuan in hon paileh khotang in a mohsak dingdan uh nathei, na it taktak leh kisa inla vapi in, nazi dia mansa ahi, anuam ahak thuak din akiman chih nathei hon chi a, tua laithon tuh hon simthak nawn hi.
Itpen leh ngaihpen
Umang
Na laikhak kana muh in kipahna sang in dahna in hon zelsuak zaw hi. Ka kinepna bang a na laithon sang a nang mahmah taksa a hong tung zaw a kumtawn a khosa khawm dia kei honpi maidia kon gintak lai in na laithon vuak hong tung maimah. A thutun sung a kigelh bang a dio ka chi a, ka theinuam a lah ka enngam kei, kei a dia hoih deih gige a kon theih in tu in ka hoihna ding sang in dahna lampi ah non khakhia, Ka itna nala a, himah leh tua itna mineizou leh sumhau kiang ah na lankhe maimah. I neuchik lai hun nagen a, i khankhiak huntan a khiaklah huai nasak pente leng na gen bang in kenleng ka khiaklah penzaw khopi hinkhua a vual eng a omsang a Zodawn a a lim-a-al ne a, innsak inkhang toh kihouthei a, anuampen zal zoukhawm a, adah huaipen thuakkhop mah ahi. Kum hiaitan vei iki ngaih nung in ken kamangilh ngeilouh ding zaw hiai laithon ahi ding, min a itpen a taan sang a sihna a tel lai in nang maw non latkhiak ding, Mi'n itna kichi ah duh-amlua kichi omkei a chih lai in maw nang kisuanlahna ziak lel a non khahsuah ding.?
Ka dinmun en in, numei ka hi, nang ngaih ziak a nu-leh-pa thu palsat a Zodawn lam zuan a kei kon tai zawk ding, ka minsiat naphal diam?Min beven nu hon chi le uh leng nang itna ziak in poisak kanei kei, himahleh tubang a chiangkuang lou a gup neingamlou a na om inzaw minsiat khulel ding a kong kalsuan a dik kei, minse nu, beven nu nana chidia, na hon pampaih khading. Pasal kisa a non it taktak leh suanlam bol kenla, sihdong a kisik a poisa a ka om sang in hon hunkhia in aw, nang ading a veihuai nawnlou ka hihkhak leh leng hon theisiam sak mai in a kin theilam in, akikhel nung inzaw vangsia kisa in kahna om dah mai hen.
Nang hon it..
Chingboi
Lamka
chi in Kikim in hon simsuk zungzung a, asimzoh in hon ensal gemgam a, bang a na poimawh dang, genbeh ding omlou hilou maw chi in ka laithon ka sakhau ah hon guansak kawm in zingchiang mahmah a vazin ngeingei ding in hon hanthawn nilouh ta hi.
Nitak zan khovak in ka ngaihtuah a, ching zoulou deuhmah zaw keive chih leng kathei, zin ding hi lengle paiman ding leltak leng sakhau apan sawk ding a omkei, ka voktal uh tuuk 5 vual zuak zen in pang ding chi lengle huai huntak in singtang kawm ah vok leinuam aki mu zenzen kei ding, khe in pai taleng lah ka tung samkei dia ka chi a, ka malta man ka puaktung sunte bat ditna din ana pekha naikei leng zaw maw ka chi a, poi kasa petmah hi. Bangteng hileh bat zon a inkal kitawi zen a hiaibang ching zoulou napi a phut luihna a pan suahtak nading in chi in zingsang beltak in kathou a, kho hausa pa kiang ah sum 500 kava ba a, innsung awlmoh huailua hinapi in phallou sasa in Lamka lam ka zuanta hi.
Lamka ka tun in lin pipi in katunna luiteh kava kinga nawn a, kihah mengmeng in ann kane a, a nitak in Chingboi teh kava hoh pah hi. Chingboite inn kava lut dek leh mi tamtak ana tudim phetphut ua, singpi khol om hi awmtak in sung leh pua ah mi adim uhi. Chingboi ka kan bawl hang in naupang te'n athei kei ua, inn phaitam lam a meiphu kiang a tu pipi kiang ah thu omdan kakan ta hi. Pipi inleng thu omdan teng kim sipsip in hon hilh a, zingchiang a Chingboi in pasal neiding ahih dan leh tu nitak a amau a pasal ding toh biakinn a reharsal nei uh ahih dan hon gen hi. Lamdang satak in ka om a, ahun geihgeih a gamtang thei hileng ka deihlai chanlou ding hing a chikawm in leh hiai itna kei a ding a kisiamlou mah hinte maw ka chi a, ngaimah leng sialkhau sattat tu a tuphing a pang nuam tuan nawnlou kahih man in pipi kiang ah Chingboi kiang ah hiai ana piaksak in aw chi in ka sakhau apan sum 100 a pasal neihding ka loppih na chi in kapia a, pipi inleng om tadih ding in hon khou nilouh a, om ding kahi chi in kamsiam a khem in kapai a, ihmu louhial in zan khovak in kalum a, zingkhua hong vak in kathou a, nunlui teng kilatna Zodawn lam zuan in ka paita hi
Chingboi toh damsung a ding in khosa khawm kei mah le ung hinkhua nuamtak zang a a pasal toh innkuan bawl uh ahi chih kaza zel a, Lamka kaphak chang inleng kaki muzel ua, kihuatna leh kikel-kitna omlou hial in kingaihnatna dik toh maitak tak in ka kihou ua, amah ka it ziak a keitoh hinkho haksa a thuak louh a a kemsiam zoding lam theisiam tak a a zot zawk pen ka damsung a ka kipahna hizaw ahi chi a amah kiang a ka kimuh hun ua kagen chiang in khase sim mah leh kenbel thildik a kalsuan kahi kaki chi a, kuaman hon phat keimah le uh lungzuan hun a ka khasiat ni natawm inleng huai kei leh kei a thupukna dik kalak pen hon hehnem tu in kazang zaw hi. Chingboi ngaih ziak in kum tamtak haksatna tuak mah leng ama nopna dia ken aguk a kathuak kan a itna thupi omlou ahi ka chi hi a, ka thuak lai ding leh ka thuak mualsuah zohna ding in hatna petu Pathian kiang ah hatlou sasa in ka thum zelzel hi.
BEITA
©Siamsinna leh Vakiangbu
Comments
Post a Comment