Siamsinna leh Vakiangbu

By ~ Nasri Jona Tawmbing A tanchin zaw gennuam lua ahikei. Aziakbel apasal ngalkhaat liam in a phillup nungteng lungsim veng tak a om chihni nei nawn lou, a ut le dah a khosa ahi a, kou inn kinaih chik a om ka hih ziak un tanau laina hikei mah le ung ka kipoh ua, a ut le ann ahong ne a, a-ut hunhun in ahong giak sek hi. Huchia amah inn sang a kou inn a khosa tamzaw ahih man in ka pa'n a room di khat a bawlsak a, huai ah a ut hunhun in ahon giak zel hi. Tapphou awl-leen lai ahi a; zing ann nekham loubuuk van di tawm di chiin, kuankhiak ka sawm hi. Nidang a ka gam kuankhiak chiang a ka hih dan mah bangin, ka thau zatsiam khinpi taw'ng a ka koih, gul-ngaan pa bang mai a vom-ngil kel-kel ka lakhia a. Gam ka kuankhiak louhna sawt simta ahih man in inking khong a kaai khakleh chiin puansia in ka nul hiau-hiau hi. A lawng ah puansia tel (oil) a nuh kawt in ka thaulawng ah ka guang a, zannitak a ka mumang ka ngaihtuahna ah ahong lang dundun zomah hi.

By ~ Vz Vualnam  Ka lawm tengteng a piching vekta uh Naupang' kimawlna ka kimawl pihte Khanglian in kimawl a tawpsanta uh Awlmoh neilou a ka gamtat pihte Pichingte bang in a gamta ta ua, Pichingte bang in a houlimta uh. Pichingte bang in a ngaihsunta ua, Pichingte' pau bang in apauta uh. Ke'n bel kimawlna van ka khahkei lai. Awlmoh bei in ka khosa lailai hi. Naupang' gamtat in ka gamta lailai, Pichin ding ka ngaihsun pha naikei hi. Kei zaw ka naupang nilouhlouh ding hi. Naupang ah ngaihsutna gil ka mu hi. ©Siamsinna leh Vakiangbu

By ~ Vz Vualnam Miteng tangthu gelhtu i hi uh. Khovel a tangthu poimohpen gelh chiat. Niteng in a peek i behlap zel uh. Tangthu poimohpen eimah tangthu chiat. Ah! Khawl dih! Agelhtu maw i hih uh? A lem chiingtu i hizawkei ua hia? Kahna, nuihna, thuakna, i chiing chiat uh. I chiin tangthu’n hon ngiat bangzel in hia? Eimah tangthu gelhtu i na hihleh, I deihlouh kahna bang dia hel i hia? Tangthu gelhsa ching i na hihleh, Kua tangthu gelhsa chiing hi ding i hia? I gelh in leng hoihtheipen in gelh le’ng! I chiin in leng hoihtheipen in chiing le’ng! ©Siamsinna leh Vakiangbu

By ~ Vz Vualnam Sunni hong tang saulim hon taan Tuallummei thengta e. Silpaak maimit singte zuangthou Haichite’n dawnsuang. Thelnahnou in tulchih bawm Zouhuihkhi’n nau bang nou. Nipi tuang hong tungta e. Sil chih hong paalta e. Va chih hong haamta e. Phalbi daidam ngilhta ni e. Nipi paalzou ni e. Hong un lawmvual ngaih teng aw, Kuivum tumtai leh chiaukuam siktui Lou bang kawm kuizil zaap ni e. Tulleel silpaak, sevau phungpha Laam bang paak in veelveel ni e, Solkha toh al bang mang khawm ni e. Silpaak huihkhi’ seem a laam bang Baanzaal zaak in laam ni. Chiaukuam a langsuk huihkhi bang Ei zong langsuk ni. Tungthangvan a zaam ngoumei bang Phaksap ah zaam ni e. Silchin dahna tualkhia a Nunnop azillai un En zong zil ni e. Al bang dahna tual a khia in Nipi paalzou ni e. ------------------------- Tuallummei – phalbi zingkal a meipi ziing Kuivum – mualvum Tumtai – loupa paak chikhat Kuizil – kha (wing) Phaksap

By ~ Mezu Milia Kingsize                                                                   LAIKHAK                                                                                                                       Hausa Veng                                                                                                                       BSF Road                                                                                                                       Gangpimual Lawm it Nunboi aw, Pathian venna ziak a na cidam ka lam-en a,kipahhuai kasa hi.Keileng ka dam lel hi. Tulai in huailam a omte na cidam na uh maw? Bang thuthu khong a kithang a? Hiai laithon na muh phetcia hong thuk pah in aw, Lawm.Tutung in ka hinkhua a itna khuk a ka na awk dan,ngaihzawngte ka na muang luat ahoihlou dan,kana tuah kong kum nuam hi. Ka hinkhua nuam kipat ding hun laitak in, ka theihsiamlouh pumpi leh taksate hong kikhek in,lungsim leh ngaihtuahna na ngawn hong kikhek hi

By ~ Vz Vualnam ‘Koi khatvei lai. Nem, na taklam ah neuchik awnzek ou,’ chih toh meek athuah hi. Kitengzou lemla in abuai vingveng ua, sawtkhop adaih hi. Biakinn a puanngou thupi silh a kitenna ahi kei. Naupang hon toh paak toh buai luihluih a kitenna leng ahisamkei. Mi’ hihlouh dandan a thilhih chiitchiat tuh Lianpu’ utlam ahi a, hiaiziak a pahtaak aloh zahzah in gensiatna leng aloh veve hi. Achih ngal lah achi tentun a, daalzoh ding ahikei. Aman tuh tua bang a biakinn khawng a kitenna bawl a zek tuamtuam zuih khawng ah thupina bangmah amukei hi. Nenem kiang a kiten ding thu agen deklai in leng huaiziak tak in haksa asa mahmah hi. Ahang bel numeite’ a ding a kitenna puanngou silh i chih a damsung ua khatvei kia ding hi a, a thupi nipen uh, pahtawi a a-omni pen uh, huai pen ama’ lungput ziak a a itpen Nenem in taan ding chih angaihsut chiang in naa sa mahmah saam hi. Himahleh a lungtang a athilpom lah akoihkhe utkei a, abuai mahmah hi. Nenem in bang ngai

By ~ Lhram Gwite Kum 3/4 ka hita. Inkong a pawt in "Nunu""Papa" ci in malbang koukou mahle'ng ka tong hon dawng ding kuamah omkei. Kapkawm in leh thawmhautak a ka kiheihei laitak in ka Pipi insung apan hongpawt in ka khitui hongnul a bangtanhiam nung in a honkhem lungdamthei khongkhong hi. Keibel ka khotheihma a ka nu leh pate bangbanghiamziak a tuibang a luangkhawm sa samgibang ana kikhen chot maidan uh ahi.Ka nu le paten ka damsung a khatveibek hongveh du kasakleh huciteuhlou.Damdam uh hia cih leng katheikei.Kuamah in hon hilh utlouh ziak un.School ana kaimahleng,pawlnihtan kan ka sunzom zoukei.Tuition fee gentaklouh,textbook/notebook zong a kim a neizou ngeilou khAt hi ing.Huaiziak mah in ka khanvualte ka delhpha zou ngeikei.Kum10 kahihtan pawlnih zil,zou nimnem hizomah lai.. Ka school kai hunsung a ka puaknat leh khasiAtna mah² khat bel ka lawmvualte a nu leh pate un a niteng in school ah kha gige ua,a deih a duhteng u

By ~ Vz Vualnam Khimzin zalkhun belhkuan lunglawp bel ing Taikhua vaal sunni’n lenkawl hong peel dia; Khangthei lou lunglawp a zuangthou ding hi’ng. Melmak zaang suunni bangchi’n hong taang dia? Tuni a hong suak zang sunni kilawm An bang itna tongnem nau bang sanni Hong hikhamohlou ding ahi maw lawm An bang it ding lanu dawn bang tuah ni. Tuni ahih naikei lehlah lawm aw Huai ni ding nikhat in i naih zel hi. Nikhat tei tuang hong tung khong ding a aw, Selungzuan zingdai bang thengta ding hi. Lungliap damtui lian kituumsaklou le’ng, Nichin lam-en in hai bang ngak peuh le’ng! ©Siamsinna leh Vakiangbu

By ~ Jems Ngaihte Zlvt Pu aw na Zu Dawn Dawn Tawpsan mai in Ci'n hah tak in ngen mah leng, Amah thangpaih na ding phet gen kha kabang lel hi. Zingkhua hon vak toh kiton in Ka Pu ihmu theilou in thoupah pah sek hi. Thouphet kihah siang in Zing singpi dawn ding in kholak lam manoh zel hi. Singpi dawn zou hon paikik ciang in a Innkuan te ana Thoukim nailou sek uhi. Ka Pi bel Zing an Huan ding in ana kisa ta sam hi. Ka pu pen thoubaih lua ahih ciang in om maimaib thei mahmah lou in Kholak vak ding in Kuankhe zel hi. Hucia Zingkar annek ma a nih vei bang apot khiat ciang in Zing zu kham sa in hon paisek hi. Zing zu dawn cih pen mihing ten lel mahmah se ding in kagingta. Amah lah Upat lam manoh ta Zingzu kham ahih man in, An nelou in Ihmu Char2 zel in Nitak lam ciang in Thoupan zel hi, Hucia nasem gim lah hilou zing toh nitak lam toh Zu ahon dawndawn ciang in ataksa in lel hiaihiai in Amah leng Gawng hulhul mai hi. Hiai in ama ading in Hoih nak sang in at

By : Prince Oioi   Itna kici huih bang mai ahi chih Lianboi leh Lalboi tantawk a hong suak  hi. A itna uh Chingno adin theisiam hak kei mahleh, muan ngamna  himhim neilou ahihman in, it leh ngaih din lawmta tegel in haksa a sa  mahmah uhi. Tua bang kal ah, Chingno in Thangno it in ngaina hi. Himahleh Thangno in bel Chingno lawm bang in pawl hi. Lianboi leh Lalboi in Chingno it  leh ngai mah le uh, a lawmpa uh Thangno ana etsim bawl zaw hi. Itna kichi  Huihbang ahi maw ci hiai tangthu tungtawn ah kichian mahmah hi. lawmta hihna hong kisia in, kimulou in hun bang tan hiam hon zatzoh nung un, Chingno leng upa simta ahihman in, Thangno ngak zoulou in lengdang ana sang santa hi. Lawmta teng leng kisik in, Thangno makaihna leh panlakna in hong kimukhom in,. khelh ngaidamnate kingen tuah in.. Lawmta gin om zaw semsem ding in hanchiam uh hi.. Kum 5 paisa in, singtang gamlei ah, pau kamkhat kibatna mun ah, tua  lawmta teng thum - Lianboi,Lalboi leh Thangno te lawmta kituak l

By ~ Gl Samte (Sunday Vaidawnna di`n) Nitak khawmui kuan ahi a, lampi gei ah paching zet zukham khatin khasiat mel tak in "Pathian in kei on bawl melse bik, Kei zaw ka melse lua " chi in ana haang a, a lungawi mel kei mahmah hi. Ka ngaihtuahna a paisau mahmah mai. Hi e. Melsiat hi ana buaihuai mahmah a, a guk in mahni mel i buaipih chiat ua, nalh louh leh hoihlouh lau vek khawvel ah ina kipel suausuau uh chih a chiang mahmah. Melsiat utlou vek hi zenpi "Na melse lua" bang iki chi ua, chiamnuih hile le zak nuam tak zaw hi khol kei. I hoih hiam aw hoih kei hiam aw, niteng i pawt di bang limlang ah i ki en a, ei-le-ei kimu tei thou hang a, i mel in ma a sawn hat kei chih le ki thei thou zaw hi veh aw. Hon na hilh hilh kei mai le uh. Pathian in miteng teng mel hon pe vek a, mel neilou zen a sia zaw ki om sam kei. Mahni mel kilawmpih mahmah a om lai un kilawmpih mahmahlou, na zaw zen leh kilawm zaw ki om bik eive. Muuk puak beb

By ~ Nasri Jona Tawmbing (Kei leh David Vanlalpek) Paite group laklak a ka ngaihnat pe'n pawl 'Siamsinna leh Vakiangbu' group kum nih (2) a chin lopna diin ka laan ahi. KHUH HONNA : Hiai thu Vanlalhruaii Fanai (Mahruaii) (@Fana Js Fanai) in agelh ahi a. Amah phalna a kon lehkhiak ahi. Mission Vengthlang (Vengkhang), Aizawl-a teeng ahi in; kum 2002 in Pathian sapna saangin Pathian gam-nna se'm diingin a nu leh pa; a pianna gam ana pawtsan hi. Vanlalhruaii ahihleh Kasia, Kushinagar District leh Tarkulwa Deoria District, Uttar Pradesh-te ah ana a-om khata a. Kum 2012 in TBZ azom a, tu'n ahih leh Missionary Teacher-in Tukaithad khua Madhya Pradesh-ah a-om lel. Missionary nna a sepna mun a athil tuah khat tanchin pe'n Uttar Pradesh Tanchinbumite'n le angaihven mahmah mai ua. Hiai amaha Pathian nnasep thupi takmai ahong kilatkhiak dan tanchin pe'n asim nailou te' sim a; atamthei pe'n in i sim di chih deihna leh eimah hink

~Biak Sang Valte Ka khua ua pan gamla sim (dakkal thum khong lam paina) ah Laam Mual ka chih na uh gam khat om hi.Mual thupi lua ahi kei a himahleh asiang kei mahmah hi.Kum teng in mi ki hih liam kha leh sihna tanpha tuak om gige hi.Nitak chiang in meisel ki de vak pheng phung sek hi.Mikhual a mu kha te khong in landang sa thei mahmah uhi.Khat vei ka Papi khopi apan hong zin a gamvak ut ahih dan ahon gen a,ken ka zuih ngai di ahihman in kana guk lit sim mahmah hi.Azing in ka Thau zat di'uh leh apoimoh teng ka kaih khop khit un zing ann nekhin in kahong ki pan khe ta uhi.... Mi gamvak di nitaklam a kipan khe sek himah le uh kou zing ann nekhin kipan kahihman un mi'n lamdang sa in ahon en ut mahmah uhi.Ahi tak in ka Papi gam thei khollou ahihman a ka zing pawt pih ahi.Huchia sawtsim tak kahong pai nung un sa ta'ang na dia hoih mahmah mun ka tung ta uhi.Huchi'in panmun di khong bawl in chiamnuih khong gen in ka nui nilouh uhi.Huchi'n panmun di k