TANGTHU

By ~ Vz Vualnam


Mi kua hiamkhat tangthu a
Minngaihpen hi ding a hamphatna i tankhaak leh
Minngaihpen hi ngei nguuttak ding in in theihtawp suah ni.
Mi kua hiam tangthu ah gentel in i om ngei ding a,
Tua bang a i telkhaakna mite’ tangthu
Tangthu hoih leh zaaknophuai ahihna ding in
Theihtawp suah in i pang ding uh ahi.
Himah e, tangthu a nuihna tuntu i hi gige thei kholkei ding.
Dahna leh mittui luangsaktu leng i hikha maithei.
Tangthu tuh kipahna kia in akimkei him a,
Dahna leng a bukimsakna ding in akuul hi.
Tua bang a mittui luangsaktu i hihtaak leh leng,
Gitlouh ziak leh tatsiatna ziak hizawlou in,
I pelhtheihlouh i tung a vaihawmtu vaang ziak in hizaw hen.
Mi tampite’ tangthu ah sau loulou i telkha thei a,
Mi tamloute’ tangthu ah sau kuam i telkha thei a,
Himahleh mi khat tangthu ah bel,
A tangthu abei dong in, a peek tawpna tan ah i telkha ding hi.
Tua tangthu a min poimohpen i hi ding hi.
Nang’ tangthu a min poimohpen leh lohmunpen,
A peek tawptan a tuang hi ding in ka taakkei zong in,
Kei’ tangthu a ding in bel,nang k’on muh ni apan
A tangthu abei dong in, a peek tawptan in,
Na min tuh akilou munpen hileh ka ut hi.
Huchia theihtawp ka suah nung a leng,
Ka hinkho tangthu a min poimohpen hi ding a,
Na min ka tuansak zoh hetkei leh leng,
A peek teng ah ka tuangsak thouthou ding a,
A tangthu abei dong in, a peek tawpna tan ah,
Na min kilawm a peek teng zepna’n ka nei ding hi.
Huchia ka tangthu gen leh sak ahihna peuh a,
Peellou a na min leng gentel ahihtheihna ding in.
Huan mite’n, ‘Hiai mi kua ahia le? A min hichitel a lohmun a a om?’
A chi ding ua, huai hun chiang in-
‘A hinna in a itnu ahi,’ achi ding uh.


©Siamsinna leh Vakiangbu