NA ZI NUMEI HIA?!

By ~Mang Tonsing

 

Chiamnuih a i gensek uh, mouthak khat in a zingkal a thugen, “Kei ka hihlehnou hon subuaitu dia honglut ka hikei. Huaiziakin, ann huante’n na huan diua, tuitawite’n le na tawi zomzel d’uh. Kuangsil, puansawp, inn zut lehthil dangdang hihte’n le noumau’ nna chiat na sepzomzel d’uh ahi” chi’agenkhe zungzung. Chiamnuih ahi chih theimahle hiai bang chiamnuih phuaktu’nhiailam thil ah lampi sautak ana zuikha khin ahi i chilou ngamkei.Chiamnuih i chi-na a atak houh ahi zenpeuh diam ah!

 

Zanlam in ka pute’n a tanu uh ka Uhau (Nuhau ka chih di chu ahi zen a hileneu apat ‘U’ honna chisak uh(?), tutan kikhek theilou) khakna nei uhi. Hiaihun ah hatsotna thu gendia chial a om bangin Heutupa Damkhothang in hasotnathugen hi. Ahihhangin hiai hun a limlatu a ka pan ziakin a thugen hoih hinamaizen e chi’a gensawn di pi ka theikei, keimah buaibuai a ka buailuatziakin. Bangteng hileh Heutupa bel ken kei mimal tak a thugen siam ka sakmahmah khat ahi a, hiai hun a le thuhoih leh hing, zuihtuak pipi ngen gendi’n ka koih miau mai. Huan, ka Uhau ngei in le hiaini a, a diak a ama’ adia hasotna thu kigenpen amailam hun a zui a, hinpih a, ama’ pitu dia a zatngei ka lam-en.

 

“Numei a theihsa” chi a numeite va nuai-et leh simmawh di chihna hi zenzenkei mahleh nupa lohching, nuamsa leh mite' etton taak hihna dinginnumeite'n apasal te uh mai-et leh a zahtak deuh uh ngai hi. Akiniamkhiatnuam zosam omlou a, pangpalek bang a tungnung kituh chiangin nupa kalchidamlou a, huai in innkuansung loh in, innkuan akipat khotang leh minamsung honpeh hi. "Numei' lutang pasal; Pasal' lutang Khrist"

"Numei thu leh vokkuang dong" chih khawng paunak ina nei uhi. Hiai inadanga numeite bangmah a simlou i d'ua aw chihkhawng hon ngaihtuahsak hi.Banah, ka theihkhelh keileh adanga numei' nitha leh pasal' nitha leng anakibanglou hi. Numei, pasal khenkhat sanga hat zaw di himahle uh a numeihihna ziakun pasalte' lohzah lohzou tuanlou uhi. Himahleh tuchiangin hiaidante om nawnlou in tanbangkim in i omta uhi. Phetlou in, kaam(job)gentaklouh, innkuansung ah leng alu pen hihna len in, pasalte om gegunapi'n numei vaihawmna inn sung a khosa tamtak i om ta uhi.

Numei' nna, pasal' nna chih omlou, sep theihtheih sep khawm diamdiam dichihkhawng inkuan sung a kithuhilhna zakhalou om di'n a gintak huai kei.Himahleh, a zuizou vekvuk vang mahmah di'n ka um mawk hi. Sep-le-bawl thuah numei' nna leh pasal' nna khentuamna i pianpih, sisan a ana belh khinhikha ding hi. Ahi a, sep theihtheih sem a, kihuhtuah diamdiam penkhantouhna, kituahna leh ki-itna langsaktu, mite' etton taak hinkhua anahilo-tel mah hi.

 

Pasal khat kianga "Nangle chuh na inn uah na om vangthou di e maw" kachihmawk leh "Om vang mah ing e. Inn a om chiale heh-nilouh tel ua. Omkeile'ng kipak zaw di ahih ua le chi'ng a ka pawtpawt mah ahi" chi'n hondawng.

Numeite a poimawh dungzui un a mohpuakna te uh leng thupi in gol theimahmah hi. Inkuan sung sunuamtu numeite ahi uh chile'ng chikhial sauteldi'n ka kikoihkei. Zin-le-leng hau, mite' hoh utna leh zotna mun i chihteanumeite uh siamziak hi kha ding hi. Pasalte bangchituk in nuam in siammahle uh numei te'n a zilhlouh chiangun kua-mah uttuanlou uhi. Lengla lahneilou, inn kuanpihte lah insung sanga kholak utzaw banga pawtpawt ahih ualeh numeite kivelthakna ding om hikha ding hi.

 

Ka Article "Mou Ka Lawm Ua.." chih a leng tamlou ka gen khinta. Inkuankhenkhat i et vengveng leh mou a neihma u'leh a neihnung ua a inkuan uh omdan kibang hetlou hi. Khenkhatte nuamsa leh khosuah, kitohsuahna a zangpawl om ding a, khenkhat leuleu lah kituak diamdiam a omlai balzan lehbangmahlou kisuah leng om ding hi.

Mou khenkhat mi innkuan sung susia le peise ut himhim a d'ua aw chih huaizozen bang om hi. Ama' nulam te kia chi, huailamte kia huai, apasal lamtebangmah a simlou chihkhawng. Apasal kia it, apasal' sungkuante mudah!Anulam hiam ahihke'h lawm-le-vualte hoh chianga siam chihtak a siam,huchilou kal a lah kipahdan theilou, zumna leh kisuanlahna himhim neilou,ganhing toh kibang! Inkuansung thu sanga kholak thute bildoh zaw, kholakthupeuh inkuan sung a polut lunglung gige.

 

I moulop dante mahmah uh ziaka le numei khenkhat in huaite kisaktheihpihhouh a di ua aw ka chihhun bang a om zozen hi. Lawmkei lelah "n'on kipahpihkei uh" ahihke'h a lawmzoulou te simmawh tang sawnsawn di houh a zel d'uamah! I mihinzia kipai theikei mahleh ahun-le-mun zil a mizia bangle i vakikoppih zelsam ngai hi. "Numei gilou phungkhen" chih paunak i neih uh anadik, dik, leh diktouzel lai di bang hi.

 

Numeite theih dia hoih mahmah bel: Mi innkuan kituak, ki-it leh nuamsatak aom khawm diamdiam lai va toknang leh hisetu hihkhak ding kiveng ding ahi.Ahoihlam a kikhekna i puaklut theihkei zongin a selam a kikhekna tuntuhihlouh sawm hamham ding ahi.

Mi innkuan a dia salam leh kha lam a vualzawlna tuntu, a kisia-kibal tekailualtu, khekhat a dingkhawm saktu hihsawm ding ahi. Huan, na sungkuantea dia mouhoih leh manpha, vualzawlna tuntu; na pasal a dia zihoih lehpahtakhuai hih sawm in.

15/03/14

©Siamsinna leh Vakiangbu