LEHKHATHON (LAIKHAK)
By ~ Xb Naulak AtFb
Ka Ta It.,
Ka
kumte hong tam a ka hong upat hun in, hon theisiam leh dohzou tak a na hon
kep ka hon ngen masa hi.. Na theihsa bang in hiai a it huai khovel ah
ki itna a bei hiaihiai ta,nu le pa teek tamtak te belh ding neilou a avak
vaih lai un kou na nu le pa huci bangg a ka vakvaih sam ding uh na hon phal
kei hial ding maw.. Pilna,siamna sangtaktak leh mahni angmasial na khovel ah
kei bang Pa mawl a din a haksa diak in ka damsung nite kiamzou hial in
ka thei hi. Ei bang a gentheite panpih na ding scheme tuamtuam hng paizel mah
leh eite hon angvan dia kilawm i makai te un nelhsiah dia ki lawmte mah
hon nelhsiah in amau gilpi ban bangmah a hon khual kei maimah ua, kei na
Pa mawl tak leh deihsak tu neilou a din huai bang hamphatna te tan khak
vual ahi kei cih na thei ding maw?A tangdia kilawm diktak ten tangzel hi
leh hiai bang thu ka laikhak ah kn gelh kei dinga gengen le ngailou mai di
hiven. Kei na pa mawltak in kei min mahmah a hamphatna hong pai nasan leng
ana saikhe zoulou a tualniam himahleng na Pa ka hihna hon ngainep mailou
din kon ngen ahi. Nitenga a nitha kilawh tawm in ka theihtop suah in
insung kana chawm a, na maban ding khualna a skul hon kaisak ka ut mahmah
lai in damlouhna ten hon bawm in doctor naihna ding leh damdoi man ding
nasan neilou in sialpi vuahthuak in haksatna kana thuak tou a, mite bang
in pilna leh siamna sangtak kn na leisak zou kei cih na thei ngei ding
maw, na hon ngaihdam kawmkawm in na hon hehpihna leng ka hon ngenlai
ahi.
Awle Bawi, ka hon gennop keh ngetnop tampite lak ah bang zah hiam kn
gen lai ding.. Ka mitte hong mial a khua mulou a ka om hun ciang
in, dawhkan a meh kilui te subua in nek kuangte ka hon ketam sak kha mai
ding a...,,Hucih hun in hon bengmailou ding in kidek hamham zel in aw. Ka
kum a upat dungzui in ka lungsim a naupang zel a, aw sangtak a non hou
ciang in na kasa thei mahmah mai cih na mangnglh kei ding aw. Ka khuazakna
leng a hong chau deuhdeuh dinga... Na thugen ka zakciang theih nawn louh hun
inle 'Bengngong' hon ci mai lou in, na gennop pen gennon nuamlou na hi
zong in, laidal a gelhkhiaksa in non nutsiat zoding aw. Ka Ta, na hon
theisiamzel ding aw Bawi. Ka kumte hong tam in ka hong upa ngei dinga..,, Ka
kalsuante hong zekai a, ka khukte hong zawi hun ciang in, naungek na hih lai
a kalsuan ka hon sinsak a na kipuk ding lau a kiptak a kahon let zel
bang a hon lenkip sam ding in ka tung ah zahngai hamham in aw.. Ka lungsim
hong mawl a ka thugensa ngen ka hon gennon ahi zong in ka gennop hon
ngaihkhiaksak hamham zel inla, nin melhiam hon musak zo mailou ding leh
mimuh a hon nuihsan mailou ding in kon ngen. Naupang na hihlai a na
thildeih te non ngetdan na theilai ding maw?ka hon hihsa mateng na gen
ngeingei na gen det lai khawng. Ka hong kizenlouh deuh hun inle na hon
theisiam zel ding aw Bawi.
Na kumte hong upa dia huci bang hinkhua na hon
theisiam touzel maiding. Hun awl na neih ciangin sawtlou chik sungbek na
hon houlim pihzel ding aw, keichauh houpih ding bei in ka om nilouh zel
a.. Na naa ah buai mah lecin, hun tomcik sungbek ka thugen hon ngaihkhiak
sakdin hong kisu-awng hamham zel in aw. Naupang na hih lai na mangnglh kei
ding maw? na ki tengta neihna thu maimai leng ning lou a ka hon ngaihkhiak
sak charchar zellai nite.. Ka simlei khualzinna lampi zuikhin ding ka hita
a, sawt ka hon dampih lua nawn kei maithei, huai ziakin midang khut a hon koih
mailou in nang mah in na hon enkol zel ding aw. Sihna ka naih hun a hong
tung ciang inle, khamuang taka sihna maituah ngam ding in ka Ta, ka khut
ah na hon len ngeingei ding aw bawi. Nuteek, pateek tampi te teek hai ch in a
om sek ua himahleh a kemtu te kep dan zilin a haina ding uh tampi
dalthei ahi, huaiziakin teek hai a hon cih louhna ding un na hon kem ding
aw. Huan ka Ta ittak lungkham kenla,ka sih hun ciangin, Na Nu-le-Pa na it
mahmah a hawmthoh tak a na kepziak a asim senglouh vualzawlna hon vuk ding
in hon siamtu bilbuk ah ka hon ngetsak ngeingei ding..
Atopna pen ding
in, thilcin hoihlou leh khamtheih na khoih hun a om zenzen leh na pa mel
hehpih huaitak ngaihtuah khe zel inla a hon kipah pih kei di cih theikawm in
huaite apan kiveng hoih in,. Na pianni apan ka sihtan dawng kakinepna
lianpen na hi cih mangngilh mahmah ken aw Bawi..
Kakipak.!
TANGTAWN DAWNGA HON ITNA NU-LE-PA.
©Siamsinna leh Vakiangbu
Comments
Post a Comment