ZODAWN LIMSAKLOUH THU A KAHLA

By ~ Vz Vualnam
 
A ngeeklai ua zaw buaipih mah hive chin!
A senlai ua zaw tawlpih mah hive chin!
Na neeksik nesak mah hive chin!
Na silhsik silhsak mah hive chin!
A khosuah ding uh na tup tintenna a,
Innkal kitawi zen a ana pang mah hive chin,
A tunung hinkhua ding uh na geel man a,
Guhtui kang zen a ana pang mah hive chin,
Mi na suah na ta, tu a koi a omta ahia?
Aw Songtal! Kemtu ding neilou a na om maimah!
Na tha nekang tute tu a kep na ngaih hun a,
Koi a kihemmang khin uh ahia?
Na hatlai tha thauna-maamna a zangte,
Khat beek nang keem dia hong kiiklou uh hia oi?
Na sam a kaangta a, na vunte a vuaita a,
Na tha abeita a, na khuukte a zoita uhi.
Huchi in leng ahon kitheihmohbawl uh.
Aw Kaihlam, nawlkhin in na omta maimah maw!
Na tuailai’ pasal koi a om ahia?
‘Ka hon itden ding,’ chi pa koi a omta ahia?
Na tuailai’ paakzu atawp kang nung in,
Apaalzaw ang atung khinta!
En dih, Hanship, tagah na liklik tel chia maw!
Na pa lah sum leh pai zong in a zinmang a,
Na nu lah na pa’ omlouhkaal in inn a om ngeikei hi!
Pa nei napi a pabei, nu nei napi a nubei!
Nang hon khotuah di’n na pa ahong kiiknawnkei dia,
Nang hon keem di’n na nu inn ahong paikei ding.
Tuitha aluanna kiang ah, munzaang nuam,
Sum leh pai munpi na pa’n a taisan ngamkei.
Na nu’n huai a tangvalte a khelah.
Dontu ding neilou a na mualliam ni atun chiang in,
Aduhgawlna uah a kisiik ding ua,
Lah akisiikna un ahon samkiikkei ding.
Na pasal, na tuailai’ pasal, aw Kaihlam,
Tuitha luanna kiang a nungak ang ah,
Awlmoh dang bangmah neilou in a ihmu hi.
Na lungzuanna khakham veiloh a,
Hankuang a sial a na om chiang in,
A donlouh a zi midangte’n akah chiang un,
A luang midangte’n a vui chiang un,
Azahlaakna ah azum tuntun ding hi.
Hong kiikkei hen, hong kilaak sekei hen.
A zi vui tute’n agou-agam tang uhen.
Gaal et-et mah leteh, aw Songtal,
Na ta ahong kiikkei ding.
Lunggulh in sialsial mah lechin,
Nang veh di’n kal ahon suankei ding.
Tuitha luanna kiang a khopi nuam ah,
Na lungngaihna pozoulou a,
Lai na tahni ahong tun chiang in
A nopsakna sumnaak atat ding a,
A haina ah akisiik peetpeet ding hi.
Na luang lah midang in a vui ding a,
Na gou midang in aluah ding uhi.
A haatnawnlouh hun a apianna pa limsaklou,
Kep ding donlou mipa’n bang lohtaak akilam-en a?
Themchik leng goutan khenkei un. 
Themchik leng tangkei heh.
Agam luah taak a omkei leh,
A luang toh vuikhawm unla, mangngilh un.
Vuikhawm theihlouh gam a omleh,
A haatlouhlai a enkoltu a innvengte pia un.
Tapa hai in ahaiman mu henla,
Huai ah hehnepna himhim mukei heh!
 
©Siamsinna leh Vakiangbu