N'ON GEEL NGEI SAAM HIAM?

By ~Sang Hilsia

Tomkal sung lel itna himahleh, kei a di'n bel kipahhuai veve hi. Tomkal sung lel di khawng bang ziak a ka itna hon sansak sese a de o, chi in khat veivei ka kingaihtuah zel a, himahleh ka itna a hon sansak himhim le ka kipak. Aziak bel iit thuk a ka om ziak in. Itna thil hihtheih dan ka theisiamta. Itna manphatdan ka theisiamta. Itna a thuak hak dan ka theisiam ta. Iit thuk a om a kipahhuai dan ka theisiam ta. Huaiziak in, vui thei ka hi kei. Leitung hinkhua ka ngaihtuah zel a, khat veivei theihsiam hak ka sa. I iit I ngaih te'n hon mualliamsan ua, I lungdeih leh lunggulhte'n hon nusia  u zaw, thuak hak in theihsiam hak ka sa. Hiai khawng ziak a thuak zoulou a, mahni ki iit zou nawn lou di khop a pawna a hinna kila tampi tak a om ta. Hucia omte na mohsa maithei, himahleh amau dinmun leh a thuak uh na theih louh ziak maimai a mohsa na hi. Amau thuak bang thuak lechin bang na chi dia? Amau thuak bang thuak lechin na thuak zou diam? Himahleh ken huchia panlak ka sawm kei. Kon iit lailai, kon lunggulh lailai. Mi zatamte'n hon pampaih in, tongsia hon lel zong in, ken hon taisan kei ning. Nang a di'n ka lungtang ah mun lianpi a omlai!!

 

Kei hon geel zel bang in, non geel ngei sam hiam? Lungkham mangbang in, chih dan theilou a lungkia a ka omlai in, nang bek hi chia ka lunggulh. Ka maimit laukha ah na nuih maite, na hoihnate, na duang etlawmte thaam den lai. Sian gawm louh a gibang khen ding ka geel ngam kei. Singdang aang ah na zaal ding zaw ka ngaingam kei. Ka heina peuh ah luankhin hon tuum. Kuamah theih louh ka luankhi, chik leh theng ni a nei diam?

Non lel simthute ka ngilh kei. "Kon ngai lua" non chih kam khumtakte ka lungtang ah chii bang kituh a, huai non chih a ka kipahdante ka mangngilh nai kei, mangngilh thei di'n le ka kigingta kei. Itna zaw hi chi zelzul lou deuh di hi ve o!!! itna thupi dan leh manphatdan na ngaihtuah ngei kei a maw? Itna manphatdan na theih chiang in, Jesu kros a ei mikhialte tan dia a hong sih ziak na theisiam pan ding!!

 

Itna kichi, a mawk na a kipiak a, ut hunhun a lakkik di hi mawk lou hi ve o!! Ki-it kingaih luat ziak in haksa leh gentheihna i tuak ding. Ahi di him le ahi. Itna chih ziak a a nuam ngen di sak mawk louh ding ahi. Ki-it ziak a mittui a pawt hun a om dia, ki-it ziak mah a nuih hun le om ding ahi. I hinkhua a le kipahni leh dahni om law tham hi. I hinkhua ah lamsuk leh lamtou i tawn a, huai bang in, ki-it kingaih hun in le a nuam a haksa om lawtel ahi.

 

Zingkhua hong vak a, thazoi tak in ka thou a, nitak ka ihmut hoih louh ziak chu ahi peuh mah. I hunluite ngaihtuah a, ihmu moh zen a ka om hun a tam mahmah. Niteng a hon phawk louh ni neilou ka hi. Hichi mai a i kal simthu a bei mai zaw theihsiam haksa ka sa. Thil ka hih peuh lah hon kalh om hi leh kilawm, lem thei mahmah lou!! Haksatna-nopna ka tuah chiang in hon hilh ka ut a, lah lem lou deuh hi'n ka thei zel a. Hon dahpih, hon kipahpih khawng a om le zaw nuam tuam lua hia, ka chih hun a tam mahmah. Himahleh huchi bang a ka kikuppih di a om kei, nang lah hon nuseta chin a. Lungke vungvung a i om chia zaw haksa khol diak hi ve o.

 

Nang a di'n Pathian' kiang ah kon thumsak zel a. Nang a dia ka hih theih sun ahi. Hiai kan a thupi thil dang bangmah kon hih sak zou kei. Ka khosakna uh na thei, belh ding ka neih louh lam le na thei. Hiaite ziak a hon nusia na hi de o ka chih hun a tam. Itna zaw neih-le-lam, sum-le-pai in a lei zoh vual hi lou eive. Sum-le-pai in zaw kichin/kidaih ni nei kenteh, himahleh kon itna zaw kiching lua ahi. Ken hichi mai dia ka itna kon piak hilou eive. Na tongdam leh na etlawmnate ka lailung ah tham den.

 

Tomkal sung lel i kithuah zong in kei a di'n manpha veve hi. Ka itpen toh ka kithuah khak ziak in. Leitung a i hin sung zaw haksatna-nopna i tuah di mah ahi. Nelhsiah leh nawlkhin a i om hun le a om dia, it-le-ngaih a i om hun le a om di. Huaite non theisiam sak!! Haksa sa in thuak mahmah mah leng nang a di'n ka ginom lailai. Kon itna a kidang tuan kei. Itna thupi dan hichi eive. Na ngaihsun ngei hiam? Sum-le-pai sang in itna a manpha zaw. Neih-le-lam sang in itna a neizou zaw. Khovel thupina tengteng sang in itna a thupi zaw.

 

Kon itna a lamdang. Thu in a gen vual louh in kon iit. Huchi mah bang in ka thuak in ka pawna. Nisim in ka lunglai luah dimtu na hi. Na hong kik di lam-en in ka niteng hun ka zang. Himahleh nang apat kam khat lel le zak ka nei kei. Kei' lungzuan bang a lungzuang lou na hiam? Kei' hon geel bang a hon geel sam lou na hiam? Itna zaw hichi lou deuh di hi ve o !! ka chi sek a lah phatuam di khat lel le a om kei. Kei le kei puakgik kiguan maimai ka suak, ahi ta zong in, ka lungtang ah na tham den lai. Lamdang ka kisa. Khenkhat in 'numei khat ziak a kisuklungkham di hilou, numei khat chouh om hilou ahi' chi mah le uh, i  iit taktak te zaw kithuak nalua eive. Huai a chih theih ziak uh, itna taktak leh, a iit taktak uh tuak kha nailou ahi maithei uh. Ka lungsim in, "kei' thuak bang thuak le u chin bang na chi phet di uam maw?" ka chih hun a tam mahmah. Thil khawng zaw i tuah leh mi gen a i zak a kibang het kei. Mi'n a lungkhamna uh hon gen ua, himahleh a lungkham dan uh i theihpih kei. A lungkham uh ahi chih i thei, himahleh bang chi tuk a lungkham a pawna hiam chih i theihpih kei. Khitui-naptui bang zah seng hiam chih i theihpih kei. Mi'n a lungkhamna hon kikup pih leh hoihtak a ngaihkhiat a, i hihtheih dandan a panpih a, tha thak piak di ahi. Ninhuai sa a, nawlkhin mawk di hilou ahi. Nawlkhin a om a haksatdan leh a lungkham huai dan na theih ut leh, "To Save A Life" kichi movie en in. Huai film ah, kum 19 a upa khat a lawmte' nawlkhinna thuak zoulou in, a hinna a la!! Mohsak huai sim bang mah leh, ama moh hilou a, a lawmte' moh ahi, adiak in, a neu apat a kithuahpih pa!!

 

Leitung a i hinsung zaw, gentheihna, haksatna i thuak di mah ahi'n ka thei. Himahleh, nawlkhin a om pen thuak haksa ka sa. Mi khat peuh in hon nawlkhin u zaw poikei, hilele nang na hih sese ziak in ka posiam kei. Haksa ka sa lua. Kha khat bang liam ta mah leh, nidang a ka kipah bang in ka kipak thei kei. Ka theisiam thei nai kei. Himahleh bang chik hiam chiang a ka puaksiam ka kilam-en. Tua ni chik leh a hong tung diam? "Kon iit, kon ngai" na chih ngal leh hichia hon nuse pah dia zaw kiging ngei lou zaw hi'ng a.

 

Chin hon sa lou na hi hia? Kon hilh di, khovel na vel suak zong in, mi ching na mu kei di!! Hihna bang bang a ki iit a kitheihsiam a poimoh. Huai lou in zaw na vaal kha d!!

 

Thildang gen di le ka thei kei. Kon iit kon ngai chih louh ngal. Nang a di'n ka ginom lailai. Nang kon lunggulh lailai. Kei' hon iit bang a hon iit di'n kon deih lailai. Non geel ngei saam de o chi in ka lungsim ngaihtuahna ah na om den.

 

©Siamsinna leh Vakiangbu