KEI ZAW KA MELSE LUA

By ~ Gl Samte

(Sunday Vaidawnna di`n)

Nitak khawmui kuan ahi a, lampi gei ah paching zet zukham khatin khasiat mel tak in "Pathian in kei on bawl melse bik, Kei zaw ka melse lua " chi in ana haang a, a lungawi mel kei mahmah hi. Ka ngaihtuahna a paisau mahmah mai. Hi e. Melsiat hi ana buaihuai mahmah a, a guk in mahni mel i buaipih chiat ua, nalh louh leh hoihlouh lau vek khawvel ah ina kipel suausuau uh chih a chiang mahmah.

Melsiat utlou vek hi zenpi "Na melse lua" bang iki chi ua, chiamnuih hile le zak nuam tak zaw hi khol kei. I hoih hiam aw hoih kei hiam aw, niteng i pawt di bang limlang ah i ki en a, ei-le-ei kimu tei thou hang a, i mel in ma a sawn hat kei chih le ki thei thou zaw hi veh aw. Hon na hilh hilh kei mai le uh.

Pathian in miteng teng mel hon pe vek a, mel neilou zen a sia zaw ki om sam kei. Mahni mel kilawmpih mahmah a om lai un kilawmpih mahmahlou, na zaw zen leh kilawm zaw ki om bik eive. Muuk puak bebauh reng a, ki hai guh threthraw reng di hi lou na a nuamlou law sek eive. Na lua leh hon tum utut, sip velvul hi lou na a a khual a tual vaidawn masatu, mi et masak pen ahihna ah va sel dan lah om khol lou. Taksa dang a meimapawn leh a nalhlou lai zaw i silh-le-ten in tuam mang thei mai veh. Hile le i mel mi mit toh kituak masa pen va tuam bengbung dah lah om ngal lou a, ahihna bangbang a latsak ngaia, singim tutut a, mahni va kimelsiat khum reng di lah hi si lou. Suang lou tak, mi hon muh di dan thei gu khilkhial a phou suah gige ngai zaw ana hi mah ei.

Sual bik ziak le hilou a khawvel eng mu dia Nu sul apat i hong pawt inle mi ngeina dan in naungek en dia a hong pawt ngei uh ka ging. A kipahhuaive Nau bang na na nei ua chi in Nu te hon sial na ah a hong daak suk di ua, a paukam un hoih hon chi le ule amel uh ana ki mu tei thou. Sia hon sak luat ziak ua mi ki ìp choih kha khat phakma a ana kituak pah in maw, khawvel zang dia khanlet zel le lithuai volvol eive. I hong khang lian deuh a, lawmte laka a vuallel ki hi tou pah.

Tangval di kihi ta, adiktak a chu Luck di hi ta. Numei star khawng kinei tou tei lua hia aw. Amau upat deuh chiang a dia hon pha khet hi si lou a hon na nawlkhin zel uh.

Khawmpi nikhua a lawmte`n nungak melhoih deuh khawng melh cheuh ua, hong ki ngaizawng thei mai uh hi veh aw. Enlah pantheitawp a i pan ale kuan hon na chuu-kha lou uh. Exercise laak vak inlah hon panpih ginhuai lawlou, mi hihdan chi in Tui tampipi i dawn alah zun kinawn nawn mai. Aw khawvel. Deih i hauh leh hawtu ki hau, it i neih le hon mu peih lou pung. Star i nei alah hon nuihsan di tam deuhdeuh. Bangziak ahi di aw chi in zankhawvak phial in ngaihtuahna i seng a, a formula tamlou melsiat ziak chauh ana hi. Hui, Ka zum lutuk.

Khawvel hong changkang dungzui a dongthak le hong suak zel. Lawmte kilawmpihte ki deih, sum neihsun sun a bajar a va lei. Khawul pawt zen a paikik vengveng. Dong thak aa, pawtsuah dia kisa. Limlang ah mel suanhuailou tak va en. Heiham...i Kichei naak leh ki trop deuhdeuh mah kibang. Manmoh loua iki et velvel leh Sazu phaak mah kibang, mi hon na muh dan a Khaukhup nek di mu lou mah kibang khemkhawm di.

Nungak iva hel tei a, kamsiam dan teng in kipahsak utluat ziak in chiamnuih khawng iva gen tei a, paukam siamlou chih mahtak,i chiamnuih gen a kuamah nui ngei teilou uh. Innteekpa`n hon khenlum utleh kilawm.

Huaichiah bangchi ahi du aw chi in mei èn na lam ah i mel iva langsak a, ana nui heuhau ua. A nalh theipen leh neelhuaipen di`n aw chi in nungak hel melhoihtak, a nuih chiang a biangsum lang cheuh zel melh kawm in i nui tei chemcham a, a nui naak deuhdeuh ua, kipahhuai law mahleh a mangbat huai. Lawhching chuanglou in a ki pai get a, limlang ma ah i ding a, nungak bul a nuihdan chiah in i hong nui chemcham a, huiha, biangsum chu koi ah, biang guh ana ki kham vengvuang a,Kel nui le kituk lou. Ka dah.

Heiham, gen seng dile hikei. Kipahhuai mahmah chu Pathian in melhoih leh melsia ana khentuam lou a, hon it vek a, mihingteng a tuam vilvel, special a hon na bawl vek. Tuk louh leh phak louh le ki nei law lou, siam zawng a na tuam vek hi zaw. Toupa non bawl dan ah kakipak, nang non it ngal a.

©Siamsinna leh Vakiangbu