LEEL DING KA DIAM?
By ~ Sang Hilsia
First day ahi a,
classroom lut dia ka kisak laitak in ka nunglam apat in hong ki phu a,
ka et leh numei khat manmoh deuh a hong pai in hon phukha ahi cih ka
thei. Ka laibu hon top sak a, a sam sau ngihngiah in a mel a khuh a. A
sam hon hui a, a mel a kipat kisuanglah mahmah ahi cih a ciang, ka laibu
hon pe kawm in, "I'm really sorry", ci'n classroom ah hon lut san a.
Hon phut khak tung in heh sim mah leng, a mel ka muh leh ka heh na teng a
bei mawk a!! Huci'n kei le room ah ka lut hi. Ka et leh a mai bang a
san tuaituai zezen a, ka nuihsan ceuh a, huci mah bang in aman le hon
thuk kik a. Ka ki muh patna uh himahleh, a profile detail tak a theih ka
ut ngal!!! Bang ziak ahia cih ka thei kei. Hon kam khat om hi'n ka
thei. Va houpih a, amin, a nam bek va dot ka ut mahmah, himahleh first
day ahi a, va hucih pah ka ut kei. Ban ah, huci di khop in hangsanna ka
nei kei, mi zahkai ka hih ziak in. Class lak sung teng ka melhmelh ta
mai hi. Sapte'n "Love at first sight" a cih cih te kan uh hi kente ka ci
lungsim a. A duangcing a, ngou kiukiau in, a sam a sau a. Samsau in zo
numei hoihna leh etlawmna a langsak diak!!
Nikhat skul kai
tawp, ka ma ah amah kia a pai ka mu a, kenle lemtang a la in, ka delh
a, a kiang ka tun tak in, ka houpih a. Ka dotna te hoih taktak in a hon
dawng a, ka gintak sang in paunuam kasa. Amin ahih leh 'Kristen' ahi a.
Kei' min le hon dong a, 'Willie' ka hih dan ka gen a. Huci'n sawt lou
nung in ka hostel lam tuak uh zuan in ka ki khen ua. Bang mah gen lou a
ka pai leh, "Hey!! Will, goodnight" nui seisai kawm in hon ci a, a nuih
mai a kilawm ngei mai!! Kenle "Goodnight" ka ci tei namnam a.
A
hun hong sawt hiai leh ka ki thuah tam deuhdeuh ua, ka ki ngaina tuak
mahmah uhi. Nopni-dahni ah ka ki taisan kei ua, ka lawmhoih pen a hong
suak a. Skul a ka ki thuah kia u hilou in, phone tungtawn in le ka ki
thuzak gige ua, theihlouh kal in ka iitna a lian mahmah mai hi. Lawmta
bang a ki thuah ka hi ua, ka iitna thu gen di hi kasa zou kei, banah
ngaihzawng a neih leh neih louh ka thei kei. Himahleh ngaihzawng nei
di'n ka koih kei, a ziak bel ki thuzaak gige ka hih ziak un. Ka ki thuah
tam deuhdeuh u leh ka iitna a lian deuhdeuh a. Kei toh teh in a paunuam
mahmah a, chiamnuih-thutak bang a thangsak mahmah a, ka om khop nak ua
le zo, ka kiim ka kiang uh ka phawk tuan sam kei uh. Kipak leh nuamsa ka
hipen mai uh. A nuih mai etlawm tak te et nuam kasa a, a aw suak te le
zak nuam kasa.
Nikhat, nidang bang lou tak in a maitai kei
a, dahmel mahmah in ka mu. A kiang ah ka va pai a, thu om dan ka va dot
leh, "It's my mom 1st death anniversary" ci'n hon dawng a, kei le ki
guih sim kawm in, "Oh! I'm sorry" ci in class le la nawn lou in kong lam
ah ka pawt pih a, mun thoveng deuh ah ka tutpih a. Sawt ki thuah thou
ta mah le ung, sungkuan thu ka gen tam kei uh. Ken le ka innkuan uah
sihna kana tuah khak ziak in, sungkuan thu ka gen tam ut kei a, kup le
ka ki kup pih vang mahmah. Kun in leh a mittui te nul kawm in a tu
ngeungau a. Ka hehnep theih dandan in ka hehnem kawm in, a sungkuan thu
uh ka dong a. Hici'n hon dawng a:
"Innkuan nei zou leh
hausa hi kei mah le ung, innkuan ki tuak leh nuam sa ka hi uh. Unau nih
ka hi ua, kei a naupang pen ka hi a, U pasal khat ka nei. Ka pa
government teacher ahi a, ka nu inn nupi maimai ahi. Ka pa Pathian lau
mi ahi a, a nasep ah ginom a citak mi ahi. Zingkal teng in kou a
sungkuan te' a di'n ka lu ua a khut nga a hon thumsak gige hi. Ka nu, nu
fel tak ahi a, ka pa a zahtak siam a, saptuam leh khotang ah ahih theih
bang tawk in a ki zang a. Himahleh cancer ziak in nikum in hon na
omlouh san ta!! Ka nu'n mihing ngaihdan a hun lou tak a hon omlouh san
na tung ah ka posiam kei mahmah. Ka pa bang in haksa a sa mahmah a,
himahleh kou a tate muh a huci bang a om a ut kei a, a ki dek theih tawp
in a ki dek. Sihna zo a thuak a nuam kei a, ngeina seh cih le om thei
di'n ka gingta kei. Ka pa' thuak dan ka theih pih, a ziak bel ka
nu-le-pa' ki iit dan ka theih ziak in. Ka sungkuan un ka thuak petmah
ua, banah lawm-le-vual tampi tak te'n le hon thuak pih uh. Ka nu' siamna
leh hoihna mu kha ciang te'n bel hon thuak pih lou kei uh" ci'n ki dik
hithit kawm in hon gen a. Kup di dan le ka thei kei, ka hehpih petmah.
Sawt
lou nung in hon sunzom nawn a, "Ka U ngial in a posiam kei mahmah a,
kal khat vingveng ann ne lou, tui dawn lou in, glucose ki khai den in a
om a. Ka hehpih petmah. Ka u'n ka nu a ngai diak a, amah tellou a
hinkhua zat haksa a sa. Ka nu' omlouh nung in, ka innsung uh a daai
mahmah a, ka nu ka ngai thei petmah uh. Ka pa le lungleng thei mahmah
hi'n ka mu", sunzom thei nawn lou in, a mittui hong luang khe zungzung
a. Ka aang ah ka kawi a, aman le kiptak in hon kawi thuk tei a.
Keile
ka ka innkuan thu uh gen dia hon nget ziak in kenle ka gen a: "Unau
thum ka hi ua, kei a mi lai pen ka hi. U numei khat leh nau pasal khat
ka nei a, himahleh ka nau in hon omlouh san ta. Ka nu-le-pa'n sepna a
nei tuak ua, khosakna lam a zo Pathian hehpihna ziak in mi ka eng kei
uh. Ka ki ngaihdam theihlouh khat a om, huai tuh ka nau sihna ahi. A
17th birthday ahi a, sungkuan kim a zat a ut a, himahleh ken ka lawmte
toh picnic sawm ka hi ua, a birthday program a tel man lou di ka hih dan
ka gen a. A heh mahmah a, ka lawmte' toh ka picnic na ua hoh lou a, inn
a sungkuan kim a zat a ut thu hoih tak in hon gen a, himahleh ken ka
ngei ngaih kei a, ka ki na kha ua. Huci'n amah heh lua in, a bike toh a
tai khia a, sawt lou nung in tuahsia tuak ahi cih ka za uh. Ka theih
tawp suah mah le ung, a hinna ka hum bit zou kei uh. 'U, tutung ka
birthday zo sungkuan kim tak a zat ut ka hi. Picnic khawng cu ut hunhun a
le sai theih ahi. Birthday pen kum khat a khat vei couh hincin,
hehpihtak in na lawmte toh na thil sawm pen uah hoh dah mai ve, nang lou
a le zang thei lo tham di uh ahi.' hon cih ka mangngilh thei kei. Ka
nau' hon omlouh san na tung ah kei ka ki mohsa a, tutan ka ki ngaidam
thei nai kei. A thu mang leng a hinna a taan loh kei di. A thu mang leng
ka damsung a bei nawn lou di meima pawn ka nei kei di. Kei' moh ngen
ahi" ci'n mittui dai tak in ka gen a. Hucia ka om sung un nitaklam hong
hi a, class om zek lai mah leh, inn lam ah ka pai uhi.
Hunte
hong mualliam zel a, semester khat bang theihlouh kal in hong bei a,
ekzam zou in, innlam ah winter vacation in ka pai a. Mel ki mu kei mah
le ung, phone tungtawn in ka ki hou khial ngei kei uh. Hon miss down
khawng hon gen zel a, kenle ka ngaihdan khawng ka heem gen zel a.
Ciamnuih dawl thei tak ahi a, ka ki ciamnuih tuak ek ek zel ua, ki suk
kawt cih bang ka thangsak mahmah uh.
Semester thak kipat
hun nawn ta ahih ziak in, ka siamsinna lam zuan in innlum kon nuse nawn
a. Kristen toh ka ki thuah ngei un kong ki thuah nawn ua, ka iitna a
pung deuhdeuh. Ka ki ngaina mahmah tuak ua, class ki bang, classroom le
ki bang ahih na ah, ka ki mu thei gige uh. Kei ngaihnat bang in hon
ngaina a, thil neu cikcik le ka ki hawm un, ka ki share tuah ua.Khat vei
"Ngaihzawng na nei hia?" cia ka dot leh, "Neilou, bang ziak e?" ci'n
hon dawng a, "Bang ziak cih le om tuan kei, kon dot himhim hi" ka cih
leh, "Nang nei mo?" hon ci a, "Ngaihzawng zo ka nei kei, himahleh ngaih
cu ka nei" ci'n mei nei tak in ka dawng a, "Na ngaih nu cu a hampha mah
di mo" ci'n hon ciamnuih a. Ka ngai a, aman le hon ngaih na ciang nei
hi'n ka thei. Ka iitna thu gen leng cu hon san sak di cih ka ciang.
Himahleh huci di'n ka hangsanna in a cin kei. Ki lawm polh masa ka hih
ziak un, ka iitna thu gen mawk di haksa kasa. A mi zia, a deihzawng, a
huat zawng ka thei vek, aman le huci bang mah in keile hon theiciang.
Ka
lungtang tengteng in ka iit a, ka iitna simthu lel mai ka ut. Himahleh
ka ki ngaihtuah zel a, namdang ahi a, om mun ki bang lou, graduate le
ung ka ki mu nawn di uam cih dotna lian tak ahi. Iitna ki ci kimawlna di
ahih louh dan ka thei. Tu'n ka iitna pe ta leng, bang tan hiam lel di
ahi cih ka thei. Damsung a di'n zo haksa, a ziak bel namdang ahih ziak
in. Namdang toh ki ngai a, ki teng le tam khop a om ta himahleh huci tan
hial tung di'n bel ka kum leh ka hihna in a cin nai kei. Ka iit a,
himahleh hon kam khat a om. Iitna ziak in bang teng thuak ka ngam. Iitna
ziak in khitui nul le poi kasa kei. Ka buai petmah. Ka lungsim a ki
sual tuahtuah a, ka iitna simthu leel mai ka ut a, himahleh hi ka sa zou
ciah kei. Ka iitna simthu leel mai ding ka diam ahihkeileh, leel lou di
cih ka buai petmah. Leel louh ka sawm cia lah ka iit lo zel a....
~Beita~
©Siamsinna leh Vakaingbu
Comments
Post a Comment