KITEN NUNKHUM KHAA (The Bitter Honeymoon)
By ~ Vz Vualnam
‘Koi khatvei lai. Nem, na taklam ah neuchik awnzek ou,’ chih toh meek athuah hi. Kitengzou lemla in abuai vingveng ua, sawtkhop adaih hi. Biakinn a puanngou thupi silh a kitenna ahi kei. Naupang hon toh paak toh buai luihluih a kitenna leng ahisamkei. Mi’ hihlouh dandan a thilhih chiitchiat tuh Lianpu’ utlam ahi a, hiaiziak a pahtaak aloh zahzah in gensiatna leng aloh veve hi. Achih ngal lah achi tentun a, daalzoh ding ahikei. Aman tuh tua bang a biakinn khawng a kitenna bawl a zek tuamtuam zuih khawng ah thupina bangmah amukei hi. Nenem kiang a kiten ding thu agen deklai in leng huaiziak tak in haksa asa mahmah hi. Ahang bel numeite’ a ding a kitenna puanngou silh i chih a damsung ua khatvei kia ding hi a, a thupi nipen uh, pahtawi a a-omni pen uh, huai pen ama’ lungput ziak a a itpen Nenem in taan ding chih angaihsut chiang in naa sa mahmah saam hi. Himahleh a lungtang a athilpom lah akoihkhe utkei a, abuai mahmah hi. Nenem in bang ngaihdan anei de aw chi’n alunggeel vungvung zel hi. Bangteng hileh dik chi a apom, huai mah tuh zuih asawm a, Nenem’ kiang a agen leh Nenem in leng, ‘Nang hoih nasak naakleh poiloupi,’ chia kiniamkhiattak a adawn man in alung anuam mahmah hi. Himahleh kimohsakna khat bel anei veve hi. Huchi’n kitenni ahong tun in a inn uah inndongta teng leh bial upa bangzahhiam toh, pastor makaih in kitenna anei uhi. Nenem in puandum ateng a, nam puannak asilh a, amaisan tiitiau toh akilawmkhawm mahmah hi.
Biakinn a kiten pen pawng muhdah ahi samkei a, himahleh tunai a thilchiin chi tuamtuam hong omthakte’ ziak a sumsenna sangtak ahong suah zadah ahizaw hi. Amah bel abang-abang hileh solkal buhpang sawk ahi a, ut hileh sialtal in leng moulawmzou ding hi. Himahleh a innvengte, haksa tak a neektawm zongte a ngaihsut chiang a hiai paidan thakte khawng deihlou ahizaw hi. Kitenna pen huchia hulumtak a leiba tampi kiguan a hih sese kullou a, dakkal khat sung a baihlamtak a zohtheih ahi chih mite lak ut ahizaw. Tua ding a alamlaktu a amahmah pan ut ahizaw hi. Tuma khang nih sung a ding a tua bang a kitenna sai amasapen leng ahi mai ding hi. Mihausa’ a ding in milak a puanak keek silh anoplouhna omlou a, himahleh mizawng a ding in bel anuamkei tuntun hi. Adang silh ding aneihlouhziak ahihman in. Aneite’n biakinn thupi tak a zeem ua, silh leh teen thupitak leh chiindan sumsenhuai taktak toh kitenna biakinn a aneih nung ua paak malkhat leng taak zoulou a kitenna sai utte ading in amaingalhuai hetkei hi. Mineizou’ ading in houchik a kitenna sai zumhuailou a, a utman hilel a, himahleh minei zoulou ading in bel azumhuai tuntun hi. Aneihlouh ziak ahihman in. Huaiziak tak a Lianpu tuh alamlaktu a pan ut ahi.
Nitak lup hun in Nenem tuh a lupna pindan ua avante kikheek in a om a Lianpu’n a nunglam apan va kawi in, ‘Akoi ah ka pan dia,’ a va chi a, Nenem in, ‘Abul ah ake,’ ana chihguih leh dawngkha kisalua in aki-en ua, anui teemtuam uhi. Lianpu’n Nenem bil ah bilngaihna langkhat a thuahsak a, aman alangkhat thuah in sawtkuam ding kawm in angaihpih a, kawikawm in tawn deeldeel in akivei pih hi.
‘Moupuan na silh ding lah hon suhsak ka hihchiah thildang k’on pe di,’ Nenem kiang ah achi hi.
‘Bang oi?’
‘Kiten nunkhum zang di’n ka hon zinpih ding. Na utna mun ahi diam ah bel ka theikei. Hilele nuam na sak ka gingta. Bukpi ah.’
‘Oh, ke’n singtanglam mukha nailou kei mah voi. Ka ut. Chikchiah oi?’
‘Kalnawn chiah aw?’
‘Aw. Hileh eigel kia di?’
‘Na naute a ut uleh amau toh.’
‘Hileh ei bangchi om di e huai a. Bukpi a hotel om amaw?’
‘Lungkham ngailou. Hon muang leteh. Na pasal dia muangtak a na hon neih leh hon pummuan leteh. Thilteng ka enkai khinta,’ anui a, ‘tuzan zaw sepdi tam toh houlim hiaizah in khin phot ni,’ chih toh amuuk a tawp athuah hi.
*
Chih mah bang in Lianpu tuh mi tupguh mahmah khat ahi a, achih vanglak chi geugou mi khat ahi. A huchih ziakmah ahi ding Nenem i chih nungak melhoih mahmah, Lamka khozang a amah elzou ding omlou khop phial a hoih tuh amah mel a gen ding himhim omlou, tangval hi diipdeep, thousilen khuam bang leltak in atan khaak. A hai kuhkal leh dohzohna ziak liauliau a Nenem tangzou hi penmai hi.
Kum guk paita a tuailai khawmpi a amuh ahi a, hoihsalua ahihman in amuhni a kitenpih pah ding hile leng thil dang bangmah awlmohlou a kitenpih mai ut ding bang hial in akithei hi. A lawmte’ tungtawn in a phone number a ngah a, mi zahkaitak himahleh tuhun in tuh zahkaina himhim in a lungtang ah mun atangzoukei ahi mai. Sih leh sih, dam leh dam chi in nitaklam khat tuh ahoupih ek maisam hi. Nenem in ana dawng peetmah a, Lianpu tuh diip kisai letlet in agen masak leh nanung nangawn theizoulou in apau belhbelh hi. Huai ni apan kigaaltheih in phone tungtawn bang, facebook tungtawn bang in akithuzaakzel uhi. Khatvei tuh Lianpu in Nenemte’ inn a va pawt ding a lunggeel a, Nenem in leng pha asakman in a va pawt hi.
Huchia hun hong kiveizel lai in Nenem in alimsak ngelkei chih athei a, himahleh atawpsan utkei hi. Mel leh puam a asithuaidan amah leng akihaih hetkei a, nungak mel leh puam a ente ahihzawkmah ulehtuh lohchin na’ng atawm mahmah chih ahaihkei. Himahleh kingaihsiatna himhim mut ot hun hi in atheikei hi. A nungak heelnu lah miteng mittunna hihman in biak hak ding mah ahi chih leng ahaihkei hi.
Kum kim bang huchia ahong kivei chiang in Lianpu’n leng a itna thu gen ding alunggeelta hi. Kilam-enlou sasa in nikhat tuh agen a, agintak bang in Nenem in kamsiamtak in anial hi. ‘Pasal na neihma ka lungkekei ding. Ka honna ngak nilouh ding,’ achi lel hi. Huchi’n avangkim a thuzaak zel in a om uhi. Khatvei tuh Lianpu’n a facebook a etleh Nenem in ngaihzawng dang neita ahihdan ataaklat amu a, ahi dedu zezen hi. Kipahpih ahihdan thuthem akhaak hi. Bangmah dawnna amukei. A zinglam chiang in Nenem in facebook nasan a amah daal ahihdan atheikhia a, huai nung tuh houpih teiteidan le om sa nawnlou in kithuzak nawnlou ahimai uhi.
Huchia kum dang khat ahong liamnawn ma in Lianpu’n nikhat facebook ah Nenem in lawm ding a azotna amu leuleu a, lamdang sa in ahi heuhou zezen hi. Alawmte apan Nenem leh a ngaihzawngpa kikhenta uh ahihdan atheikhia hi. Huchia Nenem toh hong kithuzaak nawn ua, a Nenem mah in leng tumalam sang a limsak zaw hi a atheihman in a itna thu agen leuleu hi. Nenem in, ‘Ngaihzawng nei di’n ka kiman naikei,’ chi in a dawng utkei lailai maimah hi. Lianpu tuh haamhaih akisa mahmah hi. ‘Bang achia a n’on ngaih lailai? Ngaihzawng hon neihsan ing a, huat didan ale hon enlou maw,’ Nenem in achi a, Lianpu’n, ‘Ka theikei. Ka hon haw theikei. Ka kisaktheihna sa’ng in ka hon itna alianzaw a ahi di,’ achi hi. ‘Na dinmun ka theisiam, i itlouhte va it theihmawk hilou mah ahi. Himahleh ka hon ngak lailai ding. Khatvei tei na hon deihlouhnate nawlkhin in hon itdan na kizilthei khamoh di hia. Huai ni ahong tun theihlouh a, kei na hon ittheih himhimkei leh lah ka hon itziak a ka hon ngakzoh tantan ka hon ngakna ah lungkimna ka mu ding,’ Lianpu’n achi lailai hi. Huchi’n kithuzaak touzel in a om uhi.
A kum bang ching mahmahta, alawmte zi leh ta nei a a-om siuhseuhlai un leng aman tuh Nenem a ngak ngiitngeet mai hi. Bangchi it aleng itkha ahiam ah asia leh pha theihna nangawn poihlongzou hial mah abang hi. Atanzoh akilam-en hetkei. A ngaak zoh tantan ngak leh huai a lungkimna amuh tuh adelh ahilel hi. Himahleh khenchiang in lah hichitel a a it ngalleh Nenem in leng khat veitei it khong ding in lam-etna khat anei zel hi. Huchia agum ngak mawk chiang in Nenem in leng loh dingdan theilou in akum nga na ah tuh ngaina khawng in ahon itthei khonghi. Huchi’n akum gukna ah akiteng uhi.
*
A zin ding uh ni a hong tung a, Lianpu, Nenem leh anaute nih, Niangbawi leh Khanlunte ahi uhi. Gari heek ding in Suanmung achial ua, amah leng a ut lamtak ahi zomah hi. Huchi’n zingkal baihtak a kipankhia in Bukpi lam azuan uhi.
Nitaklam dak thum in Bukpi atung ua, Lianpu’n agamtat dingdan uh Nenem a iim a, bangmah hilhlouh in akizui saksak hi. Bukpi kholai ah a kumpih a, huai a avante uh suah in apuak theihchiat uh pua in apaiphei ua, mawltual sak ah inn kilamthak, atung bii kikhuh, abang mau koptah leh atuang goten a kibawl ah aluutpih hi.
Innsung alut uleh thuk ah mei kiteen in ana om a, bel a tui kisuang mei kitetziak a souzou nawnlou a haamthoh niitniit in a om hi. Dohdan nopchitak a om a, alangkhat lampang puanzaak in akideidan hi. Dantan sunglam ah lupna nih puanphah leh puansilh bukimsa toh a om hi. Dohdan tung baang ah akitenna lem uh lianpi akisawp akitaak hi. Kuapeuh in lamdang asa chiat ua, gen ding pen thei zawsam leng a omkei uhi. ‘Naaknop e. A chikkal a hiai khawng nana sai man eita?’ Nenem in adong a. ‘Kihichi mai eivoi,’ Lianpu’n achi lel hi.
Huchia avante khawng uh lem a a-omlai un nupi khat ahong diangluut a, ‘Hong tungta na hi u? Koi kichibai le’ng ake,’ chi in chibai ahong hawm hi. Nenem a chibai kawm in, ‘Hiai pen hi maw na lawinu? Anaak hoih e. Sapte sadek i ke,’ chi in anui kalkal hi.
‘Hong tungta ka kei u. Ann na huan nailou na hi?’ Lianpu’n achihleh minu’n, ‘Anou hong tunglou a va huan hial di le ahihk’eh chi i ke. Koi, huan ziang le ahi mai. Tui le sousa a ka koih ahi. Bang meh i huan du le?’
‘A lim di na chihchih khawng hon huan suk in. Sahou nana mu?’
‘Ngal leh sasan hou ka mu a, tua huan ngal di i hi u? Nahtang uum bang le om ake.’
‘Nenem toh alim di na chih dandan in hon huan ziang un e.’
‘Koi leh ka va la ziang di,’ chi in minu a taidok a, adenlam chiang in loh khat khu in ahong luutnawn hi. Nenem toh ann huan in a kipei uhi. A Nenem taget lah chikmah a singtang hohkha ngeilou chih mahtak tap tung a thuk a singchih a annhuan chih khawng a kipahpih khop apha hi.
Nitaklam ann nezou kholai avaak maimai ua, vaikuante’ tun hun tak ahihman in naupangte anute uh dawn in achiau chiilcheel geuh uhi.
‘Kuate inn a oi i tunna uh?’ Nenem in adong a.
‘Ei inn eivoi. Nuam na sa na?’
‘Nuam lawtel. Bangchidan in eita ei inn chihmawk?’
‘Kiten ding thu i gen tunglai a inn ana lam dia ka gen eivoi. Ka zi hitel mawk chin a! Numei tampite’ ngaihsut batlouh, tawmchikte’n a ngaihsut phak uh, huai hinkhua ka hon zangsak ut. Niteng, kalteng, khateng, kumteng- a tungtuan leh manpha hi gige leh ka ut. Himahleh huai bang hinkhua ka hon delhpih nalam a ka hon gamlaat pih deuhdeuh khaak ding ka lau zel. Itna leh kithalawpna in lah lungsim abumhai pahpah a. Huaiziak in hunteng in nang tuh ka sia leh pha theihna na hi gige ding. Ka hon itna leh ka kithalawpna in ahon buphai chiang in hon phawnghalh zel in aw,’ chi in nidang bangloutak in chitaktak in ahon gen a, Nenem in a ULian hichitel a athutaklam mungeilou ahihman in anuih lamlam a za a, athugente’n a khasesak nawnsawn a, agawl bang abing sim eek-awk hi. Bangmah gentuanlou in a ULian baan a kawi in innlam amanoh uhi.
A lampaina uh tawl ngial ahi ding ua, zingkal anhuan hun a Ngaihniang an huan ding a a va kisak leh ana thou naikei uhi. A denlam deuh chiang in ava en nawn a, ana thoukei lailai uhi. Hinawn mahmahkei chi in aphawng a, Lianpu thou in kong ava hon hi.
‘Bangchi na hi u? Zingkal laplou na kei u. Na sun an ding uh i huan ziang di uh,’ Ngaihniang in achi chiamnuih hi.
‘Gari tuanna kitawl deuh ahi ding e, kithouzou hetkei,’ Lianpu’n achi a, kihah ding in a kisa hi.
Huchia adangte leng ahong thohkhiat lingling lai un gamvakpih ding a azotpa uh ahong diangluut a, ‘Aru, tutantan a na manlouh ding uh kithei hileh anneekkham in sing va kipo leh hiziang di hi a. Denlam chiah hong thak ning e,’ chi in adiangpawt nawn hi.
Tuni a Khupching leh Ngambawm’ sulnung achih uh veh ding a kisa ahi ua, a nanung pen a Ngazam lui veh a, huai a loubukte a giah ding atupdan uh ahi. Ann nekham kisazou sawtsim angaak nung un Pauthian, a makai dingpa uh ahong dianglut nawn a, akipankhia uhi.
A masa in Bukpi simlam a Muallian tang a suangpi lianpi khat, Khupching khibah koihna achih uh azuan uhi. Keplouh-zuunlouh a om, anaih na’ng bang leng lampi gina omlou hinapi in Lianpu’n lampi sial ding a mi ana goih man in nuamtak in anaihthei uhi.
Huai suangpi tuh laam nih vel ding a lian, amailam alei hiiihiai a, huai suangpi mai ah khibah kikoihna hileh kilawm a kuak tiktek tampi a om hi. Huai tuh Khupching khibah koihna achi uhi. Huai suangpi bul mahmah ah leilak ah suang saupi khat akikham zinzen a, vokkuang chia ding khawng a kikhuak a, huai tuh suang vokkuang achi leuleu uhi.
Huai apan kumkhe suk in Palkhuang leh Bukpi kikal a Ngambawm khekhap omna achihna mun uh a zuan uhi. Huai mun mah ah Palkhuangte’n Khupching leh Ngambawm theih gigena ding a a suangdoh uh leng a om hi. Huai apan akhang a Ngazam lui a tungsuk uhi.
Gamkha khohullai ahi a, khua asiang a, nuam mahmah hi. Huai a zangloubukte a giah sawm ahi uhi. Munzang nuamtak ahi a, tawldam huaitak ahi. Tua loubuk tuh loubawlte giahgiahna sa ahiman in vanzat- um leh bel, tu leh tem kiningching a om hi. Tuate zang in a an puakte uh ahuan uhi. Hiai loubukte a giahsawm ahi ua, amakaipa un zingkal a va pinawn ding in apaisan hi.
An huanzou Ngazam lui ah kihihhalh leh lem khawng kila in a om uhi. Huchia nuamsa tak a a omlai un huih haatsim in ahong nung a, luitaw lam apan husa, amaulam zuan a hong gingtou hehu aza uhi. Huchia luitawlam a et deemduam lai un luitawlam apan suangte amah leh amah in ahong kilep zungzung mawk uhi. Huchia lamdang sa leh patau a gamtat dingdan leng theilou a a omlai un thakhat in Nenem tuh a dinna mun ah apuksuk hi. Nenem a buaipih sung un suang kilepte’n apeel uhi.
Lianpu’n kintak in buk ah a domphei a, asial hi. Phawn halh asawm ua, akhut-akhe ameek ua, tui a theh ua, sawtlou a buaipih nung un ahong halhkhia hi.
‘Bangchi e Nem?’ Lianpu’n a dong a, ‘Ka lu nat a hong na in chin, huaiban ka thei nawnkei,’ Nenem in achi hi. Laulua a khophawklou a puuk hi ding in akoih uhi.
Athil tuah utoh, Nenem hong hichih toh angaih uh apha hetkei a, lah tua paina ding in ni atumta a, ni tumta chih phetlouh, a makaipa un lah paisanta, zingchiang zingkal a va pi nawn pan ding, amau kia a khua tungthei ding vual ahikei ua, ut leh utlou a agiahmai uh akuulta hi.
Khua amial siangta a, van asiang mahmah sitset hi. A kiang ua lui luangging bilhbilh, avangkim a akpa haam leh khausi-khauvai haam ging solsolte’n amaute ahulumsak zahzah uh athawmhausak uhi. A kallak a vasa thawmhau huaitak a haam ngoungou khawng thawmhauna in anei uhi. Khenchiang in thawm lamdang pipi za in akithei ua, aki-entuah geekgawk geuh uhi. Khenchiang in thil khat chiak nolnol a abuuk uh hon naih hiaihiai zel, gamla hiaihiai zel bang peuh in athei ua, nuam asa hetkei uhi.
Ihmu ngamlou sim lampang leng ahi uh. A meivak uh de in a lupna chiat uah dai dide in a om uhi. Zan sawt mahmahta ahihman in amei uh a sumit ua, atheihlouh kal un a ihmu khong uhi.
Zankhanglai in Lianpu thakhat in akhanglou zot a, Nenem chi ana sa mahmah a, huai in ana phawng ahi ding. Kintak in meivak a suvak a, anaute uh aphawng a, Nenem in khua ana phawk nawnkei hi. Achi asa mahmah a, damdawi lah keng khalou ahihman un tui in alu adap uhi. Vangphathuai tak in phalvak in a chi ahong khing a, ahong halhkhia hi.
Khua ahong vaak a, ngaklah tak in a lamkaipa uh ana ngak uhi. Dak giat pelzek in ahong kilaak pan a, Lianpu’n athiltuah uh ahilh a, kintak in innlam azuan uhi. Nenem chisa phakhe taktaklou ahihlam in ahaat zoukei a, deih bang in a paihaat theikei uhi.
Khua atun un a gari heekpa uh sabeng in ana diangkhe laizomah a, amau leng ngak nadan om salou in kintak a kiguang in Lianpu’n gari a heek a, apaisan uhi.
A damdawi neek in nnasem ahi ding a, lampi ah achisa ahong dai hi. Inn atun chiang bang ua tuh halh mahmahta ahihman in ki-etsak pah lawlaw ding leng kuul asakei phot uhi. Lianpu’n tuh nitak ding a guuk kihtaak sim a, damdawi toh kigingsa in a om hi. Bangmah bel achikei thupthup hi.
A zingkal in innkong a puanphou a omlai thakhat in apuuknawn a, achi kising in akhauh mahmah hi. Kintak in damdawiin a delhpah ua, khua phawkzoklou in sawt kuam ICU ah akoih uhi.
Bukpi a agamvakpih pa un Lianpute’ thiltuah nitak a alenglaatna a agen leh upa khat in, ‘Hong maingal ngawnta uh ahi maw. Sawtkuam zaw hong gamta ngamlou uh hive’n. Dawi chikhat, suanglepte ahi uh. Gamkha in gam avaak ua, apaina lamteng uah suang alep ua, biching gakna naangte akhiin uhi. A suanglehte un i kha adelhkhaakleh kichina a, a hong kiklam ua ahon photkhaakkei uleh kisithei kichi in hiai hunlai in kuamah gam kigiak ngamlou hi. Pathian thu ahong haat apan kigenkha nawnlou i chihleh tua hong kipanthak eita ve ua. A suang leh un akha delhkha ahi peuhmah di,’ chi in ahon gen a, kuapeuh in lamdang asa chiat uhi.
‘Tua suanglepte akiiklam ua,’ tuibuk a siatkhiat zoh in a sunzom a, ‘akha delhkha suang pen aphot khaakkei uleh a damkhekei ding. Sih leh hin bel asuang gikdan ah akinga ding. Asuang agik leh a damzoukei ding a, asuang a zaan leh bel damkhekei mahleh asi zen kholkei ding. Huan suanglepte’n a suang aphot chiang ua minu hiai mun a a omkei leh a kha in a muzoukei dia, a damtuankei ding. Tukha sung a suanglepte ahong kiik khaak zenzen uleh damlou nu hiai mun mah a a om ahoih ding, thukhaak le uteh.’
A gamvakpihpa un thai chiang a Lamka hohna ding nei ahihdan agen a, thu va tut himhim hoih asakdan leng agen hi. A va hoh in a va thuzaak ngei a, himahleh Lianpute’n huchia gintak luat ding in a koihkei ua, banghiam chia siatlam a manoh leh khopilam zot zawk a lunggulhdan uh ana hilh uhi.
Ni kimkhat mahmah ding khophawklou a alup nung in khua ahon phawk a, khua aphawk vanglak lelah bangmah chilou mah bang in kintak in ahalhkhe zel hi. Huai nung sawtkuam bang mah chilou in a om a, nikhat nipini a biakinn a mipi’n dinsa a la asaklai un apuuk a, amasa ate mah bang in sawtkhop khua aphawkkei hi.
Doctorte’n lah bangmah matkhiat ding mulou in khopi a ki-ensak mai ding in akum uhi. Nenem khophawklou in alum dildel a, ‘Bang hon lohkha ka maimah a Nem? Na kipahna ding ka zonna lam a hiai bang haksatna ka hon got maimah,’ chi in Lianpu’n Nenem mai zuut hialhial in a kidiik hithit hi.
A hong halhkhiat nawn tak in akhanawn a Delhi a ki-ensak a hoh ding in vai ahawm uhi. A zinma ding ni uh nitak in Nenem a lupna pindan a omlai, ‘Ka utkei, ka utkei,’ chi’n ahong kapkhia a, Lianpu tv en in kintak a ava delh leh pindan kil ah bil hum in ana kibu tiikteek hi.
‘Bang a Nem?’ chi’n Lianpu’n ava kawi a, Nenem in, ‘A hong pidek uh. Ka utkei,’ chi in lauhmel tak in ahon gen pepelh hi. Lianpu’n, ‘Kei ka om vo’i, kuama’n hong pilou di uh ahi,’ achi a, alung anuam hetkei hial hi.
Delhi ava tung ua, kha nih hilhial ataam nung un leng doctorte’n ngoh ding atheikeilai uhi. Om nilouhdan lah omlou ahihman in innlam ahon zuannawn uhi.
A hun sawt zil in a damlouhdan a uang deuhdeuh hi. Zankhat tuh ihmulai thakhat in athou a, kongkhak lam anaih gulgul a, Lianpu’n leng aphawk guih a, asap leh adawngkei hi. A va delhzui a, innkong a pawt in kelkonglam azuan gulgul hi. Lianpu’n ava mantang a, ‘Ko hohdek oi,?’ chi in phawnhalh asawm a, Nenem in mailam en gegu in, ‘Tomchik hong pai zual in achi ua, tomchik di hi,’ chi in mailam nawt asawm hi. Lianpu’n, ‘Hon en dih, Nem,’ chi a asawi noknok leh ahong halh guih hi. Huai chiang lah bangmah a thei nawnkei zel hi.
Huchih lai in nau ahon pai zomah a, anatna in pha mengmengkei mahleh aphaak chiang a khotheilou a apitu’ pi bangbang a gamtang ahihman in amah leh anau ading in lauhuai thei hi. Nikhat ngial houh khomuikuan a khonawllam manoh lai Lianpu’n amu a, ava delh a, alamkhak a, ‘Koi a hoh dek e Nem?’ achihleh Nenem in, ‘Na nau hon pia in, hileh k’on nuse di uh achi ua. Ka phalkeilua hilele,’ chi in a etna ngal a en gegu hi. Lianpu’n, ‘Kuama’n hon laaksaklou di ahi,’ chi’n akawi hi. A hong halh leuleu chiang in bel bangmah atheikei zel hi.
Gamkha ahong tung nawnta a, Lianpu tuh angaihsutna agik mahmah hi. Bukpi upapa’ thukhah alungsim ah a om nilouh hi. Dik in diktakeileh sin himhim asiatna bang om ahia chi in angaihsun a, Nenem lah nauneih na’ng nai mahmahta a, huchipi a zin ding lah thil baihlam hi hetlou ding a, lah upate’ gen dik ana hileh denchiah Nenem in bang hiam hon tuakkha leh chi in alung aguuk in agim mahmah hi.
Atawp in bangteng hileh tuah penpen tuak di’n chi’n zin ding in a kisata uhi.
Tuma a atunna inn mah uah atung nawn uhi. Nenem’ naunu a tonpih nawn ua, ann huan ding in tuma a amichial nu uh a chialnawn uhi. Huchi’n amau adia thil lamdang hong tung ding ngak in a om uhi. Pastorte khawng in va veh in thumna bang ava neihsak zel uhi. Dawite mah in ahihdam nuam ua hi’n teh, hiai zahvei thum nung ale adam utlouh, chipeuh in Lianpu’n a ngaihsun hi.
Nikhat tuh zingkallam khua siang mahmah napi in sun laitak in simlam apan meivom ahong kizial tou ngoingoi a, huih haatsim tak in a nung vevu hi. Nenem innka a puantuah a omlai khophawklou in apuuk geet hi.
Innsung ah azawnglut ua, lupna ah asial uhi. A chi ahong sa hiaihiai a, angaih uh apha hetkei. Vuah leh huihpi hattak in ahon nuai a, chikchiang in inntung ahon hawk de aw chi in thawmhau leh mangbangtak in a om uhi. Innkhuamte khawng puak motmot in akiheek ua, huchihlaitak a Lianpu’n inntunglam a etleh inntung a bi gaakna naangte kikhiin in a omna lui uh angou teeltual a, lamdang asa sim mahmah hi.
Huchia dakkal nih vel nasatak a zuk leh nun athuah nung in khua ahong dai a, van ahong kihong a, nisa ahong suak sengsung a, denkhawng a vuah himhim zulou mah bang in ahong sa sesu hi. Mualkuamte ah tuimei a kai thihthiah ua, awl in vanlam a manoh ua, khokiim luiguam a hawktui luangging zoizoi azaak theih hi.
Nenem chisa awl in ahong dai nawn a, sawtlou nung in ahong halhkhia a, ahalhkhiat vanglak chiang in lah a utut in a gamtazou zel hi. Lupna pindan apan pawtkhiat ualeh athuk uh, suangthuk hive’n, ana kikalkhia in apuuk teltul ua, aki-entuah ua,lamdang asa mahmah ua, alung uh anuam hetkei hi.
A denzek chiang in Nenem in agil na ahon sa a, nauneih hun in pha ahi ding chi in Lianpu’n naudompa pu Thanggou ava sampah hi. Nauneih hun in pha ana hipeetmah a, sawt suallou in ta pasal hoihtak anei hi.
Nenem’ damlouh ziak a naungek bang ahong chi de aw chia patau leh lungkham gige a omlai ua chidamtak a ahong piantheih tuh Lianpu’ ading in thillamdang ahilou theikei hi. Naungek a pom kawm in Lianpu’n – hiai atawpna hita di ade aw? Khahkhiat a omta ka di ua aw? Chi in angaihsutna apaisau mahmah hi. Pathian hia, dawite hia, khovel a tawplou a gam tangtang zaw ana om mah hi eive chi’n angaihsun hi.
©Siamsinna leh Vakiangbu
‘Koi khatvei lai. Nem, na taklam ah neuchik awnzek ou,’ chih toh meek athuah hi. Kitengzou lemla in abuai vingveng ua, sawtkhop adaih hi. Biakinn a puanngou thupi silh a kitenna ahi kei. Naupang hon toh paak toh buai luihluih a kitenna leng ahisamkei. Mi’ hihlouh dandan a thilhih chiitchiat tuh Lianpu’ utlam ahi a, hiaiziak a pahtaak aloh zahzah in gensiatna leng aloh veve hi. Achih ngal lah achi tentun a, daalzoh ding ahikei. Aman tuh tua bang a biakinn khawng a kitenna bawl a zek tuamtuam zuih khawng ah thupina bangmah amukei hi. Nenem kiang a kiten ding thu agen deklai in leng huaiziak tak in haksa asa mahmah hi. Ahang bel numeite’ a ding a kitenna puanngou silh i chih a damsung ua khatvei kia ding hi a, a thupi nipen uh, pahtawi a a-omni pen uh, huai pen ama’ lungput ziak a a itpen Nenem in taan ding chih angaihsut chiang in naa sa mahmah saam hi. Himahleh a lungtang a athilpom lah akoihkhe utkei a, abuai mahmah hi. Nenem in bang ngaihdan anei de aw chi’n alunggeel vungvung zel hi. Bangteng hileh dik chi a apom, huai mah tuh zuih asawm a, Nenem’ kiang a agen leh Nenem in leng, ‘Nang hoih nasak naakleh poiloupi,’ chia kiniamkhiattak a adawn man in alung anuam mahmah hi. Himahleh kimohsakna khat bel anei veve hi. Huchi’n kitenni ahong tun in a inn uah inndongta teng leh bial upa bangzahhiam toh, pastor makaih in kitenna anei uhi. Nenem in puandum ateng a, nam puannak asilh a, amaisan tiitiau toh akilawmkhawm mahmah hi.
Biakinn a kiten pen pawng muhdah ahi samkei a, himahleh tunai a thilchiin chi tuamtuam hong omthakte’ ziak a sumsenna sangtak ahong suah zadah ahizaw hi. Amah bel abang-abang hileh solkal buhpang sawk ahi a, ut hileh sialtal in leng moulawmzou ding hi. Himahleh a innvengte, haksa tak a neektawm zongte a ngaihsut chiang a hiai paidan thakte khawng deihlou ahizaw hi. Kitenna pen huchia hulumtak a leiba tampi kiguan a hih sese kullou a, dakkal khat sung a baihlamtak a zohtheih ahi chih mite lak ut ahizaw. Tua ding a alamlaktu a amahmah pan ut ahizaw hi. Tuma khang nih sung a ding a tua bang a kitenna sai amasapen leng ahi mai ding hi. Mihausa’ a ding in milak a puanak keek silh anoplouhna omlou a, himahleh mizawng a ding in bel anuamkei tuntun hi. Adang silh ding aneihlouhziak ahihman in. Aneite’n biakinn thupi tak a zeem ua, silh leh teen thupitak leh chiindan sumsenhuai taktak toh kitenna biakinn a aneih nung ua paak malkhat leng taak zoulou a kitenna sai utte ading in amaingalhuai hetkei hi. Mineizou’ ading in houchik a kitenna sai zumhuailou a, a utman hilel a, himahleh minei zoulou ading in bel azumhuai tuntun hi. Aneihlouh ziak ahihman in. Huaiziak tak a Lianpu tuh alamlaktu a pan ut ahi.
Nitak lup hun in Nenem tuh a lupna pindan ua avante kikheek in a om a Lianpu’n a nunglam apan va kawi in, ‘Akoi ah ka pan dia,’ a va chi a, Nenem in, ‘Abul ah ake,’ ana chihguih leh dawngkha kisalua in aki-en ua, anui teemtuam uhi. Lianpu’n Nenem bil ah bilngaihna langkhat a thuahsak a, aman alangkhat thuah in sawtkuam ding kawm in angaihpih a, kawikawm in tawn deeldeel in akivei pih hi.
‘Moupuan na silh ding lah hon suhsak ka hihchiah thildang k’on pe di,’ Nenem kiang ah achi hi.
‘Bang oi?’
‘Kiten nunkhum zang di’n ka hon zinpih ding. Na utna mun ahi diam ah bel ka theikei. Hilele nuam na sak ka gingta. Bukpi ah.’
‘Oh, ke’n singtanglam mukha nailou kei mah voi. Ka ut. Chikchiah oi?’
‘Kalnawn chiah aw?’
‘Aw. Hileh eigel kia di?’
‘Na naute a ut uleh amau toh.’
‘Hileh ei bangchi om di e huai a. Bukpi a hotel om amaw?’
‘Lungkham ngailou. Hon muang leteh. Na pasal dia muangtak a na hon neih leh hon pummuan leteh. Thilteng ka enkai khinta,’ anui a, ‘tuzan zaw sepdi tam toh houlim hiaizah in khin phot ni,’ chih toh amuuk a tawp athuah hi.
*
Chih mah bang in Lianpu tuh mi tupguh mahmah khat ahi a, achih vanglak chi geugou mi khat ahi. A huchih ziakmah ahi ding Nenem i chih nungak melhoih mahmah, Lamka khozang a amah elzou ding omlou khop phial a hoih tuh amah mel a gen ding himhim omlou, tangval hi diipdeep, thousilen khuam bang leltak in atan khaak. A hai kuhkal leh dohzohna ziak liauliau a Nenem tangzou hi penmai hi.
Kum guk paita a tuailai khawmpi a amuh ahi a, hoihsalua ahihman in amuhni a kitenpih pah ding hile leng thil dang bangmah awlmohlou a kitenpih mai ut ding bang hial in akithei hi. A lawmte’ tungtawn in a phone number a ngah a, mi zahkaitak himahleh tuhun in tuh zahkaina himhim in a lungtang ah mun atangzoukei ahi mai. Sih leh sih, dam leh dam chi in nitaklam khat tuh ahoupih ek maisam hi. Nenem in ana dawng peetmah a, Lianpu tuh diip kisai letlet in agen masak leh nanung nangawn theizoulou in apau belhbelh hi. Huai ni apan kigaaltheih in phone tungtawn bang, facebook tungtawn bang in akithuzaakzel uhi. Khatvei tuh Lianpu in Nenemte’ inn a va pawt ding a lunggeel a, Nenem in leng pha asakman in a va pawt hi.
Huchia hun hong kiveizel lai in Nenem in alimsak ngelkei chih athei a, himahleh atawpsan utkei hi. Mel leh puam a asithuaidan amah leng akihaih hetkei a, nungak mel leh puam a ente ahihzawkmah ulehtuh lohchin na’ng atawm mahmah chih ahaihkei. Himahleh kingaihsiatna himhim mut ot hun hi in atheikei hi. A nungak heelnu lah miteng mittunna hihman in biak hak ding mah ahi chih leng ahaihkei hi.
Kum kim bang huchia ahong kivei chiang in Lianpu’n leng a itna thu gen ding alunggeelta hi. Kilam-enlou sasa in nikhat tuh agen a, agintak bang in Nenem in kamsiamtak in anial hi. ‘Pasal na neihma ka lungkekei ding. Ka honna ngak nilouh ding,’ achi lel hi. Huchi’n avangkim a thuzaak zel in a om uhi. Khatvei tuh Lianpu’n a facebook a etleh Nenem in ngaihzawng dang neita ahihdan ataaklat amu a, ahi dedu zezen hi. Kipahpih ahihdan thuthem akhaak hi. Bangmah dawnna amukei. A zinglam chiang in Nenem in facebook nasan a amah daal ahihdan atheikhia a, huai nung tuh houpih teiteidan le om sa nawnlou in kithuzak nawnlou ahimai uhi.
Huchia kum dang khat ahong liamnawn ma in Lianpu’n nikhat facebook ah Nenem in lawm ding a azotna amu leuleu a, lamdang sa in ahi heuhou zezen hi. Alawmte apan Nenem leh a ngaihzawngpa kikhenta uh ahihdan atheikhia hi. Huchia Nenem toh hong kithuzaak nawn ua, a Nenem mah in leng tumalam sang a limsak zaw hi a atheihman in a itna thu agen leuleu hi. Nenem in, ‘Ngaihzawng nei di’n ka kiman naikei,’ chi in a dawng utkei lailai maimah hi. Lianpu tuh haamhaih akisa mahmah hi. ‘Bang achia a n’on ngaih lailai? Ngaihzawng hon neihsan ing a, huat didan ale hon enlou maw,’ Nenem in achi a, Lianpu’n, ‘Ka theikei. Ka hon haw theikei. Ka kisaktheihna sa’ng in ka hon itna alianzaw a ahi di,’ achi hi. ‘Na dinmun ka theisiam, i itlouhte va it theihmawk hilou mah ahi. Himahleh ka hon ngak lailai ding. Khatvei tei na hon deihlouhnate nawlkhin in hon itdan na kizilthei khamoh di hia. Huai ni ahong tun theihlouh a, kei na hon ittheih himhimkei leh lah ka hon itziak a ka hon ngakzoh tantan ka hon ngakna ah lungkimna ka mu ding,’ Lianpu’n achi lailai hi. Huchi’n kithuzaak touzel in a om uhi.
A kum bang ching mahmahta, alawmte zi leh ta nei a a-om siuhseuhlai un leng aman tuh Nenem a ngak ngiitngeet mai hi. Bangchi it aleng itkha ahiam ah asia leh pha theihna nangawn poihlongzou hial mah abang hi. Atanzoh akilam-en hetkei. A ngaak zoh tantan ngak leh huai a lungkimna amuh tuh adelh ahilel hi. Himahleh khenchiang in lah hichitel a a it ngalleh Nenem in leng khat veitei it khong ding in lam-etna khat anei zel hi. Huchia agum ngak mawk chiang in Nenem in leng loh dingdan theilou in akum nga na ah tuh ngaina khawng in ahon itthei khonghi. Huchi’n akum gukna ah akiteng uhi.
*
A zin ding uh ni a hong tung a, Lianpu, Nenem leh anaute nih, Niangbawi leh Khanlunte ahi uhi. Gari heek ding in Suanmung achial ua, amah leng a ut lamtak ahi zomah hi. Huchi’n zingkal baihtak a kipankhia in Bukpi lam azuan uhi.
Nitaklam dak thum in Bukpi atung ua, Lianpu’n agamtat dingdan uh Nenem a iim a, bangmah hilhlouh in akizui saksak hi. Bukpi kholai ah a kumpih a, huai a avante uh suah in apuak theihchiat uh pua in apaiphei ua, mawltual sak ah inn kilamthak, atung bii kikhuh, abang mau koptah leh atuang goten a kibawl ah aluutpih hi.
Innsung alut uleh thuk ah mei kiteen in ana om a, bel a tui kisuang mei kitetziak a souzou nawnlou a haamthoh niitniit in a om hi. Dohdan nopchitak a om a, alangkhat lampang puanzaak in akideidan hi. Dantan sunglam ah lupna nih puanphah leh puansilh bukimsa toh a om hi. Dohdan tung baang ah akitenna lem uh lianpi akisawp akitaak hi. Kuapeuh in lamdang asa chiat ua, gen ding pen thei zawsam leng a omkei uhi. ‘Naaknop e. A chikkal a hiai khawng nana sai man eita?’ Nenem in adong a. ‘Kihichi mai eivoi,’ Lianpu’n achi lel hi.
Huchia avante khawng uh lem a a-omlai un nupi khat ahong diangluut a, ‘Hong tungta na hi u? Koi kichibai le’ng ake,’ chi in chibai ahong hawm hi. Nenem a chibai kawm in, ‘Hiai pen hi maw na lawinu? Anaak hoih e. Sapte sadek i ke,’ chi in anui kalkal hi.
‘Hong tungta ka kei u. Ann na huan nailou na hi?’ Lianpu’n achihleh minu’n, ‘Anou hong tunglou a va huan hial di le ahihk’eh chi i ke. Koi, huan ziang le ahi mai. Tui le sousa a ka koih ahi. Bang meh i huan du le?’
‘A lim di na chihchih khawng hon huan suk in. Sahou nana mu?’
‘Ngal leh sasan hou ka mu a, tua huan ngal di i hi u? Nahtang uum bang le om ake.’
‘Nenem toh alim di na chih dandan in hon huan ziang un e.’
‘Koi leh ka va la ziang di,’ chi in minu a taidok a, adenlam chiang in loh khat khu in ahong luutnawn hi. Nenem toh ann huan in a kipei uhi. A Nenem taget lah chikmah a singtang hohkha ngeilou chih mahtak tap tung a thuk a singchih a annhuan chih khawng a kipahpih khop apha hi.
Nitaklam ann nezou kholai avaak maimai ua, vaikuante’ tun hun tak ahihman in naupangte anute uh dawn in achiau chiilcheel geuh uhi.
‘Kuate inn a oi i tunna uh?’ Nenem in adong a.
‘Ei inn eivoi. Nuam na sa na?’
‘Nuam lawtel. Bangchidan in eita ei inn chihmawk?’
‘Kiten ding thu i gen tunglai a inn ana lam dia ka gen eivoi. Ka zi hitel mawk chin a! Numei tampite’ ngaihsut batlouh, tawmchikte’n a ngaihsut phak uh, huai hinkhua ka hon zangsak ut. Niteng, kalteng, khateng, kumteng- a tungtuan leh manpha hi gige leh ka ut. Himahleh huai bang hinkhua ka hon delhpih nalam a ka hon gamlaat pih deuhdeuh khaak ding ka lau zel. Itna leh kithalawpna in lah lungsim abumhai pahpah a. Huaiziak in hunteng in nang tuh ka sia leh pha theihna na hi gige ding. Ka hon itna leh ka kithalawpna in ahon buphai chiang in hon phawnghalh zel in aw,’ chi in nidang bangloutak in chitaktak in ahon gen a, Nenem in a ULian hichitel a athutaklam mungeilou ahihman in anuih lamlam a za a, athugente’n a khasesak nawnsawn a, agawl bang abing sim eek-awk hi. Bangmah gentuanlou in a ULian baan a kawi in innlam amanoh uhi.
A lampaina uh tawl ngial ahi ding ua, zingkal anhuan hun a Ngaihniang an huan ding a a va kisak leh ana thou naikei uhi. A denlam deuh chiang in ava en nawn a, ana thoukei lailai uhi. Hinawn mahmahkei chi in aphawng a, Lianpu thou in kong ava hon hi.
‘Bangchi na hi u? Zingkal laplou na kei u. Na sun an ding uh i huan ziang di uh,’ Ngaihniang in achi chiamnuih hi.
‘Gari tuanna kitawl deuh ahi ding e, kithouzou hetkei,’ Lianpu’n achi a, kihah ding in a kisa hi.
Huchia adangte leng ahong thohkhiat lingling lai un gamvakpih ding a azotpa uh ahong diangluut a, ‘Aru, tutantan a na manlouh ding uh kithei hileh anneekkham in sing va kipo leh hiziang di hi a. Denlam chiah hong thak ning e,’ chi in adiangpawt nawn hi.
Tuni a Khupching leh Ngambawm’ sulnung achih uh veh ding a kisa ahi ua, a nanung pen a Ngazam lui veh a, huai a loubukte a giah ding atupdan uh ahi. Ann nekham kisazou sawtsim angaak nung un Pauthian, a makai dingpa uh ahong dianglut nawn a, akipankhia uhi.
A masa in Bukpi simlam a Muallian tang a suangpi lianpi khat, Khupching khibah koihna achih uh azuan uhi. Keplouh-zuunlouh a om, anaih na’ng bang leng lampi gina omlou hinapi in Lianpu’n lampi sial ding a mi ana goih man in nuamtak in anaihthei uhi.
Huai suangpi tuh laam nih vel ding a lian, amailam alei hiiihiai a, huai suangpi mai ah khibah kikoihna hileh kilawm a kuak tiktek tampi a om hi. Huai tuh Khupching khibah koihna achi uhi. Huai suangpi bul mahmah ah leilak ah suang saupi khat akikham zinzen a, vokkuang chia ding khawng a kikhuak a, huai tuh suang vokkuang achi leuleu uhi.
Huai apan kumkhe suk in Palkhuang leh Bukpi kikal a Ngambawm khekhap omna achihna mun uh a zuan uhi. Huai mun mah ah Palkhuangte’n Khupching leh Ngambawm theih gigena ding a a suangdoh uh leng a om hi. Huai apan akhang a Ngazam lui a tungsuk uhi.
Gamkha khohullai ahi a, khua asiang a, nuam mahmah hi. Huai a zangloubukte a giah sawm ahi uhi. Munzang nuamtak ahi a, tawldam huaitak ahi. Tua loubuk tuh loubawlte giahgiahna sa ahiman in vanzat- um leh bel, tu leh tem kiningching a om hi. Tuate zang in a an puakte uh ahuan uhi. Hiai loubukte a giahsawm ahi ua, amakaipa un zingkal a va pinawn ding in apaisan hi.
An huanzou Ngazam lui ah kihihhalh leh lem khawng kila in a om uhi. Huchia nuamsa tak a a omlai un huih haatsim in ahong nung a, luitaw lam apan husa, amaulam zuan a hong gingtou hehu aza uhi. Huchia luitawlam a et deemduam lai un luitawlam apan suangte amah leh amah in ahong kilep zungzung mawk uhi. Huchia lamdang sa leh patau a gamtat dingdan leng theilou a a omlai un thakhat in Nenem tuh a dinna mun ah apuksuk hi. Nenem a buaipih sung un suang kilepte’n apeel uhi.
Lianpu’n kintak in buk ah a domphei a, asial hi. Phawn halh asawm ua, akhut-akhe ameek ua, tui a theh ua, sawtlou a buaipih nung un ahong halhkhia hi.
‘Bangchi e Nem?’ Lianpu’n a dong a, ‘Ka lu nat a hong na in chin, huaiban ka thei nawnkei,’ Nenem in achi hi. Laulua a khophawklou a puuk hi ding in akoih uhi.
Athil tuah utoh, Nenem hong hichih toh angaih uh apha hetkei a, lah tua paina ding in ni atumta a, ni tumta chih phetlouh, a makaipa un lah paisanta, zingchiang zingkal a va pi nawn pan ding, amau kia a khua tungthei ding vual ahikei ua, ut leh utlou a agiahmai uh akuulta hi.
Khua amial siangta a, van asiang mahmah sitset hi. A kiang ua lui luangging bilhbilh, avangkim a akpa haam leh khausi-khauvai haam ging solsolte’n amaute ahulumsak zahzah uh athawmhausak uhi. A kallak a vasa thawmhau huaitak a haam ngoungou khawng thawmhauna in anei uhi. Khenchiang in thawm lamdang pipi za in akithei ua, aki-entuah geekgawk geuh uhi. Khenchiang in thil khat chiak nolnol a abuuk uh hon naih hiaihiai zel, gamla hiaihiai zel bang peuh in athei ua, nuam asa hetkei uhi.
Ihmu ngamlou sim lampang leng ahi uh. A meivak uh de in a lupna chiat uah dai dide in a om uhi. Zan sawt mahmahta ahihman in amei uh a sumit ua, atheihlouh kal un a ihmu khong uhi.
Zankhanglai in Lianpu thakhat in akhanglou zot a, Nenem chi ana sa mahmah a, huai in ana phawng ahi ding. Kintak in meivak a suvak a, anaute uh aphawng a, Nenem in khua ana phawk nawnkei hi. Achi asa mahmah a, damdawi lah keng khalou ahihman un tui in alu adap uhi. Vangphathuai tak in phalvak in a chi ahong khing a, ahong halhkhia hi.
Khua ahong vaak a, ngaklah tak in a lamkaipa uh ana ngak uhi. Dak giat pelzek in ahong kilaak pan a, Lianpu’n athiltuah uh ahilh a, kintak in innlam azuan uhi. Nenem chisa phakhe taktaklou ahihlam in ahaat zoukei a, deih bang in a paihaat theikei uhi.
Khua atun un a gari heekpa uh sabeng in ana diangkhe laizomah a, amau leng ngak nadan om salou in kintak a kiguang in Lianpu’n gari a heek a, apaisan uhi.
A damdawi neek in nnasem ahi ding a, lampi ah achisa ahong dai hi. Inn atun chiang bang ua tuh halh mahmahta ahihman in ki-etsak pah lawlaw ding leng kuul asakei phot uhi. Lianpu’n tuh nitak ding a guuk kihtaak sim a, damdawi toh kigingsa in a om hi. Bangmah bel achikei thupthup hi.
A zingkal in innkong a puanphou a omlai thakhat in apuuknawn a, achi kising in akhauh mahmah hi. Kintak in damdawiin a delhpah ua, khua phawkzoklou in sawt kuam ICU ah akoih uhi.
Bukpi a agamvakpih pa un Lianpute’ thiltuah nitak a alenglaatna a agen leh upa khat in, ‘Hong maingal ngawnta uh ahi maw. Sawtkuam zaw hong gamta ngamlou uh hive’n. Dawi chikhat, suanglepte ahi uh. Gamkha in gam avaak ua, apaina lamteng uah suang alep ua, biching gakna naangte akhiin uhi. A suanglehte un i kha adelhkhaakleh kichina a, a hong kiklam ua ahon photkhaakkei uleh kisithei kichi in hiai hunlai in kuamah gam kigiak ngamlou hi. Pathian thu ahong haat apan kigenkha nawnlou i chihleh tua hong kipanthak eita ve ua. A suang leh un akha delhkha ahi peuhmah di,’ chi in ahon gen a, kuapeuh in lamdang asa chiat uhi.
‘Tua suanglepte akiiklam ua,’ tuibuk a siatkhiat zoh in a sunzom a, ‘akha delhkha suang pen aphot khaakkei uleh a damkhekei ding. Sih leh hin bel asuang gikdan ah akinga ding. Asuang agik leh a damzoukei ding a, asuang a zaan leh bel damkhekei mahleh asi zen kholkei ding. Huan suanglepte’n a suang aphot chiang ua minu hiai mun a a omkei leh a kha in a muzoukei dia, a damtuankei ding. Tukha sung a suanglepte ahong kiik khaak zenzen uleh damlou nu hiai mun mah a a om ahoih ding, thukhaak le uteh.’
A gamvakpihpa un thai chiang a Lamka hohna ding nei ahihdan agen a, thu va tut himhim hoih asakdan leng agen hi. A va hoh in a va thuzaak ngei a, himahleh Lianpute’n huchia gintak luat ding in a koihkei ua, banghiam chia siatlam a manoh leh khopilam zot zawk a lunggulhdan uh ana hilh uhi.
Ni kimkhat mahmah ding khophawklou a alup nung in khua ahon phawk a, khua aphawk vanglak lelah bangmah chilou mah bang in kintak in ahalhkhe zel hi. Huai nung sawtkuam bang mah chilou in a om a, nikhat nipini a biakinn a mipi’n dinsa a la asaklai un apuuk a, amasa ate mah bang in sawtkhop khua aphawkkei hi.
Doctorte’n lah bangmah matkhiat ding mulou in khopi a ki-ensak mai ding in akum uhi. Nenem khophawklou in alum dildel a, ‘Bang hon lohkha ka maimah a Nem? Na kipahna ding ka zonna lam a hiai bang haksatna ka hon got maimah,’ chi in Lianpu’n Nenem mai zuut hialhial in a kidiik hithit hi.
A hong halhkhiat nawn tak in akhanawn a Delhi a ki-ensak a hoh ding in vai ahawm uhi. A zinma ding ni uh nitak in Nenem a lupna pindan a omlai, ‘Ka utkei, ka utkei,’ chi’n ahong kapkhia a, Lianpu tv en in kintak a ava delh leh pindan kil ah bil hum in ana kibu tiikteek hi.
‘Bang a Nem?’ chi’n Lianpu’n ava kawi a, Nenem in, ‘A hong pidek uh. Ka utkei,’ chi in lauhmel tak in ahon gen pepelh hi. Lianpu’n, ‘Kei ka om vo’i, kuama’n hong pilou di uh ahi,’ achi a, alung anuam hetkei hial hi.
Delhi ava tung ua, kha nih hilhial ataam nung un leng doctorte’n ngoh ding atheikeilai uhi. Om nilouhdan lah omlou ahihman in innlam ahon zuannawn uhi.
A hun sawt zil in a damlouhdan a uang deuhdeuh hi. Zankhat tuh ihmulai thakhat in athou a, kongkhak lam anaih gulgul a, Lianpu’n leng aphawk guih a, asap leh adawngkei hi. A va delhzui a, innkong a pawt in kelkonglam azuan gulgul hi. Lianpu’n ava mantang a, ‘Ko hohdek oi,?’ chi in phawnhalh asawm a, Nenem in mailam en gegu in, ‘Tomchik hong pai zual in achi ua, tomchik di hi,’ chi in mailam nawt asawm hi. Lianpu’n, ‘Hon en dih, Nem,’ chi a asawi noknok leh ahong halh guih hi. Huai chiang lah bangmah a thei nawnkei zel hi.
Huchih lai in nau ahon pai zomah a, anatna in pha mengmengkei mahleh aphaak chiang a khotheilou a apitu’ pi bangbang a gamtang ahihman in amah leh anau ading in lauhuai thei hi. Nikhat ngial houh khomuikuan a khonawllam manoh lai Lianpu’n amu a, ava delh a, alamkhak a, ‘Koi a hoh dek e Nem?’ achihleh Nenem in, ‘Na nau hon pia in, hileh k’on nuse di uh achi ua. Ka phalkeilua hilele,’ chi in a etna ngal a en gegu hi. Lianpu’n, ‘Kuama’n hon laaksaklou di ahi,’ chi’n akawi hi. A hong halh leuleu chiang in bel bangmah atheikei zel hi.
Gamkha ahong tung nawnta a, Lianpu tuh angaihsutna agik mahmah hi. Bukpi upapa’ thukhah alungsim ah a om nilouh hi. Dik in diktakeileh sin himhim asiatna bang om ahia chi in angaihsun a, Nenem lah nauneih na’ng nai mahmahta a, huchipi a zin ding lah thil baihlam hi hetlou ding a, lah upate’ gen dik ana hileh denchiah Nenem in bang hiam hon tuakkha leh chi in alung aguuk in agim mahmah hi.
Atawp in bangteng hileh tuah penpen tuak di’n chi’n zin ding in a kisata uhi.
Tuma a atunna inn mah uah atung nawn uhi. Nenem’ naunu a tonpih nawn ua, ann huan ding in tuma a amichial nu uh a chialnawn uhi. Huchi’n amau adia thil lamdang hong tung ding ngak in a om uhi. Pastorte khawng in va veh in thumna bang ava neihsak zel uhi. Dawite mah in ahihdam nuam ua hi’n teh, hiai zahvei thum nung ale adam utlouh, chipeuh in Lianpu’n a ngaihsun hi.
Nikhat tuh zingkallam khua siang mahmah napi in sun laitak in simlam apan meivom ahong kizial tou ngoingoi a, huih haatsim tak in a nung vevu hi. Nenem innka a puantuah a omlai khophawklou in apuuk geet hi.
Innsung ah azawnglut ua, lupna ah asial uhi. A chi ahong sa hiaihiai a, angaih uh apha hetkei. Vuah leh huihpi hattak in ahon nuai a, chikchiang in inntung ahon hawk de aw chi in thawmhau leh mangbangtak in a om uhi. Innkhuamte khawng puak motmot in akiheek ua, huchihlaitak a Lianpu’n inntunglam a etleh inntung a bi gaakna naangte kikhiin in a omna lui uh angou teeltual a, lamdang asa sim mahmah hi.
Huchia dakkal nih vel nasatak a zuk leh nun athuah nung in khua ahong dai a, van ahong kihong a, nisa ahong suak sengsung a, denkhawng a vuah himhim zulou mah bang in ahong sa sesu hi. Mualkuamte ah tuimei a kai thihthiah ua, awl in vanlam a manoh ua, khokiim luiguam a hawktui luangging zoizoi azaak theih hi.
Nenem chisa awl in ahong dai nawn a, sawtlou nung in ahong halhkhia a, ahalhkhiat vanglak chiang in lah a utut in a gamtazou zel hi. Lupna pindan apan pawtkhiat ualeh athuk uh, suangthuk hive’n, ana kikalkhia in apuuk teltul ua, aki-entuah ua,lamdang asa mahmah ua, alung uh anuam hetkei hi.
A denzek chiang in Nenem in agil na ahon sa a, nauneih hun in pha ahi ding chi in Lianpu’n naudompa pu Thanggou ava sampah hi. Nauneih hun in pha ana hipeetmah a, sawt suallou in ta pasal hoihtak anei hi.
Nenem’ damlouh ziak a naungek bang ahong chi de aw chia patau leh lungkham gige a omlai ua chidamtak a ahong piantheih tuh Lianpu’ ading in thillamdang ahilou theikei hi. Naungek a pom kawm in Lianpu’n – hiai atawpna hita di ade aw? Khahkhiat a omta ka di ua aw? Chi in angaihsutna apaisau mahmah hi. Pathian hia, dawite hia, khovel a tawplou a gam tangtang zaw ana om mah hi eive chi’n angaihsun hi.
©Siamsinna leh Vakiangbu
Comments
Post a Comment