ROOM 13

By ~ Mungboi Tonsing

Siamsin a gamdang ah om khiat zaw gentheih huai topkhok ahi ka ci ngap ta. Chennai Sumantha Higher Sec. School a class xi &xii sin ding a om kahi hi. Tenna inn luah zou lou ka hihman in ka school boarding ua a free in ka om hi. Ei singtangmi (adiak a Manipur mi) omlou ahih man in kenleng mel kibat pih deuhchi in Naga te khat lawm bawl pah in kon ki thuah thei pah vanglak uhi. Nicky(Naga pa) bel mi hausa ta ahi a a nu-le-pa ten sum ut hunhun leh deihzahzah a khak thei gige uhi, lawmta hoihtak ka hong hi ua, Boarding a leng karoom mate ahi hi. Sum ka poimoh ciang in amah kiang a va tai in ka la zel adinkik ding in gen zel mah leng a ut kei bilbel sek hi. Ka school boarding uhbel sawngthum ahi a room leng a tam huntawk hi, himahleh room dang himhim katang kei ua Room 13 kia a awng in a om hi. Hiai room bel Vaite kuamah utlouh naahi hi. Himahleh kei leh Nicky in kizen sa tak in ka puanlom uh pawlut in lupnalui mahmah te hahsiang in ka lup na ding uh ka bawl ua giah theih ding in ka sufelvek uhi.

School season kipan ta a himahleh kou gel bel laisim ka awlmoh kei ua Nickylabtop khoih kaki khel zel uhi. Kha (month) khat khong bang hun ka hong zat takun ka room gei ua Vaite'n hon mullit leh hon lau thei mahmah uhi, bangziak hiamcih bel thei lou in mak kasak thoh uhi. September kha (month) kaal (week) nihding khong paipan , nitak khat ka lup nung un Nicky mobile hon ging a Naga pauin hon kihou uhi. A ngaih zawng nu hi inte ci in kana ihmut san hi. Nicky lenga lupna apan a hong thoukhia a kei kiang a hon lumphei ahi ngei dinga ka bilbukin awl in hon sam a khua ka hon phok pah hi, thu bangmah ka gen ma in ka roomkongkhak bul (roomsung) ah laibu ki phen ging suatsuat ka za pah hi. Bang mahtheilou kahih man in ka etphei leh muh ding bangmah a omkei a adai sipsip nonhi, himahleh sot kihal lou in ka boarding compound ua ui(dog) lauhnei om tak inhonham, sot lou in a dai non pah hi. Nicky kiang a bang hihiam? ci in ka dotleh aman leng ka theikei ci in hon dawng a ihmu ding in kon kisa non uhi, kamit ka khup suk toh kituak in ka kongkhak(door) uh nakpi in hon ki soi ling hi,Nicky in bel ngaihsak ken hon ci a himahleh ka thomhau mok ziak in ka ihmu zokthei kei a, kongkhak bel sot aki soi louh ziak in awl in ka ihmu suk thei nonhi. Ngeina bang in kathou thei non ua himahleh hiai ni apan in Nicky omdan akikhek zek om hin kathei hi.

September kha hongbei a kha thak hong hi non hi, Nicky in damlouh na hontuak tou zeuhzeuh a, sunciang in damlou mun deuh hin ka thei hi. Nikhat classla ding a kaki sak lai un Nicky in ka lu(head) ana room a kana om mai ding ciin amah kia room a nusia in class la ding in ka kuan san hi. Tua ni nitak mahin thil lauhhuai pi leh huai se tak ka tuak uhi. Hiai zan zaw ka mangilh theikei November 13th zan ahi. Laisim zou in ka lum ua ka ihmut hoih mahmah laitakun ka lupna tung uah tui hon ki buak suk ekh mok hi, a lamdang bel lupnatuamtuak a lum kahi ua ka lupna tuak uah tuihon ki buak mok hi.

Khua phok pah in ka nih un ka thoh khiat ualeh ka biang nakpi in honki betsak hi. Light ka ONN ua ka room sung uh kon etchian(check/ search) ciang unlekuamah ka mukei uh. Electric vak hinapi in ka roomsung ua hong gamtang pen ahonmaingal deuhdeuh mok hi, room kil khat a pan ka bucket uh apek om mah bang inkou lam a ahon tung phei zot mai hi, hiai kia hilou in ka room sung ua husa hontam deuhdeuh hi, mi khat kia husa toh aki bang non kei a atawm top in mithum(3) bek ahi ding uh, ka van koihna uh almairah nuai apan in sisan honluangkhia a azom in kongkhak bul ah tunglam apan kibua mah bang in sisan hon kibokhia hi. Lau petmah in ka om uhi, mit a muhtheih a hici bang a hong gamtangngam tuh a huaise mahmah ahi ding cih lungsim in ka nei ta hi. Nicky kiang a navan kiguang(packing ) in ka cih leh kongkhak kihong ging ngaih tak hong om akongkhak ka et ualeh ki sungkilh zomah hi. Akizom in ceiling fan hoihlou penhon ling hi, tua ceiling fan a thil gik kikhai mah bang in a gik mel mahmah hi,tua nung sot lou mah in ka room sung ua sa puul om mah bang in uih in hon uihnon hi. Hiai ciang a tun tak in zaw kihou man lou in Nicky toh room pua lam aka tai pawt ua ka room gei te uh ka phong uhi, amau leng hon thou khe pah inbang hi hiam? Cia hon dong uhi, thil omdan gen ngam lou kahih man un tunitak naroom un kon giak ding uh cia kaki nget na uh hon pomsiam pah uhi. Himahleh kathil tuahte uh ziak in ihmu kip thei lou in ka lawmpa toh lupna tung in ki houlou in ka zanhak uhi. Zing khua hong vak philhphelh a ka giahna room te uh lenghon thou ua amau bel ka room (room13) a nitak teng in thawm ging za gige uhahih dan hon hilh phing uhi.

Hichi bang thil tung gige pen thil dik lou om hiding ahi ci in kua mah hilhsese lou in Nicky toh kou gel kia in, a thu thei deuh di pen cia ka gintak uhchowkidar pa kiang a kankhe ding in kaki thukim uhi. Khua vak mahmah ta ahihman in ka room ua pan kavan te uh tuahkhua/ lakhia in chowkidar Quarter a kava lut ta uhi.Chowkidar panleng theisiam tak in hiai ah hon giak zaw mai un honna cipah hi. Ka van te uhkoih khia in singpi don in ka thu dot sawm uh dong ngam zok lou a ka omlai unaman hici'n hon gen pan hi:

"Sumantha Boys Boarding Room 13 bel kuaman a luah louh na uh kum 3khong ahita ding. Nou bel kou mi (vaite) na hihlouh ziak un bangmah kon genlouh ahi, kou mite room13 luah lou ding a ka gen vek ahi. Bang ziak a na thiltuah uh hon gen lou uh e??? Nitak teng a na room uah thom ging polam apan kanaza gige hi, himahleh bangmah non genlouh ziak un kenleng bangmah kon hilh louhmah ahi. Tua bel ka kiang a non pai ua nou a ding in leng bit na ahi zoding". Ci a thu lakloh tak a agen lai hon top guih mok hi. Kongkhak hongkihong a Boarding student nih(2) hon lut ua bangbang hiam aki piak zoh un pot nonuhi.

Amah leng a tutna a hon tu kik non in a thugen hon gen zom lou ahih ciang inkou leng bang ziak a hici bang thil tung zel hiam? Ci in ka dong non pah uhi.Ka kiang uah hon tu nai in aw ngaih lou in hicin a thu gen hon pan non hi:"Hiai thu bel boarding student te kiang a ka im ahi. Kua mah kiang a genlou ding in kana kiciam khinta. Himahleh a kipat dan bel saulou kon hilh theiding", ci in a room a va lut zual hi, lehkha a kitun neuchik khat hon toipot hi. Hici'n a thugen hon zom non hi: "Hiai lekha a kitun bang hi dingin na ngaihtuah ua?? Gold a kibawl sana(watches)ahi. Nou om ma kum lii(4) paisa a tua na room ua student 3 ana om ngei uhi.Hiai mi thum te lak a khat, Punjab apan RanjitSingh in a neih ahi(gold watches pen). Nikhat a room(room13) ua tui pia a ka valut in kuamah ana omkei ua kenleng tua gold pen ka muh tak in, ka etlah ziak aka lak khak mah ahi. Huai nitak mah in Ranjit in a gold mang ahi cih a thei inalawm tegel ngoh a, hon kinial buai ua Ranjit in a room mate 2 te tem in dawtlum kha a, huai nung in amah leng kong kikalh khum in ceiling fan apan khaukhih in awklum ngal ahi. Hiai teng kon gen ding". Ci in kisiam tanlou takin nasem ding in hon pot san hi.

A thugen te leh nitak a thil tung te ka ngaihtuah kik ciang in ki zawitonkasa mahmah hi. Aziak bel, Ranjit awklup na ceiling fan pen gik mel tak lehlingling ka mit ngei a kamuh ziak in, huai bannah room kil leh kongkhak bul ahsisan kibuak thoh bang a hong kilang te Ranjit in alawm nih te tem a a dot namun hiding in ka suangtuah hi. . Hici pi a va omom dan hithei kasak louh man unkougel leng inn lam a ka siamsinna uh sunzom ding in kon kik non uhi.

Beita.

Kipak

©Siamsinna leh Vakiangbu