LUNGKHAMNA I TUAH CHIANG HIAM AHIH KEI LEH I MANGBAT CHIANG A I OM ZIA.

By ~Thang Haulai Ffetg 

 

Mihing te ei chouh a hintheih vual hilou hi. Huaiziak mah in leng Pathian in mihing asiampat tung  apan in ‘adam’ lawm ding in numei ‘eve’ ana bawlsak pah hi.

Mi tampi te’n I theichiat sa uh, hinkhua I chih pen anuam lam ngen in pailou hi. Anuam lam a apai hun zaw om mah sam e, hileh leng nuam gige, hoih gige chih om khol lou hi.

Mihing te’n lungkhamna ahih keh mangbatna I tuah pen ahi di mawng a I koih masak ding ahi. Kipak gige ding leh lungkim gige ding a iki koih khak mawk leh pen I khasiatnang tam deuhdeuh ding a, eimah leh eimah zong ki ning gawp thei hi. Huaiziak in hinkhua a mangbatna, lung ngaihna I tuah te pen midang te’n le ana tuah sa uh leh apal galkai sa uh ahih man in ,I tha nemsak kei ni in, ahun lou pi in I hin na eima kipiak theihlouh pen susia ahih keileh I hinna pen lamang maikei ni. Pathian in lamnuam ngen hon chiam zenzen kei a himah leh amah ah lam haksatna te palzoh didan hon hilh zaw hi.

 

Mihing te’n I sungkuan te ziak hiam. I ngaihzawng te ziak hiam. Lawmte ziak hiam leh thildang tuamtuam te ziak in lung gimna. Mangbatna leh haksatna i tuak tangpi a, ahi ding mah leng ahi hi.himah leh theisa ngoihngoih a mi hinkhua vasuknat pen vualzawl huai khol lou hi. I theilouh a I hihkhak pen thutuam hita leh. Huaiban ah mi tung ah ki nepna I hauh luat leh I khasiat nang tam kingah ahih man in mi tung ah leng kinem lokei ni in, mi panpih na tel lou in hin sawm ni. Eimah hih theih chiang leh eimah hihtheih louh chiang theitel kul hi.

Lungkham mangbat na mihing te’n I tuah chiang in, I kiang a om pouhpouh ki ning mawk hi. I kiim nai ah kuamah omkei le uh chih I deih laitak ahi a, himah leh I kiang a om di lawm I poimah pen hun ana hi hi. Lungkham mangbang a I om a mi’n hon hehnep chiang in ki ngaihsak louh bawl khawng in ki om mah leh athu gen te pen uh ki za thei thou hi. Mi lungkham mangbat hun a akianga va khamuan a va houpih zaw a phat tuam na tam mah hi. Himah leh a ngaihtuah na uh hon veng zawk deuh chiang in houpih pan le hoihzaw ding hi. Hon kum thei ta ding uh ahih man in. a lungkham tuung lai un pau lou in akiang uah va om top le huai pen lungkham mangbatna thuak tupen in nuam sazaw hi. I va paupau chiang in hon ning theih uh ahih man in, dai dide a amau kiang a va om na in amau khat tang kisak na pan hondam thei a amau leng tawldam zaw uhi, poi I sak pih na pen kam a igen sang in I melsuak mahmah apan Iak zaw le amau deihlam hi in kathei zaw hi.

Lungkhamna I tuah chiang in atawp tung pah kei ni, ka chih nasan bel thutawp lapah kei ni chi ihi. Lungkhamna natuah hun in thupukna na lak di teng kingang in lapah ken, dak kal khat leh nih hiam bek ngaihtuah masa lou in mawk lak kei in, a khonung chiang a kisiik baihlam lua hi. Huaiban ah I lungkhamna pen mang ngei nawn kenteh chi in ki khem kei ni, hun pia inla thum(pray) in, na theihlouh kal in hun in na lungkhamna pen honmualkhum san ding hi. English te paunak khat in bang gen hiam I chih leh “don’t take a decision when you are angry nor mak a promise when you are happy ’’ ana chi hi. Dinmun hoihlou tak a na om hun a thupuk na nalak di pen zaw huaise kha ding hi.huaiziak in hunpe siam in la gingta tak in ngak mai in.

I hinkhua a ituah leh I lampi a hong pai kha te a hi bangbang a pom theih kisin ni, ei thil hih ziak a I tuah le aom ding a , ei hih sese hilou midang nasep na pan a hong suak khia en I thuak khak  leng aom ding mah ahi. I lungkham ziak ahih keileh i heh ziak a thil kikhel kik thei ding le ahih louh man in I pomsiam a ei hon suna thei te pen a hepkhiat didan I zon pen ki phamoh zaw hi.

 

             “STOP WORRYING, WORRYING NEVER CHANGE ANYTHING’’

“So do not worry about tomorrow, it will have enough of its own. There is no need to add to the troubles each day brings”

Matthew 6:34.

 

©Siamsinna leh Vakingbu