Siamsinna leh Vakiangbu

By ~ Vz Vualnam Hinkho lampi a ka tonpihte Luipi bang in luang dimdim ua, Hinkho lampi ah kei tuh Luita bang in ka luangging bobok. Mite'n dai dide a Hinkho tuanglam a zuih zel lai un Ka thawm a ngaih a, Ka bengseng a, Kei toh ton ding Mite'n a kihta uh. Ka khasiat na'ng a tam a, Ka lungtai na'ng a tam a, Ka phun na'ng a tam a, Ka lungkim na'ng a tam a, Ka heh na'ng a tam a, Ka kipah na'ng a tam a, Ka gen ding a tam. Kei leng phaizaang ka tun chia'n, Dai dide in luang na ning! Himahleh huai ma zaw Bengseng zek lai ning! Thawmngaih zek lai ning! Luangging bobok lai ning! © Siamsinna leh Vakiangbu

By ~ Vz Vualnam Banghang hiam, Banghang hi mahmah hiam, Chi a i tung a thiltungte; Banghang hiam, Banghang kei tung tu sese hiam, Chi a i tung a hong tute; I theihsiam zoh louh hun om a, I theihtel zoh louh hun om hi. 'Den chiang in thei ni,' Chi'n khenkhatte kineem uh. 'A vek in thei ni,' Chi'n dawnna bukim ngak uh. Ke'n zaw tua ka theihsiam ke'h, A kikhel nung in thei ut nawn tuan ke'ng! Tu a dawnna kimkhat ka ngah ke'h, Den chia dawnna bukim leng kuul nawn tuan ke'ng! I thuak mualsuah zohleh, I pal galkai zohleh, Phazou lawm aw, Phazou lawm! © Siamsinna leh Vakiangbu

By ~ Vz Vualnam Sen mahmah ve chin! Ang a tawi chim louh! Ngek mahmah ve chin! Sang bang nouh chim louh! Tu a ka hon don, Zingni-thaini in n'ong seilian dia, Nang leh nang na kidonta ding. Nungaknou na hong hih chiang in, Ka kidek zoh louhte kidek dia, Ka kidaam zoh louhte kidaam dia, Ka neekte ne lou dia, Ka dawnte dawn lou dia, Ka hohnate a hoh lou dia, Ka hihte hih lou dia, Ka peih louhte peih dia, Ka hon thuhilh ding kei na nu, Kisuanglah law ve'ng e! © Siamsinna leh Vakiangbu

By ~ Vz Vualnam La khat hon guan dih ve, Tuzan in la khat hon guan dih ve! Na vaak nuai a lungzuang a hei, Khapi aw la khat hon guan dih ve. Nang lah den chiang mah in Kei kia hon nusia'n n'on tumsan dia, Kholhpih ding bei khattang a om, Khapi aw la khat hon guan dih ve. Vualngaih la ka chimtaak! Lungngaih-lungzuan la leng ka chimtaak! Aksite toh na sakkhawm uh, Khapi aw la khat hon guan dih ve. Thangvan zaila kilawm, Ka lungtang ngui leh bah tokhalh ding, Ka dahna puakgik hon dawn ding, Khapi aw la khat hon guan dih ve. Lungtai a phe sialsial, Na kaihzatam aksite bang in, Kei leng zanchin lungtai nuam ing! Khapi aw la khat hon guan dih ve! © Siamsinna leh Vakiangbu

By ~ G.ZamKhanMuang  "November kha a Apple min ding bang ziak a March kha a loh sawm na hiam, hehpihtak in theisiam mai in, nang a ding mah kahi". Khosung khat leh vengsung khat himahle ung, ka mukha ngei kei him him hi. Tua kia hilou in school khat a kum nih bang ana kai khawm kahi ta ua, stream a tuamziak zaw hinte, ka muh khak lam ka thei kei hi. Biak inn kai leh si in lenkhop te a taima lua hikei mah leng, tua munte ah zong ka mukha ngei kei hi. Nungak melhoih tak leh chingkam tak ahi a, a poimoh lou a kongpua kan meng meng lou mi ahi. Ahih hangin, tua mithah chiim kilkel, taksa leh gamtat-khohei a felmel mah mah, Zoutawi lianu bel, College admission ka bawl lai in ka mukha hi. Admission counter ah ka ding khawm kha ua, aman bawl masa leh chin a kiang nai ah kana ki hem khia a, amah zoh in ken ka bawl hi.  Admission bawl zou, innlam zuan IB Road tawn in ka paisuk a, Teddim Road ah Auto ngak in ka ding hi. Minute 10 bang kangak zoh in ka veng auto te uh a hon

By ~ Vz Vualnam Biakinn sung ah Tuailaite'n la a zil ua 'Halelui ah, halelui ah,' A chi uh. Tuailai khawmpi a Kidemna di Hileh kilawm. Ka khua ua Elektrik A siatna Sawtpi hita. Hoih nai tuan lou Eitel voi! A bawl man di Mipi kidong Hina lai! Innlusi a Teng zanih! Manipur government! Tel chin! Electrik Department! Ngaal gouh! Dak sawm a gingta a Tuailaite le A tawpta uh. Generator le A daita! Ke'n zaw vangam a Tawp lou a 'Halelui ah' chih kaal Ngaklah mai ve'ng e! Transformer sia Omnawn lou dia Generator chih khawng Ging doldol nawn lou ding A'ih chia maw! © Siamsinna leh Vakiangbu

By ~ Vz Vualnam Khohlou tangmai a neem ngiingeinou bang Lawm aw gual lai ah neem ngiingei le'ng e. Lawm aw gual lai ah neem ngiingei le'ng e, Michi'n dahluat kineemkim chiat le'ng e. Vailou chiingchin tangmai in bawm hi e, Guichin paalkim-gahkim etlawm hi e. Gual lungtuak aw tangmai i el ngam diam, Phungchin paalkim-gahkim i chiam ngam diam! Zotui miza'n hanlung chiam ve ni e Michin zaitha suukkim chiat ve ni e. Michin zaitha suukkim chiat ve ni e Bualna zolei ah paalkim chiat ni e. © Siamsinna leh Vakiangbu

By ~ Vz Vualnam Bandh i tha-it tuk un I khua-le-tui zuun ding tha-it chiat le! Shutdown i awlmoh tuk un I gam khantouh ding awlmoh chiat le! Lamlian a singkhuah toh i din seepsuup bang un I innsung chiat uah i tate singkhuah toh dinpih le! Lamlian lai i haalkhuut ngoingoi bang un I louma chiat uh halkhu ngoingoi le! Nawngkaina hiaizahta tung lou mah ding hive'n! Haksatna hiaizahta piang lou mah ding hiv'en! Ahi a bandh na bawl chiang ua Kei tuh a na nuam khiinkhian! Ofis hon khaksak uchin ua Tawldam hon guan hive uchin! Kuaman lah hon tai theilou! I khaloh lah kiam tuan lou! Himahleh niteng nektawm zongte'n A ngolh phot mai ding uh hi'n teh maw! Muhtawm-netawm a niteng khosate'n Mulou-nelou phot ding uh hi'n teh maw! Huai teng gam-le-nam a di'n maw! A na thuak zel phot mai uheh maw! © Siamsinna leh Vakiangbu

By ~ Vz Vualnam Leitung nuntaakzia Ka na siam het kei! Khat-le-khat toh kizopdan Ka na thei het kei! Hinkhua baihlam in kilang a A guuk in ana baihlam het kei! Ka itte ka na sukhasia a A muanna uh ka kembit zou kei! Ka ngaihte ka sulungliap a Ka lentaang zou kei! Masak zawk ding ka nunnunkha naak a Nunun zawk ding ka masa sakkha zel. Pibawl zawk ding ka nawlkhinkha naak a Nawlkhin zawk ding ka pibawlkha zel. Huai dingte ka pampaih a Pampaih dingte ka huaikha zel. Kiphatsakna in ka dim naakkhem a Ngaihhuaina ka paai thei kei. Ki-otsakna ka itkha naakkhem a Ithuaina ka paai thei kei. Ka hihkhelh thei lou a ka nungtat zel lai in Ka it-le-ngaihte'n a hon gamlaat uh. Ka hihkhelh kiphawk a ka sapkiik lai in Hong kiik ding a omtakei uh. Nang zaw hon gamlaat ke'n aw! Nang zaw hon paisan ke'n aw! Lam dik hon musak inla Huai ah hon baankaih in aw! Hinkhua hon theisiamsak inla Nuntaakzia hon sinsak in aw! Nang toh ton in kalsuan le'ng, Lungtuak in leitung hinkhua khin le'

By ~ Vz Vualnam Kalvari a ngaihdamna Ka neu apan ahon hilh ua, Thupilua in ka sep kei, Ngaihdamna' manphatdan Ka hon theihkhiat masiah! Kiphasak tak a hinkhua zang a, Pilvan ding ka na mangngilh lai in, Ka it leh ngaihte' tung ah ka na takhial a, Kisiik a ngaihdam ka nget lai in Ngaihdamna a omta kei! Muanna kichimsesa Tunding thak theih ahita kei! Ngaihdamna! ana manphana tel chia! Hun nihna! ana deihhuaina tel chia! Mihing' ngaihdamna lunggulh a Ka zonzonnalam in Kalvari a ngaihdamna' manphatdan Ka theihkhiat kholoh! © Siamsinna leh Vakiangbu

By ~ Vz Vualnam Ka inn a hoih a, Huandai hoihsem in ka uum. Sang tak in suang ka lem a Bing phitphet in ka ki-uum. Ka innvengte' thawm lah ka za kei a, Kei' thawm lah innvengte'n a za kei. Kuama'n a hong subuai kei ua, Ke'n leng kuamah ka subuai kei. Ni khat si daak a hong ging a, Kua hihiam chia ka va kanleh, Ka innvengte a na hi maimah ua, Kisuanlahhuai zezen, ka theihkhiatleh. Numei naupang tuanglai ah Thou nawn lou ding in a lum dildel hi. Amah it a suunte'n a kiim ah Amah ngai in a kah uhi. Damlou a lungzing tak a a om lai ua Koi a ana om nilouh ka hia? Tasam a suk na'ng thei lou a a om lai ua Ka kongkhak hong kiu ngam lou uhia? Inn ka pai in ka huandai ka en a, Ka sih chia'n ka kha'n a kaanzou diam! © Siamsinna leh Vakiangbu

By ~ Vz Vualnam Nam leh gam it a phe langlangte Mi' lamsa bangzah i pehbeh a? Nam leh gam awlmoh a pau phanphante Mi' lamsa bangzah i phelsia a? Gam leh nam awlmoh in i kipan sek na ua I tuptak zaw huai hi het kei veh e! Thuneihna i neih louh lai un i awlmoh sek na ua Thuneihna i tawi chiang un bang hi tuan kei veh e! Eimah angma chiat khual in Thuneihna sangpen i viik uhi. I gam leh nam in a huchihnalam in Niamkiatlam a manoh hiaihiai hi. Nuihzathuai lingling hang ei, Eilawi' gam leh nam itdan! Khanna ding gamla lai ei, Eilawi' kivaiphuakdan! I minte ulah phata mahmah zeizai, Tak in lah bangmah tohloh khang! Phuah behbeh zomah kiching zeizai, A hinpih ding lah kuamah om khang! Sakmin ah bang a om a, A min neite'n i puakzoh tuan keileh! Phuah behbeh lele bang a phatuam a, Khat lel leng i dopsang zoh tuan keileh! Zion a i ten in leng bang ahi tuan a, A lampi a nop louh khiatdan! Thugen tute'n Zion lampi haksa a chi ua, Ei pawl'

By ~ Vz Vualnam Hiai leitung i nuntaakna lampi uh Theihsiamna lou in kuama'n zui siam lou. Hiai i ni teng khosakna hinkhua uh Pichinna lou in kuamah hing siam lou. Theihsiamna nei ka kisa nilouh a, Mite theihsiam ka na sawm nilouh hi. Pichinna nei ka kisa nilouh a, Piching tak a mi thuah ka na sawm hi. Kuapeuh theihsiamna toh et ka sawm a, Himahleh a kiningching kei kha naak! Kuapeuh pichinna toh kholh ka sawm a, Himahleh a kidaihzou kei kha naak! A tawp in hiai ka hon theikhe maimah- Theihsiam ding kei ka na hizaw maimah! © Siamsinna leh Vakiangbu

By ~ Vz Vualnam Tuailai khawmpi kumchin ning bang i zou Khochin lia leh tang kaihmin luang bang e. Kaihmin luang bang simthu-zaila'n luang e, Kholhna vangkhua khuai bang ulsak hi e. Tuailai khawmpi ning bang i zou ni'n aw Zata'n Sian' simthu tuu bang chiing chi e. Tuu bang chiing zatamte' bualna gamzaang Nuaiziin' siahtaang kaihna gamzaang bang e. Kumchin tuailai khawmpi tuang hong tun a Sianmang' ngalliam chi a hanlung i chiam; Heina chiat simsing bang i gillah hiam Khawmpi then nua'n ngalliam vai bang kam e. Ngalliam zata' bualna gamzang nuam ah Tatna peuh sesum lou kipau moh e. Laizom suan ding bei singta biakmoh e, Sianmang' simthu toh ton lou tamta e. Simsing bang gil le'ng lia leh tangte aw, Sinlai kulthuk ah hanlung chiam le'ng e. Heina chiat Sianmang' di'n khuam bang kip le'ng, Tatna peuh Sian' simthu'n kisung chiat le'ng. Bualna gamlei Sian' simthu toh ton hen; Heisuk-heitouh

By ~ Vz Vualnam A neu lai ua i simmohte leng Tung-et ding in lengta uh. I neu lai a hon simmohte leng Hon muh chiang un maizumta uh. Zukham simmoh mahmahte leng Zungolvei in omta uh. Zungolvei i simmoh mahmahte leng Veng-le-paam' een in omta uh. A nungak lai ua kisatheite leng Pasal gina lou chik toh kitengta uh. A nungak lai ua simmoh a omte leng Pasal hoihtak toh innkuan bawlta uh. A tangval lai ua kiphasakte leng A simmohte' uh nna sem in innkuan vaak uh. A tangval lai ua simmoh a omte leng Veng-le-paam eng lou in khosata uh. Kingainiam le'ng, kiniamkhiak le'ng, Zing chia bang ni suak ding hiam i theikei. Kiphasakkei le'ng, kisatheikei le'ng, Hiai mun ah i ding gige diam i theikei. © Siamsinna leh Vakiangbu

By ~ Vz Vualnam Tangmai! Tangmai! Na neem thang ve'n Sen lim nianna khohlou tangmai aw! Tangmai! Tangmai! Na lim thang ve'n Kumchin tuangtung khohlou tangmai aw! Tu a ka ngaih bang a hiam aw Tuunnu' baanzaal tangmai ngai ing e. Tuunnu' baanzaal tangmai meet le'ng Sakduang vulsa zong thel bang thou e. Lamtui vangkhua i heina ah Vaimang tangmai lii bang ching hi e. Vaimang tangmai lii bang ching zong Siktui duh dangtaak neemzou lou e. Zodawn a hei i laizomte Nichin khohlou ah mazam hi e. Khohlou tangmai tuang hong tung e Lamtui i siang lii bang ching hi e. Lamtui vontawi chiim bang chiim le'ng Sesum khen ding zaitha neem lou le'ng. Laizom lelliang lenmual hong kal Sesum toh siang zongsak ve ni e. Zolei vonte bilh bang thou le'ng Khohlou tangmai gia bang zuun le'ng e. Gia bang zuun zaitha suuk chiat le'ng Zanglei a thot lii bang ching hen aw. Tuuktui kangta e tangmai aw Phavang tuang hong tung ding hita e. Maimit siing

By ~ Vz Vualnam Tuan a pupa' khan a neemsa Khohlou tangmai neem lai e. Sunkim buuktual tutkhawl mun ah Siktui duh neem na lai e. Khohlou mazap luangsing bang lum Zaitha tawl a theusak e. Pahtang leel ah seiniam-seisang Suihlung taisak na lai e. Zolei tangmai ka neekleh aw Ngaihnou ningkhum luaih bang e. Vaimang' tangmai ka neekleh aw Khang lumsuang peh bang hi e. Chik in tualkhekei ve ni e, Umtui bang kholhna tangmai. Simlei tangmai zatam lai ah Zolei tangmai limbel e. Vaimang in zong zolei tangmai A siim nuam sam ding hi e. Vaimang siang sesum toh kheek le'ng Zata'n sesum lam ding aw. © Siamsinna leh Vakiangbu

By ~ Vz Vualnam Ka pa' awging a daih chia'n Hiai innsung a ding in Kua'n Pathian a samta dia? Ka nu' thum ging a daih chia'n Hiai innsung a ding in Kua a thumta dia? Thum ging zaak ngeilouhna inn a Ten tel ding zaw kei a thumzou lou pen leng Ka thawmhau a, ka mangbang! Hiai inn ah thum ging dai ngeikei hen! A thum ding dang a omke'h, Thai aw khut kilen in Ei gel i thum ding! © Siamsinna leh Vakiangbu