VANGNGAIH NA LEH KI NEPNA THAWN

By ~ G.ZamKhanMuang 

"November kha a Apple min ding bang ziak a March kha a loh sawm na hiam, hehpihtak in theisiam mai in, nang a ding mah kahi".

Khosung khat leh vengsung khat himahle ung, ka mukha ngei kei him him hi. Tua kia hilou in school khat a kum nih bang ana kai khawm kahi ta ua, stream a tuamziak zaw hinte, ka muh khak lam ka thei kei hi. Biak inn kai leh si in lenkhop te a taima lua hikei mah leng, tua munte ah zong ka mukha ngei kei hi. Nungak melhoih tak leh chingkam tak ahi a, a poimoh lou a kongpua kan meng meng lou mi ahi. Ahih hangin, tua mithah chiim kilkel, taksa leh gamtat-khohei a felmel mah mah, Zoutawi lianu bel, College admission ka bawl lai in ka mukha hi. Admission counter ah ka ding khawm kha ua, aman bawl masa leh chin a kiang nai ah kana ki hem khia a, amah zoh in ken ka bawl hi. 

Admission bawl zou, innlam zuan IB Road tawn in ka paisuk a, Teddim Road ah Auto ngak in ka ding hi. Minute 10 bang kangak zoh in ka veng auto te uh a hon pai a, ka tuang ngal hi. Taikhe dia kaki saklai un, lamsak lam ah 'aw' ging ki lawm tak mai a kikou ka za uhi. Ka et leh amah ana hi a, ka dip a hawm huai huai hial hi. Kumkhiak thak ding lah hilou, a tuang khawm chu kahi phawt mai uhi. Aki houpih ngam pah zaw sam omlou in ka hon tu ua, bangtan hiam zoh in houpih sawm in a guktak in ka aw ka khuah bawl hi. Houpih ding chia ka et phei leh aman le a hon en a, zum sim bang pian deuh in kanui heuhau uhi. A veng uh ka dawt leh ka veng uh ana kibang a, ka inn uh leng inn li-leh-nga in hal lel hi. Lamdang sakna in ka dim hi. Kei bel tua veng ah kum nih lel khawng ompan himah leng, kholai pawthat tak ka hih man in ka muhkhak louh lamdang kasa petmah hi.

TUIBANG LUANGKHAWM NA

Hun hon paitou zel in,school kahon kai panta uhi. Kenbel nasep toh ka thuah ziak in a khasim na dan lel in ka kai man ham ham hi. Form fillup hun a hong tungta a, nikhat form fillup ding a kuan gate a ka lut leh Jubilee mualtung a tu ka mu a, bangziak a amahkia a tu a de aw chih ka ngaihtuah na ah ahon lut ngal hi. Ka zuanphei a, form fillup ding kahih dan ka hilh hi. Aman bel ni thum vel paita in ana fillup khinta hi. Class kipan nailou ahih man in form fillup na a hong ki thuahpih ding in ka zawn a, counter lam ka hon zuan khawm ta uhi. 

Form ka fillup hun un ka subject combination te uh ki bang ahihdan kaki thei tuah pan ua, banah ka rollno uh le ana ki zawm zaw mah hi. Admission ka bawl lai ua ka ma a a ding lam ka mitkha ah hon ki lang hial hi. Nasep poimoh ahih man in school ginatak a kai man ngeilou ka hihdan ka hilh hi. Huai kawm kawm in a number ka ngen a, banghiam school toh kisai thu pawimoh omte ki hilhtuah na ding suanlam in ka ngen hi. Ka buaina theisiam kawmtak in a number hon pe ngal hi. A number bang chi save ding ka hiam chih ka dawt leh, a min tawn in a hon gen pah a, hoih nasak dan dan in save in a hon chi hi. Amin hoih lua himahleh,ken bel a min ale save lou in 'Zoutawi Lianu' chin ka save ziau hi.

Hun hon paitou zel in, exam a hong hu ta a, exam na ah pai-le-kuan ki ton in bench khat ah kahon tukhawm uhi. Hun leh nite mualliam zel mah leh, ka lailung mitkha ah a sakmel etlawm leh a tongdam nemte vai bang a thamden hi. Ka theih louh kal in ana ngai law khin kahi a, ka iim sawn hang in ka thuakgimna kei a din a tawlhuai mah mah mai hi. A hoih lam kaki piak hun in ka nui threm-thram a, a se zawng kaki piak ni in mittui bang a gal pan thei mawk hi. A tawp in,sih-le-sih, dam-le-dam chidan zen chu hilou in ka hon pan nual nual a, hichin ka hon chita hi, "Kim, mite sang in pilna-siamna, neih-le-lam leh chitna tungtuan nei hi chitchiat kei mah leng, na mai a ka suan theih omsun ka iitna, tualhong niam a hon sangsak ding in kahon ngen hi. Hun sawtpi paisa akipan hon gen sawm himah leng, na ngaihdan loulua ahih khak ding ka ven luat na lam a, tua hon gen ngampan kahi, na ngaihdan lou lua ahih leh tongsia hon lel khum mailou a, tangpa selungmawl chia nahon tbeihsiam hamham ka hon ngen zaw hi". Ka hon chi ta mai zaw, mai bang a san pual pual a, khoul nel bang a kai zou hial hi. 

Hiai teng dang awk zen phial mah a ka gen zoh nung in Kim in bangmah genlou in a nuihmai a hon sulang cheuh hi. Tua Kim nuihmai ka muh pen kei a ding in kinepna zing nisuak eng sing seng bang tuk ahi hi. Huchi in sawtlou nung in lungkhat tuibang kahon luangkhawm ta uhi. Iitmah leh ngaimah ka hihdan ka hilh thak thak a, amah a ding a ginom leh ka hih theih tawp suah a pang ding kahih dan ka hilh kawm in a min tang a "Bawi" chia sam zaw ding ka hihdan ka hilh hi. Aman leng ka iitna a tangkhak hampha kisa a hihdan a hon hilh kawm in kasap dingdan pen ah kipak mah mah ahihdan a hon hilh hi.

SEPNA ZAWNNA AH

Mi bang a regular tak a, school kai man gige hikei mah leng, kei toh ki tuak sepna muh ding chih ka tum gu tinten hi. Ka nek zawnna ding a ka pom theih louh sepna/nasep pen kei a ding in lunglut huai lou leh tawlhuai khawldiak mah bang hi. Himahleh, naa dang ka muhna ding in tua ka nasep pen ah lungkia mailou a ka sep tou ngitnget poimoh ahihdan ka mangngilh kei hi. Etsakna ding in, Jugali in sem mah leng Mistry tan kai ding kana sawm kei him him hi. A ziak, tu dinmun a etin ka nekzonna ding a pomtheih lou phot kahi hi. Tua bang a sem tute amohsa zaw kahi zenzen kei, keimah ngei leng tua bang a Jugali a sepna ding omlou hileh ana khosuak zoulou ding bangtuk kahi. 

Deihtel theihna hun ka neihlai in, ka lungtun namah mitsuan phot maileng chih ngaihdan nei kahi zaw hi. Newspaper leh Magazine te ka sim chiang in Employment news leh Editorial te ah kasim pan zel hi. Kei toh kituak sepna awng ka theih peuhmah application bawl vek hin kaki thei hi. Himahleh sawm lak ah khat leh nih khong lel ah exam ka pe thei lel hi. A ziak, exam centre ding a state pua hon kipain chiang in haksatna gen vuallouh ki tuak zel hi. 

Ka lunglut na mah mah sepna a kiang a le genkhak zel, kei a ding a application honna bawl sak ahihdan nikhat a hon hilh hi. Tua kia hilou in, kaki sakkhawl na a ka reference ding in laibu nih leng a hon leisak zawmah hi. Kaki pak petmah a, ki thalop tak in tua laibute kasim zel hi. Nikhat a kiang ah hichin kahon gen hi. Bawi, nahon deihsak na alian a, na hon iit chih ka thei a, kaki pak petmah. Na hon present laibute amanpha thei pen a zang ding kahi. Kahon iitna a pung semsem ka chih leh, kanau in, khem khem eive, nang sang in kaki pak zaw, kon panpih theihna omsun ahi, hon lohching in ahon chi hi. Tua bang a lemgel siam leh panpihtu hoihtak Zoutawi Lianu ka neih khak lungsim guktak ah hampha kisa in nui thremthram kawm in kakawi phei kha thepthup hi. Tua bang aki Iittak leh deihthoh tak a bangtan hiam kaki kawi nung un, ni in mualdawn ah mualhon liamsan ding ahi ta a, Meisem pak san silh selh tele vuai ut nawn pianta ahih man in, ngeina dan in anneklim chihte ki khak in kaki khen phawt uhi.

SHILLONG ZINNA

Hunte mual hon liam tou zel in, exam hun hong tung ding ahi petmah ta hi. Exam ding in Shillong ka hon zuanta hi. Blue Hill parking tan kanau in a hon kha a, a hoih zaw lam a ki hasuan tuah in singgamlei zuan in kahon zinkhe ta hi. Ka tunna tan leh ka dinmun tw whatapp tungtawn in ka hilh zel hi, tua mah bang in amanleng a omdan, a thilhih leh a hun zatdan te a hon hilh zel hi. Zankimlai in ka tung ua, a zing dak 07 vel a thou in ann kane zawm ngalhi. Dak 09 a exam kipan ding ahih man in, basic maths tamlou revision ka neih thak leh HCF leh LCM ka thei kokalh laizang hi. Kintak a a question khak in a panpihna ka ngen hi. Sawtlou nung in a ans solve sa a hon lut kik hi. Ka en a, theisiam pah kahih man in kipahthu ka gen hi. Kaun khe ding in ka hon kisa a, Have a nice day, best of luck chihte kikhak in exam centre lam kahon zuan ta hi.

KHOLHLAI HUN NUAM

Exam zou inlam ka hon tun in kanu in Blue Hill parking ah honna dawn a, koimah a bang tuan selou in, innlam ka zuan ngal ua, annek zoh chia hoh ding ka hilhkawm in, Bawi anneklim ka chi a, Uu.... nangle anneklim, honhoh pah in aw, gonna ngak ding kahi honchi hi. Inn tung phet kisil ngal in, ann kane zawm ngal hi. Aman bel insu g naa tuam tuam te sem in ana man nailou hi. Zingdaitui sim kawm a bench tung a ka lup leh ka imu kha hi. 

Kanau le hon manta ahi ngei dia, Uu... ka manta chi kawm in ka lu ah a hon sawi a, ka kiang ah khukdin kawm in phavang huihkhi lang in tullel dawn a sem hiau hiau bang in, ka tal ah ahon mut hial hial hi. Nui kawm in ka thou a, nek ding chi tuam tuam, bang bang hiam te bawl kawm in ka exam tungtang leh tawmkal kholhkhawm louh sung a ngaih lunglen anat dan leh thu vantang tuam tuamte ka gen khawm uhi. Ka nek kawm kawm un hichin ka hon genta hi. Bawi, nang kon neih khak hampha kaki sa lua, I think I have found you in a right time, in a right moment. I feel like you are devinely given to me, you are the reasons for my existence in this world, you make me smile with no reason, you are everything to me, please abide in me forever, ka chih leh ka nau lungsim zou petmah zaw ahi ngei dia, a sakmel etmai inleng emotional zou hial hin ka thei hi. Kanau in hichin a hon dawngkik hi. Uu..... tua bang a na hon gen kaki paklua, lamdang bang kasa hial, kuamah a ki pan hiai bang iitna kammal ka zak ding ana kinem ngeilou hing a, ka phulou iitna tang hiin kaki thei, kenle kahon ngailua, nanga kahi chi kawm in ka ang ah honki ngaisuk hi. Kenle deihthoh tak in ka kawi thren-thran a, kipahna mittui te bang ahon gal pan zou hial hi. Ka nau mithah chiimtak mai ka en a, vanleng tanu bang asakmel etlawm en kawm in a huumsam kahon zut hialhial panta hi. A muk nou kiuh-keuh, zawl hiin-hian, san hil-hial chu awl in kahon tawp hian-hian tahi. Ka tawp kawm kawm in ka khut ana ommoh man dek zaw ahi ngei dia, kanau in ka khut hon letsak in hu sak phot maini Uu... hiai tan hial din kaki man kei a honchi hi. Kenbel hunsak mailou a suzawp ut kahih dan ka gen leh kanau in hichin a hon dawng kik hi, "Uu... bangziak a November kha a Apple min ding March kha a loh sawm na hiam....... hehpihtak in theisiam mai in, nang a ding mah kahi" ahon chi ngut ngut hi. Huchi in, November kha a Apple min ding tuh ki nemtak in kahon ngak ta hi.

PEELLOU DIA TONGCHIAM

Result hong suak in, kinepna bang in kahon lohching hi, ka lohching thu midang teng sang in kanau kiang ka tun masa pah hi. Aman leng a hon kipahpih thu a hon gen ngal a, chiamnuih tbutak bang bang hiam le ahon genbeh zaw mah hi. Hun leh nite mual hong liam tou zel in, sepna mun lam ah kaki report ni ding tuang hong tung petmah ding ahi ta hi.

Suangtuah na a hon thawmhau pan pan ta hi. Amah tellou a muangzou ding in kaki ging kei hi. A ni lah hong nai deuh deuh a, a lit huai ngoih ngoih tel mai. Ka zin ding ma ni in ka nau kia g ah hichin kahon genta hi. Bawi, ka zin khiak ding ka liin petmah, nanglou a muang zoh ngaplou kahi, nanglah na phone kisia zaw mah lai, ei bangchi ki thuzak din, banghiam ka lungmuan theih na ding thu nahon gen thei diam, thawmhau kisa lua kahi kahon chi ta hi.

Ka nau in, mawk mWk ei ve Uu... nang na huchih mawk in a dik di hi, na result a gon suah a ei bangle ana ki pak lua hang a, na kuan ding ahi, i tu-nung hinkhua ding nang a ki nga ahi a, kuhkal tak leh chitak tak a na hon pan zawk ding ahi, nihgel tangbang dam a ki mukik ngei ding in ginom khuam bang kana kip ding hi. Thawmhau kisa zenzen ken, nang sa thawmhau zaw ding kei kahi chi kawm in ka ngawng ah a hon kawi a, ka thawmhau na te lungmuanna in a hong dim zaw ta hi. A hon kawi kawm in ka bil ah hichin a hon gen siau-siau hi, Uu, sepna na neih ziak in lung hon sit in samgi bang hon khen mai ken aw, nang a ki nem kahi a hon chi khial khial a, tua ka nau thu gen in ka sinlai a hon khoih kha mah mah a, kintak in mawk mawk ei ve Bawi, huchidan lampang in zaw ngaih tuah ken,ka hon itna lian sem-kip sem hi zaw ahi, ka hon ngai petmah ka chih behlap hi.

Bawi, i heina peuh ah ginom khuam bang kip in, paal zaw singdang siang ah lampial keini aw, ka hinkhua a ding a kaki nepna nang nahi, chin mittui luang keuh keuh kawm in ka hon genta hi. Ka nau in, Uu, bangziak e na kah chikawm in ka mittui a hon nuulsak a, lungmuang in, nang a kahi chi kawm hinapi in, amah leng ki dek zou tuansam lou in, a luankhi tulvuah luang bang mai in a hon pulh khe zung zung mai hi. Kip sem a ki kawi in, tongchiam peellou ding leh ginom khuam bang kip tawntung ding in tongchiam khuam bang ka hon phutkip ta hi

MALBANG KOUHNA

A hun leh ni hong tungta ahih man in,ka hong zinkhe ta hi.Khakhat hial bang niteng in phone sawm mahleng ka phone thei kei hi.

A phone hoih nailou hinte chi'n ka ki lungmuang sak zel hi.Ahihhang in,amel ka muhlouh tawpin a aw bek zaleng ka chibang damtuam dingin ka um a,ngailua ka hihman in kalung amuang taktak thei kei hi.

Nikhat, alawmnu ka phone a,a inn ua vahoh ahong kihoupih sak dingin ka ngen hi.Hun neilua hikei mah leh ka ngetna ziak in ahong kihoupih sak ta hi.Ka ngaihnou aw ka zakin ka mitbang vaak tuam kuau in ka thei hi.Kipaklua zaw ka hingei ding a,khawllou in ka pau zung-zung mai hi.Ahihhang in,kanau hong dawng nadan ah ka lungsim anuam hetkei hi.Ka houpihna teng kia in ahong dawng a,ahong houpihdan akipan in kithalawp hetlou ahihdan ka thei hi.Lamdang sa in mangpha photni aw "Bawi, ka chih leh,nangle ahon chingal hi.Bang chi dan a?Bang ziak a? Chih ka ngaihtuah na a hong buai mah-mah ta hi.Ka lungmuang lou deuh-deuh ahihman in akha nawn kha kimlai vel in alawmnu kiang ahon kihoupih sak dingin ngen nawn mahleng manlouh ahih dan ahong hilh a pawi chihlouh ngal gen ding dang a awm kei hi.A lampi dang om tuanlou ahihman in,bang tan hiam nung in, alawmnu kiangah houpih ut kahih dan kahilh nawn a,lam-etna banglou tak in alawm nu'n limsak nawnlou ding in ahon hilh mawk hi.Thil awmdan ka theisiam thei het kei hi.Deihsaktak a ka hon thuhilh na zui le chin ah na hong tun chiah nathei mai di ahon chih behlap zawmah hi.

Koilam kho-khal huihpi'n hong buak hiam ka theisiam zou kei,thutak theih utna leh thawmhau kisakna ahon lian diak hi.Ahihhangin,peellou dia ka tawngchiamte uh sinlai paaitem bang ken kuah lai ka hihman in,hon gin-omlouh san dingin ka um kei a,min bangteng honggen mah leh amah a ka muanna leh ka iitna a beithei kei hi.Ka Quater uah Rose(🌹) pak kanau mel amu in, Zingteng a tuipia in ka deihthoh mah-mah hi.Ka ngaihtuah luat khak chiah Bawi...Bawi...chin malbang kou zelmah leng tawnghon dawng ding a om kei hi.Innlam ka paiding kuan in tua (Rose)paak kalou a,ka laibu kal ah kazep hi.Tua Rose paak pen kanau et-sak a,iit petmah le mangngilh lou ka hihdan nasep mahmah a sulang ding chih ka tupdan ahi. Lawmte khenkhat in tua Rose paak ka loh hon mawhsa ua,Khenkhat in bel,zingteng a tui ka piakdan leh deihthohtak a ka bawldan lamdang sa in,tua Rose paak leh ka Sahkhua in kizopna nei ding in hon gingta uhi.Himahleh,amau ngaihtuahna leh kei ngaihtuahna aki leh bulh mahmah hi.

CAPITAL HUIHKHI HONG LANG

Mangbang tak leh khattang kisa a hinkhua zat pen ka tawl mahmah ta hi.Nikhat ka lawmpa ka phone a thil omdan ka dawng hi. ka lawmpa'n , kenle a omdan tuam salua ka hi.Capital lam apat hong tung om hin kathei,bangteng hileh hon tung phot- phot in,huai chiah thil omdan achiang

A maiding ahon chi hi. Hihtheih bang mah omtuan lou ahihman in,himai te ve maw!!!leh chi'n ka kihouna uh ka kholsan phot uhi.

Hun hongpai zel in,Dawi haavang- kal ichi diam inn ka hon tung khong khong hi.inn vengte naupa kiang ah Zoutawi lianu sanggampa number la in ka phone a,a U toh ki houpih sak ding in ka ngen hi. Kanau in, "Hello", ahon chi a,ka chi-mul bang ahong thou sung-sung zou hial hi. Ka bilah,a aw

ging aki lawm mah-mah a,ka zak mai inle tawldamna hon tun hin kathei hi. Bawi..hongtungta ka hi.kahon hoh ding aw,na melmuh kal ngaklah petmah kahi chi'n kinem kawm takmai a kagen leh, kanau in "Ii,hon hoh dahmai aw! ahon chi a,gen ding abei petmah pawna petmah zaw ka hi ngei dia,ka ngaihtuahna bang khawl zou hial hin kathei hi.Khitui tak dut-dut kawm in ka ngaihtuah na apaisau petmah hi. Amah apan tua bang kampau zading in ka gingta ngei him-him kei hi.Kei koih dan in,khovel in kei honmohsa in hon pampaih mah leh ka a iitna toh sangzou lai ding khop in kana muang hi. Ka muanna toh aki khai petmah,kenle hi hichi'n ka gen nawn a,Bang ziak e? Bawi....kei hon ninglua maw kachih laizang leh poisakna nei hetlou in 'HI' ahon chi zawmah hi. Bangthu athita mai a,theihsiam ahaksa tel mai.Bang teng hileh taksa mah-mah a kimuhpih a thil omdan hon gen ding in ngen ngut-ngut mah leng a ut kei a,hunsakni chi'n a phone ahong koih khum ta hi.

Zaan tawldamna laikhun tung ah,kei din tawldamna him-him a omta kei,maimit singmawh in sialzatam toh malbang kou-kou mahleng,kei a din tuulleel dawn a Zouheisa paak lohlah bang lel ahi ta hi. Zoulengthe hong khuang ding a,muhchil vangngaih Zoutawi lianu tellou in suulnung simthu sut in khattang sawlbang hei zou ding ka hiam?.Tuulsing hiang a Khuva lungtuak nihgel,lelliang meltheilou, singdang englou a nunnuam khawlh khawm a,hun mualliam sa a khawlhlai hunnuam te ngai in,suangtuah na mitkhate ahong langzel a senlai naubang ka teithei lou hi.Tua banga,hun bangtan hiam ka zattouh hang in,luankhi inlah hunni neilou in,zaila in awi-awi mah leng a zou nawn ta kei hi.Lawm-le- vual kiang ah gen mahleng honchim tak mah-mah ta uhi.Nikhat, ka lawmpa'n hichin ahon gen hi.Amah buaihuai ahi kei a,nang buaihuai na hi zaw! Aman hon mangngilh ta a,amah siang ahi.Huai nung a nang na theihsiam louh tei-tei pen nang buaihuai na hi.Ahon chi zial- zialta mai hi. Ka lawmpa honthil gen diklua himahleh tua thudik pomsiam tuh ahaksa mah-mah mai hi.

SINGPI HOTEL A KIMUHNA

Capital huihkhi hong lang in,zoukhokhal huihpite hong nung mahleh,kanau melmu khalou a om ding him-him ka ngaihtuah thei kei him-him hi.Amel muh ding ahihnak peuh leh zum leh zah khual zounawn lou in kimaituah ding in ka hon zuanta hi.Zingkar khat a college gate hon pawt-phet in ka naih pheipah ngal a, hichin ka hong genta hi.

Bawi...hehpihtak in singpi dawn kawm in minutes tamlou hon houlimpih in aw!! Ka gen ut tamlua ahi.ka chihleh hun neilou ahihdan gen in ahon nial hi. Kenle ka gen tei-tei a,huchin in singpi ka hon dawn khawmta uh hi. Ka dawn kawm- kawm un hichin ka hong gen ta a, Bawi...hon itmah- ngaimah ka hihdan na thei voi maw?.Chin neemthei tawp pen in ka hong gen a, "HI". ahon chi hi.Nang a kinem ka hihdan lah thei chin a bang chi dan a Bawi..???.Thil omdan theihsiam haksa salua ka hi.ka chih leh anui a,a (outward reaction) etmai a, a omdan in ka thugente hon thulak bawllou hin kathei hi.Ka thugente a, akipah ziak anui hilou ahi dan ka theih a,ka hehtha hong suak in ka sisan hong sa vut-vut zou hial in kathei hi.Ahihhang in,mi tanu deihthoh tak "by force" a nawn mawk na danlah omlou ahihman in ka kidek ham-ham hi.

Ka kong a, kazeh notebook huai Rose(🌹) paak ka koihna pen ka hong lakhia a,ensak ding a kahon kisak laiin hichin ahon gen hi."Ken kahon khenta",tua teng kia gen in adai veng-veng hi.Tua kampau kazaak in kapona petmah a,ka mai vun bang sa hul-hul in sah hul-hul hi'n kathei hi. Kipasal sak in khapet zen in pangmah leng kaki pasal sak zou kei,kham vualouh in mittui te ahon pulhkhe zung-zung ta mai hi. Ka bianga khi-tuite,amah iitna ziak aluang bang in a pom kei a,vuallel pa khitui luang mai-mai bang in akoih lel hi. Vuallel tak leh lungkham mangbang tak a khitui-naaptui toh hinkhua zat pen, vualzohna dan in angai a,poisak na him-him neilou hin kathei hi.Pawna lua leh midang a ding a phalthilei mah-mah lou ka hihman in,atawp in hichin ka hon gen thak-thak hi. "BAWI", pawna lua kahi,theihsiam haksak sa petmah ka hi.nihgel mawngsing bang kikawia, peellou dia tong I chiamte hichi mai maw chin a mel le hoihtak a engngamlou in kahon genleh hichin ahong dawng hi."Hiai thu na gen-gen ding leh ka utnawn kei kapai di, ka zekai ta, chi'n a ding anuikawm in ahon pawtsan hi.

HAKAI PAHTAK LUNGVEI

Neklouh ding vonggah kei khak chu akha petmah mai,khasa in sekhe mah leng a damtuam kei a,adan bel a omdeuh sam hi. Ka it-leh - kangaih mah-mah ,ka hinkhua a ding a ka muanpen amah ading sa in kana kikoih a,amah le kei a dingsa in kana koih hi.Ahihhangin,neklouh ding vonggah kei kha kana hi mai-mah hi. Iit tak leh deihthoh tak a kabawl in,a omdan in kapahna honpia bangin ana ngaihsun mahleng kei a di'n ka deihthoh leh ka hawmthoh mah-mah lianu bel "HAIKAI " pahtak lungvei bang ana hi lel hi.

Kanau in ngaihzawng nei ding in kana koih kha him-him kei hi.Aziak a inn uah tangval hoh kathei kha ngeikei a,Aman leng ahong gen kha ngei kei him-him hi.Iitna thugil tak-takte ahong gente ziak in kana muang petmah hi.Himahleh mi apan thukhonung ka zakdan in thil omdan hichi ana hi hi.Bang tam hiam paita in kavengte uh tangval khat toh ana kingai ua,atangvalpa bek kum nihvel paita in Delhi ah ana omkhia ahuai kawmkal ah kei a "spare tyre" dan deuh a ana omkha kana hi laizang hi.

Neulai a Baibekbu hawi dan hileh,a hawi second dan ka hi.Atangvalpa amah omkei mah leh security & intelligent department koih in a omdan bangkim ngah zel hi.Kikhop ding leh milak akihel ding kham a,huai ziak in kikhopna leh si inn khong ah kihel ngeilou ana hi hi.Ken bel ami hoihluat ziak a tua munte a kimukha ngeilou dan in kana koihkha hi.Mikhat in sialkhau khihsa leh nakkhau vuhsa ahihlam kana thei kei kha hi.Huchi kawmkal ah kana kingai ua,thusia in kawlmong pha ahihman in security & intelligent department ten atheih tak un Capital lam ah report kimtak ana pia uh ahi ngei dia,case file a court of inquiry bawl ding in Delhi lamte ahonpai uhi.Huai hunin bel,kei kuan kheman ta ka hihman in, suangkang nih ki-tattuah khalou peuh mah ahi hi.Tua kia hilou in, a ansang first hong tungta ahihman in kei a dingin mun a awng nawn kei him-him hi.

Amah bel, security khauhtak nuai a house arrest a koih uh ahihdan thei ka hihman a,tua singpi hotel ka kimuhtawp na uh ahi mai hi.Capital lamte kamohsa kei,a ziak amau annsang first ahi ua, kei bel annsang second lel ka hi.Lungzuan ngaihtam siallel ding in,Zoutawi Lianu'n bang ding aka tongdam naubang hong na sang a,khenlouh dia tong hong na chiampih hiam ka thei siam zoukei hi.Nihgel lungkituak a peellou ding a tong kichiamsa himahleh,chiamlouh simthu zuih zaw sinlai gubang hong zen lua hi.

Hun leh nite mual hong liam zel in,ni-le-khate hong ki dangzel mahleh liangaih lungzuang daibang theng thei lou hi. Kum kivei zong sinlai ah damtui bang ki veiden hi.Khosung khat leh vengsung khat ka hihman un heisuk-heitouhna ah kimukha lou chih omtheilou hi.Laampi-laampal ah kithei ngeiloute bang in hong bawlmah leh ken bel dam maw "Bawi",chin tongdam kisang tuah ding in ka sitkei hi.Himahleh hindan teng aki khekvek ta a,nidang a Biakinn leh si inn leh lengkhawpna munte ah,seengual lai ah lungtuak ngabang lengkhawm a singdang engloua,khut kilen a,a tonkhawm laite uh kamuh hun in,ka laidip-dap in khuisa vung-vung in om mahleng,khapet zen a pangin,guallai ah nuihmai kasuah veve hi.Nitaklam khomui kuan a mawltual lam zuan,khut kilen lawm a (nitaklam walking) pai khawm lai uh, lungsim ah hong lang luangkhitui luang zung-zung kawm in nung et mah leng,kei a dingin hong kik nawn lou ding ahihman in hinkhua thak kapat keia ding in alampi hoih zaw ahi hi.

November kha a Apple min ding,March ka aloumai lou in,kinepna toh lem-en tak leh deihthoh tak in ngakmah leng,hun leh nite hong kidang in,huihsia-vuahsia leh huihpi-gialpite thuak zou lou in theibang ahuut tamai hi.Chiautui bang kapaal,iitna vangtah bang doh-ai hiam?,sakminsiatna lel hi.Vabang kapil louh,seengual ka phaklouh,meel athei in tongkhauh ahon luankhum zaw zaalmang himaileh ka khanglou ut petmah hi.Vangngaihna leh kinepna thon keidia laitan hiding hiam? Chia suangtuahna mitkha toh hinkhua kazattouh lai in,khohunte hong kihei zel in,singchih-paak chihte zawng hon thak nawnta a,apaak kilawm gimsi'n kasiang hon zel hi.ka lungzuang puanbang ka bang ta a,naubang ka kahnate,tuangnung siahsan in,hinkhua thak ka hon zangthei ta hi.

A tawpna ding in,kanau kiang ah thutamlou vaikhah nop kanei hi.Na hinkhua a ding in tangthu bang lel ding hitamahleng ,anuam-ahaksa anahon ki thuahpihna,ka buaina khempeuha, ka dotpen leh hin panpihtu nang nahi.Simlei haksat nate ziak abah-le- ngui aka omlai in,kaban ahon len a,iitsiam tak ahon hanthawntu nang na hi.Na hoihnate ka damsung hinkhua ah kahih theih khawm-khawm in hon thuk sam utmah leng,hunlem ka muh nawn ka kilam-en kei hi.

Deihchibang natel toh houlungtuak in nunnuam na kholkhawm ta un aw,kei zong kumsawt khaubang vaalsam lou ding in,ka kimuang ngamta hi,kipaktak leh lungmuang tak in hinkhua hon zang inla,huai kipahna ah tel khanawn lou ding hita mahleng lungsung tawng apat in deihsakthu kahon khak hi.Ka honna kiphapih dending a,hinkhua ading a,ahoih khempeuh tang ding in naphu vek hi.Hunluite ngilhta ni in,seengual lai ah,tongsia kiloh kei ni.Hangsan tak amailam manoh akalsuan zelding ahihdan mangngilh lou in hanlungchiam ni.

DAMSUNG A DIN MANGPHA NUNLUI

- BEITA-

writer's Note:- This story is purely a fiction written based on the fanciful thought of the writer the name and place indicate herein and the flow of the story don't refer to someone or someone's story.any resemblance here is accidentally coincident

© Siamsinna leh Vakiangbu