NATNA LAUHUAI COVID APAN PIANTHAKNA

 By ~ Paumuanlal Guite BaBs Chikmah a zak ngeilouh, lungsim tawng a leng gelphak ngeilouh COVID 19 in khovel pumpi hong sawiliing ta hi. It leh ngaihte toh tui leh nga bang bualkhawmna, a sakminthang Lamka khopi leng natna in hong hawi tuankei. Niteng in a vei a pung hulhul chih kuapeuh in thei, himahleh gamsung vaihawm solkalte’n hiai natna apan i suahtak theihna ding ua hon thupiak uh Policete mat utlouhna ziak lel in i zui hamham chiat uhi. Huai bangle Policete galmuh chiang khawng a zui hamhamte i hilai uhi. A tamzawte bang in a omna mun uh i pel chetchet zomah uh, lamka chihmah a ka tuamtuam tam i theitel ua. Siamsinna innte, nasepna buuk tuamtuamte kikhak zungzung a, i biakna munte tan leng kikhak hial in inn a kuapeuh kikhum chiat ding i chih lai un kholai a hih ding poimoh nei a pungdiak a bang maimah hi. I natna minthang ziak ua mual honna liamsan niteng in zak ahigige mai. It tak in a luangbul ah kap zoizoi ut mahlehang mangmat phak ahinawnkei, silhpuan piandang toh kithuamte’n i ittak mai luang hong zawn uh a gal apan ana etmai chu i tantawk uh ahitamai hi. Nalua e, nalua e... chih louh gen ding a vang khopmai. A luang kiang a va omkha lelleng le siktui piandang a kap kia hilou a zatamte mullit kitang ding hinalai. Hiai bang natna aw bei mengmeng mai in, sanggah gentheite adi’n thuakdan siambang sin a haksalua. A kallak in damlou puakna haam theite hong haam vongvong zel a, dip hawm in a thawmhau huai thei tel. I melmuhlouh tongsan i en a, natna thu kia muh ahiden mai. Huai in ngaihtuahna tam hon lakhen mahmah a, kingaihsiat gawp theih dinmun a din hun leng a tam. I kim-le-kiang hong naih deuhdeuh a, a kelkongte bang ua khau kizan mai khawng i hon mu chuh khasiat ni a tam mahmah. Khut-le-khe bukim nei buang kikhum buchilh chih thil namai ahikei. Nikhat innkong singlim nuai a kingaihtuah dedu kawm a ka tutlai in, ka khosik tha peuh hong suak mawk hi. A kallak bang in ka khuh thauhthauh a, misiam tungtuante’n hiai natna lauhuai veite omdan a gen uh toh kinaih in ka kithei hi. Huai bang ana hikha mawk leng kei natpe’n thutuam, ka innkuante gentaklouh ka lawm-le-vual mi tampite lohsawn ding ka hi chih thei ka hihman in kintak in damdawi inn lam ah vei leh veilouh kienchian di’n ka va hoh a, ka zoh in pawtkhe nawnlou dia hilh ka hih kawm in inn lam ka zuan hi. Zankhua hong mial a, bangbang hiam hih a ka buailai i n ka melmuhlouh tongsan hong ging chiaichiai a, ka va lak leh “na result a suak a, positive na hihman in hong kipawkhe ding ahi” chih tuh dawnna ka muh ahimaimah ta hi. Ka sungkuante theihsak ding lah dipkaw law ding uh, theihsaklouh ding lah hon thei veve ding uh ahihman in awl in kamdam in ka innkuante kiang ah thil omdan ka gen a, thumna toh pang leng hong pawtpah ding ka hihdan hilh in ka hehnem hi. Hilh a ka om bang ngei in damlou puakna ham theite ka innlam uh zuan in hong haam vongvong nawn a, ka kelkong uah hong khawl a, huchi’n hiai bang natna neite omkhawmna inn puaktung in ka om hi. Pindan sung khat ah hong omsak ua, nek ding bangbang hiam hong pia uhi. Ka lupna ding ka bawl a, hih ding mahmah omlou ahihman in lum zenzan kawm in ka melmuhlouh tongsan ka en nawn hi. I etna peuh ah natna thu kia muh ahinawn a, a lauhuaidan khawng hah gelh mahmah ahihman un huai in kingaihsiatna hong behlap semsem hi. Ka laisim thute ziak in sih ding lamlam kia khawng lungsim ah hong lang a, inn a lungkhamtak a ka pawtnawn hun ding ngak a omte ka ngaihtuah a, ka mittui a luang zungzung hi. Zankhua ihmulou in kingaihsiatna leh mittui luanna in ka hun ka zang bei hi. Zingkhua hong vak a, kei bang a damlou tuamtuam omte toh ka kigalet tuah leiluai uhi. Sungkuante meh puak kawm in a enkhe di’n hong kuan ua, kivehdan a tuamtel mai, mittui luanlouhna ding thu a omkei. Nidang a kiliangkawi zen a kienkolte chu a gal kimuhphakna a kiveh ahimaimah, kamkhat bek tong kisantuah uthuai hina maizen e maw chih vungvung in aom. Haksa hinatel e hiai bang khovel. Meh lim neih sunsun innkuante’n amau le ne ngamlou hial a ei adia hong piak vengvengte uh neklou a val a tamtel, nidang a lim ka sakluat tu’n lah a gimnam leng ka zakei, kingaihtuah luatna toh nek leng nekzoh ahikei. Innkuante toh alim-aal nekkhawm zaizai lai khawng lungsim ah hong kilang dundun a, mittui a dai mahmah mai. Hun paisa a solkal in kivenna dia zuih ding dan hong piakte ka na nelhsiah gige khawng ka kisik vungvung a, lah lakkik theih ahi nawnta kei. Kholak pawt zaw pawt theih mah himahleh dan zui kawm a ana pawt gige hikha leng hiai tan tunglou ding hi inga maw, kuamah mohsak ding omkei, kei mohna vek ahi. Niteng hun zatdan a kibang ahimai. Bangmah hihlou in om lenglah kingaihsiatna ngen, i melmuhlouh tongsan en leng lah kingaihsiatna ding thu tam semsem. Om khawmpihte khenkhat bang hong si zomah chih thu i thei bangzaw dipkuatna ngen ahimaita. Ka taksa natna sang in ka lungtang natna ka thuaklah zaw a, huai in hong bahsak sot mahmah. Oxygen kibulhte khawng ka en a, thawmhauna ngen in ka pumdim hi. Chikleh kei hun hong tung dia chih ahimai. Kingaisia a leng si thei mai ding dinmun in ka dingta a, ka beidong thei petmah. Lah kuamah kiang a gen ngam ding leng a hikei, innkuanpihte kiang diakdiak ah. Nikhat ka innkuante’n meh ding hong pedek ahihman un a la di’n ka va kuan hi. Kawlzal ah bangbang hiam kitun a, ka pindan sung ah ka hong hi. Kawlzal sung ah meh ding kialou Bible leh labu banah laibu hoih bangzah hiam kiguangtel hi. Lungsim in kei a laibu hi’n a Bible hitaleh a sim ngeilou penpen bang dia hong puaksak laizang uh eide aw chih khawng ka ngaihtuah hi. Ann tamlou nezou hong laibu puaksakte uh lak a khat Thaikawi Leelpi kichi Paite pau a khateng tanchinbu omsun chu a kilhna ka phel a, a sung a omte ka ban sim ekta mai hi. Ka simsim leh gintak banglou in simnop leh zaknophuai taktak thu hunkhop ana tuang a, bangmah kallou in a tawptan ka simsuak hi. Hiai ka laibu sim in laisim hon thanuamsak deuh in ka thei a, a dangte bangle ka sim nawn hi. Thumanpha leh thuhoih pipi tampi ka theihbeh a, hampha ka kisa mahmah. Hampha ka kisak diakna ahihleh hiai laibute ka simchiang in ka lunglut in ka kingaihsiatna ding lam bang ka phawkkei hi. Sunkhua laibu simna in ka zang bei a, nitak hun hong tung nawn hi. Bangteng hileh gingtu khat hingal a Bible sim hichi thadah chi’n sim ding in ka kisa a, sim ngeiloulua chih mah ka patna ding pen bang ka theikei hial hi. Laikhakte lak khawng ka sim a, ka lung a lut mahmah hi. Kare, sawtpek apan hiai khawng ana simluat ding hia, huai hunlai khawng a ana sim gige hileng manpha na maizen inchia chih in aom hial. Pathian a kinga zoute, Pathian muangte, Amah kiang a thum a Amah bel mite Pathian in veng in damlouhna, haksatna apan pikhia ahihdante chiangtak in ka sim a, thumna nei ngellou pa tuh thumna bang ka hong nei panta hi. Bible simkhin thumna i hong nei bangchu i lung a muangsot mahmah a, ka luttung apan ana kipan hileng ka taksa leng hiaizah in a kiam kei ding a, ka kingaihsiat leng a hichi tel kei ding chih in aom hi. Ka lup chiang in ka melmuhlouh tongsan apan zawlla, lunglen laa khawng ngai a mittui luangzen a kikhimte ka hi a, huaite’n ka kingaihsiat hon behlap mahmah uhi. Himahleh Bible ka sim apan Pathian laa lam ka lunglutna ah hong om a, Htp. Lianding Guite sak “Lunglel ken” chih bang, “Kon muang veve Toupa” chihte bang leh Pathian la phuaksiam tuamtuamte phuahte k’on ban ngaih zungzung chu hon hanthawn in ka lung a muang mahmah mai. Nidang a sih ding kia ngaihtuah a lumpa chu maban a dam a Pathian adia theihtawp a kizat ding ahihdan kia ngaihtuah in ka buaita hi. Melmuhlouh tongsan toh sun-le-zan hun ana zangdenpa’n chu Bible leh Pathian laa tuamtuam toh hun kong zangta a, kingaisia a sih ding bang chu ngaihtuah phak in ka nei nawnkei. Huai ka ngaihtuahnate’n a nini in damna honpe hulhul in ka thei hial a, lungnuam a ann ne na nana chu ka annkam leng a limsot mahmah. Nidang a thil hoihlou, muamtheih leh a tuamtuam ka na chiin khakte ka omtung in a duh in pheden mahleng tu in ka phawkkha nawnkei. Pathian adia pumpi hi’n lungsim hileh siangthoutak a omtak ding chi’n khapet zen a pang in ka kidekzou vek maimah hi. Inn lam a om a lawmvualte toh hun nuam lohtak neilou a zat gige hun khawng pammaih hina maizen e, inn ah innkuante toh Bible thu leh thu hoih leh manphate kikupna hun a ana zanglou a kum hiaitan ka na om, ka hun paisate lakkik theih hileh ka ut vungvung mai. Hun awl neih teng melmuhlouh tongsan toh hun zatbei mai sang a Bible toh hun zat ding kuapeuh gingtu teng in tel in zuichiat leng chih vungvung in aom hial. Zingkal kuamah thohma in ka lupna apan ka thoukhia a, mei vaksak in Bible ka sim a, ka simzoh chia ka Biakna labu a laate siam kei mahleng ka sa zel a, huaizoh thumna nei in ka kihahsiang zel hi. Minute bangzah hiam huihsiang dik kawm in ka taksa ka sawizoi zel a, huai in tha hongpe tuan mahmah hi. Nidang a zaw thoh apan ihmut tan dong a selam ngen ngaihtuah hi inga tun chu ka laibu, Bible simte’n hon khek zou mahmah a, vangsiatna tung a vualzou bang in ka kingai hi. COVID kichi omma a hih theihlouh, dawn theihlouh le neilou phialpa tuh hiai natna ziak in a siangthoupa ka suakta. Nidang a laibu leh Bible sim ngeilou pa tuh Bible sim leh laibu tuamtuam sim lunglutpa ka suakta. Nidang a kikhop ding himhim sawm ngei vakloupa tuh kikhop ding kal ngaklahpa ka suakta. Tu’n zaw ka mihinna lui tengteng ka suahkheta a, mithak ka suakta. Vangsiatna i tuah ni a bah a kingaise mailou a Pathian lam naih semsem ding ahihdan hon sinsaktu i natna lauhuai uh COVID ahimaimah. A lauhuai, i deihlouh, i tuah utlouhte bangle Pathian in hon zat utna om a hon sapna leng hithei ahi. Huaiziakin, kei bang a hiai natna lauhuai ana tuakkha kuapeuh kingaisia a hinkhua zang mailou in Pathian toh i kal bawlhoih thakna ding in zang chiat zaw ni. Pathian thu leh laate in kihehnem leng huailou hong nem zou taktak ding simlei tung ah singdang bangmah a omkei. Hiai bang a i thiltuah khempeuh khasiatna, mittui nulna a zang mailou a a hoihlam dia zat zawk ding ahi. Thilhoih hong pianna dia a hoihlou bangle tuah zel ngai ahi. Ka tawpna di’n bangkim ah THUMANNA mahmah lenkip chiat ni. (NB: Hiai gelhtu ahihleh COVID vei ahikei a, himahleh a na veikha a kingaise tak aomte hehnep theihna omsun leh ana veikha nailoute adia dan leh thupiak zuih ding ahihdan theihna dia gelh ahi. Kakipak)

(c) Siamsinna leh Vakiangbu