ZANHAK TE BANG IN SUBUAI HIAM
By ~ Leon Guite
Hiai bang
thil a tunna pen hun sawttak paita ahita hi. Zoudawn lam ah khua khat
(akhaw min im ahi) ah inn tamlou 50 vel te tenna a thiltung ahi. Hiai
khua ten misi a neih chiang un lamdang tak in misi kha laang om teitei
sek hi. A khua uapan gamla lou ah sih lian deuh mai khat om hi. Tua sih
kiang lou a neih kum un lamdang tak in a khosung uah sihna,
zawngkhalna tuamtuam tung hi. Amau leng lamdang sa mahmah ua, himahleh a
loh dingdan thei tuan lou uhi.
Lou giak ten nitak chiang
in thil tuah khawng hau thei mahmah sek uhi. Buk tung ki hawk khia
bang, naungek kap bang, Sakhi in nuihsan chih khawng tuak mun mahmah
uhi. Nitak khat pata lou giak ten a louveng ua mikhat Suanlal kichi pa
buk apan thau kikap ging za ua, agal et uh leh buk apan vak khat kikhoh
khe zel a gamla sim tak tusuk zel mu uhi. Huai zoh chiang in buk apan
mikhat torchlight tawi kawm a tua vak atuk na lam manoh a pai dan in mu
zel uhi. Louveng pan vasa khawng kap ahi di chin lut san uhi. Zingkhua
hong vak tak in alou vengpa kiang ah zan nitak a bang hih na hi hiam,
thau kap kawm in na diang khe zel a? chi a a dot uh leh aman bangmah
theikha hetlou in lamdang sa mahmah hi. Nupi khat lou ah suun a loukhou
a omlai thakhat in a le-nuai va va kizelsak mawk hi. a zel tu di lah
muh hilou, zau lah sa lah lau mahmah kawm in haksa satak in lou khou
hi. Huai kum in thiltung tampi gen ding om hi. Himahleh I genseng kei
ding.
Huai khua ten huangvulh ganta, kel, vok, ak, ui leh a
dangdang vul zel uhi. Huangvulh ganta te nitak chiang in a sawk om mah
bang in ihmu theilou in inn nuai khawng ah ham vengvung in phe
lunglung sek uhi. Misi aneih khak chiang bang un uang diak se sek hi.
Amau leng aloh ngaihna theilou in a khente bang in angeina dan a koih
top bang zong omthei zel uhi.
Nikhat hausa upa khat hong
si zenzen thahah hi. Nitaklam ninem kuan ahih man in han lai manlou
ding chi in zan hahpih uhi. Kuapeuh a it lou omlou, pammaih salou omlou
uhi. Aziakbel amah mi hehpih thei leh piltak hi a, khosung ah hausa
zom a mi muanpen khat ahi hi. Amah hong sih chiang in khosung mite'n
itlua uh ahihman un lengkhawm te zong mittui daitak kawm in lunglut tak
in lengkhawm uhi. Huai nitak in khosung mi aneu-alian kuapeuh kisit
omlou hial in kimtak in leengkhawm dipdip uhi. nitak tung in bel
bangmah thawm zak ding a omkei. Himahleh banghiam thil hong om ngei
ding a gingta in akhen te bildoh gikgek den uhi. Misi omteng a kha
laang om gige thei mawk ahih man in kuapeuh in bang chik hun in ahong
kipan dia aw chin ngaihsun chiat uhi.
Huchia lungmuang
chiah lou, lunglut tak lah hithou kawm a bangtan hiam a hong leenkhawm
lai un thakhat in inn nuai a akpi khat hong kokek in inn nuai apan inn
khang a gobul lam manoh in hamsuk chelchul hi. lengkhawm te tha khat a
phawng ahihman in hong dai duak ua, akhente lau leh liing in laa leng
sathei nawn lou in hong om uhi. inn nuai lah ging bubulh den. zan sawt
khua dai mahmah ahihman in thawm leng ngaihpha diak hi. Numei naupang
deuh te bang in lau gawp in kikawi tuah tinten uhi. akhente lah lau lua
in tangthei lou ua, milem kitung mah bang zozen uhi.
Atawp
in val-upa bangzah hiam in hichi om mawk thil hithei hikei, iva enkhe
himhim ding uh. Chi'n hong kisa uhi. lengkhawm te kiang ah la sak pan
nawn ding in hilh ua, huaikal a bang hi mahmah hiam? bang deih a hong
huchi gamtat hiam? ahihkei leh bang lungkim louhna nei a hong subuai
ahia? chih zon khiak a hon sawm ta uhi. Akpi lah a bu lam delh tou nawn
mah leh asubuai tu om ahihman in kokek den hi. huai in ak dangte
phawng in ap huaitak in ham chelchul uhi. Val-upa ten leng inn nuai hon
umkual ua, torch light toh pang hial in pan hon la ta uhi. A thawm
ging bawltu pen zonkhiak sawm himah le uh a mu masa ding ut kuamah a om
kei uh. Lau kawmkawm in hon enkhe zel ua, inn nuai a ging bubulh pen
lah dai lou ahihman in laa sate zong ama abang nawn kei uh a, a hi
liailuai geuh uhi. Val-upa te thil zon in alungsim uh luah tek ahih man
in diip hawmsa leh taikhe ding a mansa in laa sa luailuai uhi.
Bangtan
hiam nung in Val-upa khat hong pau khia a, Eh! a hon chih leh
leengkhawm te bang hong dai duak zozen uhi. kuapeuh in athu thei nuam uh
ahih man un dip hawm zen in bil doh gikgek den uhi. Huchi'n a tawptawp
in val-upa te hong nuizak uhi. innsung a omten lamdang sa mahmah ua,
sikha in khemhai hiding chi pawl bang om man uhi. Atawp in val-upa khat
innsung ah hong lut in a mau subuaitu bang hi hiam chih hong hilh chian
hi. Inn nuai a thawm om pen kha kel in ak ek ne ut a, akpi tuilai khat
bubah ah amuk thun in ak ek nek sawm hi. Ak ek a nek sawm na lam ah a
muk ak bubah ah tang kha a, kipek khiak sawm a alu ahon pei leh akpi
patau a kokek zak in abu apan lengkhe kha ana hi phiang san hi. Thu
omdan atheih tak un innsung a lengkhawm a lautak a ana om te kah nuih
niainuai uhi......
..... beita.....
©Siamsinna leh Vakiangbu
Comments
Post a Comment