BIRI’ LIANU…!!

By ~ K Thansang Zomi

 

“ ….Daal-tu muanhuai tuun-le-zua te…..” chi a Muana Ngaihte in a na sak ngelh-ngelh dan a om zaw kahi het kei. Daal naak sang in hon hentang nuam zaw uh hileh a ki lawm. Hiai ka chihna bel, 20th February, 2014 (Zomi Nam Ni) ni’n Gammang a Sharon Pak hoih bang a hoih ka Ngaihnou kiang ah ka va pawt(hoh) a, a Nu’n hon bawl dan a pan katheih ahi. Huai ni ahihleh, Zomi Nam Ni le hi, Khaw Phat leh Leivut Khuut a ki tuah ni zong hi , kei a di’n Vot sak leh Khawsik a kituah ni zong hi bok hi. Hiangtam Lamka YPA Hall a, ZAA-te’n Zomi Nam Ni lopna dan a Concert asaina uah ka vat el a, Gamngaihla tampi mahmah ka bil sung a guanglut zou in ka Ngaihnou sianglam ka zuan hi. 

Nitaklam hi ta ahih man in, ann a na huanta uhi. KA Gil kial sim hia chih theihlou in, a Innsung uh ka lut ma in a mehhuan uh, Aak sa sihzou toh a pok a huan ahih dan agim in ka thei ngal mai. Ka thilgim zaak chu a na dik petmah a, huai gim nam viauviau te diik kawm in Common Room a Secondhand puan zuakna mun bangmai a Puanlom, Bench tung a kikoih te nawl ah ka tu hi. Ka Ngaihnou in ahihleh, a innkam uh leh bang ua Maimomlen, Lamka Khopi sung a Electric gui kizan-te bangmai a ki zan zengzung te hah kawm keuhkeuh hi. A Nu’n ahihleh, Kitchen Room ah atui mawl a huan di, annkam ngentel tak in sawp hi. 

Baang a kitaak, misiam te’n siik neng a lepkhawm uh lah ki khin-khin ahih man in Nitaklam dak 03:46 bang a khut un kawk vengvong ua, “ Pai ta ve, ann nek hunta eive” hon chihna uh hileh kilawm bang in kangaih tuah hi. Himahleh, It leh Ngaih te inn a om na-na-na chu, baang a Sana pi ki taak leltak in hon thuneih khum zou kei…!! Hon thuneih khum lou ka chih hang in, ka melh-melh kha a, ka et-khak teng in daak tam zaw sem hon kawk khum ziahziah maimah uhi. Kei le a tawp-tawp in, ka taw giklua hi awmtak in ka ding khe ngutngut a, Vot sasim(Khawsik ziak) kahih man in, ann huanna a mei-aam ah kakhut ka hai zual a, pai di kahih dan ka gen hi. Ka ngaihnou’ nu’n, “ Pai Chih omthei mawk lou e, en ann honna ki huan kep a, ka Pa’ uh Mimbung lam a Zomi Nam Ni zang dia a va hoh a leh mi Nih kia om lekluak ung ua, Chimhuai lua, ann ne sa a na pai di ahi….” Hon chi a, ken le Aak sa duhziak le hituanlou in ka ‘yes’ pah hi. 

Ka Ngaihnou te’n Gas nei mah le uh a zang kei uh. Hol(Charcoal) in ann a huan ua, kei vot sak sim toh a kizen kawikawi vanglak. Ken Kizen samah leng a mau ki zen sa di un ka ging ta kei. Ka Ngaihnou’ Nu kiang ah, “ Nu, bangziak e Gas a ann na huan louh uh…?” ka chih leh “ Ka Gas uh a bei na kaal khat ching di hita, hol bag 2(huai le sing hawm ngen) ka lei ua, tulai a hol ngen zang a ann huan kahi uh..” chi’n hon dawng hi. Hiai a pan in, LPG I gam uah a ki ningching kei a, LPG a ki ningchin louh ziak in Hol a ki hah hal mahmah a, gamlak a singkung teng ki vaatmai khin ahi chih a chiang. Huaiziak tak le hi’n te Ni a sat zek chia Lengtong Pauno in, “ Sou na veng-veng ee…..” chi a laa a sak toh a ki bat sek. Vuahtui le deih a bang nawnkei, Lamka zang a om-te ngial a di’n Khuga Dam a tui te kinep phaklouh ahih ziak in, LPG ki ningchin louh in gam teng peh hi. Khuga Dam I chih ‘Multi-Purpose Project” ahih ngal leh thil dangdang a ‘MultiPurpose’ ahih sang in tui supply bek a ‘Purpose’ hileh ka chi vungvung hi. 

Ann ne dia ka kisak ua leh a Ui hon te uh le hong ki sa ua, anuam hetkei. A ui te un le sameh zaw ana duh sam uh hihtuak hi. “ Duhlam bansau” chih dan te zat ngai se-se lou in batphak ziahziah vek di’n ka Ngaihnou te nuta in a poimoh bangkim hon koih fel siusiau ua, nuamtuam mahmah. Gil-mul ki vang(kak) zen in ann ka ne a, ka khawsik lamlam le kaphawk nawnkei. 

Ka Ngaihnou kiang a “ Khawmial ma in kapai dia, zingkal a pawt kahih toh leivui khut ziak a ki ngiatgawp zomah, kisil louh theihlouh di, tuilum bek suan a Khua sik sim lele kisil kasawm ahi..” ka chih leh ka Ngaihnou in bangmah hon gen ma in, a Nu’n, “ Khawmial ngak vet lechin himai, tu khawmui zul a zaw Zukham a kiphasak bang tam ua…..” hon chi hi. 

Bangziak tak a ka Ngaihnou huchi kam tawm tel a dia aw..? Nidang toh a kibang kei, a Nu’n hon deihsak luat hang a, aman Lungdang gel adiam ka chih ton om hi. Nidang a bel, a nu toh hon houpih di bang kituh bawl zozen uh hi a, tutung in ahihleh a nu kia hon houpih sak hilhial hi. A Omdan kathei siamkei. A Nu’ omdan ahihleh, “ Vuah zu dek, a zuk ma in ka pai di..” chi le hang, “ Vuah zu dek, den chiah lamkal ah hon pha kha dia, a zuk zoh chiah pai vet oh..” hon chi di khop ahi chih ka haihkei. 

Ka hakal a aak san eng lian pi-pi laikhe kawm in ka pai a, kisil siang in, puanlum hoihtak a silh in ka zal na laikhun tung ka beel ta hi. Votsa sim kahih man in, liing sim kawm a ka mit ka siing pat diaudiau leh ziinling bangmai in ka Phone hong liing doldol a, ka et leh Message honglut ziak a Sap te’n, “ Vibrate” a chih te bang ua hong om a na hi leltak hi. Message ah, “ I Kikhen mai diam, Itna kichi ka chimtaak gawp…..” hong ki chi leuhleuh a, ka thulak vet kei.

Aziak ahihleh, ka Ngaihnou naupang chih mahtak a lungsim le a na upa kei a, thil a ut-ut gen phutphut, kol theih dandan a kum 2 bang ka na koltouh a hita hi. Nidang him in le, “ I Kikhen mai diam, Itna kichi ka chimtaak gawp…..” hon na chi mun mahmah. Muana Ngaihte in, “ Tu a mai-thak namuh ziak a, gibing khen ding simthu non lel, mittam di’n zong vallua chia ngaih, 7 Day Lianu..” chi a, aw aneih dandan sit neilou a asak khawng ka ngaihtuah khe kha a, ka Ngaihnou bel ‘7 Day Lianu’ ka chihna ahi tuankei. Naupang dawng thit-thet ahih man in mi tamtak le khempuk zou mahmah di’n ka gingta. 

Mai-thak mumun sim ahi ngei dia, mi kua hiam maithak a muhcia kikhen sawm hi di’n ka gingta. Mai(mel) thak om chiang a Itna pen sukmit a sawm gige pen mak ka sa mahmah. Tua le mai-thak mu ahi peuhmah di. Itna a sukmit hun in le ka pan thak-thak mai a, himah leh a tawptan bel ka tung hial kei uh. Ka hohlouh zek chiang bang in le Itna sukmit sawm pahpah mawk hi. 

Ka Ngaihnou omdan ka Ngaihtuah vengveng chiang in ‘BIRI’ toh kibang ka sa hi. BIRI kichi laizial chikhat ahi a, tep lou a I om zek chiang in mitkik pahpah maimah a, pat thakthak ngai hi. Tua mahbang in, ka Ngaihnou toh ka kal ua, Itna meikuang pen a mitdek hun in ka pan zel a, ahihhang in mitkik din a kisa pahpah zel. 

Ka Ngaihnou in ka ngaihdan thei henlan, Aaksi in Ni a suah chiang a, mite muh a avakna a suahkhiat louh hang a,a om na mun a ana vaak bangbang in, ka Itna le vaak den ahihdan thei hileh zaw, tua bang a omlou di hiven..!! Kei a di’n Ngaihnou chih di le ka thasial ta. Huaiziak in, “ 7 Day Lianu” chih a om bang in “ BIRI’ Lianu” ka chi mai ta hi. 

2802 – KAKIPAK - 2014

 

©Siamsinna leh Vakiangbu