BANG DAWH AI
By~Son Kym Quptong
Zing
ni suak etlawm tak mai mualdawn ah hong vakkhia singseng hi. Ni suak
etlawmnate'n i zougam jel suak jou mahmah mai a, vasate'n jong a siam
pa phat in a lang lang ah ham veng vung ta mai uh hi. Huchih laitak in Thangpu ji jong jing thou di in hong kisa a, hong thou in mei khong hong
toh khin ta hi. A hihngeina bang a ann bel suang dia hong kisak leh
nau vei in tha khat in hong pha mok a, taang thei non lou in om hi. A nau
neih hun in phaa hih man in thangpu leng kin deuh a thou khia in nau dom
thei(khawi thei)khat va sam in, huchi in tom lou kal in tanu mel hoih
tak mai hong nei khia uh hi. Nau chiil a hih man in a it un a hom thoh
kholdiak uh bang hi. Huih mut dia le phal lo hial dan uh h in mo. .Nau
deih thoh tak leh pathian a pan gou tan piak masak pen a hih na toh a
min ding in,thian hoih ci uh hi. Tanu hom thoh leh duat a hih man in nau
leng kua mah don sak ut lou in anu mah in pua leh leh mai hi.
Hun
hong pai jel in Hoihboi le lawm leh vual khol thei ding hong hi ta
hi.Hu chi a lawm le vual khol a om maimai sang in chi in, Thangpu in a lou
kuan na peuh ah pua in ton pih jel hi. Hoihboi mi pau ut mahmah leh lawm
ngai na mi leng a hih man in lawm bang inn dim dim ah om uh hi. Huai hun
lai a ding a Thangpute inn kuan mi khasathei leh mi thu dot mah leng a
hih man un, jin leh leng khuai tung mah bang noinoi sek hi. Hu chi a hun
hong pai pai in Hoihboi le nungak bang hong hi ta hi. Mel hoih leh pau
nuam a hih man in tangvalten ngai thei mahmah mai ua, amah lah kisa thei
chi a leng om tuan lou a hih man in, leng la bang hau thei mahmah hi. Huchi a leng la te lak a a ngaih pen leh it pen di le thei jou lou khop in
hong om hi. Tangval khat lai siam mahmah Nangpu in ngai in, it na khau gui
jan ta uh hi. Nun nuam nga bang leng a sing dang eng lou a om lai
un, Nangpu a nute'n mun dang a lai sim sun jom di sawl mok uh hi. A it
pen tai san di a hihman in ut kei mahmah a, poi sa pet mah hi. Nangpu leng
thu om dan teng anungak nu kia gen in, jing ciang mahmah jin di a hih dan
hilh in, pham dong in tongchiamte ngilh kei ni ci in hong kikhen ta uh
hi. Nangpu leng a jin na di a tung in a ngaih nou ngai in lunggim mahmah
mai hi. Tu lai dan a phone om nai lou a hihman in lenna vang khua kikhat louh man in thel nah tongdam in tong kikum jel uh hi. Ni khat mel
mu lou jong kum kivei bang a hih man in om thei mahmah lou hi. Hoihboi lah
amel hoih toh kam siam jo mah ka om louh kaal in tangval anei kha di ci
in lung buai thei mahmah hi. Hun jaw pai tak a hi dia, agin tak mah bang in
kum li bang Hoihboi toh Thu ja thei lo a hih man in chi in len na
vangkhua ah ngaih nou mu ding in khau bang hong ciah hi. Huchi bang a
hong pai hang in a ngaih nou mel muhding himhim om lou in kha kham vei
lung juan sial den in khau bang chiah ta hi. A lawmte kiang a hoih boi
thu a kan leh,kha thum khwng pai ta in pasal anei ta cih san hi. Aw apoi
ngei mai a ginom lou jaw hilou hi ven, a kithu jak theih louh jiak ua Hoihboi in ana juausan a suak maimah ta.
Hoihboi leng
apasal neih na ah hong vang pha in a bang hong nei pah vang lak hi. Ta te
et kol na ding chi in sep theih om sun bajar ah van juak in kuan jel
hi. Van juak a kisak lailai in o, BANG DOH AI TUI dawn kha a hiam pasal
khat toh kimai kha uh hi. Apasal leh ta te nu sia in inn lum tai san ta
mai hi. A ta neu pen la nawi ne lai a hih man in anu ngai in kapkap mai a, himahleh anu'n lainatna nei het lou jaw a hi dia, sulkik simthu lel
lou hi. Pasal thak a neih pen lah inn tum ta le nei lo, alanglang a om ana hi
maimah a hihman in lunggim kipan ta hi. Lung gim mahmah hi na pi jot na
ding lampi theilou in a tak sapum juak hong kipan ta. Taksa pum juak a
hong om chiang in nat na hoih lou bang kai loh ta.
A
om danthoih lou le natna hoih lou te in Hoihboi lungsim kining na ngen
in dim hi. Alanglang ah lungkimna jong in vak lehleh mai hi. Himah leh lungkimna leh khamuan na neithei tuanlou in, niteng in haksat na leh bei
dot naten meipi in bawm hi. A natna a pan kiven theih na a hih khak leh
ci in, apasal nawn nusia in Burma gam lam ah va pai hi. Gal tai ci leng i
khial lawm kei di. Huai ah lah lungkim na tak mutuan lou in, khovel in
lah hon pampaih ta chi in, a hun mualliamsate ngai in hui bang maumau
mai hi.
Ni khat lungnopna jong a lampi a amah vuak a pai
lai in, agal gam la sim apan in Pathian thugen na khat ja in, huai mun
bek ah lungkimna om khak leh chi in va tai lut ta hi. Huai a thu genpa
thu gen in a lungsim khoih mahmah a, bang mah lou leh sia, mihingte pampaih a hih hang a Pathian in it a hi cih hon thei khia ta. A hoih louh na
te leh a bawl khelhte Pathian kiang a kipuang in piangthakna diktak
va tang thei hi. Jesu a khelhna te ngai dam thei cih a theih man in kipak
lua, lungdamna khitui amit a pan luang khia jungjung mai ta. Huci a kipak a laam a hong om tak in alungsim in laa khat hong suak a kikhawm
tengteng mai ah hiai laa hong awi khia ta mai hi.
"Aw ka hin
khua jan mang hi mai hen la, sa bang ka jal ajan kal in maw, aw a liamsa ka
hin khua pak bang hong pak kik o, ka tuai dong lai ni e tom chik bek, jang
kik ka ur ka innsungmite toh, pak bang hong pak kik o ka hin khua" ci
in hong awi jiah2 mai ta bang cu mipite tengteng mittui luang lou omlo in
kap vengvung mai uh hi. Huai ni cu amah a ding in khovel a a kipah ni
penpen leng a hingal bok.
Hun hong pai in Jesu toh ton a awm himah leh anat na pen dam lou, akha pen cauh hotkhiak a om a hihdan hong
thei semsem in, khatvei vei lungkia le bei dong a om sek hi. Anatna damna
ding jong in a langlang ah tai a, nikhat lung dong tak a om in atak sa nguitak a om leh NGO khat in a ki-et kolna ding damdoi a poi moh bangbang a
panpih ding a hihdan uh hon ja kha hi. Lungkham mangbangte a dia kingakna Toupa a hih dan thei semsem in Pathian kiang ah kipahthu gengen
hi. Khovel hauhsakna sum leh pai lamtam sang in, Jesu ah a hinna leh
muanna koih khak pen amah a ding in damsan a hi chih thei in lungnopna ngen ta hi.
BEITA
©Siamsinna leh Vakiangbu
Comments
Post a Comment