SUM DEIHTAKNA

~Sang Hilsia

(Post nawn ta ole, post louh na le a sawt sim tak toh. Sim hak lenluan maithei   )

Political Party block makaitu ka hi a. bialtu Minister toh le ka ki thei hoih ua, contract le ka mu thei mahmah a, lou nei a nekzong maimai leh singtang kho tawng a om ka hih na uah, ka khosakna uh a sang het kei. Hucia contract estimate nuai 20 man vel kon muh gige incu, 'duhamna' in ka lungsim a hon luah ta a, tu ma a Tuailai pawl makaitu hi zel pen, zuu toh ka khosa ta.

Ka zi a damthei kei mahmah a, nupa hinkhua le ka zang vaang mahmah uh. Himahleh, ta-le-nau bang ki nei ta ahih man a kikhen lou maimai ka hi uh.

Inn hoih tak ka lam a, gari ka lei a, ka khua uah mi'n hon tung et mahmah ta uh. Tanu khat leh tapa ka nei a, ka tanu a melhoih mahmah mai a, mahni ta mah himahleh mel leh a taksa pianzia ah ka phat zel a. Innkiang a papi khenkhat in, "Chingnu cu a mel leh a pian a nalh a, officer kua hiam khat in a hong hel mai di" cih khawng in hon phat sak zel ua. Laisiam thei tak ahi a, high skul sang a zilna sangzo ka khua ua a omlouh man in, ka party headquarter lam a ka lawmhoih mahmah khat in ka na ompih di a cih man in, matric a zoh in Lamka lam ah a laizilna sunzom di'n ka va kha hi. 

Hun hong pai zel a, MLA ki tel di ka naih ta mahmah uh. Ka Bosspa ke thei dinmun a a din ziak in, ka khua ua damdawi inn bawl thak ka sawm uhi. Huai contract nna deih in ka ki pei buai ten a, ka beih nasat luat ziak in a hon pia ua, contract estimate 200 tak ahih ziak in, ka lungsim guuk ah ka kipak petmah. 

Running bill ka hon la a, nnasep ka hon pan cu ka phur a, ka hauhsak mahmah theih na di ahi cih ka thei a, pan ka la nasa petmah. Saptuam ka gamlat hiai hiai a, Tuailai pawl heutu leh makaitu hi zel pa, khovel hauhsakna in hon vuk tak incu omdan ka siam nawn kei. Zuu ka hon hah dawn mahmah a, ka lawmpolh te le zuu dawn ngen ahi uh.

Khatvei cu Lamka ah ka va zin a, sum nei mahmah a zin ka hi ta. Ka lawmpa inn ah ka va hoh a. Nekhoih ne ahih ziak in, ka tanu Chingnu le ana hoih sot mahmah a.

Nitakin ka lawmpa' inn ah ka va hoh nawn a, ka houlim uhi. Bang tan hiam zoh in ka lawmpa'n, "Nungak toh ki thuah na ut hia, sum le na nei thou a, Lamka nungak nou nalh taktak, zankhat luppih a Cheng sangli (4000) a lei theih di a tam uh", a ci a, ka bil ah a lut ut ngei mai!!

A thugen ka thukimpih cih a theih in, "Mi kon houpih dia, na deihzawng cu ahon muh sak thei di uh" hon ci a, a phone in kua hiam a ki houpih a.Diktak a gen in, ka zi toh nupa hinkhua ka zatkhawm ngeilouh luat ziak un, nungak toh hun zat poi kasa het kei!

Ka pawt ua, hotel khat ah ka lut ua, a nung sawt lou in kongkhaak hong ki kiu a, nungak melhoih mahmah leh etlah huai mahmah nih a hong lut ua, ka lungphu bang hat zot hial in ka thei. Ken khat ka teel a, ka lawmpa'n a khat pen room dang ah luppih ding in a pi ta. Zankhua in ka zi kei a ding a gin-omtak a, haksa tampi thuak a om cu ka aangkawm san ta!! Ka om sung numei ah ka ki bual den a!!

Nikhat bazaar kai zou, inn ka lut a, a dai mahmah a, T.V. khawng ka en maimai a. Hucih lai in ka lawmpa' room a kipat ka tanu a hong pawt a, a hih uh ka dot leh, bah mahmah kawm in, "Ka pa Lian(ka lawmpa) nung ka mek (malis) sak a hi" ci'n a hon dawng a, ginglel kei a.

Huci in, ka kho lam uah ka pai nawn a, ka nupa kal uh hundang sang a se zo in ka thei hial a. Damdawi inn te lamzou in, Lamka ah bill la di'n ka hoh nawn a, sum nuai 100 tak leep di ka hi cih ka ki thei a, numei ah ki bual ka sawm nawn hi.Bill ka lak. nitak in ka lawmpa' inn ah ka va hoh a, dan pangai bang in, hotel ka va zuan nawn ta ua.

Sawt ki hal lou in, kong hong ki kiu a, ka va hon leh ka gintak het louh ka mu ta. Ka tanu, ka suan mahmah leh a lawm a hong lut ua!! Pau het lou in ka tanu toh ka ki en tuah ua, "Chingnu" ka ci top a, "Pa, hon ngaidam in aw" a ci a.. Ka heh mahmah a, khutkhak ka ut hial a, himahleh midang le a om ahih man in, khut ka kha hial kei.

Ka kik sak a, kei le thildang himhim hih dia lunglutna ka nei louh ziak in, ka sungte uh inn ah giak di'n ka pai a. Zankhua in ka ihmu thei kei a, ka lungtang ana petmah. Ka tanu mi tuamtuam in a luppih uh cih ka theih in ka sa huthut a, va thoh zual a, va meklup mai ut na hial a. Hucia heh mahmah a ka om lai in, ka lungsim ah Bible chang hong lang a, "Soisel kei un, huci a soisel a na omlouh na ding un, kuamah siamlouh tangsak kei un, huci a siamlouh tansak a na omlouh na ding un, ngaidam un huci in ngaihdam in na om ding uh".

Hiai thu ka ngaihtuah khak tak in, ka ki kih mahmah a, hauhsakna ka dong a, hauhsakna hon pe tu Pathian apat ka taimang a, ka hinkhua ngaihdam tak lou a ki huai ahi cih ka thei chiang ta. Mi tanu hawmthoh leh a iit mahmah uh sum in ka lei a, a nu-le-pa' lungtang nat di dan ka theihsiam pih kei. Ka tanu mi'n sum in a lei uh cih kon theih a ka lungtang nat dan zo gen vual ahi kei. Tu in ka thei siam ta. Ka zi ka aangkawm san a, kei ka hi a dik lou masa pen, ka hinkhua ngaihdam tak louh khop a sia hi in ka thei. Sawt pi ka hih ngei nawn louh, mitsi a thum in ka Pathian sam in, ngaihdam ka ngen a. Ka tanu ka ngaidam dia, khua ah ka pi dia, Khristian innkuan pan thak di'n ka paipih di.

Zing ka thou a, ka lawmpa' inn ah ka va pai a, kuamah ana thou nai kei ua. Doorbell ka mek a, sawt lou nung in a ompih nu un kong a hong hon a. Chingnu kong ka va kiu a, himahleh hon dawng kei. Ka kiu zel a, a dai zikzik a. A sung lam a ki kalh ahi a. Nak pipi in tum mahleng, dawnna bang mah ka ngah tuan kei. Ka thawm ziak in midang le a hong thou ua, huci a kong ka kiuh kiuh chiang a le dawnna ka muh louh tak in, ka ngaih a pha kei a, kong khak ka kal hong ta ua. A sung ka lut a, Chingnu lei pet zen in ana ki khai kaang a!! Kin tak in ka naih a, himahleh hinna himhim a nei nawn ta kei!! Ka lungtang ana petmah a, a lupna ah ka bok top a, kah petmah in ka kap a, himahleh phatuam di bang mah a om kei. Ka min ki gelh na envelope khat a lupna tung ah ka mu a, ka hong a, hi ci'n a ki gelh a:

"Pa aw, na tanu vual en lau a sum na hon khak zel in mo, ka lawmte'n ki zuak a meet dan hon hilh zel ziak un, ka taksa ut na ka dal zou kei. I ki muh in, ka omdan tengteng thei a, hon mat khiat dan zong a, non man khe ta hi in ka ki koih, ka damsung in na lungsim ka hih na ta di cih ka ki thei. Na mel le ka mu ngam nawn kei di. Pa.. Na tanu ngaihdam tak louh himahleng, hehpih tak in hon ngaidam in aw.. Na Tanu hi tak louChingnu

Khovel hawm (empty) hial in ka thei a. Kei' ziak ngen ahi, hon ngaidam in aw ci in kap kap mah leng, hon dawnna di'n hinna a nei nawn ta kei. Khovel thil ah ka ki hah zat lua a, ka iit mahmah leh ka ki saktheihpih mahmah, ka tanu neih sun ka taan loh hilhial a. Kua mah hon deihlouhna khovel ah om hi'n ka ki thei. Pathian kiang ah ngaihdamna ngen in ka thum a, Khristian innkuan pan thak di'n ka hong kisa ta a..

"Sumdeih luatna tuh gilou chiteng bul ahi ngal a; huai tuh khenkhatte'n adeih mahmah ua, ginna a taimang san ua, lungkhamna tampi in amau leh amau akisun let tetok uhi".

1Timothy 6:10

~Beita~

©SIAMSINNA LEH VAKIANGBU