TUNI'N KHA KETA LE'NG

~Vz Vualnam

Tuni’n kha keta le’ngKulsin daidam ah zalta le’ng

Lailungsiik luankhi nulkei ning e

Mu bang ka ngaih lanu’ siang

An bang ka itna leelkhin ta’ng e

Lailung siiksawn na’ng bei hi’ng e

Lanu’n an bag hon itsamlou zong

An bang ka it lung a atheih

Lungmuang a kha ka kiakna’n hunzou e

Ka luakha’n damdiai in

Pialgal vangkhua zuan ding aw

Selung muang in simlei ka khenta ding aw

Lanu ka itna kumkhua sawt e

Phalbi vuukkang thum in thahta e

An bang itna mei bang mitloulai

Anuai ah kammei bangkuang nalai e

Lanu’n ei nialna kumkhua sawt e

Tuktui thum in luanzouta e

Ei nialna luansiangloulai e

Sum bang ei nial nalai e

A sinlai ah kei di’n mun omlou zong

Kumchin in an bang itna simthu

Tui bang zawl ka baanglou e

Nua chiang lungsiik dai bang pelh na’n

Tui bang zawl ka baanglou lai ding aw

Phamta le’ng, tuni’n phamta le’ng

Kulsin daidam ah zaalta le’ng

Lailung siik luankhi nulkei ning e

Mu bang ka ngaih lanu’ siang

An bang itna simthu leelkhin ta’ng

Lailung siiksawn na’ng bei hi’ng e

Phamta lechin, tuni’n phamta lechin

Na laukha lung asiik diam?

Simthu leellouh sinlai a thaam

Leelnuam in laukha a zuang diam

Pialgal tuanglam machiang suanlai

Laukha lungsiik a luanli nuul in

Siahsat simlei na gal dotdot diam?

Tuni in siphutta leng ka it nungak kiang a ka itna thu ka genkhittaak man in ka kha in kisiikna ding aneikei ding hi. Aman hon itsamkei mahleh it ka hi chih atheih tuh khamuangtak a ka sihna ding in ahun hi. Khamuangtak in ka kha’n leitung a nuse dia, pialgal gam ka manoh ding hi. Nungak ka itna asawtta a, phalbi vuuk in thumvei a delhkhumta hi. Himahleh ka itna amit naikei a, akuang lailai hi. Nungaknu’n a hon deihlouhna asawtta a, tuuktui in thumvei a luankhumta hi. Himahleh hon deihkei lailai hi. Kei ading in a lungtang ah mun omkei mahleh denchiang a kisiikna ding a om hetlouhna ding in kumteng in ka itnathu ka hilh ka tawpkei lai ding hi. Sita leng, tu in sita leng kisiikna ding ka neikei ding hi. Ka it nungak kiang ah lah ka itna thu ka hilhkhinta ngal a. Sita leteh, tu in sita leteh na kha a kisiik diam? Na genkhaaklouh na lungtang a om gennuam in na kha a kisiik diam? Pialgal zuan a pailai na kha in kisiik in khitui a nuul diam? A nutsiat leitung a gal etet diam?

©Siamsinna leh Vakiangbu