LUNTANG' KIANG AH

By ~ Vz Vualnam
 
Zanitak ka lung a kham man in
Gamtat ding ka tha a zoi ngoihngoih a
Ka lupna ah ka lum nilouh hi.
Huchia ka luplai in ka kihei ka kihei a
Tawlkhat tuh ka khuplup hi.
Huchia ka om leh puanphah sutuah a
Ka bil leh lukham ka suktuahlai in
Khuang ging bang mai a ngaih ging ka zata a
Ka bil a hon khawngzou hial hi.
Huchia ka ngaih dedulai in
Ka pumpi leh a kahiangte a
Hinna a sawlkhiat theihna ding a
Tawlngak hun himhim neilou
Ka lungtang’ nasep ging ahi chih ka hon theita hi.
Ah, lungtang ! Tawldam tak a seem hiithiat ding k’on sa a
Hichitel in nana tha-it in nana semgim maw!
Hichitel a na sepgim gah hinna lah
Lungngaihna ding leltak in ka na zangzaw naak a
Na sepgimna thawn hina tel e!
Tubaan siah zaw na sepgimna thawnlou ding in
Hinna n’on piak hawmthoh tak in
A manphapen di’n ka zangta ding.
Dahna dingte’ sang in kipahna dingte
Ka limsakzawta ding hi.
Khasiatna dingte’ sang in lungkimna dingte.
Hinna hon pe nilouhlouhlai in
Ka kipaak nilouhlouhta ding hi.

©Siamsinna leh Vakiangbu