KA NU HONG KHEM LUANKHI

By ~ Giakmawh Sumbawi

Nu aw,,bang dia ong khemkhem mawk na hia !!

Ka neulai in bangmah theilo naupang melmol kahihlai in ka nu in a zuau ong phuak den hi,kapa khualzin ciang in ka nu in kei hong khem pahpah mawk hi,kamsiatna tawh khat vei kapa khualzinna tuahsia ahihman in damlo a cina ahihman in ko inn a omte neek ding sumleh paai ongkhak theikei hi.

Tua ciang in ann nek ding neilo in ka om zel uhhi,tuni a kanu sepsa ni taak ann a mangte kahi uhhi,khat veivei upmawhlohpi in zingsangtung pan in guah ong zu/ciin thei hi,tua hun ciang in muhtawm ne tawm zingsanga kanu sepsa ni tak ann a neete ka hihman un ka nu in ni khat nasem theilo khuahun sia cihkhawng nasep theihloh hun a neih cing in ann ka ngawlhni uh ah om zel hi.

Ann neek ding ka neihloh ciang un ka nu in ka pute kiangah ka ann nek ding va ngen zelzel hi,tua ciang in ko nuta nek khopkhop ong muthei hi,Guah ni nih ni thum cihbang ong zuk/ciin theih ciang in ka nek ding uh ong bei ciang in ka batsa un ka leitawisa uh tam ahihman in,mi kiangah ngen ngamnawnlo in antang ah om zahzah khut kuakkhat khut kuaknih cih bang khawng ka huan zel uh hi.

Ka ann huan uh tawm mahmah ahihman in ka nu tawh nee khawm le ung sikkeu nga tuak in zong ka nee kei mai ding uhhi,tua ciang in kanu in “Bawi aw,,nangman nee in ong cihciang in ka nu kiang ah “Nu aw,,nang ann duhlo maw ka cihleh kanu in kei ka gilkialnailo nangman nee in ong cih ciang in bangmah theilo naupang ka hihman in kei kia in avek in ka nee hi,ka nu in hiah zuau hong phuakpah hi.

Hunte hong pai zelzel in phalbi khuavot hun ongtung zel hi,niikten puansilh ding aki cing in nei zolo ka hihman un,phalbi hong bei ding ka ngaklah mahmah uh hi, a hi zong in phalbi khauhun ongkhenma in khua vot haksa sapipi in ka thuak den uhhi,zan ciang in khua dam mahmah ahihman in ka nu tawh ka puan neihsunsun uh zawngkhawm in ka lum um uh hi.

Puan neih sunsun zong a gol neizolo kahihman un ka nu tawh zawngkhawm leng deihbang in cing zolo in ka khe khawng votmahmah hi,tua ciang in kanu in kei avek in ongsilhsak a,ka nu kiang ah “Nu aw,,puan zawngkhawmni ka cihleh ka nu in”Bawi aw,,kei ka khuadam sekei,nangman silh in ci’n kei puan neih sunsun tawh ongtuam in nuamtak in ka ihmu thei hi,hi munah ka nu in ongkhem leuleu hi.

Gentheih zatamteng tawh hunte hongbei to zel in,Ka nau ka nu sungpan asuah ding ciang in ka nu in,ka nu in thuaklah mahmah ahihman in “nu na lua,,na ei”cih bang in ka nu kah na aw ka neu mahmah hang in ka za hi,kaau ka nu sungpan ong piankhiat khit ciang in ka nu in ka nau en in denna “nu na lua,,ne ei” a cihte mang ngialh hi leh kilawm in ka nau en in nui siausuau mawk hi.

Ka nu kiang ah “Nu aw,,nang na cina maw? a abng dia kap na hia? ka cihleh kanu in bangmah ci keng e”ong ci-in a it mahmah a sungpan apaing nauneu amuh ciang in lungdam mahmah ahihman in kanu in maitai tak in ong khem zel hi,kanu a gimnawnlo ding sa in ka nu ongkhemna ka lugn kim mahmah hi,ka nu in himunah a zuau ongphuak zel hi.

Hih ka nu ong khem zuau phuahna te ka muh ciang in kei ka nu sungpan kapian tung in kanu nuam mahmah ding hi cih ka phawk phapha hi,ka nu sungah ka om lai in ka nu in a sunga om kei ong it mahmah ahihman in a duh athuk ah al,athak alim nono te nek ngamloh a gil sunga om kei ata in kanu ong itna a gilsungpan ka thei veve hi,Ka pianna ka nu/inu te himunah zahtakna/pahtawina ka pia hi.

I nu te in gentheih zatamteng tawh ongkhan suah in lawmleh gual nei in,ki tangvalsak/ki nungaksak a,khualak khuasung khawngah ih vak ciang in inn itun ma inu lungnuam ngeivet lo hi,khua sungah zuukham aw ngaih mikiko aw inu in azak ciang in,ka tapa apa kha tam maw!! ci-in ong lung hi mawh mahmah a,inn itunma teng ihmu lo in dipkua patau mahmah in inn ah na om hi,a hi zong in i vakna pan inn itu’n ciang in inu lungmuang mahmah in ihmu hi.

Hih kong gelhna hang in ta a kici khempeuh nu neilo omlo ahihman in inute ong itna mangngilh ngei kei ni in,khangkhat pallai idam sungin anute ongkep ong khoina cikmah hun in thukkik zo ngeilo ding hi hang,inute sum leh paai hauhna neihleh lam tawh ithukkik zawhkei leh zong anuntak sung lungkimsak mahmah leng inute ong kep ongkhoina ithuhkikna lianpen hipah ding hi,kawsah puanbu na kengsakzo kei zong in anuntak sung lungkimsak peuh le ci.

Nu anei laite a ahampha mahmah hi hang,leitungah “zua aw,,ci a ka sam zong in ‘sing dang tunnu’n hal,cih itheihna tam mahmah hi. Mi gam milei ah,sim lei haksatnate lel in,lungzuan ikhuangaih ciang in,cinat lunat khat peuh ituah khak ciang in,inu mahmah ki ngaipen hi,ihnu tawh omkhawm lo pipi in,inu in ong za ding sa in,Nu aw..nu aw..ci a isap hun tam mahmah hi,tua ciang in inu in ong dawnglo ahihman in khasia lai hi hang,,”Nu aw,,tui duh ing,nu aw,,ka gilkial,,ci a i kiko ma in ,,tui na duh hia?na gil akialta hia?ong ci inu itden na ding deihna tawh sumbawi”KANU HONGKHEM LUANKHI<Nu aw,,bang dia ong khemkhem mawkna hia>cih bulphuh in nute zahtakna lianpi ka pulak hi,,ihnute ong itna amal kim in sut ding ci leng khangkhat sungin zong sut zolo ding ihihteh hi zahtawh khawlbawl photni,gentenna leh a tomkim ding in konggelh hi,ih nu in hong khemleh atate ah itman hi,mi dang in hong khemleh hong haza takpi ahihi.

*KHANKUM SAWT TAANGBANG HONG DAMPIH LAI IN ‘NU AW,,,NONG ITNA ONG THUKKIK NUAM UNG,SIMLEI AH TEHKIMPIH OMLO KA NU HONG ITNA LIANLUA*

Note-Laimal gelhkhelh genkhialhna no atawh kituaklo ah omleh na theihsiamsak unla,na zepsiamsak un…

Lungdam Zomi/Sumbawi..

©Siamsinna leh Vakiangbu