By ~ Vz Vualnam
Ka
thoh hunzel ma i ka khanglou a, ka thoh hun hita hiam chia ka sana ka
etleh dakkal khat phial in a samlai hi. Ihmut thaknawn ka sawm a,
himahleh ka ihmuthei nawn himhimkei hi. Ihmulou napi in thoukhe tuanlou
in ka lum nilouh a, tuni bangchidan ade aw ka hichih mawk chia ka
kingaihsut laitak in ka thohlong ahong ging a, ka thoukhe khong hi.
Zingtaamnem (breakfast) ka bawl a, huaizoh in bawngnawi vaal teng gas ah
ka suang a, ka kisaksan hi. Bangnawi ka duh himhimkei a, namsia ka sa
hi. Bawngnawi gentaaklouh bawng a kibawl himhim leng ka duhkei.
Bawngnawi kidawndawnna nou a tuidawn leng haksa ka sa. Himahleh tukumbul
apan in thauna-maamna a apan khaakleh chi in zaalbawl in helpih
tuamtuam, abawngnawi gim sumang thei dingte hel in ka dawnzel hi. Ka
kisakzoh in ka kuan hi.
Tuni mundang a sum va koihni ahi a,
huai ding in dak khat veel in ka kuankhia hi. Hucia police thum venna
nuai a ka inn apan kilometer sawmnih vel a gamla ding a ka omlai in ka
lungsim ah thilkhat ahong suak a, lungziinna in ka dim hi. Ka phone ka
la a, ka innvengpa, kou sepna mah a sem, a ofis bel kibanglou, ka houpih
a, 'Na lawinu inn a om hia? Aw, ahoih e, ka kongkhaak tala a
khetsiattheih leh ana khensia henla, ka gas honna sukmitsak heh,' ka chi
ekmai hi.
Meh huanlai mangngilh chihkhawngzaw adaan omtak
ahi. A kaang gim na zaak hunhun in na va delh a, mei na sumit a,
huanthak angaih leh adang na huanthak lel hi. Himahleh gas a thilsuan
sukmihlouh a taihsat khak tuh thil lungziinhuaitak ahi. Huai leng va
delh thei ding dinmun a omlouh nitak hilai.
Ka
mehbeel-buhbeelte mahmah leng hehpihhuai gawpta uhi. Suankat munluat
ziak in a san gimgem geuh uhi. Kei annhuan inn khelkhel a ahong omkhaak
uleng vangsia kisa hial ding un ka gingta hi. Kei a pu unlah duatzou
mahmahlou tel ka hih maimah chiang in.
Thil mangngilh haat
chilou in meh hiam ka huan chiang in a kiang a tutpih hiam, et
ngiitngeet bang ka peih hetkei zomah laitei hi. Ka suang a, thildang ka
hih somsom a, huchi in a kanggim ka zaak chiang in ka phawk zel hi. Hun
tamzaw ah bel kimangngilh gige samlou a, himahleh i mangngilh ngeingei
le tuh ahun a lap chih a omkei hi.
Ka lawmpa'n lah 'ka na
huchih, ka na khachih' chih bangmah hon hilhkiiklou ahihchiang in bang
achimah de aw chi in ka lung a nuamkei den hi. Ka beel peuh ana tuise
gai di a. Ah, gas le kumkim tak kizang hita, tam le tam nawnke'n chin,
sawt a kuan ma'n ana beimai na ve, peuh chi in ka kilungmuan hi. Ka
paikiiklam in ka lawmte khat kiang ah, 'Na bike hon tawi inla, ofis ah
honna ngak in,' ka chi a, ahonna ngak ngei hi. Daak nga a gingta hi.
Tung phet ka lawmte kiah, 'ka na pai di, thil teng hon hihfel unla, hong
pai un,' chi in ka lawmpa toh innlam ka delh uhi.
Atuu
phingphing a va delh le phattuamna omlai ding leng ahi diam ah. Ahi
dingding lah ana hikhin ve'n chin. Inn ka tun in chabi ana kikhai geigoi
lai a, 'eh, lawmte'n bangmah ana lohlou uh eive,' chi'n kintak in ka
hong a, ka delhphei leh ana mit deeldeel, 'ana kuangbei eive. Ahoih
ahimai ve chia ka naihphei leh ana kisumit ana hi a, ka hahuai hi. Ka
innvengnu kiang ah ka va hoh a, nana sumit na hi umaw, kipahhuailua
chi'n vaipau siamngellou in va pau bualbual hi. 'Sandeep (apasal) hong
pai a, ahong sukmit hi,' ahon chi hi. Ka inn chabi khat uh ana keemkha
laizang ua, kizentak ahi. Ofis a abuaibuai di toh honna delhsak tenten
bang kipah anaak omlua hi. Huai ka lawmpa tuh tuma a ka kawlzal ka khelh
phallouhpa ahi. Nihvei-thumvei ahon kheelta a, en mantawm hetlou a i
lei, i dop mahmah, aman dawm hia dawmlou chihle theihlouh, chi'n atawp
in zaw ka na phal nawnkei khong hi.
Thilpiak tuamtuam ka na
tangkha sam a, mite a tuk a tam hikei mahleh, huailak ah adeihhuai leng a
om a, adeihhuai hetlou leng a om hi. Deihhuailou ka sak mahmahte lak a
khat tuh haihotna ahi. Thilpiak ka tante lak a ka tamtanpen ahizomah lai
hi. Bangteng hileh Issac Newton-te bangleng aktui huan dia kisa a sana
huan a aktui atawi leulaulai a nasemnu'n a va tuak hi. John de la
Fontaine kichi French tangthu gelhsiam pa houh a lawmpa sisa veh ding in
va hoh a, alawmpa sita ahihdan ana hilh uleh lamdang sa a, ahihhang in a
dendeuh chiang in, 'Eimah ve, ka va gaal nguut ve,' chi in kiik hi. G K
Chesterton bang houh a innvengte inn a cork honna khel a hoh, inn a
kiiknawn a akong tala hong thei mahmahlou. Aihleh a chabipen a khut
langkhatlam a tawi a, a cork honna a akongkhak hon sawm nilouh an ahi.
Khat vei ngial, kisilna kuak (tub) a akidiah toh kiton in, 'Ah, denzek a
kisil khin ka hi vo oi,' achihlam a zii in ana za hi.
Adang
leng tampi om mahleh, hiai teng in leng keikia hilou na ka hi chih chian
ahihman in lungmuan khat in ka lungmuang veve hi.
©Siamsinna leh Vakiangbu
Comments
Post a Comment